(\_/)
( -_-)
/>💔>

يوم الواحد الايام دي عباره عن :

‏صباح الخير
عادي مجتش على دي
No Rick, No fun
مش نصيبك يا ابراهيم
skip skip skip
الحمدلله على كل حال
تصبح على خير

جماعة بجد والله عشان الواحد طفح والله هو انتو عملتوها would ولا will

عرفت امتا انك اتدمرت وانك مبقتش زي الاول؟
لما بقيت اصحا كل يوم الصبح ومسمعش عصفور طل من الشباك قالي ي نونو لعايوده الايوبي
وحشتني اغاني عايده الايوبي اوي لما ارجع من اخر ماده هشغل اغنيه على بالي وانا راجع وافضل اتخيل واعمل سيناريوهات ف دماغي(حاجات مش بتحصل) وارجع زي الاول

-
كلمه بسيطه، بس هي كنز

"أول سطر حلو وياكي وأخر سطر كاتبه بدموع "
هتشتغل ف دماغي وانا بسلم بكره آخر ورقة إمتحانات ثانوية عامة..
لا يا معلم دي الدنيا كلها دخلت في عيني مش بعيط ولا حاجة..

فانية والله.. بس مدغدغانا.

مفيش حاجة فى الدنيا بتبعث فى القلب الهدوء والسكينة زي ترتيل المنشاوى لأواخر سورة إبراهيم..!!
يفضل يحصى فى النعم لحد ما يوصل لقوله :
﴿ وَآتَاكُم مِّن كُلِّ مَا سَأَلْتُمُوهُ ۚ وَإِن تَعُدُّوا نِعْمَتَ اللَّهِ لَا تُحْصُوهَا ۗ إِنَّ الْإِنسَانَ لَظَلُومٌ كَفَّارٌ﴾
[ إبراهيم: 34]
تحس إن كل حاجة هتبقا بخير بمجرد ما تسمع الآية دى وهتفضل دي آيتي المفضّلة
لأنها تذكّرني إن اللي بيطلب من ربّه، عمره ما بيرجع خايب.الآية دي مش بس بتتكلم عن عطاء ربنا، لكن عن كَرَم ما بيتوقفش، عن نعم بتوصل لنا حتى من غير ما نطلب،
وعن حاجات كنا فاكرينها مستحيلة، وربنا بيدبّرها في وقت إحنا مش واخدين بالنا.
هي مش مجرد وعد بالعطاء، دي طمأنينة بتقول: اطلب، وسلّم، وصدق، وهيوصلك اللي محتاجه بالطريقة اللي تنفعك، مش باللي كنت متخيّله بس.
وهتفضل أُمنيتي:
إن قلبي يفضل مليان يقين، وإنّي أشوف بعيني استجابة الدعوات اللي بيني وبين ربنا في السر.
اللهم اجعل لي من كل ما سألتك به نصيبًا، وإن لم أنطق به، فأنت أعلم بما في قلبي. ❤️

لا نقول الا مايرضي الله!
مبروك لينا كلنا حتى لو مجموعنا مش عاجبنا قولو الحمدلله احنا اجتهدنا واهي سنه وخلصت وانا متاكد ان عمري ما هرضى ان ارجع للسنه دي تاني حتى لو ضامن مليون ف الميه اجيب مجموع كبير بس الواحد طلع منها مدمر ومكسور واهو الحمدلله
ونقدر نقول السماعات كسبت وحسبي الله ونعم الوكيل
الحمد لله على كل حال…
آه جبت الرقم مش اللي كنت بحلم بيه، ومش اللي كنت بحارب عشانه كل يوم، انا اصلا لحد الآن معرفش ده يدخلني كلية ايه
بس والله العظيم أنا فخور بنفسي.
فخور إني كملت،
رغم كل التعب النفسي،
رغم الانهيارات اللي محدش كان شايفها،
رغم اللحظات اللي كنت فيها على وشك أستسلم ومكملش…
كملت.
السنة دي خدت منّي كتير…
خدت راحتي، خدت نومي، خدت ضحكتي،
خلتني أكبر غصب عني،
خلتني أعيش دور المحارب كل يوم، وانا أصلاً ماكنتش مستعد لأي حرب.
في ناس هتبص للرقم وتقول "مش كفاية"،
بس أنا شايفه رقم نازل من دمي، وسهري، ودموعي،
شايفه نهاية رحلة طويلة كلها خنقة، ومذاكرة، وضغط مش طبيعي.
مش زعلان على المجموع…
زعلان على نفسي اللي كانت بتنهار ومكنتش بلحق أطبطب عليها،
زعلان على صوتي وأنا بكتم بكايا عشان ماما ماتحسش إني تعبان،
زعلان على قلبي اللي كان بيحاول يقنع نفسه إنه هيعدّي، وكان بيكذّب نفسه كل يوم.
بس خلصت.
خلصت أخيرًا.
وحتى لو رجع بيا الزمن، عمري ما هرضى أعيش السنة دي تاني،
حتى لو ضامن أجيب 100%،
عشان الثمن كان غالي أوي، وأنا طلعت منها مدمر ومكسور.
وحسبي الله ونعم الوكيل في كل لحظة وجع اتكتمت،
في كل خنقة اتمثّلنا فيها إننا بخير،
في كل مرة جبرنا بخاطر نفسنا وإحنا أصلاً كنا محتاجين اللي يجبرنا.
أنا فخور بنفسي، وده كفاية.
ومهما كانت النتيجة، أنا ناجي.
واللي بينجو، بيبدأ من جديد، حتى لو كان مكسور.

