Prezidentimiz Shavkat Mirziyoyevning shu yil 9-10-oktabr kunlari Dushanbe shahrida bo‘lib o‘tgan "Markaziy Osiyo — Rossiya" formatidagi ikkinchi sammit hamda MDH Davlat rahbarlari kengashining yig‘ilishida ishtirok etishi O‘zbekistonning yaxshi qo‘shnichilik, ochiq va o‘zaro manfaatli hamkorlik tamoyillariga sodiqligini yaqqol tasdiqladi.

Davlatimiz rahbari tomonidan ilgari surilgan tashabbuslar Markaziy Osiyo va Rossiya o‘rtasidagi ko‘p qirrali aloqalarni yangi bosqichga olib chiqish, hamkorlikni izchil institutsionallashtirish, uni zamonaviy talablarga javob beradigan formatga olib kelishga qaratilgani bilan diqqatga sazovor.

Har bir davlatning taraqqiyotida tarixiy burilish nuqtalari bo‘ladi. Prezidentimiz nutqi, shubhasiz, ana shunday burilish nuqtalari qatoriga kiradi. U nafaqat O‘zbekistonning mintaqadagi strategik qarashlarini, balki butun Yevroosiyo makonidagi mustahkam hamkorlikni shakllantirishga qaratilgan ulkan geosiyosiy konsepsiyani namoyon etdi.