ليلة عبدالله الرضيع عليه السلام 👇

دم نحره مو ماي
سال اعلـه يمـناي
عـبدالله ويـدير الـنضر
دم طفلي بعدگ يالكمر
سال اعلـه يمـناي
ـــــــــــــــــــــــــــ
فـز الطفل مـن الضـمه وعـيونه حـمره
يبچي وينوح من الألم وبصدرة جمرة
ويعـايـن لصـوب النـهر بيدي وانـضرة
عبدالله وبهـذا الـوضـع حـيرني امـرة

جـودك لمـن راح
مـن المـهد طـاح
لـحك يبن فارس مضر
دم طفلي بعدگ يالكمر
سال اعلـه يمـناي
ـــــــــــــــــــــــــــ
عبـدالله بخـيـام الألـم يتـأمـل الجـود
ويعـاين لصوب الكمـر والجـبد ممرود
ماحسب يموت بضمه وعباس موجود
ومتاني عمـه للخيـم وبجـربـته يـعود

لا ماشـرب مـاي
ويـنك يـسـكـاي
وعـبدالـله سـلم للـقـدر
دم طفلي بعدگ يالكمر
سال اعلـه يمـناي
ـــــــــــــــــــــــــــ
عباس ياراعـي الشيـم يابيرغ حسين
ادريك ماتخلف وعد واحجايتك دين
هـذا الطفل مـن الضمه مانـام يومين
ارتفعت اصوات الحرم صوب الصواوين

مـن عفت الخيام
صـابـونـه بـسهام
من جنت ما واحد جسر
دم طفـلي بعدگ يالـكمر
سال اعلـه يمـناي
ـــــــــــــــــــــــــــ
ننخاك ياراعي العـلم بس انته ننخاك
ويهون علـينه العـطش رايـتك ولواك
ساقي العطاشى بالحرب حيدر السماك
بحماك يصرخ كل طفل ياعمي بحماك

مـا نروه هيهات
مات الأمل مات
يا اباالفضل ظهري انكسر
دم طفلي بعدگ يالكمر
سال اعلـه يمـناي
ـــــــــــــــــــــــــــ
عباس إذا طب للحـرب يفنـيها عباس
راية علي بـيده ترف حصـاد الأنفاس
مارهب بس بصارمه وبدرعه والطاس
خزرات ابوفاضل بعد هم تذبح الناس

وعضيد الحسين
يـكـلبـها صـوبين
ماشـفته يـحزام الظهر
دم طفلي بعدگ يالكمر
سال اعلـه يمـناي
ـــــــــــــــــــــــــــ
تمت بعون أسد الله الغالب
العبد الذليل علي الكعبي

آخر دللول ــ والسهم قادم بالدرب
آخر دللول ــ عبدالله يابـعد الكلب
وليدي زغير ومقـتول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
آخـر دللـول الــولد يـالغـالي نـام بـراحـه
لمن أشوفك تبتسم كلبي يخفك بجناحه
انته الكـلب يمـه عـبد وانته تـره سـباحه
بالدرب قادملك سهم وامك ولا مرتاحـه

آخر دللول ــ احچيها بلساني نعي
آخر دللول ــ وياها جاري مدمعي
ياحسره بالروح اطول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
خلـيني اسهـر يالـولـد نـام برغد وتـهـنه
عبدالله أشوفنك ترف ياطير مـن الجنة
لا تفـتح عيـونك ابد من تنفتح تفجـعنه
بلكي يجينه بجربته أبا الفـضل كـافـلنه

آخر دللول ــ وعيوني تنظر النهر
آخر دللول ــ ويعود ياريت الكمر
عبدالله ابني المـدلول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
فـكيت عـينك يالولـد شوية تريـد امـيه
عـباس طـايح عالنـهر والهـظـم بين بيه
ريجك تفـطر والـجـبد نيرانه مـامطفيه
عبدالله لو عني رحت بالاه اظل محنيه

آخر دللول ــ ويعيش بالعين الكسر
آخر دللول ــ دلالي خاف من الهجر
دلالـي بعـدگ شـيكول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
انطيك لزينب عمتك كتلها كلش ضامي
ولمن سمعني والـدك كرب لحـد خيامي
شالك يغالينه ومشه جنها مشت ايامي
حسبالي تتروه وترد رديت نحرك دامي

آخر دللول ــ مذبوح اجيت لخيمتي
آخر دللول ــ يا غـربتي ويا حسرتي
عن ذبحه ياهو المسئول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
مذبوح جابك الولـي ويلاه ينور عيوني
ضليت ابچي وحايره ماكدرو يسكتوني
عبدالله ياضي النظر فكـدك مغـير لوني
خضر جرح ماله دوه نزرع فوك جفوني

آخر دللول ــ وولـيـدي نـايم بـالـترب
آحر دللول ــ محروم ليش من العذب
دمع المصيبه المهمول
ومـاتـمم العمـرك حول ــ آخر دللول
ـــــــــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

حديث مولاتي فاطمة العليله
عن عبدالله الرضيع عليهم السلام
ـــــــــــــــــــــــــــــــــــــــــــــــــــــ
اسهر ليلي واحسب نجماته
واتخليهن ذني بنياته

احضانه السمه
صاحت فاطمة ــ ذني بنياته
ـــــــــــــــــــــــــــــــــــــــــــ
عبدالله باول ساعاته ــ
يوملي وبعيونه تكلم
يافاطم هاي آخر نضرة ــ
باجر تتروه شفافي بدم
بجفوفچ جنتي تلوليلي ــ
من وجهچ يضحك اتبسم
شال ايده واشر عالمنحر ــ
فاضت عيني وكلبي تألم

