قصيدة بحق العليلة

لا تخلوني وحــــيدة ياهلي
فدوة وي الظعن شدوا محملي
-----------------------------------------------
على فراش المرض خلوني ومشوا
ابچي عليهم وصيحن ما دروا
وحيدة خلوني بظعنهم غربوا
مشوا لاطارش المنهم رد الي
=========================
ليش يابوية تخليني وتروح
وتدري ما احمل بعُد مابية روح
اخذ روحي وياك ماتحمل جروح
لن يكَلي للــــوداع اتعــــجلي
======================
مثل خيمة الولي يفيي لعيلتة
وتحتمي بيه وتعيش بهيبتة
كَصة حيل وياي دهري بعملتة
بحزن خلاني ابد ما ينجلي
=====================
كبل چانت داري تزهي بالاهل
وي ابوي العمر يكَظي عندي امل
فركَانة الدهر ياوسفة بعجل
وموحش ومظلم خلافة منزلي
--------------------------------------------
روحي وياهم لمن ساروا مشت
من زغر روحي بفركتة اتلوعت
للعراكَ اخذوني وياكم صحت
نار فركَانة يگلــــي تحملي
=====================
طولت غيبتهم ومارد خبر
محيرة ظليت مشغولة الفكر
واكَفة عالباب لن فارس يمر
هاك اخذ مني رسالة للولي
=====================
اصد للدار ودمعتي سايلة
مشوا عنة احبابنة لطف كربلة
شما يطول غيبابهم اتحملة
متانية يردون خواني وهلي
==================
أسألكم الدعاء رائد الاسدي

قصيدة محاورة بين العليلة وام البنين عليهما السلام


علة وهجر ليل ودمع ياجدتي
يم البنين مصيبتچ ومصيبتي
بس الدمع والونة ياجدتي ظل النة
-----------------------------------------------
من سافر ارجع صيحت يا بوية ارحم حالي
لاچمني كَلبي بسفرتك گلبي انخمش يالوالي
تارسها عـيني مدمعي چم حسبة بوية ابالي
هذا انة حالي من مشوا رخصتة دمعي الغالي
ايكَصر العمر ياجدة لو طال البُعد
مُرة الحياة اخلافة خافــــن ما يرد
نياحة وبواچي وحَنّة ياجدتي ظل النة
------------------------------------------------
يا فاطـمة مر الصبر بس بعـدة كَالوا تفــرج
صبري يجدة وننتظر ظعـن النحـبهم عرج
دلالي بالفركَة انچوة لساني بذكـرهم يلهج
اذن بكَلبي للحزن وهموم اجت من كل فج
يافاطمة وياه اخذ روحي ومــــشة
متروسة ناس ايامي لكن موحشة
ذكــــــرى ادور مــــنة ياجدتي ظل النة
------------------------------------------------
اعمي دليلي من الحزن بعيــــــــني فلا ظل مدمع
ابيضت ويبست وانعمت يمتة بقــمـــيصة يرجع
عينيـني يالكلچ وفة ومدري البواچي شتنفع
وردة وذبل عودي ومتت من عروكَة كَلبي تشلع
ماخيط جروحي بزغ خيط الفجر
باچر يجــــــوني اقنع كَليــــــبي بعذر
لا ما كَطعت الظنة ياجدتي ظل النة
-----------------------------------------------
الفاكَد عزيز اعلى الكَلب ايروح الضوة البالناظر
ليلية عشرة ويالسـهر شيجبرلة كسرت خاطر
خافن عزيـزچ ما يرد ولا خـبر ندري شصاير
يعينة الله من فاركَ ابو ايتيه طريــــــجة وحــاير
وني واون انواصــل الليل بصبح
راح العزيز وبالكَلب تارك جــــــرح
الغالي انشدچ عنة يا جدتي ظل النة
------------------------------------------------
غاب الكَمر يَمّ الكَمر هجر الغــــوالي شخلة
هم مثلي دارچ موحشة جدة البُعد شيــــــحملة
يــــم البنــين وحالــتـچ للعــــــلة حطت علة
بكَلبچ فتح بابة الحزن بيتچ مشت كل اهلة
ما نامت عيونچ ذبل منها الجفن
الله اليعينچ هالــــــكثر عدچ حزن
يكتلني كَلبچ حزنة ياجدتي ظل النة
------------------------------------------------
ياجدة باچــر من يــــرد ننــسة الحزن والفركَة
كَعدتنة ما تنمل ســــوة ايصير شحلاتة الملكَة
ظمي ابعيونچ دمعتچ خافن دلــــــيلة انحركَة
خلــيني وياچ انتــظر هلــــبت الباب ايـدكَة
راح النظر من النظر صــــوب الدرب
انتاني العزيز وهلبت بغفلة ويطب
يومية ليچ اتعنة يا جدتي ظل النة
===================
أسالكم الدعاء رائد الاسدي

