" የተቃጠለው ብሎክ 2ኛ ፎቅ ላይ ዶርም ተሰጥቶኝ የምኖር ነበርኩ፤ ብሎክ 17 ነው " - የዩኒቨርሲቲው ተማሪ

➡️ " በሰመራ ዩኒቨርሲቲ ይሄ ሁለተኛው ወይም ሶስተኛው የእሳት አደጋ ነው " - ዩኒቨርሲቲው

በሰመራ ዩኒቨርሲቲ ትላንት ምሽት በተማሪዎች ማደሪያ ብሎክ የተከሰተው ቃጠሎ ሰው ላይ ጉዳት እንዳላደረሰና መሰል አደጋ ግን መደጋሙን ዩኒቨርሲቲውና ተማሪዎች ለቲክቫህ ኢትዮጵያ ገልጸዋል።

አንድ ዩኒቨርሲቲው ተማሪ፣ " አደጋው የተከሰተው ኤሌክትሪክ ኮንታክት አድርጎ ነው። ከዚያ 3ኛ ፎቅ ኮርኒሱ ችቡድ ስለሆነ በቀላሉ ተያያዘ። በተማሪዎች ላይ የደረሰ ጉዳት የለም። አልባሳት ግን ተቃጥለዋል። አደጋው የተከሰተው በተማሪዎች ዶርም ነው። እዛው የተቃጠለው ብሎክ 2ኛ ፎቅ ላይ ዶርም ተሰጥቶኝ የምኖር ነበርኩ፤ ብሎክ 17 ነው " ብሏል።

ዩኒቨርሲቲው ለቲክቫህ ኢትዮጵያ ምን አለ ?

" እሳቱ 3ኛ ፍሎር ላይ ነው የተነሳው። ነበልባሉ እስከታች የደረሰ ይመስላል እንጅ 1ኛና 2ኛ ፎቅ እሳቱ ገርፎታል እንጅ አልተቀጣጠለም " ሲሉ የዩኒቨርሲቲው የህዝብ ግንኘነትና ኮሚዩኒኬሽን ዳይሬክተር አቶ መሃመድ አህመድ ተናግረዋል።

የእሳት አደጋ ሰራተኞችና ተማሪዎች ባደረጉት ርብርብ እሳቱን ማጥፋት እንደተቻለ ገልጸው፣ " ሦስተኛው ፎቅ ተማሪዎች ስላልነበሩበት ዝግ ነው የነበረው። እሳት ገርፎት የተቃጠለ የሳፋሪኮም ገመድ አለ " ብለዋል።

" እሳቱ ከላይ ስለነበር የተነሳው ከታች ያሉት እቃዎች በመስኮት ጭምር አውጥተዋል፥ የደረሰ ጉዳት የለም፥ አንዳንድ ጫማም አንሶላም ረስቻለሁ የሚል ተማሪ ስላለ ነው ጉዳት ደረሰ የሚሉት " ነው ያሉት።

ቃጠሎ በተነሳበት ቦታ " ተማሪዎች ይኖሩ እንደነበር " እየገለጹ የተስተዋሉ አሉ፣ እርስዎ ደግሞ በዶርሙ ተማሪ አልነበረበትም አሉ፥ እንዴት ነው ነገሩ ? ስንል ጠይቀናቸው በሰጡን ምላሽም፣ " ሦስተኛ ፎቅ የተዘጋ ዶርም ነው፣ ተማሪ የለውም። አንደኛና ሁለተኛ ፎቅ ግን ተማሪዎች ነበሩ ግን በአደጋው ወቅት ወጥተዋል " ብለዋል።

የአደጋውን መንስኤ ስንጠይቃቸውም፣ " አደጋው እንዴት እንደተነሳ ገና አጣርተን ነው የሚታወቀው፤ መንስኤውን የሚያጣራ ኮሚቴ ተቋቁሟል፥ ለማጣራት ሁለት ቀናት ነው ተሰጠው፤ የምናሳወቅ ይሆናል " ሲሉ ተናግረዋል።

" በተለያዩ ጊዜያቶች የእሳት አደጋ ተፈጥሯል። በሰመራ ዩኒቨርሲቲ ይሄ ሁለተኛው ወይም ሶስተኛው የእሳት አደጋ ነው፤ ሰኔ እና ግንቦት ወራት ላይ ከሙቀቱ ጋር ተያይዞ ተማሪዎቹም ፋንም ስለሚጠቀሙ ገመዶች እየቀለጡ እሳቶች ይፈጠሩ ነበር " ሲሉም አስታውሰዋል።

ለተጨማሪ መረጃ ወደ ተማሪዎች ኀብረት ጽሕፈት ቤት ደውለን ስልክ ያልተነሳ ቢሆንም፣ የብሎኩ 2ኛ ፎቅ ነዋሪ ተማሪ እና የዩኒቨርሲቲው መምህር፣ ሦስተኛ ፎቅ ላይ ተማሪ አልነበረውም ሲሉ ለቲክቫህ ኢትዮጵያ ተናግረዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

