ثكيله للسيده خديجه ع نفس طور اهلي تحت الترب للحاج باسم الكربلائي
**********
عمري توه ابتده بعازة الوالده
آنه الزجيه ودمعتي بعيني
********
خمس سنين عمري ودمعتي تهمه
صوبني زماني وماخطه سهمه
بفكد امي خديجه بالكلب لجمه
بعدني مشبعت من جلمة اليمه
أمي يادنيتي سلوتي وفرحتي
بانت عليه كسرتي بعيني
********
شفت نعشج يشيل اكبالي ودعته
وابويه المصطفه ماتنسمع ونته
عليج يلوب تنزل دمعته سكته
افراكج يالحنينه الليله مو وكته
يالرحلتي بعجل من خذاج الاجل
ظلت ملامح وجهج بعيني
*********
ييمه شلون اتحمل غيابج دوم
وسنين العمر جايتني بس هموم
حضنج وين اشوفه لو اجاني النوم
باحضانج انام اتعودت كل يوم
امي لا ماترد نامت بنص لحد
وآنه السهر طفه ضوه عيني
**********
ييمه بعازتج ظليت كل عمري
كبل كبرج يريته اللي انحفر كبري
بعد إلمن اسولف محنتي وقهري
اذا دار الوكت بيه وكسر ظهري
كلبي من ينكسر اركض اعله الكبر
واعله التراب يهل دمع عيني
*******
بعد عينج ييمه مصاب فوك مصاب
رسول الله يفاركني اعز الاحباب
وهجوم الدار بعده واشتعال الباب
بالبسمار ضلعي ينكسر وانعاب
ضلعي ينزف دمه يمه يم فاطمه
ومن الضرب حمره بقت عيني
*******
أم علي

نزله للأمام علي ع نفس طور بس خدمتك للحاج باسم الكربلائي
***
تعاتب ابوهه الكرار
هالليله بت الزهره
****
زينب تعاتب بت علي المهيوبه
لسيف المرادي بيش إله مطلوبه
صاحت يبويه هامتك مخضوبه
دمك عله اجبينك سال
وبأيدي أشد الطبره
***
محراب ابونه ينعه وآنه ابجيله
راح السند من دنيتي هالليله
بفكدك يبويه حسين طايح حيله
رد الحسن محني وصاح
بيدي حفرته لكبره
***
يابويه عدمن بعدك امخليني
وصيت إلمن يالولي حاجيني
بمصابك الدنيه ظلام بعيني
باجر تجيني النكبات
والعمر حسره بحسره
***
إلمن أدير الوجه لو هضموني
وآنه اليتيمه ابلا أهل عفتوني
لمن تجيني كربله ويسبوني
الماعدهه والي تنضام
بويه الكلب شيصبره
****
آنه الغريبه والزمن عاداني
بمصاب اخوتي امتحن خلاني
عالشاطي كلهه امذبحه اخواني
براس الرمح راس حسين
واكبالي ذبحو نحره
****
بحسين بويه إوصيتك وعياله
بعيني لباري بكربله اطفاله
بس كلي بويه لو شفت خياله
شلون اصبر وعشر خيول
تسحك يبويه بصدره
****
اعتب عليك من الحزن مهضومه
آنه العقيله باليسر مظلومه
ميته ولا شفت الحنين ويومه
كطعو جفوف العباس
ونار الخيم مستعره
****
أم علي

نعي للأمام علي ع
******
بويه ياعلي بجيتني إدموم
أودعك يالحنين وبلوتي بلوه
إجاني العيد بويه دمعي بالعين
وبنار الهجر دلالي يتلوه
رايح للكبر ياأغله الاحباب
ياعطر الزجيه وللكلب سلوه
جنت خيمه التلمنه ازغار واكبار
فرهدنه الزمان اخلافك شسوه
خلاني انوح لفكد الأعزاز
انباكت ضحكتي وايامنه الحلوه
شلون اصبر يبويه النعش لو شال
ويظل خالي مكانك يابو المروه
محرابك حزين وخاليه الدار
وحشه دنيتي بلياك ماتسوه
مثل طبرة الهامه تنزف العين
افديلك يبويه هالعمر فدوه
بس ردلي يبو الحسنين انخاك
يداحي الباب وادري ماترد نخوه
********
عليك الكلب يابو حسين وجر
يحيدر بالضلوع بنار وجر
يبويه يالحميت الدين والجار
عفتني ابلا أبو هاي المسيه

