السجاد ع يروي لزينب ع عن الدفن

هستوني اجيت أمن الدفن ياعمه حيره !!!
كل ماشلت واحد وگع لازم حصيره

تعبوا بشمس الضهر
ميزتهم بالعطر

ياعمه حيره ياعمه حيره
*******************
راح اسولفلج سوالف عمه حيلج ينهدم
حسين من كد ماتكطع كام ابد مانلزم
شلت صدره وصوت اسمع قفص صدره منهشم
حسين ذاك الچان خيمه شفته عاري بلاهدم

متبدي ماي أعله الرمل وشلون ألمه
بكد شذرت المحبس وأقل ياعمه جسمه

والقطع كلهن حمُر
ميزتهم بالعطر

ياعمه حيره ياعمه حيره
*******************

مثل اسمه هيج طوله هيبه الأكبر جنت اضن
زغير صاير جسمه أخويه ومايتعب بلدفن
عمه ليفارك اخيه غير لازم ينحضن
شلون يحضني يعمه وهوه ما عنده متن

اليشبه مُحمد بالشكل ياعمه صاير
نص جسمه باقي ونص مشه بدوس الحوافر

الدوس حافره گبُر
ميزتهم بالعطر

ياعمه حيره ياعمه حيره
*******************
مو كبر عبدالله لازم كون اسويله مهد
كمت احسه يكلي رايد بس دللو يلولد
عمه هوه زغير نحره وعل رمح لمن صعد
مايكفي وطاح راسه شفته بلگاع نمرد

كون الطفل هيجي عُمر متدلل وخير
عبدالله عمه أمن انذبح رفرف مثل طير

ضايع مناغه العُمر
ميزتهم بالعطر

ياعمه حيره ياعمه حيره
*******************
بعد عبدالله يعمه رحت يم راعي العلم
الفرات بصفه يجري وابو فاضل كله دم
عمه هذا اليوم ثالث باقي بعيونه السهم
عمه عباله احنه يمه لهسه وجهه أعله الخيم

مثله وفي بهذا الزمن ماضنه موجود
ماعنده راس أعله الجسم بس حاضن الجود

زنوده من الحر سُمر
ميزتهم بالعطر

ياعمه حيره ياعمه حيره
*******************

الموقف القاسم ذبحني وروحي طلعت كمت احس
ميت وضل فاتح أيده متاني حنه أمن العرس
ادري بالعريس اني يِحضر العرسه أمن امس
ليش عريس الهواشم باقي نايم بالشمس

ضاع العرس مثل الصدى ومترده لدموع
بلطف لگيت ويه الجسم مسحوگه الشموع

كسره ابد ماينچبر
ميزتهم بالعطر

ياعمه حيره ياعمه حيره
*******************

سجاد كريم العتابي ✍️

السيده زينب ع تزور الامام الجواد ع

عندي سوالف هواي
اكعد وحچي وياي

حالك مثل الضل بالطف ناشف نحره
ويه الماي شعدكم يا ولد الزهره

يعمه يعمه
******************
اجيتك عمه من الشام لاگيني
كسرتك ذكرتني بكسرت حسيني
يالعطشان كلت ارويك من عيني
دمع ماخله بيه السوك تدريني

عمه بجسمك شصار
نايم والسطح حار

هاي النومه تذكر گلبي بفد ذكره
ويه الماي شعدكم يا ولد الزهره

يعمه يعمه
******************
دليني عليك بيا كتر صاير
تعبانه ركضت هواي بالعاشر
يمك بالكت انسه كسرت الخاطر
وتبرد بالكت الله حرورت الحافر

تعرف عمتك أم عون
بجروح اليعطشون

افتح عينك عمه وباوعلي بنضره
ويه الماي شعدكم يا ولد الزهره

يعمه يعمه
******************
انه وگلبي اجينه بالهفته وشوگه
بعباتي فياي اسوي للجسم فوگه
بس اعذرني عمه شويه محروگه
احبها من اخوتي هواي مشبوگه

أشتم العطر زين
بيها ريحت حسين

من ودعته بيوم العاشر ضل عطره
ويه الماي شعدكم يا ولد الزهره

يعمه يعمه
******************
ياعمه رحت لحسين متحيره
زينب موش الاوله هواي متغيره
يحاچيني ردت ياعمه منتضره
بس شلون يحجي المنكطع نحره

مثلك حاله يا حال
هم جوه الشمس ضال

ميت يم الماي وماشرب گطره
ويه الماي شعدكم يا ولد الزهره

يعمه يعمه
******************
وصلت الجسمه و بذاك التعب كوه
وخدتني الحيره جسمه هوه مو هوه
عرفته تالي اخوي بريحت الخوه
كتله الحافر آه بجسمك شسوه

