اذوني بسفرهم وانتطر خبرهم
اهلي وكل اخوتي بسفرهم هاذا موتي
*
يا روحي شبقالج بس مناحه
واليفگد هله يعاشر جراحه
دمعه وحسرته ليله وصباحه
اشوفن اني بس بموتي راحه

مكسوره وحزينه وكلبي يحب ونينه
وراهم يعله صوتي بسفرهم هاذا موتي

*

ياهو ايهفت النار الي بيه
بسفرهم هاذا راووني المنيه
بعد ماكو سُكينه ولارقيه
ولا عبد الله الوليله اعله اديه

مهدك خويه خالي وتاذيني الليالي
ودمعاتي بقنوتي بسفرهم هاذا موتي

*

بدروب الخذتهم ابقه اراقب
بلكت المح ضعون الحبايب
يشهد الله جسمي وكلبي ذايب
انه مضيعه او من حگي اعاتب

شلون أصبر بعدهم زماني مايردهم
رجواي وتجوتي بسفرهم هاذا موتي

*

تدري بغيبتك يابويه كلفه
دمع عيوني بعدك من ينشفه
على طور النعي ليليه اغفه
واني بروحي الك مستعره لهفه

جمرة كلبي تسعر وغيابك تأخر
وبنومي وصحوتي بسفرهم هاذا موتي

*
مثل كل يوم اضل بالباب اتاني
لن الناعي صوته من اجاني
زينب بالسير . والهم خذاني
يعني نذبحو اهلي يازماني

لوزينب أسيره نذبح بدر العشيره
ايضل دمعي سلوتي بسفرهم هاذا موتي
*
علي محسن الفرطوسي

#قصيدة_لام_البنين
لسان حال ام البنين تخاطب الحسين ع

امنياتي
عالهزل اركـــــــــب اســــيرة
حالي مــــــن حال الأمــــيرة
انــــدفن تالي ابحصــــــــيرة
امنياتي
ــــــــــــــــــــــــــــــــــــــــــــــــ
چانت امنيــتي قبل لا عني تمشون
حافية وَياكم امشي بذيـچ الضعون
شايَّلة سكنة و رقية بنـــص العـيون
و اباديه گايدتها نـــــــاگة ام عــون

لكربلائك.
لو وصــــــلنا اخـــدم بنــاتك
و اكنس الخيـــــمة لــخواتك
يُمّة و اغســــــــــــلك عباتك
امنياتي.
ــــــــــــــــــــــــــــــــــــــــــــــــ
امنيات ابالي چانــــت كلــش اهوواي
وحـــدة منهن يُمّة أوزع الكــــم الماي
و ثاني وحدة من تصلي اوگف افياي
و امد سجادة لصـلاتك شـــيلتي هاي

و گلبي يوگف
سمعاً لحُبك و طاعة
درع فاتحـلك ذراعه
من تصلي بالجماعة
امنياتي.
ــــــــــــــــــــــــــــــــــــــــــــــــ
ابالي أتحــول هوه من تطــــلب انفـــاس
و انه اصيرلك ظــــهر لو طـــــاح عبـاس
گبالك اوگف لابــسه درع ابني و الطاس
و ما اخلي شعــــرة منـك و الله تنجاس

و لا اخلي
حجر يوصل يم جبينك
و لا رمــل يأكــلها عينك
خنصرك يبقه بيميـــــنك
امنياتي
ــــــــــــــــــــــــــــــــــــــــــــــــ
امن العطش عبدالله ما تسمع صياحه
الجربة اترسها بدمـــــوعي المُستباحة
علي الاكبر بيـدي اضــــــمّدلك جراحه
و زفة القاســــم تصــــــــير ابلا مناحة

لجل رملة
جاســـم انحــنيله ايـده
حنَّة مو دم مــن وريـده
و للـفرح نقره القصيدة
امنياتي
ــــــــــــــــــــــــــــــــــــــــــــــــ
الشام ما يحرگ گلــب زينب عذابه
و ما تنام ارقية بنتـك عــــــــالترابة
للستر ادعي و دعوتي مُستـــــجابة
تمطر الدنية عِبْي فــــــوگ الخرابة

