Mazkur forum nafaqat Toshkent davlat iqtisodiyot universiteti, balki butun mamlakatimiz ilm-fani uchun strategik ahamiyatga ega bo‘lgan tadbirdir. “O‘zbekiston–2030” strategiyasida belgilangan maqsadlar – barqaror iqtisodiy o‘sish, inson kapitali rivoji, raqamli iqtisodiyotni chuqurlashtirish, hamda ekologik barqarorlikni ta’minlash kabi yo‘nalishlarning ilmiy asoslarini shakllantirish talab etmoqda.

Forumning asosiy maqsadi ana shu ustuvor yo‘nalishlarni ilmiy jihatdan tahlil etish, xalqaro tajribani o‘rganish va ilmiy tavsiyalar ishlab chiqishdan iborat bo‘ldi. Shu ma’noda, u nafaqat milliy miqyosda, balki xalqaro akademik jamoatchilik doirasida ham intellektual muloqot maydoniga aylandi.

Prorektorning ta’kidlashicha, forumda AQSh, Buyuk Britaniya, Malayziya, Indoneziya, Yaponiya, Fransiya, Misr, Birlashgan Arab Amirliklari, Rossiya Federatsiyasi va Janubiy Koreya kabi davlatlardan 50 dan ortiq yetakchi olim va ekspertlarning ishtiroki tadbirning xalqaro nufuzini yanada oshiradi. Unga ko‘ra, bunday keng ilmiy muloqot “Yangi O‘zbekiston – yangi taraqqiyot bosqichi” tamoyilining amaliy ifodasi bo‘lib, mamlakatimizda amalga oshirilayotgan strategik islohotlarni ilmiy asosda chuqurlashtirishga xizmat qiladi.