مصطفى عاهد


چف أعمه وجزيرة هم
وأظافر سود حنتهة ألجلد وألدم

اشوفك وين
بالظلمة الكحل طافي
والسچة.. شمع متعوب.. ضي حافي
يدروبك خناجر شوچ
ادورك وين
يا أول سفر للروح
ويا آخر ذنب بلدين

صَنهب شوگي غنوة بديرة طرشه وفار
غنيت الحطب للنار
من چان الدمع غافي
وطشرت التتن بالدم
صحت وحدي
يل طبعك حمامي سنين الي متانيك
خل نلتم

صحت وحدي
اغني الغبشة رازونه وضوه لمسجون
واهيمن بالعتب مرسال چف وعيون
والظلمة بزوية تموت كتر العين..
اشوفك وين
مذبوح وخفگ جنحي بلحن حزنين
حزن وامي وحزن صوتك

يمن دمعي وحزن دمي عُبَر شطين من صوتك
تتن والمعبر ايامي ومواليدي
ياا يمته..؟ شكبر عيدي
اشد عروگي واتعناك
واوصلك لحد هناك
اصفر والنزف يضوي عله عيوني
واكلك يا وجع لوني

بواچي من الشِعر والناس حد آخر نزف بالروح
ليش تروح؟.. وتجافي
انته آخر رسم للضحكة ضي يطگ عَله شفافي
بالغفلة
هزِر سدرة الليالي تمر عله رسومي
وسواجي الخوف
تكبر والحزن صافي

حزن ورد الصحاري المات بحلامه
خَدَر والعثرة موقف بالندم والشم
حزن يكبر سِكْر بالدم
والفرحة گمر طافي

ادورك وين
والكلشي گلب خواف
ذاك انته وهذاك آنه ولا ننشاف

احسان عكوش

الفرج يمته الفرج يا يوم
انا بنادم ترة
وع الظيم مو معصوم
انا البچاي انا المهموم
انا التايه الما مرتاح
انا المهموم انا الماجاي
للدنيا وجزاني اللوم

انا ذاك الينشدوني وأگلهم زين
حتى بساعة السودة
انا الراكض ركض چادود
انا الكشاخ بجرودة
انا الطاح ويبس عودة
انا الساعاته معدودة

انا الما طگ ضحچ سنه
انا الماخوذ حزن الناس من حزنه
انا المكتوبله مايوم يتهنه
انا التعبان بس محد مسح متنه
انا الخلصها كون وكون يتمنه

أيهاب عيال الظالمي



افز من حلمي .. افز متعوب !
مشه الصفصاف بضلوعي قصايد فيّ ..
گد ما بالدرب تانيت ،
انه وجه و گفه انذليت
انه ليلية أرِد فختاية سكرانة ياخذني الغصن للبيت
شِلب يستنكف من الـ "هاك" .. تانيتك
و مثل ما احچي البگلبي من اطب للحَضرة حاچيتك

و مشه الشباچ بضلوعي و عبرني الفيّ ..
منو مثلي يخاف عليك ؟!
احترگ دمي و طحت بارد
و من تتأخر انتَ برجعتك للبيت ..
تنام امك و اظَل گاعد
هذا انت ، كل ليلة تفارگني ..
گبلك محد مسويها بس ظِلي
بعد ما اريد ترجعلي
احبك ، بس اعيش لوحدي احسلّي

افز بالظلمة .. افز متعوب
و ادوّر جيوب كل اغنية ياهي الباگت عيوني !
مِن تعبر جنازة "خويه" چم زفّة "احبك" تستحي بگلبي
شِتسَمعَه و يرِد گلب الظرف محروگ ؟!
انه سِبّاح سِندانة عشِت مخنوگ
و مشه الطوخ و صرت نخلة تدوّر فيّ
من احلم بيك .. افز متعوب !