مهدك كلما صد وانضر خالي
انضر جن رامي النبلة كبالي
يخضبك بالدمة
صاحت فاطمة ــ ذني بنياته
ـــــــــــــــــــــــــــــــــــــــــــ
اختي رقية تشاهد وضعي ــ
كربت يمي تنشف المدمع
مسحت خدي بجف رقتها ــ
وحسيت بشبكتها موادع
طشت البالشام متانيها ــ
ثوب تردلي ولا ماترجع
باجر حتى اللي تغسلها ــ
من سياط الظالم هم تفزع

باجر نفسه اليذبح عبدالله
نارة يشبها بمهدة وتوصله
يشب مخيمة
صاحت فاطمة ــ ذني بنياته
ـــــــــــــــــــــــــــــــــــــــــــ
بت مسـلم لـمن شافتني ــ
تكول تكطع كلبي لحالچ
لو رد عودي من ارض الكوفه ـ
اوصـي لازم يتـعـنـالچ
ماتدري شيجره بوالدها ــ
وبالطف ياموقف يجرالچ
فوكاچ يحركون الخيمة ــ
ويسحكون اطفال كبالچ

بالكوفه يجرها الطاغي ويشتم
بحبل البي جرو جثة مسلم
بهمها تكلمة
صاحت فاطمة ــ ذني بنياته
ـــــــــــــــــــــــــــــــــــــــــــ
بعباية عمتي بسفرتهم ــ
ما تقبل تتركها جفوفي
تتلضه بنيـران الخـيمة ــ
وعليها بضهر الطف خوفي
كل ليلة اذكر عمتي وانحب ــ
والهم والحسرات ضيوفي
ياعمة اخذي الروح وياكم ــ
كلمات مـوادع ما توفي

صوت الريح شما حرك بابي
اركض متلهفة لملكه احبابي
الباب تكلمة
صاحت فاطمة ــ ذني بنياته
ـــــــــــــــــــــــــــــــــــــــــــ
جيت لعمي واحمل جربه ــ
وجن تكـلم جوده ويايه
لـو نبلـة هـناك تصـوبني ــ
اتبـده وعـذريـني بـهايه
لو ماكطعت جف الكافل ــ
كل نهر الطف آخذ مايه
يركع يم جدام سكينه ــ
وماتوكع عالكاع الراية

غـربه مسـبية تـعيش ابالي
وتفكد وين الطيب والغالي
تمشي بلا حمه
صاحت فاطمة ــ ذني بنياته
ـــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

شور


مكطوع نحرك بالسهم ويلاه يغالي
دمع الحزن ماينكضي عاش اعله بالي
اكتب قصيدة الذبحتك واسهر ليالي

اتفضل  عليه  بحسره
وبروحي اشعل جمره
خليني اعطش  لجلك
وتخنكني حيل العبره

يامولاي ياعبدالله
.......................
اكسرلي ظهري اعليك عبدالله حبيبي
وجويني  بالدمعات  واهاتي ونحيبي
يالظهر  ابوك  انكسر  لتخمد  لهيبي

انواع الاحزن عيشني
وذاك  الوجع  شوفني
وخليني اجزع لجلك
بمجلس  هلك  موتني

يامولاي ياعبدالله
يامولاي ياعبدالله
.......................
عبد الله يا ازغر  طفل كطعوله راسه
ميموت عايش بالكلب عطره وحساسه
وحسين عاشك نحرك ومن دمه باسه

انطيني كسرت خاطر
للداس صدره  الحافر
وفكره صفه يم زينب
لليسر.    تتطلع.  باجر

يامولاي ياعبدالله
يامولاي ياعبدالله
.......................
يالعمره مو كد الحجي ومصابه يحجي
اعظم  مصيبه سيدي من اذكرها ابجي
اصرخ عله الدمعات فوك اخدودي ضجي

خليني  اون  واتعذب
وبدمي كون اتخضب
كون  اشعر  ابهالوعه
إميه لو ردت  اشرب


يامولاي ياعبدالله
يامولاي ياعبدالله
.......................
يا طير  من  طيور  جنة  خالق  الكون
خليني يبن احسين لجلك اعمي العيون
سميني عبدك بيك هايم حييل مجنون

ارزقني حنيه بظهري
بجيني الك كل عمري
عبدك واصيح ادخيلك
او بيدك امسلم  أمري

يامولاي ياعبدالله
يامولاي ياعبدالله
.........................
تمت بعون أسد الله الغالب
العبد الذليل علي الكعبي

قصائد ليلة العاشر 👇

ليل وداع ولياني
طاف النوح صيواني

واسمع صوت بخيامي
امي تنوح للضامي
+++++++++++
اسمع نحيب بخيمتي..
وجن والده توصيني
قبليلي  باجر  منحره..
وشميلي صدر حسيني
انجان انه ضلعي نكسر ..
وكل عمرچ تنوحيني
يتساوه صدره وي الارض ..
وبمذبحه  تشوفيني

جبده هناك ثلثينه
دم يسيل بجبينه
امي تنوح للضامي
+++++++++++
من خيمة الهم والالم ..
صوت رتفع بس ياصوت
صوت السكط منها الحمل..
لمن عصرها الطاغوت
لعبدالله راحت بالالم ..
يمه تشم ريحة موت
عبدالله من كثر العطش..
يشابح وينحب بسكوت