" ያሰራጩት መረጃ ሀሰተኛ ነው " - ፖሊስ

የሙዚቃ ስራዎቻቸውን ለማቅረብ ወደ አዲስ አበባ የመጡት MAPARA A JAZZ የተባሉና የደቡብ አፍሪካ ዜግነት ያላቸው ሁለት ግለሰቦች" አዲስ አበባ ውስጥ አፈናና ድብደባ ተፈጽሞብናል " ብለው በፌስ ቡክ ገፃቸው ያሰራጩት መረጃ ሀሰተኛ መሆኑን ማረጋገጡን የአዲስ አበባ ፖሊስ ጠቅላይ መምሪያ አስታወቀ።

የደቡብ አፍሪካ ዜግነት ያላቸው Mapara A JAZZ የተባሉት ወደ አዲስ አበባ መጥተው ነበር። ወደዚህ የመጡትም የሙዚቃ ስራቸውን ለማቅረብ ነበር።

እነዚህ ግለሰቦች ስራቸውን ጨርሰው በሠላም ወደ ሀገራቸው ከተመለሱ በኋላ " አዲስ አበባ ውስጥ አፈናና ድብደባ ተፈፅሞብናል " ብለው በፌስ ቡክ ገፃቸው ያሰራጩትን መረጃ መሰረት በማድረግ ፖሊስ ተገቢውን የማጣራት ተግባር እንዳከናወነ ገልጿል።

" ተፈፅሞብናል " ስላሉት ወንጀል ለፖሊስ መረጃ ደርሶ እንደሆነ ለማረጋገጥ በክፍለ ከተማ ፖሊስ መምሪያ እና በፖሊስ ጣቢያዎች ተጠይቆ ምንም ዓይነት የቀረበ አቤቱታ እንዳላገኘ አሳውቋል።

በፖሊስ ምርመራ የተሰባሰቡ የተንቀሳቃሽ ምስል፣ የፎቶና የድምጽ ማስረጃዎች እንዲሁም ከአዘጋጁ ቅሩንፉድ ኢንተርቴይመንት ጭምር እንደተረጋገጠው ግለሠቦቹ ይህን የሀሠት መረጃ የለቀቁት ብዙ ተከታዮችን ለማግኘት ሆን ብለው መሆኑን እንዳረጋገጠ አመልክቷል።

ግለሰቦቹ " አፈናና ድብደባ ተፈጽሞብናል " ያሉት አርብ ጥቅምት 14 ቀን 2018 ዓ/ም ቢሆንም በማግስቱ ጥቅምት 15 በተጋበዙበት መድረክ ላይ ተገኝተው የሙዚቃ ስራቸውን ፍጹም ሠላማዊ በሆነ መንገድ አቅርበው ማጠናቀቃቸው እና በሠላም ወደመጡበት ሀገር መመለሳቸውን ከኢሚግሬሽንና ዜግነት አገልግሎት እንዲሁም ከአዘጋጆቹ መረጋገጡን አሳቋል።

ያሰራጩትም መረጃ ሀሰተኛ መሆኑን ፖሊስ ገልጿል።

#AddisAbabPolice

@tikvahethiopia

#Mynamar

የማይናማር ጦር ባለፈው ሳምንት አካሄደው በተባለ ኦፕሬሽን ከ2,000 በላይ ሰዎች ማሰሩ ተነገረ።

የማይናማር ጦር የቁማር፣ የኦንላይን ማጭባርበሪያ ፣ የገንዘብ እጥበት ( Money Laundry) ማዕከል በሆነውና በታይላንድ ድንበር አቅራቢያ በሚገኘው ኬኬ ፓርክ ባካሄደው ዘመቻ 2,198 ሰዎች እንዳሰረ ተነግሯል።

በወቅቱም የኤሌክትሪክ ኃይል ተቋርጦ እንኳን ካምፑ ውስጥ ኢንተርኔት እንዳይቋረጥ ለማድረግ ጥቅም ላይ ሲውሉ የነበሩ 30 የስታርሊንክ የኢንተርኔት ሳተላይቶች ተይዘዋል።

ምንም እንኳን ዜግነታቸው በይፋ ባይገለጽም ጦሩ ወንዶችን ፣ ሴቶችን ፣ ካምፑን የሚጠብቁ አካላትን አስሯል።

ኬኬ ፓርክ የሚገኝበት ካይን ስቴት የማይናማር ጦር ፣ በብሄር የተደራጁ ታጣቂዎች እና የተቃዋሚው ፒፕልስ ዲፌንስ ፎርስ የሚፋለሙበት ቀጠና ነው።

በሌላ በኩል፤ አሁንም ልጆቻቸው ከማይናማር ወደ ኢትዮጵያ ያልተመለሱላቸው ወላጆች ልጆቻቸው ሰሞኑን ከፍተኛ ችግር ላይ እንደወደቁ ተናግረው የኢትዮጵያ መንግሥት አፋጣኝ መፍትሄ እንዲፈልግላቸውና እንዲመልሳቸው ተማፅነዋል።

