شده للأمام علي ع
*****
بسك ياجرح لاتنزف براسه
ابونه المرتضه وعيوني حراسه
*****
جرح المرتضه ياحبابي ياذيني
دمه من نزل عالعين عاميني
بمصاب الأبو وينه اليواسيني
مر طعم الصبر ماينجرع كاسه
*****
ساجد بالصلاة انغدر والينه
ابن ملجم طبر بالسيف غالينه
خضب شيبته والدم عله اجبينه
وجبريل الوحي مجروح بأحساسه
******
جبريل الوحي كبر عله إصوابه
أركان الديانه انهدمت إبابه
مقتول الوصي وينعاه بمصابه
مفجوعين ولده وشيعته وناسه
******
بالحسره يودعونه الحسن وحسين
وزينب هالمسيه كدراهه البين
دمعات اليتامه تجري عالخدين
الله يعين هاي الليله عباسه
******
هالليله السمه تبجي بدمع احمر
والقرآن ينعه المرتضه حيدر
محرابه حزين لفكده يتحسر
شايل ياعلي وهاي آخر انفاسه
*******
أم علي

ثكيله للأمام علي ع نفس طور طبع اليسافر يلتفت للرادود مصطفى السوداني
**********
رايح يبويه للكبر ماحسبت بيه
دمعاتي طاحت عالنعش وظلوعي محنيه
روحي غريبه بفركتك يابويه رد ليه ٢
***********
آنه العقيله ياعلي من ودعتني
ضميتني لصدرك يبويه واحضنتني
تمسح عله راسي بديك وقبلتني
معناهه راح اصبح يتيمه فهمتني
حسيت كلبي يحترك شاجر لهيبه
وجرح البراسك ياعلي ضايع طبيبه
خضبوهه بالدم شيبتك يابويه رد ليه ٢
***********
يارحمة الله للخلك يابو اليتامه
بشهر الصبر يابو الصبر طبرو الهامه
ليلي عذاب بطيحتك وشلون انامه
تلجم بكلبي ونتك خلت علامه
صار الجرح يلجم جرح من سطرة البين
جرح الوديعه فاطمه وجرحك يبو حسين
اسم الله عليك من الكبر يابويه رد ليه ٢
********
يموت العزيز بروحته تخلص معاناته
بس اليظل بعده عدل مسموعه وناته
شلون الابو من يرتحل حالة بناته
مكسورة الخاطر عكب موته إوفاته
عامود خيمتنه وكع طاح اليحامينه
مات الحنين الكل وكت يسأل علينه
وين ألكه حنيتك بعد يابويه رد ليه ٢
*********
زينب غريبه ياعلي بعدك يواليهه
روحي الحزينه تنتحب اسمع نواعيهه
مطرت عيوني عالنعش خلصت بواجيهه
شمعات عمري اللي بقت عالكبر اطفيهه
يانعش هونك بالمشي خليني اشمنه
اشبع وادع من الابو راح انحرم منه
من هسه احن لشوفتك يابويه رد ليه ٢
*********
راح السند من دنيتي ياهيبتي وذخري
عنت عليه شوفتك ظل الدمع يجري
من كبل كبرك ياعلي كون انحفر كبري
ولااحضر مصاب اخوتي ولاينكسر ظهري
الحسن جبده بالطشت متوذر امخضب
وحسين راسه عالرمح بعدك يبو زينب
باجر تجيني كربله يابويه رد ليه ٢
*********
أم علي

فزاعيه جنوبيه للأمام علي ع
******
ياجناز بالوالد عله الهون
تنزف هامته والدم عالعيون
*******
ياجناز هونك ويه ابو حسين
بالك ينلجم صكر الميادين
راسه بالغدر مكسوم نصين
ياحيف الزمان بحيدر يخون
*******
ريض بالنعش يالشايل الحيد
زينب لحكته واتودعه تريد
وين نروح بويه من يجي العيد
تلطم عالوجه واتصيح ام عون
*******
حرمني البين من جلمة اليابه
عزيز الوالد ومااحمل غيابه
بجرح راسه أنه الشديت عصابه
وبسيف المرادي الصابه ملعون
*******
اخافن عالجرح بالماي ينجاس
خويه يالحسن لاتلجم الراس
بهيده الماي صبه خويه عباس
ها يحسين كلي اتكلبه شلون
*******
يخويه للكبر بهداي نزله
زينب بالهضم والنوح كله
جرحي بالكلب ياهو اليشله
وبنص الكلب حيدرنه مدفون
*******
راحت وانتهت ايامنه الحلوه
خيمتنه العلينه اتفرهدت كوه
بلا أم لا أبو هالعيد مايسوه
الجوه اتراب نامو مايرجعون
*******
أم علي

