🔥 Бозорларда энди осон ва тез онлайн тўловлар

Мамлакатимиз бозорлари тўловларнинг мутлақо янги даражасига қадам қўймоқда. Президентнинг қарори асосида 1 ноябрдан бошлаб савдо жараёнларида терминал ёки нақд пулга эҳтиёж қолмайди. Ҳар бир тадбиркорга махсус QR-код берилади, харидор эса шу QR-кодни телефони орқали сканер қилиши билан тўлов бир зумда амалга ошади.

“Paynet” хизмати томонидан ишлаб чиқилган “Xolis Paynet” платформаси хусусан якка тартибдаги тадбиркорлар ва ўзини ўзи банд қилган фуқаролар учун янги имкониятлар очади. Платформа орқали электрон ҳамённи тўлдириш ёки ундан нақд маблағ ечиб олиш мумкин. Тушум ва солиқларга оид барча маълумотлар автомат тарзда бир жойда акс эттирилади.

✔️ Бугундан бошлаб Савдо-саноат палатаси ташаббуси билан бозор ва савдо комплексларида “Xolis Paynet” тизими тақдимотлари ўтказилмоқда. Мутасаддилар тадбиркорлар ва харидорларга платформанинг афзалликларини жонли равишда кўрсатиб бермоқда.

Шундай қилиб, ноябрь ойи мамлакат бозорларида рақамли тўловларнинг янги даврини бошлаб беради.

🕊Telegram 📱Instagram 📱Facebook 📺Youtube

Қишлоқ хўжалиги солиқ тизимидаги янгиликлар муҳокама қилинди

👍 Жорий йилнинг 29 октябрь куни Савдо-саноат палатасида чорвачилик ва паррандачилик соҳасида фаолият юритаётган тадбиркорлар иштирокида очиқ мулоқот ташкил этилди. Тадбирда Савдо-саноат палатаси раиси Даврон Вахабов ҳамда Солиқ қўмитаси раиси Шерзод Кудбиев иштирок этди.

Мулоқот давомида Ўзбекистон Республикаси Президентининг 2025 йил 4 сентябрдаги ПФ-153-сонли “Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида”ги Фармони ижросига оид масалалар атрофлича муҳокама қилинди.

Ушбу Фармон Президентнинг тадбиркорлар билан V очиқ мулоқотида белгиланган устувор вазифаларни амалга ошириш, аҳолини сифатли озиқ-овқат маҳсулотлари билан барқарор таъминлаш, шунингдек, қишлоқ хўжалиги соҳасини рағбатлантириш орқали норасмий айланмани қисқартиришга қаратилган.

Йиғилиш иштирокчилари 2026 йил 1 январдан бошлаб қишлоқ хўжалиги маҳсулотлари реализацияси учун қўшилган қиймат солиғининг «ноль» ставкаси жорий этилиши кутилган иқтисодий таъсири ҳақида фикр алмашдилар. Ушбу тартиб маҳсулотлар нархини барқарорлаштириш ва норасмий айланмани камайтиришга хизмат қилиши таъкидланди.

🕊Telegram 📱Instagram 📱Facebook 📺Youtube

Ўзини ўзи банд қилганлар ва якка тадбиркорлар учун янги рақамли платформа ишга туширилди

Ўзбекистонда ўзини ўзи банд қилганлар ва якка тартибдаги тадбиркорлар фаолиятини қонунийлаштириш ва рақамлаштиришга хизмат қилувчи “Xolis” рақамли платформаси амалиётга жорий этилди. Мазкур платформа Президентнинг 2025 йил 12 августдаги ПҚ-247-сонли қарори ижроси доирасида ҳаётга татбиқ этилмоқда.

Бугун Савдо-саноат палатаси раиси Даврон Вахабов иштирокида “Чорсу” бозорида платформа тақдимоти ўтказилди. Тадбирда бозор тадбиркорларига тизимнинг афзалликлари батафсил тушунтириб берилди.

Ушбу платформа тадбиркорлик фаолиятини юритишни соддалаштиради, мижозлардан қонуний тартибда тўловлар қабул қилиш ва барча фискал мажбуриятларни автоматик бажариш имконини беради. Бунинг учун на касса аппарати, на POS-терминал ва на бухгалтер талаб этилади.

Xolis’га рўйхатдан ўтиш жуда тез амалга оширилади ва тўлиқ онлайн тарзда Paynet мобил иловаси орқали бажарилади. Солиқ идораларига бориш шарт эмас. Рўйхатдан ўтгач, фойдаланувчи автоматик равишда солиқ тизимида ўзини ўзи банд қилган ёки якка тартибдаги тадбиркор сифатида бепул рўйхатга олинади.

2026 йил 1 январдан “Xolis” орқали даромад солиғи айланманинг 1 фоизи миқдорида автоматик ҳисобланади. Бу тартиб тадбиркорнинг йиллик айланмаси 1 миллиард сўмга етгунга қадар амал қилади. (Ҳозирги кунда шаҳарларда 4 фоиз, туманларда 2 фоиз, тоғли ҳудудларда 1 фоиз ставка амалда.)

Яна бир инновацион ёндашув — ҳар бир транзакция учун тадбиркорга кешбэк қайтарилиши. Аксарият ҳолларда кешбэк харидорларга берилар эди, бу эса савдо субъектларини рағбатлантиришда янги амалиёт ҳисобланади.

“Xolis”нинг жорий этилиши мамлакатимизда ўзини ўзи банд қилганлар сони ортиб бораётган бир шароитда уларга қонуний, осон ва шаффоф тарзда фаолият юритиш имконини тақдим этиши билан муҳим аҳамият касб этади.

🕊Telegram 📱Instagram 📱Facebook 📺Youtube