" በስልጠና ማጠናቀቂያ ወቅት ያገኙት ሰርተፍኬት በዩኒቨርሲቲው ለመማር በሚወዳደሩበት ወቅት 10 በመቶ ውጤት እንዲኖረው እናደርጋለን "- የአዲስ አበባ ሳይንስ እና ቴክኖሎጂ ዩኒቨርሲቲ

የኢንፎርሜሽን መረብ ደህንነት አስተዳደር (ኢመደአ) ከአዲስ አበባ ሳይንስና ቴክኖሎጂ ዩኒቨርሲቲ ጋር በመተባበር በ2017 ዓ/ም የክረምት መርሃ ግብር በሳይበር ደህንነትና ተያያዥ ዘርፎች ያሰለጠናቸውን 629 ታዳጊ ወጣቶችን በዛሬው ዕለት አስመረቋል።

ታዳጊዎቹ በክረምት መርሃ ግብር የሰለጠኑት ፦
- በሳይበር ደህንነት፣
- በቴክኖሎጂ ልማት፣
- በኢምቤድድ ሲስተም፣ እና በኤሮስፔስ ዘርፎች ነው።

ላለፉት ሦስት አመታት አዲስ አበባ ላይ ብቻ ሲካሄድ የቆየው የስልጠና መርሃ ግብር፤ በ2017 ዓ/ም ከባሕር ዳር ዩኒቨርሲቲ ጋር በመተባበር ለመጀመሪያ ጊዜ 76 ልጆች ሰልጥነው መመረቅ መቻላቸው ተገልጿል።

ስልጠናውን የተከታተሉት ታዳጊዎች ከኢለመንተሪ፣ ሃይስኩል እና ዩኒቨርሲቲ የተወጣጡ ናቸው ።

ታዳጊዎቹ ስልጠናቸውን ከኢንሳ በተጨማሪ  በአዲስ አበባ ሳይንስ እና ቴክኖሎጂ ዩኒቨርሲቲ (AASTU) ሲከታተሉ የቆዩ ሲሆን በማጠናቀቂያው ወቅት የተሰጣቸው ሰርተፍኬት በዩኒቨርሲቲው ትምህርት ለመከታተል በሚወዳደሩበት ወቅት የመቁረጫው ነጥብ ዝቅ እንደሚያደረግላቸው የዩኒቨርሲቲው ፕሬዝዳንት ዶክተር ደረጀ እንግዳ ለቲክቫህ ኢትዮጵያ ተናግረዋል።

የአዲስ አበባ ሳይንስ እና ቴክኖሎጂ ዩኒቨርሲቲ ፕሬዝዳንት ዶክተር ደረጀ እንግዳ በዝርዝር ምን አሉ ?

" ግቢ ውስጥ በቆዩበት ጊዜ በተለያዩ ዘርፎች ስልጠናቸውን ሲከታተሉ ቆይተዋል ስልጠናውን ኮርስ በመስጠት ብቻ ሳይሆን ችግሮቻችንን በመንገር ችግሮችን መፍታት ከመቻላቸውም በላይ ፕሮዳክቶችን ይዘው መጥተዋል።

የራሳቸው የሆነ የተለያዩ ችግሮችን መፍታት እና መሸጥ የሚችሉ ፕሮዳክቶችን ይዘው ወጥተዋል።

እኛ ፈተና ፈትነን ተማሪዎችን የምንቀበል መሆኑ ይታወቃል ፈተና ፈትነን ስንቀበል የ 12 ውጤት እና የመግቢያ ፈተና ውጤት ነው የምናየው።

በእዚህ ስልጠና ከመላው የኢትዮጵያ አካባቢዎች መጥተው በግቢያችን ስልጠና ሲከታተሉ የቆዩ ተማሪዎች የወሰዱት ሰርተፍኬት በግቢያችን ለመማር በሚያመለክቱበት ወቅት ቫልዩ ይኖረዋል።

ከእዚህ ቀደም ስናወዳድር 50 በመቶ 12 ክፍል ውጤት 50 በመቶ የዩኒቨርሲቲ መግቢያ ፈተና ውጤት እንመለከት ነበር አሁን 10 በመቶ በስልጠና ማጠናቀቂያው ወቅት ያገኙትን ሰርተፍኬት እንዲይዝ  እናደርጋለን።

አንድ ላይ ተደምሮ ከመቶ ሲያዝ የመቁረጫ ነጥብ ላይ ባመጡት ቁጥር ዝቅ ያደረግላቸዋል ፣ ልዩ ኮታ ይሰጣቸዋል ማለት ነው ።

ይህንን እድል አምናም ሰጥተናል ዘንድሮ ከገቡ መካከልም ይህንን እድል ያገኙ አሉ በሚቀጥለው አመትም ይህ ይቀጥላል።

ሁለተኛ እዚህ ስልጠናቸውን የተከታተሉ ተማሪዎች የተለያዩ ፕሮዳክቶችን አውጥተዋል እኛ ዩኒቨርሲቲ ውስጥ የኢንዱስትሪያል ኢኖቬሽን እና ኢንኩቤሽን ሃብ ሰርተናል ይህ ሃብ ወደ 189 ስታርታፖችን መቀበል ይችላል።

እነዚህ ስታርታፖች ከተለያዩ ቦታ እና ዩንቨርሲቲዎች የተወጣጡ ሊሆኑ ይችላሉ ነገር ግን ሜድ ኢን ኢትዮጵያ ምርቶች ያላቸው እና መሸጫ ቦታ ያጡ ሰዎችን የምናሰባስብበት ቦታ ነው።

ይህንን ስፔስ (ቦታ) ስልጠናውን ለተከታተሉ ሰዎች ለሰሯቸው ምርቶች (ፕሮዳክቶች) እናቀርባለን።

የምናቀርበው በሁለት አይነት መንገድ ነው አቅሙ ኖሯቸው በራሳችን እንቀጥል ካሉ የተወሰነ ኪራይ እናስከፍላለን ፣ምንም አቅም የለንም የሚሉ ካሉ ከተለያዩ ባለሃብቶች እና ከዩኒቨርሲቲውም አንድ ላይ አድርገን ድጋፍ በማድረግ ምርታቸው ወደ ገበያ እንዲወጣ እና ስራ ፈጣሪ እንዲሆን ድጋፍ እናደርጋለን " ብለዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

የስንዴ ምርት አቀነባባሪ አምራቾች ለረጅም ጊዜ ሲያቀርቡት የነበረው ቅሬታ መፈታቱ ተገለጸ።

ለብዙ ጊዜ በገቢዎች ሚኒስቴር እና በስንዴ አቀነባባሪዎች አጨቃጫቂ የነበረው የታክስ ጉዳይ መፍትሄ አግኝቷል።

የገቢዎች ሚኒስቴር ጥቅምት 4 ቀን 2018 ባሰራጨው ሰርኩላር የስንዴ ምርት አቀነባባሪ አምራቾች ለስንዴ ግዢ የሚፈጸም ክፍያ ላይ የነበራቸው ተደጋጋሚ ቅሬታ ላይ የገንዘብ ሚኒስቴር ውሳኔ መሰጠቱን ገልጿል።

ከገንዘብ ሚኒስቴር በዶ/ር እዮብ ተካልኝ (የቀድሞ ሚኒስትር ዴኤታ) የተፈረመውና ለገቢዎች ሚኒስቴር የተላከው ደብዳቤ ጉዳዩ ለብዙ ጊዜ ለአምራቹ ኢንዱስትሪ እና ለሻጭ ጫና እየፈጠረ መሆኑንን በመጥቀስ ብዙ ጥያቄዎች ይቀርቡበት እንደነበር አንስቷል።

በገንዘብ ሚኒስቴር የተጻፈው ደብዳቤ ምን ውሳኔዎችን አሳለፈ ?

- ደብዳቤው፥ ለስንዴ ግዥ የሚፈፀም ክፍያ ላይ የቅድመ ግብር ክፍያ ሥርዓት (Witholding tax) ተፈጻሚ እንዳይሆን መወሰኑን ይገልጻል።

- የታክስ ውሳኔ ማስታወቂያ ደርሷቸው፤ በታክስ ውሳኔ ቅሬታ አጣሪ ጽ/ቤት በሂደት ላይ ያሉ እና በቀጣይ የታክሱን ትክክለኛነት ለማጣራት በሚደረጉ የኦዲት ሥራዎችም ላይ ውሳኔው ተፈጻሚ እንዲሆን ያዛል።

- የግብይት ሥርዓቱ ወደ ዘመናዊነት ተቀይሮ ትክክለኛ የግዥ ደረሰኝ ማግኘት እስኪቻል ድረስ የስንዴ ግዢ በግዥ ማረጋገጫ (Purchase vouchern የተፈጸመ ግብይት ከሆነ የገንዘብ መጠን ሳይገድበው የተፈጸመው ክፍያ ለስንዴ ሻጩ በባንክ የተላለፈ መሆኑ፣ የስንዴ ዱቄቱ በስታንዳርዱ መሠረት ስለመመረቱ እየተረጋገጠ ገቢውን ለማመንጨት የወጣው ወጪ ተቀባይነት እንዲኖረው የሚያስችል ሥርዓት በታክስ ባለስልጣኑ በኩል እንዲዘረጋ መወሰኑን ይጠቅሳል።

ቲክቫህ ኢትዮጵያ የደብዳቤውን ትክክለኛነት ከገቢዎች ሚኒስቴር ማረጋገጥ ችሏል።

ቲክቫህ ኢትዮጵያ
አዲስ አበባ

@tikvahethiopia

#Earthquake

በሬክተር ስኬል 4.9 የተለካ መሬት መንቀጥቀጥ ከደብረሲና 30 ኪሎ ሜትር ርቀት ላይ መከሰቱን የአሜሪካ ጂኦሎጂካል ሰርቬይ ገልጿል።

የመሬት መንቀጥቀጡ ንዝረት በአፋር ከተሞች ፣ በአዳማ ፣ ደብረ ብርሃንን ጨምሮ በርካታ ከተሞች ድረስ ዘልቆ ተሰምቷል።

በአዲስ አበባ ከተማ የተለያዩ አካባቢዎች ንዝረቱ የተሰማ ሲሆን በተለይም በህንጻዎች ላይ የሚኖሩ ነዋሪዎች ንዝረቱ አይሎ እንደተሰማቸው ለቲክቫህ ኢትዮጵያ ተናግረዋል።

ከሰሚህ፣ አያት ፣ ጋርመንት ፣ ገርጂ፣ ጎፋ ፣ ለቡ ፣ የካ አባዶ፣ መሪ፣ መካኒሳ ፣ጀሞ፣ ቡልቡላ ፣ ቦሌ አራብሳ፣ ጣፎ፣ ፊጋ ፣ ሚኪላንድ.. እንዲሁም ከሌሎች የከተማዋ አካባቢዎች ቃላቸውን የላኩ የቤተሰባችን አባላት ፥ የመሬት መንቀጥቀጥ ንዝረቱ እጅግ ጠንክሮ እንደተሰማቸው ገልጸዋል።

ንዝረቱ እቃ ጭምር ያንቀሳቀሰ እንደነበር አመልክተዋል።

ቲክቫህ ኢትዮጵያ

@tikvahethiopia

" ያረጀ ቫልቩ ጥገና ባይከናወን የግድቡን ህልውና አደጋ ውስጥ ይከተው ነበር " - የውሃ እና ፍሳሽ ባለሥልጣን

የአዲስ አበባ ከተማ ውሃ እና ፍሳሽ ባለሥልጣን የለገዳዲ ግድብ የውሃ ማስተላለፊያ ማማ የቫልቭ ቅየራ ስራ ከጥቅምት 2 ቀን 2018 ዓ/ም እስከ ጥቅምት 16 ቀን 2018 ዓም ድረስ እንደሚከናወን ማሳወቁ ይታወቃል።

የቫልቭ ቅየራ ስራው እስከሚጠናቀቅም በለሚ ኩራ ክፍለ ከተማ፣ በቦሌ ክፍለ ከተማ እና በቂርቆስ ክፍለ ከተማ አንዳንድ ወረዳዎች የውሃ አቅርቦት ተቋርጦ ቆይቷል።

ባለሥልጣኑ የቫልቭ ቅየራ ስራው መጠናቀቁን እና የለገዳዲ ግድብ በሙሉ አቅሙ ምርት መጀመሩን በማህበራዊ ትስስር ገጹ አሳውቋል።

ስራው ሲያከናወን የቆየው ዊ ቢውልድ /ሳሊኒ/ ሲሆን የኢትዮጵያ ኢንጅነሪንግ ኮርፖሬሽን በማማከር አገልግሎት ተሳትፏል ተብሏል።

የባለስልጣኑ ዋና ስራ አስኪያጅ ኢ/ር ዘሪሁን አባተ " ያረጀ ቫልቩ ጥገና ባይከናወን የግድቡን ህልውና አደጋ ውስጥ ይከተው ነበር " ያሉ ሲሆን በአጭር ጊዜ የጥገና ስራውን ላጠናቀቁ ተቋማት ምስጋና ስለማቅረባቸው ባለሥልጣኑ አሳውቋል።

ቲክቫህ ኢትዮጵያ
አዲስ አበባ

@tikvahethiopia