قصيده للأمام علي ع نفس طور مايحاجيها للرادود حيدر البياتي
***********
طبرو هامتك بويه يضرغام
ابن ملجم فجعنه بشهر الصيام
جرح راسك كلف ماتكدر تنام
اسمع ونتك وألطم عله الهام
يلجم جروحي يابويه ونينك
********
اذكر ونت أمي بدفعة الباب
من كسرو ضلعهه جرحي ماطاب
خلتني يتيمه بعازة احباب
تسعر بالكلب جمرات المصاب
دمعتي بعيني من يوم الزجيه
*******
وينج يالحنينه يم الحسين
ماشفتي الجرح والدم عالجبين
تعالي وداوي راسه انجسم نصين
مسمومه طبرته ورايده البين
من يواسيني بحيدر وبمصابه
*******
يودعني وتصب دمعات العيون
يكول خلاف عيني بزينب شلون
حط ايدي بجفوفه لحامي الضعون
ويكله بكربله اتكفلهه لام عون
خدري بيمينه عباس ابو فاضل
********
يامن جنت أشم بي ريحة أمي
هاي الليله آخر ليله يمي
بعد إلمن أسولف بويه همي
ظل بس الحزن والنوح سهمي
شايل الليله اغله احباب كلبي
********
ترحل ياعلي خليني احاجيك
من اشتاك إلك جاوين ألاكيك
يهنيال الكبر يحضن معانيك
مرني بالحلم خليني أشم بيك
لاتجافيني ماأحمل غيابك
********
أم علي

نزله للأمام علي ع نفس طور ثكيله جروحي للرادود محمد الحلفي
***
مدد ياحيدر يقالع خيبر علي مولايه
عليك الهادي اريد مرادي عكدت الرايه
****
جيت احلفك يابو زينب هالمسيه
بخدر زينب والنبي وبته الزجيه
بالحسن وحسين رايد نظره ليه
تعب صوتي من البواجي رد عليه
بشديده انخيتك علي ناديتك وإلك شجايه
عليك الهادي اريد مرادي عكدت الرايه
*****
ياأبو الأيتام يتمني زماني
وين اروح لغير بابك ياأماني
بس ابو الحسنين عندي ماله ثاني
بالشدايد ياعلي يلهج لساني
علي ادركني عبد احسبني ذنوبي هوايه
عليك الهادي اريد مرادي عكدت الرايه
*****
عندي حاجه امعسره مولايه حلهه
نخوتك دوم بلساني ماأملهه
كل المعسرات انته إلهه وأهلهه
وادري ماتصعب عليك العكده فلهه
تحن اعليه بفزعتك ليه بأديك دوايه
عليك الهادي اريد مرادي عكدت الرايه
*****
بالغدر لاحو الهامه ياولينه
مثل ايتامك عله بابك اجينه
وبليالي القدر فجعونه انسبينه
صحنه ياحيف انطبر حيدر علينه
تنوح العيله يتامه الليله بحزنهه قرايه
عليك الهادي اريد مرادي عكدت الرايه
*****
ليلة مصابك يحيدرنه عظيمه
صابو القرآن بالطبره الأليمه
والوحي جبريل كبر بالجريمه
يتمونه وزينب الليله يتيمه
الجرح بأيتامك ونظل خدامك إلك عنايه
عليك الهادي اريد مرادي عكدت الرايه
***
أم علي

