زهرة الرسول .. ذابل غصنها وانمرد
زهرة الرسول .. يسعر گلبها ما برد
_____

جرحي لا ما يندمل .. او من دموعي ما أمل ..
امغيمه كل ايامي ..

حزن گلبي أزلي .. مُقتبس من هَم علي ..
ونّتي او الآمي

بيت الاحزان أنّصب باعماقي
او جمر باب الدار يسعر باقي
يحرگ اغصاني او يذبل اوراقي
لا دوه الينفع له لا ترياقي

حسره لن تزول .. باقيه الحد الابد
زهرة الرسول .. يسعر گلبها ما برد
_____

كيفَ لا وفاطمه .. ضل جفنها ايهل دمه ..
من اثر هالسطره

ما رعو بيها ذمم .. جرعوها اشگد الم
او حسره فوگ الحسره

زهره واملاك السمه ايقدسونها
الله سوّه الكون لجل اعيونها
تالي ما تالي العده ايعذبونها
على خدها الطاهر ايضربونها

ويلي عل بتول .. لا ناصر او لاكو سند
زهرة الرسول .. يسعر گلبها ما برد
_____

ويل گلبي أم الحسن .. دارت اعليها المحن
واصبحت مهظومه

عله الحايط تنعصر .. أضلوع منها تنكسر
امن الهوه محرومه

طايحه او من الوجع تتلوه
او بل جمر چفها الندي يتچوه
آخ يل بسمار بيها أشسوه
صارت اتجر النفس بل گوه

تنحب او تگول .. من ايدي رايح الولد
زهرة الرسول .. يسعر گلبها ما برد
_____
اعيونها تتجاره دم .. أكتارها كلهن ألم
مدري شيطلبوها

مثل طير المنذبح .. فرفحت من الجرح
وابد ما رحموها

اتصيح يا فضه الچ سنديني
دربي ما شوفه اسطروني ابعيني
على ابني الي وگع وديني
خل أشمه او اشبگه خليني

بس هظم أنول ..من عگبه شتنطر بعد
زهرة الرسول .. يسعر گلبها ما برد
_____

امصابها ما ينحمل .. لمن شبگت للطفل
اتعاتبه او تنعاله

تگله يمه يل ولد .. ماني امحضره مهد
او ثوبك او تفصاله

ساعه ما ضليت شو يا روحي
يمه چنك ما حملت اجروحي
يمه عگبك ما ابطل نوحي
نام يمه اتهنه يا مذبوحي

صابك الذبول.. يل ما تهنيت ابمهد
زهرة الرسول .. يسعر گلبها ما برد
_____

ويلي يا ام الحسن .. غربه والام او شجن
والاجل حل بيها

ابقى انعاها او اون .. عمري الها بس حزن
بس بواچي اعليها

آه يمصاب الذي اعليها جره
خله بين احشاي جمره اموجره
لابقى اندبها او عبرتي امكسره
وانعه يا مظلومه دنيا او آخره

او بالحشر اگول .. يل زهره باقي عل عهد
زهرة الرسول .. يسعر گلبها ما برد
_____

ابو فاطمة الطائي

❇️ قصائد استشهاد #سيدة_نساء_العالمين مولاتنا #فاطمة #الزهراء عليها السلام



يا كافل ثار الزهره
ضلع امك تدري بكسره
------------
يل صُبحك غابت شمسه
شما دهرك جار ويقسه
تتذكّرهه و ما تنسه
وما تخمد ذيچ الجمره
-------------
انت التدري بقصّتهه
ابگلبك عاشت لوعتهه
تصحه بصدرك حسرتهه
وبجفنك تُغفه الجمره
-------------
نيران الباب الشبت
ما بين حشاك التهبت
وكل دمعه امن امّك صبت
تعلن بجروحك ثوره
-----------
بجروحك ينهض سيفك
يل ما تسكت عن حيفك
المحسن ما فارگ طيفك
وبضلعك ذيچ العصره
------------
حزنك عاش بأفكارك
تسعر ما تخمد نارك
انهض واشهِر بتارك
وغيظَك عل باطل فَجره
------------
عل باطل فجّر غيظك
واروي الآمال بفيضك
ما تحتاج لتحريضك
انت بثاراتك أدره
------------
عقيل الكاظمي

