يابو المحنة لاتمشي عنه
الشاعر ابو احمد الطائي

الله وياك يبويه الله وياك
صوت الرادود الحسيني الموفق
والمخلص لال محمد
ملا حساب العگيلي
المكان العراق واسط
الحي حسينية الهدى 2024/1444

بسم الله الرحمن الرحيم
ذالك ومن يعظم شعائر الله فإنها من تقوى القلوب
صدق الله العلي العظيم
قريبا ان شاء الله تعالى وبي بركة محمد وال محمد وتوفيق مولانه ابي عبدالله الحسين عليه السلام اكتمل برنامج محرم الحرام من القصائد الحسينية لأخي وعزيزي والقريب الى القلب خادم الزهراء عليها السلام الشاعر الحسيني الطيب والمخلص خادم الزهراء ابو احمد الطائي نسأل الله له القبول والتوفيق لخدمة محمد وال محمد
اخوكم ( مسلم المطيري)
الأثنين المصادف 19/5/2025

بسم الله الرحمن الرحيم

تم بفضل الله وببركة مولاتنا فاطمة الزهراء عليها السلام بكتابة برنامج محرم الحرام لهذا العام 1447.الهجري وبعناية مولانا صاحب العصر والزمان عجل الله فرجه الشريف ونسال الله لنا ولكم التوفيق اخوتي خدام الحسين عليه السلام ولا تنسونا و والدينا من بركة دعائكم اخوكم خادم الزهراء عليها السلام. ( ابو احمد الطائي)
نبدأ على بركة الله وتوفيقه

القصائد الهلالية وقصائد خروج الضعن

هل اهلاله. هل اهلاله
شهر احزانج بين طيفه وهل اهلاله

يازينب يمه اعله مصابج الله يعينج
هذا الشهر النزل دمعي يهدم حيلج
انت تحزمي بصبرج وانه بكبري ادعيلج
بلكي بجاهي الباري يخفف وحشت ليلج

شدي احزامه. شدي احزامه
للدهر الما يرحم حيلج شدي احزامه

ابصبر امج محنت احزانج اتحمليهه
وبعزم الــــــكرار وصبره انتصري اعليهه
والدنيه لو لاوت صبرج بي لاويهه
ولتخليهه تهد من عزمج لتخليهه

الله اويانه الله اويانه
احنه اهل البيت وعالباطل الله اويانه

يازينب تدرين بدهري يحب اوجاعي
والحقد البيه اعله اولادي كلش واعي
فرح كلبه بصطرت عيني وكسر اضلاعي
ولتضني الما.راعه الزهره بيج يراعي

دهري. اباله. دهري اباله
يسلب خدرج يسلب روحج. دهري اباله

دوسي بجدمج خشم الدنيه شما تتعسر
وعرفيه الظالم اشتـــعني لبوة حيدر
انه اخت حسين وگليله ما اتعذر
كل اهموم الطف احملهه واحمل اكثر

فـــــوتي بعينه. فـــــوتي بعينه
الرادالج. ذله.ويتبختر فـوتي بعينه


خلي الكاع التمشي اعليها تحجي بزودج
وشيلي الرايه ولاتنطيها بعد حيودج
خلي اطفال احسين تأمن من اوجودج
ولوطاح الكافل رويهم يمه بجودج

يابت حيدر. يابت حيدر
انتي الكافل بعد اخوانج. يابت حيدر




ادري بعزمج يشبه عزمي او ارث حيدر
وصيتج مايزغر ادريبه ولايتقهقر
وهيهات الشامت يازينب لصبرج يگدر
وشما يكبر ظلم الظالم زودج يكبر

زودج يكبر. زودج يكبر
لورديتي بصبرج عايل. زودج يكبر

خادم الزهراء ع ابو احمد الطائي

بصوت. مسلم المطيري

هل اهلاله. هل اهلاله


كلمات الشاعر
ابو احمد الطائي

واحسيناه. هل الهلال وجمعنه واحسيناه
واحسيناه. وبالدمع نعلن حزنه. واحسيناه

هل الهلال وذكرنه الغاضريه
والدمع سال وترس وجه الوطيه
الليله اعلنه الحداد اويه الزجيه
وبصده اهاتنه انواسي السبيه

