((ومعصمها))

شدت چفيته ومعصبها
گلتله اصـرخ من أطبها
چفيتك عبــاس اطلبها .. يا ابو فاضل
""""""""""""""""""""""""""""""""""""""""""""""""'''""""

شريچ عيـوني يا زود الفتوحات
يبـــــــــن المارضا عالعايل ايبات
يخلاس الشـــــوارب سم الأفات
هذني البل الضعن كلهن عزيزات

مــــــاوصيك بزينب هايه
غطي المحمل يبني برايه
يالمنطي الوالدها حـچايه .. يا ابو فاضل
""""""""""""""""""""""""""""""""""""""""""""""""'''""""

يريســــــان الدرب يالتندل الكون
ظم ضعــــون أَخيتك نص العيون
اتشلبه عالسمه لو صاحت أم عون
وخلي الناس لو مــــرت يغمضون

والماغمض افگس عينه
حي الله ويا عم سكينه
وحيدر بايسهن چفـينه .. يا ابو فاضل
""""""""""""""""""""""""""""""""""""""""""""""""'''""""

يريال المعــــــارچ زلمةّ الليل
يدهدار المراجل يا گلب هيل
زمّ أرچابهم وأترسهم الـــويل
يا عــــيالّ بيهم حتــــمّ العيل

عِيل ولا تـــــرجع بالعيله
واليوصل ليكّ امرد حيله
واليدنه الحــــدك يا ويله .. يا ابو فاضل
""""""""""""""""""""""""""""""""""""""""""""""""'''""""

يا بزري الجنيته ورتك اليـــوم
مَبنه الگوم أريدن كون مهدوم
اريدن مثل ابـوك تصير ملزوم
اريد الگوم يبني أتذب الهدوم

مــــا ريد الجيش وبهدومه
وخليها تغص يبني الحومه
يا ملــــــــزوم أمك ملزومه .. يا ابو فاضل
""""""""""""""""""""""""""""""""""""""""""""""""'''""""

يخواض المنايه يبن الايواد
أريدك بالحرب عباس صَياد
ياعباس يبني وزيـن الاولاد
اريد الگوم يم صفــين تنعاد

وأطب للكوفه المشــــــراده
والجيش ايظل بس اجياده
حي الله ويــــا عم الســاده .. يا ابو فاضل
""""""""""""""""""""""""""""""""""""""""""""""""'''""""

يمـــرهاب الزلم يبن المراهيب
بس آنه وبعد ما غيري اتجيب
مثلك وين أكو وميصير ترتيب
اريد بطبتك والعســكر ايشيب

شيبهم عــــباس وليدي
يهلالي ويا بزغت عيدي
شديــــت الچفيه بأيدي .. يا ابو فاضل

عبد زينب
محمد الابراهيمي

لحن(ومعصمها)
بصوت
ملا علاء الجياشي
ناصريه_ قلعة سكر

((صدر المضيف))

هلا بصدر المضيف وصـــدر المروه
عّزوبيت الحســـــن بــالزاد والگهوه
هيه الشيخه ثـــــوب وماتجي بگوه
يبن نسل الشيوخ الخطوه بالخطوه

العمــك تعتني تبوسه وتنحني
تگله بخدمتك اليطيح اليـنبني

شگد فرحان عمك واگف بطوله
منو هـــــذا الحسن ربعه يگلوله
نورك صار عابر .. عذاب اعله العساچر

""""""""""""""""""""""""""""""""""""""""""""""""'''""""

يبن الحسن اسمك كشخت المنبر
يتنـــومس بعطـــرك سيدي العنبر
نخطف وجه الزلم من گالو تحظر
لون اهدومهم هــــم انگلب اصفر

يوردةّ حـيدرى الزلم صارت ورى
مثل عمه الگمر ذبحـــهم بالسرى

رعدت غيمته والحــومه مطاره
غبار اسود الجيش متيه اخباره
سيف اعله المناحر .. عذاب اعله العساچر

