بحسن نية أو بسوء ادراك
بتبص قدامك ع اللي سيبته وراك👌

الاكتئاب العنيف ضل السعادة السريعة
والخضر قال لك مرة والتانية
ان الحياة مش سهلة كما ظنك
وانت اللي أضعف من غلام تقتله
أو من جداره تهدمه
أو من سفينة تدلها ع الغرق
لم تستطع صبراً ولسه بتكابر
ولسه بتواجه مشاكلك بالهروب منها
كل الحاجات الغامقة ف حياتك سميتها بُن النهار


🙂

الليل سواده ضل تحت عنيك
وانت بتدخل حرب شرسه عليك
طرفينها انت ف الخسارة الفوز💔

لو كنت وقفت خطوه قبل باب بيتها
أو كنت يومها ابتسمت وبس من غير ماتعزمها على عمرك الفاضل
أو كان موبايلك فصل وفشلت تكتب نمرة هتضرك
كان زمانك بتمشي جنبها ف شارع وتشوفها مش اكتر من جمال عابر
لو كنت يوم الخروجه انت وصحابك وقع عليك الشاي
وقعدت طول الليل ف بيتك حُر ماخرجتش
ماكنش وجعك خيالك من صديق خاين
عرفته لحظة خروجه وبعدها قتلك💔

باحسد بقلبي شخص عاش وخلاص
الصبح يصحي يشتري الجرنال
ويروح لشغله وبعدها يرجع
تكتبله زوجته لستة الطلبات
ويروح لأهله مرة ف الأسبوع
هذا البسيط اللانهائي
ملك الحياة والمستفيد منها على أكمل سبيل
هذا الذي لايكتئب الا عشان له حد مات أو جاله خصم
أما احنا بنعيط اذا فيه قطه نامت دون طعام

ماتعكروش صفو الغنا ف الأوردة
قلبي العظيم – كلبي الوفي
ارمي عليه السلام وانظر من الداخل

كتابات على الجدران

صور قديمه على الحيطان لاحمد زكي وميريل ستريب
وصورة أصليه لريال مدريد الفين وواحد
سامية جمال وسيرة الحب واحد
الفرق بينهم كاتب الكلمات

🙂