ارفع ايدي.
و ادعي ربّي يدزلي غيمة
تنصب فـــــــوگانه خيمة
ابلا غطه متظـــــل يتيمة
امنياتي.
ــــــــــــــــــــــــــــــــــــــــــــــــ
الك أُمنيتي الاخيرة اختصــــــــرها
كون زينب سـوط ميورم ظهـــــرها
لا هزيلة و لا سبي تشـــوف بعمرها
و سالمة اترد للمدينة بظـل خـدرها

لدار اهلها
ترجع بعـــــــــــزة وِليــها
حـــبل مـا ملتــــف عليها
و لا سياط مگطعة اديها
امنياتي
ــــــــــــــــــــــــــــــــــــــــــــــــ
الحمدلله
#علي_حسين_الكناني

يا بويه يذبح جـــــــــرح الفراك
كل ساعة أحن والحضنك أشتاك
لا خبر لا مرسال منك
ناسي حميده بويه جنك
يا بو يه يذبح جرح الفراك
........................................
يا بويه تذبح فركتك نار الهجـــــــــر تاذيني
كل ما أحن الشوفتك دمـــــــع الجفن يجويني
من حملت عني ورحت مشبوحه ضلت عيني
بعدك فـــــلا يسوه العمر والمن أعيش أسنيني
كل ساعة أركض وافتح الباب
هلبت يمر طارش خبـــر جاب
محتاره أسأل ياهو عنك
ناســي حميده بويه جنك
يا بويه يذبح جرح الفراك
.....................................................
يرسم خيالي صورتك كلما أحــــــــــــن واتأمل
واركض على حسين أوأضل ياخذني ألك أتوسل
يا بويه مو بس الدمــــــــع نبض الكلب هم وشل
ميت عدل ودي خبر لــــــــو طيف هم بويه أقبل
بويه وغــــــلاتك ما نمت ليل
صبح ومسى دم مدمعي ايسيل
متعلًمه أغفى أعلى حضنك
ناســـــــي حميده بويه جنك
يا بويه يذبح جرح الفراك
.......................................
لحضات والصبح أنكسر وأشهك كمت بانفاسي
من شفت الحسين أعتنه وضل بيده يمسح راسي
يا عمي كتله أمروتك لا لا تجـــــــرًح أحساسي
ماني يتيمه او عاييشه مابين أهلــــــــــي وناسي
نزلت دمعته وكلـي ميعود
يبنيتي أبوج أو آنه موجود
ميت واتانــي عود لنك
ناسي حميده بويه جنك
يا بويه يذبح جرح الفراك
.....................................................
مكسوره ضليت وكمت من أمشـي بويه أتعثر
كل طفلة تركض عالأبو والحضنك أنه أتحسر
عايفنـــــــــي مكسورة جنح ونبع الحنان اتفطر
ترجعلي أدعي كل فجر أمن يجيـــب المضطر
لو تدري بيه شصار ما صار
طفلة وأجانـــي الموت خطار
من وني أسمع صدى ونك
ناســـــي حميده بويه جنك
يا بويه يذبح جرح الفراك
.....................................................
تانيني بويه أبنيتك تحسب بقت ليالــــــــي
موتي كرب وانه أنتضر بيك التقــي يغالي
من الحزن كلبي أنمرد بويه أشتكيلك حالي
هايه حميده ومن رحت هذا اللذي جرالـــي
هم وقهر وكليبي مجروح
ليليه أون بمسامر النـــوح
أمسح ادموعي بطرف ردنك
ناســـــــــي حميده بويه جنك
يابويه يذبح جرح الفراك
...............................................
خادم خدمة الحسين
الشاعر
محمد الموالي