""""""""""""""""""""""""""""""""""""""""""""""""'''""""

يزماط الزلم جســــــام ينخونك
جبرائيل صلى الحضرت عيونك
امك خايفه الوادم يحســــدونك
جمال الله ونزل گامو يشوفونك

دلال ومرجـــله الهلا وأم الهلا
يميدان الحچي ويزلمةّ كــربله

اذا يرفع يمينه الـــــزلم تتكسر
يالمضيع الشرده وحاير العسكر
يسداد المعابر .. عذاب اعله العساچر
""""""""""""""""""""""""""""""""""""""""""""""""'''""""

عمك مبتشر ويشـــــــوفك تنازل
الفوارس لمه وانته الوحدك تقاتل
يالمخلي الدمه بوجه العده سايل
مالابس درع بس الحـــــرز شايل

بزنوده الحرز مناحر ظل يحز
يربان الحرب الفوارس هم تفز

گالــــــــو هذا ياهو بچفه كورنه
هدوم العرس لابس هذا ومحنه
صار الجيش حاير .. عذاب اعله العساچر
""""""""""""""""""""""""""""""""""""""""""""""""'''""""

رمله تصد عليك من الخيم وانته
تشيل الزلمه فوگ وينزل بسـكته
جـــــدك حيدرى بالـــروح رهمته
عباس الگمـــر بعــــيونك احملته

المراجل عرفته تصدله وعرفته
يضمـون الرگب جهنم صـــولته

حي الله المقاتل جاسم النشمي
غير انه الشجاعه البيه من عمي
ترس عين المناظر .. عذاب اعله العساچر

عبد زينب
محمد الابراهيمي

لحن(صدر المضيف)
بصوت
ملا حسام الخفاجي
ناصريه

((ليش بزفافك))

ضــــــويتلك گلبي شمع
والحنه من فيض الدمع
اجمل ترافه بهيبتك يالواحد
ليش بزفافك بالنحر مـتواعد ..

""""""""""""""""""""""""""""""""""""""""""""""""'''""""

همس المـــدامع وجرن
لمن برز أبن الحســــــن .. للحـومه
چم خيمه شبت بالگلب
ويتعثر بروحي الــدرب .. ملچومه

شمـــا يبتعد عن النضر تچويني دمعات البُعد
وترسم على خدودي رمح وتصورتّ آنه بلحد
عطرك ترس عين السمه ياأحلا من عطر الورد

ياحسرتي مـــن ترتجل
ودموعي بوصافك تهل
گلب امك بجرحه يجاسم شارد
ليــــش بزفافك بالنحر مـتواعد ..

""""""""""""""""""""""""""""""""""""""""""""""""'''""""

شمـــا تلتفت گلبي يفز
وبنضرتك يبنـــي تحـــز .. الدمعه
يادمعـــتي مـــن تنرسم
وچنت انتضر هذا الحلم .. بالشمعه

عرسك جرح ناغه الگلب وأمنيتي بس راح أمل
وتّبدت امنيتي بعطش وتّذَبحـــت كـــــل الاهل
شفتك مثل ورگـــه بهــــوى ويّدنه لعيونك أجل

راح الهوى وبيمن أشم
أمـــــــك تتاني ياشهم
أنته ابني بس آنه اشوفك والد
ليـــش بزفافك بالنحر مـتواعد ..

""""""""""""""""""""""""""""""""""""""""""""""""'''""""

مــــن عاينت طاح الولد
وتذكـــــــــرت سهر المهد .. وأتعابه
من الحومه للخيمه جرح
عمه ينـــــــــــادي منذبح .. من جابه

وبصف علي الاكــــبر گعد گلبه بألف جمره أنچوه
وحـــط شِفته بأذنـــــه وبچه گلهم وحيد بنينوى
وزينب تگض بيدي صبر وتشبگني والمدمع سوه

وآنه اختنگ وأرجف تعب
وحّلَيًليّ من إيدي أنسلب

وظل يرفس بضلعي الگلب ماگاعد
ليــــــش بزفافك بالنــــحر مـتواعد ..

