زامل سعيد فتاح

عيني مامش فوگها لغيرك مچان
ولا لساني لغير طراوكم طريت

يا فراشه
وروحي ماتنطيني اجيسنها
واخاف تغثك ايدي اشما دنيت

حتى لو وكرت فوگ ارموش عيني
يظل الك مصلوب يبگه اشما بطيت

وخاف يتعب رمش عيني
وخاف دمعي يهل
وتتوهم بچيت

ويا متاع الروح
ما والمني غيرك والك بس اتولميت
بالحنين وبالمحاچي الحلوه
وبطوک الموده اتخرميت
عمري ماضگت الموده

وعشت وي شوچ الشفلّح عوسجيت
وروحي توها أمية الحنيه بيك
عروگها اتطش

وياصريمة ورطّبت چنها ورميت
خاف سوم يزود سومي
وداعتك
مازود ولسومك رضيت

صادق الصافي


مخلبص غزل روحي بمغزله تخلبص
واليغزل ثمل
ومسودن
ويرعص
مدافر للصبح وياه
ولعد شمس العصر
شبگات وإتحرمص

بلچن ينعدل ويطيب
وبلجن بالصدف يچنص

اجاني مكطع الغزلات
والمغزل جديد
وكاسره من النص

جثيرة الفرهدت شبعت
وانا بلگمة حلال وكال بيه يغص

يظل گلبي گلب سمچة
يغريه الطعم ويكظه غفله الشص

جودت التميمي


أشكد صبرنا أعلى الكّناطر ... ؟؟
وأنتَ لا هزك دمعنا .. ولا نفع وياك خاطر

لا خطف وجهك علينه
او لاسماك أعلى العطش والديم ماطر

والله لو أعرف الك موسم حصاد
وما تذر الفشل بعيون اليناطر

جنت أضحي بكل عزيز
وجنت بالغالي وبگاي الروح اخاطر ...

تعبتني
زامطت دكَيت صدرك واعدتني
و خالفت من دون حلي
وبين الحديثات كلهن فشلتني
وتالي لنك ..
بس بالمزامط ودكَ الصدر شاطر
يا حسافة .. يا حسافة أعلى الليالي
العاشرت بيها الكَناطر

أو لا ردت منك أو لا مراية
لا مشط .. لا مكحلة
أو لا ردت صوغة من الولاية

ردت أشوفك ... ردت أكَلك ..
لشوكت عمري يضل واعيوني سبايه .. ؟؟
وردت اكّلك شنهي نيتك .. ؟؟

حرمت أترف اسنيني أيصير تحرمني البكَايه ؟؟

أهواي نشدني الحبايب
يمته فوك الدار تتعلك الرايه .. ؟؟
صدك يمته ؟؟
يمته يا الذبيتي ابكتر الدرب ذبة النوايه
يمته فوك الدار تتعلك الرايه ؟؟
ينشدني .. واضحك

وحتى الضحك مكسور خاطر
يا حسافه .. يا حسافه
أعلى الدموع الفيضت بيها الكّناطر
وهم بعدني .. هم بعدني
أبذاك شوكّي البيك شدني

وللكّناطر
ضوه أطيوفك يا طويل العمر ردني
حكَي .. لا تغتاض مني ..
وانه احس ضحكة الشامت
خنجر أبكّلبي وضهدني ... وأدري بيك