انته عمه مسموم
بس هوه بالاهدوم

جدك ضل بعازت من يحفر گبره
ويه الماي شعدكم يا ولد الزهره

يعمه يعمه
******************
عمه الكعده حلوه وياك يعيوني
لاجن راحن اروحن لا يشوفوني
بيه خوفه ضلت من يطگوني
اخاف بسوط ياعمه ويلحكوني

الذكره تهدم الحيل
العاشر عمه باليل

من ضليت افتر عل موته ومتحيره
ويه الماي شعدكم يا ولد الزهره

يعمه يعمه
******************
سجاد كريم العتابي✍️

( أمنية خادم )

حسين بكل محرم تبقه ذبلان
بالكت هالسنه متموت عطشان

من الگفه بالكت مايذبحوك
لحيتك زحمه بيها تصير تربان


وين الله ويُعبرك حافر الخيل
وميدوس أعله جسمك وين ماجان

بالكت لا حصيره ولا يالموك
ولا جسمك يضل محتاح دفان

بالكت للخيم ماتوصل النار
وما تركض أبين الخيل نسوان

السنه بالكت نذب هدومنه السود
ويرد مابي ضعنكم عطر دخان

بالكت ماتروح ام عون للشام
وميصيحولها ماعندج أخوان

بالكت هالسنه ميفتح السوگ
وميباوع عليها فلان وفلان

تضل هاي أمنياتي بكل سنه وياك
بالكت هالسنه متموت عطشان

(لسان حال ام البنين ع)

ولدي ودمعت العين
فدوه لضحكت حسين
شاغل وحده بالي

احبه وسافر بعِيد
هيه الدنيا شتفيد ؟
اذا مابيهه غالي
*
كتله حسين اخذني فراك مابيه
محتركه ويه زينب كون رجليه
اخذني وياك اصير بضعنك أميه
الحافر من يجي خل يسحك علِيه

لمن راح لليوم
چفني مزاعل النوم
وعلى حاله سؤالي

احبه وسافر بعِيد
هيه الدنيا شتفيد ؟
اذا مابيهه غالي

****
يوم العاشر المغرب اجاني حساس
محتركه الخيم وحسينج بلا رأس
مو بس گلبي انه اطيته اعز الناس
عون وجعفر وعبدالله والعباس

احبه وما أجامل
وطيته ابو فاضل
عذاب بدونه حالي

احبه وسافر بعِيد
هيه الدنيا شتفيد ؟
اذا مابيهه غالي

****
حسين ومحد يحبك ربع حبي
صح مو ابني انته بس ابن گلبي
من يوم الرحت ماوچدت دربي
تستاهل رباي ودمعتي وتعبي

قبلك ضاعت سنين
وهسه اني ام البنين
سبب صيتي ودلالي

احبه وسافر بعِيد
هيه الدنيا شتفيد ؟
اذا مابيهه غالي
***************^
ابن حذلم اجاني ومنخطف لونه
وكال وليدج انطه الجربه وعيونه
كتله وليدي سهله وخل يذبحونه
سولفلي الحسين بكربله شلونه

كلي حيل ذبلان
مات وهوه عطشان
طحت لمن حجالي

احبه وسافر بعِيد
هيه الدنيا شتفيد ؟
اذا مابيهه غالي

****
ارسم صورتك بلباب ونتضرك
وما ارسم حوارفر نايمه بصدرك
وغمض عيني وتخايل اشم عطرك
افتح عيني ولكاه منكطع نحوك

بيدي أشكف السيف
رسمتك ثاري بلطيف
يواقع ياخيالي


احبه وسافر بعِيد
هيه الدنيا شتفيد ؟
اذا مابيهه غالي

****
سجاد كريم العتابي✍️

يابو رقيه...عينك عليه
____________________
أجيتك مستحي مولاي متحير
ابوي انته احسك ولأبو يعذر
من يوم العرفتك حالي متغير
يالخيرك چبير أرحم هالزغير

يابو رقيه...عينك عليه
____________________
وجيتك معتذر مخنوگ بالعبره
لاتحرمني منك گلبي لتكسره
جبتلك بيدي گلبي وكونك تچبره
لا تحرمني من المجلس وعطره

يابو رقيه...عينك عليه
____________________
البچي مثل الصلاه مفروض يوميه
على الچانت اميره وهسه مسبيه
هذيج الصاحت اعله حسين رچليه
من جمر الخيم ياخويه مچويه

يابو رقيه...عينك عليه
____________________

مدري شبيه راحت بالهو سنيني
أخلص باقي عمري وياك خليني
شنو من طيبه شايل ماتحاچيني
نحرك ينزف واگف تداويني

يابو رقيه...عينك عليه
____________________
اخر مره هاي حسين سامحني
جرحتك وانته ما فديوم جارحني
شكد وادم أجت رادت تطيحني
ياخذني الذنب وانته الصلحني

يابو رقيه...عينك عليه
____________________
سجاد كريم العتابي

أمنية خادم )

حسين بكل محرم تبقه ذبلان
بالكت هالسنه متموت عطشان

من الگفه بالكت مايذبحوك
لحيتك زحمه بيها تصير تربان

وين الله ويُعبرك حافر الخيل
وميدوس أعله جسمك وين ماجان

بالكت لا حصيره ولا يلموگ
ولا جسمك يضل محتاح دفان

بالكت للخيم ماتوصل النار
وما تركض أبين الخيل نسوان

السنه بالكت نذب هدومنه السود
ويرد مابي ضعنكم عطر دخان

بالكت ماتروح ام عون للشام
وميصيحولها ماعندج أخوان

بالكت هالسنه ميفتح السوگ
وميباوع عليها فلان وفلان

تضل هاي أمنياتي بكل سنه وياك
بالكت هالسنه متموت عطشان


سجاد كريم العتابي

العليلة ع


حضرت روحي الكربله وكالولي تبقين
شلون ابقه واني مو هوه اتنفس حسين

صعدوا سويه ومديت أديه
وكالولي تبقين وكالولي تبقين
**********
حضرت الهدوم وتأجل النوم
ومنتضره باجر من ابوي يكلي اصعدي

لصبح تانيت سهرانه ضليت
صعدهم وبس اني كلي بنيتي ردي

لا بويه فدوه ما أضل وياك اسافر
كون اعله صدري بكربله مزاحم حوافر
وتصير موتتنه سويه بيوم عاشر

ولو يبچي من عدكم طفل بليل اشيله
هو اني خبره بالسهر تعرف عليله

ليسهر عليه ومديت أديه

وكالولي تبقين وكالولي تبقين
****************
ودعت الاحباب وضليت بلباب
راح الضعن كله وبقيت لوحدي بلبيت

بأول خطوتين شتاقيت لحسين
كتله انته بعدك بلمدينه واني حنيت

لو رحت شيرجعك بعد يانور العيون
الماعنده رأس أعله الجسم چا يرجع شلون
يا گلبي أوكف لا تدك حد مايردون

جنت اني طيره مدلله وحسين من راح
بلكاع نار واني حس تعبان الجناح

شفت المنيه ومديت أديه
وكالولي تبقين وكالولي تبقين
**********
يخلص بده الحيل شمعه وأجه اليل
دمعه اعله دمعه والوجه من دمعي متعوب

ضليت اتاني يوسف زماني
اشتم قميصه عيوني صارن مثل يعگوب

اعله حسين اسئلمن بعد ياجرحي وطيب
ماضل حلم يعتب عليِ لا بير لاذيب
نقصت عويفيتي صحت يابويه لتغيب

الناس وين اليوجعج تسأل عليه
اليوجعني اني مو مرض فرگت رقيه

لختي رقيه ومديت أديه
وكالولي تبقين وكالولي تبقين
*****************
من بعد الغياب ردولي الاحباب
رحتلهم اركض بس أجاني أمن الضعن صوت

لا لا تدورين مذبوح الحسين
وجسمه بقه بحر الشمس ما شاله تابوت

عيوني أعله حُرمه بلضعن صفنت ثواني
كالتلي عمه فاطِمه زينب تره اني
حط خلگه وي خلگي الحزن حد ما عماني

ياگلبي جاوبني ولو ادري انته تعبان
زينب عطرها من ورد شو بيها دخان

گلي سبيه ومديت أديه
وكالولي تبقين وكالولي تبقين
**********
ياعمه زينب مو گلبي شيب
بلقافله ماكو علي ولا شفت عباس

كالتلي الأكبر جسمه توذر
من بعيد بجسمه شفته تكطع الناس

عباس طب للمشرعه ومارد علينه
بالخيمه صار العگمي كد ما بچينه
من طاح ابو فاضل بعد گلت انسبينه