""""""""""""""""""""""""""""""""""""""""""""""""'''""""

وحملي على الگاع انفرش
وعطشانه يايمه عطـــــش .. لرسومك
مابيـــــــنك وبين الهــــزل
مشيَتّ أسيــــــــره وبحبل .. يايومك

جرح الهزل ذكرى وألم ولوعةّ سياط اعله المتن
هـــوه العشگ لازم صعب كون بهزل من تمتحن
يالعــــايش بصفي رمح تسمعني يايمه من أون

من تسمع بصدري الضمه
نحــــرك يسولفلي الدمه
وما يستچن گلب الجريح الفاگد
ليـــــش بزفافك بالنحر مـتواعد ..

""""""""""""""""""""""""""""""""""""""""""""""""'''""""

مــــــــن تعثر الناگه بچي
يبدي الحچي الماينحچي .. والخنگه
يبدي المتـــن من ينشرح
يشبهك يجاســــم بالذبح .. والشهگه

شما أنويّ بفرض العشگ شفت الحجر ساجد يمر
درب العشگـ چه بي تعب نسحگـ لطم فوگـ الجمر
ماهمني يايمه الحبل بس چَتَفّ عيوني الهجـــــر

چَتَفّ حياتي بالسبي
يوليدي يــوليد النبي
وشفت الجرى راسك يجاسم شاهد
ليـــــــــــش بزفافك بالنحر مـتواعد ..

عبد زينب
محمد الابراهيمي

لحن(ليش بزفافك)
بصوت
ملا محمد ستار
بغداد

((رايح يالاكبر))


رايح يكلشي يصيحلك وين
رايح يالاكبر يــــبن الحسين
ماريده عمري بدونك
هيه الحيـــاةّ عيونك
رايح يالاكبر ...

""""""""""""""""""""""""""""""""""""""""""""""""'''""""

ليش الضوه يذبحونه
وجه النبي ينســــونه
وأنته بجلالةّ وجه الاسلام

صافن يظل لــساني
كاسر خلگ وجداني
ياتاج راسي وراس الخيام

عَمد المخيم طاح مـــن طاح
لَمن سمـــعني صَيَحـــت راح .. راح
ضلمةّ رحيلك كتلت الشــوف
يمه أعله روحي خَيَم الخوف .. الخوف

شَيَــبت حتى رموش العيون
فرفحت يمه العمتك ام عون
شو چنه غايب لونك
هيه الحيـــاةّ عيونك
رايح يالاكبر ...

""""""""""""""""""""""""""""""""""""""""""""""""'''""""

كبــــــرت دمعتي وآنه
الچندوب أظل حيرانه
حيرانه يابعد أمــــك شلون

المـثلك هوى ميمره
يدموع عين الزهره
تراب وهضيمه يغطي العيون

يبني يالاكبر حزني مفضوح
المثلك حرام يصير مــذبوح .. مذبوح
ماخــــذ أنفاس العين يرباي
وخليت بيه يســــولف الماي .. المـــاي

ياروح گلبي وعمري والحال
أنعاك يبني بســوط وأحبال
وشلونه حالي شلونك
هيه الحيـــاةّ عيــونك
رايح يالاكبر ...

""""""""""""""""""""""""""""""""""""""""""""""""'''""""

يانسمةّ الله الدافي
تاليها جدمي حافي
بكل عثره أصيحلك يرجواي

ريج الـــــــــدمع نشفته
عمري أعله طولك عفته
ياضوه الــــرايح ضلمه عيناي

هجــــرك يواحد تَعَب العين
هجرك لگيته بوجه الحسين .. الحسين
عطرك جزاني وين يــــاهيل
يدفعني گلبي بوحــشةّ الليل .. الليــــل

لاگـــيني دربك وين يبعيد
لونضره حتى دمعتي تهيد
متعلگه أنه بمــتونك
هيه الحيـــاةّ عيونك
رايح يالاكبر ...

