قبل أحداث داعش جان عندي فلسين ابيع واشتري غراض مستعملة ، اجاني ولد صديقي من زيونة كلي احمد اكو واحد عقيد ركن متقاعد عنده غراض يريد يبيعهن، يريد يصفي البيت ويسافر، رحتله العصر للبيت
الرجل جان هيبة وشخصية عالية، اتخيلت نفسي جندي كدامه راح ينطيني واجب على ساتر لو اركض ١٤ مرة عقوبة بمركز النهروان
بصوت قيادي كلي ابني مابيه حيل انزل الغراض الباقيات بالبيتونة هن لوحات وشمعدانات وكتب اذا تفيدك اخذ التريده منهن وانزل
فتت للبيت رغم الوحده العايشها بس تحس الاحاديث القديمة الدارت هنا تتراودلك، وجهتني للمكان البي الغراض خادمة مسيحية لابسة اسود عيونها تحمل الكثير من الهم والمسؤولية
من وصلت للمكان شفت كنز من الغراض، مُسجّل قديم بي نشرة اضوية وثاني صغير تسمع بي اخبار الحرب وشمعدانات كرستال سوارفيسكي بالأضافة لكتب قيّمة ، فتحت كتاب لنيتشه سرحت بالقراءة ما أشوف اله واحد واكف بصفي بلبس افندي كلي الدين ثورة العبيد ، كتله الدين مو يعتبر سلوك ؟ كلي اي طبعاً بس برأي نيتشه ثورة العبيد
هذا رأيه هو ، اقراله وابدي بالعلم المرح وديربالك تقره لأستاذه شوبنهاور ذاك تشاؤمي وانت بعدك صغير خاف يكسر واهسك بالحياة رغم ان نيتشه بالاخير تمرد على استاذه، كتله اول مرة اسمع بهالشي ، ردت اصعد واشوف شكو غراض بعد شفت مجموعة من النمل خفت ادوس عليهن لايموتن، كلي تعرف النملة عدها بُعدين وانت عندك ٣ ابعاد ! كتله شلون ؟
كلي انت تكدر تندار يمنه ويسره وتكدر تباوع كدامك وفوكاك ، النملة بس تباوع كدام ويمنه ويسره ، كتله اكو مخلوق عنده بعد رابع ؟ كلي ليهسه العلم مامكتشف بس ابقى اقره
كلي عندك اصدقاء ؟ كتله عندي بس اني قليل المعشر ومااحب التقي هواية ، كلي احسن الانسان كل ماجان اجتماعي كل مايصير اقل عبقرية
ماكملت دراسة ؟ كتله متوقف حاليًا بسبب الظروف انجبرت اشتغل، كلي مجتمعك اللئيم يخلق اسباب الفقر والعاهة وراها يحتقرك اذا انصابيت بي، كتله انت اخو صاحب البيت ؟ جاوبني لا
گلي برجسون الفرنسي يكول الانسان ميال بطبيعته لموافقة الجماعة الينتميلها بس العبقري هو الينتمي للبشرية جمعاء ، شايف بيك عبقرية مغلفها بالسخرية وهذا الشي يحبب الناس الك
بلحظة سمعت صوت اقدام واحد يصعد الدرج
شفت العقيد يضحك بوجهي، كلي ابني فضني اكو واحد يسولف ويه تمثال علي الوردي.

