موعود قاسم الرشيدي


عبر زندي السهم ...
و انسيت اصيحن آخ
ابن آدم ينسه روحه بطيحت اولاده
هيست حرورت الدم عبرت جفوني
و تبلل حضني ...
حضني الچان اله اوساده
حرت و اتلفتت
بس لا هيسني احد
بس لا شافو اعيوني بچن بهداي
بس لا شافنه احد گابحانه الماي
مو شيلت رضا
شلت ابني انا مجبور
بس لا احد ايشوفه چنت خايف
عرگت بگد عطشنه ...
بحيث اليشوفون
يتراوالهم چني نهر واگف ...
اختنگ ابني بسهم و ركضت مدري الوين
رحت رديت اصيحين
بويه ...
بويه اشلون
درت صوب الخيم ما ناشفه ولا عين
التفت اعله المعسكر ذوله هم يبچون
طفل يكسر الخاطر
هسه شيداوي
بكثر مسح الدمع صارن ارداني عيون
حرت ...
وين انطي وجهي محد يگلي
صحت لخواني الحگوني كلاني الشيب
ولكم ابني راح منين ارد لهلي ...

الشمس هم بطرانه چنها
تغبش على المكتول ابنها
.

عباس الغالبي

سره مرايات روس اهلج
وعكدت فشل جانت كاضه الكيعان
حلوها الخذو ضلج

وشهر دخان
لبس حركة محرم وي نده زلوفچ
يبنيتي الرمح هم زين لو مو عالي ما اشوفچ
الخذو تنور حچي الماي شيچيمون

لو كرصت خطيه وياي لو مامش ولا سامع
ما يدرون شحلات الكود من يصير جامع يسحل بجامع
لكونه ثياب تعرك مستحه اعله النوك

ولكونه انصوم خمس اوكات شرياه ونبيع الضوك
ولكونه بكلشي نندل سچه وولايات بس نتيه باول سوك
رقيه الحزن شمرت فوك
رقيه الدنيا موش النه
لون ندري الفقير يعيش ما مذلول ما صرنه
لو ندري الصلاة بالبير تاخذنه على دنيا قصور
جا طحنه بوجه يوسف
ما نرضه الشهيد يموت موت الله
الشهيد الصدك كون يطيح راسه بحضن عين الله
ولا يعثر بجلمت مات
يبنيتي العطش جذاب شربناهم مطر جويات
يبنيتي كظيت سنين اسبك للتراب وياج
وافرغ الكاع من اعثرلج حجايه
وهسه شلون ما تردين لاكيني
واعذري عيوني لو زلفن رمحهم يفتر هوايه

ايما صباح

رايدتني الدنيا عنوان لتعبها
وانا لو ما هذا الفراگ الضعت طيره بصفگته
چان هسه شگد احبها

يا ضريح يفكلي بابه ويطرد إمن جناحي همه ؟
ويا مسيّة تنام بعيوني إمن اغني
ويا صدگ ياخذني حلمه ؟
ويا مراية اتحجب الشيب البروحي من يصد لصباي زلمة ؟

خايفة اكبر وحدي وافطن للنسوني
وخايفة إمن الچذبتهن بالقصايد ينقرن للصدگوني
وخايفة الدليتهم عني برسالة
لگوا حزني ومالگوني

وخايفة إمن التجاعيد بوجهي تحلى
وخايفة انسام برخص واشعاري تغلى
وخايفة اعبر كل صعب وانعاف سهلة
وخايفة بحظ يا نصيب انگاد للعميان كحلة
وخايفة بهاي الدواوين الأمَر من گهاويها
امشي للمو طوگ كذلة

وخاف أتاني ومايوالمني حبيبي
وخايفة الحگ شوگي ويرجعني شيبي
كون اعرف بيا كتر روحي نَزفها
چا سمعت الگالّي إمن ابعيد طيبي
وچا عرفت بديرتي شمريود مني
وماتغربت بنصيبي

انا حسبالي العشگ حَل وشربته
وانا من تانيت محبوبي عمر ماردته يرجع
ردت ارجع اسنيني المچلبة بشبگته
وهسه عگب الغبشة ال بهاي القصيدة
انعمللّه الليل لو خلاني نمته.

علي عماد


الخيمه من تثگل شمسها يزود فيها

وانتَ ذاك..

العاندِت چم ليل حتى اتظل گمر
يخله جفنك طيف واتِّرسَه سهر

اللّيش ممدوده اعله طولك
والحزن مَدَت نهر..

وواصله الياريت حد الما يجون
وحنظل البرحي ابلهاتك
سد روازين الهوه..

وتشرب الصفنه ابسمارك
وانتَ والمامش سوه..

وبيدرت حزنك سوالف
والمشوا تسبگ ضحكتك..

انتَ لو ميّت تعيش
ولا عشت ميتَه لهفتك..

يا ابنــــادم
تطفي ليلك
خاف فرّاشة تجي اتموت ابشمعتك

ياحنيــــــن
العزّبت للفرگه عمرك
مدري تشبهمن ابصبرك؟!

وهاي امانه..
حتى ماحطلك وصف موش ابمچانه
چنك آنه

حيدر الطفيلي


ودعتها بصوت اليحبون حتى ارضه بزعلها
باست عيوني بمعاضدها الهدية

كالت امشي ومامشيت رموشها مجلبات بيه

الاهم من هذا كله ماعشت دور الضحية

ومن وكع بخدودها شويه كحلها
ماتغير شكلي مثل المزهرية

الاشياء الحلوه عدها اغلى من دمها عليه

عافت جفوفي مطر بالريح من ضمت شعرها

حسستني احنه انتهينا
اغنيه للقمصان ودتلي عطرها

والدمع بلل الجام والمطر بلل صورها

ماجنت حاسبها هيجي جنت حسبالي اختصرها

هاي عود اني رحت من يمها راضي

ومن وصلت البيتنه بالليل وحدي
منين صاير عندي ماضي

كلشي موجود بغرفتي مو هديه ليش متغيره غراضي

المهم صارت بعيدة

والحنين بدمي كل ماكول يطفه
تشتعل صورة جديدة

وكلبي مدري منين يبجي
من السوار من الكلاده من القصيدة

المو حلو يصير بحياتك شي حلو تشوفه الجريدة

هي هاي المشكله بكل النهايات الغريبة
الالبوم اليوم شمعه وباجر اتصور كصيبة
شي طبيعي يصير هيجي غير ماعندي حبيبة

ناظم الحاشي

دوس اعلة الورد صار الورد ينداس
بس عطر ألورد ماتگدر تدوسة

يصح واحد جريمة اعلة الوجه ينباس أو واحد بالرجل يستاهل تبوسة

يل عندك شمس لازم يجيك اليل
ويجبرك غصب تحتاج فانوسة

لتأمن زمان العلم الطاووس يتبختر وهلس ريش طاووسة

فك سجن البلابل يا زمان ألخوف ليش بلا ذنب عالصوت محبوسة

لا تعبد صنم وتشوف بي فرعون
وتلم الحياية وتنتضر موسى

ولتخدر ورد من شتلة الكمون
والشتلة الخبيثة بصفهة مغروسة

موت بيا زمن مو مشكلة امن تموت
بس اترك أثر وفعال ملموسة

دگ عمرة المسيح بخشبة الكتال
حتى الناس تعرف صوت ناقوسة

نام بلا خبز خليك ميت جوع
مافرغت بطن والعين متروسة

عزيز عسكر

مختنك بيه الدرب
متروس كلي دمع
ولوحدي رديت

طفيت بيه الشمس
من طولي مثل النده
اعله جفوفك تبديت

دكيت باب الزمن
بس منحني طبيت

وانتهى بوجهي الوكت
وحترك خلگي وذبت
بس كومتني الالتقي وياك والياريت

من كتلي خل نفترگ
اول خسارة العمر
ماكتلك شحسيت

زامل سعيد فـتّاح


شگول اعليك؟!
اگول أنساك؟؟ روحي وياك
شگول اعليك؟؟
اظل زعلان؟؟ مُر فرگاك
مثل فزّة طفل روحي ..
تفز لو سمعت بطرواك
ومثل وردة وشحيحة ماي
كتّة مطر تتنخاك ..
واگلك هاك .. شوف اجفاك
شوف اشسوة بيّة اجفاك
وأسمع صدى يناديني
بأسف خان العزيز وياك
تَرف يا گضبة الريحان ..
شفّاي العطر بيها
تعال عيوني بلياك
ما عاود وسن ليها
تعال اشفافي محتامات
بلثم اشفاك ناغيها ..
تعال ودوس فوگ الروح
منّة وعَلي سويها ..
تعال ادماي الك حمرة ..
ظلام وطلعتك گمرة
تعال وخيّط الدلّال ..
بشَعر ظفيرتك ضبْره
واظل مثل اللي يحفر بير
بـ أبرة يدور الگطرة
واتنطرك واتنخاك
واسمع صدى يناديني ..
بأسف خان العزيز وياك
اگول انساك؟؟ روحي وياك

مصطفى الخزاعي


توادعنا ..
وبگى بروحي جذع متروك يتشلبه اعلى طول الغيظ
توادعنا ..
وبگت روجات المعاتب على جروفك تطگ وتفيض
دِرنا اظهورنا والعين بگت بالرگبة تتوسل
تهم نظراتها بمگفاك عسى ماي العتب وشّل
ضعت ودروب المتيهين يطويها الهظم مغزل
ضعت والدنيا ما تندل
ولا غصن الرمش يذبل
ولا المتواعد عيوني ترش رموشها بشوفك
انا المتواعد ظنوني اتلاگه بهيمة طيوفك
وانا البديت غيظي مراضى بـﭼـفوفك ..
وانا الهبّيت ريح بصفنة زلوفك ..
ولو عيني خذاها الشوگ ..
بواﭼـي لديرة المامش ..
رسالة من الجذع للطين ما غير الجذر طارش
ويالـ مهيض بعيني دموع ما ﭼـانت تعرف اتهد ..
وعيوني الجزاها الشوف تروح بواهسك وترد.
يا شوغة زراگ الماي لو حدره جنح للطين ظل يمتد ..
ويا في الشتا .. التف شوگ فوگ الـﭼف شتا المعضد ..
ولك بهداي مو بالوحشة ظلت سنطة الحيطان تتوضى ..
ولك دبحر بلاية شراع ..
كلما غيرة السفّان تكبر بالجرف يحضى ..
رد شمعات يا ليل الصدگ ما شظتّك نجمات..
رد براحتك يالشفت الهوى من يوادع الرايات ..
يالشفت الضوة بديرة الهندس مات ..
ولا لن بيك جيّة تـﭼـذب ظنوني.
ولا نسيانك يـﭼودر على عيوني
ولا طاريك يسكت بالنفس مرّة ويسكتني
ولا جاريك ينشف وي جرف دمي ويموتني
وتمر طيوفك التنفض تعب وتراب
وموگد مستحاك اليطفى بعيوني وأشوفك ريح ..
سالوفة رماد اغفى وتفززني ..
اغفى وتفززني ..

باگة باگة
الموت من يحصد الوادم باگة باگة ..


برداً وسلاماً .. ع اهلنا بالحمدانية
فاجعة مؤلمة ..

احمد الوراف

گطر من تجي مغيم
يالاسود مزنتك نشوه اريد اطفى واسافر بال .
واجيك من آخر الدنيا
نهر مسجون
لگه بخصرك تضاريسه ولعب شلال .
وابدي احچيلك شبيه
ذنب عطشان
لـنهودك واصابيعي تسولف كل صعب ينگال .

واطيحن ليل بمتونك
وانامن نومة الشامه .
واردن من جديد اصحى
وادردَغ ندى مغبش شاف ولايتك جامه .

واگول لـروحي هذا اهواچ عيشي الكيف واتوكحي
العشَگ من گلبه فك برزخ
والخايف يضل مگابل أوهامه .

وشعوفنك يلنك آخر المشوار
للعتمه وشفت روحي .
شمل منك يالمنزَل .. ايه وتشبگ جروحي .

ولا املك
أنه المتسودن بروحك
والمسودن ، گبل صاحي ، ولگه عيونك ، صبح عاشِگ .

تحن يمتى اشتهاك براسي چم آدم
لگاك محمل ولاحِگ .
يمتى وليلك شكبره
تعال اطفيلك الگمره
ونسولف طوخ
أحب ليلك مثل رمشك ناگع كلش وغامْگ .

تعال وبيه خلگ الميل
اطوف بطولك .. من اتعب اموت عليك متشابْگ .

جواد زغير

لا أدليـهم بگلبك ،،
گـول ضاع

گـلهم أميه وتبخر ما أظن ينلگى بـ گاع

گـلهم أنه بلا أشـراع

حتى أذا گالوا حضن ،،
گـلهم وداع

كـلشي گـلهم ،،

يـاهو يسوه أدموع عينك ..؟!

ويـاهو يستاهل نشد وتگله وينك ..؟!

ليش تعثر ...؟
مره ضم روحك بروحك
مره چذب ناسك و صدگ جروحك
مره سير للفرح من دون نوحك

هي مره وبالحياة تعيش مره

ضيع ،،
خلهم يشتهونك
خلهم يعيشون دنيا بلايه لونك

لا يغرك شوگهم لو طاح مزنه
أ.ولا گلبهم من يلم لـ جفاك حزنه

تالي تعطش ،،
تالي تنمـل

كافي چفك ينعگد بچفوفهم وكت النفاه ،،
ومن يمرك ضيج ينحل
ثاري حضن الناس ليله ،،
شما أيطر الفجر تذبل

ليش تذبل ..؟

ليش حزن الناس موسم ،،
وانته حزنك ماله تالي ..؟

ليش طيفك فاهي گلبه ،،
وطيفهم عرس الليالي ..؟

هواي ليش
و ما حضيت بـ چلمه تشفي

خلصت عمرك أتناطر ،،
يمتى تجفي

مره كابر ،،
گلهم أيغثني المشابگ ،،
للهجر مخلوق چفي

مره ضيع ،،
الدنيا مره

الغربه هم ترهم وطن للـ مالـه ناس
الخمره هم ترهم ولف للـ گلبه كاس

ميثاق الهلالي

ذابل
وعطرك يهلهل
مَطَّر بگلبي الربيع
ورَگَّص بروحي النهار...

تدري
من دون الورد
عطرك يسولف؟
يمشي
ومحمّل فوانيس ومشاعل
عطرك البارد يطرّ الظلمه نار...

وتدري
كلما مدري شنهي يموت بيَّ
وياخذ الواني الخريف،
تمر ضحكتك
وي عصافير الشلب واگعد خضار...

مرّه
لمّيتك قصيده من الجروف
ورهّمتلك
ريشة بيضة
وريشة گلبي
ونورس ِمن الورقه طار....

ومرّه
ضمّيتك حبر
وي دم رگبتي

وگتلك
شما تگدر اكتب
مره وجهك،
مره نسمه...
وخلصت أوراق الشرايين
وعِفتها
محمّله أطفال وسنابل
والگلب جاهل يدوّر،
بلكي باغنيّة ضحكتك
يضحك اسمه...

ولالت بدفتر ضلوعي
شويه گمره
ونامت بصدري فراشه
وغرگت ِويه انفاسي چلمه....

وطلّعتها
ومن قريت
أوّل حرف
من فضّة اسمك
لمعت اعلى شفافي نجمه...
تذكر شگتلك گبل ما ننغلب
ويطش خبرنا؟
نلم حچينا
ونطفي شبّاچ الوعد...

ولو همّ مرّات أحبّك
من تگلهم عاشگين
ويضوي چفّك من تسولف
لا تملْ،
سولف بعد....

تدري مرّه
انرسم وجهك عالمرايه
وگابليته
وغيّم براسي وصعد...
ومرّه
طشّيت الورد فوگ الرسايل
والتهيت...
الورد مات
وعطرك البارد گعد! ...

عبد الكريم القصاب


وينهم ؟ ذبني عليهم ،
ها يخضر الياس آجيتك ،
شوغتي تجفّل خيالي .
تدري عد الله شكبرها ...
كونك آتذبني آعلى غالي ؟
يا بخت عين التطيح آلها آعلى غالي .
وينهم؟ جم مغربيه ....
روحي تغرب مايعه بكَذلة شمس ...
وترد عليّ بوجه خالي .
صار جم شباج آهزن ،
جم علك شديت وآترجّه وآبوس ...
وما كو تالي .
صار جم هدهد أودي ...
ومامش ولا ريشه بيها عطورهم ...
توكَف آكَبالي .
يا حريج فراكَهم ...
ومنادس الما يستحون ....
وشوغتي وضيم الليالي
آه والتاكل بكَلبي ،
خايف يكَولون سالي .
ها يخضر الياس آجيتك .
عالك شموعك على جفوفي ...
أخاف ،
ما آمخليها آعلى موجه ،
اليوم آشوف الموج عالي ،
خاف تطفه وما يجون .

علي الخليفاوي

ضفيرة ليل
وگذيله وزلف نعناع
وبتوت وتراچي وحجل بيه رنه

وخصر مغزل
عليه يتلولح الرمان
فانوس بحماده ومشتعل چنه

يالمفصل
گمر بربعطعش من فوگ
كل ساعه اعله نجم اسهيل يدنه

من تبزغ
اگول اليوم صبح عيد
وشعل بالصواني اشموع واتهنه

هزيتك
طحت كلك گلب وعثوگ
لميتك شلـــــــــــيل ومابعت منه

يعافيتي
يواهس شوگ
يمفرط عنب واچفوفــــــي لمنه

ماريده
ولاشمه
الهوى الماجاب منك هيل
اسد ريتـــي واموت ومااشهگنه

مدمن بيك
اسكر من نده اشفافك
واطوطح ابزيجك وادخل الجنه

يچلماتي
يطور الكوت
ذاب ابهور العماره
وابن ذي قار بيك اليــــوم يتغنه

وفر ذبيت
غبشه ونگع ريحانك
تعال اغفه ابحظن ماسمر غرنه

شلك عندي
تعال اخذه بحلات النوم
لبريسم ظلامــــــك دوفلك حنه

قدمي في الحكومات
في البدء والوسط والخاتمة ..

مظفر النواب
#غزة_تحت_القصف 🇵🇸

حسين التوبي

من تلگى الـ بگلبك مالــــه شرّايّة
من عينك تظل اتّطلع الحـﭼـايـــــة
اليكابر والشمس بالمغرب يطيحون
وانا ذيـﭻ الرسوم المالها امرايـّـــــة
وفضيحة وروحتك ما بيها حُر صواب
غفل من فارس البر طاحت الراية
فِلَت منك گلب ماكو أربعين وياه
على اخشوم النوارس مِنفرض رايه
يغالي السوم يغري الما يعرف السوگ
يالمغرب بِعــــــــت لِگطة الشــــرايّة
مو يومية يثگل خيــــط للصــــــــياد
ولا دوم البراگــــــــــــــع تستر الغاية
يِبهَت كل عذر ما ينحـﭼـي من العين
ودومه الما مصَدّك يحلف اهوايّة
مأمن فِلت سرّي بطاسة الناعور
وادري يبيع كلشي الما حفظ مايه
التراب وعين وحده وسهم حصته تصير
الرضا يگضي العمر نيشان رمايّة
وثمر نابك يشّهي امتون المأمنين
والتروضه العيون تبوگه الحـﭼـاية
ومن تبهت الغبشة بعين اليسهرون
المن ظاله گلوبــــــــــــات الولاية ..
ومن تفگد الرغبة بعين اليتانيك
من عينك تظل تطلع الحـﭼــــاية

عصام كريم


انا لو ما رايدك ماعاتبك
الماخذك ما يسوة رفعة حاجبك
انت ذاك الظل مكانك خالي
حتى من تخون تبقى الغالي
روح لكن غيري بيمن عاجبك
ينطي حقك بالوصف لو غازلّك؟
ويعرف يرجعك طفل لو دللّك
ويدري ضحك الدنيا من شفايفك
وهم يشوف الموت اذا ما شايفك
وعالصغيرة وعالجبيرة يحاسبك
انت من تشتاگلي عندك بديل
هاي اذا تشتاگلي ..
وانا والحسرات ودموعي التسيل
والفراغ بداخلي
انا اتمنى البديل يخون
حتى تدري شصار بيه بدونك
وحتى تدري شجنت الي وشحاسبك
شلون خلصت الليالي احجيلي
بدونك انا الثانية اتهد حيلي
جربت كل الينسّي وما نسيت
ولملمت كل حيلي يمك
لجن من شفتك بجيت
انا ما رايد اشوفك .. رايد انت تشوفني
وارد اشوفك لون وجهي وحالي من تعوفني
الف هنيالك نسيت ..
وبشخص غيري التهيت
انا بعدك دورت كل اليشبهونك عليك وما لگيتك
وخانّي التعبير يمك من حـﭼـيت
ردت اگللك نسيتك ..
طلعت بحلگي الـ نسيت
اذا متريدني وما بيك جيّة
وما مر بيك ضيم المار بية
لتخليني حاير بين الاثنين
لو تانيك لو تاني المنية
انا اتمنى اگلك عايش بخير
بس المشكلة مبين عليه
صح اشوية جنت اتشوف وياك
بس الشفته منك مو اشويه
اگبالي الـ عليّ دوّر زلة السان
سولفت الألي و المو الية
سألوني اعلى گلبي وگلت خالي
وعشت احساس واحد لا أُبالي
بس ما طولت عرفوني مشتاگ
من فكرت بيك بصوت عالي
انا لو ما مرخص روحي وياك
وغلاتك ما صرت هالكثر غالي
واضحك والفراگ يگود بيه
مدري الـ يا مذلة ويا اذيه
حيلي وهيبتي ودمعات العيون
خلصن ..بس معزتك ذيج هيه
كبر بيه الصلح حد التواسيل
وانا ما حامله من جان نية
حقك ما مجربها الحرامات
ولا خنگتك مرة المغربية
ولا عايش احساس اليبجي بسكوت
تخنگ بالدمع ويفضحك الصوت
گدامك بشر بسنينك يعيش
مو حقي من اگلك مشتهي الموت
انا بـ اخر نفس واتحرك الباب
اتمنيتك انتَ ولا هوى يفوت
المهم خلصت القصة هاي هيَ
ووشالة نظر وعناد ريّة
ورقة مشگگة من دموع العيون
وقلم ما مستقر يرجف بـ ادية
خلصت القصيدة وظل نقص بيت
هذا البيت تلگاه بالوصية ..

كاظم لاله

إعترافات تحت الجلد

أمّا ان السقطة كانت بطيئة ، أو أن البئرَ كانت عميقة لدرجةٍ أنه استطاع أن يرى كل ما حوله ...

ريح ...
ريح وآنه غيمه إبِّين إيديك
إبيا كتر
يا گاع
أمطر لك .. أطيح ؟
ريح ..
لملمني حبيبي
ريح ..
طوِّگني حبيبي
أصعد لوجه الشمس
للفي أسيح
شلتك بروحي صليب
إو كل نبض بيّه مسيح
إو گتلي :
إبن آدم
بغير حزن الناس
إو فرح الناس
إو حلم الناس
لا هو ماي
إو لا هو ريح
إو جيتك بحبر إعترافي وإعتذاري
ابلا محبتك
لا آني ماي
إو لا آني ريح
.........

مصطفى الخزاعي

يعبرني السكوت أشراع لعيونك
وأضم عن شوفتك تعبي ..
وأجيس ﭼـفوفك الحلوة ..
اغاني و شمس عصرية وشعر شعبي
وحدر فيّ الزلف عصفور أذب تعبي
وأفز والگاك مو يمي ..
واكفر بالصحو الباگك من عيوني ولـﭼـم گلبي
غصن عطشان يا گلبي
يا صاحب المتعوبين يا گلبي
هايم مثل المتيهين يا گلبي
هايم والدروب السود يغرگ بيهن اخيالي ويرد ضامي
واجيك من الصحو للطيف احضنك جذب بـ احلامي
واگلك هاك انا بدونك صور متشابهة ايامي
واگلك ليش ما تحلى الليالي الا من اگول اسمك
حزن كل الأغاني يوّرد بروحي من اگول اسمك
صدى ليلة مطر يندار بضلوعي من اگول اسمك
وأسافر بالونين اشراع ..
واسكت والبـﭼـي يرسمك ..
واسكت واشتعل والگاك
بـ اركاد النفس شهگة ..
واصبر الروح بالدخان
واجيك من الرماد ولاية محترگة
واجيسك مشتعل جمرة بهبوب الريح
واطفى بـ أول الشبگة ..
واگلك وي كل شهگة اشتهيت اضحك بوجهك والدموع تسيح
يا ذلة ادموعي التغفة كل ليلة على الوجنات وانت الريح
يا رخص الهلا التذبل ورة البيبان وانت الريح ..
ولك يبعيــــــــد يالبيّة..
يالبيك الضحك شمسين ..
بيه من الحزن غنوة جنوبية ..
وبيه من التعب جم ليل
ما بين السهر والحيف
بهتت كل معانيّه
وليلة من النشد والشوگ اضويلك
بـ اثر كل دمعة گمرية ..
بـ اثر كل السمار الدافن اهمومي بتجاعيده
اخضّـر كون الك جيّة