لا تجفنها _ بويه تانيني
انده الزهره _ خل تحاجيني
تفتر عالوجوه حيرة حزنهه
شمسويه وظلوع مكسوره منهه
////////////////////////
رخي ياحيدر جفنهه _ شويه من جهت الصدر
امي متهشم ضلعها _ والجفن ياذي الكسر

تباوع بيهه وشو تندار
شلايح كلب امي البسمار
توقع حيدر شيضل بيه
اليوكع فوكاه باب الدار

هجمو اعليهه _ تخيل المنظر
لقوة العصره _ الحايط اتفطر
وارماد الجذوع عدله ودفنهه
شمسويه وظلوع مكسوره منهه
////////////////////////

حرمتك صفحت وجهه _ مورمه لطراف الجفن
تنلجم لو وسدتهه _ شلون رايح تندفن

شتغسل حيدر شتعوف
بوجه ام بيتك طبع جفوف
مطفييه من السطره العين
جانت بس بوحده تشوف

بويه ياجانب _ من توسدهه
اظلوع مكسوره _ ومنسطر خدهه
للمكبره تروح وازرك جفنهه
شمسويه وظلوع مكسوره منهه
////////////////////////

تلكت الباب بااديهه _ وانه كلبي ظل يدك
ثاري فوك المحسن ابنك _ جذع طايح محترك

صاحت فضه ركضي وياي
طفي اوليدي بطاست ماي
للحجره من ايدي اخذيه
انه الوحدي وهمه اهواي

تجوت الزهره _ شوف اصابعهه
توكف وشامت _ يجي يدفعهه
تكلب بالجذوع تدور اعله ابنهه
شمسويه وظلوع مكسوره منهه
////////////////////////

بويه فدوه اندهه اليه _ عندي وياهه حجي
احسب امن تشد جفنهه _ يعني اموت امن البجي

جانت كعده الزهره تنام
من الباب تخاف الاحلام
متفاجى حتى التابوت
راح يشيعله اجم عام

زينب ابدونج _ تعاني كللهه
ترضه بسنيني _ امي ابدلهه
ما يكدر الكون يعوضني عنهه
شمسويه وظلوع مكسوره منهه
////////////////////////
الرحه من تفرهه جانت _ صوت يطلع ينسمع
تدري توني اله عرفته _ ياعلي صوت الظلع

من تمشي تكض الحيطان
تضل تشهك شهكت غركان
بهاي الحاله تحاجي حسين
يوليدي خو ما عطشان

اليوم ياحيدر _ صبحت زينه
فده كللهه _ لا تخلينه
بلكي الله وتكوم تلمنه بحظنهه
شمسويه وظلوع مكسوره منهه
////////////////////////

موسم افراك الزجيه _ تميز ابموجت يتم
بويه بس يطلع نعشهه _ مايظل عدنه حلم

مايتعوض بويه الراح
المكسوره ظلوعه شيرتاح
لكبره الغالي من يروح
لايرهم باب ومفتاح

تدري ياحيدر// البرد ياذيهه
بهدمك بهيده// بويه غطيهه
امي من الالام ناحل بدنهه
شمسويه وظلوع مكسوره منهه
////////////////////////
تمت ____ علاء الزيدي

يمه يا يمه يمه يايمه
**
يردون كلبي يردون جي بي محنه
كلبي تره بهذا الكون ما تلكه منه
تحرمنه هاي الايام ليش امن اهلنه
منج صبح يم حسين خالي نزلنه

يمه يايمه يمه يايمه
*
عالباب امرن عالباب وشتم هواهم
يمشوني عني والروح تمشي وراهم
غالين عندي وتدرون ماكو بغلاهم
وبكلبي رايح شيصير لو فاركاهم

يمه يايمه يمه يايمه
****
امنه مشت واحنه نريد نبجي عليها
للمكبره كون يصير جا شلنه ليها
زينب تون واعله الراح تصفج بديها
وامصايب الدنيه اهواي شمسويه بيها

