🇺🇿🇺🇿🇺🇿 Jenevaga tashrifimiz doirasida XMTning O‘zbekistondagi yangi tayinlangan katta koordinatori Yuriy Shterk janoblari bilan uchrashuv o‘tkazdik.

Janob Shterk Prezidentimiz rahbarligida kambag‘allikni qisqartirish, bandlik va ijtimoiy himoya tizimini takomillashtirish bo‘yicha amalga oshirilayotgan islohotlarni yuqori baholadi. U, ayniqsa, kuni kecha davlatimiz rahbarining Kasaba uyushmalari faollari bilan uchrashuvida belgilangan ustuvor vazifalar XMT uchun ham dolzarb ekanini qayd etib, ularni amalga oshirishda hamkorlikka tayyorligini bildirdi.

Uchrashuvda munosib mehnat standartlarini joriy etish, qabul qilingan qonunlarning ijrosini ta’minlash va yangi tashabbuslar muhokama qilindi. 2026–2030 yillarga mo‘ljallangan “Munosib mehnat dasturi” loyihasining ishlab chiqilishi va uning Toshkentda XMT ekspertlari ishtirokida muhokama qilinishi mehnat huquqlari va ijtimoiy barqarorlikni ta’minlashga qaratilgan muhim qadam sifatida e’tirof etildi.

#IPU151 #XMT #MunosibMehnat
#Senat

@tanzilanarbaeva

🇺🇿🇺🇿🇺🇿 Parlamentlararo ittifoqning 151-assambleyasi sessiyasida O‘zbekistonning insonparvarlik sohasidagi faol ishtiroki va tashabbuslari taqdim etildi.

Dunyoda 120 dan ziyod nizolar tufayli 310 millionga yaqin inson yordamga muhtoj. Bu holat gumanitar me’yorlarga rioya qilishning dolzarbligini ta’kidlaydi.

O‘zbekiston xalqaro insonparvarlik tashabbuslarida faol ishtirok etmoqda, notinch yurtlardagi birodarlarimizga uy-joy, tibbiy va ijtimoiy yordam ko‘rsatishda keng imkoniyatlar yaratmoqda. Bu sa’y-harakatlar mamlakatimizning insonparvarlik va xalqaro hamjihatlik tamoyillariga sodiqligini yaqqol ko‘rsatadi.

Sessiyada parlamentlar o‘rtasida qonunchilik va raqamli hamkorlikni chuqurlashtirish, gumanitar resurslarni samarali va manzilli yo‘naltirish, global tashabbuslarga moliyaviy ishtirokni kengaytirish hamda professional kadrlar tayyorlash kabi aniq tashabbuslarni ilgari surdik.

Insonparvarlik – tinchlikning huquqiy kafolati, barqaror taraqqiyotning ma’naviy poydevoridir. Shunday ekan, parlamentlar bu jarayonda muhim rol o‘ynaydi.

#IPU151
#Senat

@tanzilanarbaeva

🇺🇿🇺🇿🇺🇿 Jeneva shahrida bo‘lib o‘tgan Parlamentlararo Ittifoqning 151-assambleyasi doirasida bir qator davlatlar parlament vakillari bilan samarali muloqotlar o‘tkazdik.

Koreya Respublikasi Milliy Assambleyasi “Xalq kuchi” partiyasi fraksiyasi rahbari Yun Je Ok bilan uchrashuvda O‘zbekiston va Koreya o‘rtasidagi siyosiy, iqtisodiy va madaniy hamkorlikni yanada rivojlantirish masalalari muhokama qilindi. Shuningdek, joriy yil dekabr oyida Toshkent shahrida bo‘lib o‘tadigan Markaziy Osiyo davlatlari va Koreya Respublikasi parlamentlari rahbarlarining uchinchi uchrashuviga tayyorgarlik masalalari ko‘rib chiqildi.

Turkiya Buyuk Millat Majlisi Tashqi ishlar qo‘mitasi a’zosi Asuman Erdo‘g‘an bilan suhbatimizda Parlamentlararo Ittifoqning 2026-yil aprel oyida Istanbulda bo‘lib o‘tadigan 152-assambleyasi doirasida qo‘shma tadbirlar tashkil etish hamda kelgusi yil sentyabr oyida Samarqandda o‘tkaziladigan Yosh parlament a’zolarining 12-Global konferensiyasiga tayyorgarlik masalalari muhokama etildi.

Shuningdek, Sloveniya parlamentining Tashqi siyosat qo‘mitasi raisi Predrag Bakovich bilan bo‘lib o‘tgan uchrashuvda ikki mamlakat o‘rtasidagi munosabatlarning izchil rivojlanayotgani ta’kidlandi. Do‘stlik guruhlari faoliyatini faollashtirish, ijtimoiy himoya, gender tenglik va barqaror rivojlanish yo‘nalishlarida hamkorlikni kengaytirish borasida fikr almashdik.

Bunday muloqotlar mamlakatlarimiz parlamentlari o‘rtasidagi o‘zaro ishonch va do‘stona munosabatlarni mustahkamlab, konstruktiv hamkorlikni yanada chuqurlashtirishga xizmat qiladi.

#IPU151 #Senat #hamkorlik

@tanzilanarbaeva

🇺🇿🇺🇿🇺🇿 Jeneva shahrida Yevropa va Markaziy Osiyo mamlakatlari bo‘yicha XMT mintaqaviy byurosi direktori Beata Andres bilan uchrashdik. Suhbatda mehnat qonunchiligini XMT tavsiyalari asosida takomillashtirish va amalga oshirilayotgan islohotlar muhokama qilindi.

Beata Andres davlat tomonidan kambag‘allikni qisqartirish va fuqarolar uchun munosib mehnat sharoitlarini yaratishga qaratilgan siyosatni yuqori baholadi. U, shuningdek, Yuriy Shterkning milliy koordinatori etib tayinlanishi va O‘zbekistonda XMT mamlakat ofisini ochish tashabbusini uzoq muddatli hamkorlikda muhim qadam sifatida qayd etdi.

Uchrashuvda 2026–2030-yillarga mo‘ljallangan Munosib mehnat bo‘yicha milliy dasturini tayyorlash, shuningdek, ish beruvchilar, kasaba uyushmalari va mehnat inspeksiyasi mutaxassislarining malakasini oshirishda hamkorlikni kengaytirish yuzasidan kelishuvga erishildi.

#IPU151 #Senat #hamkorlik

@tanzilanarbaeva