نعي
بحق السيده الزهراء ع
الشيخ عبد الحي ال قمر

كلمات الشاعر رعد الجريخي

ابوذيه

لـذات الــنـبــي راعـوا لاذت  اُمنه
عصابه وموش صحبه لاذت  اُمنه
ابـهـجـوم الــدار گــوه لاذت  اُمنه

وره الباب وكسر ضلـع الـزچـيـه

                 *----------------------*-------------------*

✍خادم الزهراء ع
الشاعر رعد الجريخي

ابوذيه حال العقيله زينب ع
بعد فقد الزهراء  ع


بـحـطـب وابنـار هالـظـالـم  بلاهه
اهروش الـگـلب فـگـدِ امـي  بلاهه
اشـوف البـيـت ضـل خـالي  بلاهه

وبَعـد مدري الزمان اشظـام ألـيـه

              *-----------------------*-----------------*

✍خادم الزهراء  ع
الشاعر رعد الجريخي

مأجور يا حيدر علي

الليله راحت فاطمه   مأجور ياحيدر علي
والضلع ينزف بالدمه   ماجور ياحيدر علي
اصبـر بهـل خـاتـمـه   مأجور ياحيدر علي
تبقى حماي الحـمـه   مأجور ياحيدر علي

اصبر اصبر يالولي

*---------------------*------------------*


ندري گلبك كسرته  مأجور ياحيدر علي
جفنك ايهل دمعته  مأجور ياحيدر علي
باب حزنك فتحِته  مأجور ياحيدر علي
بالشدد انته الفتـه   مأجور  ياحيدر علي

ألليله گلبك يغتلي

*---------------------*-----------------*

يصعب اعليك الجره  مأجور ياحيدر علي
شفت عين الطاهـره  مأجور ياحيدر علي
ومنهه تطلب معذره  مأجور ياحيدر علي
راحت السيد الـوره   مأجور ياحيدر علي

الحزن ماضن ينجلي

*---------------------*----------------*

بغربه مابين الـملـه  مأجور ياحيدر علي
بس مدامـع هاملّـه  مأجور ياحيدر علي
وانته بـأء البسملـه  مأجور ياحيدر علي
فاگد زچيه وفاضله  مأجور ياحيدر علي

الذنب شنهي وتنولي

*----------------------*------------------*

هالحزن كلنه انجدده   مأجور ياحيدر علي
للموت صرخه خالده  مأجور ياحيدر علي
تسمعهه ناس الحاقده  مأجور ياحيدر علي
بالزهره امصابك بده  مأجور ياحيدر علي

هالصوت لازم يعتلي

*------------------------*------------------*

✍خادم الزهراء ع
الشاعر رعد الجريخي

((ابوذيه))
ساعد الله قلبك مولاي يا علي


رجـع وابـنـار گـلـبـه شاب .. ابونه
ويـوم الـودع اُمـنـه شاب ..  ابونه
اليسـأل عـن ابـونـه شاب ..  ابونه

كـبـر ونـحـنـه ابتغسيل الـزچـيـه

*--------------------*-------------------*

✍خادم الزهراء ع
الشاعر رعد الجريخي

((راحت امي))

.         مـا بــقـــه عــنــدي أمــان
          وادري يـجرحنـي الـزمـان

        راحـت امـي      راحـت امـي

                                  *---------------*---------------*

راحـت وبــيّــن عـلـيّــه الـخــوف والـهَـم
وابـتـدت رحـلـت عـذابـي وحزنـي خـيّـم
طبعت ابعيني صـورهـه الـعـصـره والـدم
تجـري دمـعاتـي واگولن بـلـگـت احـلــم

          صــــارت الــدنــيــا ظـلام    
          تــركــت ابــروحـي هـيـام

                                  *---------------*---------------*

ادخـل الحـجـره ورسمهه لـبـالــي يـرجـع
مـا اشــوف الـزهـره بيهه ابـدمـعـه اطلـع
بصغري فـارگت الوديـعـه وصـعـبـه اقـنـع
كلمة  الـيُـمـه أشـيـردهـه ومـنـهـه اسـمـع