بمهد الموت ناغاهه
طفل احسين بجاها
بهالحال كدامي
امي تنوح للضامي
+++++++++++
بالخيم لن وجه النبي..
بليل  الالم  لاكاها
والدها بالطف شافته..
لا مو حلم رؤياها
هالشاب باجر جبدته..
ماتنوصف بضماها
باجر بساحات الحرب..
يوذرون صورة طه

اه بالاه تتحير
ام تنوح للاكبر
هم عطشان هم دامي
امي تنوح للضامي
+++++++++++
صوب الشريعة توجهت..
عالماي تجري العبرة
تعلم  ابنها  بالكمر ..
يكسرون باجر ضهره
هنا توكع يمين الوفه..
وهنا اطيح اليسرة
بجفينه باجر تشتكي..
يوم القيامة الزهرة

يم الماي احساسي
تبجي لحال عباسي
بين الليل والامي
امي تنوح للضامي
+++++++++++
تمت بعون أسد الله الغالب
العبد الذليل علي الكعبي

مـحرم ليـلة الـعاشـر ــ وداع حـسين وعـياله
اميـرات الـولي كلـهن ــ اجـنه وكـعدن كـبـاله
سـوالـفهن يبو اليـمة ــ دخـيـلك لا تــفـاركـنه
نضـيع بـنـار غـربـتنه ــ دمعهن هــذا مـرساله

بالخيمه كـعدن والدمع سال هواي
وعـباس اجاهن هوه أعـظم سكاي
بحـماي كـلهن مـايـمر بيچن ضيج
واعـتذر مـنچن لـو متت يم الماي

زينب حچت يـاكافلي
ياظهر الحسين وعلي
شيصير بـاجر بالحرم
من تظل ماعدها ولي

الوداع الوداع ياحسين
ـــــــــــــــــــــــــــــــــــ
امـيـرة كـافـل خيامـه ــ جـبل مـاتنثني زينب
تعب منها الصبر ندري ــ لجـن هيه ولا تتـعب
تسولف والجرح ينزف ــ اشـوفن باجر الغالي
يحير بـكربله وجسمه ــ اويلي دامي ومسلب

صـوت الامـيرة هسـه بين مبحوح
تعـرف زلـمـها بالـفـجر مـنهه تـروح
يحسين خل يصير كلشي ولا هاي
حيلي تكسره من أشـوفك مذبوح

فاضت دموع ام الستر
وام الـمـروه والـصبـر
وحسين حچاها بهظم
لخدرچ فده هذا العمر

الوداع الوداع ياحسين
ـــــــــــــــــــــــــــــــــــ
اجته اسكينة مهظومه ــ تشم حسين بالمنحر
تكله بويه كلشي اكـدر ــ بس عالفركة مااكدر
بانـت دمـعـتـه بعـيـنه ــ مـن شـافها ملجومه
ليل العـاشـر جـروحـه ــ كلها بكلب ابو الاكبر

هـذا الوداع ايشيب هـواي كـلـوب
مـاكـو مفـر يانـاس مـن المـكـتوب
اسكينة تشم حسين وتصـيح احاه
عالوجه باجر بويه أشوفك مكلوب

بين المواجع والحزن
موادع ولا يغفه جفن
ياريـت مايطلـع فجر
غالينه باجر يـنسحن

الوداع الوداع ياحسين
ـــــــــــــــــــــــــــــــــــ
رقية وعـاتـكة وخولة ــ رباب ورملة انضرهن
تـغـير لـونـهـن واضـح ــ صـبح باجر يحيـرهن
الرباب تبوس عبدالله ــ ورملة تنادي ياجاسم
رقية وعاتكـة وخـولة ــ ابو اليـمه يـصـبـرهن

خولة تكـله بويه فهـمنـي شـلون
بفجر النوايب ضدنه كل هذا الكون
صاحت رقية بويه ادوسن عالنار
والكوم شمـات وابـد مـيرحمون

وبعاتكة فاض الجرح
تتخيل الـراس بـرمح
كالـت يبـويه بلا ذنب
باجر أشـوفك مـنذبح

الوداع الوداع ياحسين
ـــــــــــــــــــــــــــــــــــ
وداع وحضرت الزهره ــ واجه طه واجه حيدر
نضرهم كلـه يـم زينب ــ غدا مـن تركض بهالبر
يشوفون الحسين يون ــ ويكلهم باجـر عيـالي
بعـد ذبحـي يعذبوهـم ــ نجـوم وكـلـها تتطشر

وهنا بچت مـكسوره امـه الزهراء
وصوت النبي يحسين يبني ويلاه
حيدر يكول امنيتي أحضر بالطف
وحسين سـالم صـدره أتمـنه الكاه

ضجت حرمهم صايحه
بـاجـر زلـــمـنه طايـحه
وماتبقى لا راية وخيم
وزينب غـريبه ورايحه

الوداع الوداع ياحسين
ـــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

صحره وبنتظار الماي
جـبدي صـار يادنـياي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
فـجر الـعـاشـر اذانـي ــ يبس كلبي والساني
غريب وماتو اخواني ــ كسرتي ـــ جبيره

نحيل وأمشي بالكوه ــ اكـوم واكـعد اتـلـوه
ودليلي بـناره يتچوه ــ هظمتي ـــ جبيره

بروحي شصار لمن راحت انصاري
سهم العـطـش تـالي صار خـطاري
بيه الناس شمتت واني ابن حيدر
روس اطيح مـن ينجاب بالطـاري