فله او شدة لطم لوفاة ابو طالب ع
**********
مأجور النبي الهادي بفكد الكافل الليله
*******
دمعاته تصب بالعين ابو طالب خذاه البين
راح اللي يحامي الدين والله امصيبته اثكيله
*******
بعام الحزن والحسره ينعه والد الزهره
لعمه منكسر ظهره ينوح ومنهدم حيله
********
تكفل بالنبي ويرعاه والد جان إله ورباه
وسنين العمر بحماه واليدناله ياويله
********
محزون النبي المختار من عمه خليه الدار
بوالد حيدر الكرار حمله ياهو اليشيله
********
يغسله وجفنه بيده بنص الكلب تنهيده
صارت شوفته بعيده بالدمعات تغسيله
********
نواسي المصطفه بهمه مصاب الكافل يلجمه
هالليله دفن عمه راح اليعدل الميله
*********
أم علي

ثكيله للسيده خديجه ع نفس طور اهلي تحت الترب للحاج باسم الكربلائي
**********
عمري توه ابتده بعازة الوالده
آنه الزجيه ودمعتي بعيني
********
خمس سنين عمري ودمعتي تهمه
صوبني زماني وماخطه سهمه
بفكد امي خديجه بالكلب لجمه
بعدني مشبعت من جلمة اليمه
أمي يادنيتي سلوتي وفرحتي
بانت عليه كسرتي بعيني
********
شفت نعشج يشيل اكبالي ودعته
وابويه المصطفه ماتنسمع ونته
عليج يلوب تنزل دمعته سكته
افراكج يالحنينه الليله مو وكته
يالرحلتي بعجل من خذاج الاجل
ظلت ملامح وجهج بعيني
*********
ييمه شلون اتحمل غيابج دوم
وسنين العمر جايتني بس هموم
حضنج وين اشوفه لو اجاني النوم
باحضانج انام اتعودت كل يوم
امي لا ماترد نامت بنص لحد
وآنه السهر طفه ضوه عيني
**********
ييمه بعازتج ظليت كل عمري
كبل كبرج يريته اللي انحفر كبري
بعد إلمن اسولف محنتي وقهري
اذا دار الوكت بيه وكسر ظهري
كلبي من ينكسر اركض اعله الكبر
واعله التراب يهل دمع عيني
*******
بعد عينج ييمه مصاب فوك مصاب
رسول الله يفاركني اعز الاحباب
وهجوم الدار بعده واشتعال الباب
بالبسمار ضلعي ينكسر وانعاب
ضلعي ينزف دمه يمه يم فاطمه
ومن الضرب حمره بقت عيني
*******
أم علي

نزله للأمام علي ع نفس طور بس خدمتك للحاج باسم الكربلائي
***
تعاتب ابوهه الكرار
هالليله بت الزهره
****
زينب تعاتب بت علي المهيوبه
لسيف المرادي بيش إله مطلوبه
صاحت يبويه هامتك مخضوبه
دمك عله اجبينك سال
وبأيدي أشد الطبره
***
محراب ابونه ينعه وآنه ابجيله
راح السند من دنيتي هالليله
بفكدك يبويه حسين طايح حيله
رد الحسن محني وصاح
بيدي حفرته لكبره
***
يابويه عدمن بعدك امخليني
وصيت إلمن يالولي حاجيني
بمصابك الدنيه ظلام بعيني
باجر تجيني النكبات
والعمر حسره بحسره
***
إلمن أدير الوجه لو هضموني
وآنه اليتيمه ابلا أهل عفتوني
لمن تجيني كربله ويسبوني
الماعدهه والي تنضام
بويه الكلب شيصبره
****
آنه الغريبه والزمن عاداني
بمصاب اخوتي امتحن خلاني
عالشاطي كلهه امذبحه اخواني
براس الرمح راس حسين
واكبالي ذبحو نحره
****
بحسين بويه إوصيتك وعياله
بعيني لباري بكربله اطفاله
بس كلي بويه لو شفت خياله
شلون اصبر وعشر خيول
تسحك يبويه بصدره
****
اعتب عليك من الحزن مهضومه
آنه العقيله باليسر مظلومه
ميته ولا شفت الحنين ويومه
كطعو جفوف العباس
ونار الخيم مستعره
****
أم علي

