مظفر عبدالمجيد النواب

.....

يا حزن ياريت اعرفك
چنت اسويلك حديقة ياسمين
وممشة من كاشي الفرح جدام بيتك
يا حزن وك يا حزن ياريت اعرفك
چان گتلك لا تجيني
وتمشي كل هاي المسافه
اني وحدي چان اجيتك
يا حزن وحياة حزنك ماعرفتك
چنك مغير مشيتك
حاط ريحة رخيصة كلش
يا رخيص شگد بچيتك
امس مر الفرح بية
سولفتلة چثير عنك

راد يعرفك
گتلة بس عيونة ما تشبه عيونك

ضحك مني وانزع النظارة
ها تو عرفتني
گتلة يا حزن الفرح ماظن نسيتك
يا حزن ياما نطرتك
وانت بيه بثوبي بعيوني بمخدتي
انه عشك
يا احب طيور الله واشتهيتك
يا حزن
تذكر زمانك زاعلتني

ورحت ابچي بحزن غيري
وبحزن انت
ومن مسحت دموعي بدموعي لگيتك
وك يا حزن
يامة اشتهيتك

مظفر النواب
(ياحزن)

صوت : محمد الاميري

@sha3er_100

.

احمد العامري

(نگار الخشب )

أذڪرڪ و أغسل ظنوني برذاذ الفيّ..،،
و أطب لحضرتڪ مجنون.،،
بجيوبه شمس من ميّ،،.!

و غيمة آه ؏َ الشباچ،،
تحچيلڪ نهر مغثوث..
تشبڪ عروتڪ و يفيض شباچڪ
نوارس ضيّ..!

رَڪض ام أربعين جدام
اتلهوج ضمه و نسرين.،،
اجيڪ بلا الذنب خطَّاف
اتوسـم مقامـڪ تين..،،

يا أول سما من تبتسم تنباڪ..!
أبيت زيارتڪ بالغيم
و اشربها عله ريڪي أرواح..،،
يالريعڪ نبي و تفاح ،

اذريهن اذريهن ثلج مذبوح
اغنيهن اغنيهن طلاسم ماي.
لحد ما تڪفع الشفتين..،،

معزوفة عنب مجنون
تلحڪها الشمس ليلين..،

و يطيح الدعا ولايات
ولڪ ياهـ ...؟
اقرالڪ ورڪ عرفان

و انت من الرجيف اتلوب..،

ثمل و احسبلڪ الرعشات ،
رعشة مستحہ الڪيعان
يالخوفڪ مزاحم بوب..،،

رعشة من يجيڪ الروج
و براسڪ قداسة هيل..،،
رعشہ من الخصر لسهيل ،
تتماوع زبد و تلاحڪڪ حظنين ،

و المثلڪ ڪفر ينجاس..،،!
يالثغرڪ مطر جرجيت أنت اتبوس ماتنباس !

سما ياهـ....!
ترانيم الضوه لوحين بيَّ وبيڪ نتوضه
يالهلبڪ عشب فضة..،

أأدخُل يا رحيق الماي؟
مؤمن بشفايف طوخ...؟

أأدخُل و الرمل معلوڪ؟
يالنهدڪ عذارة خوخ..؟!

و انت ابنادم من ألوان..،،
توميلي بإصابع جام توميلي ،

أجيڪ اتبختر علهَ الريح ،
ڪمر سَبحان و بدورڪ تمد الشوڪ
تستنڪه النده و اتقبل اشليلي ..،!

أڪلڪ نام ، نوم الجام ، ؏َ الشباچ اڪلڪ نام..،
لو دغدغ رڪبته الغيث
يثاوب ڪحل وينام ،

نمش ؏َ البرتقال يلوڪ.،
تجيڪ محملات الحيل
علهَ ظهور الوِذَن و النوڪ ،
انت المفترض مبيوڪ..،،!

شنهي الراي..،،؟
مشي عليڪ أرباب الخمر ، و النوم و الضويات ،

ظل وياي...
آرش حظني هلا و ياريت،،
ألمڪ لو سما تبديت..