صار الابد مـامقـعـول
بعد الـكفل والمسئول
شـيردلي الكـمر وياي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
شفت الموت ياخذهم ــ ومـحتـار واشـاهـدهـم
ولدي بيش اعـوضهم ــ مـحـنتـي ـــ جبيره
الاكبر طاح يم جاسم ــ تتطـبر جسمه بالصارم
وعـليه تتفـرج الوادم ــ شـمـاتــه ـــ جثيـره

جعفر عون ويه عبدالله اشـوفنهم
يامحلى اخوتي شكـبره مـوقفـهم
بان العـطش بيـهم والنهـر قـاسي
يروي الكاع ليش وعاف جبدتهم

مـاي الـنهر مـامعذور
خله الزمن بينه يدور
بينه العطش ظل حداي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
راح الـعـازتـه عـــــازه ــ راح الجــان عــكـازه
كلـبـي الـفـاكد اعـزازه ــ حسرتي ـــ جبيره

حسـين بديـرة الغربه ــ حجار بجبتها يضربه
حياتي بلا كمر صعبه ــ غـربتـي ـــ جبيره

فوك الشاطي ظل عباس ياوسـفه
سهم العين جـرحه بـله شـيوصفه
بيش يردلي حيلي ومنذبح شـفته
طاح وتـالي خله بالـظـهر خسـفـه

راسي كله ابيض صار
فاكد زلمـه كلـش حار
شـيب يارمش عيناي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
صعب ماينوصف حالي ــ شماته ضحك اكبالي
احير بجـرحي بعـيالـي ــ مصيبه ـــ جبيره

خيامي بعـازة الحامي ــ جبدهم يلهب وضامي
غـريب وجـارت ايامي ــ رزيتي ـــ جبيره

جبت عبـدالله بيدي وحتى يتروه
بـسهم تـرويه نـاس الـمـالها مـروه
مـثل الطير فرفـح وانـضر ولـيدي
خذيته للخـيم واعـثر بكـل خطوه

زينب شـافته مذبـوح
طلعت امه حيل تنوح
يادهري شكبر بـلـواي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
أشوف عيالي مفجوعه ــ وعلية اعداي مجموعه
يحچيهم نكسر ضلوعه ــ وأذيـتـي ـــ جبيره

برمح وحـجار طكوني ــ وحـيد ومـا يـعيـنوني
طحت من مهري شافوني ــ وكعتي ـــ جبيره

اجاني الشـمر وتـربـع على صدري
بوجهه ضحكته من يـكطع بنحري
صحت عطشان ماكو امـيه تروني
ذبحني من الكفه بهايه جهل قدري

هـدو عالخـيم بالـنار
وعيالي صفت طشار
يازينب سبـيكم چاي
والـمـرن علـيه هـواي
مصايب ـــــ مصايب
ــــــــــــــــــــــــــــــــ
تمت بعون أسد الله الغالب
العبد الذليل علي الكعبي

من الخدر بادرت تجيتك ــ ما لكيتك ــ
ياكشختي
نـار كـلبـي ونــار خـيـمه ــ دنيـا هيمه ــ
ياحسرتي

جـابـني مـهـرك وجيت
بعيني دمعه ومابجيت
تالي اصـير بـلايه بيت

غربه وجروح ــ غربه وجروح
ـــــــــــــــــــــــــــــــــــــــــــــ
خـويـة يابيت الـيلمني ــ رحت عني ــ
وين ادورك
بالرمل مدفون جسمك ــ سال دمـك ــ
نكطع نحرك

جدمي من يعثر اكول
وين اخوي ابن البتول
عالصدر ارسـم خيـول

غربه وجروح ــ غربه وجروح
ـــــــــــــــــــــــــــــــــــــــــــــ
خوية فوك التل كـلامي ــ انته دامي ــ
خوية وينك
(أن كنت حيآ فآ دركـنا) ــ خوية ضعنه ــ
دون عـينك

نجان مـيت ياحـسين
وين اروحن گلي وين
احچي كلـمة يالحنين

غربه وجروح ــ غربه وجروح
ـــــــــــــــــــــــــــــــــــــــــــــ
راسك بـرمحه رحتله ــ خوية كتله ــ
شوف زينب
أه ضـلـت دون والي ــ ضيم حالي ــ
كلبي شيب

خنصرك اسمع يصيح
طــاح راعـيي ذبـيـح
خويـة دلالـي جـريح

غربه وجروح ــ غربه وجروح
ـــــــــــــــــــــــــــــــــــــــــــــ
دمـك الـيجري بجبينك ــ ضـاربـينك ــ
بـالحجاره
خوية حد الان ادورك ــ وين صدرك ــ
فوكه غاره

خـوية ياروح الحنـان
هظم زيـنب تـوه بـان
من طحت راح الأمان

غربه وجروح ــ غربه وجروح
ـــــــــــــــــــــــــــــــــــــــــــــ
تالي ماظل امل عندي ــ راح يبـدي ــ
سبي الـعيال
زيـنبك تـحـتار حـيـره ــ ديـرة ديرة ــ
بجفي الحبال

هالضـعن يـحدي غريب
بينه ظل يـاخـذ يجيب
بس تعب صار النصيب

غربه وجروح ــ غربه وجروح
ـــــــــــــــــــــــــــــــــــــــــــــ
خوية هـذا الصار بينه ــ مــن مـشـيـنه ــ
عـذبـونـه
بالسياط متون طاحت ــ طفله صاحت ــ
وين ابونه