نعي للأمام علي ع
******
بويه ياعلي بجيتني إدموم
أودعك يالحنين وبلوتي بلوه
إجاني العيد بويه دمعي بالعين
وبنار الهجر دلالي يتلوه
رايح للكبر ياأغله الاحباب
ياعطر الزجيه وللكلب سلوه
جنت خيمه التلمنه ازغار واكبار
فرهدنه الزمان اخلافك شسوه
خلاني انوح لفكد الأعزاز
انباكت ضحكتي وايامنه الحلوه
شلون اصبر يبويه النعش لو شال
ويظل خالي مكانك يابو المروه
محرابك حزين وخاليه الدار
وحشه دنيتي بلياك ماتسوه
مثل طبرة الهامه تنزف العين
افديلك يبويه هالعمر فدوه
بس ردلي يبو الحسنين انخاك
يداحي الباب وادري ماترد نخوه
********
عليك الكلب يابو حسين وجر
يحيدر بالضلوع بنار وجر
يبويه يالحميت الدين والجار
عفتني ابلا أبو هاي المسيه

جرح راسك بعد ماظنه ينشاف
ضماده ماإله ياعلي وينشاف
مثل دمك يبويه الدمع ينشاف
بعيوني نزف صبح ومسيه

روحي من الهضم ناحت ولابت
ميلمهه بعد لا أرض لابيت
تناشد ياعلي الكرار لابت
صدك نام بكبر حامي الحميه

لأبويه يازماني الراح عيده
شهر رمضان باجر جاي عيده
يالماخذ دليلي وياك عيده
وعندي العيد من نكعد سويه
******
أم علي

ثكيله للأمام علي ع نفس طور يايوم اشوف اعتابك للحاج باسم الكربلائي
***********
شرايد بعد يادهري راح السند من عمري
آنه الغريبه هالليله آنه الغريبه
إلمن اسولف همي من بعد حيدر وأمي
آنه الغريبه هالليله آنه الغريبه
أكبر هضيمه زينب يتيمه
*********
يابويه أعاتب من كضيت إعتاب
من كد البجي حته الرمش هم شاب
جرحي عالوديعه فاطمه ماطاب
واجتني هالمصيبه طبرة المحراب
راسك يبويه طبروه وكلبي بونينه خلوه
ماعندي غيرك يالوالي ماعندي غيرك
انته الدوه لجروحي يامن اعز من روحي
ماعندي غيرك يالوالي ماعندي غيرك
المحنه عظيمه زينب يتيمه
*********
أنه الكضيت عمري بويه بالحسرات
تودعني يبو الحسنين بالدمعات
رايح يالحنين جروحي وين اتبات
مثل صدر الأبو ماكو أبد هيهات
باحضانك تواسيني اتنشف دمعتي بعيني
يابو اليتامه ياحيدر يابو اليتامه
عايفني اجرع آلام بغدر الزمن والايام
يابو اليتامه ياحيدر يابو اليتامه
ماعندي خيمه زينب يتيمه
*********
تلوج من الألم يابويه يالوالي
نبع جرحك دموم شسوه باحوالي
بعصابه أشده وينزف اكبالي
حرت ياناس بمصابه الأبو غالي
خلاني وبياحاله طبرة علي جتاله
مايشفه منهه هالطبره مايشفه منهه
يودعنه هاي الليله وجروحه هدت حيله
مايشفه منهه هالطبره مايشفه منهه
كلش أليمه زينب يتيمه
*********
تودعنه وأويلي من صبح باجر
نعشك من يشيل آنه أكسر الخاطر
بعد عينك كسري ماإله جابر
يجيني مصاب اخوتي وليلة العاشر
بعدك احير بطشتين جبد الحسن راس حسين
وين الگه حضنك يابويه وين الگه حضنك
بفكد اخوتي يصبرني من امشي ظهري محني
وين الگه حضنك يابويه وين الگه حضنك
المأتم أقيمه زينب يتيمه
********
يبويه تروح للزهره وتكر عينك
ونيني يبدي لمن يخلص ونينك
خلصت رحلتك بالدنيه وسنينك
شكطع يابو الحسن مابيني وبينك
شمبعدك جوه التراب عايفني ياداحي الباب
بنار المصايب اتجوه بنار المصايب
شللي بعد بسنيني والدنيه شتراويني
بنار المصايب اتجوه بنار المصايب
والله حريمه زينب يتيمه
********
أم علي