يمه يايمه يمه يايمه
***




وياج يمه وياج اخذيني يمه
مثل الكبر صار البيت والدنيه ظلمه
الما عنده ام بدنياه كلشي يهظمه
والحسن بوداعج وين دمعه يضمه

يمه يايمه يمه يايمه
****
كل يوم ضلت كل يوم سهرانه عيني
وبيت الحزن راد يشيل من كد ونيني
ليش انطفت يمه بساع شمعة سنيني
مريني لو حته بطيف رايد تجيني

يمه يايمه يمه يايمه
**
حسبالي يمه تكومين لينه بسلامه
كل احنه عكبج تدرين صرنه يتامه
حيدر علي صعبه الليل يغفه وينامه
يالزهره ضلعج بالباب تارك علامه

يمه يايمه يمه يايمه
*
تمت
تحسين الخفاجي

❇️ قصائد استشهاد السيدة الزهراء عليها السلام



من يوم ضلع أمك يمهدينه تكسّر
لليوم وجروحك نَزِفهه ما تخثر
--------------
ما شفت بعيونك يغايب ذاك المصاب
ولا غيِرَت أنوار وجهك حرگة الباب
لكن عشتهه من گبل عالم الأصلاب
هل جَرِح عاش بمهجتك من عالم الذر
-------------
انعرضت صور هذا الجرح والباري راواك
من عالم الذّر سيدي ما فارگ احشاك
منك اخذ عهد الصبر يل مهدي ونطاك
ميعاد تاخذ بيه ثـــارك يوم تظهر
-------------
بهاي الصور شفت الهجوم الصار عل دار
وظلت بصدرك يا بو صالح كل الاسرار
اسمعنه بضلعهه وبل جنين ولهبة النار
يل مهدي لاچن ما لفتنه اخبار اكثر
--------------
هل نار يمكن نثرت اعلى امك جمرهه
ومو بس ضلع يمكن تهشم كل صدرهه
ولهل سبب ماتت وهي بزهرة عمرهه
وجمره بگلبهه اعلى الجنين الطاح تسعر
--------------
ما گول ريتك حاضر بهاي الفجيعة
جدّك علي هو الأمين اعلى الوديعة
شاهَد خريف الفاجعه ذبَّل ربيعه
لاچن وصية المصطفى گيدت حيدر
--------------
جدّك تگيّد بل وصيّة وتدمع العين
وما من وصية اتگيّدك يبن الميامين
يوم اللي تظهر يا غيور لنصرة الدين
ما غيرك لكسر الضلع يل مهدي يثأر
-------------
عقيل الكاظمي

الليالي الفاطميه 1447ه‍-2025م

يالزچيه وين رحتي يالزچيه
انا من بعدچ بقيت بلا تچيه
؛★★★★★★★★★★★★★★

انا حيدر يا مَن سنينچ قصيره
من فگدتچ چني فاگدلي عشيره
بللتها الگاع بدموعي الغزيره
وصار طول اليوم شبه المغربيه
؛★★★★★★★★★★★★★★

يالزچيه العمر توجع نايباته
وبوفاتچ تنعلن گلبي وفاته
من وراچ البيت ماتت بيه ضواته
والظلام بكل مكان يحيط بيه
؛★★★★★★★★★★★★★★

من وراچ الدنيا صارت دنيا مره
صرت افر البيت عنچ حجره حجره
بلكي اطبنهن واشوفنچ يزهره
وترد جمعتنه ونرد نگعد سويه
؛★★★★★★★★★★★★★★

الدفع باب اعليچ هذا كله منكر
كون منچ فقط سامع ها يحيدر
اگلب الكون واخلي السيف احمر
ولا اخلي كتر للهدو عليه
؛★★★★★★★★★★★★★★

بيدي كظيته لچن عندي قضيه
عفته حتى ما أخالفها الوصيه
عشت بالحسره وبقيت اصفگ بديه
ما شفت راحه بعد عين الوفيه
؛★★★★★★★★★★★★★★