إِرحَم غربة اجدامي ..
حَنضل حتى من تنداس ،
الطَعِم يصعد لگلب الراس
إرحَم غربة عيوني ..
هضيمة الباب يتنوع مِن الشباچ
إرحَم گلبي كل ما اجزه يدّمر الشارع شيب
إرحمني و گلي "ما احبك" ، اريد اكتب !
سنتين القصايد باردة بروحي .. قصايد فيّ

افز من تضحك بدوني .. افز متعوب !
هذا انا ، اسكت من يمر اسمك
انه كل ما يذكرونك ابوس اسمك
إِخذ طولك .. دَم سنون كل مِنجَل سراب اخضر
و إِخذ وجهك .. احبك حتى لو تكبر

ضرغام لطيف


هذا همّي . حيرتي . ظنوني . وهواي
دموعي چوياتي وشگاي
دروبي كلها الـ ماشي بيها وخلگي ماي

وهاي روحي الـ ماعرفها
شـ ماگلت شوفوها تنحب
تستحي و ( تختل ) وراي

وهذا گلبي الـ مبتلي
وشايل خطيتي سنين ماطاح اعله راي

مدري يا عابر ضحكله
وصدّگ الـ دنيا وهواها
وصاحته و ( گاللها ) جاي

وهذا لوني
همّه الـ يگولون لوني
مالي بيه عِرفه واگلهم من صدگ چا هذا لوني

وذنّي الـ يلوحك دمعهن لو حچوا بأسمك يضيعن
الـ ذابلات الـ فاگدات
الـ غورگن ( كلما ) ذكرتك

اي گبل چانن عيوني
ذنّي كلهن وآنه وين ؟

كاظم الركابي


من يطيح الليل واحلامك غميجة
ماتطفي الماي جمرة
ومن تمر بيك العوافي يطول عمري
واعلگ ارموشي شمع و وساده گمرة

وردت اعذرك ...
والعشگ نجمة بعيدة وعين المحبين عثرة
وليش اعذرك ؟
وانت شتلة خاطر وعطشان صبرك
لا لگيت ابمستحة الحبوك گطرة
ولا تصح غيمة وتمطرك
تذبل اگبالي واشب نار اعلى ورقة

اطفى سكته وعمري يندار اعلى عمرك
لاني عشت عيون شذره
ولاصغت روحي اعلى اصبعك
ولاتصح للموت سچه وافتح عيوني واتبعك
امنيلي الحيل وانشدك
كون امد ايدي اعلى گلبك !!
والزم الحسره التوّجعك

وليش اعذرك
وانت كحلت السمه بتعبي وسماري
ولاتعب وياي صبرك
وذاك چفك
عاند الحنه الغريبه وگتلي من چفك حلال
ونزلت دموعك تطفي شموع حلمك
من گلتلك ؟
ياثمرتي : ضوگ غيري من السلال ؟

بغيري وازوك اشكثر بس ما شفتهم
وگتلك يضيعوك بالظلمه البعيده وگتلي اندل
وگتلي بس ضويلي عينك
اصعب اعلى اهلي وارد وياك واسهل

يازغير .
الشيب وي عمرك كبر حسبته چذبة
ليلة ليلة وداعتك تغفه واحسبه

عقيل العرد


ارتاح لليل اذا
بالليل ما ارتاح

الگمر نام وغفى
وانه بصفنتي اصياح

بيني وبين الفرح
باب و قفل و أرواح

ارواح جوا السجن
و أرواح يم القفل
و ارواح عدها سلاح

وشلون اجيس الفرح
والشايلينه اشباح

وشلون الم الحزن
لو يم ضحكهم طاح

وشلون افك السجن
بالسرگي اشوفه القفل
بس بالسما المفتاح

بهاء سوادي


امشي والدنيا بَـرد ،
والليل نَـاي..
يعـزف،
ويرسـم،
ظَـلامك يَـمْ ضـواي ..
والهَـوى يگطّـر على ضلوعي حَنـينْ
ومدري شنهـي؟

ومدري ويـن ؟
ساعـة وحده من الثـَلج..
رَدّتْ شَمـس ذيـچ السِـنين،
-امشي والدنيا بَـرد
وچُـفوفي سَـيل ..
وليل ياخـذني ،
ويِّـرد بعيوني ليـل ..
والهـوى العِـذري رِسَـم وجهك گُمـر ،
وفَـزز بروحي الجگـاير والسَـهر ،

ومدري شنهـي؟
ومدري ويـن؟
نمشي انـه وگـلبي.
نِنـدل ابّعضنا وتايهـين،

خنجر خصاف

روحي خطوة ماي
مزروع ابشواطيهه التعب والنوح
مذبوح الضوه
ابشريانهه المجروح

ماخضر ولا برعم فرح بيهه
لان بيهه الفرح
ممنوع مامسموح

يـادرب النجوم ..
اجدامي ركضت خيل
عثرن بالضباب وليلهن دولاب

يفتر ياخذ عيوني مغازل دم
وألم أحروفي بشفافي
وشوفنهن نهر عطشان مايلتم
وايامي ورد مذبوح

بچفوف الغشيم
الماعرف يشتم !