ظل وياي...
و شيلڪ لله و أصعد بيڪ
نتشبله المطر حفاي..؟!

ظل وياي..،
طويات الظفيره حروز
تبطَل من ارش خدڪ..،،
افضيلڪ خلگ ڪهفين
و احسب ڪل نمش نهدڪ...،!

ازفڪ بوس ، اشيلڪ بوس ،
من تڪعد يڪعدڪ بوس..،،!

شرار مجرش يطخ بيڪ..
و ارد ردة نهر متروس - شايل بوس..،
إشرد لا يجي المجنون...!
نڪار الخشب و يبوس..،!

احمد رحيم


اشتهــيت الليله ارد الــخوفي ذاك
الــ ذاك وكته
اشتهــيت الليله اغني المافـهمته
اشتهــيت ازعــل وازعل
ورضه سكــته
وبلايه عرفــه..
الشوك اخذني بلايه عِرفه
ومالكيت اليندهه اعيوني اعله عِــرفه

مامعودتني الأماكن
من وكت بالناس تــطفه
خاليه گلوب الشوارع
والمدن مابيها رجـفه
صاعد الدخان لعيون الرسايل
والوطن بيها ايتدفه

لاگمــر للماي يدنه
ولا حچي الينكال..
وتگوله الشفايف
هاي جويات الشجر من عدها خايف

لاحمام ايشيل حزني
ولا قصيدة اتواسي همي
فكت الديره حزنها وصبغو الحيطان واسمي

وانّسيت اكبال كلشي..
من شفت عذروني...
وبلايه عتب
من برد حضن السلال
وطاح مرتين العنب
هذا حده وفات وكته
امناده كلشي من انكتب

هذا حد اليحترك من كلشي بارد
هذا حد شوف القصايد..
هذا حدها وماتلوحه
الناس هيج..

يرضه بيش
الراح زعلان او يـروحه..

زين كاظم

وگفت عليك يـدخيلك ..جرح و اهدوم
انا الكاتبها والساعي .. و المشگگها اذا فزيت
ولك روحي عزيزة بيت .. مطرودة جبتها وياي
مثل ﭼـف الـﭼـتيل بمهرة اجيت اتلولح بممشاي ..
احط ﭼـبدتي براس الرمح وأنطرها لما تنزل لـﭼـعبه و لا گطعتك هاي ..
تواكح مهرة عمية ملاگيـه الـﭼـالي ولك روحي ..
افك روحي يتجادح عتب منها ..
افا .. اتفك بالحرب ﭼـفك ..
ياللي معزتك هلولة الخالات ..
حلم و امراد المرايات ..
وبالموازاه ..من بطن السواجي اتغير ..
وبالمداراه .. هوادج للڰلوب تصير
و دگ عالروح دگ الـﭼـف..
تِحمل ..من يضل اصبع يدگ وحده يشگ الدف ..
و فوگ الشگ نتل بالروح ..تيهتك
بالتلمس و الـ ادواره اليه بكل گبر نيشان
لميت الحزن .. كل الحزن يا كرم شدة ياس عالبيبان
وگلت للناشدين عليك ..
احب جف اليدليني اعله گبرك حِبة الملهوف..
واضمك بالنحر بـ امتوني اﭼـل عليك اشوفك حضنة المـﭼـتوف ..
أجيت ازحوف ..من الگيض ...اجيت ازحوف ..
ها شتگول ..أدنِ يمك .. أسوي الساني ﭼـف واشرب ..!
كون الموت مثل النوم يتخرب ..
ها شتگول.. احط ﭼـفي!!
يريد يعوفني وينبت ...
أحط خدي ..!!
أحسك گاعد تعارﭺ ..
يتساوى الصهيل اويه الرصاص عليك ..
وانت تنزل اﭼفوفك .. تمد راسك لليلاگيك ..