""""""""""""""""""""""""""""""""""""""""""""""""'''""""

عگبك عمر مايسوه
رايح وصرت اتچوه
وين أنطيّ وجهي وإيدي بحبال

والهزله تدري بحالي
تدريني ابچي الغالي
تواسيني أحسها وتبچي عالحال

تنضر عليه الهــزله بدموع
چنها تگلي النـحر مگطوع .. مگطوع
گتلها الاكبر خــــده بتراب
ذاك البدر ياناگتي غــــاب .. غاب

والدمعه صـــــــارت بيه نيشان
بروحي سمعته يصيح عطشان
عطشانه ليك ضعونك
هيه الحيـــاةّ عيــونك
رايح يالاكبر ...

""""""""""""""""""""""""""""""""""""""""""""""""'''""""


لشـــــــام اطبن حيره
ياويلي صرت إيسيره
آنه ام الاكبر يمـــــي شمات

ودلالي ضج بجرحه
والليل صار إيذبحه
وزينب گلبها شَيب ومات

زينب گلبها يصيـــــح ويلاه
ماتـــــــــت رقيه وبالگلب آه .. آه
حتى الخرابه تبچي وتصيح
امك يالاكبر تمشي وطـــيح .. وطيح

من فرگت عيونك تراديت
من الحــزن يوليدي مليت
كلهم هلـــك يردونك
هيه الحيـــاةّ عيونك
رايح يالاكبر ...

عبد زينب
محمد الابراهيمي

لحن(رايح يالاكبر)
بصوت
ملا علي عباس السماوي
سماوه

((مو طفل))

زغيره خدودك اعله دموع الايام
طــالع بالنحـــر والــــوادم اسهام
طالع والعشگ حار
وأنته متاني محتار .. يبني للسهام

""""""""""""""""""""""""""""""""""""""""""""""""'''""""

اول خطــــــوه مـــن باب المخيم
شبگت حسين ليش بصدره تشتم
دريت أمــــوادعك مـــو مال تسلم
شفتك مـــو طفل رجال ابو هَــــمّ

كتلك روح احـسك يبني مخنوگ
روح اعله السهم واتنفس الشوگ
الدمع عبد الله مدرار
وأنته متـــاني محتار .. يبني للسهام

""""""""""""""""""""""""""""""""""""""""""""""""'''""""

تريد وياك تمشي هـاي العيون
يعبد الله بغيابك حالتي شلون
حبك يبني هادل حيل المـتون
ابوك حسين صافـنلك يمزيون

احسك للموادع شـايل جفوف
راح تعوف گلبي عليك ملهوف
عليك مّحتمه الآقدار
وأنته متـــاني محتار .. يبني للسهام

""""""""""""""""""""""""""""""""""""""""""""""""'''""""

عمــــرك والضعن متساوي بالنوح
الضعن كله انذبح من انت مذبوح
يابو الروح ألمن ضلــــــــت الروح
ألمن عمري أخلصه جروح بجروح

تطشر دمك اعــــله الگاع بهداي
السهم مو ماي وانته بعازةّ الماي
السهم مايعرف زغار
وأنته متــاني محتار .. يبني للسهام

""""""""""""""""""""""""""""""""""""""""""""""""'''""""

گماطك مــرتخي لو أنته مصدوم
تناغي حسين بس بصوت مكتوم
يبني اتبسمت مــــاهــــــزتك گوم
غمضـــت وحيـــاتي غمضت دوم

بكل گطرةّ دمه مـــن عندك أيوب
شگد شايل صبر عبدالله مصيوب
صرخه بوجه الأشرار
وأنته متاني محـــتار .. يبني للسهام

""""""""""""""""""""""""""""""""""""""""""""""""'''""""

الحضني بياجرح يوليدي رديت
تمنـــيت الســــهم بيه تمنـــــيت
يلب احشاي يبني وبسمةّ البيت
نار الشوگ مـــــن الخيمه خليت