أدري بيك
ما اودك ... تودني

وأنه غاد اعلى الكّناطر
يالمشيت أتجيب لسنين الحزن
جبر الخواطر

أمير ال جدوع


و متانين ..
شتتّنا الصبر عالگاع
تسحگنا الليالي بغيظ
وبدوس الجدم يلتم شتات الطين
ومتانين .
تانينه خلگ فحطان يلهث
وبحِمادة وشوگكم تموز
وطوارشكم ..
سواجي اطيوف مرننا بحضنهن كيظ
رادن من دمعنه احروز
نفحط.. والكوار يزيد نتصبر يلن ندري
الخلگ شيّال نهبت من خلگنا النوگ
ننطركم زرع ريحان، فوگ مروز
يسحگنه اليريد ايحوش ونتاني
زرع مسحوگ ...
هذوله احنه
الرسايل لو ملح تدّي نحطه اشداد
لن اجروحنه اتعزها ..
وواحدنا غشيم اعيون فك عينه
اعلى صفصافه حملها تراب ويهزها
وهذوله احنه ..
تانينه رمد، وديرة كلها اعيون
دوم ابكل جفن مفروك..
شجرة ابطارف الصوبين ورخيصة
سعره الحيل ويداعي اعلى حگها الشوگ
تموت الـ أه
اذا خاوت اشفايف افهى من الطين، ومتانین..
الطير الـ بالسما امجنح اذا يسمع
حجي الزنجار واصل للقفص يزعل
وهذوله انتم ..
سجنتونا حديد بماي ينشال الجريب الشوف والفرهود بالمضموم مايندل
وغشمة احنه ..
علگنا عشگنا اگبال غيمة صيف ..
نيشان الغشيم يعگب مثل الصوت
ونناشد ماعطشتونا؟
وكل عطشان.. يدري البلم من يعطش
يشگ روحه ويدور الموت ..
ومتانين
فيّ عيطة نخل
جم دوب نمتد عالدرب كله
واذا مريتوا لاتجزونا وصيحوا
سعف بينا يسد الشوف جا شِلنا
لجن يومي عكس باقي السعف گذلة
وبالملاگه ننصي الشوف لايتعب
نماشيكم نخل ،
ننزع كربنا ونلبس الدخان
غشمه احنه واخذنا الراي
ﭼـي شفناها ماتنشد
العمية اتحس اجاها الليل
من يبرد حجي الشباﭺ والبيبان
لجن طحنا عرگ حمّال
من ننشف نخلي اثار بالقمصان
لو رديتو تلگونا
حطب مكتول ..
فصله ارماد والفجّار ما مندوم
گام امن الطلابه
ابراحته اوابيض وجه ادخان
شلناکم‌ حرز چذاب والوادم يعيرونه
صبغ ماشي بوجه زنجار
من يوگع یرد لونه ...
يروج شوصلك يم بلم المعيبر
يماتدري يشگ گلبك ابمجدافه
نضحك والجرح يدّي
الگطن ناعم وخشنة اجفوف ندافه
تنيناكم شبيب الفين لكن شيب
لاح اوجوه المرايا ونبت سبعين
ومتانين
من نشتاگ؟
ننفش شكو اخيال بـ طير
هلبت جايس اخيال انتـﭼـى بـ فّيكم
هذوله احنه ، جدم متعوب
تانينه ايعثر بينه درب حيّكم
تعال و صيح ..
نتلگاك هودج ها
يماي اروينه گبل الذبح
ترضه انموت عطشانين ومتانين ..

حسن علي الغالبي



شَرّعتني چفوف غُربة ..
طشّرت زَفّة هَلاهل تمشي بالدَمْ
وباعني اللِيلْ إعله حَسبة خايفين ..
''وانه وجناح القصايد''
مدري وين مسافرين ..
ندوّر الگاع إعله شَهگة
ندوّر الگاع إعله رُفگة ..
نوصل لسابع سِمة مرايات گَمرة
ونندفع من چَف مُطر ..
نطيح غنوة لِيلْ بحلوگ السِكارىٰ
ونِنمحي بصحوة صُبح ..

ضايعين ..
درّة فكّت عينها بشاطي الحِزن ..
باردين ..
مِحبس المَوتىٰ الينزعوه للدفن ..

''وانه وجناح القصايد''
نرسم الفرحة بنعاوي ..
نِظفر الصَفنة قصيدة ..
انّناغي لِعب الهور والبَردي وعَجدنه
لحد ما يذبل حچينه
وننطحن بالرحّة حنطة ..
ماكو سدّة اتحشّم الغافي بگفاها ..
وماكـو طوفـة تعبّر الطايح وراها ..

كِلشي ماكو ..
واحنه هم مرّات ماكو ..
نزغر، شما شِفنه زفّة
نبرد، شما شِفنه ماي ..
نكبر، شما شِفنه عفّة
نعرگ، شما شِفنه راي ..

'وانه وجناح القصايد'
نرسم الدخّان گِذلة ..
نِظفر الساعة مواعد ..
إنتاني رفّة ثوب وشموع وتراچي
لحد ما تغفىٰ الإميالة
وننّثر ع الباب ذاري ..
ماكو نثية تطرز ثياب القَصيدة ..
وماكو منَحر ننصلب شذرة اعله جيده ..