عريان آل سيد خلف


ومدري بأمرك ،
وانت لاظنة وفه
ولاوصل يل وصلك فرحتي
أبگة أگل للروح لو جرحي انلجم
ياروحي اسكتي ،

بيش اجيتي وبيش رحتي ؟
من كثر فيض الحجي الزايد
مثل طوفة انهدمتي
ومدري احير بلوعتي
لو احيرن ابعملات وكتي
وانه ياانه شكثر ليل
البعد سامر دمعتي

وشكثر ونت خلك ،
وانه
ال ولا تنشال ونتي ،،
لو اهدلها الرسن
جاملخت لاگات ريتي
وهاي انه وياج بهدة
وياروحي من روحج جزعتي

لا استحيتي من الصبر
ولا من حجي العالم خجلتي

آنه آنه ..
وانتي انتي ..
لو اراويج الصبر
لو بيج اجي اعنايه اعله ذلتي
وادري بيج امعذبه
وضكتي المرار وعيب تبتي

يالمثل كطرة مطر ..
وبصبخة البذات ضعتي
مدري شمضيعه ابخلك
بيهم سبع موتات متي !

ليش ياروحي سكتي
بيش اجيتي ؟

وبيش رحتي ؟

ميثاق الهلالي

استسهل الدخّان دمعي!
وبسّطن بيّه الليالي...
وآنه ذاك الچنت اصوغ الفجر فختاية وگلب..
هي هاي النار بالدم،
وهيّ هاي (الآخ) اليغنّون عنها!
تطر شبابيچ الجروح
وكل صدع نايم تفك صدره وتطب....

آخ لو عرف البيوت الطافية شعدها ويه روحي!
جا تشلبيت الحياطين الغرب...
وآخ لو عرف الجمر يقرا الرسايل
چا بچيت على الورق حد ما يشب…

الليلة بيّن عندي راي
المو نخل محد يذكره....
وآنه شاتل روحي صبّيرة بدرب...

ليا وكت اجدح وادخّن؟
غير أَلم ارماد روحي من السواجي
ويطلع ابنادم جديد...
ليا وكت بهدومي ضايع!
دمعة يم باب المحطة، وفشلة يم ساعي البريد..

شخلّت بعيني الصور!
والليل يركض، هدّة ارماح وحمام
غير ابطّل من تفاصيل الرسايل،
لا نه راضي وشادهن بخيوط گلبي
ولانه زعلان وأشگگهن وانام...

مثل عصفورة غريبة
انطفه كل شباچ بالدنيا بوجهها
وجام يشمرها اعلى جام...

وانت يا تالي النفس تطلع وأردّك
سالفة خلگي الطويلة
الكلشي من حروفك تودّيلي اشمّه
وآنه تذكر، من گلتلي شلونه گلبك؟
گتلك تشوفه؟ هذاك طوير شارد،
ناذر لكل گصبة دمّه...

يجنّح، يصير الحچي اسهام وخناجر
ينزل، يتيّه بالسطوح الغريبة
لا چفوف تحنّي ريشه، ولا تصح شجرة التلمّه..

والله هنيالك على خلگ الثلج
يالذبّلتني،
برودتك باگت النار ِمن الأغاني....
عادة التخطي الچيلة بروحه يشرد
وآنه تخطيني واتاني...

حاسدك..هنيال گلبك
ضايع بميل الكحل
يالضيّعتني بميل چويات الثواني…

شما تلمني السكتة افرفح ،
وشيفيض الشط أعبره،

بخاطري النيّة جسر...
آخ لو گلبي مثل ذيچ الگلوب الما يمض بيها الفراگ
شفايت الها، توادع وما تنكسر!

الرحمة والخلود

💔

أكتبوا اكثر بيت يجي ع بالكم من تسمع أسم مظفر النواب ..

تخليداً لذكرى الراحل النواب ..

عادل سامي


يصير احبكم ؟
لو بعد فات الأوان..
يصير لو كلش نسيـتوا
وصار هذا الحب قديم ومن زمان..