قصيدة بحق العليلة... وداع العليلة مع اختها رقية


ياليل طول بالوداع ابهالمســــــــية
ياليل عنـــــي تروح ما تصبح رقية
مصيبتنا مصيبة العليلة و الغريبة
---------------------------------------------------
ياليل احلفك تـنتظر طول وصبحك لايطر ما تسمع الـويد
ما يطبكَ لعيني جفن اسمع رقية من تـــون حسراتي اتزيد
تحظني حظنة فاكَدة وانه عليلة امـددة وتسافر اتريـد
عذبني يالــيل الدمع ارحم دليلي المنفــجع مايقبل ايهـيــد
حسرات اكظي اللــيل ما يكطع ونيني
حسراﺕ خاف تروح عني وما تجيني
ايا كَلبي ونحيبة العليلة و الغريبة
------------------------------------------------------
طول يالـــيل النايــــــــبة كَلبي وكَلبها صايبة اختي العلــــيلة
مدري شجاني ابهالمــسه عيني ابد ما ناعسه طولي يلــــيلة
باچر نويت اعلى الســفر ثوبي اخليـــــلچ اثر لو اخلي شيلة
يا فاطــــــــمة راح ابتعد عنچ اروح وما ارد بسفرة طـويلة
ارجوچ كافي النوح بطلي لا تونـــين
ارجوچ عدنة وداع خلي الونة بعدين
قصتنا عجيبة العليلة والغريبة
------------------------------------------------
محد يكَلي اتحــظري رحموها كسرت خاطري يهلي يطيــبـين
يرقية كَلي لـوالــــدي ليش انه اظل لوحــــــدي وانتي ترحلـين
كَليله لو شفــــتيه اجه ماظنه يرفظــــــلچ رجه بيه ترحــــمين
ما راح اكلفة بسفرتي ولا تعب ابـــوي بعلتـي يختي تشوفـين
وياچ عمري ايام ينعد مو بالسنــــــــين
وياچ بس لحظات عن عيني تغيبين
الدمعة سچيبة العليلة والغريبة
------------------------------------------------
بطلي العتب يافاطـمة سفرتنة صعبة ومؤلمة كل خوفي عليچ
ظلي يخيتي بمــنزلچ وانه اذكرهـم هــــــلچ اواحد يــرد ليچ
عمچ اودي لـو علـي كَلچ ابــوي اتحملــــي يفاطمة أيـجــيچ
تدرين ابونا لو وعـد لازم يوديــلچ احــــــد وهناك اتانــــيچ
اهناك احظرلچ مچان وصبري چم يوم
اهناك شملي وياچ يلتم ظــــمي الهدوم
المدة قريبة العليلة والغريبة
------------------------------------------------
عني ركبكم لو رحل معناها وافاني الاجل ما اتــــاني جـــيتة
انتم ظعنـــكم يـــبتعد ما اصبر وعمي يرد يــــــلكَاني مـــيتة
عله اوحيدة ابمنزلي لمن تودولي علــــي مايلكَة اخــــــــيتة
يرقية اموت لوحدي ماظن يردلي والدي واغفة اعلى اديتة
هيهات اصبر وانتظر لمن تعــــودون
هيهات تبقى الروح لو عنــي ترحلون
كلمن يانصيبة العليلة والغريبة
------------------------------------------------
صعبة وشديدة علـتچ ياخيتي ارحــــمي حالتچ خافن تموتــــــين
امر الله لازم نقبــــلة باچر تســـــير القافـلة وانتي تظلـين
ذكريني وانه اذكرچ ما انسة كـسرت خاطرچ كل ذاك الونــين
ابريها ذمة خيتـچ وانتـي برية ذمتـــچ كل احنة ماشين
لبعيد راح انروح يخــتي لرض العراكَ
لبعيد ممـشانه ويطــــول وياچ الــفراكَ
هالحالة رهيبة العليلة والغريبة
=========================

أسالكم الدعاء رائد الاسدي

قصيدة بحق فاطمة العليلة عليها السلام


يا بوية والموت الخذاكم ذبيت ماي اشگد وراكم
ماي البالعيون هلبت تردون
ذبيت ماي اشگد وراكم
==================
لجل السلامة حظرت ماعون للماي
ومتروس بموادع هلي بدموع عيناي
وحطيت روحي ويالدمع اوناتي بهداي
وبديتهن فوكَ الدرب واتنطر الجاي
علة وهجر زايد عذابي بنوح وحزن يجرح عتابي
اترجة الضعون هلبت تردون
ذبيت ماي اشگد وراكم
====================
انتم تلمون الظعن وانة اجمع الروح
وشديها بطرف الظعن وياكم تروح
چني اشوفن كربلة جدامي اتلوح
نار ابمخيم شاهدت دم بيها مسفوح
گلبي انخمش وانشده بالي تمشون وانة شلون حالي
چا موش تبطون هلبت تردون
=====================
كلما تنگلون الجدم يطلع اثر موت
صيحت يا بوية الحذر ما تسمع الصوت
اركض واصيحن ياهلي ردوا للبيوت
بعيني اشوف القافلة تشبه التابوت
يالرحتوا ريضولي اگلكم الموت يفتر فوكَ منكم
شو ما تسمعون هلبت تردون
======================
رديت مكسورة گلب للدار رديت
هلبت اشاهدلك اثر موجود بالبيت
يا بوية اشوفك كل كتر لا وين صديت
اتوسد بحضنك بعد اشگد تمنيت
هم ترجع النة ذيچ الايام بحظنك تحطها بتك تنام
كتلتني الظنون هلبت تردون
======================
كل لحضة يحبابي التمر احسبها بسنين
تچويني نيران الهجر وانتم بعيدين
اصبر وتانيهم هلي ماضني ناسين
الهم عليلة تنتضر اهلي الحنين
يا يوم بوية لبيتك تعود بس لا يضل البيت مسدود
ما ضن تذكرون هلبت تردون
========================
اتدور ابخيالي والفكر كل ذكرى وياك
هيهات يلهيني المرض يالغالي وانساك
يهيج حنين البالگلب يا بوية طرواك
لو تنفدي النفس بنفس بالروح لفداك
يا اعز من روحي وحياتي ابهجرك عفت كل امنياتي
انساكم شلون هلبت تردون
======================
أسالكم الدعاء رائد الاسدي