‏خليك الشخص اللي انت عاوز تكونه مش اللي الناس عاوزه تشوفه ملكش دعوه بالناس اعمل كل اللي انت عاوزه حتي لو مش هيعجبهم وهيتكلموا عليك وينتقدوك اعمل اللي انت عاوزه طالما مش بتغضب ربنا وهتكون مرتاح نفسياً باللي بتعمله ومتفكرش في الناس عشان ترتاح.

زهقت من الحوارات الكتير الملغبطه في حياتي، مش قادر أعيش وسط الزحام واللغبطه والصداع بالطريقه دي، طاقتي متسمحليش حتي إني أحاول أغير الواقع.

توبة وبداية جديدة مع الله للمرة المليار أسال الله الثبات هذه المره.

Return to god now.

كل ما تلاقي نفسك مُحبط خد نفس عميق كده وأفتكر إنك مش في سباق مع حد ولا مُضطر إنك تثبت حاجه لحد وإن كل حاجه هتيجي في وقتها وإن الدنيا مش ٢٤ قيراط زي ما بيقولوا، الدنيا دار بلاء وابتلاء، دار اختبار، ده امتحانك مش دي نهايتك، ولازم تتأكد إن رزقك مش هيروح لغيرك، لا رزقك في الفلوس ولا رزقك في الناس، وكلنا فترات مهما كانت غلاوتنا ومهما كانت الوعود، وكله بيتنسي وكله بيعدي، صعب سهل والله هيعدي.

وَكَانَ فَضْلُ اللَّهِ عَلَيْكَ عَظِيمًا 🤍
رسميًا طبيب بشري 🩺⚕️🥼

دكتور دكتور يعني 😜🩵🩵

أهو ده اللي صار يسيدنا 🤎🥼

انا مش فاهمة درجة حبي لأغنية انا هويته وانتهيت، انا مجرد ما بسمعها في أي مكان حرفيًا مش بركز غير مع لحنها وكلماتها.

انا سمعتها من سيد درويش، محمد عبدالوهاب والجميلة سُعاد محمد، اكتشفت وانا بسكرول علي يوتيوب ناس كتير جدآ غنوها، زي الأستاذ إبراهيم الحجار، و كمان فيروز غنت مقدمة بسيطة من الأغنية مع إن كان نفسي العمل يكمل وتغنيها كاملة لكن مفيش مشكلة كام دقيقة تكفي بصوت فيروز، وأذكر أني قرأت أن ام كلثوم غنتها بس مسمعتهاش ومش عارفة أكيد أو لا،
ولدرجة اني حبيتها من مسار اجباري وسمعتها من محمد محسن وكانت جميلة وعصرية .

انا اعتبرتها أفضل أغنية بالنسبالي خارج المقارنة مع أي عمل فني او فنان مُفضل ليا، انا هويت وانتهيت بالنسبالي تحفة فنية فريدة مع انها مش أفضل عمل في الكون بس بالنسبالي فيها شيء من الغموض مش قادرة احدده، وعشان كده بحبها.

سبحان كإن القط بتاعي(تيمور) حاسس اني مسافر وسايبه بكره كل مره انزله الاقيه ميعبرنيش اصلا سبحان الله كإنه حاسس اني هسيبو بكره وعمال يقف قدام الباب عشان انا مخرجش ولما لفيت ورجعت اطمن ورجع ورايا ويتلزق فيا.
بجد الواحد شاف مع الكائن ده حب ووفاء مشافوش من أي بني ادم والله ♥♥♥