بصوت. مسلم المطيري

بچتفه شد. الرايه
لازم ايدگ ثايه


كلمات الشاعر
ابو احمد الطائي

ام الاكبر ع تخاطب ولدها الاكبر

تقبل علي بهذا الــوضع. يمه يمه
بس انت الي وبيك انفجع. يمه. يمه
روحي صارت مكبرة.
وفوگــــهه امشي اميسرة. يمه يمه

كربله تخوف عفتني شلون بيهه
ديره مالت غربه ما اكدر عليهه
سرفنت يمه السلبنه جفوف اديهه
وعسكر ابليس بجنوده وكعد بيهه

كلبي جفل من هالبشر        يمه يمه
وكـــــــلهم اشوفنهم شمر   يمه. يمه
بهلي سوت مجزره
وفوگـــــهه امشي اميسرة.      يمه يمه

ـــــــــــــــــــــــــــــــــــــــــــــ

هنانه يمه الناس ماتعرف محنه
اوجوهم تنضح حقد من تنضرنه
واحد بلا سبب گابلنه وشتمنه
اوناس تفرح من دموع اطيح منه


اوجوهم  تنضح حقد.  يمه يمه
الوالد اطغى من الولد.  يمه يمه
جره اعليه المـــــاجره
وفوگـــــهه امشي اميسرة.      يمه يمه
ـــــــــــــــــــــــــــــــــــــــ

بالحجر لاكونه يبني وبالشتايم
وظالم يهوس علينه بأسم ظالم
اوجوهنه صبغوهه من دم العمايم
وذوله ماهضموني كون اوليدي سالم


مهضومه وكلبي انفطر. .  يمه يمه
ادعيلي. إيـطول الصبر. يمه يمه
بجبدي نار اموجره
وفوگـــــهه امشي اميسرة.      يمه يمه
ــــــــــــــــــــــــــــــــــــــــــــــــ
ياعلي زينب جبيرتنة وخذوهه
وكلنا درنه اعليها لمن جتفوهه
يضريونه ويشتمونه ويضربوهه
بغضاٌ براعي اللوه وبغضاٌ ببوهه

جرونه كلنا .للأسر. يمه يمه
وحرنه نلوذ بيـــاكتر .  يمه يمه
ادموعي عالخد ماطره
وفوگـــــهه امشي  اميسرة.      يمه يمه
ــــــــــــــــــــــــــــــــــ
عازة الـــــوليان عازه اتهدم الحيل
وكلنا نفگـــدها ييمه لـــو اجه الليل
وحده اتلوذ اعلى وحده تگلها ادخيل
وصعبه يايمه وتخوف ركضت الخيل


من خوفنه انوح ونون.         يمه يمه
شيب كلبنه من الحزن    يمه. يمه
مدلـله وصرت أمرمره 
وفوگــــهه امشي اميسرة.      يمه يمه
ــــــــــــــــــــــــــــــــــــــــــــــــــــ
ادري يايمه عتابي اوياك أذاك
بري الذمه ياحبيبي والله وياك
بري الذمه لو اخذني الموت بجفاك
علي حبيت المنيه البيها الگاك

ليليه الموتي انتظر. يمه يمه
ويجمعنه ارضى لو كبر. يمه يمه
عمري كسرني بأخره 
وفوگــــهه امشي اميسرة.      يمه يمه

ـــــــــــــــــــــــــــــــــــ
خادم الزهراء ع ابو احمد الطائي

بصوت. مسلم المطيري

تقبل علي بهذا الوضع. يمه يمه


كلمات الشاعر
ابو احمد الطائي

نزله العباس ع وعلي الاكبر يفخر بهم الحسين ع ويخاطب زينب ع


نزل عباس وعلي. الشده راحت تنجلي
زينب الهم هالهلي.  زينب الهم هالهلي

اثنينهم هدوه سويه. وعلي هوس للكمر
تكفه يمدوخ الطرايد . يبو رايات الخضر
مايشيل الراس عمي الجيش منك منسطر
اوتسعه وتسعين منه. . مكومين عله النهر