قصيدة بحق فاطمة العليلة عليها السلام


*****
روحي لاحباب الجفوني يا مراسيل الهـــــــــجر
مــــن بعــــــدهم ظيعــــوني واندفنت امن الزغر
وجــــــوهم مالت منية من مشوا للغاظرية
--------------------------------------------------
شكتب وانه اعله كلي بس جرح ينزف احاسيس ومشاعر
انتظر وايدي اعله خدي هم يجي يوم ويرد طير اليهاجر
وردة ذبلانة اتركوني وانكسر عودي وبعد مكسورة خاطر
بالمراسيل ابعث لكم كَلب متروس بحزن يعمي النواظر
كَلبي اشـــــــــدنه بكتابي وآنه محـــــــزونة نفس
ابقه مزروعة اعله بابي واكَعد ابحــر الشمس
ما كسر عالروح فيية من مشوا للغاظرية
-------------------------------------------------------
ياهلي بساعة سفركم روحي خذتوها ودفنتوا امنياتي
بوية احس الموت اجاني من جفيتوا ومن مشن عني خواتي
احــــلى ايام العـــــــــشتها راحت ولهنا احس وكَفت حياتي
منهد الله وياك بــــــوية مرورة الموت اشعر لهسه بلهاتي
روحي تبعتكم عليلة واغركَ بــجاري الدمع
انحب ابونة ثجــــــيلة وني بالطف ينــــــسمع
خلفوا نــــيران بية من مشوا للغاظرية
----------------------------------------------------
حتى ليلي انباكَ مني كَامت عيوني تحب سهر الليالي
ملت الحيطان وني من بعدكم حالي ظل يبچي اعله حالي
ذكرياتي وياك حلوة وياها اعيشن وابقه مسجونة خيالي
مات كل احساس بيه وعاشت احزاني بعد فكَدك يغالي
اعله الحياطين ارسملكم صور وانسولف سوة
انتــــبه واحلامي عـــــــنكم طارت ابعالي الهـــوة
فاركَوني وهاي هية من مشوا للغاظرية
------------------------------------------------------
ابعث عتاب واعاتب للجفوا عني ومشوا اهل المحنة
ماي وتبدة اعله رمضه هيچ طشرنه الدهر ياهو اليلمنة
ما ترد ذيچ الليالي چنة وين اوين هسة اليوم صرنة
نار مستعرة بدليلي ماتردلي ارجوك يالملكَاك جنة
لو نظر يعكَوب حزني ما يعد حزنه حزن
انه راحت كلها مــــــني هوة فاكَد بس ابن
لاخبر لا من وصية من مشوا للغاظرية
----------------------------------------------------
خِلّ اليـــــــفاركَ خلـــــــــيلة تيبس شفافة وفلا ترويها بسمة
هذا حالي اكتب الكم جرحي كل نسمه هوة منكم تلچمة
ماتطيب جروحي بوية كل اثر باقي الك اكَعد واشمة
يا عذاب الشافه كَلـــــبي شفت نجمات الظهر نجمة اعله نجمة
دهري ماهمه مصابي مدري يطلبـــــــني بـطلب
يســـــــــتلذ كَام بعذابي فوكَ ناري ايذب حطب
طالت الغـــــيبة علية من مـــــــــشوا للغاضرية
-----------------------------------------------------
صوتي من انشد يردلي والصدى يجرحني من ايردلي صوتي
اغفه ويفززني جرحي ويه كل شهكَة حزن اتمنه موتي
اذكر بمرسالي واكتب بوية من كتلي يجونچ يلّة فوتي
ابحرت عني السفينة لا رجع عمي ولا رجعولي خوتي
بعد ما يحـــمل دليلي كافي يا مرسالي روح
ابهالكلام ايبيد حيلي وانه اتنفــــــــــس جروح
كَلبي دوم ايحن لبية من مشــــــوا للغاضرية
*****
أسالكم الدعاء رائد الاسدي

قصيدة بحق العليلة عليها السلام


چان اعله بابي الطير بصوتة تفاؤل خير
يا بوية من سافرتوا عني
طير السما ون اعله وني
==========================
ايغرد الطير امن الصبح وي صوتة ابدي بيومي
نگعد ســـوة انة و هلي مرتاحة حلوة علومي
بمصباح يوم اضلم صدح للحزن فاطم گومي
بس انة وانتي والدمع صارت چبيرة همومي
رايح عزيز الروح خلة الگلب مجروح
صار البچي والنوح فني طير السما ون اعله وني
==========================
هُدهُد سُليمان النبي محتاجة الك تدريني
تطوي الارض وعلية رد كون بخبر تلفيني
مملكت بيت ال النبي وين اصبحوا دليني
ويا آصف بشوكَ لهلي بلمحت بصر وديني
أتمنى بس ما صار ضليت اون بالدار
لا خبر لا مرسال اجني طير السما ون اعله وني
==========================
تعبانة من كثر المرض والونة تجرح گلبي
اكتب رسايل للمشوا وعيوني الهم تربي
ياطير مد جنحك الي حمل اشواگي وكتبي
وصلهن لنبض الگلب ويشوف شوگي وعتبي
ارحل ياطير الشوكَ واحمل گلب محروكَ
شيبت وانة بزغر سني طير السما ون اعله وني
==========================
عني المحامل من مشت منكم ما واحد ردلي
منتظرة من عدكم خبر گلبي نسوچ ايگلي
شو طوليتوا وما رجع لا اخو ولا عم يهلي
ابعث مكاتيب اشكثر وجواب ما يوصلي
عني الخبر مگطوع ضليت اصب ادموع
من شمهن اهدومك عمني طير السما ون اعله وني
===========================
وي كلشي ابعثلك گمت عن كلشي بعدك جاري
مستغربة شلون وعجب رد ما يجي من اخباري
تاهت مراسيلي ابهوى لــــو ما يعــــرفن داري
بالدار انوحن وانتظر ليلي اتـــصل بنــــهاري
ينساني ابوي شلون لا اهلي ما ينسون
ابقى ابأمل ما خاب ضني طير السما ون اعله وني
===========================
أسألكم الدعاء رائد الاسدي

