#MinistryofRevenue

" የግብር ክሊራንስ " የምስክር ወረቀት የብድር መከልከያ ምክንያት መሆን የለበትም ሲል የገቢዎች ሚኒስትር ማሳሰቢያ ሰጠ።

የገቢዎች ሚኒስቴር ባንኮች የግብር ክሊራንስ የምስክር ወረቀት ይዘው ለብድር ለሚቀርቡ ደንበኞች የተለመደውን የብድር አገልግሎት እንዳይከለክሉ ማሳሰቢያ መስጠቱ ተመላክቷል።

ሚኒስቴሩ በቅርቡ በሚሰጠው የምስክር ወረቀት ላይ የተቀመጠው የታክስ ቅድሚያ መብት ድንጋጌ የብድር አሰጣጥ ሂደቱን የሚቀይር አዲስ መብት አለመሆኑን በማስታወቅ፣ ባንኮች የምስክር ወረቀቱን ተቀባይነት እንደሌለው ሊያስቡ እንደማይገባ አስታውቋል።

የገቢዎች ሚኒስትር ለብሔራዊ ባንክ እና ለሁሉም ባንኮች በሚል በፃፈዉ ደብዳቤ ላይ እንደተመላከተዉ ግብር ክሊራንስ የምስክር ወረቀት የሚሰጠው ግብር ከፋዩ በሕጉ መሠረት የተጣለበትን ታክስ የመክፈል ግዴታ ሲወጣ መሆኑን ገልጿል።

በተጨማሪም፣ ለታክስ ባለስልጣኑ በቅድሚያ መከፈል እንዳለባቸውና በየትኛውም ህግ ወይም ፍርድ ቤት ትዕዛዝ ቅድሚያ የሚሰጣቸው ክፍያዎች መሆናቸው በግልጽ ተቀምጧል።

ሚኒስቴሩ እየተሰጠ ባለው የታክስ ክሊራንስ የምስክር ወረቀት ላይ የሰፈረው የቅድሚያ መብት ድንጋጌ፣ ከላይ የተጠቀሰውን የታክስ አስተዳደር አዋጅ ድንጋጌ ለማካተት እንጂ፣ ለባለስልጣኑ ሌላ አዲስ ልዩ መብት ለመስጠት እንዳልሆነ አብራርቷል።

ይህ መረጃ ባለቤትነቱ የካፒታል ጋዜጣ ነው።

@tikvahethiopia

“የ9 ጤና ባለሙያዎች ሕይወት አልፏል። 7ቱ ከአርሲ፣ ሁለቱ ከባሌ ናቸው” - የኦሮሚያ ክልል ጤና ቢሮ

➡️ “የተጎዱት ወደ 8 ይደርሳሉ፤ ከፍተኛ ጉዳት የደረሰባቸው አራት ናቸው። በአጠቃላይ 28 ባለሙያዎች ተሳፍረው ነበር” - ዞን ጤና ቢሮ

ከኦሮሚያ ክልል አርሲ ዞን ተውጣጥተው ለትምህርት ወደ ሐረማያ ዩኒቨርስቲ ሲጓዙ በነበሩ ጤና ባለሙያዎች በመኪና አደጋ ሞትና የአካል ጉዳት መድረሱን የክልሉና የዞኑ ጤና ቢሮ ባለስልጣናት ለቲክቫህ ኢትዮጵያ ገልጸዋል።

የኦሮሚያ ክልል ጤና ቢሮ ምክትል ኃላፊ ዶ/ር ተስፋዬ ከበበው ፣ “የመኪና አደጋ ነው የደረሰው፤ የዘጠኝ ጤና ባለሙያዎች ሕይወት አልፏል። 7ቱ ከአርሲ፣ ሁለቱ ከባሌ ናቸው” ሲሉ ሰማሁት ያሉትን መረጃ ነግረውናል።

አደጋው የደረሰው ጤና ባለሙያዎቹ ለፈተና ወደ ሐረማያ ዩኒቨርሲቲ እየተጓዙ በነበረበት ወቅት መሆኑንም አስረድተዋል።

ተጨማሪ ማብራሪያ የጠየቅናቸው የአርሲ ዞን ጤና ቢሮ ኃላፊ አቶ ሱልጣን ሐምዲኖ፣ ጤና ባለሙያዎቹ ለትምህርት (ከዲፕሎማ ወደ ዲግሪ ለኢንትራንስ ፈተና) ወደ ሐረማያ ዩኒቨርሲቲ በኮንትራት መኪና እየሄዱ እንደነበር፤ ብዙዎቹ ከአርሲ እንደሆኑና ወለንጪቲ አካባቢ ሲደርሱ አደጋው እንዳጋጣማቸው አስረድተዋል።

ቲክቫህ ኢትዮጵያ፣ ሞትና የጉዳት መጠን የደረሰባቸው ስንት ናቸው? ብሎ ሲጠይቃቸውም፣ “የሞቱት 7 ናቸው፤ ሦስት ወንድና አራት ሴት። የተጎዱት ወደ ስምንት ይደርሳሉ፤ ከፍተኛ ጉዳት የደረሰባቸው አራት ናቸው” ብለዋል።

በመኪናው በአጠቃላይ 28 ሰዎች ተሳፍረው እንደነበር፣ ሁሉም ከተለያዩ ወረዳዎች የተውጣጡ ጤና ባለሙያዎች እንደነበሩ ገልጸው፣ “ሁሉም የጤና ጣቢያ ሠራተኞች ናቸው” ነው ያሉት።

ከተሳፋሪውቹ መካከል፣ “በ4ቱ ላይ ከባድ ጉዳት ደርሷል፤ አራቱ ታክመው ወጥተዋል” ያሉት ኃላፊው፣ አሰላና አዳማ ሆስፒታሎች ህክምና እየተከታሀሉ ያሉ ጤና ባለሙያዎች መኖራቸውንም ጠቁመዋል። 

አደጋው የደረሰው ከአዳማ ወደ ዩኒቨርሲቲው ሲጓዙ ወለንጪቲ እንደደረሱ ትላንት ጥቅምት 12 ቀን 2018 ዓ/ም ከጠዋቱ 12 ሰዓት ገደማ መሆኑንም ገልጸዋል።

አደጋው የተከሰተው፣ ከሀረርጌ ወደ አዳማ በርበሬ ጭኖ ሲጓዝ የነበረ አይሱዚና ባለሙያዎቹን የጫነው ተሽከርካሪ ተጋጭተው መሆኑም አቶ ሱልጣን ለቲክቫህ ኢትዮጵያ ተናግረዋል።

በጉዳቱ ጥልቅ ሀዘን እንደተሰማቸው አስረድተው፣ “የመኪና አደጋ በጣም እየበዛ ነው፤ ትራንስፓርትና ሎጂስቲክስ ቢሮዎች በደንብ መስራት አለባቸው። በየቀኑ የሰው ሕይወት እየጠፋ ነው፤ ንብረት ላይም ውድመት እየተደረሰ ነው፤ ጥንቃቄ ያስፈልጋል” ሲሉ አሳስበበዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

#Update

የ2018 ትምህርት ዘመን የ12ኛ ክፍል ሀገር አቀፍ ፈተና ይዘቶች ይፋ ሆኑ፡፡

የትምህርት ምዘናና ፈተናዎች አገልግሎት ፤ ተማሪዎች፣ የተማሪ ቤተሰቦች፣ መምህራንና የትምህርት አመራር ለፈተና ዝግጅት በሚያደርጉበት ወቅት ፈተና የሚሸፍናቸው የይዘት አካባቢዎች ይፋ አድርጓል።

የ2018 ትምህርት ዘመን 12ኛ ከፍል ፈተና ዝግጅትና አስተዳደር የሚከተሉትን ያካትታል፡፡ 

1. የትምህርት ዓይነቶችን በተመለከተ

ለተፈጥሮ ሳይንስ ተፈታኞች ፦
- እንግሊዘኛ፣
- ሒሳብ፣
- እስኮላስቲክ አፕቲትዩድ፣
- ኬሚስትሪ፣
- ፊዝክስና ባዮሎጂ

ለማህበራዊ ሳይንስ ተፈታኞች ፦
- እንግሊዘኛ፣
- ሒሳብ፣
- እስኮላስቲክ አፕቲትዩድ፣
- ታሪክ፣
- ጂኦግራፊና ኢኮኖሚክስ ናቸው።

2. ፈተናው ከ9ኛ እስከ 12ኛ ከፍል ደረጃዎችን እና በተማሪው መጽሐፍ ላይ ያሉትን ሁሉንም ምዕራፎች ይሸፍናል፡፡

3. ከ10ኛ – 12ኛ ክፍል ሁሉም የትምህርት ዓይነት ፈተና በአዲሱ ስርዓተ ትምህርት መሠረት እየተዘጋጀ ያለ ሲሆን የ9ኛ ክፍል ደግሞ የሁሉም የትምህርት ዓይነቶች ፈተናዎች ከቀድሞውና ከአዲሱ ሥርዓተ ትምህርቶች የጋራ ይዘቶችን ብቻ አካቶ እየተዘጋጀ ይገኛል፡፡

4. ፈተናው ማንኛውም ተፈታኝ ተማሪ ከተማረው ሥርዓተ ትምህርትና ከተማሪው መጽሐፍ ላይ ብቻ ተመስርቶ እየተዘጋጀ ይገኛል፡፡

5. የፈተናው አስተዳደር በበይነ መረብና በወረቀት ጎን ለጎን የሚሰጥ ሲሆን አብዛኛው ተፈታኝ በበይነ መረብ እንዲፈተን እየተሠራ ያለ በመሆኑ ተፈታኞች እራሳቸውን በበይነ መረብ ለመፈተን ሊያዘጋጁ ይገባል፡፡

#EAES

@tikvahethiopia

#ችሎት

በእስር ላይ የሚገኙ የቀድሞ ሰላም ሚንስትር ዴኤታ አቶ ታዬ ደንዳአ ዛሬ ፍርድ ቤት ቀረቡ።

አቶ ታዬ " ህገወጥ የጦር መሣሪያ መያዝ፤ ጠላትን ማገዝ እና በጉልበት ህገመንግስት ለመናድ ከሚሰሩ ቡድን ጋር መተባበር " በሚሉት ወንጀሎች ነው ተጠርጥረው የታሰሩት ሲሉ የህግ ጥበቃቸው አቶ አበራ ንጉስ ለቲክቫህ ኢትዮጵያ ገልጸዋል።

አቶ ታዬ ዳንዳአ ተጠርጥረው በተከሰሱበት ወንጀል በዋስ መብት ከተለቀቁ ከተወሰን ወራት በኃላ ዳግም ግንቦት 25 ቀን 2017 ዓ.ም ታስረው በቂልንጦ ማረምያ ቤት ይገኛሉ።

በተጠረጠሩበት ወንጀሎች የመጨረሻ ውሳኔ ለመስጠት ልደታ ፌዴራል ከፍተኛ ፍርድ ቤት ፀረ ሽብር ችሎት ሀምሌ 30 ቀን 2017 ዓ.ም ቀጥሮ ሰጥቶ ነበር።

የአቶ ታዬ መዝገብ ተመርምሮ ዛሬ ውሳኔ ለመስጠት ቢቀጥርም ፍርድ ቤቱ በተደራራብ ስራዎች መዝገቡን አጣርቶ ውሳኔ ለመስጠት ግዜ አለማግኘቱን ገልፆ ተለዋጭ ቀጠሮ  ገልፆል።

በዛሬው ችሎት ከሳሽ አቃቢህግ እንዳልቀርበ ጠበቃቸው አቶ አበራ ተናግረዋል።

የአቶ ታዬ ዳንዳአ ጠበቃ አቶ አበራ ንጉስ ደንበኛቸው ከዚህ ቀደም ታስረው ባሉበት የሰብአዊ መብት ጥሰቶች እንደደረሰባቸው ለፍርድ  ቤቱ አቤቱታ አቅርበው በጉዳዩ ላይ ትዛዝ አለመሰጠቱን ፤ እንዲሁም  ከሁለት ወር ቆይታ በኃላ መዝገባቸው ተመርምሮ አለማለቁ ቅር እንዳሰኛቸው ለችሎቱ ማስረዳታቸውን ገልፀዋል።

ሆኖም የፌዴራል ልደታ ከፍተኛ ፍርድ ቤት ፀረ ሽብር ወንጀል ችሎት ውሳኔ ለመስጠት ለጥቅምት 24 ቀን 2018 ዓ.ም ተለዋጭ ቀጠሮ ሰጥቷል ሲሉ አቶ አበራ ንጉስ ለቲክቫህ ኢትዮጵያ ተናግረዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

#ሀዋሳ

" ባልተገባ መልኩ ተይዘዋል " ያላቸውን የመንግሥት ቤቶች በማስለቀቅ ለከተማ ነዋሪዎች ማስተላለፍ ጀምራለሁ ሲል የሀዋሳ ከተማ አስተዳደር አሳወቀ።

ከተማ አስተዳደሩ ይህን ያለው በይፋዊ የማህበራዊ ትስስር ገጹ ነው።

የግል ቤት ኖሯቸው በመንግሥት ቤት ውስጥ የሚኖሩትን በማስለቀቅ ለሚገባቸው የከተማው ነዋሪዎች አስረክባለሁ ብሏል።

በቅርቡ የተሾሙት አዲስ ከንቲባ አቶ ተክሌ ጆምባ " በተለያዩ አጋጣሚዎች በከተማዋ የሚገኙ የመንግሥት ቤቶች የመንግሥት ቤት  ወደማይገባቸው ግለሰቦች ተዘዋውሯል " ያሉ ሲሆን " በተለይ የግል ቤት ኖሮአቸው በመንግሥት ቤት የሚኖሩ ግለሰቦችን ቤት በመረከብ ለሚገባቸው የከተማዋ ነዋሪዎች ለማስተላለፍ ዝግጅት ተደርጓል " ሲሉ ገልጸዋል።

" የክልሉ መንግሥት ይህ ተፈፃሚ እንዲሆን አቅጣጫ አስቀምጧል ፤ የከተማው አስተዳደርም ለተፈፃሚነቱ በቁርጠኝነት ይሰራል " ብለዋል።

ከተማ አስተዳደሩ ፦
- ይህ ቤቶችን የማስለቀቅ ስራ በምን አግባበ እንደሚመራ፣
- ከመቼ ተጀምሮ ተፈጻሚ እንደሚሆን፣
- ስንት ቤቶች ባልተገቡ ሰዎች እንደተያዙ በይፋ  ያለው ነገር የለም።

@tikvahethiopia

የገቢዎች ሚኒስቴር የደመወዝ ስኬል መሸጋገሪያ ሰንጠረዥ ይፋ ተደርጓል።

የደሞዝ ስኬሉን ትክክለኛነት ቲክቫህ ከፌደራል ሲቪል ሰርቪስ ኮሚሽን አረጋግጧል።

በ13 ደረጃዎች የተከፈለውን የደሞዝ ስኬል ከተያያዘው ፋይል ላይ ይመልከቱ።

ቲክቫህ ኢትዮጵያ
አዲስ አበባ
#TikvahEthiopia

@tikvahethiopia