اسد ويهوس الاسد   والبرز راسه انمرد
  زينب الهم هالهلي



ابو فاضل كف يمينه. وخيلهم كلها اعثرت
وناس ذباهه اعلى ناس. والرگاب اتشمرت
اوكر الاكبر بعد عمه. ويده بيهم اوجرت
واحد وتسعين فرقه.   مثل ماي تبخرت

الهاشمي والهاشمي. خذو. صدر العلكمي
زينب الهم هلهلي

كمر هاشم شد عليها وعلي شد حيله بعلي
وصاح ياعمي ابو فاضل. كافي خليهم الي
والله مايسون ذوله . انت الهم تعتني
روح للخيمه تگهوه. وانه افنيهم فني

بالحرب مية هلا صاحوا اهل المرجله
زينب الهم هلهلي

غاره ردفوهه اعله غارة    وعالمنايه تحزموا
وقائد ايصيح اعله قائد. وين نختل لو أجوا
روس ماتبقى برگـــبنا. وداعتك لو أوصلوا
وگوم خل نختل اگلك. الهواشم ضهضبوا

من علي وزود الكفل. واحد بواحد ختل
زينب الهم هلهلي


خطفو عقول الكتايب. علي الاكبر والكمر
وداخت الجيمان بيهم. من تعلوا عالنهر
اشجع الفرسان بيها. اوجوهم صارت صفر
وبنهار الطف يزينب شافوا انجوم الظهر

الأكبر وراعي العلم. خطفوا عقول الزلم
زينب الهم هلهلي

دحنت كاع المعاره.      من ابو فاضل غضب
وخبط زلم الحومه بيده.     وعلي كضلها الدرب
الواحد بواحد يضربه وينقسم ماينضرب
هذا بس عند الهواشم. الضرب يمحي الضرب

كربلاء ازلزلي اليوم يمحونج هلي
زينب الهم هلهلي

خادم الزهراء ع ابو احمد الطائي

بصوت. مسلم المطيري

نزل عباس وعلي
الشدة راحت تنجلي



كلمات الشاعر
ابو احمد الطائي

صاح الاكبر من نزل... لعمه راعي المرجله
وداعتك يابو الفضل...اليوم ازلزل كربله



راح اخض الحومه خضه ترتجف منها السمه
واطبر بروس الاعـــــــادي حتى تركع نادمه
وعلي مااتسمه الاكبر و ابن حاميه الحمه
انجـــان ماخلي المناحر تسبح فيض الدمه

احسب الجيش انسحگ. والرگـــــاب أمّّـفصله
وداعتك يابو الفضل...اليوم ازلزل كربله



فرصه من الله وجتني اعليه اشهد يالكمر
الكاع راح اطويهه بيهم واصل الاخر شبر
وراس اطگ براس عمي وظهر اكسره اعله الظهر
وخاف متكفي الوطيه عشره اخلي بكل كبر

انه گانوص الزلم... وسيفي مثل الزلزله
وداعتك يابو الفضل...اليوم ازلزل كربله



ميه ميه خل يجوني وانه اصول بوحدي
والمشارق عالمغارب تنطوي من ابتدي
لازم ايرد اعله گومه بلايه راس المعتدي
وانه وارث زود حيدر وابو الاكبر والدي

غيرتي غيرة علي... وزود هاشم شايله
وداعتك يابو الفضل...اليوم ازلزل كربله

هاشمي ورابي اعله ايدك بيه زامط واعتمد
اسد انت والتدربه يااسد يطلع اسد
سيفي يحصد بالمنايه وانه احل بيهم واشد
واتكسر اعيون الاعادي اخشومهم من تنمر

واحد بواحد عثر..... زودي منهو اليحمله
وداعتك يابو الفضل...اليوم ازلزل كربله

اليوم اصم الهوه بيدي وفنه اليشم الهوه
وراح اهز الكاع بيهم مثل فنجان اگهوه
الساگ عالساگ وحياتك من سمع صوتي لتوه
وراح اسد الشمس بيدي وفنه يوصلهم ضوه

الگوم مانطيها فرصه...والا اعدل المايله
وداعتك يابو الفضل...اليوم ازلزل كربله

انه موت احمر عليهم والله فارضني فرض
وين تشرد هالرعايع وانه سديت الارض
اليوم ماتنفع وحقك شرده مني ولاركض
والا اترسهه بجثثهم كاعهم طول بعرض

لا دخيل ولاعذر .... ياجفيل العايله
وداعتك يابو الفضل...اليوم ازلزل كربله

خادم الزهراء ع ابو احمد الطائي

بصوت. مسلم المطيري


صاح الاكبر من نزل. عمه راعي المرجله


كلمات الشاعر
ابو احمد الطائي

قصائد مولانا علي الاكبر ع

ام الاكبر تخاطب ولدها


ياضنوتي. ياضنوتي ياهو الاليه بغربتي
ماحسبت. لمن رحت
ياهو الاليه بغربتي

شلي بحياتي ياعلي وانت ارحلت يالغالي
اسودت بعيني دنيتي. وصار الكبر يحلالي
كلشي حسبته يالولد بس ما اجت ابالي
انه ابقى وانت التنذبح ويبقى مجانك خالي

ابدمعتي ابدمعتي. اتوضه كمت بدمعتي
عني اغفلت. وتاخرت
واتوضه كمت بدمعتي


ضميتك اليوم العسر. شو عسرت دنيايه
وعفت امك باصعب درب يالجيت اليه احمايه
ظهري انكسر يمه علي. ورتك اله تجايه
يالعفت امك موكت. عشگك للمسنايه

وبحركتي بحركتي. من همي اموت بحركتي
بهمي ابتلي. بعدك علي
من همي اموت بحركتي


نجيب الولد ونكبره. ونتمنه يبارينه
يحط أمه تاج لهامته. ويحط ابوه ابعينه
وابني علي هيبة نبي الوادم اموصفينه
حنيه بي كبر السمه وبيها علي مغطينه

وياحسرتي. ياحسرتي. راح وتركني بحسرتي
بصعب محن. راح الابن
راح وتركني بحسرتي

 
لو دورت ارض وسمه ماألگه مثلك يالرحت
ياوسفه غابت ضحكتك ومن ردتك يمه ايست
شيصير لو هاي السنه وجم سنه اتاخرت
بلكي اسبگك للنعش يوليدي ليش استعجلت

ابموتتي ابموتتي اتمنيت اسبگه ابموتتي
انفت الكلب. ودمعي يصب
اتمنيت اسبگه ابموتتي
ـــــــــــــــــــــــــــــــ
شلي بعمر مابي علي. يگصرهه الله ايامه
شلون انسى وحمل فركته الشالاني فوگ الهامه
كل عمره كضى بسهر وشد ابخدمتي احزامه
ويدعي الله اليه بكل صلا وبسجدته وبصيامه

ياوحشتي. ياوحشتي . بعده شيسدهه وحشتي
هسه اصبرت. لومه اصبرت
بعده اشيسده وحشتي
ـــــــــــــــــــــــــــــــ
رب العرش يتقبله. قربان اله وديته
وباعله رتبه ينزله. لوليدي ربي انخيته
ماقصر ومن كل كلب عن التعب باريته
يكفيني حتى ابموته. رافعلي راسي بصيته

ياكشختي. ياكشختي. بصيتك علي ياكشختي
لمن صرت. حد مامتت
.  بصيتك علي ياكشختي

خادم الزهراء ع ابو احمد الطائي

بصوت. مسلم المطيري


ياضنوتي. ياضنوتي.
ياهو الاليه بغربتي



كلمات الشاعر
ابو احمد الطائي

قصائد مولانا الرضيع

عبد الله الرضيع ع يطلب الماء من العباس ع


عيني عالجربه يعمي متاني جودك
ودري بيــــه العطش مايعبر حدودك
صبري والحيل انهدم
فزعلي يمشيم العلم.    عمي عمي



عمي املي جربتك ونهي عذابي
ارد اعــــيش ورايد اتهنه بشبابي
وكف ملك الموت وجنوده على بابي
والمنيه صارت اقرب من ثيابي