قصيدة بحق العليلة عليها السلام


حن الگلب طاح الدمع اه يا هلي هم ننجمع
سهم الهجر نص الگلب صاباني
يهلي بجفاكم عاشرت احزاني
=========================
من اشتاكَ اصيحن ياهلي. ما وصل صوت صياحي
وكل ساعة اطيح وانتچي. واوگف واكض صفاحي
شــوكَ وسهر فگد الاهل. جفني من اهدهم صاحي
أصبح وامـــسي بدمعتي. وما گطع صوت نياحي
شصبر بعد مر الصبر ما ينحمل يهلي الهجر
هذا انه حالي من مشوا خلاني
يهلي بجفاكم عاشرت احزاني
=========================
اليفگدلة غالي اعله الگلب. ما يون ونة بهيدة
شلون اليفاركَ كل هلة. وسكنوا ابديرة بعيدة
عافوني خلاني ومشوا. علة وهجر و وحيدة
طبع اليفاركَ من يحن. غير الدمع ميفيـــدة
فگد التحبة اشگد صعب ما ينجبر كسر الگلب
اهوة الدمع صار الدمع يهواني
يهلي بجفاكم عاشرت احزاني
==========================
يومي بدموعي يبتدي. لو بدت تطلع شمسة
يغرد الطير من الصبح. چان ويون لي هسة
انشد وادور كل كــــتر. يا هلي منكم شنسة
بكل جانب اتذكر إثر. چنتوا لي زهرة أونسة
وياه اعيشن كل أثر لهلي بخيالي شگد صور
شنسة وذكرهم عايش ابوجداني
يهلي بجفاكم عاشرت احزاني
==========================
امشية عليك الله استچن. يا هوة وارحم حالي
لا تفــــــتح الباب ابچذب. وافرح اجاني الوالي
وتكثر ظنـــوني البالفكر. ومحظرة كلشي ابالي
بالگوة اوصل عتــــبتك. يالباب اشـــوفك خالي
خاب الرجا وخاب الأمل وأتمنى يلفيني الاجل
ما چنت اظنن لو رحت تنساني
يهلي بجفاكم عاشرت احزاني
==============≠===========
كل ساعة احسبها بسنة. وانة انتظركم يهلي
بگلبـي طلع شيب القهر. غيم وتشتت شملي
مشتاگة اشوفك انتظر. يابوية طارش ودلي
سودة الحياة ابلا ضوة. بالعمر بعدك شلي
شلي بحياتي ابلا ابو لا أمي يمي ولا اخو
وحيدة وعليلة والدمع يرعاني
يهلي بجفاكم عاشرت احزاني
===========================
أسألكم الدعاء رائد الاسدي

قصيدة بحق فاطمة العليلة عليها السلام


يابناتــــي ..هاي اختچن من تكَلها ما تروح
يابناتـــــــي ..للسفر ماتكَدر وما بيها روح
السفر يصعب عليها ... ينكسر كَلبي ابچيها يابناتــــــــــــي -------------- يابناتــــــــــــي
------------------------------------------------
ليش جبتي هدوم بيدچ السفر مابيچ حيلة
يا بناتي هاية اختـچن الجدم كَوة تشــيلة
كَلبي ما يطـيني اكَلها تكسر الخاطر عليلة
ياهي تنقل خبر عـني للحنينة بأي وسيلة
من تكَلها .. خل تظم دموعها لحد الرجوع
من تكَلها .. من يرد الظعن تحتاج الدموع
ياهي منچن تمشي ليها ينكسر كَلبي ابچيها
يابناتــــــــــــي -------------- يابناتــــــــــــي
___
سكنة يا بوية الحنــينة فاطـــمة طلعت ورانه
تكَوم واطيح وتـنادي وحدي عفــــتوني انه
نور ابوي الچان ضاوي انطفة واظلم مچانه
ياسكينة ردي لخـتچ هيجت كَلبي وحنانه
يا حنينة .. احچي وياها بلطف يم الحنان
يا حنينة .. يالخوات ابينچن طب الزمان
من البواچي سكتيها ينكسر كَلبي ابچيها
يابناتــــــــــــي -------------- يابناتــــــــــــي
____
يم كَلب مـــتروس رحمة بوية اسمعيني رقية
روحي يم اختچ حزينة نشفي دمعتها خطية
تحتـــركَ وتذوب شـــمعة زيدت حـــزني علـية
خاف اكَلها ما اردلـچ بــوية توفيها المنية
تعذريها .. من ترد للدار مكســــورة كَلب
تعذريها .. ما يرد هيهات لو سار الركب
انه وانتي ما نجيها ينكسر كَلبي ابچيها
يابناتــــــــــــي -------------- يابناتــــــــــــي
__
بوية يا فاطمة الكبرى فاطمة ظلت حزينة
ويالهوة تتمايل اختچ تومي بيديها علينة
شما اصـــد بوية تنادي ريض شوية الظعينة
يالخذت مني ونستي وحشة خليت المدينة
يا فواطم .. هذا اخير وداع بـــــوية اتوادعن
يا فواطم .. ما حسبت حساب تصعد بالظعن
بوية اختچ رجعيها ينكسر كَلبي ابچيها
يابناتــــــــــــي -------------- يابناتــــــــــــي
____
عاتكة بــــــوية ارد اكلفچ العلــــــــيلة روحي يمها
اتبدت اعله الكَاع دمعة من بعــــــــدنه من يلمها
چنها طير انكسر جنحه وحيدة لا انه ولا امها
روحي يبنـــيتي العزيزة خلي دمعـــــتها تظمها
لا تعاتب.. ينجرح كَلبي واحس دمعي انفظح
لا تعاتب .. ما شفه ويــــــطيب من كَلبه انجرح
بوية عني خبريها ينكسر كَلبي ابچيها
يابناتــــــــــــي -------------- يابناتــــــــــــي
___

أسالكم الدعاء رائد الاسدي

قصيدة بحق العليلة كأني بالامام الحسين عليه السلام يخاطب العليلة عندما استعدوا للرحيل



صوبتي الگلب بوية العليلة
فوكَ امصيبتچ علة ونحيلة
بهدومچ تلمين    جدامي تطيحين
صوبتي الگلب بوية العليلة
=====================
الله يعين گلبي من اصد ليچ..  تحظرين بثيابچ
اشوفچ گمتي تمشين وتطيحين.. صوبني مصابچ
حنين وگلبي ما يحمل يجافيچ .. اذاني عتابچ
اخاف اعليچ من اگعد وحاچيچ.. يفجعني جوابچ
بديارچ تضلين من اگلچ
عنچ ياالعزيزة اتشيل اهلچ
خوفي من تردين   جدامي تطيحين
====================
تحظر للسفر كل ضعن الاحباب.. وانوينا نسافر
يبنيتي مچانچ انتي بالبيت .. يالمكسورة خاطر
عينچ بالعتب متروسة ودموع.. واعلينا تناضر
احنا انشد ضعنا وانتي تبچين.. ودموعچ تناثر
يتباچة الضعن كلة اعله حالچ
هودج بالضعن يابوية مالچ
ويانة ما تروحين   جدامي تطيحين
======================
وحشة ابيـــوتنا من عنها ماشين .. والهم بيها نازل
يستاحش البيت واهلة غياب .. هذا البينا حاصل
شمعة ابيتي ظلي تنور البيت ..  من تمشي المحامل
ما يصلح تظل ابلاية سكان .. مهجورة المنازل
ادري ابوحشة البيت اشكبرها
وعلة البالگلب يصعب جبرها
بفراگي تشيبين    جدامي تطيحين
========================
ضمي اعتابچ ودمعات العيون .. من يرجع ضعنة
ينراد الدمـــع من تلفي العيال .. وترد الوطنة
ما افجع دليلچ بالذي ايصير ..  لو عنچ رحلنة
هذا آخر وداع وبعدة الفراكَ .. يطشر شملنة
ياكل بالگلب يا بوية الفراكَ
عنچ راح اروح لارض العراكَ
كل اهلچ تفگدين   جدامي تطيحين
=======================
ها يم البنين و يا ام الاطياب..  حفضيلي الامانة
هاي ابنيتي يمچ تبقى بالدار... ومفارگچن انة
لو طر الضعن ونسافر انريد... ما تحمل جفانة
تكسر گلبي وگلوب الميامين ... من تطلع ورانة
تنگل بالجدم من تمشي گوة
وياكم اريد اخذوني فدوة
كل خاطر تكسرين   جدامي تطيحين
======================
أسالكم الدعاء رائد

قصيدة بكل حروف الهجاء من الالف للياء (هجائية الاحزان) كل نص يختص بشهيد من شهداء الطف


تبكي لكَ السماء بأحرفِ الهجاء
حسرة ودموع بكل حرف من الألف للياء
------------------------------------------------
الالف اهات والم اعــله الوجوه اتنظرة
البــاء بين بالــكَلب وبعيني بانت عبرة
التاء تبقى وتنذكر وتاذينا تبقى العشرة
الثاء ثائر ثورتــك ثبـتت ثكَل العترة
يا ذابِــــلَ الشـِـــــــفاه وزينبً تراه
كل چلمة دمعة تنذرف من الالف للياء
------------------------------------------------
الجيم جربة والجرف جفـفن جاري عيونة
الــحاء حدب وانحنة حكَة لحامي ظعونة
الخاء خليــتة وخيم خي خلفك ايتانونة
الــدال دارت دنيتة ودار العدو من دونة
عــباسُ انتَ ايـن استوحدوا الحُسين
نايم يوسفة اعله الجرف من الالف للياء
------------------------------------------------
الــذال ذبحة بيا ذنب بالذبح ذابل واصفر
الـراء روحة ما روت راد الــشرب مايكَدر
الزاي زحمة اتزاحمت وزادت ازلام العسكر
السين سار وما سلم وسفة بسيوف اطبر
للحتفِ قد مـضى الاكبرُ قضى
امطبر وابــد مايــنعرف من الالف للياء
------------------------------------------------
الشين شاب وشمعتة شبت وشاب الشافة
الصاد صـابر ياصبر صارن صحاري شفافة
الضاد ضاعت ضحكتة الضّمةَ مضيع اوصافة
الطاء طايح منـطبر طب للطف وماخافة
لم تُثنهِ الحشود بنفــــسهِ يجود
حتى العدو بي يعـترف مــن الالف للـياء
------------------------------------------------
الظاء ظل ابلا ظنة ابظربتة اتظعظع حَيلة
العين عاين عالطفل عينة بعتب تشكيلة
الغين غافي وانغدر غفلة وغـدة يناغيلة
الفــاء فرفرح مافرح فز ابفـزع يبچيلة
سهمُ القضى رماه مُحتَضناً اباه
چـتالة كَلبة ما يرف من الالف للـياء
------------------------------------------------
القاف قاتل وانقـتل قربان قربى اتقــدم
الكاف كلها اتكاتـفت كربلة انكتبت بالدم
الــــلام لــلَّه وللنــبي وللدين لازم نلتم
الميم موقف مُنتصر موقفهم وما ينضم
انصــــــارُك الآبــــــاة بِموتِنا الحياة
لجلك فلا يغمض طرف مــــن الالف للياء
------------------------------------------------
النون نيران ونـسه ونوح اوّنيـن ومدمع
الهـاء هودج عالهزل هاي الهضيمة التفجع
الواو وين الواعدچ وحدچ ولاهو اليسمع
الــياء ياهو ايركبچ يــم اليـتامة ويفـزع
نّادِيْ على النيِاقْ يا أخوَتيِ الفِرَاق
اعذركم وادري الظرف مـن الالف للياء
*
أسالكم الدعاء رائد الاسدي

قصيدة بحق السيدة ام البنين عليها السلام ( طور اهوازي)


