Лол бўлиб атрофга қарайман секин,
Улар кулишади, демак, улар ҳақ.
Менинг тасаввурим уфқида лекин
Ёнаётган дала, ёнаётган халқ...

26 апрель – Ўзбекистон халқ шоири Жамол Камол (1938-2022) туғилган кун

✍️ Жамол Камол
©@turtliklar

"Ё мени танлайсиз, ё онангизни!" -
Шарт қўйди эрига бир соҳибжамол.
Эр деди: "Эшикни қаттиқ ёпиб кет,
Онам совқотмасин, кўчада шамол!

✍️ Х. Ҳамидов
© @turtliklar

Гул ғунча маст этиб мени тўхтатди,
Тиконлар бағридан уфуриб атир.
Демасман тикондек тиғни ким отди,
У тиғнинг тагидан анқиса меҳр.

✍️ Шукрулло
©️@turtliklar

​Афандига бир кун мақтанди подшо:
''Ҳеч қандай камим йўқ, ҳамма нарсам бут''.
У деди: ''Тақсирим сўзлари хато –
Йўқку ўзларига аталган тобут''.

✍ Шафоат Раҳматуллаев
© @turtliklar

ATIRGUL VA YULDUZLAR

Qismat umidlarim sovurib butkul,
Esganda bagʻrimga dam-badam muzlar,
Yerda - nigohimni oʻpar atirgul,
Koʻkda taskin berar menga yulduzlar!

UMR...

Umr shundoq shitob -
Tuyganing chog'da
Qoningga daf'atan yuguradi muz.
Qara, ma'suma qiz
Gul tergan bogʻda
Bu kun xayol surar g'amgin ayol - Kuz...

©️Mirpo'lat MIRZO | @turtliklar

Туғилсанг бахт билан камол ўшадир,
Тарк этсанг оламни завол ўшадир.
Охир чоғ тупроғинг устига келиб,
Кимдир ёд айласа, иқбол ўшадир.

✍️ Абдулла Орипов
©️@turtliklar

Ноёблик бор қувончда, бахтда,
Висолдан кўп ҳаётда фироқ.
Ўқигандан кўра инстда,
Тил ўрганиб, сурган яхшироқ!

✍ Зидан | @turtliklar
✔️ #мухлис_ижодидан

Соддадил одамни жуда кам кўрдим,
Борин ҳам шикаста, кўзин нам кўрдим
Дунёда фирибгар кўп экан, лекин,
Уларнинг барчасин шод-хуррам кўрдим.

✍️ Aбдулла Орипов
© @turtliklar

Сен ғарбингдан кечмадинг бир зум,
Кун чиқарда қолиб кетдим мен.
Сен ёлғизсан, мен ҳам бир ўзим
Бизни кутиб йиғлайди Тошкент...

✍️ Кабир
© @turtliklar

(17 май — Ҳалима Худойбердиева таваллуд топган кун)

Сеҳру сабоғимиз устидан юринг,
Доғ ўлдик. Доғимиз устидан юринг.
Чорланг. Биз борайлик. Ё ўзингиз келиб
Қошу кабоғимиз устидан юринг.

⚪️🔆🔴🔆🔵

Сиз десам тилимга қанд, бол келармиш,
Хизматимга қуёш, шамъ лол келармиш.
Сочингиз бўйидан юборгайсиз Ёр,
Сиз соридан бизга шамол келармиш.


⚪️🔆🔴🔆🔵

Умримга киринг, — деб ёзиб юбордим,
Янчилдим, теринг, — деб ёзиб юбордим.
Мени чорланг. Ёки... ёки ўзингизни
Мунга келтуринг, — деб ёзиб юбордим.

© Ҳалима Худойбердиева
✳️ @turtliklar

...Ёмғир ёғар - осмон тунга айланади...
Сен кўнглимни қолдирмоққа уринасан.
Мен сўрасам, мен бахтлиман дейсан, аммо
Тушларимда нега бахтсиз кўринасан?...

✍ Нодира Назар
© @turtliklar

Яратғонга сиғинғон он,
Турфа тилдин турфа афғон.
Биров тахтни умид қилса,
Биров йиғлар сўраб иштон.

✍️ Анвар Обиджон
© @turtliklar

Ғийбатда кўмдилар тирноғимгача,
Мен бағримга маҳкам босдим Иймонни.
Аллоҳ гуноҳидан ўт машҳаргача,
Дилимни оғритган ўша инсонни.

✍ Ирода Муродбахш
© @turtliklar

Кексалик илтижоси

Бешмаҳал дуога қўл очади чол:
- Оллоҳим, оз оғриқ, осон ўлим бер.
Ақрабо жонига тегмай жоним ол,
Йўлга қаратмасдан сўнгги йўлим бер.

✍️ Эркин Воҳидов
© @turtliklar

1 июнь — Халқаро болаларни ҳимоя қилиш куни!

Кулсанг, дунё кулар—кўнгиллар тўлар,
Мунчоқ кўзларингга пайваста бу жон!
Кулгу тошиб турсин кулгичларингдан,
Сен бахту иқболим, азиз болажон!

💟 @turtliklar

Кўнглимга дунёни сиғдирма, ё Раб,
Бўйнимни ўзгага эгдирма, ё Раб!
Мажоз деб хор бўлдим, қолган умримда
Ўзингдан ўзгани севдирма, ё Раб!

✍ Мирзо Кенжабек
© @turtliklar

Қайинзор қошида ўйлар йўлдошим,
Ётаман тўнкага қўйганча бошим.
Мен сукут ичраман, оқ қайин ҳам жим,
Гўё синамоқда менинг бардошим.

© Омон Матжон | @turtliklar

Оҳ, ўтган у кунлар қайтмагай зинҳор,
Ўчган муҳаббатнинг ёнмоғи душвор.
Нигоҳинг қадама қароғимга сен,
Унда тўкилмаган кўз ёшларим бор.

✍️ А. Орипов
©️@turtliklar

«Ҳамёни соф тилла тўла бўлса ҳам,
Оч киши саҳрода қўёлмас қадам.
Биёбонда қолган оч бечорага,
Кумушдан яхшидир қайнаган шалғам».

✍️ Саъдий Шерозий (Ғ.Ғулом таржимаси)
©️@turtliklar