بعدني أتأمل أطيــوفك بعدني
من يوم الرحت بويه وعفتني
أحسب نجمه نجمه عطرك وين أشمه
بويه يحسين
.......................................................
مثل شمعة أحتـــرك ليليه وأطفه
وأطيح أمن التعب عالباب وأغفه
أنشدمن عليكم ياهـــــــــو أعرفه
عليله ومو مشــــــي ما بيه وكفه
أتاني وهلبت أطروشك تمرني
واشمن ريحتـــــك وأيهيد وني
يمن طرواك رحمه عطرك وين أشمه
بويه يحسين
.......................................................
ذابحني الهجر بالينـــــــــــــــي بلوه
وذبل عودي وكمت أتوجــــــــه كوه
شلـــــــــي بعمري بعد يا عمر يسوه
شيب رمش عينــــــــــــي الشاب توه
ليل أنهار أتانــــــــي وما تجيني
لحد ما فصها طاح وعمت عيني
الدمع عالغالي يدمه عطرك وين أشمه
بويه يحسين
.................................................
كمت كوه أعله روحي وعثر جدمي
وين أندار اسمعك صحت بسمــــــي
أدورك ويـــــــــــن أدورك آه يحلمي
عسن لو طيف كلــــــي أتكربي يمي
واجيك بلا وعــي الزم جفوفك
وبعد هيهات أموت وما أعوفك
خيالك ضاع رسمه عطرك وين أشمه
بويه يحسين
................................................
الأبــــــــــو من طبعه يسأل وين بنته
ويجيها بشـــوك والضحكه أعله شفته
أول مره أشوفك تمشــــــــــــي سكته
كعدتي طولـــــــــــــي بويه ما ذكرته
وحشة ليــل بفراكك وحشتي
عليلة وتكسر الخاطر دمعتي
بويه الدنيا ضلمه عطرك وين أشمه
بويه يحسين
....................................................
ألمن أشكي حالـــــــي وحيرة أمري
عليله وحيـــــــــــل ماضل بيه تدري
صحت طفلة يـــــوادم رحموا عمري
خلص دمعـي وخلص بالسكته صبري
غريبه ابين وادم كلهـــا غربه
علي ياهو اليحن ويلجمه كلبه
ردت أسمعلي كلمه عطرك وين أشمه
بويه يحسين
.....................................................
خادم خدمة الحسين
الشاعر
محمد الموالي

ودعوني اهواي احباب ابحياتي ودعوني
ما اجوني خلصت عمري انتضرهم ما اجوني

روحي ملهوفه الدربكم يل حبايب
ماشفت راحه ابجفاكم بس مصايب
والله من هذه الزمن شفت العجايب
ودعت كل الاحبهم والكرايب

ياعيوني ابجي اكثر عل حبايب ياعيوني
ما اجوني خلصت عمري انتضرهم ما اجوني


ياحسافه العمر يخلص والكلب شاب
ودعت كل الاحبهم جوه التراب
ماردت كلشي ابحياتي ودمعي سجاب
بس ردت اشتم هواكم بلهوه الهاب

عذبوني كلهم العافوني للهم عذبوني
ما اجوني خلصت عمري انتضرهم ما اجوني


والله لو تدرون بيه شنهو حالي
كلبي مايتحمل اكثر يلغوالي
ليش ازفن لنجف كل لحضه غالي
بعد ماعندي ولا واحد بقالي

حيروني كثرت اجروحي بعدهم حيروني
ما اجوني خلصت عمري انتضرهم ما اجوني

طالت الغيبه وبعد ماتصبر العين
وبس صوركم ضلت ابوجه الحياطين
كمنه نقره الفاتحه ونهدي القرابين
بلكت ايسجلكم الله وي الحسين

ضيعوني اهلي وحبابي الاحبهم ضيعوني
ما اجوني خلصت عمري انتضرهم ما اجوني


روحي ماتصبر بعد وكت المسيه
انتضر اكثر بعد لو ماكو جيه
ردت بس احلامكم اتمر عليه
تالي حته احلامكم مامنهه جيه

علموني جنت متعود عليهم علموني
ما اجوني خلصت عمري انتضرهم ما اجوني

#الشاعر #سيد #احمد #الموسوي

زينب ورمله ام القاسم  ع

طفـي الشمـع يالـوالـده  بدمـه الولـد تحـنه
للحومه جاسم من مشه سيوف العده زفنه
    صبرچ يرمله  ..  فگده شيحمله
                   راح جاسم

…………………………

الراح ابنـها  شلون تـتحمل مغـيبه
يصبرچ الله آه يرملـه  لهل مصيبه
شلون گـلبچ راح هسه يكف نحيبه
وجاسم اگبالچ اجـه جثـته خضيبه

الچان الچ خيمه وعمد  طاحت عليچ الخيمه
يـالفـاگــده راح الـوالـد  هـالـنـايـبه عـظـيـمه
     ورد وصله وصله .. فگده شيحمله
                   راح جاسم
…………………………

تحمل شلون المصيـبه ويـهـده ونـها
الياخذ الموت الضنه من نص حظنها
والـيـرد امگـطـعـيـنه  شلـون  ابـنـها
تمـوت ويـاه امــه حگـها من  حزنـها