هاي ام البنـــين اتلوج  زايد عالــولد ونها
ظلت بس تدير العين  بالموت انگطع ظنها
آه يحسين يا يمة   آه يحسين يا يمة
=======================
ابن ادم من يجيه الموت   ويوصل لاخر انفاسة
اعزازة بكل حـــزن تنعاه   تــلتم كل هلة وناسة
هذا ايحبة ذاك اينوح  هذا اليبچي يم راسة
تلوج ام البنين اشلون  غـــياب الــولد عــــنها
آه يحسين يا يمة   آه يحسين يا يمة
========================
يمها بس علي السجاد  يون وينحب اعليها
يطيبة ام الوفة والطيب  صعبة الفرگة تدريها
تمنيت الابو موجود  يشوف الربتة شبيها
العين ادير يمنة شمال  تدور اعله الابو چنها
آه يحسين يا يمة   آه يحسين يا يمة
==========================
العدها بنية وكت الموت  بـــيديها تنگط الماي
زينب ماهي يم عباس  يمچ وانتي ادرة بهاي
ربيتي وتعبتي سنين  وتالي اوحيدة بس الداي
يحسين الحكَ تنادين  امك يبـــــني چــــفنها
آه يحسين يا يمة   آه يحسين يا يمة
===========================
عزيزتكم يا ال البيت  اجت ليكم تلگوها
گلبها امجرح ومحزون  بوجه حسين داووها
خلها اتحبة واتشم بيه   تشبع شوف خلوها
شبعت ضيم لمن راح  فلا مرة ضحك سنها
آه يحسين يا يمة   آه يحسين يا يمة
==========================
شفتي من الزمان اهوال  اذية شگد تحملتي
الله اطاچ خـــير هواي  باب لرحــمتة صرتي
نطلبچ طلبة يم عباس  بجاه الي عليه نحتي
يعــــجل للإمام الغاب   ربـــنا وتنفــرج لنها
آه يحسين يا يمة   آه يحسين يا يمة
========================
اسالكم الدعاء رائد الاسدي

قصيدة بدوية بحق ام البنين في وداع الحسبن عليهما السلام


ياحادي النوكَي صد لحالها
هاي امَ البنيني بعدك مَن لها
****************
ها يولدي الغالي بسيفك محتزم
ومطوكَه عيالك بحــزام الـــــــزلم
يا ناحــره البيدة لاويــــــن العزم
ماهگوتي الديرة وحشة اتخلها
____________________
هونك على گليبي يمخلي الوطن
عازم تــــخلـــــيني وتهجرني زمن
خبرني يوليدي بنسوانَ المشن
انت الترد بيها لو هي لحالها
--------------------------------------
ياسايجه النوگي هونك بالحدي
يمخلي گليبي يرجف يولدي
تنادي يويلادي انتم مگصدي
وكته الشدد دومن انتم حلها
------------------------------------------
بالعون يوليدي انته روحيتي
افديلك عيالي وروحي ورکبتي
غيرك فلا ودي كلشي بدنيتي
بعد الهجر روحي حزن اينولها
________________________
يمعگره الخيلي يچبير اخوتك
يا هزبره البيدة براسك ريشتك
انته چفيل او هي زينب رادتك
يا ابا الفضل بيدك عدل احمالها
_____________________
هاذي مظاربكم وديار النبي
فيها الحزن بادي صبح ومغربي
تهجرني ما ودي بس چنك تبي
تطفيها نيرانك حدر دلالها
--------------------------------------


أسالكم الدعاء رائد الاسدي

قصيدة جديدة بحق ام البنين عليها السلام على طور قصيدة محمد الجنامي (يعباس ياخوية) محرم ١٤٤٣ هـ



ماتت وهية تنحب ما نشفت العين
طول العمر تنادي آيبــني يحسين
اتنوح اعله ابنها اويلاه يوليدي
اتريـــدة بدفنها اويلاه يوليدي
=====================
ما گطعت النوح من فگد الاولاد
لا تهــــنة بالماي لا تهـــنة بالزاد
من الحزن يوم مدمعها ما هاد
لا صحة لا لون حتى الجسم باد

بعد الولد علـــيلة ماريدن الروح
شلي بحياتي وانة دلالي مجروح
زايد حزنها اويلاه يوليدي
اتريدة بدفنها اويلاه يوليدي
======================
كبرت على النوح حسرة بدليلي
ما ادري بـــــنهار ما اعرفة ليلي
من أيدي وتــــروح يا يمة ويلي
مشتاگة الك موت يادمعة سيلي

تدري شكثر حنينة يا اغلة مني
عني رحــت يغالي والهم كتلني
روحي أغلى منها اويلاه يوليدي
اتريــــدة بدفنها اويلاه يوليدي
====================
من راح الحسين دنيتها دارت
وابحر الشموس گعدتها صارت
ما يرجع المات شتسوي حارت
من صب الدموع عيناها غازت

عافيتي كلها راحت يبني بغيابك
شيب دليلي اشتم ريحت ثيابك
شيب جفنها اويلاه يوليدي
اتريدة بدفنها اويلاه يوليدي
====================
گبور امن التراب سوتهن الكم
عنــــي يالولاد شو رحتوا كلكم
من غبتوا لليوم موحش نزلكم
ايزود اعله يعگوب حزني لجلكم

گبرك رسم رسمتة كل ساعة ازورة
والماي ارشة يبني وأشعل بخورة
مو هذا ظنها اويلاه يوليدي
اتريدة بدفنها اويلاه يوليدي
====≠==================
وكت المنية رادت يمها الاطايب
عن يمنتي وشمالي محبوبي غايب
اه يا دهر ليش خذت الحبايب
ما تسوة العتاب دهري واعاتب

بالدنيا ماهو يمي ابساعة مماتي
يلتم شملنة ثاني وتبدي حياتي
يخلص حزنها اويلاه يوليدي
اتريدة بدفنها اويلاه يوليدي
===================
أسألكم الدعاء رائد الاسدي

قصيدة بحق ام البنين عليها السلام


يارحمه الله الواسـعة يم البنـــين الاربعة
باب الفرج للمحتار عدها يصير الماصار
ام البنين الاربعة
--------------------------------------------------
ام البنـين اتميـزت بيها العقول اتحيرت
انخاها لوحاجة اكلفت كل حاجة تطلبها كَظت

انخاها وانته ملهوف ومشي عليها الحسين
تطي الحوائج بالايد تكَظيلك برمشه عين

هاي العفيفة الطاهرة خل يدري بيها الما درة
هايه خزانة الاسرار عدها يصير الماصار
------------------------------------ ----------
بالدنيا لو صابك عسر انخاها يتحول يسر
بالشدة اقره من تـــمر الفاتحة تسهيل امر