يالمشيتي وما رجعتي بالسلامه
نحس كل احنه بعد عينچ يتامه
ندري ما ينفع بعد دمع الملامه
وداعة الله يالوديعه وهاي هيه
؛★★★★★★★★★★★★★★

آه والآه شبعد ينفع نطقها
وانا روحي باقيه باخر رمقها
صفحت افراحي بعد طوّت ورقها
وراح اعيشن بالألم صبح ومسيه
؛★★★★★★★

جعفر عطيه البزوني

بين  الباب  والحايط مصيبة
عصرو روح نور الله وحبيبة
فاطمة       فاطمة
@@@@@@@@@@

فاطمة روح  النبي الوصانة بيها
وگال عنها بضعتي وهيه ام ابيها
وسفة ناس الما وفت كلمة بحچيها
ما رعتها  وللاسف  غدرت  نبيها

گالو  يهجر  أصحاب  الضلالة
وركضو  ظلمو  الزهرة  بمغيبة
فاطمة          فاطمة
@@@@@@@@@@@

انجمعو الگالو گبل احنه الصحابة
وبالسقيفة   كونو   أحقر   عصابة
ما برد  جرح  النبي  وحرگة مصابة
ابصارهم   غطتها  هالدنيا  بضبابة

ركضو  عالخلافة  كالغنيمة
وكل واحد اخذ منهم نصيبة
فاطمة      فاطمة
@@@@@@@@@@

نكرو أشگال النبي ونكرو وصيتة
وما رعو  وسفة  بمحمد  ال بيتة
البيت حيدر ركضو الطاغي ورعيته
وفاطمة  گلولة  يفلان  بثنيتة

جاوبهم  وان  حرگوها  بالنار
ويا سفه رعب بيها النجيبة
فاطمة       فاطمة
@@@@@@@@@@@

العنها گال المصطفى روحي البالاجناب
عمده يا وسفه عصرها  الطاغي  بالباب
واحترگ  گلب  الرسول  بهذا  المصاب
بضربة  البسمار  ضلعة  هوه  منصاب

صابو روحه بمصاب الزجية
الضلت عگبة بالدنيا غريبة
فاطمة         فاطمة
@@@@@@@@@@@

عگب ما بالباب لوعها وعصرها
رد عليها  افلان  وبچفة  سطرها
العين حمره  صارت  وبين  اثرها
اشلون واتحمل علي لمن نضرها

بس لزمت علي احروف الوصية
وصعبة  يشوف  حالتها  الحبيبة
فاطمة          فاطمة
@@@@@@@@@@@

اشلون  متحمل  علي  اكبر  جروحة
اشلون ابو الحسنين غسل بيده روحة
حقة  من  جاس  الضلع  لو زاد نوحة
اشلون شايل روحة محمولة اعلة لوحة

دافنها  علي  لو  هو  مدفون
البلسم  ياوسف دافن  طبيبة
فاطمة           فاطمة
@@@@@@@@@@@@@

رجع  لكن  من  رجع  نيرانة  تلهب
من ثگل جرحة الضهر ياوسفه حدب
هم دفن روحة وبعد محتار لو طب
شنهو  ردة  لو تسأله  اعليها  زينب

لو زينب تسأله وين أمي
شيجاوبها علي بهاي المصيبة
فاطمة           فاطمة

تمت بعون الله
لخادم اهل البيت موسى الجيداوي

توجعني كلمة فاطمه
تخنگني دمعة فاطمه
الله يعينچ فاطمه يمه

-----------------------------

بضعة محمد هيچ تاليهه
حتى النفس صاير يأذيهه
محنيه من ضيم السدى اعليهه
ما ينسمع ونها وبواچيهه

ذبلت لحد ما صارت خيال
كسر الضلع مو چلمه تنگال
بسمار يذبح امنه يا ناس
طايح الكون وصعبه ينشال

يا فضه صاحت فاطمه
لحگيني ونت فاطمه
الله يعينچ فاطمه يمه

---------------------------------------

ليل اليمرنه وهيه ويانه
تعبانه بس متگول تعبانه
تگعد بصفنه وتعدل غطانه
وهيه الكسر خلاهه ذبلانه