اجتي سيارة مال شرطة بدون سابق انذار شالتني ، وبرغم تحفظي بالتعامل بسلوكي صعدت بدون ما اسأل
اتمنيت اخذ شريط الـxanax لأن اعاني من رهاب وتوتر اذا كعدت بصف شخص ماعرفه، هذه الدوه يخليني استوعب الخوف ويحول كل مأساة بداخلي الى سخرية كبيرة ,
وصلنا لمكان يشبه الكنيسة متحول الى سجن، تهمتي ماعرف شنيه لحد الآن،
محد حقق وياية ولا شفت ضابط او صعدت لقاضي، نزلت من السيارة الشرطي كلي وصلنا لمدينة الضياع، لا تتعب نفسك وتخابر محد يكدر يطلعك،
فتت من باب هيكلها حديد، جديدة الأنشاء مصبوغة بلون اسود ، استغربت من شفت العالم المسجونة هناك
نصهم اعرفهم ، المسؤول عن المساجين ضابط عنده عقدة تجاه الحيوانات،
يجيب اي حيوان كدام المساجين يعذبه ويكتله تخويفاً الهم ، الأنسان من يتطبع بالخوف يتحول لحيوان يخاف ان يُعذّب او يُقتّل
وهذا الشي الراد يوصله الضابط لكل سجين جديد يفوت الهالمدينة المسجونة،
ونجح هذا الاسلوب وياية، من قتل كدامي جرو صغير، واني قبل لا انشال بساعة جنت اوكل بزونة شارع قوطية سردين
بعد هذا المشهد رحبوا بيه المساجين ، هواي بيهم عرف، محد بيهم يعرف تهمته، جابوني حالي حالهم ، الي استغربت منه اول مرة اشوف سجن بي شوارع ومحلات وناس مبسطه عيشتها عالمساجين
تكدر تفتر براحتك بس ماتكدر تشرد، بنهاية كل شي اكو بوابة حديد مسدود بابها
الغريب كل العايشين بهذا السجن عنده جرأة يغلط ويفشر ويضحك ويلعب بصوت عالي، كلهم متعايشين بس الشي الممنوع عليهم هي عبور بوابة الحديد، كل شغفهم وحماسهم ينتهي من يرجع الضابط، الكل يرتبك ويخاف ويترقب اي حيوان جايبه اليوم يعذبه، مرات يجيب حيوان يطلقه كدامنا يخلينا نلزمه ونلعب وياه وندري ثاني يوم بعد مانشوفه
كل الموجودين جانت گلوبهم طيبة وغزيرين الدمع، مرة واحد كلي هذي المدينة العايشين بيها مستمرة بالقتل ، اليوم الماينقتل بيها شي تختفي، سمعته واخذت حجايته مو بمنتهى الجدية
جان مجتمعنا عبارة عن بشر بحياتهم الواقعية مرضى مايكدرون يختلطون بالمجتمع، اغلبيتهم تاخذ ادوية مثلي حتى بس يتنفس، او يهدأ، او ينام عالأقل من وكت ومرتاح، هناك ما احتاجيت بعد لأدويتي
اسولف براحتي ويسولفون براحتهم، مرة احتفلنا بشخص ويانه لأن بقى ساعتين ما مختنك، واحتفلنا بشخص ثاني لان كدر يستمع لحديث دار عن الوجودية بدون مايحس بقلق، سوينا فريق نلعب بيناتنا، صح جو هالمدينة كئيب، لون السمة أحمر قاتم ومابيها شمس، بس اكلنا وشربنا سوه ، ورغم هذا التماسك يجي الضابط بالاخير وياه حيوان يكتله كدامنا ويرجعنا لسابق طبعنا

هالمرة جايب وياه جرو كلش صغير وخشب حتى يحرقه ، بقيت الليل كله ما نايم، نزلت بدون ما أحز يلاحظني جمعت الخشب وحركته ورجعت لفراشي،
دخلت المدينة انذار واجه الضابط اول واحد بيده حديده يدور على الجرو بوسط النار، ضحك ضحكة صوتها مسموع ورجع هو والبقية لأماكنهم
تغطيت والجرو يمي ،كعدت الصبح بقيت محافظ عليّ جوه جربايتي ، شفت هوسة جوه كالوا الضابط لاول مرة يتمرض، رغم نار البارحة بس لاول مرة من عشرات السنين ماينكتل حيوان ، وكلهم يصيحون وين الجرو مال بارحة
ضميت الجرو بقمصلتي، بقيت اتمشى شفت بوابة سريّة من بعيد اتقربتلها، بابها مفتوح ركضت وعبرت، عالشارع تركت الجرو يروح بحال سبيلة ركض بعيد جان يوكف على بعد مسافة، اندارلي وباوع بنظرة عطف، جان يريد يگلي بهاي النظرة شكرًا لأن انقذت حياتي وراح كمل طريقه بالحريّة،
ومن بعيد اسمع صخب واحتفالات عارمة
رجعت للمدينة لكيت بابها مسدود والكل محتفل بأنجازي
اول مرة واحد يعبر البوابة وموت الضابط بفراشه
اتحررت المدينة من القتل بس ماكدرت ارجعلهم
لوحتلهم من بعيد وودعتهم
ورجعت لسجن حريتي القديم.

وكلكم عيوني.

اغلب المشاكل الزوجية والعاطفية تبدي بالعناد وتنتهي بي
علاقات حلوه مدتها سنين تنتهي بسبب العناد، وهالمرة مضطر احمل اغلب السبب للمرأة.
مشكلة من تتعامل المرأة بعاطفتها فقط بدون عقلها، الانترنيت والمجتمع رسخوا هالفكرة بداخلها وخلوها تؤمن بأنها عاطفية فقط، بالمقابل الرجل عقلاني ومنطقي اكثر، وهاي المعادلة هي السبب بالمشاكل النشوفها حاليًا
العاطفة بدون عقل ما تفيد والعكس صحيح،
فمن تجين تعاندين هنا دا تتعاملين بعاطفتج بدون ذرة عقل، لأن لو شغلتي عقلج اول قانون راح تشوفي كدامج هو ان العناد صفة تهدّم رجولة الزوج، راح يگوم يحسج رجل آخر يعارض كلامه، وهنا الزوج مستحيل يسمح برجل آخر بالبيت وتبدأ الخلافات.

ربّ الأسرة مفهوم أنعدم عند البنات الي وعن واتثقفن على الأنفتاح الغربي الخبيث الصدروا الهن عن طريق السوشل ميديا والمسلسلات والقصص الوهمية.
ربّ الأسرة هو رجلج والسند الوحيد المتبقي الج بمعادلة الحياة الصعبة، وهيّ صفة القوامة المذكورة بالقرآن، التميّز الذكر عن الأنثى
أي محاولة منج لأخذ هذا الدور،
غريزيًا معناها هددتي رجولته وبديتي بمرحلة العناد بالقرارات وهالشي ما ممكن أي رجل حقيقي يتقبله.

طبعًا اكو استثناءات لكلامي، وحده منهن أن زوجها احتمال يطلع مو صاحب مسؤولية، واحد فاهي لا يحل ولا يربط ولا إله أي دور رجولي، هنا من حقها تصير ربّة الأسرة هيّ لأن العينتين ما ماخذ دوره الحقيقي اساسًا، وطبعًا من حقها تعاند وترفض اذا جان قرار الرجل ضد الدين واللأسس الأخلاقية، وهذي حالات شاذة مو بصدد ذكرها حاليًا.

ما أنكر أبدًا أن المرأة غير قادرة على أن تكون ربّة الأسرة، بالعكس تكدر لكن من تكون الأسرة خالية من رجل حقيقي، بهل حالة فقط، أما بوجود هذا الرجل، يسقط دورها بالزعامة وإصدار القرارات.

الزواج مشاورة مو مشاركة، يعني تتشاورون بالقرارات لكن اليصدر القرار هو ربّ الأسرة فقط، من تنضجين لهاي النقطة وتتقبليها بدون تذمر او إنزعاج، فأنتِ بديتي تفهمين اول نقطة بعالم الزواج والعلاقات الصحيحة.

وكلكم عيوني.

يارب اني أتوكلُ عليكَ بنبيّك نبيّ الرحمه وبأهل بيتهم الكرام
يارب سهلها ولا تعسرها

ومن يتقِ الله يجعل لهُ مخرجًا ويرزقهُ من حيثُ لا يحتسب ومن يتوكّل على الله فهو حسبُه، إنَّ الله بالغُ أمره، قد جعل الله لكلِّ شيءٍ قدرا 🙏🏼❤️

صدق اللهُ حينَ قال "إنّ الله بالغُ أمره"
وحينَ قال " إنما أمرَهُ إذا أرادَ شيئًا أن يقولَ لهُ كُن فيكون"

عجيب بالفيّض العطائي هذا الإله، يخليك تخجّل تطلب شي آخر لأن هسه توه ديحققلك أصعب طلب بالكون طلبته منه قبل شوي!
ويمكن طلبَك الي دعيت بي الله مرارًا وتكرارًا، تحت سقف غرفتك انتَ وساجد إله، يمكن الطلب تحقق أول ما فكرت تطلبَه، والي صار من أحداث هو تسلسل دقيق حتى يبشرك بالنتيجة النهائية
"أدعوني أستجب لكم" مو مجرد آية عابرة ، وحاشى أن يكون كلام الله مجرد كلام
بل الآية هو وعد إلاهي حتمي التنفيذ ، بدون شرط بدون قيّد بدون مقابل!