نعرفه مـــــاينضام العمه ابو فاضل
وعال بيهٍ العطش وانت عمي كافل
من الضمه كلبي انثلم
افزعلي يمشيم العلم. عمي عمي
ـــــــــــــــــــــــــــــــ

شدتي غير ابوفاضل من يحلها
روحي مو بس من كتر توجعني كلها
عمي عينك عالنهر والحومه خلها
اسكي كلبي ومن بعد عمي ارجعلها


دمعي مابطل هطوله وحفر خدي
ومن حرگتي ومن عذابي انمرد جبدي
وصلت الـكسرالعظم
افزعلي يمشيم العلم.    عمي عمي
ـــــــــــــــــــــــــــــــ

عمي ذبحوهه الترافه البيه جانت
وكل علامات المشيب اعليه بانت
عمري عام والمنايه اعليه حانت
وروحي من هالدنيه عمي اهوايه عانت


ادخيل عندك من عذابي الماگحمته
وانت ابن حيدر علي وارث شمرته
شبر بيه ماسلم
افزعلي يمشيم العلم.    عمي عمي
ـــــــــــــــــــــــــــــــ

كل مسيه تجي أسوء من مسيه
اذبحت روحي ومرمرتني الغاضريه
كمت ماحرك يعمي جفوف اديه
وحتى اصبع ما احس ضل صاحي بيه

بشاربك يابو الفضل عمري عكدته
امل واحد ضــــــــل الي وهوه انته
نزف كلبي وابجي دم
افزعلي يمشيم العلم.    عمي عمي
ـــــــــــــــــــــــــــــــ


الونه ذبحتني بغيابك شدلي حيلك
وغيرك انت ما اگلله دخيلك
عيني تبقى اعلى النهر وانا اندعيلك
عمي أخذ الماي واحنه الي نجيلك

الماي يوصلني اذا سيف بزنودك
بزودك اويـازود يتعله اعلى زودك
انخاك ودريبك شهم
افزعلي يمشيم العلم.    عمي عمي
ـــــــــــــــــــــــــــ

اسئل ويـــــــاهو يرجعـلي جوابي
هي هـــــاي الناس. شسوي. بعذابي
طفل انه وحاضر اشيعني غيــابي
وشنهو اليحصلون لو عدموا شبابي

ارجع وراوي العده شتعني الكفاله
النهر جيبه مجتف وجــره ابساله
خورس احلوگ الزلم
افزعلي يمشيم العلم.    عمي عمي



خادم الزهراء ع ابو احمد الطائي

بصوت. مسلم المطيري

عيني عالجربه يعمي متاني جودك


كلمات الشاعر
ابو احمد الطائي

نزله للرضيع ع


گومي شدي حزامي وعوفي المهد
انه اسد وبن الاسد يطلع اسد

ابن هاشم يعني انه المرجله
ولازم اويه اخواني اخوضن كربله
جدي حيدر شاخ صيته اعله المله
وعمي العباس مثل الزلزله

وراح اطب بيهم بسم حيدر مدد
انه اسد وبن الاسد يطلع اسد

بالكماط اخنكهم اواطلع بطل
لاتقيسي الطول قيسي اعله الفعل
جم جبان المـــــــات خايف مانزل
وحنه بدينه الزلم تصبح غزل

اهلي غزالت شوارب بالشدد
وانه اسد وبن الاسد يطلع اسد

انا اخويه الاكبر الـماينثني
وعلي بالحمله يوصفونه بعلي
خوش زلمه والشدد بي تنجلي
وانا الج هم راح اكول ادللي

يمه لبسيني الدروع وخل اهـد
وانه اسد وبن الاسد يطلع اسد

الغيرة بينه أمئصله ونهوا الصعب
وبالمهد وكلوبنه تحن عالحرب
گومي لبسيني ارد اكضلها الدرب
وينها الكالت علينه ننغلب

والدي يحل بعگـــايدها اويشد
وانه اسد وبن الاسد يطلع اسد

العمر ماريدنه يايمه العمر
شفت ابوي وعالكمر ضهره نكسر
شلون أصبر يالعزيزة احنه بعسر
ونار كلبي يحترگ منها الصخر

الزلمه بافعاله يدوم وينسعد
وانه اسد وبن الاسد يطلع اسد


خادم الزهراء ع ابو احمد الطائي

بصوت. مسلم المطيري

گومي شدي احزامي وعوفي المهد
انا اسد وبن الاسد يطلع اسد

كلمات الشاعر
ابو احمد الطائي

اتندمت من جبته وياي ما أدري ايشح الماي
اعصر كـــمت بديه
جبت ابني للمنيه. ما أدري ايشح الماي

عبد الله سامحني اعثرت من جبتك انه هنانه
مـــــا. أدري تجفي كربله او تگصي هيج ويانه
لوعت ضماك وحرگتك وشفافك الذبلانه
والــــــــــــونه البصدرك غفت كلهن سببهن انه

لاضحكه ضلت لاحيل.
بس الدمع منه يسيل
تضل ونتي سريه. جبت ابني للمنيه
ما. أدري ايشح الماي
ــــــــــــــــــــــ
موگد جمر كلبي استعر وبضلوعي ضل يجويني
من كمت تتلوه وتون وعينك تصدهه بعيني
وضاكت عليه ارض وسمه وماضل دمع يكفني
من گتلي ذابت جبدتي يايمه فدوه رويني

بچبده احسن الام.
ومايگدر الجفن ينام
اللوم كـــــله اعليه جبت ابني للمنيه
ما أدري ايشح الماي

ــــــــــــــــــــــ
عبدالله جان بضحكته مــالي البيت علينه
وجهه حرز من كل حزن وبحجيه ايسلينه
كل احنه نلتم عالمهد وكل احنه ايناغينه
ومن جبتـــه ركضت فاطمه وكلتلي لتعبينه

ضيم الدرب حيل جبير
وعبد الله يايمه ازغير
وما حسبتهه شبيه  جبت ابني للمنيه
ما أدري ايشح الماي
ــــــــــــــــــــــ
كلب العليله اعليه خذف من الطفل ناغاهه
وچـنه يگلهه اوياج اضل وهالحروحه ماراداهه
هي عليه صبت دمه وهوه بجه المبجاهه
وشكثر بية توسلت. عبد الله يبقه اوياهه

كالتلي الله يخليج.
الــدهر لايغدر بيج
عوفي الطفل اليه  وجبت ابني للمنيه
ما أدري ايشح الماي
ــــــــــــــــــــــ
شيصير لو يم فاطمه أجم شهر خليته
جا هسه مامر بيه عطش ولاجمر صارت ريته
عبدالله جـــــــا هسه كبر لو اخته امباريته
أشحصلت من جيبته بس كربتله امنيته

وياي حسبته ارتاح
هسه افطنت لمن راح.
مني شبــــــع اذيه. وجبت ابني للمنيه
ما. أدري ايشح الماي
ــــــــــــــــــــــ
بعد الحجي مابيه نفع من عندي راح الغالي
والحزن غيم عالكلب وصار الدمع يبرالي
صحته يبو وجه الحلو يايمه عاين حالي
بعدك صفيت بلافكر وفـــــــال النوايب فالي

اعليه انطفى ماي العي
ن. والكلب صاير نصين
روحي تضل شجيه جبت ابني للمنيه
ما أدري ايشح الماي


خادم الزهراء ع ابو احمد الطائي

بصوت. مسلم المطيري

اتندمت من جبته وياي
ما أدري. ايشح الماي


كلمات الشاعر
ابو احمد الطائي

القصائد الزينبيه والأسر

زينب تخاطب يزيد لعنه الله
لحن اهوازي


انه زينب يبن سفيان.     التهز الدنيه جلمتها
واهلي الذلت اهل الشام      والكسرت مهابتها
           انه زينب.   انه زينب

تئدب ياسفيه الراي من تكلم اسيادك
احنه اهل الصلاة والصوم واهل الفاحشة اجدادك
مجدنه الدين والتوحيد. وذبح حسين امجادك
وسوء العاقبه الخلاك تجبر على اسيادك

التتجبر عليها الناس.    تاخذ من كرامتها
واهلي الذلت اهل الشام      والكسرت مهابتها
          



الميت والعدل ينخاه وكلها تعرف بصيته
جدي البالعرش موجود.اسمه واسم اهل بيته
من اسم الله المحمو.   د محمد اجت تسميته
وقصركم ينهدم بيكم.  لو شلت ايدي ونخته


انه بنت شهد الله       لابوها وامها واخوتها
واهلي الذلت أهل الشام      والكسرت مهابتها
          

تعرف حيدره الكرار.  لو تتقاضه عن ذكره
ذاك المن يسل سيفه.  ابيك يرجف بگبره
ذاك الخله ارض صفين من دمكم غدت حمره
وسوه اجيوشكم طشار من اتخيل الشگره


علي شمر  مناحركم    ولا تنسون سحكتها
واهلي الذلت أهل الشام      والكسرت مهابتها
          

اذا ماتعرف بصيتي.    اسئلهم عن اخت عباس
ذاك المن نزل ليهم.      اجم شارب بشارب داس
خرسه صارت الحومه.  . ونكتمت انفاس الناس
وسيفه  يهلهل اعليهم  وراس يطگه سبعي براس

انا اخت الكمر ييزيد.    التنفضك نفض جبتها
واهلي الذلت أهل الشام      والكسرت مهابتها
          

وحگ الرافع السبعه.      ومنجي النبي أبراهيم
ما اطخ راسي واترجاك  ضيمك لو تردفه بضيم
كلها ادنگ لنه الروس.. وبس الوي شيمنا ايشيم
احنه مفخرة هاشم   وماينفعكم التعتيم

بزودي افخر اعليكم    وبت هاشم وعزوتها
واهلي الذلت أهل الشام      والكسرت مهابتها
          


خادم الزهراء ع ابو احمد الطائي

بصوت. مسلم المطيري


انا زينب يبن سفيان


كلمات الشاعر
ابو احمد الطائي

قصائد مولاتي زينب ع


وين امي الزجيه. وتشوف الصار بيه

من يوم الحده ضعني،،، لهاتي
شجن و الخوف يبسلي ـ،، لهاتي
نوايب غاصت ابريتي
أسر والسوط تاليتي
واصيحن يابعد بيتي.. ولهاتي
والگه احسين جثه اعله الوطيه
ــــــــــــــــــــــــــــــ
اصيحن من ضجر روحي... والمهه
مثل طفلة فطم تعثر.. ورأمهه
الحسره بروحي تتكسر
اشيل اجدامي ما أگدر
اعيال احسين تطشر.... والمهه
وترد الخيل وطشرهه اليه
ــــــــــــــــــــــــــــــــــــــــ
دار الدهر يايمه..... ولوانه
واجسر حيل من طيح... لوانه
غربه اطوف بيّه
السبي ياحيف اليّه
وصحت من جور أميه... لو انه
ميته ولايصير الصار بيه
ــــــــــــــــــــــــــــــــ
ليل انهار ادگ بالـصبر والهم
وجذب يايمه اجافي النوح والهم
ولاني بضيمه عاشور
الكلب بلآه مسجور
ولخوتي مگطعه انحور والهم
نياشين بدليلي تلوج بيه
ــــــــــــــــــــــــــــــ
المصايب يمه ابنيتچ لونها
وكسرن عودهه وأصفر لونها
كمت اتعثر من امشي
نوايب ذبلن هرشي
وصرت لا امر ولحچي ولنها
اسيرة والحچي ينرد عليه

ــــــــــــــــــــــــ
فرحهه الشماته الدمع. من سال
وكلبي من لهيب الخيم منسال
وحيده ومحد بحالي
الدمع والخوف يبرالي
منهو اليتبع اخباري و من سال

وخبره اشسوت أهل الشام بيّه


خادم الزهراء ع ابو احمد الطائي