شور للأمام علي ع نفس طور أيا كاظم للرادود محمد بو جباره
***********
أيا حيدر أيا حيدر ٢
********
يالمجبل عليه شفتك من ابعيد
تتوجه اعله ولدك بويه إيد بأيد
انخمش كلبي عليك وصيحت ياحيد
جدمك مايشيلك وسفه ياصنديد
يكودونك بحامي الجار صدك يابويه ياكرار
ترد بطبرتك للدار وأنه دمعي يصب مدرار
أيا حيدر أيا حيدر ٢
***********
يزينب بالعجل كومي واتلكيني
ابن ملجم غدرني وضيع سنيني
طبر راسي ونزل دمي عله اجبيني
شدي طبرتي بالهامه داويني
بسجودي الناصبي إغدرني المرادي بسيفه يطبرني
حزن كلبج يعذبني ودمع عينج يمرمرني
أيا زينب أيا زينب ٢
***********
سامحني يبويه لحزني وآلامي
جبل حيدر علي ويطيح كدامي
طبرو هامتك وإمدد ودامي
بعدك ماأريد العمر وأيامي
تمنيت الجرح بيه مصابك يصعب اعليه
صدك ترحل إلك نيه تروح وامشي محنيه
أيا حيدر أيا حيدر ٢
***********
جرح راسي بنزيفه ينتهي كلشي
اودعكم يزينب للكبر امشي
اذا شفتي الجنازه وشيعو نعشي
تعالي للكبر وكت الصبح غبشي
اسمعج بويه ماعوفج وانه بروحي ألزم جفوفج
اشبكج دومي بطيوفج إطلبيني وأجي أشوفج
أيا زينب أيا زينب ٢
***********
بويه ياعلي اسمع هالحجايه
اظل طول العمر انخاك شجايه
اريدنك تجي لو طاحت الرايه
واذا امشي سبيه تحضر ويايه
سبيه وهودجي مايل وذبيح حسين والكافل
الدمع فوك الوجه سايل كطيعه جفوف ابو فاضل
أيا حيدر أيا حيدر ٢
********
أم علي

ثكيله للأمام علي ع نفس طور عازتهه امنه عازه للرادود معتز تويني
***********
يابه الحسن عفتني هالليله يتمتني
جلمة يبويه تموت من شالو التابوت
هالليله يتمتني
*********
آنه الحسن أنعاك ياحامي الجار
بيدي أشيل اجنازتك يالكرار
حكه الكلب من يشتعل بويه بنار
يابو اليتامه والدمع ينزل حار
كبرك احفره بيدي يافرحتي وياعيدي
دمعي يهل بسكوت من شالو التابوت
هالليله يتمتني
*********
غسلتك بدمعي اليصب من العين
مظلوم ياحيدر علي يابو حسين
بسيف الغدر مطبور راسك نصين
بشهر الصيام إمشيت ياحامي الدين
بليل القدر سبونه بالوالي صوبونه
كلبي عليه مفتوت من شالو التابوت
هالليله يتمتني
**********
ياشمعتي الجانت تضوي بليلي
لفكدك يبويه منهدم كل حيلي
نعشك اشيله عالمتن ياويلي
شلون احمل افراكك علي احجيلي
يابويه هاك عيوني يالمادريت شلوني
يالماسمعت الصوت من شالو التابوت
هالليله يتمتني
***********
ياماي عيني اجنازتك شلناهه
بلحدك يبويه بهيده نزلناهه
لاتنلجم هامتك وسدناهه
آنه واخوتي ياعلي ادفناهه
وردينه للحبيبه زينب صفت غريبه
وحشه بقت البيوت من شالو التابوت
هالليله يتمتني
**********
ياعيد الفطر من تلفي أيامه
أبونه بالكبر ماتمم صيامه
تعيد بالمكابر حيدر ايتامه
دمعتنه دموم لطبرة الهامه
راح الابو اليلمنه صار الحزن سهمنه
والعنده أبو مبخوت من شالو التابوت
هالليله يتمتني
**********
أم علي

