مانگی ڕەمەزان هاتەوە بۆ بەختی شەڕی من
ڕەنگزەردو زەعیفە گوڵەکەی سیمبەری من..

گەر بێت و دەرمکەی بەخوا ڕۆژێ دووسەد جار
هەر خاکی دەری تۆیە نیگار تاجی سەری من..


#ئەحمەد_موختار_جاف

زەمانێکە بەڕۆژووم بەو ئومێدەی هەر دەڵێم بیکەم
لە قورسی ڕوومەت و عەننابی لێوت بەڵکە بەربانگێ


#حەمدی

داوای لێبوردن لەو کچە بکە
کە لە قاوەخانەکە جێی هێشتی
لەبەر ئەوەی تۆ ئاگات لە شێوازی قژ داهێنانە نوێیەکەی نەبوو..

ئاگاداری ئەو پەپولانەش نەبویت
کەلەسەر ڕومەتەکانی سەمایان دەکرد..


#مەحمود_دەروێش

قوربانی قەدت بم کە دەڵێی سەروە بە ڕەفتار
تا کەی لە خەمت دەربەدەر و سینە بریندار..


#ئەدیب

من ئاواتێکم هەبوو زوو
وەک خەوی خۆش لەدەستم چوو

یارێکم هەبوو وەک باڵدار
فڕی بۆ ناو کۆشک و تەلار

مەل بۆم گریا نەگریام خۆم
سەرم نەنایە سەر ئەژنۆم

ئەی گوڵی گەشاوەی بەهار
با تۆ ماچ کەم لەجیاتی یار


#کامەران_موکری

لەبار و قیت و قۆزە خاوەنی زێڕ
ئەگەر کووڕە و وەگەر گۆجە و شەل و گێڕ

بەژنباریک و شووش و شۆڕەلاوە
ئەگەر پیرێکی خوێنتاڵە و ورگتێڕ

دەڵێن زانا و ئەدیب و خوێندەوارە
ئەگەر نەیخوێندبێ شەش پیت و دوو دێڕ

بەڵام زێڕت نەبێ سووکی ئەگەر تۆ
بدەی دەرسی هەزاری وەک شکسپێر



#هێمن

دەمێکە یار کە ناپرسێ لە حاڵی عاشقی زاری
لەبیر چۆتەوە چەن وەختە وا عەبدی وەفاداری

لەلام وابوو کە یارێکی وەفادار و وەفا جۆیە
بەسەهوا چووم و نەمزانی وەهایە ڕەسم و ئەتواری

ئەگەر چی بێوەفا و مەیلە بەڵام ڕۆح و دڵم سەد جار
بەقوربانی نیگاهی دیدە و لێوی شەکەرباری


#ئەحمەد_موختار_جاف

بێمروەتیت کرد ھەی شەم دەربارەم
من بۆ تۆ قەیسی سیاستارەم

وادەی من و تۆ دیوانی خوا بێ
مەگەر ئەو ڕۆژە دادم ڕەوا بێ

شەمی ڕوومەتشەم تۆ بەسەلامەت
سکاڵای دڵم کەوتە قیامەت


#وەلی_دێوانە

چوونی منی بێچارە لەبۆ مەعبەد و مزگەوت
بۆ دیتنی میحرابە کە تەشبیهە بە ئەبرووت


#قانع

سەردەمێ مەست و خومارە خادمی مەیخانەیە
کاتێ تەسبیحی لەدەستە سۆفییە حەی حەی دەکا

ڕۆژی وایە هەر بەکەیف و پێکەنین و خەندەیە
بەعزە جار مەجنوونە دایم گریە بۆ لەیلای دەکا

#صافی_هیرانی

لە ئەم عیدە بەعیدم من لە دیداری ڕەفیقانم
خودا سا تۆ قەریبم کەی لە خوانی وەسڵی یارانم

لەلایێ عیشرەت و شادی، لەلایێ گەردنازادی
ئەمن کەوتوومە نێو داوی حەریقی ناری هیجرانم

سەرم قوربانت ئەی ساقی کە تۆ سادەی، وەرە سا دەی
فیداتم دەستوبردێ کە ئەجەل نەک بێ بە میوانم


#حەریق

من وەکوو لالە کە بێبەش بم لە قەددت وەک چنار
وەک یەکە بۆ دڵ چ داغی ئیشتیاقت بێ چ نار

بۆ نموونە باغی عالەم نەخلی وەک تۆ دەردەخا
کێ چناری دیوە فەرموو بەر بدا وەک ئەو چنار


#حەمدی

لە سەر ناچێتە دەر ساتێ خەیاڵی بسکی خاوی تۆ
ئەگەرچی تێ‌گەییشتم چاوەکەم خاوە خەیاڵی من


#هێمن