واحسيناه كل جرح بيكم جرحنه. واحسيناه
واحسيناه. وبالدمع نعلن حزنه. واحسيناه

كل جرح من الشفه ينطر نصيبه
الا جرح الغاضريه الماله طيبه
الدنيه من يوم الطفوف اصفت كئيبه
وياهو يفرح كلبه او زينب سليبه

واحسيناه   بفجفتك كلنه انفجعنه.    واحسيناه
واحسيناه.  وبالدمع نعلن حزنه.     واحسيناه

الزهره كالت من يكملنه القضيه
والله كال اخلقله شيعه جعفريه
شيعه عالفطره ابغضت حكم ال اميه
ويه. لا. حسين صاروا رافضيه

واحسيناه   الله للعاشر خلقنه   واحسيناه
واحسيناه.  وبالدمع نعلن حزنه.     واحسيناه

ريت كون بعاشرك هايه المواكب
جا شلعنه الكاع من جوه النواصب
وجان شدينه الشوارب بالشوارب
ولك جبناهم سحل فوك الترايب

واحسيناه   ياحسافه الطف عبرنه  واحسيناه
واحسيناه.  وبالدمع نعلن حزنه.     واحسيناه

ابو فاضل علــم الشيعه الشجاعه
والعلم مهيوب لو طال ارتفاعه
نقسم بغيرة علي نگطع ذراعه
الناصبي و المهدي گرب ساعه ساعه

واحسيناه   للقضيه انذرنه دمنه  واحسيناه
واحسيناه.  وبالدمع نعلن حزنه.     واحسيناه

مانعوف الثار ألكم يآل امية
وباجر اشوفون زود الجعفرية
باجر انذركم وصل فوك الوطية
وناخذ بثار العقيله الهاشمية

واحسيناه   محنتك لجمه بكلبنه  واحسيناه
واحسيناه.  وبالدمع نعلن حزنه.     واحسيناه


خادم الزهراء ع ابو احمد الطائي

بصوت. مسلم المطيري

واحسيناه
هل الاهلال وجمعنه. واحسيناه


كلمات الشاعر
ابو احمد الطائي

ياهلال  بجيتك  ماضلي بيت
هلت اوياك النوايب من اجيت
كابلتنه.     وفركتنه.  
وهلت اوياك النوايب من اجيت
ــــــــــــــــــــــــ


هلال المحرم عليك اقسم نبينه
روح منانه وبعد لاتلفي لينه
روح لابهموم دهرك تبتلينه
وثوب الاسود من تضل يلزگ علينه

ارحمني روح عله القهر  مابيه حيل
وبشوفتك موبس دمع  دمنه يسل
  مرمرتنه.    وعذبتنه
وهلت اوياك النوايب من اجيت
ــــــــــــــــــــــ


انت لدروب الخطر اول علامه
ومن تهل مايبقى الحسين بسلامه
امدللاته ايصيرن بجيتك يتامه
اودمه يصبغ شيبه ويحني العمامه

اطفال بحضان الاهل رادت تعيش
ارجع اطشر الشمل جالنه ليش
جاورتنه.      وبهذلتنه  
وهلت اوياك النوايب من اجيت

ــــــــــــــــــــ

هلال يمطشرنه  يمحرم السعاده
باجر اتفتت جبدنه واحنه ساده
الخيام بعــــــــاشرك تصبح رماده
والرمال الخـــــــد ابو اليمه وساده

عوفنه نكمل عمرنه بلا جروح
من تضل ايام زينب تكضي نوح
     فاجئتنه.     وخوفتنه.  
وهلت اوياك النوايب من اجيت
ــــــــــــــــــــــــــ

روح لتخليني اشوف الغاضريه
اسياط مايحمل كفـاي ولا أديه
مدلـــــله وشلون اعيشن بالاذيه
ومن اميره بيوم اتحول سبيه

تدري وي اقذر بشر باجر اسير
والي اصعب منها للشام المسير
     بهذلتنه.      شوغتنه. 
وهلت اوياك النوايب من اجيت
ـــــــــــــــــــــــ
العليله تدري ماكمل دواها
اتركها خل الدنيه تمشي بمشتهاها
تدري لو رحنه وبعد ماتم شفاها
اتموت  و بموتتها انته السبباها