شده للأمام علي ع
*******
مطبور الولي والشيبه خضبوهه
زينب تنتحب وتنوح خلوهه
*******
زينب تنتحب تلطم عله الهامه
تصيح بصوت ابونه راحت ايامه
ياحيف الولي ماتمم اصيامه
وبفرض الصلاة الهامه طبروهه
*******
شفتك ياعلي والدم عله عيونك
من كد النزف اصفر غده لونك
شلون اكضي العمر يابويه من دونك
بتك ياعلي الكرار هضموهه
*******
ابن ملجم فجعنه الليله بمصابك
جتال الجرح ومصوب احبابك
طبيبك يالولي أيس من صوابك
ايتامك عليك الدمعه سالوهه
******
سالت دمعة عيالك يبو الحسنين
تفاركنه ومستعجل عليك البين
وبساعة وداعك يابطل صفين
روحي تنسحن وجروحي لجموهه
*******
تذكرت الحنينه فاطمه الزهره
ودعتني يبويه وبالكلب حسره
عفتوني سوه ياوالد العتره
من الأم والأبو زينب حرمتوهه
*******
أم علي

شده للصادق ع
********
عجل بالفرج يايوسف الزهره
جم ثار التطلبه لصادق العتره
*****
إطلب ثار جبده البالغدر سموه
يدير العين صوب القبله من داروه
يلوج من السموم بونته خلوه
الله يعين كلبك وشكبر صبره
******
عندك ثار للدار اليحركوهه
بناته والحرم بالنار روعوهه
مثل نار الخيم بالطف يسعروهه
وبثياب الزغار إيطفي جم جمره
*****
من كتر لكتر يتراكضن بالدار
لعماته ذكرهن والدمع مدرار
علويات اخذوهن سبي الاشرار
ويذكرهه لرقيه بدمعته الحمره
*****
يوميه يون لمصاب ابو اليمه
آلام الطفوف بكلبه ملتمه
بمجالس للحسين وفاطمه أمه
إباب الدار يستقبلهه كل عمره
*****
إمام الجعفريه وينهه أبوابه
كبره بالبقيع إحجار وترابه
يالمهدي تعال وشوف احبابه
مانكدر نزوره المنهدم كبره
*****
يايوم الفرج عجلهه للطلعه
ملينه الغياب ونشفت الدمعه
بنار الانتظار نذوب جن شمعه
من يوم الغبت شيعتكم بحسره
******
إكبور اهلك بلا بيبان لارايه
تبنيهه شوكت ونروح مشايه
بصحن الصادق انسويهه القرايه
وتلتم الحبايب كلهه بالحضره
*******
أم علي

ثكيله للصادق ع نفس طور شمعة ضواي للحاج باسم الكربلائي
*********
ينادي البقيع هل دمعته
الصادق غريب يا شيعته
*********
صاح البقيع بدمعته ها يالموالي
وحشه المكان بغربتي ظلمه الليالي
سادس إمام وبالعرش نوره يلالي
ليش انهدم كبره وبقه من الدمعه خالي
زواره وين شو عافته
الصادق غريب يا شيعته
******
الصادق إمام وللعلم أسس مدارس
ياهو بزمانه وحضرته اليكدر ينافس
لجده الحسين بكل وكت ينصب مجالس
وسفه عله كبره بجت بس النوارس
وناح الحمام لمصيبته
الصادق غريب يا شيعته
*******
أمنيتي ياشيعه تجي تعزي المواكب
عيني عله دروب المشو يوميه اراقب
ناعي عله الصادق ردت اسمع اعاتب
بنار المصيبه احترك وين الحبايب
وكت الغروب ياوحشته
الصادق غريب يا شيعته
********
إبن الأمام المرتضه حكمه وكلامه
بغضا بأبوه الناصبه وحقد الزعامه
جم مره بالنار احترك بيت الأمامه
مثل الحسين بكربله الحركو خيامه
وجانت رقيه بدمعته
الصادق غريب يا شيعته
*******
بمصاب ابنهه فاطمه الليله اجتني
فرشت عبايه عالرمل وتنادي يبني
لجبدك ييمه المنفطر نوحي إويه وني
وكبرك بلا كبه وسكف زيدلي حزني
بحر الشموس بس تربته
الصادق غريب يا شيعته
*******
أم علي