اكلوبنه تحـن عالخيام
الدنيا بعدگ كـلها شام
ارقية كالت ويـن انـام

غربه وجروح ــ غربه وجروح
ـــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

قصائد للامام الحسين عليه السلام 👇

اول عشك وآخر عشك
اسمه مـن اكوله أحترك
كلها وهـم وانته الصدك ــ ياحسين 1

تدوي جـروحك بالنبض
دمك يصب فوك الأرض
سالفـتي يمـك ماتفض ــ ياحسين 1

يعشكي الما الك ثاني ــ حبيبي الاول حـسين 2
أحـبـك الله خــلانــي ــ يـسلـطان الـسلاطـين
بحنانك يـلهج لسـاني ــ عطف رب السمـاوات
اضـيع وانته تـلكـانـي ــ عمر منطيني وسنين

باعتني دنياي ــ وبس انته شراي
شكرآ يمـولاي ــ حسيناه 3

ماعندي كل راي ــ منك تره الراي
جايبـني حـداي ــ حسيناه 3

حلم عمري اون وابچي 4
واذا كاللولي مصلحچي
امـوت روحي لعـيـونك
كلام من الكلب أحچي

يامولاي ياابا عبدالله
ــــــــــــــــــــــــــــــــ
انته الـعـشـك مـن الأزل
مجـلـسك شـفـاي العـلل
انته الوطن وانته الأمل ــ ياحسين 1

مسلوب ثـوبـك ياتـرف
كلها غرب وانته العـرف
كلبي لوصالك ظل يرف ــ ياحسين 1

حياتي بالــعزه دمـعه ــ أصـبها بحـركه وبـاه 2
حبيبي ماسلم ضـلعه ــ غريب ودامي ويـلاه
جرح ماينسي وضعه ــ وكسرها كل الـكلوب
انه الخادم انه صنعه ــ وانه من مهدي اهواه

بروحي ردت نار ــ تحركني واحتار
واتـذكــر ازغــار ــ حسيناه 3

سالفـتي انعـيك ــ من كلبي ابچيك
رايــد اواسـيـك ــ حسيناه 3

عـطر رب السـمـه انـته 4
مشه راسه برمح شفته
حـوافر داست بصدرك
ولا هـابـت كـبر بـخته


يامولاي ياابا عبدالله
ــــــــــــــــــــــــــــــــ
سـلمـت بيدك هـالـعـمر
مـن خيمتك رايد جـمر
يچـويني وبـهيـمه افـر ــ ياحسين 1

يلي جبتني مـن العدم
وحطيتني ويه الـخدم
شكرآ الك يـابو الـشيم ــ ياحسين 1

سـوالف كـلبي مكـتوبه ــ دمـعتي وحسرة الروح 2
غريب وروحه متـعـوبه ــ جـمال الـباري مـذبوح
ضلوعك شنهي مطلوبه ــ حـسين ومـنـك تـروح
اليموت بغـربه محـبوبه ــ يـمـوتـه الازم الــنـوح

المحبوبه مـذبـوح ــ سالفته الجروح
صوته يجي يروح ــ حسيناه 3

مـسلوب الـثيـاب ــ وشكبره المصاب
جرحه يظل صاب ــ حسيناه 3

فضل منك اجي واحضر 4
ونيني بـمجـلسك يـكـثـر
اشكرك واشـكر افـضالك
ويعـدها لسـاني مايكـدر

يامولاي ياابا عبدالله
ــــــــــــــــــــــــــــــــ
سـميني يـمك أي اسـم
يم كسرتك كون انهظم
بس حـزنك أتمـنه أشم ــ ياحسين 1

يـاكـلـمة الله وغـيـرته
تفرهد خدر من عيلته
وتجرحلي كلبي غربته ــ ياحسين 1

مشه فوك الرمح راسك ــ وسبي زينب جراحات 2
ذبيح وينبض حـساسك ــ اذا طـاحت يتـيـمـات
وهظم يالمعتلي جاسك ــ تشوفه بعينك اجروح
غـريب ومـات عـباسـك ــ وجـثيره بيك لجـمات

زينب عله النوك ــ وطبوها للسوك
هاي الها متـلوك ــ حسيناه 3

تتفـرج الـنـاس ــ ولن دخن الراس
ينـدب يـعـباس ــ حسيناه 3

اصيح بلا وعي وانحب 4
هظـيمه تـغـربـت زيـنب
أشـوف الدنية مو دنية
اذا بت حـيدره وتنسب

يامولاي يا ابا عبدالله
ــــــــــــــــــــــــــــــــــ
قـران بس فـوك الثـره
شـفت الحوافـر تـنـثره
واختك غريبة اميسره ــ ياحسين1

يـارحـمة الله وقـدرته
ماتنحمل بس طيحته
وبروحي عاشت ونته ــ ياحسين1

عـذاب الـطف يبچيني ــ جرح مـاريـدن انساه
انام واصحه يحسيني ــ واصـيـحـن اوغـريباه
يمجروح ودمـع عيني ــ يصب ويحچي بلصار
عله حزنك انته دليني ــ وضعنكم رايـد انـعـاه 2

بين السبي وبين ــ ذبحك يالحسين
تطلبني جم دين ــ حسيناه 3

مشيـني الـشـام ــ كسرني كسر جام
يم حرك الخيام ــ حسيناه 3


خلقني الباري أخدمكم 4
أمـوت بـلا مـجالـسكم
ونيـني والجـرح رحمه
بصـدق نـية اذا الـكـم