جرح راسك بعد ماظنه ينشاف
ضماده ماإله ياعلي وينشاف
مثل دمك يبويه الدمع ينشاف
بعيوني نزف صبح ومسيه

روحي من الهضم ناحت ولابت
ميلمهه بعد لا أرض لابيت
تناشد ياعلي الكرار لابت
صدك نام بكبر حامي الحميه

لأبويه يازماني الراح عيده
شهر رمضان باجر جاي عيده
يالماخذ دليلي وياك عيده
وعندي العيد من نكعد سويه
******
أم علي

ثكيله للأمام علي ع نفس طور يايوم اشوف اعتابك للحاج باسم الكربلائي
***********
شرايد بعد يادهري راح السند من عمري
آنه الغريبه هالليله آنه الغريبه
إلمن اسولف همي من بعد حيدر وأمي
آنه الغريبه هالليله آنه الغريبه
أكبر هضيمه زينب يتيمه
*********
يابويه أعاتب من كضيت إعتاب
من كد البجي حته الرمش هم شاب
جرحي عالوديعه فاطمه ماطاب
واجتني هالمصيبه طبرة المحراب
راسك يبويه طبروه وكلبي بونينه خلوه
ماعندي غيرك يالوالي ماعندي غيرك
انته الدوه لجروحي يامن اعز من روحي
ماعندي غيرك يالوالي ماعندي غيرك
المحنه عظيمه زينب يتيمه
*********
أنه الكضيت عمري بويه بالحسرات
تودعني يبو الحسنين بالدمعات
رايح يالحنين جروحي وين اتبات
مثل صدر الأبو ماكو أبد هيهات
باحضانك تواسيني اتنشف دمعتي بعيني
يابو اليتامه ياحيدر يابو اليتامه
عايفني اجرع آلام بغدر الزمن والايام
يابو اليتامه ياحيدر يابو اليتامه
ماعندي خيمه زينب يتيمه
*********
تلوج من الألم يابويه يالوالي
نبع جرحك دموم شسوه باحوالي
بعصابه أشده وينزف اكبالي
حرت ياناس بمصابه الأبو غالي
خلاني وبياحاله طبرة علي جتاله
مايشفه منهه هالطبره مايشفه منهه
يودعنه هاي الليله وجروحه هدت حيله
مايشفه منهه هالطبره مايشفه منهه
كلش أليمه زينب يتيمه
*********
تودعنه وأويلي من صبح باجر
نعشك من يشيل آنه أكسر الخاطر
بعد عينك كسري ماإله جابر
يجيني مصاب اخوتي وليلة العاشر
بعدك احير بطشتين جبد الحسن راس حسين
وين الگه حضنك يابويه وين الگه حضنك
بفكد اخوتي يصبرني من امشي ظهري محني
وين الگه حضنك يابويه وين الگه حضنك
المأتم أقيمه زينب يتيمه
********
يبويه تروح للزهره وتكر عينك
ونيني يبدي لمن يخلص ونينك
خلصت رحلتك بالدنيه وسنينك
شكطع يابو الحسن مابيني وبينك
شمبعدك جوه التراب عايفني ياداحي الباب
بنار المصايب اتجوه بنار المصايب
شللي بعد بسنيني والدنيه شتراويني
بنار المصايب اتجوه بنار المصايب
والله حريمه زينب يتيمه
********
أم علي

