Termizda Surxondaryo va Balx viloyatlari o‘rtasida hamkorlik bo‘yicha Ishchi komissiyaning beshinchi yig‘ilishi bo‘lib o‘tmoqda

O‘zbekiston va Afg‘oniston o‘rtasidagi do‘stlik va hamkorlik asrlar davomida chuqur tarixiy, madaniy va ma’naviy rishtalarga tayanadi. Bu yaqinlik Iso Termiziy, Al-Hakim At-Termiziy, Imom Buxoriy, Jaloliddin Balxiy va Abdurahmon Jomiy kabi ulug‘ allomalarning ilmiy va ma’naviy merosi orqali mustahkamlanib kelgan.

So‘nggi yillarda Prezidentimiz rahnamoligida Afg‘oniston bilan hamkorlikni yangi bosqichga olib chiqish, mamlakatda ijtimoiy-iqtisodiy barqarorlikni ta’minlash va tinchlik jarayonlariga ko‘mak berish bo‘yicha xalqaro tashabbuslar amalga oshirildi.

Ushbu jarayonda Afg‘oniston bilan chegaradosh Surxondaryo viloyatining Balx viloyati bilan hududlararo hamkorligi alohida ahamiyat kasb etmoqda.

Ayni vaqtda Termiz shahrida Surxondaryo viloyati hokimi Ulug‘bek Qosimov va Balx viloyati gubernatori Moxammad Yusuf Vafo boshchiligidagi delegatsiyalar ishtirokida Ishchi komissiyaning beshinchi yig‘ilishi o‘tmoqda. Uchrashuv doirasida iqtisodiy, transport, ta’lim, madaniyat va savdo sohalarida hamkorlikni yanada kengaytirish masalalari muhokama etilmoqda.

Surxondaryo.uz | Telegram | Facebook | Instagram | YouTube | X

Surxondaryo va Balx hamkorligi yangi bosqichga ko‘tarilmoqda

Bugun Termiz shahrida Surxondaryo va Afg‘onistonning Balx viloyati o‘rtasidagi hamkorlik bo‘yicha Ishchi komissiyaning beshinchi yig‘ilishi bo‘lib o‘tdi. Unda Surxondaryo viloyati hokimi Ulug‘bek Qosimov va Balx viloyati gubernatori Moxammad Yusuf Vafo boshchiligidagi delegatsiyalar ishtirok etdi.

Uchrashuvda Afg‘oniston delegatsiyasi O‘zbekiston Respublikasi Prezidentining qo‘shni mamlakatda tinchlik va barqarorlikni ta’minlash, ijtimoiy-iqtisodiy rivojlanishga ko‘mak berish hamda gumanitar masalalarga xalqaro hamjamiyat e’tiborini qaratishdagi tashabbuslarini yuqori baholadi.

Tomonlar O‘zbekiston va Afg‘oniston o‘rtasidagi do‘stona munosabatlar, jumladan, Surxondaryo va Balx viloyatlari hamkorligi izchil rivojlanayotganini ta’kidladi. Kelgusidagi hamkorlik yo‘nalishlari, mavjud imkoniyat va dolzarb masalalar atroflicha muhokama etilib, qishloq xo‘jaligi, savdo-iqtisodiy, investitsiyaviy, madaniy, ma’rifiy, gumanitar, ta’lim va transport-logistika sohalarida hamkorlikni kengaytirish, o‘zaro tovar ayirboshlash hajmini oshirish, chegara o‘tkazish punktlaridagi infratuzilmani yaxshilash masalalari ko‘rib chiqildi.

Yig‘ilish yakunida mavjud muammolarni bartaraf etish hamda "Termiz" xalqaro savdo markazi imkoniyatlaridan samarali foydalanish orqali o‘zaro aloqalarni yanada chuqurlashtirishga kelishildi.

Surxondaryo.uz | Telegram | Facebook | Instagram | YouTube | X