يامولاي يا ابا عبدالله
ــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

رحلت عشك ــ تطلب خلك ــ رحلت غرامي
شـوك ودمع ــ عالمـنصـرع ــ والجسمه دامي

منطيني كلشي ــ وبكيفه امشي ــ
مسويني خادم حضرته
أشـكـر نعـمـته ــ وفضله رحـمته ــ
طـببـني بيـده لـخيـمته

فضله جزاني هواي
وخـلاني عندي راي
سـالفـتـي يامـولاي ــ أشكر نعمتك

يامولاي يامولاي
ــــــــــــــــــــــــــ
الحب الصدك ــ كون احترك ــ حركته خيامك
عـايـش جـرح ــ راس برمح ــ ضيفك سهامك

رحلت دمعتي ــ تبدي بحسرتي ــ
وعيوني غيرك مابچيت
عـاشك ونيني ــ وكلمة بجبيني ــ
عرفتك الـحظ والـبخت

سولفتك بكل يوم
وانه بكلب ملجوم
ياضـامي يامظلوم ــ تكبر غربتك


يامولاي يامولاي
ــــــــــــــــــــــــــ
ابچـي دهـر ــ واشــبـع قـهـر ــ ومـقـصر انـي
لا مـنــذبـح ــ لا مـــنـجـــرح ــ مدري شجاني

ضربه بجبينك ــ ومعطشينك ــ
ومـاغيـرتي مـصيبـتك
خنصر ضياعه ــ لجفك وداعه ــ
ومجلب انـي بشيمتك

جايب ذنوبي وچاي
تقبلـني كـل رجـواي
خلصـني مـن دنـياي ــ اسكن حضرتك

يامولاي يامولاي
ــــــــــــــــــــــــــ
جايب كلب ــ اشكد منطلب ــ وخـاين امامه
منك رحـت ــ وليك ارجعت ــ مثل الحـمامه

عفتك واجيتك ــ واكف لكيتك ــ
وتكلي بيتك حضـرتي
خـيرك مـلانـي ــ ومااخجل اني ــ
حاير بروحي ودنيتي

يمته انه اوفي وياك
وخليـني مـا انـسـاك
كـدامــي طـايـح ذاك ــ طولك اشوفه

يامولاي يامولاي
ــــــــــــــــــــــــــ
اعظم خـيم ــ لاهل الشيم ــ طاحن عليهم
طفله وطفل ــ فوك الرمل ــ ومـركـضـيهم

ضايع ضـعنكم ــ بـكـبر حـزنـكم ــ
ماهـمني بيـكم مـا جره
مـاعندي كلـمه ــ ولا كلت زحمه ــ
بالهيمه مـن تطـلع مـرة

غربه وهظم وجروح
وزلمة عـلـي مذبـوح
ضعن الله وين يروح ــ والحادي شامت

يامولاي يامولاي
ــــــــــــــــــــــــــ
تمت بعون أسد الله الغالب
العبد الذليل علي الكعبي

غاضب لمن طب ليهم
حسين الـيوم يبچيهم
ــــــــــــــــــــــــــــــــــ
بعـده مـاهــجم لا شـاد حزامـه
شاف الكوم شردت كلها جدامه
مايخطي بضربته عدل عالهامه
حيدر ثاني طبها مضيك الثامه

يـازلـمـه الـيـطلع بيهم
حسين الـيوم يبچيهم
ــــــــــــــــــــــــــــــــــ
حسين بعزمه هد وطيح الوادم
زلـمة زود بيـده يـرهب الصـارم
كالـو حيـدره هذا وكـمر هـاشـم
طب الحـومه ماخله نحـر سالم

دم عالـكـاع مساويهم
حسين الـيوم يبچيهم
ــــــــــــــــــــــــــــــــــ
كل الروس مثل الريش طايـرها
جف الله الملاحم دوم حاضرها
كل صعبه نشوفه بجفه كاسرها
مثل النار هيج الحـومه وجرها

مـوت بجـفه مراويهم
حسين الـيوم يبچيهم
ــــــــــــــــــــــــــــــــــ
كـاع الله بعدوه تـمـيـل خـلاها
وراية حـيدره بكـل زود عـلاها
زلم وخيـل تخضع يمه شفناها
بچاهم بچـي الـنـسوان وتباها

بشفرة سيفه يحاچيهم
حسين الـيوم يبچيهم
ــــــــــــــــــــــــــــــــــ
ماهمه العطش لا همته الكثره
هز الـكاع بيهم هـزت الشجره
ذاك الطاح هذا الساحكه مهره
نفخة صور هيج الناس تعتبره

سـيفه النار ويكضيهم
حسين الـيوم يبچيهم
ــــــــــــــــــــــــــــــــــ
ينضر عالضحايه ويبتسم قائل
كلها ماتساوي مداس ابوفاضل
خزرت حيدره هذا الأسد شايل
هذا حسين موت يشرب العايل

موت الاحمر يسكيهم
حسين الـيوم يبچيهم
ــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

الحمدلله  الشكر لله شكرا للزهراء ع شكرا للحسين ع شكرا لسيدي صاحب الزمان ع
تم نشر منهاج شهر محرم الحرام لسنة  1445
ان شاء الله
واي استفسار (كخطأ مطبعي او لحن او.....) حول القصائد التي تم نشرها اني بخدمتكم