كتله ابقه يمي لو رحت شنسوي بلماي
مو مهم اعطش والمهم تبقه انته وياي

چفوفه رميه ومديت أديه
وكالولي تبقين وكالولي تبقين
****
سجاد كريم العتابي

لسان حال سيد الشهداء ع
ليلة العاشر


هاي هيه ... ليله اخر ليله يمكم ...هاي هيه
مو بديه ... متانيه ضلوعي الحوافر ..مو بديه

هاي هيه ... هاي هيه
___________________
ركزي بتفاصيل الوجه يازينب وشوفيني
باجر تره الحد العصر ماضنج تعرفيني
وانطيج نقطعه للوصف لو باجر أدوريني
اني الوحيد البالچثث دايس الحافر عيني

خويه زينب ... سهله خلي تروح عيني... خويه زينب
بس الاصعب... بعد يعني ما اشوفج ... هاي الاصعب

هاي هيه ... هاي هيه
___________________
شما يلتفت راسي احس يلگه الرمح كدامه
من كثر مي طب بالنحر يوصل لحد الهامه
صيحوا رقيه وخل سوه اليل هذا انامه
خل تترس احضاني تره باجر تترسه سهامه

يا رقيه... شبعي من احضاني بويه ... يارقيه
الاعوچيه... تسحك أغله مچان عندج .. الاعوچيه

هاي هيه ... هاي هيه
___________________
الحيره باجر وحّدي اطلع وماكو أخواني
والشامت يصيح بضحك يحسين ها ؟ شمتاني
وتخيلوا اني الوحدي و محَاوط بعدواني
أمنين ادبرلي بعد عباس واحد ثاني

مابقالي ... واحد يگلي أجيتك .. مابقالي
هذا حالي... انتظر يكعدلي ميت ... هذا حالي

هاي هيه ... هاي هيه
___________________

راح اختصرلج حالتي يازينب المهضومه
هم سامعه بميت قبل باگت الناس هدومه
هاي اني باجر حالتي زينب بنص الحومه
باجر انام وما أضن تخلص يخويه النومه

گلبي يلهب... اني باجر اعطشلكم ..گلبي يلهب
والله زينب .. راح اموت وبالي يمج ..والله زينب

هاي هيه ... هاي هيه
___________________

زينب ألي يمج طلب عوفي البچي وسمعيني
باجر اذا طيح الضهر والوحدي تشوفيني
جيبيلي وصله أمروتج حار الرمل يچويني
تلگين بلكت بالخيم من الشمس غطيني

والله حيره... شلون راح اسمعها باجر .. والله حيره
شكد چبيره.. أمن الخيم طلعوها زينب.. اي چبيره

هاي هيه ... هاي هيه
___________________
سجاد كريم العتابي

يوم العاشر
لسان حال السيدة زينب ع
عنده الذهاب من كربلاء الى الكوفه
_______
مجبوره عفتك خويه يحسين
حنيتلك بأول خطوتين

الى الوداع يالمنذبح
الى الوداع يالمنذبح
*****************
كون ميّ ينطوني هسه واجي يمك
شلون اشربك وانته راسك مو بجسمك
والله مشتاگه اجي ولحضني اضمك
المشكله ماتنشبگ لازم ألمك

راحت محنت خوة سنين
حنيتلك بأول خطوتين

الى الوداع يالمنذبح
الى الوداع يالمنذبح
*****************
تعِبت گلبي المحنه مو بديه
أمنيتي لو جوه الشمس نغفه سويه
انته ميت وادري ضل گلبك عليه
يا أخو يحن أعله اخته بالمنيه ؟

عل خيمه شفتك فاتح العين
حنيتلك بأول خطوتين

الى الوداع يالمنذبح
الى الوداع يالمنذبح

*****************
شيخ واگف بالخيم چنت شحلاك
شيخ بس الحافر مطيح عباتك
شما يمر بينه العمر تكبر غلاتك
يالصرت بعد الحسن أب لخواتك

ياهيبت الطف والصواوين
حنيتلك بأول خطوتين

الى الوداع يالمنذبح
الى الوداع يالمنذبح
*****************
امنيتي خاطر كافلي المكسور أجبره
شعندي غيره حتى قابل ما اعذره
شفت موقف وّصرخت يمه يزهره
الخيل روحه وجيه صعدت فوك صدره

يشگُف أبيش الماله چفين
حنيتلك بأول خطوتين

الى الوداع يالمنذبح
الى الوداع يالمنذبح
*****************
رتاح خويه لايضل بالك ورايه
انه من يمي وطلع صيت العبايه
باجر الضلمه اشبعها بضوايه
خويه لتهمك ابد چلمة سبايه