شور للأمام علي ع نفس طور أيا كاظم للرادود محمد بو جباره
***********
أيا حيدر أيا حيدر ٢
********
يالمجبل عليه شفتك من ابعيد
تتوجه اعله ولدك بويه إيد بأيد
انخمش كلبي عليك وصيحت ياحيد
جدمك مايشيلك وسفه ياصنديد
يكودونك بحامي الجار صدك يابويه ياكرار
ترد بطبرتك للدار وأنه دمعي يصب مدرار
أيا حيدر أيا حيدر ٢
***********
يزينب بالعجل كومي واتلكيني
ابن ملجم غدرني وضيع سنيني
طبر راسي ونزل دمي عله اجبيني
شدي طبرتي بالهامه داويني
بسجودي الناصبي إغدرني المرادي بسيفه يطبرني
حزن كلبج يعذبني ودمع عينج يمرمرني
أيا زينب أيا زينب ٢
***********
سامحني يبويه لحزني وآلامي
جبل حيدر علي ويطيح كدامي
طبرو هامتك وإمدد ودامي
بعدك ماأريد العمر وأيامي
تمنيت الجرح بيه مصابك يصعب اعليه
صدك ترحل إلك نيه تروح وامشي محنيه
أيا حيدر أيا حيدر ٢
***********
جرح راسي بنزيفه ينتهي كلشي
اودعكم يزينب للكبر امشي
اذا شفتي الجنازه وشيعو نعشي
تعالي للكبر وكت الصبح غبشي
اسمعج بويه ماعوفج وانه بروحي ألزم جفوفج
اشبكج دومي بطيوفج إطلبيني وأجي أشوفج
أيا زينب أيا زينب ٢
***********
بويه ياعلي اسمع هالحجايه
اظل طول العمر انخاك شجايه
اريدنك تجي لو طاحت الرايه
واذا امشي سبيه تحضر ويايه
سبيه وهودجي مايل وذبيح حسين والكافل
الدمع فوك الوجه سايل كطيعه جفوف ابو فاضل
أيا حيدر أيا حيدر ٢
********
أم علي

ثكيله للأمام علي ع نفس طور عازتهه امنه عازه للرادود معتز تويني
***********
يابه الحسن عفتني هالليله يتمتني
جلمة يبويه تموت من شالو التابوت
هالليله يتمتني
*********
آنه الحسن أنعاك ياحامي الجار
بيدي أشيل اجنازتك يالكرار
حكه الكلب من يشتعل بويه بنار
يابو اليتامه والدمع ينزل حار
كبرك احفره بيدي يافرحتي وياعيدي
دمعي يهل بسكوت من شالو التابوت
هالليله يتمتني
*********
غسلتك بدمعي اليصب من العين
مظلوم ياحيدر علي يابو حسين
بسيف الغدر مطبور راسك نصين
بشهر الصيام إمشيت ياحامي الدين
بليل القدر سبونه بالوالي صوبونه
كلبي عليه مفتوت من شالو التابوت
هالليله يتمتني
**********
ياشمعتي الجانت تضوي بليلي
لفكدك يبويه منهدم كل حيلي
نعشك اشيله عالمتن ياويلي
شلون احمل افراكك علي احجيلي
يابويه هاك عيوني يالمادريت شلوني
يالماسمعت الصوت من شالو التابوت
هالليله يتمتني
***********
ياماي عيني اجنازتك شلناهه
بلحدك يبويه بهيده نزلناهه
لاتنلجم هامتك وسدناهه
آنه واخوتي ياعلي ادفناهه
وردينه للحبيبه زينب صفت غريبه
وحشه بقت البيوت من شالو التابوت
هالليله يتمتني
**********
ياعيد الفطر من تلفي أيامه
أبونه بالكبر ماتمم صيامه
تعيد بالمكابر حيدر ايتامه
دمعتنه دموم لطبرة الهامه
راح الابو اليلمنه صار الحزن سهمنه
والعنده أبو مبخوت من شالو التابوت
هالليله يتمتني
**********
أم علي

شده للأمام علي ع
*******
مطبور الولي والشيبه خضبوهه
زينب تنتحب وتنوح خلوهه
*******
زينب تنتحب تلطم عله الهامه
تصيح بصوت ابونه راحت ايامه
ياحيف الولي ماتمم اصيامه
وبفرض الصلاة الهامه طبروهه
*******
شفتك ياعلي والدم عله عيونك
من كد النزف اصفر غده لونك
شلون اكضي العمر يابويه من دونك
بتك ياعلي الكرار هضموهه
*******
ابن ملجم فجعنه الليله بمصابك
جتال الجرح ومصوب احبابك
طبيبك يالولي أيس من صوابك
ايتامك عليك الدمعه سالوهه
******
سالت دمعة عيالك يبو الحسنين
تفاركنه ومستعجل عليك البين
وبساعة وداعك يابطل صفين
روحي تنسحن وجروحي لجموهه
*******
تذكرت الحنينه فاطمه الزهره
ودعتني يبويه وبالكلب حسره
عفتوني سوه ياوالد العتره
من الأم والأبو زينب حرمتوهه
*******
أم علي