وهذا رقم الهاتف 07705628830
#خادمكم الاقل علي الكعبي

قصايد لصاحب الزمان عجل الله فرج 👇

بالرسالة .. أبدي أكتب قصتي
بالرسالة .. يا ابوصالح دمعتي
بالرسالة .. انته كلشي بدنيتي
جرحك انعاه .. جرحك انعاه
+++++++++++++++++
عبد ومراسل سيده
الشوك جابه وكايده .. واجالك
شفتك انه مره بحلم
مكسور ظهرك ياشهم .. يحالك

جرح بيك .. يبجيك .. الحسين ابلايه ناصر
ركض خيل.. خذه الحيل.. صلف دوس الحوافر

متى الكاك واشوفك
بدمع زين واطوفك

بيك اسولف .. عالرايح  وعاللي اجه
بيك اسولف .. الصلب يم ذكرك بچه
بيك اسولف .. كلبي كل يومه حچه
جرحك انعاه .. جرحك انعاه
+++++++++++++++++
اصفن واحير بقصتك
ليلك  نهارك  دمعتك .. جريه
ماشفت راحه بهالعمر
دلالك امشيبه الصبر .. عزيه

حچي الروح .. يمذبوح .. ولا يطفن خيامه
جبل طاح .. ضعن راح .. بعد راعي الشهامه

دمه تسيل عيونك
وكع  لون  جفونك 

ياجفونك .. ذابلات امن الدمع
ياجفونك .. خلصن مثل الشمع
ياجفونك .. ونينهن نظل ينسمع
جرحك انعاه .. جرحك انعاه
+++++++++++++++++
كل ساعه اشوفنك شكل
همك سهم صوط وحبل .. غربتك
يمته  اساعد  حسرتك
ويمته احس  بلوعتك .. وكسرتك

يمتعوب .. بالغروب .. مصابك شلع كلبك
نواعيك .. بواچيك .. اليسر كلش امتعبك

تفز بيك جروحك
جرح ماذي روحك

ادري يومك .. عاشر أبكل الوكت
ادري يومك .. حزن لا ما خلصت
ادري يومك .. ما يمر  الا ونحت
جرحك نعاه .. جرحك انعاه
++++++++++++++++
يكسر قوانين الصبر
خنصر عظيم ومنبتر .. بطفوفه
اه الضلع داسه الفرس
أغلى جسم من نرفس.. تشوفه

شيظل بيك .. اناديك .. دليلي اعليك خايف
دمه انحور .. يعاشور .. يعينك بيهه  شايف

يبو الروح واهلها
فقط  انته  خلها

تارس الكاع .. دمه عيونك عالأرض
تارس الكاع .. جرح وحساس ونبض
تارس الكاع .. وروحي ابچيلك فرض
جرحك انعاه .. جرحك انعاه
++++++++++++++++
يالـمهدي يايوم الفرج
تحي السنن تحي المهج ــ طلعتك
ثـار الـزجيه وحـيدره
وثـار الحـسن يم ترى ــ وفـهـمتك

حسـيناه ــ اويــلاه ــ ذبيح وضـل يـندبك
والضعون ــ يريدون ــ يبو الثـارات قـربك

يـنادوك اوتـجيهـم
وتفل حبـل اديـهم

ويلي زينب ــ حـيل تـعـبها اليسر
ويلي زينب ــ يومك تضل تنتضر
ويلي زينب ــ بيها عايش ياكسر
جرحك انعاه .. جرحك انعاه
++++++++++++++++
تمت بعون أسد الله الغالب
العبد الذليل علي الكعبي

درب  السبي .. كاسر ظهرك
تبجي امسلم .. للباري أمرك
دم صبن دمعاتك
فكرك  يم عماتك
معروفات آهاتك .. من الطف مصدرهن
................................................
طيحت كافل بيك انرسمت .. واصياح الايتام
روحك ويلي اشكد نهظمت .. بيها تعيش الام
لوعه  او جمرة بيك  لتمت .. صابنك  ابسهام
طاح اعليها الكاع  اللجمت .. بعده اطيح اخيام

طاح الكافل .. كبل  اخيامه
جان الراس .. حسين عمامه
عينك شافت كلشي
هظمه بدمك تمشي
بالمجلس صيحاتك .. من الطف مصدرهن
................................................
احسين وذبحه  كاسر ظهرك .. وتسولف دمعات
الطف وجرحه مشيب عمرك .. وبكلبك صرخات
طايح   دامي  مزيد  كسرك .. دمعاتك  جمرات
كطعو  نحره   ها  لو  نحرك .. ها  يا بو الثارات

تبجي لوحدك .. فكرك  يمه
حسرة بعينك .. لوعه ولجمه
جسم حسينك وينه
عل الكاع مطشرينه
او ماتخلص لوعاتك .. من الطف مصدرهن
..................................................
اليمشن أسره بذيج الهيمه .. تنعاهن واتصيح
ليهن  وسفه   ماكو  خيمه .. تذكرهن واطيح
كلبك عاشك نوحه وضيمه .. بعيونك توضيح
اعليهن  لا ما  حنت  غيمه ..  تقراها ابتسبيح

تسبيحاتك .. هظمو زينب
كلبك يصبر .. كلبك يتعب
صدر حسين مكسر
ضعن  الحره ميسر
يل عشت بلجماتك .. من الطف مصدرهن
...............................................
احبال مكيده عيال الكافل .. وحسينك مذبوح
وحدك حاير  دمعك  سايل .. هايمخاوي النوح
الله  يعينك  كلبك  شايل .. ويلي اهواي جروح
لجرح احسينك انته الكايل .. دم عينك مسفوح