أسأل عليها التاريخ من فاطمة ماكو اثنين
نحسبها بعد الزهراء باب الله للمحتاجين

معروفة ساعات الشدد فاز الندبها وانسعد
منقولة عنها الأخبار عدها يصير الماصار
------------------------------------------------
حيدر ترة ايعرفچ عدل واختارچ بحكمةوعقل
ياهي الي مثلچ تحتمل تطي الولد لجل الكتل

اطت ولدها قربـان والباري كلشي اطاها
صارت مَثل بالايــثار باب الفـرج خلاها

بيها دعـُـائك ينسمع والهم بسـمها يرتفع
هيبتها من الكرار عدها يصير الماصار
--------------------------------------------------
ام البـنين ام الوفه بالحاجة تدري وعارفه
علمها حيدر كل صفه عدها الفرج عدها الشفه

اطلبها دوم بأخلاص الـشدة تنحل بساع
ما تعتذر ام عـباس تشـفي جميع الاوجاع

بالــشدة دايم تنذكر ماتـسد باب وتعتذر
يرضى لرضاها الجبار عدها يصـير الماصار
------------------------------------------------
صارت مثل بالمرحمة وعن فاطمة هم فاطمة
المخلص الله ايكرمة كل طلب منها ايتممة

عدها الوفه ماله حدود وي النبي واحبابة
خلاها للـعالم بـــاب الباري ماسد بابة

اذكرها من تدعي العلي لاشك همومك تنجلي
اذكرها عند الاسفار عدها يصير الماصار
------------------------------------------------
اقسم عليچ ابحيدرة وابنچ الكَطعوا منحرة
والبطل سبع الكَنطرة وزينب الحرة الصابرة

قبلـينا عـدچ خدام وسجلينة من خدامچ
نطلب شفاعة من حسين فدوة لتراب اجدامچ

بسمچ طلبنه نرفعة وانتي شفيعة مشفعة
ياحرة عدچ خطار عدها يصير الماصار


أسالكم الدعاء رائد الاسدي

قصيدة بحق ام البنين عليها السلام


تانيتكم ... يهل المحنة يالعميتوا عيوني
تانيتكم ... ام البنين ام الوفة اتعرفوني
لمن جفوني احبابي   بس الهوة ايدكَ بابي
====================
محلاه چان البيت من تلتم الاحباب
لا اسمع بطاري الهجر لا اسمع غياب
الدنيا دارت وانچفوا ماي اعله التراب
مجروح گلبي ومن مشوا خزن ولا طاب
ناديتكم ... موحش البيت وبلكت اتسمعوني
ناديتكم.... بنص الگلب يا سلوتي صبتوني
ما اضن يبرة صوابي   بس الهوة ايدكَ بابي
=======================
چندوب اگل للروح كافيچ تنوحين
باچر يجون من السفر بيهم تفرحين
طالت المدة وما رجع محبوبي الحسين
منتظرة لا هوة الرجع لا من نسواين
محتارة ... شنهي الخبر يهل الوفة خبروني
محتارة ... چم يوم سفرتكم تضل علموني
محد يردلي جوابي   بس الهوة ايدكَ بابي
=======================
انشد عليكم يا هلي واتنطر اخبار
لاطارش المنكم رجع لا جيتوا للدار
ميتين لو عدلين مدري اشصار ما صار
يا يمة گلب امكم يضل ملتهبة بي نار
باحلامي ... گامت تخوفني من اشوف اطيوفكم
باحلامي ... ما ادري شنهي يالمشيتوا ظروفكم
من نومي افز لعتابي   بس الهوة يدكَ بابي
========================
بالديرة عفتوني جسد من يوم الوداع
امشي وحگكم بس رسم ينشاف عالگاع
ما حسبت شمل الاهل يطشر بساع
روحي لجل روحك فدة يحسين تنباع
يوليدي ... من يوم روحتكم متت بدياري
يوليدي ... من حزني ليلي متصل بنهاري
حسبت خاب حسابي   بس الهوك ايدكَ بابي
===========================
حسبات تاخذني و ترد يا يمة حسبات
يومية اودي اويالهوة الكم سلامات
حرمة وچبيرة لوحدي وشبعانة لوعات
محد يباريني ومشن عني العزيزات
تمنيتكم ... يمي وتطيب اجروحي ويرد لوني
تمنيتكم ... شلونچ ييمة اسمع اتنشدوني
شيبت حتى اهدابي   بس الهوة ايدكَ بابي
==========================