محمد الكرعاوي


غربة من تجزي السهر شيبة بگـصيبة
غربة من تلكة الكواغد تحضن بچلمة
غريبة
وحدك تجزي الليالي بلاية ضلك
حتة دمعك مارضة يندهونة خلك
تنظفر وية الحزن محد يفلك
تمشي وتعثرك حسبتك

ليش عايش وانت بفراشك غربتك
ليش كل هذا الشتة بجفك يغني
شجرة وتحاجي الفخاتي
منهي تندل الشتلني
منهو بيرغ مايسولف للهوه اسرارة ويضمها

منو مهتم للمحطة وكال ياريل الهضمها
شنهي عود ترد
ودربك مايجيبك

شنهي عود الصفنه لو صارت صليبك
تحجي وية الريح ابد مايلتفتلك
ليش كلها تموتك ومحد يكتلك
تلكة زعلان علچفك حته كاسك
تكبر.. تراب علطولك
مايك موشلته ناسك
غربة من تلكة التتن هم مايريدك
تبتسم والمري تفشلك
والحزن شامة علجيدك
دمك!!! ومايشتهي يمشي بوريدك

وهيه هيج
الرسالة تبات... تبرد
وهيه هم نفس الچفوف الخنكتك.
بالملكة معضد
عمرك وخلصتة غربة
موت بس بعيد وحدك
لا تمن اعليـك كاعك
راسك يلوليلة زندك

رمضان عبد الحي


الصرت (بردية شته) يغنيني ياس ..ويرجع ابروحي الهوه (يم داركم)..

وتطفح ابروحي المحنة… وداخل ايغني
(لـ اهلنا)

وانه لاگتلي الـ( سلامات) الحميد

من لگيت الدنيا هيمة وگمت انوح انوب حته ابنوحي طلعت (ياحريمة)..

وروحي رادت (ياطيور الطايرة مرّي بـ هلي)

وارد بل (مرينا بيكم حمد) بس مو بالقطار الشوگ طار

من سمعنا ( اهنا يمن چنه وچنت)
بس مو عجيبة

اشما يتيه ابنادم الروح الغريبة و (يا سعيدة ) تردلي روحي

العايشة بالله كريم ..

الطفت امن العمر شمعة ..وصارت اغنية
( لـ كريم )..

وهيج احس صار العمر
سفرة طريج

يوم اطيح بـ هم مگاش
اسبوع اطيح بـ هم
غميج ...

وروحي تسمع ( مو غريبة)

وگمت اشوف الفجر يتراوالي شيبة

وهيج عايش عيشت
الما يدري وين

وين ما طاحت شلونك صاح زين

ومادري مطلوب لله اعليك دين

وترجع ابالي الـ( عزاز ) اشما يجيس افكاري
طين…

وهم ترد بيه المحنة ويرد ياخذني الضلام

والگه روحي امتانية (شمتانية) يا بشر
ما عيراني

الشيب مو ذاك
الوقار العيرت بيه ( ليلى ناظم)

(تعيرني بالشيب وهو وقارُ
ليتها عيرتني بما هوَّ عارُ)

شيبي ترچية كلام . وزارع اذني ابكل
مكان

هلبت ايجيب الهوو (حن وانا احن)
طيف من انام ..