" አሁንም ልጆቻችን ማይናማር ናቸው። ከዚህ ቀደም በተሰራው ስራ ብዙ ልጆች መጥተዋል አሁንም ትኩረት ተደርጎ ከዚህ ቀጠና ልጆቻችን እንዲመለሱ ትብብር ይደረግልን " ሲሉ በቲክቫህ ኢትዮጵያ በኩል ጥሪ አቅርበዋል።

የፎቶ መግለጫ ፦ ኬኬ ፓርክ እንዲሁም የማይናማር ጦር የያዛቸው የስታርሊንክ የኢንተርኔት ማሽኖች (በካምፑ ውስጥ ኃይል ቢቋረጥ እንኳን ኢንተርኔት አይቋረጥም ነበር)

ቲክቫህ ኢትዮጵያ
#TikvahEthiopiaFamily

@tikvahethiopia

" አስከሬኑ የተገኘው አንድ ቀን አድሮ ነው። ከባሕር ዳር የተሻሉ ዋናተኞች መጥተው ነው ከከፍተኛ ድካም በኋላ ያወጡት" - እንጅባራ ዩኒቨርሲቲ

የሁለተኛ ዓመት የሳይካትሪ ተማሪ የሆነው አማኑኤል እንዳወቀ ለዋና በገባበት ወንዝ ሰጥሞ ሕይወቱ ማለፉን እንጅባራ ዩኒቨርሲቲ ለቲክቫህ ኢትዮጵያ ገልጿል።

ለጉዳዩ ማብራሪያ የጠየቅነው የዩኒቨርሲቲው የተማሪዎች ኅብረት ፕሬዝዳንት ጌታነህ ሽፈራው፣ አደጋው እሁድ 3 ሰዓት ገደማ መድረሱን ገልጿል።

" ከጓደኞቹ ጋር ከዩኒቨርሲቲው በቅርብ ርቀት የሚገኝ ቦታ ሂዶ ነው አዩ የሚባል ወንዝ ለዋና የገቡት፤ ጓደኞቹ የዚሁ የከተማ ልጆች ናቸው፤ ዋና ላይ ባሉበት ነው የሰጠመው " ብሏል።

የተማሪ አማኑኤል የቀብር ስርዓት ዛሬ ከቀኑ 9 ሰዓት ተኩል ገደማ ተወልዶ ባደገበት በእንጅባራ ከተማ መፈጸሙን ለቲክቫህ ኢትዮጵያ አረጋግጧል።

" ከሰጠመ በኋላ መረጃው ሲደርሰን፤ ዩኒቨርሲቲው እና ማኀበረሰቡ በጋራ አስከሬኑን ለማውጣት ሙከራ ቢደረግም አልተሳካም በእለቱ ሊገኝ አልቻለም " ያለው የተማሪዎች ኅብረት ፕሬዚዳንቱ ፣ " ዛሬ ባለሙያዎች ከባሕር ዳር መጥተው አስከሬኑን ማውጣት ችለዋል " ሲል ገልጿል።

" አስከሬኑ የተገኘው አንድ ቀን አድሮ ነው፤ ቀኑን ሙሉ ሊገኝ አልቻለም ነበር፤ ዋናተኞች ይገባሉ ግን ጉድጓድ አይነት ስለሆነ ይዋኙበት የነበረው ቦታ መውጣት አልችል ሲል ከባሕር ዳር የተሻሉ ዋናተኞች መጥተው ከከፍተኛ ድካም በኋላ ነው ያወጡት " ብሏል።

" ሌሎች ልጆችም የመሞት አደጋ ይደርስባቸው ነበር፤ በቶሎ ሀኪም ቤት ተወስደው ነው ያሉት አብረው ሲዋኙ የነበሩት " ብሎ፣ " አስቸጋሪ ነው ቦታው ራሱ፣ ለመዋኘት የገቡበት ቦታ ራሱ ጥሩ አልነበረም " ሲል ገልጿል።

" እሱንም ለማውጣት እየሞከሩ ስለነበረ ውሃ ወደ ውስጣቸው የመግባት ነገር ስለሚኖር ወደ ሀኪም ቤት ሂደው እንደነበር መረጃው አለኝ " ሲል ለቲክቫህ ኢትዮጵያ ተናግሯል።

" ተማሪዎች በማያውቁት ቦታ ሲኖሩ በእንዲህ አይነት ወንዝ ውስጥ ከመግባት ቢታቀቡ፣ ራቅ ያለ ቦታ ሲሄዱ የመታገት ሁኔታም ሊያጋጥም ስለሚችል በተቻለ አቅም በግቢው ውስጥ ቢዝናኑ መልካም ነው " ሲል መክረዋል።

እንጅባራ ዩኒቨርሲቲ ተማሪው፣ በአዮ ወንዝ ለመዋኘት በሄደበት በደረሰበት የመስጠም አደጋ ህይወቱ ማለፉን በማኀበራዊ ትስስር ገጹ በመግለጽ፣ ለቤተሰብ መጽናናትን ተመኝቷል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia