قصائد ام البنين ع تخاطب الحسين ع

كالولي مكطوع النحر
والخيل داست عالصدر
مايكفي لو ابجي العمر. يمه ياحسين

جويعده وعيني الدربكم ودمعه عالخد سايحه
وياهو ألمحنه بجهتكم. أله اركض طافحه
اسئلته يايمه عليك. . وكلي اقري الفاتحه
راسه فوگ الرمح شفته. . وجثته بالدم سابحه
كسروا اضلوعه مو ضلع
للخيم كـــــــالوا مارجع
ومات ابنج وشابع وجع. يمه يحسين
ــــــــــــــــــــــــــــــــــــ
يمه عن زينب سألته. وصفــــالي جتــافها
طلعت ومجبوره گلي وبس عبي اعله كتافها
الوصف مـا أكدر اكمله .الخوف مالي اوصافها
وماتت اوشيب كلبها. من المعسكر شافها

وين انته اوين الكمر
معقوله يعصيكم نهر
وزينب كلبها ينفطر. يمه يحسين
ـــــــــــــــــــــــــــــــــ


تسعه اوسبعين فرقه. كلي حاطوا بيكم
وينها الجـــــــانت تراسل. وحلفت اتحاميكم
وين ذيجه العاهدتكم. بالدمه تشريكم
صدگ دارتــــــــلك ضهرهه. وبالنبل ترميكم
رسلوا نبلهم للخيم
حتى يوصلولك عِلم
بلنهب وسلب الحرم. يمه يحسين

ـــــــــــــــــــــــــــــــــــــــ
صدگ مارحموا عطشكم. والنهر ضم مايه
وصدگ كــــــــالولي رضيعك. ذبحته الرمايه
صح نحر عبد الله يمه. نزف دم اهوايه
نزف حتى الســـــــــــمه منه صارت امحنايه

للسمه راح ومارجع
دم الطفل لله ارفع
خبرني صح هذا الوضع. يمه يحسين
ـــــــــــــــــــــــــــ
المقتلك كـالولي زينب. .ركضت من الخيمه
فززتهه الخـــــــوة يبني وركضتـــهه الشيمه
اجت تتعثر تدور اعليك وسط الهيمه
وكالوا من شمس صارت. على جثتك خيمه

ركضت تشاگف بالنبل
تريدلها حل وماكو حل
حسبالها اترجع الهزل. يمه يحسين

ـــــــــــــــــــــــــــــ
يمه من كالولي زينب. عالزلم طلعوهه
اعرفت ولدي اربعتهم. موته هالعافوهه
واعرفت جفه ابو فاضل. عالنهر گطعوهه
هو لو سيفه بيمينه. زينب ايأسروهه

يبني مرسوم القدر
راعي الوفه يضل عالنهر
يطلب ويالتمسك عذر. يمه يحسين


خادم الزهراء ع ابو احمد الطائي

بصوت. مسلم المطيري

كالولي مكطوع النحر
والخيل داست عالصدر
مايكفي لو ابجي العمر. يمه ياحسين


كلمات الشاعر
ابو احمد الطائي

قصائد ام البنين ع

ام البنين ع تخاطب ع تخاطب حادي الضعن


ريض يجمال. ،،، لاتاخذ احبابي
من بعد الاعزاز..... ياهو اليدگ بابي
اتموت ام البنين . بفراگ الحسين

من بعد الاعزاز. ياهو اليدگ بابي



خذت خيرة وطلع مگصدهه مو صالح
اوچنهه تگلي مايرجعلج الرايح
الضعن لو راح يرحل كل حچي المالح
اوبعد راعي المحنه بيمن اتصابح

ماصعباً عليك دمعاتي البعيني
اصبر يجمال وبحزني واسيني
هد حيلي البين . بفراگ الحسين
و من بعد الاعزاز. ياهو اليدگ بابي
ـــــــــــــــــــــــ

احس كلبي نعصر جن عصرة الزهره
واحس نمرود ناره بروحي مستعره
عليك الله يحادي اتوانه هالمره
حزينه الروح وارد اشبعها من عطره


خليلي الحسين. هالليله ياحادي
ارد اشبع. الشوف ومنه اخذ مرادي
انطي الوجه وين . بفراگ الحسين
و من بعد الاعزاز. ياهو اليدگ بابي
ــــــــــــــــــــــــــــــ

نشعب گلبي يحادي وگتلك ادخيلك
وعلى شد المحــامل لاتذب حيلك
ابهيده اسرج خيمهم واني ادعيلك
واشكرك حيل لوكضيت كل ليلك

هيج الله ويطول... يالحادي مگعدنه
بس ليله ونگوم... . حد الفجر حدنه
وراح احزن سنين. بفراك الحسين
و من بعد الاعزاز. ياهو اليدگ بابي
ـــــــــــــــــــ
شسولفلك يحادي عن محنتهم
احسين وزينب اغلى مني ماعدهم
وانه مثل الهوه للروح احسبهم
واعز من شوفت ابني عندي شوفتهم

لو تسئال الروح. انت وتحاجيها
چا گــــالت الموت. ولاممشى أهاليها.
نفت كلبي نصين بفراگ الحسين
و من بعد الاعزاز. ياهو اليدگ بابي
ـــــــــــــــ
ماصبر وحشه الدنيه بجفاهم
ولا يرضون اروحن وامشي ويـاهم
انه اهديلك حياتي كـــون ترجاهم
وياهم أسيراً اوامشي ممشاهم


أترجه يبقون. واهديلك أيامي
لو امشي يرضون. وتحقق احلامي
ماتسلم العين . بفراگ الحسين
و من بعد الاعزاز. ياهو اليدگ بابي
ــــــــــــــــــــــــ
يالحادي أخـــبرك عن جرح بيّـــه
اسنين اوياي يطـــعن كلبي ليليه
علي گـلالي زينب تمشي مسبيه
ومن ذيجه جلمته دمعتي اربيه

سبلت الدموع.... من اسمعت بيها
زينب أميره..... والدنيه تسبيها
ويذبحني الونين. بفراگ الحسين
من بعد الاعزاز..... ياهو اليدگ بابي
ـــــــــــــــــــــــــ
خادم الزهراء ع ابو احمد الطائي

ريض يجمال. لاتاخذ احبابي
من بعد الاعزاز ياهو اليدگ بابي

كلمات الشاعر
ابو احمد الطائي

بصوت. ( مسلم المطيري)

ام البنين تخاطب ابا الفضل ع


انطي اعيون اثين. ورخصله الجفين
وبوجودك ياسبع الماي
بالك خالي يگول اكفاي
ـــــــــــــــــــــــــــــــ
خل روحك درع لليسوه الوكفه
وذراعك الف مره اله كفه
الاخوه يراد لوجار الزمن واكفه
ترى الدنيه بلايه حسين ماتسوه


صدر وظهر وعين
كلشي انطي لحسين
ضم ضعنه بعينك يرباي
وبالك خالي يگول اكفاي
ورخصله الجفين
ــــــــــــــــــــــــــــ

شمامة محمد وامه الزهره
قبل لايطلبك يابني امتثل لامره
رخص ادماك اله كطره بأثر گطره
ودوس اعله المنايه وكلبه لتكسره
من تتمشه اوياه
صيره انت بمكفاه
اسمعه ادلل خويه اهواي
وبالك خالي يگول اكفاي
ورخصله الجفين
ــــــــــــــــــــــــــــ
كله ادلل وذب حملك اعليه
ولو مسوا عباتك يا أبو ارقيه
تلگه الكاع من ضرباتي مجويه
اطشرهم وطكهم ميه ابميه


وشيل الرايه وصيح
روس اعداك اطيح
وگله ار،خصني وشوف شجاي
بالك خالي يگول اكفاي
ورخصله الجفين
ــــــــــــــــــــــــــــ

لاترضه بوجدوك ينحني ضهره
وكل جرح بأخيك لازم اجبره
خلي الرايه دوم ترفرف بكتره
يحب حسين رفت رايه الخضره