شده للصادق ع
********
عجل بالفرج يايوسف الزهره
جم ثار التطلبه لصادق العتره
*****
إطلب ثار جبده البالغدر سموه
يدير العين صوب القبله من داروه
يلوج من السموم بونته خلوه
الله يعين كلبك وشكبر صبره
******
عندك ثار للدار اليحركوهه
بناته والحرم بالنار روعوهه
مثل نار الخيم بالطف يسعروهه
وبثياب الزغار إيطفي جم جمره
*****
من كتر لكتر يتراكضن بالدار
لعماته ذكرهن والدمع مدرار
علويات اخذوهن سبي الاشرار
ويذكرهه لرقيه بدمعته الحمره
*****
يوميه يون لمصاب ابو اليمه
آلام الطفوف بكلبه ملتمه
بمجالس للحسين وفاطمه أمه
إباب الدار يستقبلهه كل عمره
*****
إمام الجعفريه وينهه أبوابه
كبره بالبقيع إحجار وترابه
يالمهدي تعال وشوف احبابه
مانكدر نزوره المنهدم كبره
*****
يايوم الفرج عجلهه للطلعه
ملينه الغياب ونشفت الدمعه
بنار الانتظار نذوب جن شمعه
من يوم الغبت شيعتكم بحسره
******
إكبور اهلك بلا بيبان لارايه
تبنيهه شوكت ونروح مشايه
بصحن الصادق انسويهه القرايه
وتلتم الحبايب كلهه بالحضره
*******
أم علي

ثكيله للصادق ع نفس طور شمعة ضواي للحاج باسم الكربلائي
*********
ينادي البقيع هل دمعته
الصادق غريب يا شيعته
*********
صاح البقيع بدمعته ها يالموالي
وحشه المكان بغربتي ظلمه الليالي
سادس إمام وبالعرش نوره يلالي
ليش انهدم كبره وبقه من الدمعه خالي
زواره وين شو عافته
الصادق غريب يا شيعته
******
الصادق إمام وللعلم أسس مدارس
ياهو بزمانه وحضرته اليكدر ينافس
لجده الحسين بكل وكت ينصب مجالس
وسفه عله كبره بجت بس النوارس
وناح الحمام لمصيبته
الصادق غريب يا شيعته
*******
أمنيتي ياشيعه تجي تعزي المواكب
عيني عله دروب المشو يوميه اراقب
ناعي عله الصادق ردت اسمع اعاتب
بنار المصيبه احترك وين الحبايب
وكت الغروب ياوحشته
الصادق غريب يا شيعته
********
إبن الأمام المرتضه حكمه وكلامه
بغضا بأبوه الناصبه وحقد الزعامه
جم مره بالنار احترك بيت الأمامه
مثل الحسين بكربله الحركو خيامه
وجانت رقيه بدمعته
الصادق غريب يا شيعته
*******
بمصاب ابنهه فاطمه الليله اجتني
فرشت عبايه عالرمل وتنادي يبني
لجبدك ييمه المنفطر نوحي إويه وني
وكبرك بلا كبه وسكف زيدلي حزني
بحر الشموس بس تربته
الصادق غريب يا شيعته
*******
أم علي

قصيده للصادق ع نفس طور مات الولد مات للرادود كرار الكربلائي
*********
بديت العيون بديت العيون
********
يالصادق لكبرك رحت يمه صحت يايمه
مسموم من ذاك الوكت جبدك يفوح بدمه
ألطم عله ضلعي وصحت يبني الضلع بي لجمه
وكليبي مشلوع ألطم عالضلوع
لامانسيتك يالولد كبرك اجيت اشتمه
بديت العيون بديت العيون
**********
حرموك من شم الهوه يبني النواصب كوه
مسموم جبدك ينفطر وآنه بدليلي اتجوه
من شال نعشك للكبر آنه احضرت هالبلوه
الكاظم اواسيه انعه وابجيه
لمن ينزلك باللحد يومك بحاله شسوه
بديت العيون بديت العيون
**********
بيديه أرش ماي الورد فوك الكبر ونعيته
والدمع بالماي انخبط وي حسرتي طشيته
جوه الشمس كبره انجوه وبدمعتي برديته
لجعفر تعنيت ولعطره حنيت
امك الزهره فاطمه طولي عليك احنيته
بديت العيون بديت العيون
**********
اكبالك كعدت وبالشمس حار الرمل يجويني
جاليش مهدوم الكبر شنهي السبب حاجيني
وين اعلك شموعك حرت يبن الولي دليني
بس ذاري التراب لاحضره لاباب
احجارات كبرك يالولد تبجي وتون لونيني
بديت العيون بديت العيون
**********
مديت ايدي لخالقي يبني اندعي ويايه
ياربي عجل طلعته لبن الحسن رجوايه
يبني كبور امهدمه وبيهن يعلك رايه
يبني المنارات ويعلي رايات
ثارك وثاري يطلبه وثارات اهله هوايه
بديت العيون بديت العيون
**********
أم علي