راح السبيه تكمل الدين
حنيتلك بأول خطوتين

الى الوداع يالمنذبح
الى الوداع يالمنذبح
*****************
سجاد كريم العتابي ✍️

لسان حال الأمام الجواد بعد مابقي
‏في حرارة الشمس لثلاث أيام في سطح المنزل
‏يُخاطب الحسين ع
‏______________
‏
‏حيل مرتاح بعذابي لان بجروحك احس
‏اني هم يحسين مثلك نايم بحر الشمس
‏
‏مثلك وحدي خلوَني      مصابك واهس عيوني
‏
‏انه الجواد             انه الجواد
‏***********************
‏ياحُسين السم ركض كل حيله بيه
‏مثل نار وتركض بضهر السبيه
‏اني حيل تعذبت وكت المنيه
‏جا شلونك من اجتك العوجيه
‏
‏انته يله محد يشبهك يامصيبتنه الصدك
‏ميت وعينك على اختك بلخيم من تحترك
‏
‏حزنك يمسح بالوني       مصابك واهس عيوني
‏
‏انه الجواد             انه الجواد
‏***********************
‏نايم بحر الشمس فاتح أديه
‏أمنيتي يتحول سطحنه الغاضريه
‏الخيل ياهلبت تجي وتسحك عليه
‏وتبقه جثتي أعله الرمل مثلك رميه
‏
‏الخيل تعبت وانته صدرك صار ألهن مُستقر
‏كون مثلك والحوافر توصل الحد الضهر
‏
‏وأهله مايعرفوني    مصابك واهس عيوني
‏
‏انه الجواد             انه الجواد
‏***********************
‏جسمي كامل جان لمن شيعوني
‏مامطشر عل تراب وجمعوني
‏بشغله بس وحده احسهم عذبوني
‏بلمعطشك يا هضيمه يغسلوني
‏
‏اعطش وللماي أوصل وذكر العاشر و ون
‏حيرتي حيرة رساله وجان ساعيها بسجن
‏
‏بچتالك يغسلوني !      مصابك واهس عيوني
‏
‏انه الجواد             انه الجواد
‏***********************
‏شغله تفتر بخياله ولحضه  متروح
‏ياهو فيالك حبيبي وانته مذبوح
‏نشف جرحك بلحراره وباقي مفتوح
‏تراب من كد السحك متروسه لجروح
‏
‏انه مسموم ودليلي تكطع بكثر الألم
‏وانته گلبك لمن يعطش توكف تشربه سهم
‏
‏يشاغل صفنت ضنوني    مصابك واهس عيوني
‏
‏انه الجواد             انه الجواد
‏***********************
‏بمسأله تشابهنه وحده انتَ وانه
هم ثلث تيام ما واحد اجانه
‏لچن راسك ماصرت انه بمكانه
‏وتجي بنيتي وتشتكي هذا السبانه
‏
‏وافتح عيوني لرقيه وتمسح ترابي بدمع
‏الخيل احسن بيش مني ومنطي للحافر ضلع
‏
‏وتگلي يشتموني   مصابك واهس عيوني
‏
‏انه الجواد             انه الجواد
‏********************
‏عشت مثلك بلشمس بس فارق هواي
‏من متت اني بقتلي هدوم فوگاي
‏وفوك صدري مايدوس الراح والجاي
‏ومامتت يابس كلب ومكابل الماي
‏
‏انه مو كدام اهلي سلبوا عمامه وعُمر
‏ولا رفسني بجعب رجله ولا يسب أمي الشمر
‏
‏ولا كلهم يضربوني     مصابك واهس عيوني
‏
‏انه الجواد             انه الجواد
‏***********************
‏سجاد كريم العتابي ✍️
‏

(استقبال محرم)

أخذني بديره ضلمه وغمض العين
أتيه روحي وندلك يالحسين

ماتنسي شكد تنذكر
ميت وفاتحتك عُمر

حُسين حُسين
**********
أرد احس باليوجعنك فدوه عيشني الألم
كون احس بالحضه وحده من أجه بگلبك سهم
مو دموع هدومي بيها كون مثلك بيها دم
ان شاء الله بهذا محرم أحترك ويه الخيم

أمنيتي كبال عينك يكضي عمري
وتجي الخيل وأكلك هاك صدري

يا نسمة بروده الفجر
ميت وفاتحتك عُمر

حُسين حُسين
**********
ماشفت طولك حبيبي بس وجه ضل بالصور
يجوز مارسموك كامل لان مطشر وذر
صعدت الخيل أعله جسمك وانتَ مكطوع النحر
كلها داست فوك صدر ماشفت حافر عبر

