المماطلة دي أكتر شيء ممكن يحرق الزول من صماصيم قلبه.....
يعني ما فارقة معاهم دماء الشهداء....
يا مجلس عشان ما اتحرق حشا زول فيكم....
ما فقدتو نور عيونكم ما فقدتو حشاكم ما فقدتو جناكم...
ما حاسيين بالألم بتاع أسر الشهداء ما بتساهرو ودموعكم في خدكم...
ذكريات أولادكم في كل ركن البيت...
يااااخ جيبوا حقهم دعواتهم ما بتقيف وانحنا ما بنتراجع مالم يتم القصاص...أو نهلك دون ذلك. 💔

اكتر شيء محزن إنه نحنا صابرين ومستنين وما عارفين راجين شنو المهم في حاجة مستتنها لكن هي شنو ما معروفة 💔

هتجيني ناس ناطة تقول ليك مالك والحاصل شنو....
عاينو ما معني انه ختيت كلام ولا فيديو في كلام مشاعر وأحاسيس يبقي انا عايش اللحظة دي....مرات الكلام ده ما بحرك فينا شيء لكن بكون شعلة تغير ولحظة تفكير وانتباه لغيرنا...في ناس كتيرة نحنا بعيدين منهم وما عارفين الحاصل عليهم شنو فامكن بكلام أو فيديو ختيتو أو رسلتوا...نقدر نوصل ليهم مجرد شعور انه انتو في بالنا....في كلام كتير لمن اكتبه هنا أو انزله في #سكة_فرح...بتجي بوراهو فضفضة وراحة بال لناس كتيرة... الكلام الانكتب كان دافع ليهم يحكو يرتاحو يغيروا.....وفي النهاية تكسير المجاديف راقد 😄 فالناس دايما ما تاخد الموضوع بشكل هزلي مرات الحاجات دي بتغير حياة ناس💜 #سكة_فرح 😊 ربنا يسعدكم💜 ودام الفرح بيكم وفيكم❤

Mõhâmměd.Ãhméd Ømãr:
#بخل..


ليه ما بنظهر مشاعرنا إلا بعد ما الزول البنحبه يمرض او يموت ليه وقت نحنا فينا نفس طالع ومارق ما قلنا ليه لمن زولنا سليم ما اتكلمنا وصرحنا ليه.
اكتر الحاجات البتلخبط افكاري وتجوط راسي وتزعلني إنه بعد زولنا يتاذي ونحس أنه هنفقده نجي نظهر مشاعرنا.

يلا الإحساس البقتل إنه لمن الزول يتعب ويمرض تجو تتعاطفوا معاه وتحسسوا بضعفه الحاجة البتتعمل هسي وفي كل المواقف دي ما بتزيد الزول إلا ضعف...

فعكس الناس المن البداية محسسنا باهتماهم ويومهم ما بحلي بدونها واصلا ما برتاحوا إلا يدخلونا في يومهم وينكدوا علينا فشنو من هسي لو في اي حاجة قولوها نحنا هسي قاعدين واهو عايشين معاكم و بتقروا كلامنا..

وفي النهاية كلامي ده ما داير منكم تعاطف لو شايفني كعب قولوا لو انا ما بنفع معاك صارحني بس ما تخلينا نخد توقعات أنه نحنا لينا مكانا عندك وأنت ولا هاميك...

فعلي المعموم
دي فرصة انه نغير طباعنا ونفتش الحولينا ونشوف منه العازونا ومنه الخاتينا سكة عبور بعد يمش ويعدي ينسي ويهدم طريقنا فشكرا للأيام الجميلة الكانت معاكم وشكرا للايام الحزينة الجارحة لأنها بتقوينا وتخلينا نشوف الدنيا بصورة أوضح...

أجمل اللحظات في حياتنا مفروض نستثمرها صح أهو جا العيد وراح وما انجزنا شئ من الكنا مرتبين ليه إننا نزور اهلنا ونصلكل الناس البنحهم لكن لظروف كتيرة ما قدرنا نحققها....

بس ده ما بمنع أنه نحنا لازم نعاد الظروف عشان في حاجات بالتهاون والبرود بتروح وما ظنيتها ترجع حاجات كتيرة بتجينا فرص فلازم نستقلها ومن الحاجات أشخاص ربنا رسلهم لينا عشان يكونوا الشئ الجميل في حياتنا ومن واجبنا لشكر النعم شكر الله....