قصيده للصادق ع نفس طور مات الولد مات للرادود كرار الكربلائي
*********
بديت العيون بديت العيون
********
يالصادق لكبرك رحت يمه صحت يايمه
مسموم من ذاك الوكت جبدك يفوح بدمه
ألطم عله ضلعي وصحت يبني الضلع بي لجمه
وكليبي مشلوع ألطم عالضلوع
لامانسيتك يالولد كبرك اجيت اشتمه
بديت العيون بديت العيون
**********
حرموك من شم الهوه يبني النواصب كوه
مسموم جبدك ينفطر وآنه بدليلي اتجوه
من شال نعشك للكبر آنه احضرت هالبلوه
الكاظم اواسيه انعه وابجيه
لمن ينزلك باللحد يومك بحاله شسوه
بديت العيون بديت العيون
**********
بيديه أرش ماي الورد فوك الكبر ونعيته
والدمع بالماي انخبط وي حسرتي طشيته
جوه الشمس كبره انجوه وبدمعتي برديته
لجعفر تعنيت ولعطره حنيت
امك الزهره فاطمه طولي عليك احنيته
بديت العيون بديت العيون
**********
اكبالك كعدت وبالشمس حار الرمل يجويني
جاليش مهدوم الكبر شنهي السبب حاجيني
وين اعلك شموعك حرت يبن الولي دليني
بس ذاري التراب لاحضره لاباب
احجارات كبرك يالولد تبجي وتون لونيني
بديت العيون بديت العيون
**********
مديت ايدي لخالقي يبني اندعي ويايه
ياربي عجل طلعته لبن الحسن رجوايه
يبني كبور امهدمه وبيهن يعلك رايه
يبني المنارات ويعلي رايات
ثارك وثاري يطلبه وثارات اهله هوايه
بديت العيون بديت العيون
**********
أم علي

فزاعيه جنوبيه للصادق ع
********
لأسد بغداد تتعنه الموالين
عله الصادق تنوح بدمعة العين
******
يتعنه المحب للكاظميه
يواسي الكاظم بهاي الرزيه
شال اليوم إمام الجعفريه
سمو جبدته كوم الملاعين
******
شحال اليوم موسه يالموالي
ذب اعمامته والدمع هالي
يصيح بصوت يابويه يغالي
شالو للنعش سدو الدواوين
******
نلطم عالصدر ونواسي ابنه
شيظل بالروح للوالد يدفنه
ليش اعداه مابيهم محنه
سموه بالغدر لأبن السلاطين
******
نعزي الكاظم الليله يالاحباب
جرحه عالولي لليوم ماطاب
عله المهدوم كبره وماله ابواب
بلاكبه ومناره والصحن وين
******
لمأسس المذهب نبجي هاليوم
عله الغرب يشيعه وراح مسموم
وبأرض البقيع الكبر مهدوم
مهدينه شوكت يبنيه متانين
******
يمته للبقيع نروح مشايه
يم كبره العزه وترفرف الرايه
حسره بالكلب ظلت هالقرايه
ونعش الصادق اتشيعه الملايين
******
أم علي