صعدت فوك صدرك خيل والناس
وضهرك يوجعك من مات عباس

يالنايم بشمس الضهر
ميت وفاتحتك عُمر

حُسين حُسين
**********
سنين عمري كلها هينه عندي بس شهرك مُهم
يالملبسني كرامه ليش باقي بلا هدم
احن وارسم اشتياقي رمح يطلع بالرسم
مستعد عمرين أنامن لو تمر بيه بحلم

هنيالي وفز وبيك حلمان
اول ماي انتَ يموت عطشان

تدري انته احله أمن البدر
ميت وفاتحتك عُمر

حُسين حُسين
**********
زحمه منك باقي عايش كون مثلك منذبح
عمت عيني وراس عندي وانتَ راسك عالرمح
بمجلسك مولاي حالي شمعه خلصانه الصبح
ليخسر عيونه أعله مودك هوه هذا اكبر ربح

عيوني مملكه وصرت انت سلطان
والله الما بچالك هذا خسران

من البچي عيوني حمر
ميت وفاتحتك عُمر

حُسين حُسين
**********
والله هاي ايام عمري صعبه من دونك تمر
بلضبط نفس الصعوبه زينب دوس الجمر
واكف بكل شده عندي شكد حلو وياك العمر
وراح هم توكفلي باجر من اطب وحدي الكبر

اموت ومن يجي عاشور اتانيك
واسوي بكبري مجلس والطم أعليِك

يغرك أمن دموعي الكبر
ميت وفاتحتك عُمر

حُسين حُسين
**********
ياحُسين ادعيلي رايد أمنيه بهذا الشهر
بلكت الخاطر عزائك يرضه عني المنتظر
اعترف يوميه اجرحه وعمره خلص بالسفر
يابو صالح ذنبي كطره وانت ماتهتم بحر

أوعدك كل ذنب ماراح اعيده
بمحرم نفتح الصفحه الجديده

وداعت الماتت باليسر
ميت وفاتحتك عُمر

حُسين حُسين
**********

سجاد كريم العتابي ✍️

لسان حال سيد الشهداء ع
ليلة العاشر


هاي هيه ... ليله اخر ليله يمكم ...هاي هيه
مو بديه ... متانيه ضلوعي الحوافر ..مو بديه

هاي هيه ... هاي هيه
___________________
ركزي بتفاصيل الوجه يازينب وشوفيني
باجر تره الحد العصر ماضنج تعرفيني
وانطيج نقطعه للوصف لو باجر أدوريني
اني الوحيد البالچثث دايس الحافر عيني

خويه زينب ... سهله خلي تروح عيني... خويه زينب
بس الاصعب... بعد يعني ما اشوفج ... هاي الاصعب

هاي هيه ... هاي هيه
_______________
شما يلتفت راسي احس يلگه الرمح كدامه
من كثر مي طب بالنحر يوصل لحد الهامه
صيحوا رقيه وخل سوه اليل هذا انامه
خل تترس احضاني تره باجر تترسه سهامه

يا رقيه... شبعي من احضاني بويه ... يارقيه
الاعوچيه... تسحك أغله مچان عندج .. الاعوچيه

هاي هيه ... هاي هيه
_______________
الحيره باجر وحّدي اطلع وماكو أخواني
والشامت يصيح بضحك يحسين ها ؟ شمتاني
وتخيلوا اني الوحدي و محَاوط بعدواني
أمنين ادبرلي بعد عباس واحد ثاني

مابقالي ... واحد يگلي أجيتك .. مابقالي
هذا حالي... انتظر يكعدلي ميت ... هذا حالي

هاي هيه ... هاي هيه
_______________

راح اختصرلج حالتي يازينب المهضومه
هم سامعه بميت قبل باگت الناس هدومه
هاي اني باجر حالتي زينب بنص الحومه
باجر انام وما أضن تخلص يخويه النومه

گلبي يلهب... اني باجر اعطشلكم ..گلبي يلهب
والله زينب .. راح اموت وبالي يمج ..والله زينب

هاي هيه ... هاي هيه
_______________

زينب ألي يمج طلب عوفي البچي وسمعيني
باجر اذا طيح الضهر والوحدي تشوفيني
جيبيلي وصله أمروتج حار الرمل يچويني
تلگين بلكت بالخيم من الشمس غطيني

والله حيره... شلون راح اسمعها باجر .. والله حيره
شكد چبيره.. أمن الخيم طلعوها زينب.. اي چبيره

هاي هيه ... هاي هيه
_______________
سجاد كريم العتابي

انتَ لو ماكو بحياتي اني وين ؟
الله لا يحرمني منك يا حُسين

يالوجودك نعمه
نور وكت الضلمه

الله لا يحرمني منك يا حُسين
______________________
كل خادم تقل هيبته ومقداره بين الوادم
بس انتَ يمك تختلف سلطان عاش الخادم
بضلمة ذنوبي من اطب مولاي اكلك نادم
شتعلّي بجفوفك تجي شمعه من عرس القاسم

لغير جرحك حتى ما انطي هتمام
حسين حط بگلبي جمره امن الخيام

كون اعيش بالچمه
نور وكت الضلمه

الله لا يحرمني منك يا حُسين
______________________
نكران ذاتك شي عجب لاصاير ولاداير
خاطر اعيش اني بستر هدمك مسلمه الحافر
عندي وساده من گطن لو نام ماضل حاير
وجانت وسادت حضرتك اتراب يوم العاشر

وصل بيك المرحله النُكران ذات
حتى احنه انعيش مسبيه البنات

شلون عاشن هضمه
نور وكت الضلمه

الله لا يحرمني منك يا حُسين
______________________
الناس مفتهمه الرزق لازم فلوس هوايه
يحسين بس هوه الرزق احضر عليك قرايه
كلشي ايتعوض بالعمر بس قالقتني حجايه
من مجلسك لو انحرم وين انطي وجهي بهايه

الله من يريد يبليك أبلاء
يحرمك امن المجلس وذاك البُكاء

قالقتني الكلمه
نور وكت الضلمه

الله لا يحرمني منك يا حُسين
______________________
من تنسد ابواب الفرج مايبقه منها شويه
ياخذني گلبي لكربله يم راحتي النفسيه
يم الضريح اشبع بچي واحجي الهموم البيه
يطلعلي صوت امن الكبر ياخادمي مكضيه

روحي لمن تختنك عدها انيس
تسولف الشباجك بيوم الخميس

خنكه وتهب نسمه
نور وكت الضلمه

الله لا يحرمني منك يا حُسين
______________________
لا لون بيها ولا طعم الدنيا لو مالونك
مسويتلي واهس بالعمر يحسين بس عيونك
دمعه وتطيح بنص بحر هيج اني اضيع بدونك
حسيت عقلي مكتمل لمن صرت مجنونك

انتَ لو ماكو اصبر روحي بيش
عيونك مسويتلي واهس حتى اعيش

وجهك اذكر رسمه
نور وكت الضلمه

الله لا يحرمني منك يا حُسين
______________________
سجاد كريم العتابي

ام البنين ع

كربلائي

لسان حال السيده زينب ع
مع ام البنين ع


______________

ماقصرتي يم عباس فضلج واجب انشكره
اول يوم بي شفناج هانت فرگة الزهره

**************
عوضتينه دفع الباب من جابج علي ويانه
ومن گلبي احس شلتي همومه وكثرت احزانه
رغم ماجنتي ويه حسين احسج جنتي عطشانه

لان عشتي العمر بيه
احسج يمي مسبيه
وهم رجيلج مچويه

وحسج لابسه و تمشين عبايه أمن الشمس حمره

**************
وحده تعوض ام حسين تجينه البيتنه ردنه
اشكر الله كل مصباح صرتي وحده من عدنه
من طبيتي هذا البيت نشّفتي دمع خدنه

اجتي الزهره احس عندي
ومسحت دمعي لبخدي
حسيتج حلم وردي

طفت لمن اجيتينه احس بداخلي الجمره

**************

نار گلوبنه وملكاج سوت نارنه بروده
يشهد الله من شفناج حسيّنه امنه موجوده
ونذر جبتي كمر عباس لهاي ايامنه السوده

يالشلتي صدك همنه
نحس الزهره اجت يمنه
ومن نتطشر أتلمنه

فعلاً انتي بت حزام احزام المنكسر ضهره

**************
اذكر مره صحتي حسين حط بگلبي من همك
شنو ماعندك ام بالبيت اني امك يبعد امك
عليك الولد مايغلون اجينه خاطر انخدمك

انه ولدي هل جينه
خدم يمك تخلينه
ولو نعطش تروينه

مو فدشي مهم الماي ارزقنه فقط نضره

**************
كونك سالم تكولين يحسين الولد سهله
صحيح البزر غالي يصير بس يحسين انت اغله
اذا لا سامح الله تموت ألمن باقيه عدله

يالمتروس حب وحساس
نذر فدوه ألك عباس
اغله من جميع الناس

شنو عباس يمه حسين فدوه يروحلك عمره
__________
سجاد كريم العتابي

ليلة السابع

لسان حال الحسين ع
عنده مصرع ابا الفضل ع

_____________

وصلته وكتله خويه وحركت بي
مو من طبعه يسكت من احاچي

مات عباس
مات عباس
__________
بعيونه النحبهن سهم مضروب ومأذينه
إحتاريت اجر بيدي السهم بس خاف تطلع عينه
حاولت اشيله للخيم كل اهله منتظرينه
ارفع جزء يوكع جزء عباسنه مكطعينه

اني ابجي وعليه تصيّح الناس
شيشيله ألك كطعنه عباس

مات عباس
مات عباس
____________
موقف ولا صاير قبل هالموقف استغربته
عباس مايرفض طلب كل عمري وياه عشته
إيوخر براسه شعجب كل ما ألي قربته
گلي بعد ساعه منو اليشيل راسك انته

بجسمي هسه انته كاعد تشيل
بس شلون بيك أبجيت الخيل

ومات عباس
مات عباس
____________
توسلت بس ماكعد لا گام من أمچانه
محد بقه لهاي الخيم عباس رِد ويانه
تدري برقيه تنتظر كالتلي ما ينسانه
اني ادري ما يبطيّ لان يعرف شكد عطشانه

حتى بموتته عباس وفاي
مات وزنده حاظن جربة الماي

ومات عباس
مات عباس
____________

امن الخيمه جيتك للنهر ودموعي ترسن دربي
اليوجعك خويه شنو يالجنت راحه بتعبي
كال ارد ادليك الجرح يحسين صير بگربي
الشلع گلبي مو سهم زينب الشلعت گلبي

انه وياك راح اعله الثره أنام
المحد شافها يشوفوها بالشام

مات عباس
مات عباس
____________

لمن وگع يم النهر ماردت واحد يدري
بس كلها عرفت بالخبر من ايدي لزمت ضهري
اركب بنفسي يا اخي وعامود خيمة خدري
مو ألا يتربع شمر طيحته الاخذت عمري

يا خويه صحتله رايح الوين
هاي النومه كسرت ضهر الحسين

مات عباس
مات عباس
____________

سجاد كريم العتابي

مولاي الاكبر
حال السيده ليلى في السبي

عيّنيني زينب امشي ما أكدر
الحيل مات أبموتت الأكبر

جان الوجه مثل الصبح
بس غيّر أرسومه الرمح

يمه يمه
________________
بجماله .. إستحاله
بشر بي ينوصف

لكيته ... بمنيته
ابد ما ينعرُف

علي اليشبه رسول الله الكُبر وتربه بين أيدي
ماضل بالحرب حافر ما دايس على وليدي

زين وبقيت بكربله عدله
شفت الحوافر غيّرت شكله

مايحمل أوليدي جرح
بس غيّر أرسومه الرمح

يمه يمه
_______________
حبيبي ....لمشيبي
كلت هذا الذخر

مُنيتي .... بأمنيتي
ينزلني الكبر

يشيّعني ويغسلني جنت بيد أبني اتمنه
وصارت أمُنيه امن الگاع جسم أوليّدي ألّمنه

ارد احچي للخلاني محنيه
گوم اكعد امك هسه مسبيه

جان الوجه يضّوي وسمح
بس غيّر أرسومه الرمح

يمه يمه
_______________
أبنوحي...وجروحي
علي جان الدوه

شهگتي .. بخنگتي
احس هوه الهوّه

جمال اثيابه من وجه مرتب ابني من يومه
بس بكربله شفته الوادم سلبت هدومه

محسبه جنت تذكار اخليهن
مو ميت ابني هدومه شعليهن

ثوبه بسحكهم منفتح
بس غيّر أرسومه الرمح

يمه يمه
______________
يجيني ... حنيني
يأثر عل نضر

الزمه ....و اشمه
اريد امن النحر

واذا مذبوح ميخالف اريد وليدي اشتمه
مچان بصفه خلولي اموت بكربله يمه

خلوني يمه لبيتي لا مارد
اني و علي نغفه بكبر واحد

جرحي بعد ما ينصلح
بس غيّر أرسومه الرمح

يمه يمه
_______________
زماني ... رماني
بسهم اسمه علي

ذبحني ...وتركني
ولا واحد ألي

الأذه گلبي بالعاشر وخله ليلى معلوله
من شفت الحُسين أوياه متمدد على طوله

غذبني شيّب حالي هل منضر
ما ادري ميت هوه لو الاكبر

ربحي علي ومات الربح
بس غيّر أرسومه الرمح

يمه يمه
_______________

سجاد كريم العتابي