ငလျင်ဒ-ဏ်သင့်ဒေသများ ပြန်လည်ထူထောင်ရေးအတွက် သက်တမ်း(၅)နှစ်အထိရှိသော ချေးငွေများလျှောက်ထားနိုင်
+++++
မန္တလေးငလျင်ကြီးဒ-ဏ်သင့်ခဲ့သည့်ဒေသများ၌ ပြန်လည်ထူထောင်ရေးလုပ်ငန်းများဆောင်ရွက်နိုင်ရေးအတွက် နိုင်ငံတော်မှထည့်ဝင်ပံ့ပိုးသော ရန်ပုံငွေဖြင့် သက်တမ်း(၃)နှစ်မှ(၅)နှစ်အထိရှိသော ချေးငွေများကို သက်သာသောအတိုးနှုန်းဖြင့် ထုတ်ချေးသွားမည်ဖြစ်၍ လျှောက်ထားနိုင်ကြောင်း ဗဟိုဘဏ်မှ ယနေ့ အောက်တိုဘာ ၁၇ ရက်ကအသိပေးခဲ့သည်။

နေအိမ်နှင့် အဆောက်အဦးပြန်လည်တည်ဆောက်ရေးချေးငွေ၏ အတိုးနှုန်းမှာ ၃ ရာခိုင်နှုန်း၊ အသေးစား၊ အငယ်စားနှင့် အလတ်စားစီးပွားရေး(MSMEs) လုပ်ငန်းများအတွက် လုပ်ငန်းလည်ပတ်ရင်းနှီးငွေ၊ စက်ပစ္စည်း၊ ရေ၊ မီး၊ ဆိုလာနှင့် ရင်းနှီးမြှုပ်နှံမှုချေးငွေ၏ အတိုးနှုန်းမှာ ၅ ရာခိုင်နှုန်း၊ စက်ရုံလုပ်ငန်းကြီးများ ပြန်လည်ပြုပြင်ရေးနှင့် လည်ပတ်နိုင်ရေးချေးငွေ၏ အတိုးနှုန်းမှာ ၇ ရာခိုင်နှုန်း၊ နိုင်ငံပိုင်အခြေခံအဆောက်အအုံများ တာဝန်ယူတည်ဆောက်နေသည့် ဆောက်လုပ်ရေးကုမ္ပဏီများအတွက် ယာယီချေးငွေ၏ အတိုးနှုန်းမှာ ၇ ရာခိုင်နှုန်းတို့ဖြစ်သည်။

ဘဏ်နှင့် ဘဏ်မဟုတ်သော ငွေရေးကြေးရေးအဖွဲ့ အစည်းများအဖြစ် AYA Bank PCL ၊ uab Bank PCL ၊ CB Bank PCL ၊ ဧရာဝတီဆောက်လုပ်ရေးအိမ်ရာနှင့်ဖွံ့ဖြိုးရေးဘဏ်၊ ရိုးမဘဏ်၊ ဆောက်လုပ်ရေးအိမ်ရာနှင့် အခြေခံအဆောက်အအုံဖွံ့ဖြိုးရေးဘဏ်၊ မြန်မာနိုင်ငံသားများဘဏ်၊ ကမ္ဘောဇဘဏ်၊ မြဝတီဘဏ်၊ အင်းဝဘဏ်၊ Best Merchant Finance Co., Ltd နှင့် Zega Finance Co., Ltd တို့က ချေးငွေနှင့်ပက်သက်၍ ဝန်ဆောင်မှုပေးသွားမည်ဖြစ်သည်။

ထို့ကြောင့် ငလျင်ဒ-ဏ်သင့်ခဲ့သည့်ဒေသများရှိ စီးပွားရေးလုပ်ငန်းများနှင့် ဒေသခံများအနေဖြင့် ချေးငွေအစီအစဉ်တွင် ဝန်ဆောင်မှုပေးမည့်ဘဏ်များနှင့် ဘဏ်မဟုတ်သော ငွေရေးကြေးရေးအဖွဲ့အစည်းများမှတစ်ဆင့်ချေးငွေများလျှောက်ထားနိုင်သည်ဟု ဗဟိုဘဏ်ကအသိပေးခဲ့သည်။

မိမိတို့ ကိုးကွယ်ယုံကြည်ရာ ဘာသာတရားအလျောက် ဘာသာရေးပွဲတော်များကိုအနှစ်သာရရှိရှိ ကျင်းပဆောင်ရွက်သွားကြရန် လွန်စွာအရေးကြီးကြောင်း ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် ပြောကြား
+++++
နိုင်ငံတော်အတွင်း မှီတင်းနေထိုင်ကြသူများ၏ ဘာသာရေးဆိုင်ရာ ယုံကြည်ကိုးကွယ်မှုနှင့်ပတ်သက်ပြီး တူညီသည့်အခွင့်အရေးများနှင့် လွတ်လပ်စွာ ယုံကြည်ကိုးကွယ်ခွင့်ကို ဖွဲ့စည်းပုံအခြေခံဥပဒေနှင့်အညီ ခွင့်ပြုပေးထားပြီးဖြစ်ကြောင်း၊ ထို့ကြောင့် မိမိတို့ ကိုးကွယ်ယုံကြည်ရာ ဘာသာတရားအလျောက် ဘာသာရေးပွဲတော်များကိုလည်း အနှစ်သာရရှိရှိ ကျင်းပဆောင်ရွက်သွားကြရန် လွန်စွာအရေးကြီးကြောင်း ပြည်ထောင်စုသမ္မတမြန်မာနိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် က အောက်တိုဘာလ ၁၇ ရက်တွင် ဟိန္ဒူဘာသာဝင်များ၏ ဒီပါဝလီအထိမ်းအမှတ်အခမ်းအနားသို့ တက်ရောက်ချီးမြှင့်စဉ် ပြောကြားခဲ့တာဖြစ်ပါတယ်။