‼️Жиззах ва Самарқанд вилоятларида
ноқонуний дори воситалари савдосига чек қўйилди

☄️Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида Жиззах шаҳрида ўтказилган тезкор тадбирда 1993 й.т. 2 нафар фуқаро тегишли ҳужжатлари бўлмаган 400 дона “MISOPROSTOL” таблеткалари, 139 дона капсулалар, 2 дона бальзам ва уларни қадоқлаш учун мўжалланган 26 дона қутиларни 5 000 АҚШ долларига сотган вақтларида ашёвий далиллар билан ушланди.

Тезкор тадбир давомида Жиззах шаҳрида жойлашган аёллар фитнесс-клуби ҳам кўздан кечирилиб, у ерда қўлга олинганлар томонидан ташкил қилинган яширин цех аниқланди. Мазкур цехда ушбу шахслар турли хил дори воситаларини қўлбола усулда қадоқлаш, тақсимлаш ва сотувга тайёрлаш билан шуғулланиб келишган.

💊Натижада, 1 дона қадоқлаш ускунаси, сотувга тайёрланган жами 141 дона капсулалар, 1 040 дона хитой ва инглиз тилида ёзилган сохта галограммалар, 237 дона сохта штрих кодлар, 1 014 дона бўш капсулалар, турли хилдаги қути ва пакетлар процессуал тартибда расмийлаштирилди.

ДХХ Самарқанд вилояти бўйича бошқармаси томонидан бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда эса Самарқанд шаҳрида яшовчи, 1998 й.т., фармацевтика маҳсулотлари чакана савдоси билан шуғулланувчи МЧЖ менеджери Қирғиз Республикасидан айланма йўллар орқали олиб келинган ҳамда таркибида психотроп моддалар мавжуд бўлган жами 9800 дона дори воситаларини шартли харидорга 25 млн. сўмга сотган вақтида ушланди.

Ҳозирда ҳар икки ҳолат юзасидан суриштирув ишлари олиб борилмоқда.

Ҳурматли фуқаролар! Тегишли сифат сертификатига эга бўлмаган дори воситалари савдоси билан шуғулланиш жиноий жавобгарликка сабаб бўлади. Бунинг натижасида инсон соғлиғига путур етиши, энг ачинарлиси тузатиб бўлмас салбий оқибатларга олиб келиши мумкин.

✈️Каналга аъзо бўлинг ✅ www.tg-me.com/xavfsizlik_uz