كــــــثرله الرايات
ودون العلويات
گله بجفي أمرده اعداي
بالك خالي يگول اكفاي
ورخصله الجفين

ـــــــــــــــــــــــــــــــ
حسين ابشوفتك روحه يحزمهه
لتخلي حســــــرته بصدره كاتمهه
هيج كــــــل جرح بعـــداك يالمهه
وتعنه المعاره طشهه اولمهه

خليهم يــــــــــــــالعباس
راس يطگ براس
طش بيهم يبن الوفاي
بالك خالي يگول اكفاي
ورخصله الجفين
ـــــــــــــــــــــــــــــــ

سوايت الله بكوم صالح سوي بيهم
ورموا كلبه يكافل من حجيهم
خلي روس اطيح وي طيحت اديهم
وخلي ضعن حسين هوه اليسبي بيهم

يايمه الصوبين
جر جرهم لحسين
دگ صدرك تكفيني بهاي
وبالك خالي يكول اكفاي
ورخصله الجفين

خادم الزهراء ع ابو احمد الطائي

بصوت. مسلم المطيري

انطي عيون اثنين

كلمات الشاعر
ابو احمد الطائي

قصائد ام البنين تخاطب الحسين ع. نزله


اربعتهم الك. .... فدوه يامولانه
وشلي بيها الولد..... وزينبك عطشانه

ــــــــــــــــــــــــــــــــــــــــ
كلف اولادي بخدرها. وهم يحرسونه
والضوه اليدخل عليها. مدنگ ايدخلونه
النجم لو صد عليها. من السمه يشلعونه
والهوه مايدخل الها. الا يفتشونه

يبني ذب الخدر.....  عالكمر وخوانه
وشلي بيها الولد..... وزينبك عطشانه

ــــــــــــــــــــــــــــــــــــــــ

جلمتي جلمه ثكيله ولدي ايقيموهه
وحلفوا بروح الزجيه. زينب يحفظوهه
ختنه فوك الروس كلهم كالوا يحطوهه
هيبة الزهره بحجيها. ولازم يقدسوهه

زهره من فاطمة. ازهرت بسمانه
وشلي بيها الولد..... وزينبك عطشانه

ــــــــــــــــــــــــــــــــــــــــ
جبت طاري النهر يٓـمه والكمر جر سيفه
وصاح اذبحنه اعله ايدي ايعطش اختي بكيفه
والله لو بس لحظه منه. تشعر اختي بخيفه
جرفه اكلبنا اعله مايه. وسيفي ياخذ حيفه

وگتله ذل النهر....... يبني هد اركانه
وشلي بيها الولد..... وزينبك عطشانه
ــــــــــــــــــــــــــــــــــــــــــــ


ازلام نيبه والمنايه. اولادي يتلگوهه
ولو تجي الدنيه عليهم. والله ميهابوهه
وزينب اوديعة علينه وكلهم يعرفوهه
والله ينطون الزنود. وهيه ماينطوهه

احنه اهل الفخر ..... والفخر ويانه
وشلي بيها الولد..... وزينبك عطشانه

ـــــــــــــــــــــــــــــــــــ
گلي العباس ابشري. وحركالي الصارم
زينبج بعيوني احطها. هايه اميرة هاشم
انه اخوها وانه اسدهه. ولها اصيرن خادم
ولا تهمين بخدرها وابو فاضل سالم

امنت عالخدر. ..... ابوفاضل صانه
وشلي بيها الولد..... وزينبك عطشانه


ـــــــــــــــــــــــــــــــــــــــــــــــ

اربعتهم فدوه ولدي. . الزينبك خليهم
كبرتهم للشدايد يبني افزع بيهم
سبعه يطووها اعله سبعه. انت من تنخيهم
وابو فاضل وي اخوته. الكون مايلويهم