سبحانك ربي شكد مقصرين بالشُكر والصلاة إلك، شكد احنه بؤوساء لأن بكل مرة نحاول نستوعب عظمتك ورحمتك علينه، نفشل فشل ذريع.
وما اجملهُ من فشل
"ورحمتي وسعت كلّ شيء"
سبحانك شكد واسع الرحمة لعد!

الحمدلله على ما مضى، والحمدلله على ما سيمضي
ولا حول ولا قوة إلا بالله العليّ العظيم

أني فرحان
وكلكم عيوني.

هواي ناس تعرفهم بالبداية تنبهر بأختلاف تميزهم، بحجايتهم واهتمامهم ووعدهم، صحيح ذني الامور حلوة ومنختلف عليها
بس وراها نكتشف كل هالامور مؤقتة، مرحلة وكت مو اكثر، قناع خلف الوجه الحقيقي

احنه نريد ناس بحياتنا عدها مبدأ، ناس متخلينا نتعود على نظافتهم وميخلونا نرسم صورة ونقتنع بيها وبالاخير نشوف شخص غير هذه الرسمناه ، وكتها راح نتغير ونخاف .
الحقيقة شكد متشوفها مؤلمة شكد ماهي احلى من مليون شي مزيف وباهت، الانسان الما واثق من نفسه شلون يريد يخلي العالم تثق بي وتتقبله ؟
الثبات اهم الف مرة من البدايات

ميلان كونديرا برواية غراميات مضحكه من يكتشف بطل الرواية آروين صديقة ستيڤ جان يجذب علّي حتى يثبت بشغلة گاله :
لو متقبل نفسك من البداية ومتصالح وياها اهم من الكلام الحلو الصنعته ورسمته وحولك الشخص ماله علاقة بيك .
بالنهاية راح تفشل، صح الطرف الثاني راح يتعب لان ماله ذنب بهذه جذبك، بس انت راح تبقى تطاردك لعنة عدم الثقة بالنفس .
الي راح تفسد عليك اَي علاقة بالمستقبل،

خليك انسان سّوي، مقتنع بنفسك وعندك امان داخلي ، ولتقترب من انسان
غير وانتَ بطبيعتك وذاتك
وكتها راح تشوف نفسك فرحان ومقتنع .
لأن اليتقبل كل شي بيك راح يشوف عيوبك مميزات

بالنهاية
سولف شكد ما تريد، أصلك يبيّن بتصرفاتك

وكلكم عيوني.

أول وأهم علامات النضج البشري هو التعامل مع إختيارات الحياة بمبدأ الأنسَب لا الأفضل.

مو كل أفضل هو الأنسب، وهذا المبدأ يتطلَب تجريد النفس عن هواها بلهثها خلف كل لامع ظنًا هو الأفضل لها.

وكلكم عيوني.

كل انسان الله خلقه انطاه بحياته انسانة يختصر بيها الحياة بالنسبه اله
بنظرك تطلع حبيبتك، وبنظر غيرك أمة، وبنظر واحد ثالث اخته
المهم راح تشوفها مهمة، بتفكيرها وكلامها وبصمتها داخلك راح تترك أثر دائم.

المرأة بطفولتها تفتح باب الجنة لأبوها، ومن تصير زوجة تبني حياة أسرة بصبرها وبتضحياتها وتربيتها لأبناءها.
ومن تصير حبيبة الكلمة منها تهون عليك امور بعز تعبك، لمسة منها كافية حتى تنطيك سبب للحياة ومقاومة هواي ظروف
كل القصص تبدي منها وتنتهي بيها.

لكل امرأة تحت اَي سماء وفوك كل ارض،
كل سنة وانتن طيبات وحنينات
وتبقن عَل عين والراس.

وكلكم عيوني.

الصراع بين الإمام علي عليهِ السلام ومعاوية ماله علاقة بالسنة والشيعة ولا له علاقة بالشيخين والإمام علي، الصراع هو بين حق وباطل، ابيض وأسود، وهذا مو رأيي، رأي 90% من علماء اهل السنة، رأي اصحاب المذاهب الأربعة وأصحاب الكتب الستة، الصراع هو بين النبي محمد صلّ الله عليهِ وآلهِ وابو سفيان
معاوية والإمام علي
يزيد والإمام الحسين

بين فئتين لا يمكن ان تفاضل بينهما،
كل انسان سني او شيعي يبرر لقتل الأبرياء هو اموي الهوى حتى لو ينتسب لحب الأمام علي
كل شخص يرفع شعار النصر على حساب دم اخوه في الوطن مستعد ان يقر بطن اخوه ويستخرج كبده كما فعلت هند.

على سياق مُتصّل
بالفجرية الي الجولاني الأموي إحتل بيها دمشق
نشرت بوست وكتبت "سقَطَت دمشق"

بعض الأخوة الأصدقاء عاتبوني على النشر، كل ظنهم اني داعم لبشار القذر او لسياسته الرعنة
كل الموضوع اني جنت متخوّف من نقاط معيّنة، وهاي النقاط كلها تحققت بعد مرور الوقت، الى أن وصلنا اليوم الى النقطة الأكبر وهيّ الطائفية والتهجير العُرقي والقتل على أساس المذهب، الي ديصير بسوريا حاليًا ما يختلف عن الصار بالعراق بأول أيامه وشرارته، الي يتذكرون القاعدة وبدايتها شسوّت، بالضبط ديسووه حاليًا الجولاني وجماعته، وبالحقيقة همه نفسهم، يعني نفس الأشخاص ونفس العقل والفكرية، نفس كلشي ما تغير شي فقط "المكان"

أطفال ونُساء يُقتلون بالجملة، شباب عُزَل لا حول لهم ولا قوة يتم تعذبيهم وقتلهم بأبشع الطُرق، يقتلون بدم بارد كأن لا اجساد ولا أصوات لهم،
بالضبط كما فعلَ بنو أمية مع بني هاشم

اليوم لا مجال للمجاملة ابدًا
أما أن تكون مع معاوية أو مع الإمام علي
أما أن تكون جولاني ، أو تكون إنسان سَويّ.

من اباوع على نفاق الناس وعلى جذبهم وعلى الأخلاق التعبانه، الحقد والنميمة والتنمر ، كره الخير للمقابل والحسد التارسهم، احتراف الجذب والخيانة وسرقة الأمانة وسوء المعاملة وغيرهن العشرات من الصفات الخبيثة.
مو غرور ولا تكبر من اكول شكد مختلف اني لعد، شكد نقي من الداخل، شكد فعلًا إنسان"حقيقي" بعيد كل البعد عن التزييف، ومرات افكّر ، ليش اني هيج؟
ما جربت ابد احجي على احد بالسوء حتى عن الأشخاص الأذوني، ما جربت ربع من الديسوونه الناس الذكرتهم فوك.
هل الموضوع نعمة وتوفيق من الله فقط! أم انهُ إجتهاد شخصي مبني على حسن التربية، وهل نحنُ مخيرين أم مسيرين أمام فعل الخير او الشر ؟
اسئلة كثيرة.

وكلكم عيوني

1:- الزوجة الحقيقية هي التخيط قميص زوجها اذا ينفتك.
2:- الزوجة الحقيقية هي التشمر القميص بره البيت اذا ينشك.

الاولى تبقى رائعة من يشوفها زوجها مهتمة وحنونة، والثانية تبقى أصيلة من يشوفها الزوج معتزة بي لدرجة ماتقبل يلبس قميص انشك.
ويه غير زلم عادي يتهم الاولى ماتعرف تغسل والقميص انعدم من وراها ويتهم الثانية باللامبالاة وعدم المسؤولية.

الرضا بين شخصين ماينبني على افعال الطرف الثاني
ينبني بالأساس على استقبالنا لأفعال الشريك وقدرة تفهمنا اله.

الشاعر الألماني "راينر ريلكه" يگول
( الزواج اكبر بكثير من أربعة ارجل على سرير )

وكلكم عيوني.

تخيل شخص يكضي عمره راح بإنتظار السعادة، يتصور راح تجي ويه شخص محدد، او بالمال ، او بالنجاح والمنصب
وكل مرة يوصل لليريده يحس بفرح مؤقت وراها يرجع لشعوره بالفراغ ، مثل متسول باقي طول عمره يمد ايده للحياة .
بفلسفة شوبنهاور ، الحياة مو مسرح للسعادة، بكد ماهي معركة مستمرة بين الرغبة والمعاناة، ما تلهَف أمامَهُ يصبح بلا قيمة بمجرد حصولك علي ،
فتبقى بدائرة ماتنتهي من السعي والإحباط،

اليفهم الحقيقة ما يبقى عبد لرغباته،
يلگه الحكمة بتقليل التعلق،
وتقبل الألم جزء اصيل من الوجود
يمكن مانكدر نشرد من المعاناة
بس نكدر نعيش بدون مانصير خدم لأوهامنا.

وكلكم عيوني.

9:18 صباحًا
بهاي اللحظة وبدون سابق أنذار ، أني مشتاق لبغداد.

صح عايش بنصها بس مشتاقلها،
أريد ارجع أحس بيها من جديد
أريد أرجع أحس بطفولتي من جنت أزورها، اللهفة والذكريات الحلوة، بيت الخالة، بيت العم والجد , اللمة الحلوة والسوالف التخبل الي إلها بداية ومالها نهاية، حنين مو طبيعي للسنين السابقة، جان كل همّي تصير ب 3 العصر حتى انزل اشتري اني وأخويه وبت خالتي من اسواق ابو رواد، واذا سمحولنه اهلنه نروح للمحل الي ع شارع العام، جان بنظرنه مول كامل، يمكن چنه نشوفه هيج لأن بعيد شوي، متعة انُ تمشي مسافة بعيدة خارج حدود بيتك ب 2008 جانت متعة ومغامرة عظيمة.

نومة السطح ببيت جدو يعقوب، مثلجات الملكة، بركر الدب، الكيّة حمل مال عمو مؤيد، من تصعد وراها تحس نفسك باتمان طاير ديدور ذكرى حتى يصنعها بطفولته، ذكرى حتبقى بباله لحد الآن.
شكد اتمنى لو تنعاد دقيقتين فقط من الشعور القديم، لو أشوف بغداد وأحس بيها نفس قبل.

قبل شوي طلبت أكل من مسافة شوية بعيدة، دائمًا الطلبات البعيدة أنطيهم إكرامية زيادة، الطلب جان سعره 8 ونص ، نطيته 10 الاف وجانن اغلبهن خردة آلاف،
گلي بعدلك الف ونص كتله فدوه الك، واخذت الطلب تمشيت للمحل براس الشارع داجيب شي اشربه، وصلت للكاشير دا احاسبه ، سمعت واحد بصفه يگول "عادي هنه مليونين قابل شمقفص عليّ" ويرجع ذاك يجاوبه يگله اي اصلًا فلوسه ما تخلص
رجعت للشقة لكيت ابو الدلفري بنفس مكانه دا ينتظرني
گلي حبيبي ذني 11 ألف مو 10
منطيني ألف زايد اضافي بالغلط.

بقيت صافن شويه، رجعت للسؤال الأبدي، هل الإنسان مُخيّر أم مُسيّر بفعل الخير او الشر؟
ألف دينار فقط هيّ قيمة الإجابة عن هذا السؤال.
بهل اثناء گلي اخويه وين شردت
انتبهتله كتله اخذهن گلبي، وشكرًا الك گلي عليش؟ كتله على الجواب.
ضحك وراح.

وكلكم عيوني.

ليش اكثر العلاقات الحالية تنتهي بالفشل؟

النجاح بالعلاقات يكتمل من تفهم شخصية المقابل، شلون يحجي، وشلون يعبّر عن فرحه وحزنه، درجات حدود زعله، مقدار العطاء بالحب والتقدير الينطي الك ولغيرك، وكذلك إستعداده حتى يتغيّر علمودك
لأن فهمك للشخص يخلي حدود لتصوراتك الوهمية، وأول ماتعرف حقيقة وسلوك المقابل راح تريّح نفسك، أما تساعده وتتقبله أو ترفضه وتبحث عن شخص ثاني.

احنه اغلبنا نختلف بطريقة العطاء وطريقة التعبير عن المشاعر، ممكن انت اذا حبيت شخص تعزمه بمطعم وغيرك من يحب يجيبه ورده،
ف إلمامك بحدود الشخصية المرتبط بيها وجوانبها يريحك بالتصرف وياها بعدين.

دائمًا انطي لنفسك وللمقابل فرصة يفهمك وتفهمه

وكلكم عيوني.

أحسن مكسب ممكن الإنسان يكسبه بهاي الحياة
هيّ امرأة شريفة وبنت أصول، تعرف شلون تحبك وتصون مكانتك بغيابك وبوجودك وياها، تعرف تقدّر وتحترم وماعدها بگلبها بس الضحكة والخير للكل
تسمع الكلام وتتجنب الشغلات الممنوعة عليها، وتتخلص من المشاكل بأقل الخسائر وأبسطها،
تهتم لصحتك ولنومتك وكعدتك، تحس يمها بأنك طفل صغير توّه إجه للدنيا.

امرأة حنونه 'وتفهمّك'
وتعرف الله ونبيّه وأهل بيته
هذا ما أتمناه ألكم أصدقائي الشباب.

وكلكم عيوني.

مو لازم كل شي حلو تسوي بحياتك راح يرجعلك
المقابل الحقيقي لأفعالك الطيبة هو راحتك النفسية وضميرك الحيّ
وهاي أكبر مكافأة.

تكدر تحارب الكل حتى تخلي علاقتك العاطفية تنجح وتحافظ عليها، إلا شخص واحد ماتكدر تحاربه علمود تحافظ على علاقتك
وهو الشخص التحبه والرايده بهل علاقة، ابد متكدر تجبره يكون وياك، ولا تجبره يصير زين وياك حتى ما يخسرك، ومستحيل تجبره حتى يسمع كلامك، لأن لو رايد هالعلاقة تنجح جان سمعه وحافظ عليك، او على الأقل جان حس بيك وقدّر القدمته اله.
لذلك اذا حسيت بنفسك ما قصرت ووضحت الأسباب وحاولت مرارًا وتكرارًا، لا تلوم نفسك ابد إذا إنتهت العلاقة، بل أشكر نفسك على حقيقتك ووضوحك أمام الله، ولأن ضميرك لسّه موجود.

عيد مبارك أصدقائي
وكلكم عيوني.

أللهم لك الحمدُ حتى ترضى ولكَ الحمدُ إذا رَضيتَ ولكَ الحمدُ بعد الرِضا، اللهم صلِّ على محمدٍ وآل محمد، واكفنا شرّ خلقِكَ، وأجمعنا بمن هم أحنُ منّا على أنفُسِنا، اللهم وفقنا على طاعتِكَ وتقواك، ولا تشغلنا في أمرٍ يضرنا ويبعدنا عنكَ يا رحيم يا كريم، اللهمَ أجعلها بدايةً تُرضيك وتُرضينا، ويسّر لنا أمرنا بما ترتضيهِ لنا، لا بما نرتضيهُ نحن، اللهم عاملنا برحمتكِ لا عدلكِ، وأعفو عنّا وأغفر لنا سوء جهالتنا بقدرنا، وثبتنا على نهجِ مُحمدٍ وآلهِ الطيبين الطاهرين
ولا حولَ ولا قوة إلا بالله العليّ العظيم.

شغلات يومية ذكّر نفسك بيها

- العلاقة التستنزف طاقتك والمتضايق منها اتركها لو روحك بيها
- لا تكرر طلبك مرتين، ولا تكرر المسامحة مرتين
- نام مظلوم ولا تنام ظالم
- قدّر المواقف والأفعال اليسووها الك اليحبوك، وسجلها بورقة لأن راح تنساها بعدين
- غادر من كل مكان تحس وجودك مو مهم بي
- شكد ما تكدر لا تطلب شي من الناس
-إتحكم بردات فعلك وسيّطر على عصبيتك، اليزعجك أتجاهله ولا كأن موجود.
- دائما راح تسمع كلام مو حقيقي عليك حتى من أقرب الناس، اتجاهله تمامًا.
- شكد مابيك لا تكتل ضميرك الداخلي، لأن هو اليحسسك بالإنسانية والأخلاق.
- ساعد الناس لوجه الله شكد ماتكدر، ولا تنتظر رد او تقدير.
- ابد لا تخلي أحد يقلل من كرامتك ويحسسك أنت لا شيء ، كرامتك هيّ سلاحك الوحيد بالحياة.
- دير بالك تضعف وتنقهر بسبب علاقة عابرة، كل الشغلات الراحت مصيرها تروح، هذا قرار من السماء، راحت لأن حتمًا بيها أذية وبيها قهر مستقبلًا.
-لا تدخل طب أسنان
- ولا تشجع برشلونة

وكلكم عيوني