بحجة اتلولي اعلينه بليل
تبچي بدمعهه اليهدم الحيل
خافن نگلهه الضلع اذاچ
ضمت وجعهه وگامت تميل


يا ويلي مالت فاطمه
من عدنه شالت فاطمه
الله يعينچ فاطمه يمه

--------------------------------------

حتى بصلاة الليل مهمومه
تحچي وي ربهه وهيه ملچومه
ربي الظلمني اتگرب بيومه
لا ترضى عنه اتمرمره ابنومه

حارمني من الراحه والنوم
ما بيه حيل اگعد ولا أگوم
يوجعني ضلعي وظلم الاجناب
حيل انحلت ما شيل الهدوم


گربت منيتچ فاطمه
شنهي وصيتچ فاطمه
الله يعينچ فاطمه يمه

-------------------------------------


وكت المحنه الفرگه تاذينه
بعده العمر وياهه خلينه
حال آمنه يمغير معانينه
ها يا سبب همنه وبواچينه

يا يمه تاني الرمل غطاچ
محلات حظنچ وانتي محلاچ
خلينه يمچ وسط الگبور
فتحي الچفن خل نغفه وياچ


ضمينه كلنه فاطمه
يمچ لطمنه فاطمه
الله يعينچ فاطمه يمه

---------------------------------------


صار الوداع وماتت الليله
بظهر الجنازه الحيل اتچيله
شلت العبايه وحاظنه الشيله
گلبي اليريدچ شرد اسويله

زينب بعدهه اتريدچ شلون ؟
من ريت طولي وياچ مدفون
ضميني اريد امشابگ اوداع
توگع وراه چفوف وعيون

خلصت ييمه فاطمه
سمعيني چلمه فاطمه
الله يعينچ فاطمه يمه


كلمات الخادم / رعد الفريجي
ثوابها الى روح والدتي

نعي للزهراء عليها السلام


نعي گرناوي :

يقول رسول الله صلى الله عليه واله وسلم من قبل امه بين عيناها جعل الله له نورا يسري بين يديه يوم القيامه ساعد الله كل من فقد امه وساعد الله قلب مولاتنا زينب عندما فارقت امها وطال الفراق ماذا تقول ؟؟ گالت :


هم نرجع بعد وايامنه اتعود
ونطب للدار ونشوف الحنينه

هله ومية هله شمحلاها من تگول
وتفك اگلوبنه من تلاگينه

تباصرنه ونباصرهه عله الكيف
تشيل اهمونه وتنشد علينه

اشماله الموت اجاها بدون ميعاد
واخذهه الموت بالغفله امن ادينه

دفناها ورجعنه اندگ عله الروس
ومحد سكتانه من بچينه

ردي بساع صحنه وموش تبطين
شفجه وعالحزن ماعوديتينه

ابوذية :


شكثر تعبت عليه     وشالت امي
امن احن واشتاگ اشمن ( شيلة امي )     شالت امي
حسافه بساع عني     شالت امي
وبعد هيهات مانلتم سويه


نزل بينه الدهر شوغات     ياما
شيفيد البچي للوصل ( يومه )     ياما
شحلات الحلگ من يگول ( يمه )      ياما
اريد الوالده وعنت عليه


نعي مجرد :


جنة عدن يالوالده امي
لو ثگل همي تشيل همي
ماتت وضل البيت يعمي


بالگوه اخذني الجدم للبيت
الوالده امي وين ناديت
بطرگ الدمع والنوح ضليت


محد گعد يمي ونشدني
وين الاواددهه وتودني
ياضيم فرگاها ضهدني


ضيم الفراگ اشلون احمله
نار وجمر بضلوعي خله
والبيت مايحچي امن اسأله


البيت مايحچي امن احاچيه
عونه اليطب وامه التلاگيه
گلبي تصدع بيش اداويه


طور الفراق :


بيش اضمده ... گلبي مجروح وتفطر
بيش اضمده ... عالهضم والضيم مگدر
بيش اضمده ... شالت امي وسكنت البر
بيش اضمده ... حالي مفجوع وتغير



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر