باسم الخاقاني


وأبتسملك
تضيع تلگاني اعله جفنك
انا اغانيك .. لوّن صليت حزنك
انا موالك .. لوّن غنيت حملك

وأبتسملك
من وره البردة التعبر الريح اشوفك
احجي گلبك لو ردتني
من وره البردة التعبر الناس أحسبك
من وره عيونك احبك

آه وعيونك نست چفي وبجتني
ياهو يمسحلك دموعك
ياهو يدناك ويشمك
ياهو لو طاحت سماك
جناح وأبساتين اچملك
گلي ياهو
اليبتسملك

علي الشيباني


كاسر الليل وحزنك بكاس
وشرب لما تطفة من النعاس
ليلك طويل بگد حجي الناس
بصفصافة باعو شجرة الياس

ثاري البعد هم صار تعويد
ولياحريمة وياك شتفيد
جديتك بكثر المواعيد
شيترسهن اچفوف المگاريد

سل روحي هجرك مارحمهة
أصبع وچاكوچك گرمهة
غم روحي لمبذر كرمهة
گصو جلد منهة وعظمهة

مدري شتريد الناس مني
محسود حتى من أرد أغني
امنيتي اراوي اليوجعني
للخلگ وحجي الكفرني

يعين الله ليعشگون لبعاد
ولا خيط بي طاري الهم اضماد
منهو لبحالة الصاير ارماد
وحزني اكبر من جروح بغداد

ايروح وين الجامة گلبة
ولناس بلچرمد تصلبة
فشلة ليدلي يتيهة دربة
ولزگة امس صارت تغلبة

من ما نصح وياهم الحيل
وغثهم الهندس وبعد الريل
جبت الگمر ونجومة وليل
وگتلهم الغثاكم يشيل

مامش شجاع يفشخ العوز
ذابحني ذبحة ضرف محزوز
راسة ومچلبة برگبة الكوز
عشرة امسودن وية لحروز

شحة مواقف هاي الأيام
وصنگر الديرة من العصر نام
ياروحي بسچ ماهم اولام
مايدك صدرة الصدرة من جام

رخصج حيل المستحة البيچ
الياحد بعد ياروحي تاليج
ادلي ع كيفج مانة راعيج
ولو ضعتي اگصة الينشد عليج

ولجفل من عيونج النوم
الخلة ماكو اگدارج اهدوم
لزگيج كاسة من لسموم
لو شفتج تحنيلهم يوم

عدنان البركي


اذا منعوا صلاة الكاس اطوف شفايفك وسكر ...
وكاسر شوفي بعيونك
لماهيس الجفن يخدر
واشم من منحرك روحي وخالط منحر بمنحر
لما احس الهوى كزبر ...
وسمارك .يشتعل ..تحمر .

يشنهو انت ...
عنبر ..مستوي ..مهدر.
شكر ..بمرورتي .اطشر
(ديرم)عالسان اسعر

وشلك بيه ...
إلك بيه ...ركش فاله ..ونگش خنجر
مرض.. .وستاهلك واكثر
كسر..بس لاتضن يجبر
سوادين ...ولفايف صوف .وحروز .وسريد اثياب (واتضغبر)
وملامة وين المعثر ....؟

وبعد..بيه..!!

خلعت اعرافهم غيمه
شحيحه وطاحت اعله البر..

مالك السيد



البارحة

تگاودنه لهفة ثنينه
وطحنه بسوالفنه عشگ
طيحت نده اعله سنينه

وبللنه كل يابس عطش بينه فراگ
وطگ بينه كلشي الچان صحره وما طاگ

وجيوبنه انترست ضحك
وگلوبنه انترست شوگ

وطاح اعله كذلتهه الهوه
وگالتلي حط روحك طوگ

ولمينه لتبده وحـسبنه ايامـنه
البارحه اتشلبينه فوگ احلامنه

وگالتلي..
گالتلي رمضان وگلت چا شيريد
مو كفره اذا نحسبها هل ليله العيد

ودنگت ضحكة وشفت روحي بلونهه
وما ادري خيعون الشـمس خيعونهه

علي على الله


گدما يدگ ويجيب غياب
تمنيت ابدل گلبي بالباب
من گد محنتي عيوني سرداب
والعمر راهي والنفس ضاب

لو ادري هلگد يحضن عزاز
ماصير طين ابقه اعله التراب

كلشي الفرحنه ماله داعي
اشهر شخص بالديره ناعي
التابوت بين الناس ساعي
كسر الناي وطغه الراعي

صاحي الوطن بالبوگ سكران
والسكران من البوگ واعي

سمير صبيح


انت خليك بمكاني
وگلي بالحل اليريح ..
بيّه صوت يهزله دنيا وما گدر بسمك يصيح
طحت
ما خذت النصيحة
وهي مو كل طيحة طيحة

فرق بين تطيح صخرة والجبل كلّه يطيح

انت خليك بمكاني الصار بيه يصير بيك
بنص نهر لازم تعبره
و تلتفت ما تلگه اديك
انا هذا الصار بيه ..
بنص نهر عافني اديّه
و عـ الجرف بس الشماتة
وانت گلي شلون اصيح !

انت خليك بمكاني نهر و تعوفه الجروف
انت الحنيّن قسيت شلون ترحمني الظروف ؟
صرت اعده من العده
و طلعت وعودك ندى

جمرة ظليت بغيابك وارضى لو ترجعلي ريح

محمد الوسمي


چم دوب
اغلط وأشتاگ
واخزر گلبي بجيوبي

أذكر مره
الك حنيت
ولزمني ببابكم ثوبي

اعتنيتك
والشبر صوبين
وباخر نضرة ع الشباچ
بالخطوة اعثرت مرتين

يما تدري
اعز چفيتك اعله العين

وامسح دمعي برداني
اذا گلبك گبل وازاك
بعدك گلبي وازاني

أذا تشتاگلي وأشتاگ
ياهو العايف الثاني؟

لجلك طلگت دنيا
ورفضت من الگمر نوره

وكتبت بگلبي گبر ابليس
خاطر محد ايزوره

تدري الثلج صفنة ماي ..
چا ما تومي بحروره؟

اغار من النهر بالليل
ياخذ للگمر صوره

واسهر ليلي ما انامه
اخافن بالحلم لا اهيم

ادگك بيا وتد للروح
اشد اجدامي بجدامه

تخيل نايم ومشدود
عينن نوم البلامه

واعاين ع المرايا تراب
وانفخ روحي ما ادري
عفتني تراب

بعدك عيشة الفانوس
يذبحني النسيم الهاب

احس روحي صليب اموات
امس نام اعله متني غراب

تنيت الموعد البلطيف
شمدريني الحلم چذاب؟

وغصبا عني ع الأيام
خلگي ايطول

من يفقد اعصابه
شيكسر المشلول

دمر بالروح وسولف
كل الاعرفهن

اكو چذبات بس
محتاج اصدگهن

شلت روحي
هوه من المي
ونزعت هواي احبنهم

احترام لگلبي وهمومه
مثل المحترگ مجبور
لمن ينزع اهدومه

ألا انتَ عشت بالبال
رغم ما گلبي ما همك

شو صاير بخور السوگ
ياهو يعامل ايشمك

علي الخليفاوي


وبيك هيل
الليل وزلوفك خوات
اتمغط بزيجــــك گمــــر طگ الزرار

سكرتني
الديرم بشفتك خمر
مو حلگ من عظعظيته اتگول بار

زعفرانك
عــــود ذابل
من اشبگك يصعد ابطولـي الصفار

ومن اجيسك
يوگع البرحي المرطب
والچفوف اتلوح عنگود الزغار

ومن احط ايدي
اعله خزنة مستحاتك
كل قفل ياخذله مفتاح بوقار

لاتروح
الفرگه موت
ومنجل افـراگـك ترف يطلبني ثار

واعدتني
العشره دوم
العايش بروحي دهــــر ماگله جار

وبيه نار
منين ماتكمشني حار

كاظم الركابي


طيح يم العين ليلة وشيل جفن موادعي المتروس هم
و السنين اشما جزت تقرانه باجر
وتزغر عيون القصيدة الما لگت بالعين دم

وهذا حال السجة يذبل لونها بعين اليطيح
واليموت بگلبه صوته يموت ظنه !!
ومدري ليش تفرفح جفوفه اليصيح

يا وداع المستحين
اتخضر السكتة اويه طولي وتكتل الجلمة بحزنها
وتطفه دنيا اگبال غيرك !!
وانت تدري العين من يثگل دمعها اتسد جفنها

الگاع تبرد من تگود الغيمة ريح
النجمه تشرب مستحاها وتزغر بعين الشمس حد ما تطيح
وانت ذااااك ... اشما جزيت بروحي ليلة الصفنة تاخذني اعله رسمك واستريح

يااابعيد الفرگة دنيا تبوگ حيل امن السنين
وانت غاااد اشما حلمت اتضوگ وجهك تگعد وماتلگه ادين

وغاد من رمشي لمض وجهك نهار
وغاد من حزني لگيت دموعي ضحگة وطافحه بحلگ الزغار
وغاد من روحي لكيت الدنيا انت

وانت انت
وين ماادفنك يطك شوگك جديد
اشما يشح طيف الرسايل تكبر الظلمة ويمر ليلك بريد

الظلمة موت التايهين
واحنه صدگ البارحة ومامستحين !!

ياغربتي ...
استاهدت رمشك حمامة ويا سما اتلگاها جنحك
عيش سكتة ... وموت جلمة اشما تمر ( اااخ ) اعله جرحك

ياعزيز اسوالفي المحد عرفها
والرساله الضيعت عنوانها اتموت بظرفها

ياهو يلگاني امن اضيعك ؟
ليش ضميت العطش بعيون غيرك
خاف ما يقرون دمعك

10,000 صديق بالقناة .. كل الحُب لكم و لدعمكم المستمر ..🤍


#قصيدة_وشاعر

عريان آل سيد خلف


تشريني ...تبيعني ...
للسوم ...
حدي اوياك وارضه
اوها فضاة الروح ..
خلك الكبر ..
للعطش وافضه

حتى شوكي ...
اشما ثكل ,يسهل ..
او بعضه يعين بعضه
ياملح جرحي .اشوكت ..
منك ....ابچوية وصل نحضه
وانته غيمي المايجل ...هابخل ؟..
غيم الديم لارضه ..؟
وحنه ...
ذوبنه الوجد ...
والصبر بينه اوكات كضه
جنه ...
مطبك للفرح ..
والوكت ..
عد ..وعماد شضه
واحد بلومه ابتله ...
او واحد ..
حنين العطش عضه
يلي تجري ويه النبض ..
شلك ؟..
عله التجري اويه نبضه
تعتب ..
او شنهو التعب ؟
وشتنفع المجتول عرضه؟
يالونستي بشوفته ..
اوموتي اللذيذ...
ابليل لحظه
لاسمارك يستحي ...
او لاطيفك ايوجر واكضه
وادفن بعينك وجد ...
لاصاير ...
او لا اعله احد
واشتعل بالاه ...
لمن تستراح الروح ..
وابرد
والحلم اجفوني اعله جفنك ..
كون ...
عين بعين تنشد
خاف تزهك عبرتي ..
اودمع الجفن ..
كترين ينهد
يالغوي ..
او كحلك طبع ..
ماضاف ..
جفنك يوم مرود

يالعله اجتافك ...
يحط ..
الليل ويرد يتفرهد
يالحلو ...
او حلوين شفنه ..
او غيرك ..
الدلال ماود
نشتهي انشوفك ...
مثل لهفة كلب ..
يعكوب وازود
يالعليك اتعودت ..
لاظل جفن ..
لا عين ..
لحد
وانته شباج الفرح ...
جاليش ..
باترف ريح تنسد .؟
وك عليك اتغربت ..
عمري
وعمر دنياي ابعد
لا وصلت الغايتي ..
او لاني ..
ابليالي الوصل مسعد
كلي :
ماينفع عتب ..
بلجي..
العتب لو رخص يرتد
حتى ابطل ونتي ...
او شوكي ..
ارد انسى الروح فرضه
واحد ابلومه ابتله ...
او واحد ..
حنين العطش عضه

بهاء سوادي


يفتر براسي الحچي السكران ،
والدَم ،
والرغيف
الليله گلبي الحار ،
دَگ باب الشته بدمعة الصيف..

دِگ ولك سكران يـ بني
دِگ حزن مهضوم دِگ

غُربه زوّگنـي الشته
بـ هوسة اغنيّه
وسالفة دمعه
ومواويل
وعشگ ،

دِگ ولك نبضك ملامـه
دِگ حزن وجهك علامة ،
وسَبّل دموع الجفن

ماتعبره اللّيل اذا مامش حِـزن،

دِگ ولك نبضك رجيـف ،
أبچي خطوات الشوارع للضياع
وانـوي أنام ..
احط راسي اعلى المخده !
براسي يتمشى الرصيف ،