فشنو ابقوا عشرة علي الحاجات السمحة وما تمزقوها بمجرد أفعال و مواقف لانه هي اتكونت في سنين فصعب نفقدها في ساعات،لكن مرات في حاجات بتحصل في ايام ويصعب علينا فقدها طول العمر فالناس تشوف الجزء اللامع من كل ظلمة تقع فيها ما تخلي الظلام يسيطر حتي علي نفسك الحلوة....
فسلاما عليكم..
#سكة_فرح
محمد_أحمد
للإشتراك :-
قناتي علي تلغرام سكة_فرح

https://www.tg-me.com/sektFar7
.......

رقم التواصل تلغرام
0996677299
واتساب برودكاست:
0116631459
وقروبنا علي فيس بوك

https://www.facebook.com/groups/917559268321517/

#انثر_الخير

انحنا لمن نطلع من القيادة دي هتكون.... احلي دمعة فرح... وأشد ألم فراق.... واقوة وعد لزول مفارق... 💜
#اعتصام_القياده_العامه🇸🇩💪
#لم_تسقط_بعد 🇸🇩
#السودان 🇸🇩
#إضراب_شامل_السودان 🇸🇩
#دم_الشهيد_غالي #دم_الشهيد_ماراح 🇸🇩

ايماناً منا بأهمية التعليم ودوره الفعال في بناء المجتعمات ، ودعماً لمسيرة الطلاب المعسرين التعليمية والسعي الحثيث لتوفير المعينات الدراسية لأولئك الطلاب عملت المنظمة ممثلة في مكتب الأيتام على إقامة مشروع الحقيبة المدرسية وتوزيعها على أسر الأيتام الذين تكفلهم المنظمة وبعض الأسر المتعففة ..

المشروع استهدف توفير كافة المستلزمات الدراسية من حقائب ودفاتر وأقلام وغيرها من الأدوات المكتبية ، لتكون داعماً لمسيرة الطلاب خلال عامهم الدراسي ورفع التكلفة عن كاهل تلك الأسر ..

في هذا العام تم توزيع عدد 300 حقيبة في عدة مناطق مختلفة ، المشروع عمل على ادارته مكتب الأيتام ومتطوعي المنظمة ضمن برامج المكتب في محور التعليم والإسناد الأكاديمي

شكراً لكل من دعم وساهم في إنارة طريق علم لكل طالب ، شكراً فاعلي الخير الذين ساهموا بمالهم وجهدهم وفكرهم ووقتهم ..

شكراً متطوعي منظمة تكافل الخيرية ..

سائلين الله التوفيق والسداد لكل الطلاب وأن يجعلهم ذخراً لأسرهم وللوطن ..

ساهموا في دعم كفالات الأيتام بالمنظمة ودعم مسيرة تعليمهم ، ليستبينوا بهذا العلم سبل الحياة ..

فاللهم قبول اللهم إخلاص اللهم إحسان ..

سُبحانكَ اللَّهم خيرَ معلمٍ علمتَ بالقلمِ القرونَ الأولى ..

للمساهمة في كفالات الأيتام بالمنظمة عبر تحويل الرصيد :

MTN : 0924438443
ZAIN : 0905140914
Sudani : 0111540073

للاستفسار :
0924438443

#مكتب_الأيتام ..
#الحقيبة_المدرسية ..
#منظمة_تكافل_الخيرية ..
#شركاء_في_الخير_شركاء_في_الأجر ..

سيلفي🤳.. السلفيات دي عبارة عن زكريات بس... يعني ما اي زول أتصور معاك بكون عندوا ليك مكانة في نفسه ولا في قلبه مرات بتكون بس تغير مزاج ما اكتر.... وفي ناس كتار اتصورو معانا وضحكوا معانا ويومنا كان كله ليهم بس... كانت كلها فترة عشان هو يقضي وقت ما اكتر فشنو ما اي صور ليك مع زول تعمله رفيق درب وصحاب شديد ولا حبيب ملازم... في ناس كمية ما اتصورنا معاهم بس قلوبنا مبروزة مع بعض... الحكاية كلها انه الما عاملك بقلبه... ما تأمن ليه وهو بتظاهر ليك بالجمال والطيبة... ندمنا كتير علي المظاهر والتعامل بحسن نية عشان كدا.... ما كل زول يستحق ذاك العنا... لكي نسعدها..في ناس بتسعد معانا في افراحنا و بتسعد باحزانا.... فعلي العموم ما نخضع نفسنا بجمال اللسان والشكل والتعامل... القلب أهم وأصدق ❤️بقلمي #محمد_احمد💜

