Ғаллаоролдаги МДҲда ягона кўчатчилик комплекси

Бир гуруҳ журналистлар ва агроблогерлар билан Жиззах вилояти, Ғаллаорол туманида жойлашган, МДҲ давлатларида ҳозирча ягона бўлган Agro In Vitro инновацион комплексига бордик.

Бу ерда замонавий усулда кўчатлар етиштирилмоқда экан.

Айни пайтда тупроқларнинг заҳарлангани, турли вируслар туфайли ҳосилдорлик пасайиб кетган Навлар йўқолиб бормоқда. Бутун дунёда эса ҳосилдорликни ошириш, озиқ-овқат хавфсизлигини таъминлаш масаласи долзарб бўлиб турибди. Бу масканда «Агробанк» томонидан бир нечта уникал лойиҳалар экотизими яратилибди.

Агробанкнинг «Agro In Vitro» лойиҳаси энг аввало қишлоқ хўжалигида вируслардан ҳоли серҳосил ва экспортбоп мева кўчатларини етиштиришдан иборат. Лойиҳанинг умумий майдони 20,4 гектарни ташкил этади. Унга лаборатория, иссиқхона, кўчатзор ва оналик боғи киради.

Бу ерда энг серҳосил мевали ва манзаралари дарахтларнинг клонлаштириш йўли билан пайвандтаглари яратилади. Улар Финландиядан келтирилган торфда ўстирилиб, аввал иссиқхонала, сўнгра очиқ майдонда секин-аста маҳаллий шароитга мослаштирилади. Сўнгра оналик боғида ўсиб турган мевалардан новда олиниб, ёрма ёки куртак пайванд усулида кўпайтирилади. Анжир, узум каби евалар эса қаламчалардан етиштириб кўпайтирилмоқда.

Серҳосил навлар борасида Италия, Испания ва АҚШ компаниялари билан ҳамкорлик қилинмоқда, барча жиҳозлар ва технологик ускуналар Нидерландиядан келтирилган.

Италия давлатидан эртапишар, кечпишар ва ўзини-ўзи чанглатадиган навларни олиб келиш режалаштирилмоқда. Бундан ташқари, сувсизликка чидамли ва юқори ҳосилдорликка эга бўлган навларни кўпайтириш ишлари йўлга қўйиш ҳам режада бор.

70 дан зиёд маҳаллий мутахассис ишлаётган комплекс шу йил 1,2 млн, келгуси йилда 2 млн, 2030 йилга бориб 10 млн дона кўчат етиштириб бериш қувватига эга. AgroInVitro республикадаги умумий кўчат талабининг 5 фоизини қоплайди ва ҳосилдорликни 40 фоизгача ошириш имкониятига эга.

Энг ҳайратланарлиси, бу ерда етиштирилган кўчатларни йилнинг исталган ойида экиш мумкин ва тупроқнинг минерал таркиби талабга жавоб берса 99 фоизлик аниқлик билан ниҳол амал олади.

Эртапишар ҳамда кечпишар гилос, ўрик ва бошқа шу каби мевалар навларини кўпайтириш эвазига бу меваларнинг кетма-кет пишиб етилиш даври уч ойгача давом этади. Яъни дастурхонаимиздан сархил мевалар аримайди.

Комплекс Самарқанд вилоятидан Жиззахга ўтишда («Вишший тўчка»)да шундоққина йўл ёқасида жойлашган. Бемалол йил-ўн икки ой кўчат харид қилишингиз мумкин. Доналаб ҳам сотилади.

➡️ @shokirjonov