عقيل العرد


اني ادري بيش انبعت
وانت اغلى من هالسعر
بس كافي وكتك خلص لازم يبيعونك

ما مقتنع بالدرب
جدمك وكف وافتهم
وخيالك بديرتك يتمشى من دونك

آية انت وتعمدوا
بالعكس يقرونك

فوتت كل الفرص
واحلام عمرك بعد ما ترغب عيونك

من تحس روحك ملك
بس جيشك يخونك

تكره ضواك الكبل
وتغيب كبل الشمس
وتظلم ظنونك

وتتندم اعله الصدك
جي ما تضم الحجي

من جان لونك حلو
محد عرف لونك

من جان طولك جبل
مديت حبل الوفا
وصعدوا على متونك

لا تمد روحك نهر
ما يشربونك بعد همهم يعبرونك

اتشظى ضيع انهزم
لا تضل يمهم ولك
باجر يحجمونك

واحسب حساب الهلا
مو عاليروح ويرد
تشمرها الشلونك

#قصيدة_وشاب

منتظر سعد / بغداد


لا تحبني الدنيا موسم
وانه ما عندي غصن يغوي البلابل
لا تحبني
الشيب لاح زلوفي سكته
وبيه منشار العمر

كل لحظه ياكل
لا تگرب وانت برحي وانه گاع
من تطيح بحضني تتطشر حلاتك
لا تجيني الغربه ترست كل فراغي
وبعد ما عندي وطن يجمع شتاتك !
لا تگربلي الشمس شباچي ارمد
ولا تحرك چفك بحجة سوالف
انه ميحركني معضد
غض جفن عينك عليه

وصي عينك لا تدور بيه كحله
ولا تحاول
تتعب وما تلگه مرود
وحضني ما ضل بي دفو وليلك جحيل
وانه اخاف بحضني تبرد
وانه خشبه وضايع ابستان صبري
ومره نارك تشتهيني
ومره تاخذني الچفوف الما اعرفها
و مدري وين اتريدني امتد

لاتدگ بابي يخايب
لا يفز بيه صباي
انت ماي
ولا تظن بيه انه گاع
انه فوگ الماي
هم اتبده ماي
ياهوگلك بيه تلگالك ربيع
شنهي جيتك ليش جاي
وخاف لومك بيه يگصي

راح اسولفك علي
انه المتعب الشفه من الشفايف
وانه من چفوفي تعبت الزلوف
وانه المتعب الضلوع من الضلوع
بس بعد ما بيه حيل
و هسه تعبت الچفافي من الدموع
جان خلگي ايصير في وكت الشمس
ويصير راگ
كل زند مر بيه لاعبته بهداوه

وكل نهد يغويني احط فوكه زراگ
ليلي جان اوسع من عيون الاحبها
وهسه بيه الليل ضاگ
سيرت يم كل ظلام
بچفي شايله شمس
وسيرت يم كل صراخ
وصار يحچيلي همس
انته اجيت اليوم متأخر عليه
انه الاتمنيته بس لو جاي امس

فقرة #قصيدة_وشاب هي كل جمعة

نستقبل مشاركات منكم لشعراء شباب


* بالضغط على الهاشتاك هذا #قصيدة_وشاب
تطلع الكم كل المشاركات السابقة بالفقرة

هاشم الخزاعي

منين الغوث ؟ اذا چتالك ظنونك
حلمك من يروح بعيد
يتيه وينخطف لونك
شما داريت .. تتدرفع بصدرك آه
وتعرض دمعة بجفونك
شتسد يا باب ؟ .. شما سديت
حزنك يفضح عيونك

يا گلبي الحزن.. مو باب
الحزن ناعور ؟ لو دولاب ؟
لو عين انچفت ع الباب ؟

يا گلبي الحزن غيمة ....؟
واذا مو غيم ، ...
من يغسل ذنوب الباب ؟؟

يا گلبي الحزن ليلة ؟
واذا مو ليل ، چا ليش الغروب صواب ؟!

و اذا يكبر يشيب.. يموت
شعجب حزن المگابر شاب ؟؟

يا گلبي الحزن محراب
الحزن كلسا يذبنه بباب
الحزن من تچهب الصحره
وتصد عنك
وانت تراب ..
الحزن هم فرح... بس چذاب !!