نزله للصادق ع نفس طور روحي راحت للحاج باسم الكربلائي
**********
موسه ابن جعفر غريب الليله
شال نعش الصادق وهد حيله
*******
إيودع الليله حبيبه بونته وحسراته
كلبه من نار المصيبه تستعر جمراته
عله فراك الابو سالت من دمه دمعاته
شال نعش الغالي بيده ويعثر بخطواته
انطفت شمعة بيته التضويله
شال نعش الصادق وهد حيله
********
الكاظم الله يعين كلبه وعالجروح يصبره
راحت الخيمه الجبيره والسند من عمره
طيحة الوالد ثكيله هالكسر شيجبره
فوك مانعشه يشيله بيده يحفر كبره
حنه ظهره وصاح ابويه ادخيله
شال نعش الصادق وهد حيله
********
صاح يابويه برحيلك من يصبر عيني
شلون اهيل تراب كبرك عالوجه حاجيني
راح اظل بعدك غريب اعداك هم تسبيني
بالسجون الظلمه بويه راح اكضي سنيني
والسلاسل تدري حيل اثكيله
شال نعش الصادق وهد حيله
*********
بالغدر مسموم جبدك يالتغير لونك
شلون اتحمل غيابك مااشوف عيونك
تدري بيه شكد احبك دنيه وحشه بدونك
شيعو روحي الغريبه بويه من شيعونك
منهو بعدك بويه همي اشكيله
شال نعش الصادق وهد حيله
**********
إتوسد بكبرك يغالي يالكسرت اجناحي
ارتاح من هالدنيه بويه وآنه اظل بنياحي
بعدك بزنزانه ظلمه ليلتي ومصباحي
ذكرياتي وياك بويه عاشت اويه جراحي
مانسيته بكل ونين ابجيله
شال نعش الصادق وهد حيله
**********
أم علي

شدة لطم للصادق ع
*******
جعفر الصادق يالمحب جم مره حركو داره
********
الصادق ابن حيدر علي إبغض النواصب مبتلي
وجر حقدهم يصطلي زمرة كفر غداره
*********
نفس الوجوه الظالمه أهل السقيفه المجرمه
وجو الدار بفاطمه وابواب حامي جاره
*********
ولكربله عادوهه مثل الخيم حركوهه
ولعيلته روعوهه هالحقد ماله جاره
*********
إبنياته بالنار انجون من خوفهن يتصارخن
ولزينب اذكرهه بحزن لمن بقت محتاره
********
موجود ويباريهن واثيابهن يطفيهن
واللي انذبح واليهن بطف كربله الغداره
********
اخذوهن اعداهن سبي وبالنار محروكه العبي
طبن لقصر الناصبي بدمعتهن التتجاره
********
بالألم تندب شيعته مهدوم كبره وكبته
واللي نواهه زيارته يلكه الترب وحجاره
*********
غايبنه يرجع ياشهر ويبني المراقد بالخبر
ننخه الأمام المنتظر يجعلنه من انصاره
**********
أم علي

شده لأربعين الأمام علي ع
******
هاي الأربعين ومايدك بابي
ابويه المرتضه خلاني بصوابي
******
راح اللي يطبلي وينشد اعليه
تصد عالباب عيني تناطر الجيه
لكعدتنه كبل اشتاك يوميه
لأبو سوالف حنينه نوحي وعتابي
******
فاركني وبعد ماشافته عيني
مرت الاربعين ومايحاجيني
نايم باللحد ياأجمل سنيني
ظلت دمعتي اتسليني بمصابي
******
تعنيت الكبر وبروح ملهوفه
جرحي بالكلب ياريتك تشوفه
والتفكد ابوهه النوح متعوفه
مر طعم الهجر ياأغله احبابي
******
وين ايامنه الحلوه وليالينه
كعدتنه سوه راحت يوالينه
خذاك الموت واحنه ايتام ظلينه
اشمن ريحتك يابويه بثيابي
******
وحشه الدار يابو حسين من دونك
اجيتك للكبر وأرد انشد شلونك
نفس ذاك الوجه لو مختلف لونك
واذا تسأل عليه اسمع اجوابي
******
كبلك لو خذاني البين اشوالي
صوبني الزمان ومارحم حالي
أشيع للكبر غالي وره غالي
افكد كل هلي ماجان بحسابي
******
حكي لو انوح وماابطل النوح
اتجرع غصص وجروح فوك اجروح
اتاني كربله وامصيبة المذبوح
راسه عالرماح وحركو اطنابي
******
أم علي