تدري شنهو الرايح تخلفه  وراك
اعلينا حيل استعجلت شنهو الاجاك
          حيرتنه.  ودمرتنه
وهلت اوياك النوايب من اجيت
ــــــــــــــــــــــــ

ليش مستعجل على جيت الاذيه
اتعطل اجم عام خل تكبر رقيه
ازغيرة ماتحمل مرار الغاضريه
اتركني اربيها وكبرهه اعله اديه

تدري مايكمل عمر هاي السنه
الا جـــــــاني عله ارقيه جنه
ما عفتنه.    وفتتنه
. وهلت اوياك النوايب من اجيت
ـــــــــــــــــــــــــ
خادم الزهراء ع ابو احمد الطائي

بصوت. مسلم المطيري

ياهلال بجيتك ماضلي بيت
هلت اوياك النوايب من اجيت


كلمات الشاعر
ابو احمد الطائي

زينب تخاطب الحسين ع
عند خروج الضعن ومروره بقبر الزهراء ع


وكفوا الضعن.يخواني. وگفوا الضعن
نتوادع اويه ام الحسن. واگفوا الضعن
روحي مخنوگه ارد اكلها
اعله امي اريد انفض حملها
وكفوا الضعن . يخواني   وگفوا الضعن

ــــــــــــــــــــــــــــــــــــــــــــــــــــ

هذا كبر أمي يبو الاكبر يصدنه
ارجوك وكف النوگ خلنه نودع امنه
بلكي وياهه تنومنه وتظمنه
الموت من هلسفره ياخويه احسلنه

گـامت تون نسمعها. كامت تون
اعلينه يهل مدمعها كامت تون
صعبه شدتي ومن يحلها
اعله امي اريد انفض حملها
وكفوا الضعن.يخواني.     وگفوا الضعن

ــــــــــــــــــــــــــــــــــــــــــــــــــــ

صدگ يايمه السوالف هيه هيه
انتي اول وحده سولفتي القضيه
شكثر جنتي تنوحي من الغاضرية
وجنتي اتگليلي بيها اصبح سبيه

هاي المحن تدريها. هاي المحن
عيديها الي وحجيها. هاي المحن
الخوف هد روحي وكتلها
اعله امي اريد اشمر حملها
وكفوا الضعن.يخواني.     وگفوا الضعن
ــــــــــــــــــــــــــــــــــــــــــــــــــــ


يمه عيديلي الحجي الما حسبيته
اليوم اجتني كـربله واقع لكيته
احجيته وي روحي اشويه وبطليته
وگلت معقوله الحسين ايهد ثنيته

شاب الجفن. من لوعتي . شاب الجفن
ومن نايباتي إلي لفن شاب الجفن
كربله تخـــوف رسلها
اعله امي اريد انفض حملها
وكفوا الضعن.يخواني.     وگفوا الضعن
ــــــــــــــــــــــــــــــــــــــــــــــــــــ

قبل گلت الخيم زينب راقبيها
وحده وحده من حركهم فتشيها
خاف بيها ايتام توگع طلعيها
اويمه من الخيل بيدج ركضيها

عصر الفتن. هذا الفه عصر الفتن
اوحظي وصلني العصر عصر الفتن
احزاني بعد الزهره شلها
اعله امي اريد انفض حملها
وكفوا الضعن.يخواني.     وگفوا الضعن
ــــــــــــــــــــــــــــــــــــــــــــــــــــ
وكلتي اذا شفتي اخوج يوذرونه
بعدي عنه ترى بركضج يفجعونه
وبدل لتحامينه حاميله ضعونه
ولو عثرتي بالج اشوفج عيونه

يم الحسن.گليلي. يم الحسن
شلون اخلص كربله. يم الحسن
القهر نـــــــاري شعلها
اعله امي اريد انفض حملها
وكفوا الضعن.يخواني.     وگفوا الضعن
، ــــــــــــــــــــــــــــــــــــــــــــــــــــ
راح اروح اعله الله يايمه انتكالي
وكل وصيه احفضها ورسمها اعلى بالي
اعليج لـــوطولت يايمه اليالي
يعني انـــــــه اميسره ومو هذا حالي