أسألكم الدعاء رائد الاسدي

قصيدة بحق ام البنين
__
شكَد تمنيت  تخلص ايام العـــمر وياكم
شكَد تمنيت  بالمنية اكَبال عيني الكَاكم
بس ادير بعيني     محد ايباريني
------------------------------------------------
يمه تاذيــــني من اعــيد الذكريات
شوفتي الكم يمه تعنيلي الحــــياة
تخــــــطر ابالي تحــظرون المـــمات
انــــــــــــه أم وعندي ذني الامــنيات
بعلتي كون  اربعة اولادي يجــون اكَبالي
بعلتي كون   كل ولد ينشدني عن احوالي
اشتكي الياذيني      محد ايباريني
------------------------------------------------
يمه وافــتــــــــني المنــيه ما تجــــون
اعلى باب الــــدار اديــــــرن بالعيــون
شكد چنت مرات تاخذني الضنون
بالمنيه عــــــــيوني يــمه اتغمــــــــضون
آه يالولاد   من صحت ماضنكم تسمعوني
آه يالولاد   مافزع واحد يغـــمض عيوني
لكبري ايوديني       محد ايباريني
------------------------------------------------
يــــــــــمي العـباس كَاعد حسبـيت
بالمنــــــــيه وهــسه ادور ما لكَـيت
يمسح ابيده اعلى راسي اتصوريت
وايدي يــــسبلها اذا انه اتـشاهديت
يكَعد وياي   ابني كل ساعة يحبني براسي
يكَعد وياي   ونشبع وداع وتروح انفاسي
حسرتي تچويني     محد ايباريني
------------------------------------------------
يــــمه حاچيــــــــني يكَلي وبعــويل
(جعفر) ودمعه اعلى خدينة يسيل
يصــــــيح يايمه فطــرتــــيلي الدليل
هــــــذا حلمي وما تحـــقق مستحل
چانت احلام   انه أم وحكَي من ارويها
چانت احلام   امنية عدي اعــيشن بيها
شوفتك تحييني   محد ايباريني
------------------------------------------------
اسمع صياح وبواچي والنحـــيب
لنه(عون)يصيح يا فكَد الحــــبيب
صورة ابني الصــــورتها ماتغــــيب
خابت آمالي وبعد ضني يخيب
هاي الضنون  چنت احسبها وضنن بيكم
هاي الضنون   خابت وما ينسمع طاريكم
وحدي مخليني   محد ايباريني
------------------------------------------------
ينكَط الماي ويحاچيني الحنـــين
ينوح (عبدالله) ويكَلي ترحلــــين
كون هذا يصير وبعــين الــــــيقين
موش بس احلام يا كَلبي الحزين
قصتي هاي  كلشي سولفته جرة بأحلامي
قصتي هاي   راح امـــوت ولا ولد جدامي
دمعتي تواسيني    محد ايباريني
*
أسالكم الدعاء رائد الاسدي

لم البنين الليلة عدنا قراية
بخدمة حسين يلة ارفعوا الراية
=============++===

يا نبع الوفة ونبع المحنة
يم كَلب الحنين الماكو منة
ياحرة دليليچ ما تهنة
شالوا كل هلچ حكَچ تونين
____
عليچ الدار وحشة ابلاية والي
بدار حسين دمعچ ظل يلالي
تصيح احاه اه يبني يغالي
بعد روحي تنادي يبني يحسين
__
دنت ليها المنية ام كَلب محزون
تتمنى الولد يمها يحظرون
على فراش المنية ادير العيون
تنادي الموت اجاني ها يطيبين
___
هاي ام البنين اتعالج الموت
چا وين الولد ما سمعوا الصوت
خل عباس يمشي اليوم زاتوت
عزيزة الوالدة تستاهل ونين
____
يشيلون النعش تتمنى الاولاد
لچن يا حيف عنها شالوا ابعاد
يفكَد الوالدة للچبد مراد
وحيدة والولد عنچ بعيدين
____
يهيلون التراب عليچ ولدچ
تمنيتي يجون ابيوم لحدچ
تلكَاچ الحسين وموش وحدچ
واجوچ امه وابوه الكل محزنين
__

أسالكم الدعاء رائد الاسدي

قصيدة ..وصية ام البنين لابو الفضل العباس عليهما السلام قبل خروج الضعن


يانبض كَلبي وحنانة سلمتك اختـك امانة
بيدك احطــــهة بدية بزينب ييمة الوصية
--------------------------------------------------
يبو فاضــــل ييــــــــمة ارد اكلفنك
تحط زينب وسـط عيــــنك اريدنك
شهم يبني وغيور وانـــــة اعرفنك
عزيزة اختك ييمة احفظها احلفنك
تحرسلي زينب اريدك من ايدي اسلـمها بيدك
امشية عليك الزچية بزينب ييمة الوصية
--------------------------------------------
ييمة اختك امانة وانتة كافلها
وسط عينك اريدك دوم شايلها
وفوكَ الكَاع اريدن لا يمر ظلها
اذا طلعت ييـمة الزهرة شنكَلها
بعينك واديك افتديها كافلـها انتة اوليها
ماتحمل اختك اذية بزينب ييمة الوصية
----------------------------------------------
اذا طر الظعن واختــــك اودعها
على الهودج ييمة بهــيدة طلعها
واريدن ما تصب يبني مدامعها
نعم لبيچ اريدك بـــــس تسمعها
لو صاحتك يبني ليها حافي تكَـوم وتجيها
هاي العزيزة الابية بزينب ييمة الوصية
-------------------------------------------
عزيزة مخدرة بت فاطمة الزهرة
اريدن ما تذل يبــني وتظل حرة
بوجودك لا يمر بيها الحزن مرة
لما ربك يشاء وينقـــــظي امرة
يمة عليك الوديعة اختـك امرها تطيعة
اهدي چفوفك هدية بزينب ييمة الوصية
--------------------------------------------
عزيز انتة عليها مـن اول سنـينك
عجيــبة ياعلاقة البينها وبيــــنك
اجة يوم الوفـة يبــني وترد دينك
اريدك من توفــي چفوفك وعينك
وفيها عمرك ييـمة واختك عمرهة تسلمة
قدم حياتك ظحية بزينب ييمة الوصية
-------------------------------------------------
الاجل منك اشوفة لو رحت كَرب
نريد الماي زينب ناتــــدك نشرب
وانتة ابهالمواقف سيـفك امجرب
وچني انظر ييمة جسمـك مترب
مسبية تمـشي ذليلة ازحف زحف للعـقيلة
احميها من ال مية بزينب ييمة الوصية
-----------------------------------------------
أسألكم الدعاء رائد الاسدي

قصيدة جديدة في طور الكتابة بعنوان (للبعض)

للبعض احچيهن كلمتين حلو التواضع وي الحسين
اخدم حسين بنفسك ومالك
گبل الحسين شچانت احوالك
=====================
يا خادم حسين انتبه اخذ الحذر لاتنغر
لو شانك لفوكَ ارتفع لاتنسى فضل المنبر
اتواضع وخل قدوتك زين الشباب الاكبر
ما دامت الدنيا لاحد الدنيا دايم تفتر
اعقدها نيتك قربى لله تلگة الي يخلص الله علاه
من حسين جاهك والعلو نالك
گبل الحسين شچانت احوالك
=====================
رائد الاسدي