كلشي ماكو ..
واحنه هم مرّات ماكو ..
وخاف يوم احنه انتصادف
هذا دخّان السنين المدري شنهي
احنه ماكو ..!

علي الصفراني


أشمك جاي ..
بس أطلع سراب الگيك
وأردن ردّة المكسور وأگعد وألتهي بطاريك
تعال أرجع وأحنيلك گناطرنا
وألملّك هلا الوادم ..أگللك أمس صرنا
تعال العشگ ما خلاش بحبال الوكت شرنا
اشو شحيت يهوايّة!! ..
الشجر من ينشتل عالگاع موش بكيفه وبرايّه ..
انا اخلافك بشر متعوب ذلّت وجهه المرايّة
حالف لو تمرني بيوم اجديلك ضحك بطران
أدگلك بوب الولاية ..
وألم سنين طيش الفات
وأراوس عمري بحجاية..
يحسرة موكب متانيك
لكن ماكو مشايّة ..
تعال أطغى أشتهيتك خل اضوگ الذل
تدري البير لمته يموت ..لا رد الدلو اموّشل
وتدري الصحرا يمته تعيش اذا شمّت مطر مجبل
وتدري الـ اااخ يمته تموت من تتشابگ وي الخل
شبشرك صوفرت بجفاك
والمنجل وصل للزيج ..
وانا حجايات خرسة وياك ..
تتماطل تظل بالريج ..
مـ انا براسي محطة عليك
تاخذ ناس وتوّدي ..
واطــيح وطيحتي لوحدي
جم اسبوع تانيتك ..
وأردن للسبت وأبدي
طبع رحّة جبتها وياك من كل كتر متبدي
يعندي وكلشي ما عندي
وانا الطاسة .. لجن ما طب گلبها الماي
تشبه طاسة مجدّي
وانا ادموعي اعلى باب الله
مثل معتاز دوم اتدوّر بخدي
حلم خرسة .. دفنت أسرارك بصدري
وعشت وياك بين الـ اااخ والمو ااااخ والمدري
تعال أتدفى بـ أعذارك ..
مو دلّة واعاشر دوم بس نارك
تمنيت بغرفتك روحي يدة باب
يالمالك بعد جيّة ..
تدري الصيف يكشخ بيش؟
من نگعد سوة بـ فيّه ..
وهذا انا جبتها وياك
مُدّة تصبر بمُدّة
صرت ﭼـنّي حبل تابوت
هذا يصيح جِرّه وذاك اليشدّه
يـ كوز اشگد توزع ماي بس بالتالي تتبده ..

هاشم الخزاعي

حتى زواكتك بهتت
والديرم طعم زنجار مات بصبخة اشفافي

راي ايكول بطّل يشتهي ازلوفج
وراي يكول لكَه... واللاكَت اجفوفج

وآني ابين هاي وهاي
اشوفك راي
واشوفك جاي

كالتلي الكصايب ذيج تذكرهن؟
شما اظفر اشوفك جاي
لو مر الهوه بشعري اشوفك جاي

ومن تنكع زلوفي بصيف اهيسك ماي
حته الماش المصفطه اعل لاهيتك
شما اغير مكانه احتار اشوفك جاي

وتعلل بأول لون حطيته على جتافي
وتعلل بآخر آه مرت والكَمر غافي

ايما صباح

يصيحني الليل وتفزني الدار عَبرة
وتركض احلامي شبابيچ بمدينة
وهو ركض الليل فِكرة
وامشي اموت بساع
حتى احيى الصبح گبل الجرايد
وانقري بكل حايط يدلي اليضيعوني عليّه
آنا حرّة

صوتي محبوس بقفص ..
بس روحي برّه
عيني معصوبة بدمع ..
بس شوفي يقرأ
يمته يفتهمون آخرتي لسماي
وباچر إمن الگاع خطواتي اتبرّه

صدگ ما غنيت يم اذن الشمس ..
بس سامعتني
صدگ ما لحت الگمر ..
بس الي اوياه چم هلا وذكرى

