^

‏فقدنا في ليالينا مواعيد . . وفقدنا " ناس "
‏مشوا معنا الطريق أكثر من اللي مافقدناهم

‏حبايب كم دعينا الله عساهم مايرون الباس
‏وعسانا كثر ما اشتقنا لهم في يوم ؛ نلقاهم

‏يجي يوم ويجيب الله لنا من صوبهم نسناس
‏طرف علمٍ يطمنّا .. ونَعرْف "إنّا وحشناهم"

^

محبتك أمانة .. لا تفكّر بـ يوم انساك
انا حالف احفظ لك أمانتك لين تعود

^

من زبنتي في قفص صدري من اوّل مرّه
‏ارتعي بين الضـلوع ؛ وغامري ؛ واتّجهي

‏انتي بوجهي .. من ايام الحياة " المـرّه "
‏ليـن اخليهـا مـع الأيـام . . تكره وجهي

^

صرت من حلمٍ حقيقي لـ حلمٍ مستحيل
( اعترف به ) بس ماله على الواقع محل

مارضيت اكون هامش ، ولا ارضى بالقليل
لو وطيت الجمر ؟ عادي ، ولا آطا في وحل

^

‏ما يوجع البعد . . لكـن الولَه يوجع !
‏يا آخر اخبار قلبي ، وش هي اخبارك ؟

‏مدري متى آخذك وامشي ولا نرجع
‏وأصير دارك . . اذا حنيت لـ ديارك

^

حتى فساتينك بها كبر وغلوّ
‏عشانها تحضّن جسدك وترتديك

‏أسود حلو أحمر حلو أبيض حلو
‏حتى اللذي ماهو حلو - حلو عليك

^

الليل طعمـه سهر ي نـآيم ليلك
ليتك تذوقـه مثل مـآشفتك وذقتـه

الحيـن وقتـي بسولف لك وبشكيلك
مو انت قايل حـلآة الشـي في وقتـه

^


هذا ومني وعد ؛ تبقين لين الزوال :
في ذمة القلب لو مـ انتي على ذمتي

..

'

ما كل ّ حيل الحب فيني ولا مل ّ
ولا وهَن عود الشعور .. وتمايل

ولا تغيّر لك "حنيني" ولا قل ّ !
الله يدري وش لك القلب شايل

'

'

مرت بعَدك ظروف ووجيه واصوات
ولا قدرت ؛ انساك . . ولا تناسيت

ماهو صحيح ان ( كل متوقع آت )
ياما توقعتك تجي وانت ماجيت !!

'

'

على نفس الطريق اللي لقيتك فيه قبل اعوام
طرى طاريك واجتاحت دموع العين خدّيني

كفلت الدمع بيديني مثل ماتِكفل الايتام
على ماهلّته عيني . . جزا الله خير يدّيني

رحلت ولا رحل طيف الغلا والشوق والالهام
وعلى قل التواصل والهجر ماطحت من عيني

'

,

حنا القديمين مهما الوقت غيرنا
‏نحط نفس العطر ، ونثقّل القهوة

,

^


من قديم الوقت لاخر ذكرياتي
‏والله إن قلبي من الضيقه تشوه

^

ما أشتقت لك أشتقت لي وياك
‏أشتقت أحس إني على حيلي

‏نسيت نفسي ما قدرت أنساك
‏تغيرت دونك تفاصيلي

^

يا حبيبي يومٍ يجيبك يجي له ( معنى )
‏قيمته من قيمتك >> يا غايتي ومرادي

‏مد حبل الوصل قبل ظروفنا تمنعنا
‏واترك التاريخ .. لا الهجري ولا الميلادي

‏مانبي تاريخ " متميّز " لـ اجل يجمعنا
‏لا اجتمعنا انميز التاريخ لو هو عادي ..!

^

مناقع الما ، ذكريات المقفّين ،
‏مثل السحايب بلّلونا ، و راحوا

^

ماكنت احبك حب نزوه وتدرين
بالخافي اللي عنك ماهو بـ خافي

واذا نويتي عقب حبي ؛ تحبين
أمانتك حبي الشجاع السنافي

^

يِزْعلني إنْك تبدّي الناس والناس
‏مافيهم اللي كثر قلبي سعى لك

‏ما أعاتبك إلاّ وأنا أكّـن الاحساس
‏الي على رغم المسافة .. وفى لك

‏ما للشعور الي ورا الصدر مقياس
‏وما فـ الحياة الي عوَضكْ وبدالك ؛

‏أمانتك قلبٍ " رهيّف وحسّاس "
‏عليه من جرح " القسى " دير بالك ..