راح الطم عليك بشـــــد الحبال
وأبچي عليك يبني بدمع العيال
الضعن من غيرك وسار
وأنته متــــــاني محتار .. يبني للسهام

عبد زينب
محمد الابراهيمي

لحن(مو طفل)
بصوت
ملا عباس شاكر العسكري
ناصريه _ فهود

((ماتتعده ساعه))


ماتتعده ساعه وماذكرتك
متوهمين من گالو تركتك
انشدوها العلــيله
اليحب اينام ليله
متوهمين من گالو تركتك
""""""""""""""""""""""""""""""""""""""""""""""""'''""""

احس بصورتك ملهــــــوف لهفان
حته بصـــــــورتك يحسين تعبان
تجاعيد الجفــــــن بالملگه عنوان
اَشربك ماي احسَك حيل عطشان

عطشان بصفنتـــــك
مجروح بدمعــــــتك
العشگ يحسين قاتل
لذلك ماتـــــت اختك

العشگ يرسم ملامح عالحياطين
المثلك ينترك لاصعـــبه يحســين
العشگ ياويل ويله
اليحب اينام ليـــله
متوهمين من گالو تركتك

""""""""""""""""""""""""""""""""""""""""""""""""'''""""

العاشـــگ صفنته تتفسر شلون
اذا ضگت العشگ لاتقرا العيون
تتحلم مـــــواكب ناس يمشون
وتتحلم بگبه وناس يبچـــــون

اذا دمعـــــك تجاره
تهيم اعــــله الزياره
والحضره اعله بالك
وبروحك منـــــــاره

اليضيع بمجلسك مايندل الناس
اليحبك يبتسمله هــــواي عباس
البعيد انته تجيله
اليحب اينام ليله
متوهمين من گالو تركتك

""""""""""""""""""""""""""""""""""""""""""""""""'''""""

بابك چنه گلبــــــك دوم مفتـوح
اليزورك واليروح تودعه وـيروح
روحك مــــن حنان الله يمذبوح
الينوح اعليك هم تبچيله وتنوح

يل اسمك محـنه
ابونه انته وأهلنه
شما نتبعد أعليك
بچفــــوفك تلمنه

بيك انته الشجون ويه التعابير
چم يوسف نقذته وهــادم البير
معشوگي ودخيله
اليحب اينـام ليله
متوهمين من گالو تركتك

""""""""""""""""""""""""""""""""""""""""""""""""'''""""

عله الشباچ چـــــم دلال ينخاك
چم دمعه بضريحك گالت وياك
طبيب وعالجتني شلون انـساك
يالعاري الجسد يحــسين اهواك

يالتوزع هــــدايه
وعيالك ســـــبايه
واخوانك مچاتيل
عالغبره ضمــــايه

منطي أخيام للماعدهم اخيام
بس ضعنك بلايه اخيام وينام
الضعن مهدود حيله
اليحب اينــــام ليله
متوهمين من گالو تركتك

""""""""""""""""""""""""""""""""""""""""""""""""'''""""

چــــــم مخدره شافــــوها الجناب
وچــم مــــــدلله متگبعه بتـــــراب
هوه السبي واحد والحچي اسباب
گلبــــــــك باب لكــــن حرگو الباب

باب الخــــــــير محروگ
الهوه يحسين مخــــنوگ
الحبل بچفوف الاحساس
وزينب صعدت النــــــوگ

چم بسمار اجاك وماطردته
چم حافر الضگته والحملته
يالدمعك تــسيله
اليحب اينام ليله
متوهمين من گالو تركتك

عبد زينب
محمد الابراهيمي

لحن(ماتتعده ساعه)
بصوت
ملا حسين العنزي
ناصريه

((هدوء))



هدوء استوطن بروحك يالحسين
صاعد عـــالرمح بس خلگك يأشر

تــــأشــر عـــالخــيام وملتقى النار
وتشوف الشــمر بســــرارك إيطشر

رگضن وانته واگـف محني العيون
وبـــالدمــعه العــزيزه خــدك إيبذر

شــــما تركض رقيه يركض الشيب
براسك والمـشيب أعله الرمح يعبر

گـــطــعــوها الـگلاده وطشو الهيل
وبــنــــاتك تـــايـهـات بـعازةّ إيدور

وأهــي بــس زيــنب ونيرانها هواي
تجـــر عدلين والمــيتين هــم أتجر

الــــنار اتـــركض الـــــماعنده رجلين
الطفل مايدري يركض ياطريج إيفر

اليركض والچــفوف أبعثرته إيشوف
يــنضــر بيــهن وروح الــــدمع يشمر

هذني الـــچانن إيــگودني الچـــفوف
هـــذن لـمـساتهن بـيــهن حــنان إيدر

نزفن بـــالعــشگ مــــن دمعةّ الـــروح
ونــــزفـن بـــالـدمه وراعـيـهن الينضر

الخيــــــمه ألــــيّ تــطيح تريد فـزاع
طـــايح عـــالــرمـــح عـــالنهر ماتعذر

بـس يـاخـــــويه گـتلك حيل مـعـذور
المـثلـك مــا نلـومه وبـالــعتاب أنــصر

يــــــــا نــــــــار الـبگـلبك تلهــــب النار
چــويــت النــهـر والــمــاي صــار إيحر

عبد زينب
محمد الابراهيمي

((نار وچوتني))


نــــار وچــــوتني بهيــبتي
گــــوه أطلعت من خيمتي
بكل خيمه من ضعني دمع
ياهـــــــو اليدليني اخوتي

على حسين ..
اريده يشوفني ويبچي أعله عمري
وأشبگــــنه وأضــمه بضيم صدري
ويَدَليني عــــــــلى كــــفال خدري

على حسين ..
دلوني يـــــــوادم والله حيره
أريد بروحي ألمه مو حصيره
وأگله الشوگ ســواني أسيره

يعرفونه المّضيع أخو من وَحَده بنص الهواديد
يشبچ أدي فوگ الجرح مات الصبح ويّ المواعيد

راح ..
من أديه ويا رقيه شنهي أگلها
راح ..
والحنينه يا سكينه هـم شگلها

آه ياخويه
آه ياخويه ...
"""""""""""""""""""""""""""""""""""'''''''''''

لَن هذا أخوي ومصرعه
وشفت النبــوه أموزعه
يحاچيني بعيـونه غده
يابس كلامه ومـــدمعه

أحاچي ..
مايسمعني وتـراب بأذانه
وهوه بعينه مطَشر حنانه
يابويه شفت يابس لسانه

أحاچي ..
أدَنيّ مسمـــعي والكــلمه هيه
أريدن ماي بثـــــــوآب الزجيه
عمت عيني ردت تلفي المنيه

من گلي كاتلني العطش خويه صحت گمت ألطم الراس
ومنين أجيبلك نهر مات النهر
ياخويه عباس

مات ..
خويه حرنه من گمرنه ماله جيه
مات ..
وآنه أتــــاني يازماني شلون بيه

آه ياخويه
آه ياخويه ...
"""""""""""""""""""""""""""""""""""'''''''''''

وسالفتي ماخلْصت بعد
وبصــــدره ذباحه صعد
لاتسحـــگ بضل العرش
لدوسه ابــو روح الشهد

وغده يدوس ..
على ضلوع النبوه والرسـاله
يويلي شلون جيه من اجاله
هذا حسين وتشـــوفه عياله

وغده يدوس ..
وحيل البيه عافاني وهجــرني
وأصيحن والشمر ويلي شتمني
وأحس السيف بعيوني نحـرني

وأعله الوجه من أگّلبه سكنه أصرخت وتگله لا لا
وغمضنه بعيون الدمع وسيف الشمر بالرگبه خلاه

ويل ..
وراد يشلع گلبه ويذبــحه برهاوه
ويل ..
گلبي يرفس بيه وبروحي إيتلاوه

آه ياخويه
آه ياخويه ...
"""""""""""""""""""""""""""""""""""'''''''''''

وتعـــــلگ بســـــن الرمح
وأحنه الجرح ياكل جرح
ركـــضه ومــدامع سايله
شفنه الرمح شايل صبح

نخيناه ..
حبل لا مـــــو علگ شديته نخوه
بلبن ذيچ الـعزيزه گـــــــوم فدوه
الضعن ياخويه راح بدوس حذوه

نخيناه ..
وركضنه والعدو يركض ورانه
وجمر الخيمه يچوينه وعمانه
الزمن ياناس گــــــوه ضيعانه

ضعنه وركضنه بيادرب وأحنه بغرب والدنيا لاوين
من الخيم للمشرعه بنص الدرب لاگانه الحسين

اووف ..
حسين وبس نحر صار بدربنه
اووف ..
وشفنه الخنصر المقطوع متنه

اه ياخويه
اه ياخويه ...


عبد زينب
محمد الابراهيمي

لحن( نار وچوتني)
بصوت
ملا صادق هاشم
بغداد

((عباس حاچيني))


عباس مـن يوم المهد
عشرتنه
ياكافل ضعوني وعَمدّ
خيمتنه

لا مايرد سائل اجاه ويگضي حاجاتـــه
اهلا وسهلا ياهلــــه چانــــت عباراتـــه
طب استريح بخدمتك يامحلـه چلماته
تلميذ مدرسةّ الحسن يــدرس دراساته

هسه انه اجيتك ياشهم
يـــــاعين ريعان الـــزلم
المخـتنگ گــلي اشيشم .. عباس

لا ما اعاتب مــــا اذم
فدوه المخـيم ينهدم
بس آنه مساني اليتم .. عباس

خويه خويه عباس ...

"""""""""""""""""""""""""""""""""""""""""

مرعوبه وبسدك لذت
كفالي
مـا اندل بدربي تهت
يالغالي

عباس ياغيرةّ علي گـوم الحگ اعلينه
ماترحم خيـــول العده عباس حاچينه
لو ينچوي لو ينسحگ هــذا اليمر بينه
والسوط سالفته بعد واتشاگف إيدينه

مثل المطر غيمه وتزخ
والسوط بعيـالي يطخ
وكلهن اجن بيه شجخ .. عباس

بس آنه اختك ما اطخ
كفــــالي والـ الله نطخ
هــــذا العقد ماينفسخ .. عباس

خويه خويه عباس ...

"""""""""""""""""""""""""""""""""""""""""

چا وين چفك وختفه
حاچيني
ياجود هاشم وانچفه
ضي عيني

عگبك يبو فاضل تــره متلهفه أخيامـي
الطولك يبن ام الوفــه من عالنهر دامي
يمك اوشل دمعتـــــي يــــالعنهر ضامي
بيتي انهدم لمن رحت وامالي واحلامي

احلامي مــــراها السبي
مره امشي ومره اختبي
عبـــــــاس ياخدر العبي .. عباس

عباس گـــوم المطلبي
آنه اختك وبــت النبي
ترضا يصدلي الناصبي .. عباس

خويه خويه عباس ...

"""""""""""""""""""""""""""""""""""""""""

طول بعرض ياكربله
صرت اركض
تركض عـزيزه مدلله
ومـــا ارفض

كلش عجيبه بيا وكت ومدلله اخواني
وين الزمان اليادرب بيــا حيره وداني
عبـــــاس كتلهم يجي ليهسه ما جاني
وما أيست ضني يـجي معذور خلاني

خلاني منطـيته العذر
مايگـدر يگــــوم ويمر
مگطوعه چفين الخدر .. عباس

چنت انتضر فوگ الجمر
وجيتك يمعــوشگ العمر
يالخوه مـــــن عينك تدر .. عباس

خويه خويه عباس ...

عبد زينب
محمد الإبراهيمي