محسن الخياط

فيّ البرتقال


لون بوصافك اتعشگ
جبل من الصبر يشهگ
تحن يمته؟
شوكت وجه الثلج يعرگ
تلمست الجرح بالليل
وال يم الضوه ادنيت
ردت اعرف نتل لو شگ
سمعت الروح ونت بي
كاغد منتهي ملزگ
وياهو يصرف ال ملزگ
تگاطيع وصبر مابي
گبل ما جيسه يتشگگ

واذا تلحگ
وأذا دنياك مثل ام الغزالة بـ ليل
ماتدري وببنها توهمت تسحكَـ
فلاهي اتضر
يلن ابن الغزالة يطيب
يحمل سحگة امه ولا بعد يزهگ
المطر شم الورد من دنگ اعله الگاع
وراح يبوسه من دنگ

صبح كلك صبح
وارموشك مرايات
وانگوط وربيع بطولك معلگ

ل لمك والتم انه وياك
والتف بيك واتطبگ
واشوفك شوفة القداح
لمه من يريد ايطيح
والتف لف جگاره عليك واتشبگ
شوصفك وانت روح الماي
وانه شلون فَــي البرتقال زغير
وين اعله النهر يلحگ
يمن طبعك ثلج ويلوذ بيه الصيف

ولو هب البرد بهواك نتمشرگ
أحبك ردتك بكل لون
أذا ابيض
واذا اشگر
واذا اغمگ
يلن لونك مثل لون الچمه العطشان
من شبگات گاعه يصير لونه احرگ
ويلكشني البرد واشتاگلك وأحتام
تطلع بالجنح سبگ

يا أول نبع مبهوره بي حلوات
ملهوفه امهاتهه علي
غنن للعشگ مطبگ
وحده تشيله الـ چكليت
وحده تصير فَــي عليه
وحده ادوف حنه
ووحده بي تطلگ
يگنطار النخل ومنين جبت اللوز
مو بعده النخل والچمر بعده ازرگ

اجر الليل بيد وبيد اسيس بيك
حد الگيشك واغرگ
وأفز والگه الوكت بي طول
واتچوه خضر ع النار
اثارينـي الخضر ع النار
وانه روحي مثل روح النخل لو صارت بجريد
والجريد ما مامون يتشرگ
وراويت الجرح لـ بن امي
عافه وراح
بعد ياهو لجروحي يشوفهه معوگ

معتز سامي الحمداني

جَـيسة ياس )
...

شَـعـرچ ... صُبح فُختايات

إصابيعچ ...
طعم غيمة نعاس ...، وسالفة في ياس

عيونچ آخـِـــر الغنوه ..،
وبداية صحوة الگمره على البستان

تشاورني ....
برذاذة غبشه جاست توها طيرة ماي

تمد فَـي التراچي .... لطفل گلبي بكل صبح شارع

بي يلعب طفل گلبي

بي حِـفّـاي ...
أنه ..، وگلبي
نركض ..... مثل ريحة ياس

مصطفى جواد


الصدك مرتاح هسه وكلبي خالي
شلت من بالي ناس امتعبه بالي

جنت ياهو الاعرفه الغالي اسمي
وغير امي بعد ما عندي غالي

بعد مو اني ذاك الينغث هواي
اليجرحونه ويبين لا ابالي

شنهو الشفته منهم غير الجروح
ركضت لناس ما تسوى انشغالي

اريد لوحدي اعيشن مثل الهلال
وحده وعاش عالي ومات عالي

انه بظلمة رايد مو بس ارتاح
لا ماريد يمي يضل خيالي

دنيا وبيهه ناس تجامل بناس
يتعب من يضل بيهه المثالي

ما مجبور اجامل بالهوه الحار
واسمي اليچوي ابو النسمه الشمالي

ما مجبور اسوي عيوني شلال
لل احتاجيت دمعه وما بجالي

بادرت وسألت هواي ع ناس
لاكن من طحت محد اجالي

اثاري وياك حد الوكعه العزاز
ترجع تالي وحدك تبقى تالي

لا تسأل يجونك من يعطشون
يحب كبلك تندمت بسؤالي

كبلك مني شربو ماي العيون
زلال ومن خلص ذمو زلالي

كاظم الرويعي


ورّد ألتفّاح يسمر
وألارض لبست خضار

ورّد ألتفّاح يسمر
وأنت ماورّد وصالك
إوبالليالي عله أعيوني
أيحوم يمدلل خيالك
وين وديت ألمحنه
يا حبيبي
وأشجرالك

ألدرب ضيعني
وضعت
كدر واهموم أشبعت
والخمر شفتك جعت
وإن لگت عينك بدالي
عيني ما تلگه بدالك

بالدمع رويت عودك
وأنت ترويني مرار
ورّد ألتفّاح يسمر
وألارض
لبست خضار