في ناس كدا جميلين في حياتنا... ما معروفين للناس وما مشاهير.. مندسين كدا علي روحهم ديل الناس الممكن يطلعونا من mood اللامبالاة الي mood انه لسه نحنا بخير و قويين بما فيه الكفاية انه نواصل ديل مفروض نواجه بيهم الدنيا ونمسك فيهم قوي.... 💜💜👌

جميل ان تبتعد من الاذي... مرات كتيرة في حاجات مفتكرنها جميلة من الظاهر تجي تقرب منها تلقاها أقبح من أقبح شيء لاقيته...
وفي ناس كدا جمال خلقة لكن لا خلق ولا أخلاق بتصنعوا انهم كويسين وطيبين بخدعونا بتعاملهم الجميل بس بجي وقت ينكشف فيه المستور... وكل الحلو يتبدل بالشين وعدم الثقة وشعور الخذلان والابتعاد عن أي جماليات كانت معاهم حتي الذكريات الحلوة بنحاول نمسحها... حتي الأماكن الكانت فيها ما بنجي بيها بتغير كل شيء.... وبعد ده يجوا ودايرين يتعاملوا معانا زي الاول.... في مقولة بتقول كترت الغلط بتموت (المشاعر) و اي شيء.... فعلي العموم كدا ما بنردكم خايبين فتاني التعامل بدون اي شي حااااف وحااااف 🤝💜

عندما تخلدوا الي النوم لا تنسوا الدعاء للشهدة... ولا تنسوا ان تتحصنوا... ولا تنسوا أيضا مسامحت كل من اساء لك....
العفو والعافية تصبحوا علي خير 💜وعلي نصر من عند الله يعزنا به🤝🇸🇩🇸🇩