چنتوا مثل الفرح
حتى الحزن الابيض مايغشه

وچنتوا هذا الطير البگلبي اليحن..
بس انتوا عشّه

وهسه ما ضَل للفرح بينا مكان،
يصير احبكم ؟
لو بعد فات الأوان..

رايحين وماخذين گلوبنا،
چا بيمن نحب؟

معاشرين عيون غير اعيونّه
وضل بس دمعهن عالخد يصب ..

واحنه بس قررنا نزعل
زعل كلشي يحبنا چان
يصير احبكم ؟
لو بعد فات الاوان..


انه بس فكرت اسافر ودعوني ..
وزعلوني وقررت ما اشوفهم

وابتديت من المحطة
چفوفي بيها من الحنين: چفوفهم

ولامت عيوني المسافه البينّا
وصارت دمع
ودورت گلبي البصدري
وماحسبت احساب يرجع بس رجع..
كلشي بينا يريد يرجع ..حتى اصابيعي النستها زلوفهم
انه بس فكرت اسافر ودعوني ..وزعلوني
وقررت ماشوفهم..

مظفر عبد المجيد النواب


يجي يوم نرد لأهلنه

يجي يوم إنلم حزن الْأيام
وثياب الصبر
ونرد لأهلنه

يجي يوم
الدرب يمشي بكيفه… ياخذنه الوطنّه

يجي يوم
انفرّگ الغربة على العالم املبَّس
والحزن طاسات حنّة

زغارنه يعرفون
الهم ظهر بالدنيا
ومدينة وناس ، جيران و گرايب …

ما يگللهم طفل: غربة عراقيين
ويموت اللعب بيهم !

يطفل الناس مانعتب على اهلك كلنا غربة
لاچن احنه نشوف كل الحزن يحبيب حبايب

يجي يوم
زغارنا يعگدون خيط الشمس بدْرابين كل الناس
بلچي هناك حي الله طفل عن أهله غايب

تجي الدْرابين
تاخذهم للبْساتين
يلگطون الذهب خستاوي ذايب

يجي ذاك اليوم
لاچن آنه خايف گبل ذاك اليوم
تاكلني العگارب !!!

كريم البغدادي


كسرة بنادم جريمة
وكسرة الخاطر حرام

ياهو گلك عدنا غيرك
واحنه من سلم الضيف بعالي صوته
خفنه لا تسمع صورَك
همس ردينه السلام

لا تسويها بعد وتروح عنه
هاي ثالث ليله مانگدر ننام

وحگي اخاف
الخوف بس للعنده مثلك
الخوف ع المثلك عباده

امس شفتك بالحلم ضليت افكر
كون الاحلام التفرح بيها إعاده

وكون تلگاني بطريقك لمني بيدك
بارده الدنيا بدونك
وأحر من تموز الحرورة بورّيدك

انتَ بس انتَ الصدگ من الله اريدك

ياحچاية معدلة بديوان خير تنحچي
للجمال عيونه شايلهن بوجهه
عيونه ابد مو للبچي

فلاح الزيدي


غنج كصبة بمهب الريح
هيج الوادم تشوفك
ونظرات الطوايف كون تشرب صوتها زلوفك

وانت منين ماتندار تتبدى قوافي عزاز
مدري اشلون منظومة
يل ماخذ حلاة الطين من يتوالف وي الماي
جذر العافية يطك بي
ويشرب حمرة رسومه

هذن بس بيك امنهن نده الغبشة
سالوفة عشب نيسان
وصوت البلبل الخدران
من يتمغط بعشه

وشاخه بشجرة التفاح وردها مبدل هدومة

الي بصوتك حچي مرايات وي بت بيت
محد يعرف شعدها
حديثة ،،وحته شمس شباط
ماضاكت طعم خدها

والي بصوتك سوالف ناي ،
،،تمر بروح ملچومة

والي بشفايفك بيتين ،،
،من اقراهن اريد جناح عصفورين
يعرفن شنهو معنى التين
من يشرب معاني الفي
ويعرفن رقة ( الليلو)
من يكسر عليه الضي
ويعرفن شنهو معنى