          يُـــمـــه اتـــمــنـــه أگـــول
          مــاتـت ابـمـوت الـبــتــول

                                  *---------------*---------------*

ابــحـلــم اتــمــر ثــوانــي يـمـتــه وتـــرد
ما حسبت حـساب امـي بـلـحـظـه تبـعـد
يـجرح الـلـيـل وظـلامـه الـوحـدي اگـعـد
يـاهـو الـيـعـطـف عـلـيّـه و ياهـو يـنـشـد

          عـاشـت بـگلـبـي الـجـروح
          فـجـئـه خـلـتـنـي واتـروح

                                  *---------------*---------------*

بجرحي عـافتني الـزچـيـه وعيني تهمـل
ويـن اشوفـنهـه واگـلهـه الـفـرگـه تـكـتل
والله ما عيش ابـجـفـاهـه واگـدر احـمـل
غـابـت الـچـانـت تـلـمـنـه وخيـمـه للـكـل

          احـسـب احـسـاب البعـيـد
          والـحــزن بــيّـــه يـــِزيـــد

                                  *---------------*---------------*

عـاشـرت صـوت المناحـه ودمـعـه الـخـد
ذكـره خـلـتـلـي الزچـيـه الـثـوب الاسـود
اصــبــر اشـلـون وألـمـهـه عــابـــر الـحَــد
جـمـرة احـزانـي وعـذابـي صـعـبـه تـبـرد

          شـيّـب اجفوني الـحـنـيـن
          مـظـلـم الــبـيـت وحـزيّـن

                                  *---------------*---------------*

بـزهـرة اسـنـيـنـي وعـگـبـهـه گلبي شيّب
احــلــم اتــنــاديـنـي مـــره يُــمــه زيـنـب
لـشـوكـت ابـقـه ابحسرتي ونـاري تـلـهـب
الــتــروح اُمّــــه يـــوادم حــقــه يـنـحـب

          خـلـصـت ايــامـي عــذاب
          احـمـل اشـلـون الـمـصـاب

                                  *---------------*---------------*

✍خادم الزهراء ع
الشاعر رعد الجريخي

(يا يُمه)

يـابـيـت الـيـلـمـنـه بـعـد   يـايـمـه
تـجـري الـمـدامـع للأبـد    يـايـمـه

اسـتـعـجـل الـمـوت ويـاچ  
طـول الـعـمـر مـا نـنـسـاچ

*-----------------------*--------------------*

يجينه الليل واحنـه بـحـسـره وبـدمـعـه
حـلـم يـرجـع ييمـه وصـوتـچ انـسـمـعـه
نـطـب لـلـبـيـت وبـدونـچ بـلا شـمـعــه
نـحـن حـن الـثـكـالـه ونـذكـر الـجَـمـعـه

نـتـنـطـر ومـات الأمـل    بغيابج
والدمعه جرحت للمقل    بغيابج
هـذا الـزمـن مـاخـلاچ

*------------------------*-----------------*

خـليتـي اعـلـه حـياطـن الـغـرف ذكـره
وبـغـيـابـچ تـضـل بـكـل گـلـب كـسـره
مـثـل حـال الطيور التـفـگـد الـشـجـره
بس الـثـوب عـدنـه ونـشـتـم بـعـطـره

بينه الـمـدامـع والحزن     خليتي
والدنيه تـشبـه للسجن     خليتي
نـتـذكـر اسنيـن اربـاچ

*--------------------*-----------------*

التروح امـه يحس بـوحـشـت الـغـربـه
وأشـد كـلـشـي يزهره الينكسـر كـلـبـه
اليالي اتـمـر عـلـيـنـه بـلـيـتـم صـعـبـه
تـضـل عـينـه اليـفـارك لـلـفـجـر تـربـه

حگه ألتسّولف حسرته     بعيونه
والشافه يقـره القصته     بعيونه
اسمچ يـمـرنـه وننعاچ

*----------------------*------------------*

صـعب هذا الجرح ما نـگـدر انـكـتـمه
ولو ابـطيـف مـري وعـطـرچ انـشـمـه
تره المكطوع نـفسـه ايـكيـف بنـسمـه
صعب هيهات نـسـمـع مـنـچ ابـكـلـمـه

عاشرنه بغيابچ سهر     منعوفه
والاسود بطول الدهر   منعوفه
نحيه ونموت بذكراچ

*----------------------*-----------------*

ردنـه ويـاچ يالـبعـضـه الـعـمـر كـلـه
تعوفينه بـعَـجـل بالحسره مو سهلـه
بعد يابـيـت هـذا بـروحـتـچ يـحـلـه
تره الفاگـد عـزيـزه الـدمـعـه تـنـدلـه

مرسومه ضلت صورتچ    يالزهره
كسرتنه صـعـبـه بغيبتچ     يالزهره
هنيالـه مـره الـشـافـاچ

*-------------------------*---------------------*

✍خادم الزهراء ع
الشاعر رعد الجريخي

يا زهراء

عـهـد لٱم الـحـسـن مـا تـبـرد احـزانـي
بـكـل مجلس يـردد گـلـبـي والـسـانـي

                   *---------------*---------------*

كـل عـام الـيـمـرنـي هالـحـزن يـكـبـر
وانوح الـفاطـمـه مـن اسـمـع الـمـنـبـر
يـهـل دمـعـي وأبـد مـا اگـدر اتـصـبّـر

ضلعـهـه الـمـنـكـسـر بـالنـوح خـلانـي

                   *---------------*---------------*

حزنهه الـحـد مـماتـي بالـگلـب يـسـري
قـلـيـلـه لـلـزچـيـه اشـمـا دمـع يـجـري
مالـومـه ألـيلـوم ابـجـرحـي مـا يـدري

ليـالـي الـفـاطمـيه بحسرتي امـتـانـي

                   *---------------*---------------*

احـچـيهـه وأخَـلّـي الـمـاسـمـع يـسـمـع
كـون العيـن عـمـيـه الـمـارضـت تـدمـع
احـس بـيّـه الألـم والــنـوح يـتـجـمّــع

لـلـبـضـعـه يـضـل مـجـروح وجـدانـي

                   *---------------*---------------*

يــا بـاب الأشـوفــه وأذكـر الـعـصـره
ولـعـن مـن دفـعـهـه وعَـذّب الـزهـره
ما انسـه الضـلـع لـلـطـاهـره وكـسـره

والــعـنـهــم ســويّــه الأول وثـانــي

                   *---------------*---------------*

اجـامـل لـيـش اجـامـل لـلـيـعـاديـهـه
هايه الصحبه هايـه وهذا مـاضـيـهـه
مـنـهـم فـاطـمــه راحـت اثـــر بـيـهـه

شمتانـي بـعـد ما احـچـي شمتانـي

                   *---------------*---------------*

✍خادم الزهراء (ع)
الشاعر رعد الجريخي

ابوذيات


            بـكـيـفــك يـالـتـلــوم اتــريــد.. لمنه
            عـلـى الحسـرات تـالـي البيت.. لمنه
            نـنـوح بـكـل مـسـه يـا نـــاس.. لمنه

            يـتـامـه ونـنـتـظـر طـيـف الــزچـيـه

                   *---------------*---------------*

            مشيتي وصار مثل السجن.. هالبيت
            مـاگـلـتـي بـغيـابي اتـمـوت.. هـالبـت
            مــجــبــوره انـــام الـلــيــل.. هـلـبـت

بـحـلـم يـم الـحسـن نـگـعـد ســويــه

                   *---------------*---------------*

✍خـادم الـزهـراء ع
الشاعر رعد الجريخي

نعي مفجع
للزهراء ع


أفـزّ بـالــيــل واتـــذكــر
               امـي الـحلـوه گـعـدتـهـه

وياخذني الدمع والشوگ
              ويوديني اعله حجـرتـهـه

اصـبّـر روحـي بـالـگـوه
              واشم ريـحـت عبايتـهـه

واتـمـنـه الـزمـن يـنـعـاد
              واسمـع مـره چـلـمـتـهـه

صوور بعيوني لـلـزهـره
               مشت والصوور خلتـهـه

اوّل وحــده بـالـعــتـبـه
               البيهه ابـتـدت قصـتـهـه

وثانـيـهـه تـشيـب الراس
               يـوم الشفت عـصـرتـهـه

أمـي اشـجـنـت مـا ادري
              ليش الـگـوم ظـلـمـتـهـه

وليش ايطيح محسنهـه
               وليش الدمعه سالـتـهـه

بضعة سـيـد الـكـونـيـن
            اشلون انسه مـصـيبتـهـه

*--------------------------*------------------*

✍خادم الزهراء (ع)
الشاعر رعد الجريخي

موشح

الـلـه يـلـعـن كـل زنـيـم ونـاصـبـي
الجاب نيرانه واجـه البنت الـنـبـي

*------------------------*--------------------*

الـلـه يـلـعـنـهـم لـعـن عـاد وثـمـود
عـبـرو ابـحـقـادهـم كــل الـحـدود
خانـوا الهادي ابـغـيـابـه والـعـهـود

صاح شيطـان العـصـابـه اتـعـذّبـي

*-------------------------*------------------*

اقصد اصحاب السقيفه بـهـل أمـر
ادمـوع فاطـم مـن تـئـآمرهم حمـر
اثمنطعش ونـبـاگـت اسنين العمـر

والخبـيث ايـگـلـهـه اخـذ مـطـلـبـي

*----------------------*---------------------*

راحـت ام حـسـيـن بـلـهَـم وألألـم
حتى مـحسـنـهـه جنين وما سـلـم
اشحال حيـدر بالوديعـه مـن عِلـم

طاح محسنهه ورفـسـهـه الاجـنبـي

*---------------------*-------------------*

اشگد ابو الحملات من يمهم حمـل
شيّبو راس الـوصـي خـيـر الـعـمـل
يـوم مـاتـت فـاطـمـه مـات الأمـل

اشلون گلبه بهل مصاب الـطـالبـي

*-----------------------*---------------------*

حـرگـوا الـبـاب الـطـهـر وبلا سـبـب
وأن صاح افلان مـجـهـول الـنـسـب
ماحسـب قـدر الـزچـيـه مـا حـسـب

شـرّع ابـفـعـالــه لـلـدم والـســبــي

*-----------------------*------------------*

امنل سقيفه الـكـربـلـه الـعـاده جـرت
الـبيـهـه اصحـاب الـضلالـه اجـاسـرت
هـيـه نـفـس الـنـار بالـخـيـمـه سـرت

وبالطفوف اهـنـاك وصـلـت لـلـعـبـي

*-----------------------*------------------*


✍خادم الزهراء (ع)
الشاعر رعد الجريخي

(يافاطمة)

.      عــالــم خــدمـتـچ عــالـمــي
       وابـقـه بــعزائـي الـفـاطـمــي
        
       عـهـد  عـهـد  يــافــاطـــمـــة

                   *---------------*---------------*

فـاطـمـة ذاب بـمـحـبـتـچ كـلـشـي بيه
واحـمـد الله بـهـالعـقـيـده الـفـاطـمـيـه
شـايـل اوسـام الـخـدم اشـرف هـويــه
بـعـالـم احـسـاسـي أهتفت آه يالزچيـه

     عــاجـز اســولــف بالـشـكـر
     فـضـلـچ عـلــي مــايــنــكــر

                    *---------------*---------------*

شــاكــر الـنـعـمـه وأضـل دايـم ولائــي
وألـعـن الجاب الحطب وارفـع دعـائـي
رافـضـي ويعني الرفض انصب عـزائي
خـل يـگـولـون البـعـض ياللطم مـرائي

      مـاعـرفـوا بـحـزنـي وحچوا
      مـالـحـظـه بـالـنـار انـچــووا

                    *---------------*---------------*

عـمـري دمـعـه بمجلس احزانچ جريته
أنــه هـذا الـخـدمـتـچ صـارت هـويـتـه
تـيـهـت دربـي وعـلـى اعـتـابـچ لگـيتـه
خـادم وأشـعـر ملك ومـعـلـيـه صـيـتـه

      هـــذا الـنـهـج والـمــعــتــقــد
      مــا هــمــن الـعــاده وحــقــد

                    *---------------*---------------*

عـالـم ايـحـيـر الـعقل عـالـم خـدمـتـچ
مـايـعـرفـه اللي حچـه وشك بعصرتچ
دمـعـه دمـعـه جفني واسـاچ بـدمعتچ
وعـرفـت مـعـنـى الـعـزه لمن عـرفـتـچ

      أذكــــــر الـــصـــار وجــــــره
      بــاب وضــلــوع امــكــســره

                    *---------------*---------------*

حـنـت الـثـكـلـه الـچ ابـقــه بـحـنـيـنـي
هـذا طـبـعـي وعـالدمع متعلمه عـيـنـي
أمــنــت دك الـصــدر ديــنـي ويـقـيـنـي
وانـتـي فـاطـم حـاشـه والله اتخيبيني

      يـالـزهـره ارجــو بـخـدمـتـي
      لـجـلـچ امـوت بـحــســرتــي

                    *---------------*---------------*

دفعت الباب أشـأسولف وحجي عنـهـه
تجرح احساسي وشعوري وبيه چنـهـه
ويـشـهـد الـبـاري بـقـت خـالـد حـزنـهـه
دمعتي تجري بـحـزن واعـرف ثـمـنـهـه

      غـصـبـاً عـلـيــه الــمــارضـــه
      أبـچـي وأعــزي الـمــرتـضــى

                    *---------------*---------------*

   ✍خادم الزهراء ع
الشاعر رعد الجريخي

نعي مفجع
(بحق الزهراء)


يـابـو النعش بـهـداي بـهـداي

بنعش الحنينه ريض اشواي

امـي الـزچـيـه ونـور عـينـاي

اشلون اعيش ومامش اوياي

تـجـري الدموع وتـايـه الراي

انـظـر نعشهه ويكثـر ابـچـاي

باچر عگبهه امصايب اهواي

ابهظمي اضـل وضيم بلواي

هـاي العزيزه الـغـربـت هـاي

سـر الـحـيـات التشبه الـمـاي

*----------------------*------------------*

✍خادم الزهراء  ع
الشاعر رعد الجريخي

https://youtu.be/gp7JluzTIQ4?si=ERblrkHg9uaUKH7R&sfnsn=mo

يهل الغيره

اداء ملا قاسم الحاج عاتي

كلمات رعد الجريخي

وياج ياأم الحسن ||سجاد الساري || مؤسسة السبط المجتبى (ع)- البصرة جامع ال...
https://youtube.com/watch?v=cmkMkwJy4XU&feature=shared

ابوذيات للزهراء  ((ع))لسان حال اولاد الزهراء (ع)


الفـرح يا ناس وســفـه ..  ماتم انــه
و وي مـــوت العــزيـزه ..  مات امنه 
يــظــــل لـلـدوم دايـــم .. مأتم انــه

على الچـانـت تلمنه بكل مـــســيـه

               *-------------------*-------------------*

يـــــم الـوالـده ويـفـيـض .. يــمــهـــا
وعگبها الروح گام الحـزن .. يــمــهـــا
انه اتمنيت اخلص العمـر  ..  يــمــهـــا

عزيزه وراحــــت وبــعـدت عـلـيـــه

               *-------------------*-------------------*

✍ خادم الزهراء ع
      الشاعر رعد الجريخي