#DV

የ2027 የአሜሪካ ዳይቨርሲቲ ቪዛ ሎተሪ (ዲቪ) ማመልከቻ ቀን በዚህ ወር ይፋ ይደረጋል ተብሎ ይጠበቃል።

ዘንድሮ የአሜሪካ የውጭ ጉዳይ መሥሪያ ቤት ለዳይቨርሲቲ ቪዛ (ዲቪ) ሎተሪ ምዝገባ 1 ዶላር የአገልግሎት ክፍያ ማስከፈል ይጀምራል።

ይኸው ክፍያ ተመርጦ ወይም ዲቪ ሲደርስ ከሚከፈለው 330 ዶላር ውጪ ነው። አመልካቾች ማሸነፋቸው ሲረጋገጥ ለቪዛ አገልግሎት 330 ዶላር ይከፍላሉ።

በዚህ ወር የምዝገባው ቀን ይፋ የሚደረገው የ2027 ዲቪ ሎተሪ እንደከዚህ ቀደሙ አሰራር ከሆነ እስከ ህዳር ወር ድረስ ይቆያል (ማመለከቻ ጊዜው) ፤ ውጤቱ ደግሞ በግንቦት ወር 2026 ይታወቃል።

በየዓመቱ እንደሚደረገው 55,000 አሸናፊዎች ከመላው ዓለም ይታወቃሉ።

ለዲቪ በሚሊዮኖች የሚቆጠሩ ሰዎች ስለሚያመለክቱ አሜሪካ ዘንድሮ በምትጀምረው የ1 ዶላር ክፍያ ለስራ ማስኬጃዎች የሚሆናትን በሚሊዮኖች ዶላር ታገኛለች ተብሎ ይጠበቃል።

በየዓመቱ ለአሜሪካ ዲቪ ከዓለም የተለያዩ ሀገራት በሚሊዮኖች የሚቆጠሩ ሰዎች የሚያመለክቱ ሲሆን ለአብነት ለ2025ቱ ዲቪ ወደ 19,927,656 ሰዎች አመልክተዋል። ከነዚህም 131,060 ሰዎች ለቀጣይ ሂደት ተምርጠው ከነሱ ውስጥ 55,000 ሰዎች ቪዛው ተሳክቶላቸዋል።

#TikvahEthiopiaFamilyAA

@tikvahethiopia

" ያነሱትን የደመወዝ ጭማሪ ፣ የጥቅማ ጥቅምና የመሬት ጥያቄ ለመመለስ የሚያስችል መመሪያ ለማውጣት ተዘጋጅተናል " - የክልሉ ካቢኔ

ዛሬ የትግራይ ኃይል አባላት ለሶስተኛ ቀን በአራት አቅጣጫ መንገዶችን ዘግተው ነበር።

ሁለቱ መንገዶች ከምስራቃዊና ደቡባዊ ዞኖች ወደ መቐለ ከተማ የሚወስዱ ሆነው ከከተማዋ በ35 እና በ100 ኪሎ ሜትር ርቀት በኣጉላዕና በመኾኒ የተዘጉ ነበሩ።

ሶስተኛው ከእንዳባጉና ወደ እንዳስላሰ-ሽረ ከተማ የሚያስገባ ሲሆን አራተኛው ደግሞ ከዓድዋ ወደ ዓዲግራት በሚወስደው መንገድ ' ሴሮ ' የተባለው አከባቢ ነበር።

ለግል የስራ ጉዳይ ከመቐለ በተምቤን በኩል ወደ አክሱም የተጓዘው የቲክቫህ ኢትዮጵያ የመቐለ ቤተሰብ አባል በዓድዋ በኩል ወደ ዓዲግራት ከተማ ሲጓዝ ' ሴሮ ' በሚባል አከባቢ መንገድ ከተዘጋባቸው ተጓዦች አንዱ ነው።

እንደ አባላችን የአይን ምልከታ መንገዱ ከጥዋቱ 2:30 ተዘግቶ ከሰዓት በኃላ 9:40 ነው የተከፈተው።

የአከባቢው አስተዳዳሪዎች መንገዱን የዘጉትን የትግራይ ኃይል አባላት ለማነጋገር ጥረት ቢያደርጉም " ከክልሉ ፕሬዜዳንት ለተላከ አመራር ካልሆነ ለሚድያም ይሁን ለአከባቢው አስተዳዳሪዎች ቃላችን ለመስጠት ፍቃደኛ አይደለንም " በማለት ከልክለዋል።