كلبي يحن.الشوفتج. كلبي يحن
وعالمشرعه انطر جيتيج. كلبي يحن
االدهر روحي خذلها
اعله امي اريد انفض حملها
وكفوا الضعن.يخواني.     وگفوا الضعن

ــــــــــــــــــــــــــــــــــــــــــــــــــــ
خادم الزهراء ع ابو احمد الطائي

بصوت. مسلم المطيري

وگفوا الضعن يخواني. وگفوا الضعن


كلمات الشاعر
ابو احمد الطائي

الزهراء ع تخاطب الحسين عند ما مره بقبرها

وين يمه بهالضعن. شايلين الياوطن
كفو الدمع. گلبي انفجع
شاياين اليا وطن

بزينب مبين التعب. وانت كلبك ملتهب
يبني فززت الجروح
جيتك مو مثل امس. هيجي دلالي يحس
بسرعه شو رايد تروح
يمه سولف يالحسين. ليش انتم راحلين
والضعن كاضيها نوح
راح اموت من القهر. اطفال ليش بهالسفر
والحزن بيكم يلوح

.حزنك يبجي السمه. وانه امك فاطمة
من هالسفر. گلبي انعصر.
شاياين اليا وطن

ـــــــــــــــــــــــــــــــ
صوت لسماعي وصل. يشبه الصوت الكفل
ذاك عباس الوراك
ليش شايل رايته. وسيفه اشوفه ولامته
محزم ولازم كفاك
يمه احس كلبه استعر. انت طايح بالخطر
اوجيت الفازع اجاك
كلهم اخوانك. اجوا. والهواشم كوطروا
للحرب فزعوا وراك

بروحي نار اموجره. احجيلي يايمه الجره.
تخفي الامر. ابيا عذر
شاياين اليا وطن
ـــــــــــــــــــــــــــــــ
وذاكه اوليدك علي. لوجهه يشبه. للنبي
يستعر من حرگته
بروحه نار موجره. وفزع فزعت حيدره
جن عزيزه اتنخته
علي. واليه الغضب. يمه لازم شي صعب
شعل نار بغيرته
الاكبر يضهضب غضب. حرگ بجدامه الدرب
وهاذي ماهي مشته

شبيه يحسين الولد. احجيلي لاتخفي بعد.
هاج الضلع. من هالوضع
شايلن. اليا وطن
ـــــــــــــــــــــــــــــــ
هذا موشبل الحسن. الجاب عماته واجن
وامه تتعثر. وراه
چنه ابوه ابهيبته. وحلوه كلش لامته
ورايه الخضره بكفاه
لكن اسمع حسرته. من يصــد العمته
ونار تطلع من ضواه
امبين اعليه الزعل. ويبني بسمك يرتجل.
هالولد شنهو الاجاه

كلبه مهضوم اشكثر. وانت كلبك منفطر
عاف العرس. مهظوم احس
شاياين اليا وطن
ـــــــــــــــــــــــــــــــ

ليش حته البالمهد. قررت هم يبتعد
عن وطن جده ورباه
يمه اسمع ونته. ومن حرارت جبدته
العرش اهتز بسماه
ماسامح كل نهر. لو جبد عبد انفطر
وشح عليه ومارواه
يمه عوفولي الطفل وجوه اعيوني يضل
وانه اتكفل رباه

وهو شله بالسفر. ازغير بعده وماكبر
. صبري انثلم. حيل انهدم
شايلين اليا وطن
ـــــــــــــــــــــــــــــــ

ياهي ذيج الي وراك. تبجي وتمسح بكابك
چنها اخيتي ام البنين
يذرف المدمع دمه اتصيح ولدي فاطمه
فدوه لتراب الحسين
يدمي منظرهه الكلب. ماخذيتوهه اشعجب
وليش عنها راحلين
يالحسين ويالكمر. احجولي اشعدكم خبر.
ناوين الروحه وين

يم عوفوا ارض البله. ولاتروحوا الكربله
ماينجرع. هذا الوضع
شايلين اليا وطن
ـــــــــــــــــــــــــــــــ
خادم الزهراء ع ابو احمد الطائي

بصوت. مسلم المطيري

وين يمه بهالظعن
شايلين. اليا وطن


كلمات الشاعر
ابو احمد الطائي

قصائد الخدمه