آنا حرّة
ودوم اخضّر جسر للشارد لروحه
وين ماشِتلوني حُفرة
وين ما ضمّوني ما يلگاني غيري
وين ما باعوني ما يشريني غيري
وين مادفنوا گذلتي بچف شگار
تطفح احچاياتي سمرة

آنا حرّة
واسود إمن الليل شيبي
لياهو ينطوني ورد ما بوح عطري
آنا مضمومة لحبيبي
كلمن اتحلاني گمرة يموت مغرب
ما يحصل بس مغيبي
ياهو غير الرادني بظرفي رسالة يلوگ لإسمي ؟
يندل بچف من دلال جروحي
ويگلي بهمس عگب الضماد
يمته ما تردين طيبي
ياهو غير الباعته الأيام اليّه بكلشي اعرفه
يصح نصيبي ؟

آنا حرّة
وشوغتي اتعثر الهوى الينباگ مني
وحزني ما يسترني يم طاري الفرح
وإبچاي عيبي
مدري چم عثره اليطيح اوياها ضحكي
ويلحگ اعله الماكو جيبي
مدري يا چف گاد گلبي إمن الضوه لهاي المتاهة
وگال للساعات ماكو ايام ينتظروچ غيبي

وغاب كلشي
وصارت الدنيا سجن
والتهمة ناس
وبيها بس المات يبره
والسعف مد راسه يرجى الريح
والبيبان تشره

غابت طيور وبچه اويه اغناي عشها
والنهر دمعاته فوگ خدود حزن الگاع
تطفح شجرة شجرة
والدروب بعين كل مشتاگ تبچي
بگلب كل عطشان تبچي
تريد من فيض الأيام الرايحات اوشال گطرة

وآنا ماهدّيت حلمي برغم كل هاي العواصف
سألوا اسمي منين هاي ؟
وجاوبتهم ..
من وره النجمات
فوگ امن الخرايب
غاد من دار اهلي ذيچ التيهتني ..
آنا حرّة .

سلام حمزة


وگف عد أول الظلمة
شمس عـ الباب
ودگت ساعة الظلمة وزعل عـ الباب
وصار مرادم الحيطان والتيجان تتلوه
تره المبيوگ موش الباب سرگي الباب ماهوه .

ما يدرون
بالظلمة نشاز الصوت
والسكته گمر محبوس والعِله بلهات الحوت

هذا أخر گمر يا حوت ……. لا تطفي
هذا أخر ضوه من الطين … لا تچوي

وأتكتر وروحه هناك مسبيه على الشباج
وبراسه شذر ملچوم
ومراية حزينه بخوف توميله .

تشوف الباب ، وتعته يشوف الباب
ويشخبط ليله من ليله
ويگللها التعب حيله
ويغطي مرايته بخوفه عن لاينلچم سباح بجروفه .

بكتاره أصابع باب من لونه
تندس والدرب مذبوح والدرويش وحاش إعله رازونه
يصفك والهوه بلا جف .. يزته لأخر عيونه

وتنام الدنيا بعيونه
وبراسه حلم ماجوته مرايه
كتب عـ الباب ، كلبه ، وشمعة
لا مو شمعة عشر شموع وچماغه وشمر ضيه
خاطر ما يموت الباب والبهلول يعرگ لو ذكر فيه .

كلما تضحك الظلمه يشب طاريه
كلما رمح غفلة يطوف
يلتم گلبه فوگ الريح ويچويه

كلما يتعب السنبل يطيح اميّه بذياله
كلما سلهمت كحلة يصوغ النجم گرداله
هذا ( أخر نبي ) والباب غناله ..

علي الشباني


بالليل الأول
جست روحي من المحبه
خفت حد الموت يحبيبه المحبه

جست اصابيعي وخفت
نجمه مشتعله همت

بالحنين أنتَ والليل الصعب سكته
( سكته مكسوره بطعم بوسه جديده )
يا سر النجم مفضوح ، واحزانك جديده

هدم حايط حنيني ، وروحي تاهت بالرياح
صرت اخاف من الطيور اتحرك بدمي الجناح
وإنتِ حركتي الرياح

بالجهات اليّه واندارن بروحي
مري يحبيبه الشته يدك باب روحي

ومالي حيل ويه المطر تگضي السوالف
وإنتِ بأول زخه
نجمه زغيره نزلت بالسوالف
جدحت بروحي ،وهدم حايط حنيني

لن محبتنا سؤال
دخت من لون السهر
تميت بالحيره نهر

والسهر مثل الضوه الـ بالبيت

يالبراري
بالحنين وبالرمال
يرسم الخطوه سؤال

يمته يفتح بالعشب باب الجواب؟
نركض بكل النوايا

ثيابنا تخضّر التراب
نركض بهذا العمر يحليوه ودروب العذاب

تلتف وتاخذنا ونرد
تلتف وتاخذنا ونرد
وآني وإنتِ والعذاب والمحبة
تلتف وتاخذنا ونرد
للبعيد ...تكبر وما يتسع كل الجواب

أمير جدوع
في رثاء الراحل علي مهدي


مابين دجلة البارحة و اليوم
قبل أن يكون موت كان قصيدة

يگود عيني النورس او للماي اتبعه
دجلة باب تصير للمحد يسمعه
هكذا قال الشاعر علي مهدي إلى أحد الأصدقاء



أجيت و أوَلَك دمّك
و شوغة من الدمع تاليك

أجيت بوحشتك فايض
تريد تسابگ الروجة اعلى حد مابيك

مد وجزر وبلامة توهسك روجتك بس جرفك يوازيك
حر وزواگتك دمك اذا چان العمر جازيك

ياراگ اليلم فيضك حلم تجزينه ونتانيك

ويمد النهر وتبوگك الروجه
وبقى من اللون بس حزنه
على چفوف الرمل ماتوسم الحنّة
موش المشتهى الدنيا التعب شاريك للمنّة
يافيض وحزن توّك ومِن ننشف تعاتبنه

الالواح الجديدة تريد ماي اكثر
وتونه احنه دمع صرنا

وچنت مثل المري اترد الضوة بگده
وتوهس جرحك احجاية
وجنت تدري النزف ماردّته امراية

ويصك دمك... وتظل حدره معانيك
يالتضم العتب حدر التواسيل بأغانيك

اوتساير دربك ويگصر تخاف العمر لا يبطي
يالـ اجدامك مشاحيف وخشب بيه روح
ومن تجزي تهم روحك جذر للطين ماتطّي

ورحت كلك وماگصّر اجدامك خوف
من يكسر ابفيك الليل تكسر على الفي اطيوف

وچنت من تخصم عيونك
يتيه صيدتك گلبك هواي يشوف

وجنت تدري الضوه مايلتفت يجزيك
وضعت يالتنفگد بينه
زمخ يم وجهك الفانوس ما وجد ملامح بيك

اشعفت للملگة من مايك
يلو فيّ منك وننخاه من المامش اتلمك عين
يـ انگاط ما ظل ورا سنينك طين

وانت اول اصيارك حب

اجينالك برد من خاطر الظلمة
برد وشلت الشمس مغرب

اخذها بهوسة الصفاف و لا برحي اليفز منك يدليها
وجزه التتخايره بضنها جزت للمگبرة عثوگك
الرمل ماعثرك بيها

ويناغيك الضوة الفوگ الگبر يبچي
وتفز وتگلب عيونك وغاد من الحلم تبعد

تشب ويوهسك اصيارك
تريد بروجتك تجزي العطش وترد

وتثگل ريتك تالي
وتعب لعب الصبا بروحك او فيّ من العمر ما ظل
وترد وتنجفي بحزنك مطر حدره الرمل يثگل

وعتب عالناس تتشضى

وغيضك يكسر الدنيا توچد حزنك بسيفك
او ما ينكسر منها مرايتك فضة
وتموت بكيفك ونرضى ..

عماد المطاريحي


روحي دايّة ..
وشاطي عينك ..
حلم يزرعني اعلى جرفه
وعمري صدفة ..
وانت روحك نافذة ..
تجيب الضوة ..
وضحكتك عصفور حط بحضن شرفة
وماي أصابيعك .. أتمس الماي يغفى ..
أنت بستان المحبة ..
تدري بسيوف العطش تذبح الرغبة ..
تذبح ازهار البنفسج ..
والنوارس ..
والسوالف ...
والبداية ..
تدري من ترويني أكبر!
أزرع طيوفك شمس والديرة عنبر ..
آه .. لا تحرمني نبعك ..
تذبل ورودي وتموت بشوگ دمعك
جرحي يضحك وانتَ تضحك ..
وانا اتبعك ..
من مزامير اليشيعوني ..
احس ريحة شماتة ..
وذاب عمري ..
وظل نداكم ينعى ذاته
ما يفيد اللوم
شاطيكم نبت صوبين حلفة
تعذرت منه البلابل ..
ردت وتندب حلمها بغير زفة ..
ونايكم خضّر حزن وجروحي شفّة
وروحي داية ..