በዚሁ ቃላቸው ፀንተው በግራና በቀኝ የተጓዙ መኪኖች በማቆም በርካታ ተጓዦች ለእንግልት ተደርገው ቆይተዋል።

ከቀኑ 9:40 መንገዱ እንዲከፈት ተደርጓል።

መንገዱ የተከፈተው በስልክ ተነጋግረው ካልሆነ በስተቀር ወደ ቦታው በአካል የመጣ የክልሉ ከፍተኛ አመራር እንደሌለ የቲክቫህ ኢትዮጵያ የመቐለ ቤተሰብ አባል አረጋግጧል።

ወደ መቐለና ወደ እንዳስላሰ-ሽረ ከተማ የሚያመሩ ሶስት መንገዶች ከሰዓት በፊት ሲከፈቱ ፤ አባላችን የነበረበት አቅጣጫ ከሰዓት በኃላ ነው የተከፈተው።

የክልሉ ካቢኔ በመንግስት የኮሚኒኬሽን ቢሮ በኩል ጥቅምት 5 ቀን 2018 ዓ.ም ባወጣው መግለጫ ፤ " የሰራዊቱ አባላት ያነሱት የደመወዝ ጭማሪ ፣ የጥቅማ ጥቅምና የመሬት ጥያቄ ለመመለስ የሚያስችል መመሪያ ለማውጣት ተዘጋጅተናል " ሲል አስታውቋል።

ቲክቫህ ኢትዮጵያ
መቐለ
#TikvahEthiopiaFamilyMekelle

@tikvahethiopia

#Kenya

‎የኬንያ የቀድሞ ጠቅላይ ሚንስትር ራይላ ኦሞሎ ኦዲንጋ ሞት ተከትሎ በናይሮቢ ከተማ ዉጥረት ነግሶ ውሏል።

የቲክቫህ ኢትዮጵያ - ናይሮቢ
‎
‎በሕንድ ሀገር በሕክም ላይ እያሉ ሕይወታቸው ያለፈዉን የቀድሞ የኬንያ ጠቅላይ ሚንስትር ራይላ ኦሞሎ ኦዲንጋ ተከትሎ በኬንያ ከተሞች የተለያዩ ሰልፎችና መሰል እንቅስቃሴዎች የተስተዋሉ መሆኑን ናይሮቢ የሚገኘው የቲክቫህ ኢትዮጵያ አባል ገልጿል።

በዋና ከተማዋ ናይሮቢ ሱቁችን የመሰባበርና በአሁኑ ወቅት ሀገሪቱን እየመሩ የሚገኙት ፕሬዚዳንት ዊሊያም ሩቶ ስልጣን እንዲለቁ የሚጠይቁ መፎክሮችን ያነገቡ ሰልፈኞች በብዛት መስተዋላቸውን በስፍራው የሚገኘው አባላችን አመልክቷል።
‎
‎በናይሮቢ ከተማ እሲሊ፣ ካሜይኮ አከባቢዎች እነዚህ እንቅስቃሴዎች የተደረጉ ሲሆን በአብዛኛው የሀገሪቱ ክፍሎች ሀዘናቸውን የሚገልፁ ዜጎች የተለያዩ ቅጠሎችንና የስራ መሳሪያዎችን ይዘዉ በየመንገዱ ታይተዋል።
‎
‎ከዚህም በተጨማሪ በሀገሬዉ ሕዝብ በእጅጉ የሚወደዱትና በወቅቱ የኬንያ ፕሬዝዳንት ዊሊያም ሩቶ 'የነፃነት ታጋይ፣ የሀገር ወዳድነት ተምሳሌትና የዴሞክራሲ አባት' ተብለዉ የተገለፁት ጉምቱዉ ፖለቲከኛ ራይላ ኦሞሎ ኦዲንጋ በተወለዱበት የኬንያ ሶስተኛዋ ትልቅ ከተማ ኪሱሙ፣ ናይኩሩና ቦባሳ አከባቢዎችም ሰልፍ መሰል እንቅስቃሴ ጎልቶ ተስተዉሏል።
‎
‎የራይላ ኦዲንጋ አስክሬን ወደ ሀገራቸው ገብቶ እሁድ በተወለዱበት አከባቢ ኪሱሙ ሲያያ ካዉንቲ ቦንዶ በባለ ስፍራ ግብአት መሬታቸው እንደሚከናወን ተሰምቷል።

የራይላ ኦዲንጋን ሞት ተከትሎ የፕሬዚዳንት ዊሊያም ሩቶ አስተዳደር የ7 ቀን ሀዘን አውጇል።

ቲክቫህ ኢትዮጵያ
ናይሮቢ
#TikvahEthiopiaFamily

@tikvahethiopia

#Tigray

የትግራይ ኃይል አባላት ሰልፈኞች ለአራተኛ ቀን ዛሬ የመኪና መንገድ ዘግተዋል።

ዛሬ ጥቅምት 6/2018 ዓ.ም የትግራይ ምስራቃዊ ዞን ዋና ከተማ ወደ ሆነችው የዓዲግራት ከተማ የሚያስገቡና የሚያስወጡ ሶስት ዋና መንገዶች ተዘግተዋል።

ትናንት ጥቅምት 5/2018 ዓ.ም ከዓድዋ ወደ ዓዲግራት ሲጓዝ ሴሮ በተባለ ቦታ መንገድ ተዘግቶበት ከሰዓት በኃላ ተከፎቶ ወደ ከተማዋ የተጓዘው የቲክቫህ ኢትዮጵያ የመቐለ ቤተሰብ አባል እንዳረጋገጠው ፤ ከዓዲግራት ወደ መቐለ ዓድዋና ዛላአንበሳ አቅጣጫ የሚያመሩ መንገዶች ተዘግተዋል።

ከጥቅምት 3/2018 ዓ.ም ወዲህ ከክልሉ ምስራቃዊ ፣ ደቡባዊ ዞኖች ወደ መቐለ የሚወስዱ መንገዶች በኣጉላዕና ፣ በመኾኒ ወደ እንዳስላሰ-ሽረ ከተማ የሚወስድ መንገድ በእንዳባጉና ከዓድዋ ወደ ዓዲግራት የሚወስድ በሴሮ ተዘግተው በዚያው ቀን በተለያዩ ሰዓቶች መከፈታቸው ይታወሳል።

የክልሉ ካቢኔ በመንግስት የኮሙኒኬሽን ቢሮ በኩል ጥቅምት 5/2018 ዓ.ም ባወጣው መግለጫ፤ የሰራዊቱ አባላት ያነሱት የደመወዝ ጭማሪ  የጥቅማ ጥቅምና የመሬት ጥያቄ ለመመለስ የሚያስችል መመሪያ ማውጣቱን ትላንት አሳውቆ ነበር።

ያም ቢሆን ግን ዛሬም መንገዶች ተዘግተዋል።

ቲክቫህ ኢትዮጵያ
#TikvahEthiopiaFamilyAA

@tikvahethiopia

" የወላዷን ስቃይ ሳይ ግን አልቻልኩም፣ በጣም ደከመኝ እንባዋን ሳይ እኔም ባለሁበት ቁጭ ብየ አለቀስኩ ፤ የእኔ ማልቀስ ግን ህፃኑን ማትረፍ አልቻለም፣ በዚህም በጣም አዝኛለሁ " - የአምቡላንስ ሹፌር

በጎፋ ዞን መሎ ጋዳ አካባቢ አንድ የአምቡላንስ ሹፌር አንዲት ወላድ እናትን ወደ ሆስፒታል ይዞ ሲጓዝ አምቡላንሷ በጭቃ ተውጣ  እና ሹፌሩ መኪናዋን ለማውጣት የቻለውን በሙሉ አድርጎ ሲያቅተው በጭቃው ላይ ቁጭ ብሎ ሲያለቅስ የሚያሳይ ምስል በተለያዩ የማህበራዊ ገጾች ላይ ተዘዋውሮ ነበር።

ቲክቫህ ኢትዮጵያም ይህንን የአምቡላንስ ሹፌር በስልክ አግኝቶ ስለተፈጠረው ነገር አነጋግሯል።

ይህ ሹፌር ሀብታሙ ደርጉ ደረሰ ይባላል።

ሹፌር ሀብታሙ ደርጉ ደረሰ ለቲክቫህ ኢትዮጵያ ምን አለ ?

" ችግሩ የተፈጠረው ከመሎ ጋዳ ወረዳ አንዲት ወላድ እናት በወሊድ ምክንያት ሪፈር ተጽፎላት ወደ ጎፋ ዞን ሆስፒታል ይዤ እየሄድኩ እያለ ልዩ ስሙ ጃውላ መንገድ ተብሎ በሚጠራው ቦታ ላይ ጥቅምት 2/2018 ዓ.ም ከሌሊቱ 8 ስአት ላይ ነው።

ከወላዷ ጋር የነበሩ ሰዎች ከእኔ ጋር በመሆን መኪናዋን ከጭቃው ለማውጣት እየታገልን እያለ ወላዷ በዚሁ ቦታ ላይ ወለደች፣ የሚያሳዝነው ግን የተወለደው ህጻን ሞቷል።

በመቀጠልም ስለተፈጠረው ነገር ለሃላፊዬ ደወልኩና ነገርኩት፣ እናትየዋ የደም ካንሰር ስላለባት በህይወት ለመቆየት ወደ ሆስፒታል መድረስ አለባት አልኩት። ከዛም ከቡልቄ ወረዳ ሌላ አምብላንስ መጥቶ እናትየዋን እንድወስዳት ተደረገ።

ይህ ነገር ከመሆኑ በፊት ግን እናትየዋን እና ህፃኑን በህይወት ለማዳን የግድ አምብላንሷን ከጭቃው ማላቀቅ ስለነበረብኝ ብዙ ስቆፍር ነበር። ነገር ግን አልሆነም፣ እኔም በዚያ ብርድ ላይ ስቆፍር አድሬ ሰኞ እለት ጠዋት 2:30 አካባቢ ላይ ወደ ጋዳ ተመልስኩ።

በሰአቱ የተሰማኝ ስሜት ከባድ ነው፣ ቆፍሬ፣ ቆፍሬ ሲደክመኝ በአካባቢው ያሉ ሰዎች እንዲረዱን አምቡላንሷን ሳስጮሀት ነበር። ግን መጀመሪያ ላይ ማንም አልመጣልንም። አብረውኝ  የህክምና ባለሙያን ጨምሮ የወላዷ ባለቤት እና አማቿ ነበሩ።

በሰአቱ የወላዷን ስቃይ ሳይ አልቻልኩም፣ በጣም ደከመኝ፣ እንባዋን ሳይ እኔም ባለሁበት ቁጭ ብየ አለቀስኩ ፤ የእኔ ማልቀስ ግን ህፃኑን ማትረፍ አልቻለም፣ በዚህም በጣም አዝኛለሁ።

በህይወት የሌለ ልጅ የወለደችው እናት በስአቱ በጣም ደክሟት ነበር፣ ምክንያቱም የደም ካንሰር አለባት። ሌለኛው አምቡላንስ ወደ ሆስፒታል ወስዶ ካደረሳት በሗላ ወደ ጥቁር አንበሳ ሪፈራል ሆስፒታል ሪፈር ተጽፎላታል፣ ነገር ግን ለህክምናው የተጠየቀችው ገንዘብ ወደ 800 ሺህ ብር ስለሆነ ገና እርዳታ እያሰባሰብን ነው።

በአምቡላንስ ሹፍርና እያገለገልኩ ሁለት አመት ቆይቻለሁ፣ ብዙ ጊዜም ተመሳሳይ ችግር ይገጥመኛል፣ ሁለት እና ሶስት ቀን መንገድ ላይ የማድርባቸው አጋጣሚዎችም ነበሩ። በተደጋጋሚ የእናቶችን ከፍተኛ የሆነ ሲቃይ አይቻለሁ። በዚህኛው ግን በጣም ተስፋ ቆርጨ ከዚህ በሗላ መኪና ላለማሽከርከር አስቤ ነበር። በፌስቡክ የእኔን ምስል ብዙዎች ሲቀባበሉት ስመለከት እና ብዙዎች ለእናቶች ያላቸውን ፍቅር ሲገልፁ ሳይ ግን በጣም ደስ ብሎኛል።

ሁሌም በመንገድ ጉዳይ እንደተሰቃየን ነው፣ ችግሩ ጫፍ የወጣ ነው። የእናቶችን እና የህፃናቶችን ሞት ለማቆም ሁሉም ሰው ለመሎ ጋዳ መንገድ ትኩረት ሊሰጥ ይገባል " ሲል ተናግሯል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia