لطمية للقاسم ابن الحسن ع من ديوان ارض الحتوف الجزء2️⃣


❥❈┉┉┅━━❀❀━━┉┉❥❈┉
هذا موش يومك يومك بعيد
يالبعدك شباب وللهوى تريد
❥❈┉┉┅━━❀❀━━┉┉❥❈┉
هذا موش يومك ياضوه العين
يتخير اجالك ويلي هالبين
عمرك ماكمل يالولد عشرين
محروم ارحلت يوليدي ياحيد
❥❈┉┉┅━━❀❀━━┉┉❥❈┉
محروم ارحلت يالبعدك شباب
الك جرح بدليلي يمه ماطاب
تنام شلون ويلي حدر التراب
مهضومه اون واصفج انه الايد
❥❈┉┉┅━━❀❀━━┉┉❥❈┉
خابت يالولد كل هاي الضنون
من جابوك اليه مغمض العيون
شلون اصبر يجاسم كلي شلون
اون عليك يمه وابد ماهيد
❥❈┉┉┅━━❀❀━━┉┉❥❈┉
مخضب بالدمه جابوك اليه
وعمك ينتحب ظل الشفيه
نيران الكلب ظلت سريه
تسعر يالولد كل يوم وتزيد
❥❈┉┉┅━━❀❀━━┉┉❥❈┉
ابدل الموت يمه وياك ياريت
ياريع الكلب يالماتهنيت
من دم ركبتك تالي تحنيت
طولك ضيعيته وانته الوحيد


بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطميه للقاسم ابن الحسن( ع )
من ديوان أرض الحتوف ج٢
❥❈┉┉┅━━❀❀━━┉┉❥❈┉
لسان حال رمله تقول :

يابدر الليالي وحلم السنين

غبت عني يجاسم يمه لاوين
حلمي بزفتك خاب
معرس حدر التراب
صارت سلوتي يايمه الونين
❥❈┉┉┅━━❀❀━━┉┉❥❈┉
ماضنيت هيج يصير الفراك
روحي يالولد للملكه تشتاك
ياريع الكلب فركاك حراك
دمع العين همال
حالي يمه ياحال
مفطور الكلب مجسوم نصين
❥❈┉┉┅━━❀❀━━┉┉❥❈┉
اعد واحسب ييمه شكد الايام
وانطر هالفرح والكلب محتام
بيديني ازفك يبني جسام
تفرح بيك روحي
يابلسم جروحي
تاليها اون واصفج بالايدين
❥❈┉┉┅━━❀❀━━┉┉❥❈┉
احنيت الظهر وانطر واتاني
تكر العين يازهرة زماني
تاليهه الدهر سهمه رماني
رماني وصابلي حشاي
يوليدي ويضنواي
ياوسفه تنام وتغْمض العين
❥❈┉┉┅━━❀❀━━┉┉❥❈┉
حناك اعجنتها بدمع العيون
احنيمن بعد عكبك يمزيون
ترد لمك بعد هيهات وضنون
ينبض بيك كلبي
يضوي ردود دربي
ضيعتك انه ياترف يازين

بقلم خادمة أهل البيت الشاعرة أم عباس السكيني
https://www.tg-me.com/umabbas1979

نعي للقاسم( ع ) لسان حال الوالده
من ديوان أرض الحتوف ج٢
❥❈┉┉┅━━❀❀━━┉┉❥❈┉
اصرخ واصيح بصوت يبني
يومك يالمعرس كتلني
ليش بعجل تمشي وتهدني

طولك حلو والعين وسعه
يحكلي انه من ابجي وانعه
ظلت الك بالكلب وجعه

بعدك زغير وشلت مني
خيبت يمه الولد ظني
وعليك مافلن يحزني

منساك ولحد المنيه
يلي ربيت بين اديه
ضاع الربه وشلون بيه

ضاع الربه وضاعت سنيني
يلي رحت ماظن تجيني
ماهودت نوحي ونيني

اعليك الدمع مابطل نهران
والكلب من الحزن خلصان
والفكر ظل اعليك دوهان

نيران تسعر اه فركاك
وشلون كلي الولد انساك
تمنيت يمه الموت وياك

ردتك لعد النعش زاتوت
كبلك يريته خمد هالصوت
وارتاح يمه ابجيت الموت

بعدك انه منهو اليه
امست ادياري هل خليه
مالي بعد عكبك تجيه

ضيعت يمه الولد دربي
يلي خذيت وياك كلبي
مكسوره انه واشكي لربي


بقلم خادمة أهل البيت الشاعرة أم عباس السكيني
https://www.tg-me.com/umabbas1979

نعي للشباب
من ديوان أرض الحتوف ج٢
❥❈┉┉┅━━❀❀━━┉┉❥❈┉
شحجي وشكول اعليك يبني
ياولد يل رباك حضني
تحمل تريد بعيد عني

بعدك انه بالعمر شلي
مايل صبح هاليوم حملي
شنهي البصر ياولد كلي

من حملت كل حيلي هديت
بمك يبعد امك شخليت
نور وطفه واظلم يهل بيت

بيتي صفه من ضيه خالي
موحش ويرعب بل ليالي
نورك خمد يبني يغالي

ياولد يانفسي الاشمه
وياشوف عيني الريت تعمه
اعليك الكلب غارك بهمه

همي ثجيل والمن احجي
بعدك ييمه وين الجي
محزونه يمه عليك وابجي

مابطلت لاجلك ونيني
يابعد عمري وكل سنيني
يايوم يمدلل تجيني

ونيت والونه اكتلتني
ياولد يلشالاك متني
تالي بعجل يمه عفتني


بقلم خادمة أهل البيت الشاعرة أم عباس السكيني
https://www.tg-me.com/umabbas1979

هوسات للقاسم ابن الحسن (ع)
من ديوان أرض الحتوف ج٢
لسان حال مولاتي زينب تقول :
❥❈┉┉┅━━❀❀━━┉┉❥❈┉
طفي شمعة العريس يم الولد وبساعه
جاسم طاح يارمله وهوه بكاعه
خل نلحك نروح بساع لوداعه

( مدد ظل الغالي / بتراب الهيمه )
❥❈┉┉┅━━❀❀━━┉┉❥❈┉
لسان حال ام الولد

ياصبر البقه عندي وودعنه
مذبوح الولد وبعيني اشوفنه
نايم عالثرى ويجهر بقه ونه

( الموت ويبني /ردته تمنيته )
❥❈┉┉┅━━❀❀━━┉┉❥❈┉
تنطر ظلت سكينه وشكللها
راح ومايرد جاسم بعد الها
دموع من الدمه ياويل تهملها

( شال وغرب / مايرجع ليها )
❥❈┉┉┅━━❀❀━━┉┉❥❈┉
يوليدي يجاسم اه يامظلوم
كلب امك يويل اعليك ظل مالوم
ليش من العرس يوليدي لن محروم

( بعرسك يبني / ليش يفجعوني )



بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطميه في شجاعة علي الأكبر
(وزن الموشح )
من ديوان (أرض الحتوف) ج٢

❥❈┉┉┅━━❀❀━━┉┉❥❈┉

علي الاكبر من نزل للحومه
ترجف الفرسان من علومه
❥❈┉┉┅━━❀❀━━┉┉❥❈┉
صال بالميدان ارعبها الزلم
وبيمينه السيف يحصد بالظلم
الكابلا منهم ماظنه سلم
طشر صفوف العده المنظومه
❥❈┉┉┅━━❀❀━━┉┉❥❈┉
جنه حيدر من نزل بيهم ضرب
موت كالو جاي ياخذنه كرب
الشرد منهم تيه اعليه الدرب
المايعرفه اليوم يشهد يومه
❥❈┉┉┅━━❀❀━━┉┉❥❈┉
علي خله لارض راجت بالدمه
رغم جان العطش جبده مألمه
نكس الرايات لعداه ورمه
صرعه خلاهم بأرضهم نومه
❥❈┉┉┅━━❀❀━━┉┉❥❈┉
الغوث صاحو منه ياعدوانه
زلزل الحومه يويلي وجانه
جثث بالغاضر علي خلانه
تنتفض من الشجاعه هدومه
❥❈┉┉┅━━❀❀━━┉┉❥❈┉
راس ابن غانم علي لن جابه
مايخاف الموت لا ميهابه
حيف بسيوف الغدر يصوابه
عالثره طاح وهوه الجيدومه


بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطميه فزاعيه للاكبر (ع)
من ديوان أرض الحتوف ج٢
❥❈┉┉┅━━❀❀━━┉┉❥❈┉
ولك ياموت ابعد عن علي بعيد
متحزم اجيت ومني شتريد
❥❈┉┉┅━━❀❀━━┉┉❥❈┉
ولك ياموت بدل روحه وي روحي
خل ابني بديه يشيل لي لوحي
لب احشاي هذا وبلسم جروحي
انه خلاف الولد هالعمر ماريد
❥❈┉┉┅━━❀❀━━┉┉❥❈┉
اشريه الولد لو رايد تسومه
بالله دخيل لاتحرمني رسومه
حيلي باد من طاريهه هلحومه
بيها افكد انه ياحيف جم حيد
❥❈┉┉┅━━❀❀━━┉┉❥❈┉
بيها افكد اوليدي ويل وشلوني
وياه وياه ريت بساع لحدوني
ولااشوفه صريع اتصدله اعيوني
بعده شلون كلولي انه اهيد
❥❈┉┉┅━━❀❀━━┉┉❥❈┉
ولك ياموت ريض بالولد ساعه
خليني احضر روحي لوداعه
يانار الولد ياويلي وجاعه
تسعر بالحشا كل يوم وتزيد
❥❈┉┉┅━━❀❀━━┉┉❥❈┉
اله نار بدليل احشاي لهابه
مااحمل تراني فراكه وغيابه
مو بالهون يومه واه يمصابه
ابجي اعليه انه والبجي شيفيد

بقلم خادمة أهل البيت الشاعرة أم عباس السكيني
https://www.tg-me.com/umabbas1979

نعي لعلي الاكبر (ع)
من ديوان أرض الحتوف ج٢
لسان حال ليلى لما جاؤها بعلي مقتول كالت :
❥❈┉┉┅━━❀❀━━┉┉❥❈┉
وين الربه وسهر الليالي
والنوم لجلك ماحلالي
جاوبني يبني اه يغالي

شلتك ييمه بين الايدين
واحنيت ظهري ايام وسنين
ضاع الربه ياكرت العين

اكعد ييمه وردلي اجواب
كلبي تراهو مصوب اصواب
مااحمل الفركه والغياب

ماظنتي ترتحل مني
تحمل تشيل بعيد عني
سهام الغدر يمه رمني

مغمض اعيونك ليش كلي
بالعمر بعدك يبني شلي
يا روحي بعد الولد سلي

بالخيم ترجعلي اناطر
مادري ليك الموت داير
عليك الفكر يالولد طاير

افتحلي عينك هايمزيون
ارجوك لاتطبكها الجفون
بيه انه يا علي وشلون

❥❈┉┉┅━━❀❀━━┉┉❥❈┉
( نعي كرناوي )

امحنه بالدمه جابوك اليه
يبجي وينتحب ظل ويل لحسين

فكري طار يمه وراحت الروح
من شفتك صريع مغمض العين

ودمك يالولد غركها للكاع
خمد كل صوت منك حتى الونين

كلي بياذنب يا علي ذبحوك
شنهي الثار التطلبه الملاعين

حسافه تروح يبني ونور عيناي
تعوف امك تظل لغدرة البين

ضخرتك يالولد للكبر واتناك
من يجفه الدهر ولعوز السنين

ولنعشي ييمه تصير شيال
تمشي ياعلي ويه المشيعين

تالي يالولد موتك اجه وحان
وشلتك منذبح مابين الايدين

بقلم خادمة أهل البيت الشاعرة أم عباس السكيني
https://www.tg-me.com/umabbas1979

لسان حال الام الفاقده

عين امك عفتها دمه …..تنهال
من همي عليك اجبال ….تنهال
الترابه ريت يبني اعليه …تنهال
ونام وياك اه حدر الوطيه


✍🏻ام عباس السكيني

ابوذيه / لسان حال الوالده


يَكون الموت الي يالولد ….ينضام
ولاكلبي عليك بيوم …. ينضام
لو بيدي ويصح الولد …ينضام

لضمك بلكلب واقفل بديه

✍🏻ام عباس السكيني

لطميه : لسان حال الحسين(ع) لما شاهد عطش الاكبر(ع)

( وزن الميمر )