فزاعيه جنوبيه للصادق ع
********
لأسد بغداد تتعنه الموالين
عله الصادق تنوح بدمعة العين
******
يتعنه المحب للكاظميه
يواسي الكاظم بهاي الرزيه
شال اليوم إمام الجعفريه
سمو جبدته كوم الملاعين
******
شحال اليوم موسه يالموالي
ذب اعمامته والدمع هالي
يصيح بصوت يابويه يغالي
شالو للنعش سدو الدواوين
******
نلطم عالصدر ونواسي ابنه
شيظل بالروح للوالد يدفنه
ليش اعداه مابيهم محنه
سموه بالغدر لأبن السلاطين
******
نعزي الكاظم الليله يالاحباب
جرحه عالولي لليوم ماطاب
عله المهدوم كبره وماله ابواب
بلاكبه ومناره والصحن وين
******
لمأسس المذهب نبجي هاليوم
عله الغرب يشيعه وراح مسموم
وبأرض البقيع الكبر مهدوم
مهدينه شوكت يبنيه متانين
******
يمته للبقيع نروح مشايه
يم كبره العزه وترفرف الرايه
حسره بالكلب ظلت هالقرايه
ونعش الصادق اتشيعه الملايين
******
أم علي

نزله للصادق ع نفس طور روحي راحت للحاج باسم الكربلائي
**********
موسه ابن جعفر غريب الليله
شال نعش الصادق وهد حيله
*******
إيودع الليله حبيبه بونته وحسراته
كلبه من نار المصيبه تستعر جمراته
عله فراك الابو سالت من دمه دمعاته
شال نعش الغالي بيده ويعثر بخطواته
انطفت شمعة بيته التضويله
شال نعش الصادق وهد حيله
********
الكاظم الله يعين كلبه وعالجروح يصبره
راحت الخيمه الجبيره والسند من عمره
طيحة الوالد ثكيله هالكسر شيجبره
فوك مانعشه يشيله بيده يحفر كبره
حنه ظهره وصاح ابويه ادخيله
شال نعش الصادق وهد حيله
********
صاح يابويه برحيلك من يصبر عيني
شلون اهيل تراب كبرك عالوجه حاجيني
راح اظل بعدك غريب اعداك هم تسبيني
بالسجون الظلمه بويه راح اكضي سنيني
والسلاسل تدري حيل اثكيله
شال نعش الصادق وهد حيله
*********
بالغدر مسموم جبدك يالتغير لونك
شلون اتحمل غيابك مااشوف عيونك
تدري بيه شكد احبك دنيه وحشه بدونك
شيعو روحي الغريبه بويه من شيعونك
منهو بعدك بويه همي اشكيله
شال نعش الصادق وهد حيله
**********
إتوسد بكبرك يغالي يالكسرت اجناحي
ارتاح من هالدنيه بويه وآنه اظل بنياحي
بعدك بزنزانه ظلمه ليلتي ومصباحي
ذكرياتي وياك بويه عاشت اويه جراحي
مانسيته بكل ونين ابجيله
شال نعش الصادق وهد حيله
**********
أم علي

