استاذ الشعر الشعبي
غانم الفياض

(حلم تعبان)

نجمه اتطيح
تفلت من سمه عيوني
تخدر
تنتجي اعله الكاع
تلكـــــاني..
شجره اعله الرصيف اواكـف ابكــلبين
واحد ينتجي من الضيم
ع الثاني
تلكــــــاني..
حلم تعبان
ومتاني المسيح ايفوت
وبجفي صليب
وبيه ست اطفال ماتو ليله الميلاد
رسموا فوك خد الموت ست الوان
للحب.والخبز.والماي.والدم.والوطن .والناس
واحد طاح
والخمسه اصابع باقيه ابجــفي
ومتاني المسيح ايفوت
امتاني المشو بلكن يجون وبيدهم عنوان
غركت كل سفن ربعي وكلاها الليل
مدري شلون عمري انباك
والتم اعله بالي وخيم النسيان
يتمدد على عيوني الندم
فد يوم..
جاني النخل كله ابلهفه العطشان
ومحمل تراجي ابلون عمري الفات
امتدت اديِِهّ وضاع بيهه الشوف
جابت تمره وحده وعافت البستان
بيني وبين وجه امي
عمر يمتد مسافه خوف
وبيني وبين اول بيت بالدنيه
ظلام
وموت يعبر والطريق سيوف
وبيني وبين وجهك ليل
طش ثوبه.......وخنك صبحه
روحي امرايه المجتول
وسنين العمر حلمين
وعيون التغمض بالفشل وكحه
وادري العود من يحله
الجفوف الزرعته
اتذبحه
سد الباب
غم صدر اليشيل الضيم ما يكدر
يكــّسر وحــّــده البيبان
ما خليك تقراني
وتعرف كل مساماتي
وتدك ابحافرك فوك الجرح نيشان
ما دليك بجروحي.
وعناوين الطيور الغافيه ابروحي
وبصمات النخل
والكاع
والنهران
ما غمض جفن والليل شايل سيف
ما اخلي الخريف ايفوت
واوراق الشجر
ذمه
او ... وصيه ابركبه الانسان
شضيني علكيفك
طشني بيدي الموت
ماتشطب هويتي
وصوتي بيه الموت
اصير بكل شضيه
السان .. صوت
وكل شضيه تهد عليك
تريد ثاري انسان

،


ستتعب الموتى بأنينك ..

الشاعر الكبير موفق محمد في ذمة الله ..

مسلم الخنفري

نام و ارزق عينك شويه ظلام النور وحشة
و غيّر اشويه اعتقادك و اكفر بتاريخ فكرك
تلگه هاي الناس چذبة
و تلگه هذا الغيم چذبة
و حتى هذا الصبح چذبة
و تلگه بين الچذب روحك سفر ما بين الملامح
وين ما يلتفت فكرك يلگه حل بلا سؤال

و انت تمشي
چن متاهة و ضايع بنفسك خريطة
تريد تحچي
تضيع بين اللسن چلمة
تريد تصرخ
تلگه صوتك طفل اخرس
يخمط من الفوضى حلمة

وين رايح خلصت عمرك مسافر
خلصتهن ذكرياتك سفرة سفرة
خلصت صفنات وجهك ذكرى ذكرى
النور حريةْ تطرّف
الشمس للظلمة قناع
و الحقيقة خيوط هاجس
ضاعن بصفنات شاعر

إفتح اعيونك و عاين
وين ماتعاين تناقض
وين ما تنولد فكرة تموت عاجر
إلإباحية حقيقة
و لبسوها الليل ساتر
و السكوت شگد مقدس
و الحچي طغيان كافر

و انت تمشي
تشوف وادم من حزن
ناس ما يضحك ثغرها
تريد ضحكة من الجفن
اتريد خيط من الشمس ياخذها لله
و طعم موت
و باب جنة
و قفل مفتاحه ذهب
الجنة حريةْ سجن
ناس ما شبعانه موت
لأن ما شافت حياة
و الحلم ما شاف عمره
الليل من يطلگ حلم ذباحه فجره
الصبح مأذنةْ المگبرة
هذا يعني الموت فكرة
و الحياة اعلى الحياة تصير ثورة
و الوكت ثورةْ ملامح 
و انقلاب اعلى الشغف
و احتلال بلون أبيض
تنگط اسنونه نفاق