غيرة الله علي...... وعلي اصل دمانه
وشلي بيها الولد..... وزينبك عطشانه

خادم الزهراء ع ابو احمد الطائي

بصوت. مسلم المطيري

أربعتهم. الك. فدوه يامولانه
وشلي بيها الولد. وزينبك عطشانه


كلمات الشاعر
ابو احمد الطائي

قصائد ام البنين ع


نزل للعباس ع واخوته ع


يضحكون. يضحكون. نزلو السوح الحرب
يعرفون. . يعرفون. صعبه هاشم تنغلب

ضحكوا وكالوا يزينب بالحرب مية هله
ونزله وحده اسباع هاشم نزلوا الطف كربله
فنون ابو طالب وهاشم طبقوهه اعله المله
وكربله گصوا أديها وعلموهه المرجله

هدوا و راياتهم
. ترفرف اعلى اجتافهم
يخوفون. يخوفون ترسوا الحومه رعب

ــــــــــــــــــــــــــــــــــــــــــــــــــــ

علي الاكبر وابو فاضل شدوا اعله الميمنه
ترهب الرايه اباديهم و الحراب مسننه
ازلام هاشم كلها غيرة واليكابلها انفنه
ونكسر ظهر المعسكر والحديد الها انحنه

كوروهه الحومه
.  والزلم مهزومه
يشيمون. يشيمون گلبوا الما تنگلب

ــــــــــــــــــــــــــــــــــــــــــــــــــــ

اخوان الحسين اربعتهم دگوا الظهر بظهر
وابو فاضل گام سيفه يشمر الوادم شمر
شمره منهن شمر واحد وگبل وداه السقر
وهوسوا بسمه النشامه وجه الحسين ابتشر
وصلوله الهوسه
الجيش كله اندوسه
يحصدون. يحصدون. بالرگب مثل الگصب
ــــــــــــــــــــــــــــــــــــــــــــــــــــ

هوس العريس بيها وهوسته تهز البدن
وصاح گولوا. للعقيله اليوم اعوضلها الحسن
لاتهمي بالنوايب. هلا بيهن من لفن
اليوم اسويلج عراضه منها ينشگ الجفن
الغيرة تمشي بدمه
ابو فاضل عمه
يگولون يگولون. بيده الجيش انكلب
ــــــــــــــــــــــــــــــــــــــــــــــــــــ
هلهلن يالبلخدور الكمر صال اعله النهر
وجيشهم مرده بيده وقائد العسكر طفر
انكسر كل حچي اميه وجيشهم كله انكسر
ولملك گاع الله كلها صار مايملك شبر
قائد الـخوانه
شرد من ملـگانه
ويوصفون. يوصفون. شرد وعيونه تصب
ــــــــــــــــــــــــــــــــــــــــــــــــــــ

سبعه وثلاثين فرقه ومابقى منهم علم
ولو مثل سد السكندر جيشهم هـم ينهدم
ضهضب العباس بيها وسيفه ضل يلمها لم
وسره مشاهه الجهنم والسره ضل مزدحم
هذا راعي الرايه
واخوته الوفايه
يكولون. يگولون. سيوفهم تمطر غضب

ــــــــــــــــــــــــــــــــــــــــــــــــــــ
خادم الزهراء ع ابو احمد الطائي

بصوت. مسلم المطيري

يضحكون. يضحكون
نزلوا السوح الحرب


كلمات الشاعر
ابو احمد الطائي

أربعه مو راية         عكــدت الوفاية
بشري بالتردينه.      يالرضاتج غاية

انتي بت الحـبه الله.   وسيده اعله الوادم
واخوتج حتى الخيالج.    هم تحطلج خادم
الدنيه فريها اعله كيفج. .مثل فرت الخاتم
واليعاند مايجيج      يجيبه حد الصارم

عالصعايب نگدر // وحنه ضنوة حيدر
  وياهو التخافينه.//  انجيبه الج دمايه


الــــج شدينه البيارق.  والــــهمم زدنــــاها
وخيمتج احنه حرسها.    ومنهو اليدناها
الدنيه لو غثت اخـتنا حيل نكصي وياها
ونطبگ السبعه اعلى سبعه.وينتهي طرواها