كاظم اسماعيل الكاطع


ولا جنك يكَلبي بكَلبك النار
ولا جنك ثلج من عاشرت نار
خلص عمر المواسم والنياسين
وظل بس
الغنه الصامت ... والاسرار
نام
وصبح الناعور مشلول
لا ... ماي النهر يصعد للشفاف
ولا بيه حيل يكَدر حيل يندار
جان الفرح عدنا طير محبوس
ولكَـــــــه فرصه وتعلكَ بالسما .... وطار
ولا جنك يكَلبي فوك الارماح
معلكَ... خلصت عمرك بالاسفار
ومادامك يكَلبي فوك الارماح
ولا عندك حبيبه
ولا الك دار
شيفيدك لو تجر كل المواويل
شيفيدك لو تردد كل الاشعار
شيفيد ...!!
تمر نهر بولايه مهجوره
شيفيد ... !!
تمر محابس بيد مبتوره
شيفيدك ....؟؟
يا .... يول
يا كافي ... يا كَلبي
تظل مثل الارض يوميه إلك ...دوره
وشمتانيه الروح ...؟
وبعدها متانيه ...؟
واسنين تكَضي من العمر
كل ... ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ !
انت يكَلبي تعيش للحين
ولا جنك ثلج ومعاشر النار
آنا وياك خلينا غريبين
سولتنا الجكاير... والصبر زين
وبليل الشته يصير الحزن ...حار
دافي ياحزن
للفاركَ اثنين
صاحبته وشبابه انكتلوا ازغار
آنا وياك خلينا غريبين
نحلم بالحبيبه ... وعتبة الدار
وإذا شفتك يكَلبي ... بيوم فرحان
هذا اول عتاب
وآخر
إنذار

حامد الشمري


اهجوني واكتبوشماعلي تردون

لتخافون مايهجيكم الساني

خيال وموهبه منطيني رب الكون

حتى اهجي واسب القاصي والداني

انه فلاح اصلي ومفرداتي ابخير

الكطهن لكط من طيب بستاني

الورده السنبله والطير والقداح

ذني من المهد يسرن بشرياني

مامتوازي اجيبن مفردات اتغيض

جبت عمري النوارس تغفه بحضاني

الانانيه بنسب موجوده عندالناس

عندك انته عدهم حتى عندي اني

شسويله اليحب بس روحه هم معذور

ماعنده مجال ايحب شخص ثاني

ترى المبدع الحاقد لو وصل لناس

سمعة گلبه تسعر تاكل اعماله

شكد شاعر يزيد تكول عنه الناس

قسوة گلبه ماخلتني اقراله

هاشم الخزاعي

من كفروا برب الشوگ
لبست عيونك وصليت
ومن هزوا كواريكي
شبگت اول حضن حضنك
وگعدت بفيّك اسنيني

تـجي وي امي طواريك
واسكت من تناغيني

وانه ادريك
اي ادريك وجهك مو صدگ واحچايتك تنعاب

عشت عمري هوه وگضيت عمرك باب.

يبو خلگ الشحيح شما تهل سرداب.
انـه ميت عطش
وادريك صم تراب

امـّنت الفراش الذمة العاگول
من شفت الورد چذاب

وامناغاك ترتيلة بحـلگ سكران لا بيها خشوع ولا عليها اعتاب

لطيف العامري


مدري ليش ..
انتَ انتظارك يختلف !
لا .. مدري ليش ..انت كِلّك تختلف ؟
روحي صبّيرة ويمر طولك ندة
چا شرد أصير ..

شيثمر العاگول من تمطر حرير ؟؟
وآنه بس لـ حزن طيفك ابقى اسير
وانتظارك يجري بيّه وگاعي صبخة..
ما يخضّر بيّه غير الشيب لون اسود حزين

ومدري ليش !
الليله حتى اللون الأبيض ينذكر كلش حزين
مر مثل ليلة رحيلك..هاكثر بيها سواد
چنها شعري .. الطعمه اسود
سنِّيني بلا لون مرّن

وانتظارك طيف .. لو بس طيف تعبر
والله حتى الشوك اسويه ياسمين
والله حتى غيومي هاي العاگر الماترضى تمطر
چنت امطّرها عطر

يالــتعبتني
الگاع من ينشف ثديها تدر ملح
وانت لو نشفت عيونك من دمعها
يخضّر الصبير بشفاف الجرح
وآنه كل عمري جرح نشفت شفافه

الصبخه گاع ..يغني فوگ جروحها الفلاح آآآآه
الليل كل ماتثگل مرورة ظلامه
تذوب بشفاف الصبح
وليلي طال وصلت مرورة ظلامه
المشتهاك العازتك..
مابيه اغني ..

ومدري شلون !؟
امد شوفي على گد الحيل البعيني وماالگاك
وردّن للحلم مجبور
يالضاعن چفوفي من الدوارة عليك
يالمابيك شي الـ بهالناس حتى الگيك ..
يالوحدك بروحي تدور
يبرد نبض روحي وانت بيّ تفور
وما الگاک
ما الگاك
وردّّن للحلم مجبور

عقيل العرد
........

اغتيال وكلشي جاهز
والسما عدها علم

وگف جيش من الجهل
ضد مدينة من العلم

گبل ليلة من الجرح بالكوفة خوف
والشوارع نايمه وشافت حلم

من السما لمسجد الكوفه
يثعول الدخان مرة
ومرة حايط ينثلم

ومر شريط الدنيا بعيون الامام
كام يتمشى الفجر بالذكريات

يبوس ذو الفقار
ويعلگه اعله صبره

ويرجع لبِشت النبي
يحضنه و يشم

مبينه نظرات الوداع بعين حيدر
ويلمح وجوه اليتامى ويبتسم

من زمان الصحرة تستاهل عطشها
ومو مكانك ياعلي تبديت بيها
هاي ناس تقدس الما يفتهم

وقبل اذان الفجر
نعسان الضمير

و توه فز جفن البلابل
من الندى تنَشَف جنحها
و اعله باب الله تطير

الشوارع باقي بيها الليل ما يقبل يروح
والوضع بالكوفة من يومه خطير

عرضة صارت بس علي مواعد يتيم
وزينب مسويه سحور
وحيدر أباله فقير

هنا طلع للمسجد يصلي الامير

تلمع سيوف الخوارج
بس علي بلايه حماية
لا يصلي من ورى الجامة وي ربعه
ومثل هاي الناس ما يقبل يصير

تحت كل سجادة سيف
وسيف الــ يصلون ما يحتاج اجازة
هنا بداية جرح الاسلام الجبير

عبد الوهاب الحمداني

( الليلة گدِر )

ودّيتلچ وي الگمر ديرة هلا

او رفّة خواچي أو مستحه او ريحة نثايا مهلهلة

او ردتچ تجين إبضحكتي أو ما صحلي طارش للنذر

أو ردت أشتري من الله الهوى وأشرب روازين العمر


يمرايتي الليلة گدِر ...

حلّيتلچ ميّة ظفيرة او لا شفت خصلة فجر

أو صلّيتلچ ميّة نهد لمّن غفه إبجفي الخِصر

أو غنيتلچ كلّ القصايد و الرسايل والمواويل أو سوالفنا الشِعر و المو شِعر


يمرايتي الليلة گدِر

او باچر يمر بينه العطش و إنفرفح طويرة عتب ما أظن يكفّينا صبر

و آنه إعله باب حجايتچ بلكت حرف يترس قصايدنا خمر

بلكت تمر نسمة صدگ تفتحلي شباچ الجدايل وأنتظر

يمرايتي الليلة گدِر

و آنه نبي أو متعوووب من ليل الوِتر

صلّيني بأحضان الشَفع خل أنتچي

تدرين المرايات تطفى إبلا وجه يمسح تجاعيد البچي

أو تدرين الولايات تغفه إبلايه شاعر يعلگ شموع الحچي

ناظم السماوي

الجوري الاحمر

لاتركض ..
تره الدنيه مسافتهه..
ابشبختك بالركض ضيكه !!
لاتركض .. كبلك ناس ركضوا..
والبشر الوان ..