الـ mental hygiene day
#أصوات_المدينة
#aswat_almadina
💜حبيت اليوم وناسه 💜
باقي الكلام ↪️
نادي التنس...
يمكن كمية الصدق الشفتها هناك ممكن تخليك تقول الناس دي ما تطلع من هناك الناس تعتل خيم وتقعد لأنه حرفيا كنت بشوف السودان في عيون الناس دي كنت بعاين للتباين الشكل لوحة امنتيت تترسم وتتعلق عشان كل ما تجي خاشي النادي الناس تذكر إنه دي من الحاجات دي كنا فاقدنا بمعني الكلمة تعبر وتقول ألفي نفسك عشان و بدون خوف لمن قلنا #حنبنيهو كان الوطن حاضر في الجيل ده... امبارح لمن شوفت تفاعل الناس مع كل المواقف والناس الجات حكت الضغوطات اللقتها والاعتقالات الحصلت ليها كنت حرفيا بتذكر ناس عللي عبد اللطيف والنضال الوقف في وش المستعمر ودار الخريجين والحاجات الكنا بنسمعها وانحنا في المدارس تتجسد في هذا الجيل انا لو قولت اتكلم عن النضال الصنعه الشعب ده في إسقاط النظام كفيل جدا يخلينا متيقنين إنه مهما حصل زي ما اتعاهدنا من البداية الثورة الشوارع لا تخون وزي ما بنقول (ما خاب من ملأ الشوارع بالهتاف)  الناس دي كانت بالجد بيناتهم قالد وطن يعني انا من المعتاد لمن نمشي، اي حفلة في نادي زمان كان لازم تتخرب او نهايتها تكون شكلة واليوم يبوظ لكن تفاعل الناس، مع الغناء الأمس ولمن كل الناس، دي تقيف وتغني بلغة الشوارع اللهي كانت حاضرة في كل ملاحمنا... العامية  ولغة الشوارع الاجبرت المجلس يعترف بيها في اللحظة دي انا كنت فخور جدا 😭 إنه كلنا نادينا بيها وغنينا بيها الشوارع دي هي السقطت النظام البائد والشوارع دي هي العتعمل كل التغير الجاي ما معني نحنا بنتكلم بلغة نفهما برانا وعملناها في الشارع يبقي ما عندنا لا هدف ولا احلام ولا طموح عاين عايني نحنا من الشارع ده #حنبنيهو عارفين كيف نحنا عاوزين نطلع الشارع حملات توعية عاوزين نفتح مراكز  تمنية عاوزين نعمل كتير وكله من الشارع نبداه سوا .. كنت بشوف في عيون الناس الحلم الجاي السودان الجاي الخير الجاي والسودان الدُقري... اوقسم بالله الناس الشفتها امس، رغم الانكسارات هي بضحك ورغم الاوجاع بطبطب علي بعض في نظري ده الجيل ده جاهز جدا من كل العتاد للبناء... حاليا داير نبني نفسنا والحولينا.... انا في موفق امس خلاني اتأكد الناس دي اثناء ثورتنا دي في كمية حاجات اتغيرت فيها نظرة اختلفت فهمنا اي شيء اختلف الثورة حاليا واقع يدرس وياريت لو يبقي منهج نتغني بيه ويتحكي... امبارح واحد من الشباب اللاقيتهم هناك وانحنا طالعين بعد آخر غنوة وقع رفعنا برا الزحمة ديك يتنفس شوية وكدا فجأة كدا اشوف بت جات وقفت جنبنا وبقت تسعف فيه وكدا انا كنت بعاين ليها عين غريبة يا رب البت دي بتعرف جات معاه المهم كمية أسئلة كدا في راسي مع انه لمن جينا مارقين بيه وكنا في الجهة الجنوبية للمسرح قربين المسرع في كوم بنات جنبنا طلعنا جنبهم بس فتحوا لينا الطريق... دي جات من وين سبحان الله ما عارف بس بقت تقول لينا جيبوا ليه حاجة حلوة يأكلها وبتاع وقفت معانا لمن اطمنت عليه هو كان يده شبه اتشلت... الدم فيها وقف هو شكله اتكل عليها كتير المهم حركتها ليه وبتسال فيه حاسس بيها يقول لا لحدي ما قال ليها اي فكت يده وانتظرته لمن بقي كويس فاتت وقالت لينا ربنا يكتب سلامته.... الحاجة الداير اقولها انحنا كان كل فهمنا زمان اي كلام يدور بين بت ولد واجب انه تربطهم علاقة يا أمه الولد بفكر في البت او العكس لكن أمس شوفت حاجة تانية فهم تاني.... عموما كدا الناس بقت من بداية الثورة فاهمة و واعية و زي ما بنقول #عواليق_نخليها
وهسي خليناها اوقسم بالله😂✌️
انحنا دايرين كل خميس، نمشي نادي التنس نقعد قعدة زي دي ونحكي لي بعض تعالوا نعمل منصة مفتوحة نخلي جزء من الناس، ولو ما كلهم تحكي ونعلم بعض يااخ لو ما في مسرح دايرين نقعد مع بعض... وين المشكلة يا ريت ياااخ نعملها...
أمكن ما قادر احكي كل الحاجات الحسيتها بس يا ريت يكون كلامي وصل نحنا عاوزين نعمله شنو..... ما نقيف ما نقطع ما نرخي الحبل ما حاجات كتيرة كدا.... عشان ما نتعطل💜...
وكانت كل الوجوه والاجناس و تباين اللهجات حاضرة كان الحضور السودان 🇸🇩🇸🇩🇸🇩🇸🇩
#حديث_ثائر✌️✌️🇸🇩🇸🇩
#Mohd_Ahd_Omr
#mood

محتاحين عربات تنقل الأضحية اي زول بقدر يساعد يتواصل معاي واتساب 0116631459 💜فرحة عيد تكافل 💜

كل عام وانتم الخير لنا ودمتم يا أعز الناس 💜عديكم مبارك وينعاد عليكم بالخير واليمن والبركات 💜 والصحة والعافية... لا فاقدين ولا مفقودين 😍😘🤝❤🇸🇩🇸🇩مدنياااااوووو ✌🇸🇩🇸🇩

محتاج عربية ضروري لتوصيل أضحية امدرمان الصالحة من الشجرة 💜ضروري بالله🤝
واتساب 0116631459
لو اتوفرت اتصلوا علي هنا
0966589849
💜

عاوز اقول ليكم كلام ما اي حاجة بكتبها او بنشرها تبقي بتعنيني.... مرات كتيرة بتكون رسائل لي ناس ما بتحب تحكي ولا تتونس، ولا تفضفض فبقدر الممكن بحاول اوصل ولو جزء، من الحاجات البتعرفها عنهم عموما كدا.... ما كل شيء ظاهر هو الحقيقة 💜

قبل ما تقول الزول ده كعب شوف نفسك... نبطل ننتقد في الناس ونعاين لسلبياتهم... صلح نفسك وشوف الناس💜