الطين من يتوالف وي المي
جذر العافية ،،يطگ بي
ويشرب حمرة رسومه

كريم حاشوش


ماعفت كلبك بجه... ولا زودت ونك
وغير التعب والسهر.. ماشفت شي منك

لو جرح واحد سهل ..عثره ونرد نكوم
بس انه كلبي وطن.. من كل كتر ملجوم

واضحك واكول العوض غلطه ونعبرها
ما ادري طبعك طفل ياجامه بيها رسم ، ، ضحكات تكسرها

كاسر كلب ديرتي
وكلبي اعله مودك مشه وعاف اليحبونه
وهو انه تالي اعرفت
بس اليحب من صدك ماتنشف عيونه

بس ابو عيون الحمر
والطيب .. ويستحي .. ربعه اليغثونه

هو الحزن مو حجي
ولا سالفه وتنتهي ونكول نمونه

مثل الجمر بالشتا
للعافه كرصت برد ويجوي اليجيسونه . .

" عطش صحراوي "


الشاعر عزيز السماوي


لا تبچين
غيمة انتِ توجّين
و على آخر جرح بالروح بچفوفچ تحنين
تجيبين الليالي الـ ما تجي و گمره تجين
نهر يشبگ نهر .. للموت
ونهودچ عطشها سنين
يلين الحزن .. بچفوفي .. وخصرها يلين
النهر دافي و حزين
الضحك گمره و بساتين
صدرچ مهره .. مذعورة
توّج الروح بالچفين
تصهل بليل
و ترد
هالة خضرة من الحنين
صحراوي هذا العطش يحلم بالنهر چفّين
يرف لون الخصر گبل اللمس : جنحين
خَطف .. ياخذ حنين الروح
عليچ من العطش نهرين
اصابيعچ أغاني الماي
تتلون غنج وأسرار
گميره من الفرح وأسرار
اصابيعچ ورد من نار
تجيب الگمره للظلمة .. و تفل أسرار بأسرار
اصابيعچ برد من نار
اصابيعچ ليالي طوال
اصابيعچ توج گبل اللمس ذكرى و جمر تذكار
أحلم بطولچ نهر .. توج خضرة البساتين
مهر ياخذ اصابيعي بصهيل و يشعل الصوبين
علميني المشي عَ الماي
علميني الرگص بالنار
أسهر الـ أبعد صبح .. هيبة و گمر وأسرار
ويهيم الحنين عليك هالة من الحزن وأسرار
علميني أجيس الحجر ينطوي بچفي و يلين
علميني ..
علميني ..
آخ
أدوسن عَ الجرح صوبين
درويش الأغاني ما فرح طوله الحزين
يتلگّى النهر جرفين
و يفيض من العطش لو رفت العين
و ماتدرين
عزيز يعاند الغربة و يرد من الفرح كلّش حزين
يهيم خيول مذعورة ما تعرف تريد الـ وين .. ؟
نزيف عيوني ياخذني .. العراق منين .. ؟
يجي منك جرح .. أفرح .. يجن جرحين
صحراوي هذا الحلم يمتد للأبد ماشين
ما أدري إنتِ من يا صبح مهرة تجين
النفس ورد البساتين
اخذيني . .
اخذيني . .
أصد الخوف من يعرض تجين و ما تجين
الجمر يخضر من تجين
الگمر يكبر من تجين
يا لون البرد بچفوچ الحلوين
تزيد من الحزن كلما فرحها يزيد
يا خفگ الحمام ..
و لهفة التنهيد
مذعور الصدر
دوّخ اصابيعي ..
و حيّر النهدين ..
سرب من الحمام يطير .. مدري الـ وين .. ؟
كل عمري يمتد نهر .. يفيض يضيّع الجرفين
أموت من العطش
لمن تجين .. و ما تجين
أمر برد الصبح بچفوفچ .. تحلمين :
شمس تاخذ اصابيعي نهار الغبشة الماشين
انتَ منين ..
وآنا منين .. ؟
جرح يجمع عذابين
تحزن .. أشوفك
گمر
يغرگ
بالنزف
ليوين .. ؟
حزين الگمر .. بچفوفي .. ليالي ينوح
يا صوت الـ يهيم .. شراع .. للروح
يا .. سر . . الـ يجيب .. الروح .. للروح
يا گلبي .. الـ عليك .. بذلة مذبوح
إشعلي الماضي كلّه بليل
و حيل إبچي عليَّ شما بالنفس من حيل
اخذيني ظلام و خوف
لمّيني نزف ما شوف
داويني گمره الوطن
يهيم عيون للشوف
اخذيني نهر أزرگ يفيض من الفرح ويشوف
يلمض الليل و يفز : خيل وشمس وسيوف
حزين النهر يتلمس بيديچ طيوف
يوج برد الأصابع من حنين الخوف
ويهيم غبشة الصدر .. لچفوفي كلي .. نشوف
مذعور الشَعر بالريح .. مهرة بلا رسن وطيوف
اخذيني خذاني الخوف
اخذيني نزف شاعر يطيح إعله الورق ملهوف
اخذيني قصيدة هور تدوي بكل حرف مشحوف
اخذيني ..
اخذيني ..
گمره وحصن وسيوف
أريد الـ ما تريده
الناس
وأحلم بالظلام يشوف
أهيم من الحزن وأوگف بطولي شراع
ولك ماي النهر كل عمره بس .. وداع
الوطن بين الأصابع ما يمس الگاع
أفرح يموت الفرح
أحزن
توج أسرار
أسافر بالدمع مرتين
• مرّة حنين الصدر ياخذني مدري الـ وين ..؟
• ومرّة الأصابع توج روحي أغنية بچفّين
وين ..
وين تغنّي بچفوفك تريد الـ وين ..؟
يهيم الصوت بالگمره عَلَيْ : مهرين
ياخذني الصهيل و يرد خوف يفزز النهدين
أغانيّك حنين چفوف بالنهدين
حمام يطير .. بالگمره .. لوين ..؟
أطير بلا جنح جنحين .. !
أغانيّك نهر تاخذ حنيني أنهار
أغانيّك سفن من نار
فرح ورد القميص بجية الخطّار
أغانيّك .. جمر بيت الفقير و عزّة الأفكار
أغانيّك .. تهز ليل المدينة بگمرة الاسرار
أغانيّك فرح درويش .. يلعب بالجمر والنار
أغانيّك .. تمس جرح الشهيد بدمعة الثوار
وين
وين تغنّي بچفوفك تريد .. الـ وين ..؟
يهيم الصوت بالگمرة عَلَيْ : مهرين
أغانيّك نزيف عيون تجيب لكل صبح شمسين
دلّيني العراق منين ..؟

علي مهدي


يا عطر شال وشابك زلوف
تلاحگ" ارداني صارت جروف
لنته الغريب و نگدر نعوف
وجهك على العميان مألوف

ترضاها يا گلب العصافير
من صورتك حصتي البسامير !
فزاعه يمكن وسط العيون
توه النعاس يفوت و ايطير

وشحجيلك اعله الخنكه بيه
امن الصبح خنكه مغربيه
ومنطي بثواب الريح ريه ؟!
والخاصره تغفه اعله اديه

الحنيه كلما تعله اطخ راس
مهيوب ، بس من وحدي انداس
حنيتلك من ناموا الناس !!
اكثر امن الدم بيه الاحساس

مو انته و اتوسل بگایاك
يدري الله بالصاير بلياك
خاب اعله شوفة وجهك انخاك ؟
جا وين المسولفهن وياك !!!