شدة لطم للصادق ع
*******
جعفر الصادق يالمحب جم مره حركو داره
********
الصادق ابن حيدر علي إبغض النواصب مبتلي
وجر حقدهم يصطلي زمرة كفر غداره
*********
نفس الوجوه الظالمه أهل السقيفه المجرمه
وجو الدار بفاطمه وابواب حامي جاره
*********
ولكربله عادوهه مثل الخيم حركوهه
ولعيلته روعوهه هالحقد ماله جاره
*********
إبنياته بالنار انجون من خوفهن يتصارخن
ولزينب اذكرهه بحزن لمن بقت محتاره
********
موجود ويباريهن واثيابهن يطفيهن
واللي انذبح واليهن بطف كربله الغداره
********
اخذوهن اعداهن سبي وبالنار محروكه العبي
طبن لقصر الناصبي بدمعتهن التتجاره
********
بالألم تندب شيعته مهدوم كبره وكبته
واللي نواهه زيارته يلكه الترب وحجاره
*********
غايبنه يرجع ياشهر ويبني المراقد بالخبر
ننخه الأمام المنتظر يجعلنه من انصاره
**********
أم علي

شده لأربعين الأمام علي ع
******
هاي الأربعين ومايدك بابي
ابويه المرتضه خلاني بصوابي
******
راح اللي يطبلي وينشد اعليه
تصد عالباب عيني تناطر الجيه
لكعدتنه كبل اشتاك يوميه
لأبو سوالف حنينه نوحي وعتابي
******
فاركني وبعد ماشافته عيني
مرت الاربعين ومايحاجيني
نايم باللحد ياأجمل سنيني
ظلت دمعتي اتسليني بمصابي
******
تعنيت الكبر وبروح ملهوفه
جرحي بالكلب ياريتك تشوفه
والتفكد ابوهه النوح متعوفه
مر طعم الهجر ياأغله احبابي
******
وين ايامنه الحلوه وليالينه
كعدتنه سوه راحت يوالينه
خذاك الموت واحنه ايتام ظلينه
اشمن ريحتك يابويه بثيابي
******
وحشه الدار يابو حسين من دونك
اجيتك للكبر وأرد انشد شلونك
نفس ذاك الوجه لو مختلف لونك
واذا تسأل عليه اسمع اجوابي
******
كبلك لو خذاني البين اشوالي
صوبني الزمان ومارحم حالي
أشيع للكبر غالي وره غالي
افكد كل هلي ماجان بحسابي
******
حكي لو انوح وماابطل النوح
اتجرع غصص وجروح فوك اجروح
اتاني كربله وامصيبة المذبوح
راسه عالرماح وحركو اطنابي
******
أم علي

شده للعليله ع
******
عليله وبالضعن احبابي ماشين
ظلت موحشه يادار الحسين
*******
عليله وبالكلب نيران فركاهم
ماعندي دوه واصبر بلياهم
ياروحي الأحبهم وين ألكاهم
ضيعتي الأهل وإلمن تظلين
********
اليفاركله عزيز دموعه سجابه
الله يعين كلبي الفارك احبابه
كلكم عالسفر ناوين يايابه
وخليتو بكلب بتكم نياشين
********
تودعني يبويه بدمعة عيونك
شالت فرحتي من شالت ضعونك
مااحمل اعيش ايامي من دونك
اعتب عالوكت بس ياخذ الزين
********
احاجي الدار بويه وماتحاجيني
وين الاكبر وعبد الله دليني
ظلت ذكرياتي وبس دمع عيني
تسمع ونتي وتبجي الحياطين
*******
لبو فاضل احن واشتاك يوميه
ودمعاتي دموم من اذكر ارقيه
ولزينب احن من تلزم ايديه
حكج بالبجي معميه ياعين
*******
يدار حسين وين احبابنه الحلوه
وين اهل المحنه وللكلب سلوه
طشرنه الزمان وبلوتي بلوه
شيردج بعد ياذيجي السنين
*******
أم علي