من ديوان أرض الحتوف ج٢
❥❈┉┉┅━━❀❀━━┉┉❥❈┉
ضامي تون يوليدي وتريد الماي
بويه انه مثلك هالعطش فت احشاي
ونك مرد دلالي
لو ميت انه اشوالي
ولا انظرك يوليدي تتلوه احذاي
❥❈┉┉┅━━❀❀━━┉┉❥❈┉
كلبي انجوه يوليدي وبجمر اضماك
ضامي اشوفك والعطش لن اذاك
هديت حيلي ياعلي وبنخواك
تلوج وتون يوليدي
واعليك انه شبيدي
حالي مثل حالك ترا يارجواي
❥❈┉┉┅━━❀❀━━┉┉❥❈┉
ماظل دمع حتى اعصره منه ارويك
لوبيدي تدري ياعلي ولاخليك
يصعب عليه يالولد مااسكيك
محروم تدري علينه
ماي العذب يروينه
حيران اصفك ياعلي لن راحاي
❥❈┉┉┅━━❀❀━━┉┉❥❈┉
مخطوف اشوفن يالولد لن لونك
حر العطش يابوي سد اجفونك
ذبلت يحيف الحلوه بويه عيونك
عطشان بويه ولابيك
ثكل الحديد مأذيك
للباري يبني يالولد كل شكواي
❥❈┉┉┅━━❀❀━━┉┉❥❈┉
كلبك اظنه ياعلي متفطر
ذوب دليلك هالضما يالاكبر
حر الشمس فوك العطش ماتكدر
وجروح هم وياهن
خصمك غدر خلاهن
جروحك بكلبي يالولد ياعيناي
❥❈┉┉┅━━❀❀━━┉┉❥❈┉
رغم البيك وانته فارس ضرغام
وسفه يبويه بالغدر اه تنام
للموت جنك يالولد هم محتام
لجدك يبويه اشكيله
الصار وجره اعل لعيله
من بعد عينك ياعلي تجفه وياي


بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطمية للأكبر (ع)
تقرأ بطور الفزاعي الجنوبي وأطوار أخرى
من ديوان أرض الحتوف ج٢
❥❈┉┉┅━━❀❀━━┉┉❥❈┉
نارك يالولد تسعر بدلالي
تحرك بالحشا ماتطفى للتالي
❥❈┉┉┅━━❀❀━━┉┉❥❈┉
نارك يالولد تلهب وسعريه
بفراكك ييمه شعملت بيه
من بعدك تراني اشبع مهضميه
اخذني ارجوك يمه وياك يالغالي
❥❈┉┉┅━━❀❀━━┉┉❥❈┉
وياك وياك يمه الموت اتمنه
ولايومك اشوفه هنا يالمجنه
اون اعليك يالتستاهل الونه
من بعدك ييمه الحزن يحلالي
❥❈┉┉┅━━❀❀━━┉┉❥❈┉
يحلالي الحزن والنوح والدمعه
يضي العين ولداري جنت شمعه
وسفه تروح مني ومالك رجعه
بعدك يالولد منهو الي يبقالي
❥❈┉┉┅━━❀❀━━┉┉❥❈┉
بعد هيهات ياصوتك اسمعنه
ياطولك ييمه شلون اودعنه
مني تروح يبني واكطع الضنه
محزنه اعليك يمه وبيتي ظل خالي
❥❈┉┉┅━━❀❀━━┉┉❥❈┉
عليك مكدره الديران تنشدني
حزنانه تون ياويل من حزني
شجاوبهه تكلي يالولد يبني
شال بعيد اكلها ومادرى بحالي

بقلم خادمة أهل البيت الشاعرة أم عباس السكيني
https://www.tg-me.com/umabbas1979

هوسات في شجاعة علي الاكبر(ع)
من ديوان أرض الحتوف ج٢
❥❈┉┉┅━━❀❀━━┉┉❥❈┉
بطل ضرغام جن حيدر علي الكرار
كلمن واجهه ظل خايف ومحتار
علي سيف الشجاعه اليحصد وبتار

( ليث مجرب / من طب للحومه )
❥❈┉┉┅━━❀❀━━┉┉❥❈┉
شجاعه ومرجله والفخر يحلاله
سبط حسين فنه الي تدناله
موت وجاي لن يحصد الخياله

( ويحصد ويعد/ راعي الغيره )
❥❈┉┉┅━━❀❀━━┉┉❥❈┉
تتنافض شجاعه ظلت هدومه
جن طه النبي بعيونه ورسومه
وجن حيدر ابو الحملات بالحومه

( الطف يشهدله / يسولف بافعاله )
❥❈┉┉┅━━❀❀━━┉┉❥❈┉
نزل للحومه يرعد ويل لن اغتاض
طفح بركان صبره الحيد جن وفاض
كالو موت هذا الجاي لينه ركاض

( الشايف يومه / يسولف بي )

بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطمية للرضيع (ع)
تقرأ بطور الفزاعي وأطوار أخرى
من ديوان (أرض الحتوف) ج٢
❥❈┉┉┅━━❀❀━━┉┉❥❈┉
شلع كلبي المهد خالي ويبجيني
راح الجان بي صوته يسليني
❥❈┉┉┅━━❀❀━━┉┉❥❈┉
خمد صوت الولد ونكطعت الضنه
ياطوله بعد هيهات احظننه
محزونه بكيت اجهر انه الونه
تكتل فركته وحيل تأذيني
❥❈┉┉┅━━❀❀━━┉┉❥❈┉
ياذيني المهد وشلون ظل خالي
اصدن ليه وانه الضيم ياحالي
عليه مساهره ومصيوب دلالي
شلون شلون يتركني ويخليني
❥❈┉┉┅━━❀❀━━┉┉❥❈┉
بكماطه اشمن واسجب العبره
ونيران الفكد بكليبي متوجره
شيصبره الكلب لفراكه شيصبره
الموت وياه ريت بساع يلفيني
❥❈┉┉┅━━❀❀━━┉┉❥❈┉
خله بيتي بعد من ضحكت شفافه
ويا حضني الولد ياحيف لن عافه
شلون انسه انه الحلوه اوصافه
مطبوعه تظل ارسومه ابعيني
❥❈┉┉┅━━❀❀━━┉┉❥❈┉
ياوسفه يروح وليدي ويهدني
عليه مساهره ومعيوب ظل متني
وين الجان صوت امناغه يطربني
بس ثيابه ظلت ويل تعميني


بقلم خادمة أهل البيت الشاعرة أم عباس السكيني
https://www.tg-me.com/umabbas1979

قصيده لعبد الله الرضيع(ع)
الوزن : ( ثلث ترباع ) ياشيعتي
من ديوان (أرض الحتوف) ج٢
❥❈┉┉┅━━❀❀━━┉┉❥❈┉
يارضيعي
يمه عبد الله مشيت ورحت مني
يارضيعي
وانه من بعدك يعمري الحزن فني
❥❈┉┉┅━━❀❀━━┉┉❥❈┉
عفت مهدك ليش يوليدي يغالي
مانمت ساعه تراني من ليالي
اذكر مناغاك بحضيني والالي
صورتك مطبوعه متفارك خيالي
روحي طلعت يالولد من شلت عني
❥❈┉┉┅━━❀❀━━┉┉❥❈┉
ليش مستعجل ييمه اعله المنيه
افتح كليبي واضمك لو بديه
حسبت اسكيك يوليدي لميه
تالي محزوز النهر جابوك اليه
فرفحت ضامي يويلي زاد وني
❥❈┉┉┅━━❀❀━━┉┉❥❈┉
اعليك در يايمه يوليدي حليبي
ليش منك يالولد شح يانصيبي
ليش فاركت المهد يبني وحبيبي
اعليك معلوله يمن انته طبيبي
اه يايومك ييمه والله سلني
❥❈┉┉┅━━❀❀━━┉┉❥❈┉
من اجاك السهم سولفلي اعله حالك
شنهي ضنيته يعبد الله اجالك
هذا عذب وجاي يرويك بخيالك
هم تريد الماي هم بعده اعله بالك
ريت صاباني السهم يالولد يبني
❥❈┉┉┅━━❀❀━━┉┉❥❈┉
جن حمام الدوح مابطل ونيني
مني راح الشوف يبني يضي عيني
ضاعت ايام العمر ضاعت سنيني
اه يايومك كتلني وحيل هدني

بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطميه ثكيله للرضيع (ع)
من ديوان أرض الحتوف ج٢
❥❈┉┉┅━━❀❀━━┉┉❥❈┉
كأني بلسان حال الرباب تقول :

يبست اشفافه هالولد يلوج عالماي
عبد الله فر من العطش وتنظره عيناي
❥❈┉┉┅━━❀❀━━┉┉❥❈┉
فرفح وليدي ومهجتي غارت الاعيون
يحسين هاك اخذ الولد اميه يسكون
اتفطر دليلي الونته بيه انه شلون
نشفت عيوني من الدمع من كثر مبجاي
❥❈┉┉┅━━❀❀━━┉┉❥❈┉
ضامي اشوفنه الولد ودموعه اتسيل
وناته من كثر الضما هدتلي الحيل
جف اللبن من درتي يوليدي ياويل
حالي مثل حاله ترا يبست لي احشاي
❥❈┉┉┅━━❀❀━━┉┉❥❈┉
شابح اعيونه يصد الي ويطلبني ارويه
ذابت مهجتي من القهر من انه اصد ليه
حيرني دهري بالولد جاوين اوديه
كلفه وجبيره محنتي محتاره بعداي
❥❈┉┉┅━━❀❀━━┉┉❥❈┉
اتنطر باب الخيم يرجع الي حسين
بأحضانه شايل مهجتي سكتله الونين
مفطوم رد ليه الولد بسهم الملاعين
شمسوي ويل ويه العده اوليدي وأضناي
❥❈┉┉┅━━❀❀━━┉┉❥❈┉
المن اللولي جا بعد والمهد اهز بيه
خالي صفه من الولد عبدالله ماضيه
بكماطه راح اطوي العمر موتي انه اتنيه
تمنيت اموت واندفن ماريد دنياي


بقلم خادمة أهل البيت الشاعرة أم عباس السكيني
https://www.tg-me.com/umabbas1979

لطميه مربعة للرضيع (ع)
(وزن التجليبه )
من ديوان (أرض الحتوف) ج٢

❥❈┉┉┅━━❀❀━━┉┉❥❈┉
عبد الله يلوع وفرفح كبالي
يريد الماي مني شسوه بحوالي
❥❈┉┉┅━━❀❀━━┉┉❥❈┉
يريد الماي مني منين اجيبنه
جف صدري يويلي شلون ارضعنه
ذابت مهجته وبعيني اشوفنه
حيرانه بكيت اذرف دمع عيني
❥❈┉┉┅━━❀❀━━┉┉❥❈┉
خذاه حسين للميدان يسكونه
شافه من العطش غارتله اعيونه
بلكي هالعده زغير ويرحمونه
انحنه ظهره ابو السجاد من جالي
❥❈┉┉┅━━❀❀━━┉┉❥❈┉
يصفج بالايدين وينثر دموعه
يون ونات ظل حسين مسموعه
وينج يالرباب تحضري لل لوعه
فطموه بنبل وليدج الغالي
❥❈┉┉┅━━❀❀━━┉┉❥❈┉
مذهولة فكر وانظر على وليدي
اسم الله نام المدلل واهز بيدي
اكل للروح من البجه چا هيدي
اهزن بالمهد بهداي انه الالي
❥❈┉┉┅━━❀❀━━┉┉❥❈┉
يامهده صبح خالي ويبجيني
ولكماطه يويل تصد بكت عيني
سهم الصوبه بحشايه راميني
خله حضني بعد ياهو اليناغيلي


بقلم خادمة أهل البيت الشاعرة أم عباس السكيني
https://www.tg-me.com/umabbas1979

نعي لعبد الله الرضيع (ع)
من ديوان أرض الحتوف ج٢
❥❈┉┉┅━━❀❀━━┉┉❥❈┉
بعدك انه ضايع دلالي
عبد الله يوليدي يغالي
والعيش عكبك ماحلالي

سهم العده ريته رماني
وماجاك يازهوة زماني
طكني الدهر يمه عماني

هديت حيلي يالزغيرون
غارت اشوفن هاي العيون
ضامي اصد لايمه ميهون

اعصر دمع عيني وارويك
بالروح لو بيدي انه افديك
من الموت يمه وين اوديك

تصرخ تريد الماي مني
وانه العطش كبلك كتلني
ياولد يالحالك ضهدني

من الكوم طلبولك اميه
انطر بكيت ترد عليه
وادعي انه وارفع اديه

جابك ابوك حسين محني
مذبوح مثل الطير يبني
عليك الدهر يمه لحكني

جابك اليه حسين مذبوح
ودمك يخر ياولد مسفوح
اصرخ عليك وصوتي مبحوح


طار العكل والروح هامت
من شفت عينك غفت نامت
وسهم العده بالنحر نابت

ياولد يالهديت حيلي
نارك دوت تحرك دليلي
مانمت يمه عليك ليلي


بقلم خادمة أهل البيت الشاعرة أم عباس السكيني
https://www.tg-me.com/umabbas1979