ويخنكني شوكي المارضه يفض
وكلما انگال اسمك اغمض !!
ارد انسه بس الـ ليش تعرض؟!
و ها حشه جدامك صوج دربي

المشكله عيونك هنه هنه
جا وين وديت المحنه !!
وبسك تكول اليوجعنه ؟
ماظل وجع ما جاس گلبي

بگد برد وجهك بية حركة
بكل المنافي ارسومي تلگة
اغلط بثوبي و جرحي اشگه
ليهسه فگدك ما مصدگة

وناطر رسايل من وداعي
وبس انه الاتعنه اعله ساعي
يا گلبي اخذ بينه اعله ناعي
ويه اعزاز كلبي مالي داعي

زهير الدجيلي


مرة وحدة

صرت اشوفك أحلى مامرسوم باالدنيا وأرسمك
صرت اشوفك وين ما يطلع گُمر
صرت أگل للناس حبوا هواية حبوا
ولاتخلون الربيع بلايا وردة

حتى يبقى الوفه شمعة
حتى تبقى الدنيا مليانة مودة

مو امحبين
الي يردون اليحب لازم يشوف الهجر مره
مو محبين
الي يحسبون الگلب مثل المواسم الف مره

شلون لو ماي الوفه أبيناتنه طاح وتبده
شلون بينه

شلون لو راحت الدنيا مسافرة بلايا ردّه
ماأظن يبقى غصن شابگ له ورده
بعد ما يمر بينا الهوى ولامرة وحدة

تدري مرات الغياب ايصر شامت واضل احسب
وحتى ساعات العتاب وياك ماخلتني اعتب

مرة اشوفك فرح يكبر
ومره اشوفك حلم أخضر

لجل عينك والعيون الصافية بلون الموده
والعيون التعرف أتحب مرة وحدة
كلت احبك مرة وحدة
والعمر بس مرة وحدة

عامر عاصي


كلشي يجوز
إذا دسنا المواسم كلشي بينه يجوز

وگف وحده العِثِگ،
بس الجِذِع مهزوز ..

كلشي يجوز ..
الحنطة دموع،
والخد،
على البوسة يموع ..

كلشي يجوز ..
يخلصون الشباب،
وينتهي الموضوع ..

كلشي يجوز ..
نِزِفْ كتّال اهلنه،
وندفن الحاجوز ..

كلشي يجوز ..

دنياكم لِعِب
والمستريح يفوز
وشتا عيوني طويل
وعينكم تمّوز ..

موفق محمد


يا مطر زخهه بحلاتك
وأترس إشليلي مطر
حالوب ،
يا هو الچان يمعود ددخيلك
ارد اطير وياك
وأتنفس گذايل

وتدري خالي ،
الگذله ورده
الگذله هلهوله
ضوه إبراس الجدايل

يامطر طگني إبسبحتك ،
خرزة
خرزة
وخلي شاهودك بأيدي
وآنه أبيت ،
ومن اصيحن بات
انزل يا فحلنه
واگعد
اگعد
وافتح اليمنه دخيلك ،
بقن هالنهدين
ولفني الدنيه گمره
وارد أذبن ليل حزني
وأسكر إبميتك أغني

يا ديچ يابو عرف
گعّد حبيبي الترف
گله المطر تلني
يخدرني چني إبحلم
خل يجي إيلعبني
إينزعني ثوب المطر
وبميته إيضمني ..

يا مطر طگني دخيلك ،
كلشي عدنه
وارگصلك گمر بالروح ،
يتماوج محنه
ولمني طينه ،
ودوفني إبمي الورد
دوف غطيني إبحنينك
ارد اطگ شجرة محبه

إتضوي من طاريك
وتخضر فخاتي
ومن تهزها الريح
والله تصيح باسم الله بناتي

ونام حدري
وهزني امطرلك
عسل ، بوسات
ترچيات ،
عيديات
وشتأمر أغاتي

وطير تلگه ابصدري عشّك
وغني وآنه أسبح إبحسك

ويا ديچ يابو زلف
عوعي اعله راس الولف
گله المطر هزني
ولفني ابگلايد شذر
خل يجي اينزعني
ويعلگلي شمعة عرس
وبميته ايزفني ..