Tadbirda Maktabgacha va maktab ta’limi vaziri o‘rinbosari Farhod  Boqiyev,  Xalq deputatlari Toshkent viloyati Kengashi raisi Sayyora Fayziyeva, viloyat  Maktabgacha va maktab ta’limi  boshqarmasi boshlig‘i  Shukur Burxonov, ta’lim sohasi faollari va faxriylar, o‘quvchi va talaba yoshlar ishtirok etdi.

Tadbir davomida sohada  samarali faoliyat yuritayotgan ustoz va murabbiylar munosib rag‘batlantirildi. Jumladan, 13-maktabning rus tili o‘qituvchisi Zulfiya Kalikulova  “Xalq ta’limi fidoyisi” ko‘krak nishoni bilan, 2-maktab qozoq tili va adabiyoti fani o‘qituvchisi Baxtigul Abdukarimova  hamda 9-maktabning ingliz tili fani o‘qituvchisi Ravshan  Pirmatov “Xalq ta’limi a’lochisi” maqomiga loyiq ko‘rildi.

1-oktabr — "O‘qituvchi va murabbiylar kuni" munosabati bilan Toshkent viloyatidagi kasbiy ta’lim muassasalarida fidokorona mehnati bilan yoshlarga bilim va tarbiya berib kelayotgan 36 nafar ustoz va murabbiy “O‘rta maxsus va professional ta’lim a’lochisi” ko‘krak nishoni bilan taqdirlandi.

Tadbirda Oliy taʼlim, fan va innovatsiyalar boshqarmasi boshligʻi N. Kulbekova so‘zga chiqib, ustozlarning ta’lim sohasidagi fidokorona xizmatlarini alohida e’tirof etdi. U o‘z nutqida mazkur ko‘krak nishonlari nafaqat ustozlar faoliyatiga berilgan yuksak baho, balki ularni kelgusi faoliyatida yanada katta marralarni zabt etishga undovchi muhim rag‘bat ekanini ta’kidladi.

1-oktyabr — O‘qituvchi  va murabbiylar kuni munosabati bilan  viloyat Sport boshqarmasida ham  bayram tadbiri tashkil etildi.  Unda viloyatdagi sport maktablarida fidokorona mehnat qilayotgan, yoshlarni sportga keng jalb etib kelayotgan bir guruh murabbiylar taqdirlandilar.

Tadbirda viloyat hokimi o‘rinbosari J. Babajanov va Toshkent viloyati Sport boshqarmasi boshlig‘i R. Boboqulov so‘zga chiqib,  murabbiylarning sportchilarni yuksak natijalarga tayyorlash yo‘lidagi zahmatkorona mehnatlarini samimiy e’tirof etishdi.

Marosimda 2 nafar murabbiy “Jismoniy tarbiya va sport a’lochisi” ko‘krak nishoni bilan,  2 nafar murabbiy viloyat hokimligining maxsus sovg‘asi bilan, 31 nafar murabbiy esa Toshkent viloyati Sport boshqarmasining tashakkurnomasi va esdalik tuhfalari bilan  taqdirlandi.