سيل ادموعك .. غربه وحسرة
وكلبك مفجوع .. ابجم  كسرة
سالفتك بدموعك
ويحير موضوعك
اومن يعلن وناتك .. من الطف مصدرهن
..............................................
ادعي وانعه وابجي ابحسره .. يا رب يا قيوم
ليش  المهدي  بكلبه  الجمرة .. فرج  للمهظوم
والله   محير   العالم   صبرة .. ومغيرله ارسوم
مثل احسين احساسي بظهرة .. من الطف ملجوم

يظهر هوه .. يعدل الميله
كل مجلس .. ابجي وادعيله
بكلب احسين الذايب
يا رب رد الغايب
يالمهدي وحيراتك .. من الطف مصدرهن
..............................................
تمت بعون أسد الله الغالب
الشاعر علي الكعبي

حاير امنين ابدي وياك
انة الاخونك وانة الاهواك
مستحي من الحجي
غوركت عيني من البجي
يابو صالح  يابو صالح
............................
ابدي اعتراف ابذنبي الك.    اوبيك انة اتوسلك اتسامح اوتعفي اسئلك        هايابقية من هلك
هذا اعترافي بل ذنب         ومخالف واتبع كلب.
اوهذا مو فعل اليحب.     ومبين ابروحي الجذب

عمري راح واني حاير
عود اتوب اليوم باجر
من ذنبي صاير ترتجي
غوركت عيني من البجي
يابوصالح  يابو صالح
............................
ثاني امر وبلاصدك       اني ادعي شايل عشك
ابذكرك ارائي مختنك.    والطروتك مامش خلك
لا عاشك ولا منتظر       ولاهمني امامي المنتظر
وبحالتك ما مفتكر.        ولافاني الك لحضة عمر

بس ذنوب ابخلكي شايل
ويومية وي الهوة مايل
عل النفس جاي اشتجي
غوركت عيني من البجي
يابو صالح  يابو صالح
..........................
ثالث امر هوة الدعاء.      بي الهج ويعلة النداء
يشهد علي رب السماء.      لتهمني شدة ولا رخاء
الامرك ولا مهتم ابد.       واني اذكرك بس بلشدد
وكت الرخاء اني ابتعد.      عنك ايا خير الوعد

ادري بيك الضيم والهم
ولحالك اني لا ممهتم
يمتة يل غايب تجي
غوركت عيني من البجي
يابو صالح يابو صالح
..............................
تحمل اسم صاحب لامر.  وجيت اشتكي يمك بامر
مني الذنب بايك عمر.      وبكلبي نار وتستعر
يابو الوفة وماي العذب.      رايد تمشيني بدرب
لازلة بيه ولاذنب.            منك اكون انة بقرب

فدوة لا تتركني طايح
مدلي ايدك يابوصالح
منك الفزعة ارتجي
غوركت عيني من البجي
يابو صالح  يابو صالح
................................
هذا كلامي واعتذر        خايف خطاء مني بدر
واتمنة لو بية تمر.         حتلو حلم اني انتظر
شوفت خيالك يافرض      رايد ولو منك قرض
كلبي اريدة يتعض         هسة انتة ساكن ياارض

كلي ابأي الاماكن  
بلارض لو سمة ساكن
مذنب وانتظرك تجي
غوركت عيني من البجي
يابو صالح   يابو صالح
.............................
تمت بعون اسد الله الغالب
الشاعر علي الكعبي

شور

يامهدي الروح .. يامهدي الروح
تبجي عليك بكل وكت منك تريد الاجية
حاير ادريك .. حاير ادريك
وبروحك آهات وحزن يا سيدي ولطمية

يمهدي .. انتة الروح البية
يمهدي .. جرحك المسبية
يمهدي .. بيك نوح ارقية

يا غايب يا غايب يا غايب
.................................
يامهدي العين .. يامهدي العين
فاديهة الك هيه ودمع حته اواسي اجروحك
اخ من الطف .. اخ من الطف
جم نار شاعل بالكلب يلي غبت وبروحك

يمهدي .. تشب نار اخيامك
يمهدي .. دمع كلهة ايامك
يمهدي .. بية كون الامك

يا غايب يا غايب يا غايب
..................................
حزنك ميروح .. حزنك ميروح
عايش بعينك ما رحل ممدود وي اسنينك
طايح عباس .. طايح عباس
سهم الذي لاح الكمر جنه تحسه ابعينك

يمهدي .. بدر عدكم عالنهر
يمهدي .. بيك اينشاف القهر
يمهدي .. منكسر منك ظهر

يا غايب يا غايب يا غايب
..................................
ياجرح احسين .. ياجرح احسين
وياك كل لحظة يضل أكبر جرح بعيونك
دامي ومذيوح .. دامي ومذبوح
ومصيبتة ماعافتك ماراحت أمن اظنونك

يمهدي .. ادخيل هاذه اونينك
يمهدي .. تنحب اعله احسينك
يمهدي .. ضيم كلها اسنينك

يا غايب يا غايب يا غايب
.................................
نار الخيمات .. نار المخيمات
بكلبك يشبن كل مسه محد يجي يطفيهن
صاحت شمات .. صاحت شمات
امخدرات ال نبي عكب الاهل نسبيهن

يمهدي .. سبي الخدر نوحك
يمهدي .. ماتتطيب اجروحك
يمهدي .. ويلي ذابت روحك

يا غايب يا غايب يا غايب
..................................
تمت بعون أسد الله الغالب
العبد الذليل علي الكعبي