الحار فكرج بيها. // من الارض نمحيها
انتي بس دليــنه.// ونعـــتنيها اعنايه

كلشي ابالج يزينب. گـولي واحنه اخوانج
ولو تريدين الثريه. انرفعج من امجـــــانج
انتي عنوان العفاف. ونفخر ابعنوانج
ونگلب ا الـــــــدنيه يزينب من تغير الوانج

عنها مانتعذر. // والله لو نتوذر
  وكلشي الطلبينه.//  اعليج موش اهوايه

الاخو الما بي محنه. واخته ميباريها
الشوارب مــــــــاتريده. والمن امخليها
ترى ثلثين الشهامه من اختك تحاميها
ولي بي غيرة ومحنه. اخته ما يجافيها

ونعم من طولج. // كعبه واحنه نزورج
زينب وتدرينه. // عدنه اعظم ايه

شنهو يختي الغاضريه. وانتي تخافيها
وعلي من نشتد عليها. بالدمه انغطيها
نينوه اجتج هديه. اتبيعي تتملكيها
اوبــــــاجر انمد الرگاب. الجدمج ودوسيها

نينوه تملكيها. // ولي يحجي بيها
نسحله من رجلينه. // عالفرات ومايه


احنه اخوانج نشامه. جف علي مربيه
العاليه نصيــــها احنه. واليگوم انهينه
الكــــــــــــون انفره يزينب. وين ماتردينه
واكبر اخشوم الاعادي. ندوسها برجلينه

كافلج عباسنه.//وانتي رفعت راسنه
من يكف جفينه // ايربي خصمه اربايه


خادم الزهراء ع ابو احمد الطائي

بصوت. مسلم المطيري

اربعه مو رايه. عگدت الوفايه


كلمات الشاعر
ابو احمد الطائي

أقره الها الفاتحه واهديها
وحـــاجتي الام البنين اشكيها
ـــــــــــ

مو جديد الحجي اتكولونه
. والف شاعر قبلك يوصفونه
انا عدته حتى لا تنسونه.
واليدك باب الله ميرجعونه

طلبتي هالخدمه اثبت بيها
وحـــاجتي الام البنين اشكيها

ــــــــــــــــ

حلفتها وادري صعبه المسئله
والصعب ام البنين تسهله
حلفتها بالي صار بكربله
. اسمي وي اهل الخدامه تسجله

بخت ام الاربعه ايسويها
وحـــاجتي الام البنين اشكيها

ـــــــــــــ

حلمي كون حسين يقبل خادمه.
وللخدامه كـــون بيده يحزمه
من حبال ابليس اريد يسلمه
وحلوه وي حسين حسن الخاتمه

الدنيه وي حسين اريد اكضيها
وحاجتي الام البنين اشكيها

ــــــــــ

ادري مالكني الذنب لكن اتوب
وسطت ام البنين اعلى الذنوب
ثياب بيض العدها ورايدلي توب
والعمر متوجه الصوب الغروب

فدوه يم عباس لترفضيها
وحاجتي الام البنين اشكيها
ـــــــــــــ


السالفه احجيها الج من الاخير
وحدي مادبرها تدريني فقير
انتي جدميني على الدرب اليسير
ولج عند الله بيه ِ اجرا كبير

الصفحه التمسحينها تبضيها
وحاجتي الام البنين اشكيها
ــــــــــ

انتي طهريني احلفج برسول
وبالذبيح الركركت فوگه الخيول
انه من ذنبي وعلي كلش خجول
وراسي دنكته الج انطيني طول

ذنوبي كلها بدعوة وحده محيها
وحاجتي الام البنين اشكيها

خادم الزهراء ع ابو احمد الطائي

بصوت. مسلم المطيري

ا
أقره الها الفاتحه واهديها
وحاجتي الأم البنين اشكيها


كلمات الشاعر
ابو احمد الطائي

قصائد مولانا مسلم ع

(حميده تخاطب ولدها مسلم (ع)


قريباّ اوصل الكوفه واشوفك
قريباّ. بعد لحضه ماعوفك
نلتقي ونگعد سويه. وحجي كل الصار بيهِ
بابا. بابا. بابا بابا


للاسر هيئني وانه تهل دمعتي
وجاب طاري الكوفه بويه وطر جبتي
بين احزاني ولمح طيف بفرحتي
وگلت بالكي الگيك سالم يارجوتي

اسيرة. والامل مــــــــافـــــاركيته
. اسيرة.      ورسمك بعيني لكيته
الامل تنزاح الرزيه. ويدك تشابك اديه

          بابا.   بابا.     بابا بابا
ــــــــــــــــــــــــــــــــــــــــــــــــــــ

كلت بلكي الكـوفه عكس الـغاضريه
وبالــــــكي هايه الديره تطلع حيدريه
وكون ارجع بويه اميره ومو. سبيه
والك اشكي كلمن اجاسر عليه


حميده. تدعي من الله يرجع
حميده.    تصيحلي اتمنى اسمعك
اتمنه نتلاگه بمسيه. مثل الحسين ورقية
بابا بابا بابا بابا
ــــــــــــــــــــــــــــــــــــــــــــــــ
ضامه بصدري حجي محتاجه اطلع
وخايفه ينفطر كلبك لو يفجع
تدري بويه حسين عمي انكسر ضلع
ومن وگع مديده الك رادك ترفع

عِزيزك. وكع بالحومه وتوذر
عِزيزك. فكد حيله وابن الاكبر
بيك جان يوصي بيه. خبري مسلم عالقضيه
بابا بابا. بابا بابا
ـــــــــــــــــــــــــــــــــــــــــــ
بويه والعباس عمي نطفة عينه
نگطع جفه وهوه بعده يداري بينه
يصيح مسلم وينك بأخر ونينه
وراد منك ترجع تحامي الضعينه

بجبينه. الحجر ماخذ مكانه
بجبينه. نار تسعر من ضمانه
بيه شفت نار الحميه يزئر وجثته رميه
بابا بابا بابا بابا

ـــــــــــــــــــــــــــــــــــــــــــــــ

بويه ردتك من جبيرتنا ولوهه
ولية انذال أنولد من طاح اخوهه
بويه وياها اركضت من طلعوهه
وشاكفت عني السياط وجرحوهه

تشاكف. عني كل ضربه التجيني
تشاكف. زوركوهه حمت عيني
گبلي جروهه سبيه. وهي فخر الهاشميه
بابا بابا بابا بابا
ــــــــــــــــــــــــــــــــــــــــــــــــــــ

صدگ بويه الخبر هذا الجاي منك
كالوا الكوفه تخلت كلها عنك
الجاني حامي الظهرك بظهرك يطعنك
وكالوا ارجع وانا بويه بنفسي احضنك

ارجعي. گلي الميت ضميره
ارجعي اويه الهزل انتي اسيره
مسلم اذبحته بدايه. وسال دمه اعلى الوطيه
بابا بابا بابا بابا
ــــــــــــــــــــــــــــــــــــــ
خادم الزهراء ع ابو احمد الطائي

بصوت. مسلم المطيري

قريبا. اوصل الكوفه واشوفك


كلمات الشاعر
ابو احمد الطائي

قصائد مولانا  مسلم ع



فطر كلب حسين مصابه. ودمعاته المسلم سجابه
ـــــــــــــــــ

يذكر مسلم وتهل عينه. . خويه شلون انت اتجافينه
وتدري بفگدك مايرضينه. وكلبي عليك انشگ جلابه
ـــــــــ،ــــــــ
محتاجك يبن العم ارجع. الگوم تريد احبابك تركع
ودهري يريد ايذبح الرضع وتدري وياهم عدنه طلابه
ـــــــــــــــــــــــ
ردتك ترجع حتى اشكيلك. وتلزم حيلي بلزمت حيلك
عاود يامسلم وحجيلك عن ضيم الشامت وصحابه
ـــــــــــــــ
جفك ردته يرجع العايل. وترد ويعباس الباطل
كلشي خلافك اصبح مايل. ودهري يراميني بنشابه
ـــــــــــــــ
شبت نارك بين اضلاعي.. ورجع لو كمل بوجاعي
ياراعي البيرق ياراعي. . غيابك شيب كلبي وصابه

ـــــــــــــــ
مايهده ولا تطفى النار. كلبي اعليك وحيلي انهار
وشيعاتب دهره الغدار. لوع جبده بفگد احبابه
ــــــ،ـــــــــــــــ
الماله اخوان ايئذونه. وحجي الناس ايطلع عيونه
ازغير دوم ايخلونه. وبس بالمايل يندك بابه
ـــــــــــــــ
راح ابقى لوحدي وأتذه وزماني يخض بيه بجفه
وبعدك راح يروح الكلفه. عباس اليصرعني مصابه
ـــــــــــــــ
لو طحت وعالحومه اتوذر. ياهو البعدي يحامي الخدر
الشر يامسلم يتوشر وزينب توليها السلابه
ـــــــــــــــ
بعد الطيحه رتك ترجع. تدفني وتهيل المدمع
عاده تخلص بس الرضع. من سبي الغاشم وربابه
ـــــــــــــــ
خادم الزهراء ع ابو احمد الطائي

بصوت. مسلم المطيري

فطر گلب حسين مصابه
ودمعاته المسلم سچابه


كلمات الشاعر
ابو احمد الطائي

قصائد مولانا مسلم ع

هجت خيلها ومسلم تلكاها
وتـترافس رفيس الموت خـلاها
ــــــــــــــــــــــــــــــــــــــــــــــــــــ
دگ درعه اعلى صدره ورايته بيده
يريد الـــــــــثار منهم بالدمه يريده
مثـــــــل عباس سوه الگوم بالبيده
غطــــــت بالــدمه والموت حافاها
ــــــــــــــــــــــــــــــــــــــــــــــــــــ
ماخذ زود عمه وصيته من صيته
وتربيت علي معــــروفه تـــربيته
سفير حسين هذا ومن اهـل بيته
الگوم بگوم طـگها وجثث سواهـا
، ــــــــــــــــــــــــــــــــــــــــــــــــــــ
شاط الهـاشمي مـن يگــدر يلـــزمه
الروس اتساوت اويروس من جدمه
نفض بيده المعــاره نفضته الهدمه
ومن سيفه الـــــسمه و الكاع حناها
ــــــــــــــــــــــــــــــــــــــــــــــــــــ
بيده المـوت الاحـــمر نــزله بيـهم
وضيـگ دنية الله وضاكت اعليهم
يجتفهم جتف گـــــــام بجفافيهم
والما تـــــمشي بامره اتحير بدماها
ــــــــــــــــــــــــــــــــــــــــــــــــــــ
زلمه بزلمه يردم من يطب بيها
ولاذت بالمنــايه بلكي تـــحميها
الشردت والبقت گـــطعها رجليها
وزلمه فوگ زلمــــه بسيفه مداها
ــــــــــــــــــــــــــــــــــــــــــــــــــــ
كفــــها الكوم مـسلم كفت اردانه
ومملي من الــفخر وزود عــنوانه
وين الـــــخان خل يتلاگه اويانه
يصيح اوناس فوگ الناس حطاها
ــــــــــــــــــــــــــــــــــــــــــــــــــــ
تمــنه حســين اخوه ايعاين الكوفـه
ويشوف الكوفه بيها الكاع مخسوفه
مســــــلم حالف يوصلـــها لطفوفه
روس بـــــــــلا رگب والموت شلاها
ــــــــــــــــــــــــــــــــــــــــــــــــــــ
حـــلف مايضل لحسين من عدهم
الا. ادنگ من الـــموت يخـــدمهم
يخــــــدمهم غــصب الراد يسلبهم
وروس العاندت بالسوط ربـــــــاها

خادم الزهراء ع ابو احمد الطائي