ثكيله للعليله ع نفس طور اوصيكم عله الغالي للحاج باسم الكربلائي
**********
لمحنتكم أدير العين
أصيح بحسرتي يحسين
تداويهه جنح فطرس تداويهه
تشافيهه عليلتكم تشافيهه لمحنتكم
*********
عليله تعوفني بالدار من خوفك
يبويه شلون ترضه العين متشوفك
جنح فطرس يطيب بلمسة جفوفك
دشافي علتي وللموت ماعوفك
بضعنكم بويه اخذوني
غريبه لاتخلوني
جره بيهه الدمع عيني جره بيهه
تشافيهه عليلتكم تشافيهه لمحنتكم
**********
إخذوني يبويه أسرجلكم خيل
وأمد فراشكم لمن يجيكم ليل
لا أظلن وحيده أسهر إعله الويل
جرح إغيابكم بويه هدملي الحيل
إنهدم حيلي يبو اليمه
الدهر ظالم بلا رحمه
غدر بيهه بسهم أعمه غدر بيهه
تشافيهه عليلتكم تشافيهه لمحنتكم
**********
خذت كل الأحبهم بلوتي بلوه
عفتني بعلتي وبالفركه اتجوه
إذا تدعيلي بويه حسين أتكوه
إخذني وياك فدوه هالعمر فدوه
بدمع عيني أرويكم
تباروني وأباريكم
اواسيهه لعقيلتكم اواسيهه
تشافيهه عليلتكم تشافيهه لمحنتكم
**********
الله وياك روح وراشده النيه
لجن بالدار بويه عايف إبنيه
خذت كل الخوات وياهن إرقيه
فراك أختي الحنينه يصعب إعليه
اذا ترجيه سلبوهه
واذا مسبيه اخذوهه
بمآسيهه اظل يمهه بمآسيهه
تشافيهه عليلتكم تشافيهه لمحنتكم
**********
خذت عبد الله مني وبالكلب ونه
اعاين عالمهد خالي واهزنه
صدك ضامي وسهام اعداك صوبنه
بلذيذ الماي بعده شلون اتهنه
اخويه وضحكة سنيني
بسهم فكده انطفت عيني
أصد بيهه بعد إلمن أصد بيهه
تشافيهه عليلتكم تشافيهه لمحنتكم
***********
أم علي

نزله لأم البنين ع نفس طور الدنيه رادتنه للرادود محمد الجنامي
***********
ثكلت همومي ها يبدويه
الشده يم عباس كولي مكضيه
********
إنتي باب الله الوسيع المايسد أبوابه
بحر جودج يالوفيه ومنهل لأحبابه
بابج الليله أدكه بدمعتي السجابه
بجاه نحر المات ضامي بكربله ومصابه
بدمعتي لحسين أرفع إيديه
الشده يم عباس كولي مكضيه
********
ضاكت الدنيه الوسيعه يالحنينه بعيني
ماأسولف همي لأحد بس إلج صدكيني
دمعتي لحسين دوم لكلبج توديني
صبري يكبر عالنوايب وإنتي التصبريني
ويم صبر كلبج ألكه حنيه
الشده يم عباس كولي مكضيه
********
الدنيه بأهل البيت خانت بالغدر معروفه
منهه شأترجه وأريد بدمعتي المذروفه
الخانت بأولاد حيدر والكمر وجفوفه
حسين واخوانه ذبايح عالنهر وجروفه
والكفل زينب عينه مطفيه
الشده يم عباس كولي مكضيه
*********
ننسه تعب الدنيه كله بالمجالس راحه
وننعه وياج الذبيح بعاشر ومصباحه
بصدره تسحك الاعوجيه راسه فوك ارماحه
وزينب اخذوهه سبيه وتمشي وي ذباحه
بالجره اعله ام عون ودمعة ارقيه
الشده يم عباس كولي مكضيه
*********
إمصيبتج للموت تبقه ويانه ماننساهه
آه يحسين ومصابه وياج رددناهه
إلج ونه بالمجالس واحنه عليناهه
وراية العباس ابنج بالفخر شلناهه
يامره المثلج بالعزوبيه
الشده يم عباس كولي مكضيه
********
جيت احلفج بالحسين المارجع لدياره
ودمعج لناعي المصيبه من يجيب اخباره
نظره من عينج عليه وكلبي تبرد ناره
أدري متعوفيني والله بالشدد محتاره
الفاتحه اقراهه وتفرج اعليه
الشده يم عباس كولي مكضيه
********
أم علي

شده لأم البنين ع
*******
حكي لو صحت يحسين ها يبني
من سار الضعن فركاك شيبني
********
آنه ام البنين الاربعه الطيبين
شيبني الوداع وسفرة الغالين
ماهمني البنين يهمني بس حسين
مشت عافيتي يوم اللي مشه عني
********
شلون اصبر عله الفركه يبعد أمك
ومن أسمع ذبيح إمغسل بدمك
وعاري عالرمل يابو علي جسمك
يريت الموت كبلك كون ياخذني
********
من سار الضعن وياه مشت روحي
وظليت بونيني وحسرتي ونوحي
جانت شوفتك يبني دوه جروحي
اخلافك وين ادير العين جاوبني
********
مشو اهل المحنه بحالي مايدرون
خمستهم سوه لطف كربله يرحون
وحس كلبي بعد متشوفهم العيون
اعتب عالزمان شلون حاربني
********
خلاني غريبه بحسرة الاولاد
فديت الاربعه لعيون ابو السجاد
ردت سالم يرد حسين إلي ماعاد
اجه ناعي المصيبه ومااجه ابني
****""**"***
ربيت البنين بهدلة متوني
اعاتب بالدمع متجرحه عيوني
عله العباس ابجي ولاتلوموني
ولجفوفه الكطيعه النوح ذابحني
*******
أم علي

فزاعيه لمسلم بن عقيل ع
********
مسلم سفير حسين لاتنسونه
باب الحوايج كلكم تعرفونه
*********
مسلم شجاع وللوفه سالوفه
حيف بغدر صابوه أهل الكوفه
تربات حيدر مايعرف الخوفه
والغيره تجدح نار من عيونه
*********
عباس جنه وغيرته عنوانه
ماهمه موت ولاغدر عدوانه
إلتمو عليه الجيش وبميدانه
وحده يحارب والعده يهابونه
******
والحيد لمن صال حط إلثامه
بالمعركه طوعه تشد إحزامه
والكاع بيهم زلزلتهه أجدامه
واحد يلوذ بواحد الغدرونه
*********
واتحيرو فرسان أرض الحومه
حفرو حفيره وصادو الجيدومه
بخطه خبيثه بالغدر مرسومه
وناس بحجر ناس بسهم صوبونه
*********
بقصر الأماره الطاغي لمن شافه
عطشان كلبه بسيف حز اشفافه
ومن القصر للكاع ذبه وعافه
بالسوك بحبال الغدر سحلونه
*********
أده السفاره للحسين بروحه
مسلم غريب وماتطيب جروحه
من مات همه عالحسين ونوحه
وشلون اهل الغدر يتلكونه
*********
أم علي

ثكيله لمسلم بن عقيل ع نفس طور يابو فاضل للحاج باسم الكربلائي
**********
ها يبويه تعاتب الوالد حميده
ها يبويه فركتك صعبه وشديده
ها يبويه شوفتك صارت بعيده
ها يبويه
********
ها يبويه ليش ماتنشد عليه
تدري متعوده عليك شلون بيه
فاركتني ودمعتي بخدي جريه
بالضعن الأخبار وصلت هالمسيه
مسح راسي وإمسحت بيدي دمعته
مسح راسي حسين عمي ماعرفته
مسح راسي وصاح راح اللي نريده
ها يبويه
********
عمي يمسح راسي هاللحظه أليمه
بويه حسيت بشعوري آنه يتيمه
بالطفوله التفكد الوالد هضيمه
راح اللي يفيي عله إبناته وحريمه
يتموني إلمن أشكي هموم كلبي
يتموني ضيعت يابويه دربي
يتموني والزمن محد يعيده
ها يبويه
*********
جنت اتنطر تردلي بالسلامه
نار كلبي تسعر بشوكي وهيامه
غياب وجهك بالوجه خله علامه
ليش يابويه انهدم عش الحمامه
جنت طيره ليش كسرولي جناحي
جنت طيره هسه ليش اظلم صباحي
جنت طيره وصرت بالغربه وحيده
ها يبويه
*********
ريت ميته ولاسمعت الخبر آني
مسلم بكوفان مات وماإجاني
ياغريب وغربتك تشبه زماني
بعد صوتك ماأسمعه ياأماني
ياغربتي بروحتك اتمنه موتي
ياغربتي باجر يذبحون إخوتي
ياغربتي بعد ياهو الألزم إيده
ها يبويه
*********
الجانت اتسليني بالشام وعذابه
فوك راس حسين ماتت بالخرابه
انجرح كلبي من رقيه تصيح يابه
وآنه ماشفتك ذبيح اعله الترابه
إسمعت عنك والقهر هدملي حيلي
إسمعت عنك ذبل عودي بسهر ليلي
إسمعت عنك ضامي يشرب دم وريده
ها يبويه
*********
أم علي