كلشي بالدنيا منافق لونه أبيض
كل ضوه يتعده جفنك هذا حلمك
غمض اعيونك و عاين
تلگه للظلمة وجهْ
و تلگه هذا الغيم ياخذ من جمال الورد رشة
و تلگه ناس بلا دغش
و الصبح لو يغفه بالليل يتغشه
نام و ارزق عينك شويه ظلام النور وحشة

غازي ثجيل

(ضيعوني)

سلمت روحي وياچ ياشمس الغروب
والما تشوفه العين تسلاه الــگــلـوب

وانه ذاك العاشت عيونه بصورهم
وبمكاتيب العشگ ينضح صبرهم
ياسحرهم .. ليش من بعدوا نسوني
ضيعوني .. وضاعت بشوگي الدروب

ضيعوني وانه لسه گليبي يسگيهم حنينه
عيــــــني هم شــلون واحد ينــسه عـينه
عمــــــري هم وكـــبرت بفــيهم ســنينه
وحتى شـــوگــي يطـگ ورد ومأملينه
واحنــه يــــاشـــوگ شـــبـدينـه
السكته تاخذنه وطواريهم تجينه

ضيعوني.. وضاعت ايامي على دروب البريد
وانشد النسمه التسافر غيــر شوفتهم شريد
ولو نسيت وردت احبن، هم احبكم من جديد
أي يا گــلبــي من الــعـشــگ والشوگ زيد
وتــدري شوفتهم مــحبـــة وفـــرح عيد

مصطفى سبتي


هذا حدي
يجي الليل الليلة وبكيفي انامه

بخوف مو خوف ارد انام
واغفى وبشفتي ابتسامة

شگد بعد للدنيا بية
الكون مرعب
الخوف مرعب
الهدوء القبل دمعي حبال ملتفة برگبتي
ورجفة شفافي علامة

امشي فوگ اغصان متكسرة
وصريخ بكل مكان
كلمن يدور انتقامه

حتى چفي يريد يكتل
حتى عقلي يريد يكتل
انا مثل الناس
هذا الموت هم شدني اهتمامه

من وحدتي الينعكس ظل الطفولة
ظل عجيب
دم يغطي اطراف جامة

انا قبل شوية عايش
قبل چم اغنية عايش
قبل چم لطمية عايش

وهسة جثة
بس گعدت ابحدي جثة

بعيني قامت چم قيامة

مظفر النواب

"هنا يالشافك!
يالتبرج، وشلون نشوفك؟
يالتمطر، وشلون نعوفك؟
يالشايل حظنه اعلى چتوفك
تمرگ بالحلوة بنومتها
تصد عيونك
وآنه موصّيلك بعيوني
بيابيها
ومامش من چارة..
هونك هونك
كلّش هونك
روحي من خلافك محتارة..
..
..
موش احلفنه؟
وگلنه نموت وما نتفارگ؟
چا ليش بساع تفارگنه؟
چذاب، امشينه، امزعلينك..
چا دلحگنه!
نفك لك كل بيبان الجنّة
وفوگ الجنّة
وفوگ الفوگ الفوگ الجنّة
نوبه توهدن
ويّاك هواي توهدنّه
لو ردّيت أعلگ دايرنه
وجيّاتك أفرش بإيديهن
ضحچة وحنّة
وأفرشلك بالعتبة شليلي
وثوبي الأسود
يفتك حزنه
ويرجع نيلي
وتخضرّ الرزّة من دموعي
وضحچة وبچية تطگ بعيني...

محسن الدخيلي



البصرة زعلانة
البصرة زعلانه يَعَبد الله عليك
و حَلِّفتْني تريد أوديلك تمر ما بيه نُوَه
تخاف حگهة أعله النُوَه يخضر غريب
تخاف حگهة أعله النُوهَ يخضر ذليل
و تدري أنتَ أفضالة الفقره النوه
الكَاع حصتها النوه…..
الكَاع والفقره يَعَبد الله سوَهْ
إشلون ترضه اتبات وي چتال أبوك
و من هواه تاخذ هوه
الغربة تكتل
وأنتَ بس ريحة عدل وبلاية صوت
الغربة هيكل عظمي موت إبلايه موت
تهون من تفرش إديك ويه الدعاء…
تهون بس اشلون بالماعنده ادين
تهون من تلكه دمعتك بالسماء
تهون بس اشلون بالماعنده عين
الغربة كاس…..
إلباع روحه يعيش وي روحه غريب إبلايه ناس
إلباع جنسيته أو هويته و باع ساسه
يعيش عمره ابلايه ساس
الباع مسقط راسه يبقى ابلايه راس..
ابلايه ديره…. ابلايه دار
الديره والبستان وانه أوكبر أبوك…
نحارب الهل يوم والديره عُمارْ
شماخذك و أنتَ ابن أبوك……
الوحشة تكتل
وأنتَ لا ديره ولا بستان أبوك
و دمعة أمك
صارت أعله الكاع دمعتها مزار….
الغربة تكتل
إي يعبد الله تره الغربة حصار..
العازه كلفه
وكلفه من تخله تره جفوف الشريف….
البارحة بالطيف شفتك عالرصيف
غطاك وفراشك جرايد
حتى صينيتك جرايد
اوف يعبد الله صرت عبد الرصيف
وجانت أمك أنتَ تذكر من تجوع يصير….مدري شلون جف أمك رغيف
الغيره جام.. مدلل أنتَ بجال ابوك
لا يعبد الله حرام
تبوگ جف أمك حرام
إشلون ترضه اتعيش وي جتال أبوك
أو تَمِّنْ أوكلبك ينام
وتدري أنتَ
الكاع بالممشه تره اتبوس الجدام
وبوسة أجدامك تراهي الكاع غير أهلك حرام
أوشارة اليحلف تره إبكاع الربه شارة إمام
البصرة زعلانه يعبد الله عليك
ومارضت حتى أوديلك سلام

حيدر الغريب


اشتاگيتلك
اشتاگيتلك والگاع طين
وليل هندس ..
وخضر الشيب الشتا الازرگ بحضني
ويا مچان اللامح عيونك رحتله
ومن رجعت ولا بگى من اهلي يعرفني
الخيط ياهو الرايد مشابگ يلمني ..
ماكو خيط الـ من محمد وي ضمأ شفافك يلمني ..
الينشدون اعلى حالي
موش اسف حتى اوصفلهم عليك
يا دواي اليفتر بديرة الغربة منين اجيك ..
ويا طريج يوصل اجدامي للمشورين بيّة
الفراغ البين اصابيعك وقف لچفوف اديّة
كون اجيك ..
وأوصل الزلفك ..
وأحاچيك بحچي المنخول چيلات من أخيّه
مشتـهيك وأرد أشمك ..
يالـ أكليلك من خذوك ذياله تسحل ..
اليخطف الوان الخضار اطباعه منجل
بيه شوگ وبيه عوز وبيه السنين العجاف
وجيّتك فزعة سنابل ..
واگف لجيتك واتاني ..
حتى موگ العين عتّگها التراب ..
چني من آثار بابل ..
يالتلاگيني اعلى طولك ..
تضحك من نياط گلبك ضحك ياهل
ضمني بيك السان ..
باب السجن من ينضم هلاهل ..

علي دحام

( الضِحك و الدَم )

الوكت هذا كتب روحه ..
بــ( ضِحك ) و بـ( دَم ) ..
لا ( سِـن ) ينضمن ، لا ( دمعة ) تتوازه !!

يحير ( المِيل ) عن يا رقم ..
ينگل ( لحظته ) و چازه !
و إذا يمشي يصير ( الماضي ) جنـَّازه !!؟

بكل ( ساعة ) إمتحان إيصير
و هنياله إلبَـعد ( لحظات ) يجتازه ..
هذا إلمثله ( يتجازه ) !

شيتجـازه ؟؟
إذا شَب ( العمر ) و ( الگاع ) چف ( عفريت )
و ( فِتيت ) الراح وي ( الجاي ) يتوازه !!

شيتجـازه ؟؟
إذا ( يستفحل ) إعله الشجرة ( شُبه الفَيّ ) !
و إجه ( البطران ) سوّه الغصن ( عكّــازه ) !!؟

نِبَــت ( بزر ) العِفي بفطور ( طين ) الآه ..!
و خضَّر ( حَنضل ) إلمو ( عيب ) ..!
و ثُمَر مُر ( الحقيقة ) إمدرَّز ( إدرازه ) !

و بِدت بَطن ( اللَبيب ) إتخُض ..
فِطِنتَه و تطلگ ( ألغازه ) !!؟

و ( إكتاب ) الصبر ( مَركون ) ..
على ( رَف ) الــ( عسى ) و ما بَيـَّن ( إعجازه ) !!

( عَــلگم ) كل ( ضمير ) و فاح ..
بــِجفون ( الـوفه ) إفرازه !!؟

شَــح ماي ( الگِـصَص ) بالناس ..!
بحيث ( الزَيـن ) نَشـَّـز و إنمِسَح ..
من ( دَفتَــر ) العازة !

و إذا ( العاري ) كِشَخ بــإلـ( ماكو شي ) ..
( يِنهــاب ) ..!!
و ( يِنـعاب ) الشريف إليـلبَس ( البازة ) !!!!

يموت ( الخوش ) مِتغَربِل ..!
لذا ( ذكره ) يعيش بــ( صفوة ) إعزازه !!

( الشين ) إيموت بس لو عاش ..
حدَّه إلــ( شَيـل ) الإجنــازة ..!؟

و ذاك اليوم كلمن ينقش ( إنجازه ) !!؟؟

كآظم لاله


احن عليك ..
حنية جرح للدم ..
احن ازود
حلمك فيض الوادم…
جزه كل حد
يا أول عشك ..
وأخر حلم بروح ..
عيب أرتد
حنينك خضر بروحي… 
برموشي عشك ورد
انفل برمش غيرك…
برموشك ارد انشد
و اعبرلك اسنين الضيم…
لو جفنك يضل ارمد
ورد بذيال حلمك سيف…
وبجزرك اصيرن مد
تشبكك شهكة اجروحي…
يا ماي الوجه وازود

حاجيني بجرح كلبك…
ابحجي الجروح افهم
تطوي جروحي بغفلة…
وتطويك الجروح بدم
كل كطرة حلم مشتول…
نجمة بليل ما يحلم
بكثار الجرح دور…
عمر مدفون حزنك لم
اشتلني بسماك هلال…
كمرة بليلك الأضلم
اسكيني لون بلموت…
اردلك لو سكيت بسم
دربك لو شفت مابيه…
موكد نار فرس ادهم
اخذني وبترس جفك…
سيف ولا تظن ارحم
اخذني سيل…
ما مش سيل .
مثله ولا يكعه السد
وانتة شما تريد اتكول…
يا ماي الوجه وازود

شمسح يل جزيت اجروح..
جرحك ما جزه بعمري
وشنحر ..?
ما نحرت الضيم .
بيا جف لملمت فجري ..?
لتكول السوالف طيف…
مرن وانتة ما تدري
سمعني فرد موال…
ضمير الناس بي يجري
اعلكلك ضميري اشموس…
اوفيلك بعد نذري
شما خضر حلم بروح
تضل انتة حلم وردي
اصغر من فرح جفني…
واكبر من شمس سري
ذاك انتة.
وتظل انتة.
اشبك جرحي وتوسد
طيفك بل جرح ورد..
يا ماي الوجه وازود..

فيصل الحچيمي

للشمس حلمي انطرح
مافسراني گمر
وتباصرينه دمع
عيني اويه عين اليجي
ويجيبلي اخبارك

چا عثريت الدرب
لو ادري نيتك سفر
وماغيضيت الضحك
والغانمه اعذارك

ياچف اليشري التعب
وبعيد بي يمشي
ياخذ ادروب السهر
ويجيب عيد وكحل
ويصلي يم رمشي

يابس بروحي النخل
ساكت يجماري
من شح خيال النهر
وعيون خلي مشت
ضليت مثل اليضل واتگمگش بناري

كافي اعله بلكي ارتچي
فحطت عين الدرب
ظلمه ونخيت الشمع والريح بكتاري

عنوه اعتنيت العتب
بلكت بگصته ندى
ياحطب ياالما توج
يبروحي ناضح دمع
من ركض صوتي شعجب ماجاوباني صدى

اخذ بمتن النهر
والروج صوته لهب
اعله الكوسر ارجع ثمل
واتفاوض اويه التعب

گصبه بغميج الحضن
مشدوده عين البلم
معذور كلما سحگ مجذافه جاس الندم

ليره اعله طارف گحط
مالملماني حضن
مازعل سن منجلك ؟
سنبل بروحي اندفن

مخلبصه ضنوني وافل
ها صفت ها ماصفت
تلمع النجمه لچن شالفايده انه بسجن

عبد الكريم القصآب


وينك انت

يا حبيب وينك انت
اشكد بعيد الله ولحد

وينك انت
اشهالمسافه اششطولها يحليو يغييد

كاعد كبالي
واحس بيناتنا ميلين وازود

وك تدنه ومد اديك
وخذني ليك ولا يظل حد

اعصر اجفوفي بحرارة شوك
عض شفتك تنهد

ضمني لحضانك لصدرك
شدني بذراع العشك شد

ابماي حسنك خل يذوبني الخدر
والروح تصعد

بوسني لكطع النفس
حتى امن اموتن بيك اشهد

يا زغير الحلك
يل من زغره جن من يحجي ينسد

يا بو صوت الدافي
والكذله الحرير ورصعة الخد

عودتني اعليك
والمحروم مو مثل المعود

عودتني اعليك
شيصبر ابنادم لو تعود

اه يا لون الشعر
وي لون وجهك احلى مشهد

السواد يحلي الابيض
والبياض ايحلي الاسود

عيني يلطولك حرير الشام
بالسوك ايتفرهد

عيني يلزندك وسادة ريش
هنياله التوسد

عيني يمكحل امن الله
بغير كحله بغير مرود

لا تغطي اعيونك بجف الخجل
لا عيني ترمد

من تفك اعيونك ادفه
ومن تغمض اعيونك ابرد

يا غزل كاشان
كل عام اليمر لونه ايتجدد

من جنوني بيك اغار
بلا سبب واشتعل موكد

وداعتك ما عندي غيرك
عينك اعلى الماله احد

زامل سعيد فتاح

روحي...
طريه وتشتهي
وصوباط عنبك عالي
ردناك ياديس العنز
وامك تسوم بغالي
زتيتك لبغداد .. ايد بأيد
وارجع خالي
ريت انكسر بيه القطار
ولا ارد اشوالي
رديت وشراع العمر
طاح ورد مني الجالي
رديت ما اشوف الدرب
يل چنت يمي تلالي
رديت وادري بدمعتك
طول الدرب تبرالي
كل ضني عنگودك يگع
بأيدي وتلمه اسلالي
يحليو إلك مد العمر
حبي وحناني وشوگي
واترباك .. صابر وانتظر
اغفه على حچاياتك الحلوات
متوسد جمر
واصحه
على عهود الهوى العذريه
كل بزغة فجر
يحليو :- هلك مني سياره
يريدون وقصر
گتلهم الفن والشرف
آنه حلالي ومالي
وروحي طريه
وتشتهي
وصوباط عنبك عالي

كل عام وأنتم بخير 🤍

كريم حآشوش


هوى يخفگ على الشباچ
ويفك كل الستاير والحچي البي شوگ
هوى حار وجرح مفتوگ
وأنه مكابر وطين عناد
وبگلبي نخل محروگ
هوى ما اعرفه من يا باب
من رية السما ؟ من الناس ؟
من الباع العمر سلعة اعله چف السوگ ؟
من سنيني المشن جرحى اعله ظهر النوگ ؟

وأنه من هواي صار هواي
ودعت الأغاني البيها لون اسمك
وضيعت الورق والطيف
خاف چفوف حلمي بدمعتي ترسمك

وطيرت البلابل حتى أنسى الصوت
واجه صوتك صدى وي الريح
يا گذلة بهبوب الريح
يصوت امي يصوت الريح
ولك يا غيم اريد ايبس
ليش إلا اعله گلبي اطيح
ولك يا مطر يا چتال عطرك ياخذ ضنوني ويذكرني بمواعيد وبچي وعتاب
وشوارع فارغة وضلمة
وأنه متاني سراگي الباب
ومصابيح السمه يلمضن مطر
والدمع چان عتاب

ومن البعد البچي والشوگ
ارد ليلية مو انه
طفل فك جنح حريته
وعلى احلام العمر طاير
أثاري المطر يسگي اسمي
لحد ما خضرت شاعر

الشاعر حچه بگلبه
وطلع وي البواچي الصوت
الكهف ما ينستر بي صوت
حچه عن الحياة والموت
احتمال آخر محطة بالعمر ونموت
احتمال الناس النحبها وتبچينه
ترد تبچي اعله اسامينه
وشيفيد البچي وي الموت

حچه عن السفر والباب
سفر ما بي هلا ولا باب اليتانيك
سفر بس حزنك يغنيك
ومتاع الشايله بعينك ..  ضحك
بس سولته يبچيك

هذا انه
الشاعر والنسه والرجع من تالي
اليجي كاتبلك سنينه ويرد خالي
يا ريح التجيبك وانه ما ناسيك
يا لوني ويچتالي

يادمي ونهر بالروح
يا ذاك الضوه العالي
ياهندس وصفنة ماي
وبوجه تجي تلالي
ياريح التجيبك وأنه إذا حبيت
احب بكل جنوبيتي

واسبگ كل جدم للباب
انه مرتاح  چه گلبي يرد منك
دخن وتراب
اليرد ما منذبح چذاب

محسن الخياط

بعد عگبيش
بعد ما مرمرت روحي... بعدما كثرن جروحي
بعد مامات الگرنفل
بعد ما خضر العاگول من نوحي...
بعد عكبيش
يل عني سنين طوال ،
يالمجفي خذاك الطيش ...
يهالكاطع عليه الماي ،
افرفح بين جزره وگيش ..
شكلك ، ما اكلك ليش ...

يل عينك جوية هواي ...
لافادك حنيني ولا وفيت وياي...
لا غزر ملح لا زاد ،
يهالمجفي ونسيت رباي ...
كل ابچاي ،
كل اغناي ،
كل جروحي المخزنات ،
ياوسفه برخص هل ماي ...

يهل چانت علة اشفافك الف لالة.
گاع العاشكك صبخة شتظن تنفعهة الوشالة.
يعنبر نسفوك وتطلع اسحالة.
شهر ما بي الك خبزه ،
ولك شسوي بهلاله ...
ولك تتعب ولك تسهر
تعد ايامه ولياله ...
الف لالة وبعد لالة

لاريدك ولاريدن الك جية.
يحايف باگ من ورد العشگ فية.
بعد ماچانت الرية اتحضن رية
اجيت وشنهو هالجيه ؟...
عطف منك ؟
حرام ان چان جيتك صافيه النيه ...
رد رد بطريجك مالي حيل اهواك ...
وشعندك عله الينساك ...
لچوي الگلب عطابه
عبن حبك عبن لاشاك ...
عبن ما يدري ابعودك شري وحنظل
لحصدنك حصد منجل ..

#جرح_سبايكر

عامر عاصي

-عراريس النهر -

يا نهر ذبني عله الجرف ناي
وبهداي جيس الروح بهداي
سولفلي أدري جروحك هواي
ودمهم حرير ويجرح الماي
...........
يا نهر ذبني عله الجرف عين
بعيونهم تقره العناوين
يا نهر حلّفتك بالحسين
من موتهم ، هم استحه الطين ؟
......
توّه الدمع والموت ، توّه
والعاش گوّه ، يموت گوّه
يا نهر شوف آدم شسوه
يمطر جثث بچفوف حوّا
......
يا نهر يا گبر النواميس
ابليس راح وخلف ابليس
والروج ظل يكنس عراريس
ونذور وشموع وفوانيس
......
يا نهر دم ودموع صاير
وچنّك بالولايات حاير
خجلان ؟ شتگل للمناير؟
الشبان بمتونك ضفاير
........
بس يا نهر طينك عماهم
وبرياگهم وذّن ظماهم
أدري النخل يشرب دماهم
وتنوح برحيّة بسماهم
.....
صار النهر حيّه وتمد ناب
تروي الشواطي بدمعة احباب
غِيّاب .. چنهم موش غياب
شو چن أديهم دگّت الباب

نام الولد ، والشوگ ما نام
والريح تعوي ومالها لجام
يا طيف يبن ثمنطعش عام
تبچي الصور وتبلل الجام
......
وينشد فضيض الماي شتشوف؟
ماي وسِعِد وعيون وچفوف
ومچتوف لاذ بإيد مچتوف
والروج مغزل يغزل زلوف
.........
شتشوف من توگف على الشط
وشمس الفجر توهه اتّمَغَط
وتسمع غراب الليل ينغط :
شيلي الضمير البالنهر غَط
.........
شيلي الولد شوفي شحلاته.
عطشان والماي بلهاته
والموت شل جرحه بعباته
عريس ...... شيگولن خواته؟
.......
يا نهر روجاتك مخاديد
ناموا عليها الإيد بالإيد
حتى اليريد يصيد ، شيصيد؟
ضحكات وشفاف ومواعيد......................،........

موعود قاسم الرشيدي


خبر موت
و ثغيب اسود ...
و احا ناوبت گلبي اويه دگاته
و سوال
شموته ؟
و گلولي آهاته ..
و انطشن بالمغيسل قصايد مهن مقريات
انكتبن غزل .
بس هنه مرثيات ...
و گلولي تعال ارثي
و گلت انا النعي ما خله شي بيه
القصيدة التنكتبلك كون
موزونه عله اللطمه الشروگيه
ردح .
و الموت حد الباب
ردح
و الوجع ما گادر يضمه نگاب
حزني احاه لطامات
تشتد باول الملگه ...
و اصفن
بس ثغيب الروح
كلش واصل الزرگه
و اجي من افراگك مدخن
جگارة غضب من صوبين محترگه
و اگلك شوف گلبي شلون
مايقنع بنسيانه
و اگلك شوف روحي
اتگول هاي الورده المخلينها الگبرك
يمك غفت ذبلانه
و انشدك ليش انت بهل گبر مدفون
تره الضايگ الموت انا ..

ولان علي من اعظم ماخلق الله لابد ان يكون الوصف يليق ....



علي عمآد


ثگلن ياعلي
ومالت محاملهن
وعثرن نوگهن ثگل الحمل شَلهن

واجيتك نفس يمشي
ونفس يعثر بي
الدمع غرّگ اجفوني الگوه شايلهن

علي وانته ابو الكلفه
وهنه مو كلفات
چي شايف مثلهن ما تهملهن

رحت لغيرك
وگتله الحمول اثگال
بس ماشال منهن گام چملهن

واجيتك ياعلي
وفرّعت الموشلات
وگتلك راح اذبهن گلت لا خلهن

گتلك شيل نصهن حدّبن مگفاي
گتلي احنه الحمول انشيلهن كلهن

وخَفّن يم حضرتك
خُفَة المرتاح
الگتلك فرّعن ردن امكحلهن

اليرضه ايطيح دمعك
يفرح امنطيح
واذا مالن حمولك ما يعدلهن

علي وانته التِدَلّي
الهوه امنين ايفوت
ودروب السمه امن الزغر تندلهن

الشمس تودع ضواها
ابگبتك وتغيب
والبالسمه ايلمعن ضوه اتشعلهن

ايفك ريجه الصبح
من گبتك ويگوم
الهلا والمرحبا اعله الباب شاتلهن

اتگل للنسمه خويه
امن الترافه البيك
والورود اليعطشن نده تروحلهن

تفتر عالمگابر هوه وراحة بال
الچفوف اليستحن چفك ايصيحِلهن

يالتطي اشكثر
بس ما تگول اطيت
ادموعك لليگلك عطش تعزلهن

علي چي مو سهل
ماجيك بالسهلات
اليعصن كلش اتعناك واتحلهن