ايساعد الله التفگـد  بهـذا الوكـت ولـدها
الرادتـه لشيب العـمر  يصير الولد سندها
    وياخلـته خله .. فگده شيحمله
                   راح جاسم

…………………………

الچان سلـوى بالحلـگ يارمله اسمه
جاسـم بـيا حالـه هـسه جـابه عـمه
وذر شاله وزحف گـوه جاب جسمه
حسين راح من البچي يارمله يعـمه

رد للخيم محني الظهر  حسين وعله نحيبه
ومـدده مابـين اخـوتـه  ابن الحسن حبـيـبه
     وضل نوحه يعله  .. فگده شيحمله
                   راح جاسم

…………………………
حسين گـلبه  علـه الولد يمـكـنـه واگــف
وگمت اشوفه حسين دمه  بوجهه ناشف
منـين مـا صدالـه  شـافـه  جــرح  نـازف
وهـاي اول مـره اشـوفـه حسين خـايـف

خايف اشوفه وينظرچ  رمله وحزينه عينه
وصاح بهضم راح الولد  عريسچ امن ادينه
          وبگـلبه عله .. فگده شيحمله
                   راح جاسم

…………………………

صعبه يارمله المصيبه  الفگد يكـتل
الينذبـح بالطـف ابنـها بخـربه تـنزل
وتگطع ادروب وبراري بلاحمه وظل
وتصعد النوگ الهـزيله وكـون تحمل


تصعد على ظهور الهزل  الينذبحـه حلمـها
وبحلوگ شماتة حچي  يضل ينذكر اسمها
  وبسفره ذلـه .. فگده شيحمله
                   راح جاسم

……………………… ..
يعينها الله الينذبح بالطف ضناها
خـيـمه ماعـدها  وتسويله  عزاها
تركـض ونـار الخـيم تـلـهب وراها
هذا يشتم بيها ذاك ابسوط اجاها

ماتگدر تسوي عزه  وتبچي وتـون لبنـها
خيل وزلم ، نار الخيم  ليها ركض يجنها
       تلفـيها كلها .. فگده شيحمله
                   راح جاسم


#الشاعر #عقيل #الحسناوي..

ليش ما خذتوني ياهلي وعفتوني
تعبني الغياب وعيوني عالباب
*
ما تنام عيونه كلمن فارك اعزاز الگلب
وعنه لو طول سفرهم تظل عينه عله الدرب
وانه راحو عني كلهم ودمعي بجفاهم يصب
اختنك كل مغربيه خنگت العاش بغرب

افراكهم هد حيلي وما انامن ليلي
اتنطر اجواب وعيوني عالباب
***
الباب يندك وآنه اركض ركضت الفاگد اخو
المثلي هسه ابين اهلها وانه لا ام لا ابو
راح ابوي وفارگاني وحيل فرگاه مو حلو
وحيل مشتاگه الحنانه حسين اليعوضه منو

هجره عذب حالي وشيعوضه الغالي
مليت العتاب وعيوني عالباب
****
ارد اكلكم مر هجركم لا تطولون الغياب
تعبن عيوني بجفاكم وگلبي من الفرگه ذاب
عليه يابويه اليالي تمر مثل مر السحاب
وگمت اصيحن ارجع ارجع مارجع منك جواب

طوليت اغيابك وروحي ورده ابابك
ذبلها المصاب وعيوني عالباب
****
جيتك اركض ياحبيبي وركضت احلامي وراي
بالسره كلهن صحتهن وانه منتظره سراي
هسه اكول ايصيح بسمي وگمت اشم گوه هواي
ليش بويه ماصحتني وليش ماگتلي تعاي

ما گلتلي اتروحي وآنه طلعت روحي
بدلالي الصواب وعيوني عالباب
***
يا عزيز الروح ريض وارحم بگلبي الحزين
آنه ادري شگد تحبني وگلبك ادري شگد حنين
بويه وياكم اخذني عليك امشي ام البنين
وي رقيه خل اروحن گالت ويانه تجين

خل اروح وياها اختي مر فرگاها
جا شنهي الاسباب وعيوني عالباب
***
أبغيابك ضاع عمري وعشت بين الذكريات
كاعده وايدي عله خدي وتلعب اگبالي البنات
ويانه صاحن گومي العبي وضاگت بعيني الحياة
تذكرت بويه خواتي وآه يا فگد الخوات