راح السيف منه وضيع الدركه
وناس انطه العزيزه ..ونزف حد الموت ..
ومارخص الروح .. لأخر الشهكه
وناس ..نريد .. تقفل ..
باب الله اعليك ..
الهوه لوبيده صدّك ..
عنك ايخنگة
وناس ..اوجزهه .. رخصت ..
بأول ااسوم !!
وناس ..اويه الشرف
لم العُله ترگة

وناس اتخف جدم ..
وي صفكة الماشين ..!!
اعله حس الطبل يركض ..
لو على الصفكه

طبع بالناس .. هاذه يختلف عن ذاك ..
ذاك ارخيص ..
وهذه بالذهب مثله فلا تلكه !!
وأبو ..جف الكريم .. وصخي ..
ايعز الناس ..
مثل النخل ينطي ..!!
وّعبرته اتغركه

وابو .. وجه البخيل ..
الموت ماينطيه ..!!
خاف الجفن يشرد منه ويلحكه
النخل ..!
النخل يفرح إذا عثكه ..
هدل للكاع ..
شله ابطوله النخل ..
لوماهدل عثكه ..!!

الشجر وكت الخريف ..
ايصير عاري الثوب
يبجي ..اعله الربيع ..
ايستره بالوركه
اذن .. عّود ضميرك .. لو ..
ردت ترتاح ..!!
إلأ لك .. ماينوخذ منك ..مهما يطول ..
اليكلك غلط لتصدكه ..!!

الحسين ..
اشلون خله الناس ..
تبجي اعليه ..؟
إلى يوم القيامه .. وساعة الملكه
لأن .. اسمه الحسين
وابن داحي الباب ..
ترك دم الشهاده .. يطالب بحكه !!
خله السيف يبجي ..
اعله النحر لليوم ..!!
وخله .. السمه .ـ سبعه ـ
نزلت اتشبكه !!
وثيقة ..
تضحيات وشرف صبر احسين !!
إقره .. وكلب التاريخ ..!!
فِنك رُبعه لو تلكه ..!!
الوثيقه ..اموقعه .. بأصبع
إله الكون ..
وبّباب الشفاعه اهناك متعلكه
ولاتنهظم ..
لاتنهظم .. لوشفت الاسد جوعان
والواوي .. يطيح .. اللحم ..
من حلكه ..!!
ولاتنهظم .. لوشفت ..
المثقف .. عالرصيف ايبيع ..؟
يبيع آخر كتاب .. ودمعته اتلحكه
لأن ..
طبع المثقف .. دفتر امن اشواك ..!!
موقف ..!!
والغبي مايكدر ايحركه
جان ..!! اعله الورد ..
اجمل فراش ايطير ..!!
وهسه .. اعله الورد ..
تتشايم "البگة "
صدكوني .. الورد .. من عطره موزعلان ..
لان ..
اصل الورد .. يشتم ..
عطر حلكه !!
لان .. طبع الورد .. بخدوده..
رابي الكون ..
ويكره عل اليدوسه ..!!
ابجدمه ويسحگه !
الورد ..
ألوانه ..لون ..
ولون يسحر لون .. !!
بس .. الجوري الاحمر ..
مانمل عشگه

مريم القيسي

صيهودك ذبح شوگي
لاتعطش تعال اشرب بگايه جروف
تعبها الرگد روحي ولابلام بيها يحوف

شيعني الهوه صفصاف
خريفك خرب بوجهي ملامح شوف
(يجلمه اوف)
انه بصدري ملاذ الخوف (يجلمه اوف)

عشت شاعر بلايا جفوف
صغتلك من دمع رمشي ندى طاح اعله شباجي
يفزز كل گلب مشغوف
يبو زلوف العليهن صلت حروفي
نجم غافي ابكايه طيوف
يكون اجدامك تحن اعله ملكانه وبدربنه تروف

شوكح حلمك..! يشتلني بدرب تايه
واجيك بركضه الملهوف
واشوفاً وجهك مشرغد ضحك مرتاح
وانه لابس حزن لوني.