ليش كابوس المحنة انسان مات…

وانه يوميه افرش اجفوني من اغمض

خاف طيف اعذيبي جاي
وماكو طيف

والگه دمعي ابجفني بات

(ومن بيّن عليه الكبر) ذاك الصبا بيا بير طاح

ولون يعگوب البعينه براسي صاح

وين اشوف امرايتي حته استراح

واقتنع (شيبنا اشوف الشعر) ليل الراس راح

وهم (يفر بيه) الهوه مرجوحة العيد اليتامة

(وعبر على جفون الحلم) ماطيح ووصل بالسلامة

وگمت ادور (عالزغيرون )وجزيت

وين ما جسيت روحي بلايه ديرم بلايه حنه
وبيه (فصلية) لگيت

وكلشي بيه انسان مات ودنگت راسي وبچيت

قناة (قصيدة وشاعر) للشعر الفصيح


https://www.tg-me.com/sha3er_1000

سريح حمزة الزريجاوي


للفرح ما ظِن ثوب ضل ما نزعته ...
وللحزن ما ظِن ثوب ضل ما لبسته ...
وللصدك ما ظِن حال ضل ما حفظته ...
وللجذب ما ظِن حال ضل ما فضحته ...

كل التعبته عليه ضرني ونفعته ...
كحيلي الحچي لعريان رسته وركبته ...
ما ظِن شعر ينگال ضل ما كتبته ...
المخفي عد الناس شفته ولزمته ...
وماظن شتمني هدان ..
هنته وشتمته
عني اليريد الطيب ما ضن منعته ...
ما وصلته لمخلوك ..گلبي الوصلته ...

كلي شبعد شتريد ..؟ الردته اخذته ...
كونك نويت تروح خليهه سكته..
تنشد اعله الچتال ..؟

والچاتل انت !

عباس الغالبي

هيّ لمضة مستحة
وگلت أمشي بيها.
گلت هلبت لعبة النسوان تنفض

وانحسب ماسة اعل كسرة جام
وانشاف بحجيها.

وحسّبت ذاك التعب يكفض هنة
ولذّة ليالي معاتبين

وچنت فشلة عين طيرة
لو ربت بين البيادر
تنهب الليل وتطلبه
وتسكت بچلمة گمر من خوف روحة

حسبة انجوم اعل ظلمة
وصادفت كل السمة ابشارة قصيدة
ونيّة الرايد غربتة ومن يحن يدفن عيونة

ياهو يدري شلون اكضّي الليل وردة اعل الگبر ؟
هيّ لمضة مستحة وانباگ عمري
انباگت الويلاه من گلبي وضگتها
اعل البعد
چا وينة گلبي؟

همام الزغيبي


آنه ذاك
أبلا صبح
وبلايه ليل

أبلا عشگ
وبدون حيل
أبلا همس شفة محنه

آنه ذاك
الباعته الدنيه سوالف
وأشتره الروحه حزن
بچياس حنه

آنه ذاك
الصدگ الضحكه تدوم
والشعر يبقى بسوادة
والعمر مايمشي خطوة
معاند دروب السعادة
وخاب ظنه

ولملم دموعه بصواني
آمن الفجر للكاس غنه

گصو ألسانه
ورجع للماي غنه

أگبال كل متعوب غنه
أگبال كل بستان غنه

هاي روحي
متانيه الريل وحجيكم

هاي روحي
تنگط بدمها نذر
فدوه البچيكم

هاي روحي
تعتني ملگه
منين ما تندل تجيكم

وأبچي والملچوم گلبه
أبيا حزن بات وتهنه

والملامه تبوگني
الجيدك گلايد
والحجل ياخذني رنه

وأنته بمعاتب قصيدة
وضحگه لعيوني تدنه

والحنين
يلاعب الصفنه بترافه
أني أجيت وما تعنه

وبالچذب چا راودتني
وبالصدگ چا عذبتني
حته أذا يدرون أهلنه

چا نسيت

بزيچ المحمله رطب
تاخذنه مطرة
وشمس كل تموز تشهد
هچي عصفورين چنه

نلعب ونرگص نهلهل
عدنه كل الديرة جنه

وعدنه
كل هلال يوگف عالصريفه
يلم شملنه

شلون چا غمضت عينك
ياحبيبي
آمن الگلب
معقوله شلنه

وعلمتني
الماي من يسكت يموت
وگتلي
للعشاگ مايحله السكوت
وذنب المدوهن غرامه
وذنبي ونه