هدني حيل اجفاهن ما خذتني وياهن
فارگت الاحباب وعيوني عالباب
***
تمت
#ميثم #العمري

للعليله ع

حَـنِّيت الك ياوالدي وِلْحضنك اشـتاگيت
كِلما تهِب نَسمة هَـوَا تِـفتَحلي باب البيت

وامشيلك ابسَكـتَه ... حسبالي اجيت انته
                 ( نسمة هَـوَا)
____


يل ماخــذ اوياك النِـدَه وميـبِّــس الورده
شِيلِمَّه يل عمـــري ابدرب هجرانك اتبده
بويه اليفارگله طفل غير البجي اشــعنده
گلبي انچــوه بنــار الهجر يـل ما إلك ردّه

أحلم تجي ها ماتجي وعيوني صوب الباب
حسبالي أحظى بشوفتك ثاري الهوا چذاب

يل ذبحي مو وكته ..حسبالي اجيت انته
نسمة هوا
ــــــــــــــــــــــــــــــــــــــــــــــــــــــــــــــــــــــ

بصدرك أشِم امن الزغـر بس ريحـة الملگه
والرابي بحضانك عُـمر يســتغــرب الفرگـه
يابويه والله اجفوفي الك محتامه عالشبگه
يشبه حنانك ياگلب بالدنيـــا وين ألـگه

وين الگه حنـيَّـه ودفو تشبه تفاصيلك
ونتسامر بذاك الحچي تحجيلي واحجيلك

عطرك تنفـســته ....حسبالي اجيت انته
......نسمة هوا
ــــــــــــــــــــــــــــــــــــــــــــــــــــــــــــــــــــــ

يل كلشي بيه ايحن الك مشـتاگه لحضانك
كل مغرب امصلايتك اَفرشـــــها بمــچانك
بكلشي حلـو بس الهجـر مو حلوه بلسـانك
لوما بعيــــــده كربلــه جيت آنـه واحزانك

وأگعد واراويك الألم بعيوني هاي وهاي
يابويه كبَّـرني الهجر لمّن عفتني اهواي

كلمن اِجه البِـنْـته ....حسبالي اجيت انته
.......نسمة هوا
ــــــــــــــــــــــــــــــــــــــــــــــــــــــــــــــــــــــ

أدري الدمع مابي نفع من تخلـص احروفي
راح اطبگ اَبواب العتب وافتحلك اجفوفي
ياربي رد الغــالي إلي وبجـيته رد شـوفي
نظره حقيقية ردت مو نظره بــطيوفي

شلّي بعمر مابي أبـوْ ياحسرتـه اليـشتاگ
والموت والله أهوَن إلي وْلاعِيشن اعله افراگ

بس الأثـر شفته ...حسبالي اجيت انته
......نسمة هوا
ــــــــــــــــــــــــــــــــــــــــــــــــــــــــــــــــــــــ

من اســمعـت رد الظعـن كل حيــلي رد بـيَّه
رحـت اَركض ابلايـــه وَعي ملهــــوفه رجليه
شـافاني ابن حذلم سِـكت ظل صافن اعليّه
من شوگي ليش اتفاجئت گـتله او نزل لـيه

گـلِّي لَوَن عن كربلــه جيتي تسأليني
خوفي أجرحج يابنِت لا لا تجـبريني

يحچــيلي حلَّـفته .... حسبالي اجيت انته
.......نسمة هوا
ـــــــــــــــــــــــــــــــــــــــــــــــــــــــــــــــــــــ

ظليت ألـِـح گال الخبر خاف أحجي ويكتلِچ
هسه آنه من طف كربله جايب خــبر أهلچ
كلهم ضحايه اعله الثـره وبس الظعن ردلچ
لاعمِّــچ او لاوالــــــــدچ ريت الله يوگفلچ

بعون الله ياسيِّـدتي ايخففـلج الاحزان
بهاي المصيبه الراتبه يوگفلچ الرحمٰن

يالگلبي گطعـــته ...حسبالي اجيت انته
نسمة هوا
ــــــــــــــــــــــــــــــــــــــــــــــــــــــــــــــــــــــ

دعواتكم........

خادم الحسين ع
مرتجى الحسَّاني

انطر وتانيك هواي
مو قصدي ترجع بلماي
بهل لحضه وانه شتاكيت
وتخرت مارديت

تدريني ماشم الهوه اله اليمر بريتك
مو ساعه صارت فركت لابي سنه متانيتك
لوادري تمشي وماتريد علماي ماوصيتك
خليني اموت من العطش وبروحي جا ظميتك

مااحمل فركك يوم
هيج الگلب ظل ملجوم
انته الهوه ونته دواي
انطر وتانيك هواي

كلمه لخو تهدي الگلب بسانه حيلي تهده
من ماترد يابو الفظل ياهو النلوذ بسده
خلافك اعيش بلا ولي وتكتل يخوي الوحده
مو شده هايه وتنحسب لا والله اعظم شده

ياشدتي تهد الحيل
لو شفتك وحدر الخيل
ياهو البعد ظل حماي
انطر وتانيك هواي

گلب الخت يم الخو وبس هوه يلعم بيهه
ولو كلهه خويه دللي بهل كلمه ويداويهه
شلون الغريبه وتنسبي بين الغرب ناسيهه
تتمنه گبله وتندفن وترابه اليغطيهه

لو ميته گبلك عباس
ولاشافت خيالي الناس
فراكك تره يمرد حشاي
انطر وتانيك هواي

انطر لحد اخر نفس ماگطع انه الظنه
ولراد يوسف مايرد عباس باجر ونه
فراكك گبل يوم الدفن بين الخلگ دوهنه
شما يبعد علينه الدرب عباس الك نتعنه

امشيلك ومهمه يكون
لو عميه وماكو عيون
وما هابن انه منعداي
انطر وتانيك هواي

كلولي عباس نگتل كلتلهم انه انتظره
مايخلف وياي الوعد حالفلي بمي الزهره
ظليت اسولف وختنك مابين حسره وعبره
ولمثلك يفارك اخوي عباس شنهو يصبره

شلون الصبر كلي يصير
بلفركه عباس نحير
ماينگطع خويه رجاي
انطر وتانيك هواي


#ابو #سلام #الجابري

ادور بالمجــــالس والگلب مجروح 
اريد اسمع نياحه وصوت للمذبوح
وين اللــــي لبو السجاد ليله ينوح 
يبچيني النعي وتشيط مني الروح
ــــــــــــــــــــــــــــــــــــــــــــــــــــ
ادور بالمجــــــالس واســچب العبره
واعله الراس احضر  شـابچه العشره
ومانوح اعله ضلعي ولا عله السطره
انوحن عالذبيح الهشمـــــــــو صدره
ــــــــــــــــــــــــــــــــــــــــــــــــــــ
ادور بالمجالس والطم اعله الراس
لو قــــاري قرالي  أمصيبة العباس 
عله عينه وعله چفوفه وعمود الراس
الما مثله وفـــــي مابين كل الناس
ــــــــــــــــــــــــــــــــــــــــــــــــــــ
ادور بالمجالس وابچـــي عالشبان
واحضر بالعزيه بحــــالة لهفــــــان
عله الاكبر وجاسم گلبي وج نيران
وعالطفل الرضيع المنذبح عطشان  
ــــــــــــــــــــــــــــــــــــــــــــــــــــ
ادور بالمجالس والدمع سچـــــــــاب 
وادگ صدري والچم ضلعي المنصاب
مصاب الطف هدمني وموت الاحباب 
انه الجــرحي عليهم لا هده ولا طاب
ــــــــــــــــــــــــــــــــــــــــــــــــــــ
ادور بالمجــــــالس وانه  محنيه
اريد اسمع نعي واسمعلي لطميه
اشيطن لو سمعت الحـره مسبيه
مصيبتها ابد مــــــــاهانت اعليه 
ــــــــــــــــــــــــــــــــــــــــــــــــــــ
ادور بالمجـــــالس ياهو ينخيني
والخــــدام ذوله احبابي وبنيني
وين الصـــــــاح يازهراء اغثيني
اگله ابشــــــر ييمه وبّطن عيني
ــــــــــــــــــــــــــــــــــــــــــــــــــــ
ادور بالمجـــــــــالس عالبچه بحرگه
وايده امن اللطم لبني اصبحت زرگه
مثل احباب ابو السجــــاد وين اللگه
البچه ودمعاته من دم هـذا من حگه
ــــــــــــــــــــــــــــــــــــــــــــــــــــ
حيدر بشار الدراجي