وزامطتني ازماط كافر
ياهو اليعذب حبيبه
وياهو اليناغي الگصيبه
وياهو حس روحه غريبه

وتالي ملينه وتعبنه
وطگ صبرنه

عبد الكريم القصاب

بعد النعاس

ليليّه النعاس يمد جسر عالماي ،
وتخضّر جروفي وجوه .
تعبرلي أصابع تنبش بعيني .. نبــع وفياي

ليليّه الوجوه
يجيبها آلمدري شني بروحي .
تحط وسادة الزيبك بمرجوحه .
تهز بيّه ، تهز ... والروح صفنة ماي

وآتنفس رذاذ الطين ،
أبوس عيون طيف الماي .
أكَلّه آدخيل آصابيعك ، ولك بهداي ،

وك ياطيف ،.......
يمعوّد ، خبطت الماي ،
يمعوّد ، خبطت الماي .
وك ياطيف المصبرين ، وك بهداي .
يل عابر عليّ بظهر موجه وناي ،
بارد مثل كَلب آصباي .
وك بهداي وي حزني ، ولك بهداي .

دخيلك ، لا تبلّلني بنداوة عيد .
أنا حزني عطور العيد .
مر يا طيف ناشف ، لا تجي مبلّل ،
لا تحجي حجي مبلّل ،
لترشني ندى ، خاف الحزن يزعل

عود ترشني مايك والحزن يبرد ؟
لا يابوي ،
البارد ما يفيد آوياي ،
تزاني حزني مدلّل ،
أنا مجنون حزني ويشتعل بالماي

بهاء سوادي


الروح شُمّيسة صُبـح
تشرگ على سطوح الحبيب "
تشـرگ وبوساتها الشَگره نحـيب

تنـزف الألوان ..
ويطـگ الخَضـار ،
تمشط سطـوح الأحبهم

دار ..
دار ..

تمشي شُمّيسة حَنيـن ..
عالكبــار
وعالزَّغـار ..

عالغريـب
وعالخـوال
وعالعَـمام ..

عالسنابـل
عالبـلابـل ،
عالحمـام ..
تمشّط الدنيـا ضـوه ..

تحلّي نسمات الفرح للنـاس
وتبوس الهوى..

شَگره حيـل وهايمـه، تـوّزع غَـرام
وگبل متغيـب بحـزنها ..
الناس كـل الناس تصـرخ
سلّمت شَـمسْ الغَريـب
ومحد يـرد السـلام،


روحي مَچرِيه شحلاها؟

بـ الحزن ..
بـ الناس ..
بـ الهَـم ..
بالصَـبر ،

بالأغاني البيـض ..
بـ الطِـب ..
بـ الشِعـر ،

بالكِتُـب..
بـ الليـل ..
بـ الحُب..
بـ الجِـگاير… .
بـ الأيام السُـود ..
بـ نجـوم الظُـهر ،
بـ الأماني الزاهية بشَمس العصر ،

كلشي بيها يعيشْ روحي ..
تلـگه ماي ،
ماي گاعد بالجَـمُر
بالسِـلم روحي حَمـامه
وبالحَـرب روحي انتقام

وبالعشـگ
كلّـش مَـلامة
تـنوّم الدنيا بحزنها
وماتنام و
وهاي روحي گبـالكم گمرة
وصَـفگ جنحين
بولاية حَمام،

مصطفى الاشتراني


الخوف چتال
ونهب بيت الضنون

ديره بيها السنبلة
اتشيخ اعله منجل

هندس وعميان بينه تگود تندل

طيف
ما صله المحمد
والضمه اتيبس نهر جاسم لهاته

اليركض اسم الله وعثر
عينه لبناته

وأذن
الجامع توابيت وصلاه

كلها تركض مالگو غير الترب
والخبزه مضمومه ابگفااه

حيل چان الحيل ينفع !!

والرچيچ
ايطيح ..فدوه
وتسحگ اضلوعه الوراه

هناك لهناك وسمعنه
الگاع تهتز يعني تتنفس بعدها

الموت فرصه
ولحگو موتو
ودگ جرس وانذار عدها

واحنه نركض نووگ دوهنه الدليل !

الحافي
لحگ

والركض شايل ثروته
ايطيح ويطمه الشليل

منتظر هادي


انه كتلك لمعة الصدفة بنهر لا تغري عينك
كتلك النجمه بعيده
والشمس ما تطفه للحلم التريده
وتنسه روحك سالفة بحلك الضياع
وتلكه روحك يم الأحلام البعيده
وتحترك شيفيد جرحك تحترك
دخان تصعد توصل الغيمة وتطيح
وتلچم لچمه جديدة

طيح بولاية غريب
طينها بعين السوالف
حيلك ينهشونه شوف
تبدي تخلص ويه دمعك
تحجي ما تلكه اليسمعك

تبدي تتمنه شكو بالدنيه موت
لو شفت روحك عشت بگبور صوت
يبدي ييبس طينك ويذره منك
والهوه يلم التراب يبوك رسمك
تنسه اسمك تغفه واحلامك تلچمك
وتكره النجمه البعيدة

لا تعيش العشته والموتني گبلك
اصحه يا نسمه ثلج تموز دربك
والله تنده دمع من تكلي أحبك

روحي ملت
روحي يبست
روحي صحرة

وآني خايف لا تشربك مني شو خايف عليك
شماله گلبك خل يحب انسان عايش

علي الركابي



يا حبيبي
تيهت وجهي على دروبك امرآية ..
ضوگني ودليني بـ أسمك
وين اطش عيوني وتخضر إنسان؟!
إنسان من يضحك يسد جوع التراب
يلم سراديب المدينة التايهة بطيش الشباب
ليلي أبرد من زنازين الحكومة ..
انا أگضّي الليل رزّة بحضن باب
شوهدناني وتيهت مايي بمحطات السراب
شوهدناني وسِمت ظلي بسوگ نزوة ..
لوّن أدري ملوحتك تنسام غيمة
جا شريت الغيم من جرف النهر
لـ اخر دكاكين الضباب
وجا دفنت أسراري وي أخر نجم غافي اعلى وجهي
وفشلتي اكبر من حروف الأسباب
وين أغني؟ وناسنا نشارة خشب
وعيوني يـﭼـويها العتاب
ويا عذر يرهم عليك ..
وانت موسيقى آفيش ..
يا منسيني حليب أمي اعلى بختك
حبني مليت أرد أعيش ..
أنسمت بعدك هوى بحي كل المگابر
ولا گبر يسألني بيش
كلها بعيوني دنابيس وخشب ناعم وليط
ولهفتك تترسني ريش ..
يا حبيبي بديرتي توجعني روحي ..
الناس ظِل ميّت بعيني ..
الناس بس بالليل ناس
الناس لمن تنعشگ تتسى ناس
وانت دنيا ..بـ بين أصابيعك كواكب للنده ..
وخدرانه وتغنيك ..
ولك هلبت يوديني النهر مزنة ..
وتمطر بلكي أخضر بيك
وسولة بيّه ..
سولتي أقرا اسمك واسولف
للشوارع ..للشجر ..للماي للتربان بيك
سافر لـ آخر اشواگي .. والمتاهات بمساماتي
واسافر انا وگليبي .. ومتاع العاشگ عيونه انا بجنطتي عيونك ..
حبني شباقي بالدنيا
هاي الدنيا وحشة مگبرة بدونك
يالشوگك وفر بلّور
أمسح غربتي بلونك ..
وكت ما يسوة خزرة عين من عصفور
الـ بين ضلوعي شيّب من وره القضبان
فك ازرار زيجك ..خاطر اتعناك
انا وجرح روحي انزور
واجيك اگدار خزامة ..وأعگد روحي بالشباج ..
اصابيعي وقميصي انذور
يمرسال الشمس للفيّ ..
خلصت الدروب اتسامر بظلي
وسفرتي خيال مرجوحة ..
وضحكتك كاس خمرة يغازل اوهامي
وحلم اوراق مذبوحة ..
وانا اخر نبي يدگ بوب الولايات
شايل غربته بروحه
والگى روحي ..
المثلي بس بـ أطراف عينك يلگى روحه
وين ما ينولد ظلك الگى روحي
وين ما ينذكر اسمك الگى روحي
كل درابين الولاية اتصيح بـ أسمك
الماي والقدّاح والطين وعصافير الولاية تغني بـ أسمك
والأغاني بغير وجهك ..برزخ لروحي
محطات و ضياع بلا تذاكر..
يا حبيبي كلها بعيوني أمس بس أنتَ باجر