دڵيش مايل به‌ ديده‌ى تۆيه‌ بۆيه‌
له‌من وه‌حشى و ڕه‌ميده‌و دوره‌ ئه‌مشه‌و..


#نالى

سینە سەد لەت بوو، سەرم سەد داغی سەودا پێوە، چووم

عەرزی حاڵم کەم، بە ئیستیهزاوە دەیوت: چاک و باش

#مەحوی

نەڵێ مەردم کەدنیا پشتی لەو ، ئەو ڕو لەدنیابێ
کەپوری زاڵە ، بۆچی پیرە زاڵی پێ ڕەزا نابێ

لە دەروێش و لە شا ئەم فاحیشە ئاخر دەکا حاشا
گەر ئەھلی غیرەتی ، بەر لەو لەخۆی و ئەھلی حاشابێ

ئەگەر تاجت لەسەرکا ، سەرتی پێوە قوت ئەدا ئاخر
موبارەک کەی دەبێ ئەو خەلعەتەی وا خەلعی لەدوا بێ

#مەحوی

پور : کوڕ
( پوری زاڵ واتا ڕۆستەم کوڕی زاڵ)

بەکورتی :
دنیا وەفای بۆکەس نیە و بەکەسیش ڕەزا نابێ وەک چۆن بۆ ڕۆستەمی زاڵیش نەما ، بەڵام دنیای پیرە فاحیشە ھەر دەمێنێ،
ھەمو کەس بەبێ جیاوازی دەروێش بێ یان شا ، دەوڵەمەند یان فەقیر کەس نامێنێ و دنیا لەجێی خۆیەتی
تەنھا داد ی ڕاستە قینە ئەوەیە کە مردن جیاوازی ناکات لەنێوان کەسەکان.
لەوانەیە دنیا تاجت بکاتە سەر دڵی خۆت خۆشمەکە بەوە چون ھەر ڕۆژێک دێت لەسەت دایدەماڵن ،کەشتێکیش لێت بسە ننەوە پێویستی بە پیرۆز بایی نیە

مەرھەم کە شەفابەخشی برینە بە حەقیقەت
وەک داخی لە سەر داخە، لە بۆ داخی دەروونم


#تاهیر_بەگی_جاف

وەکوو بیستم خەمت خواردم
ئەویش بۆ من خەمێکی دی..

دڵت بـــۆ ماتەمم سووتــا
ئەویشم ماتەمێکی دی..


#سەید_کامیل_ئیمامی

لە چی ترسای؟
لە چی تۆرای؟
بۆچی ڕووی خۆتت وەرگێڕا؟
وات ئەزانی دارستانی بەژنی جوانت ئەسووتێنم؟
کۆشکی بەرزی خۆشەویستت ئەڕووخێنم؟
ڕاستە گیانە، پشکۆ و بڵێسەی ئاگرم
هەرەسی بەفری تاسەم و
چاوەڕوانی هاوار و گرم و هۆڕ ئەکەم.
ڕاستە گیانە، هاوارێکی زۆر بەرزم و
ملە و زریان و لافاویش چاک ئەناسم!
بەڵام، بەڵام
خۆ تۆی ئازیز، ئێجگار لەوە باڵاتری
دەستی زریانت پێ بگات...
هەرەس بتکا بە ژێرەوە...
خۆر بتوانێ بتسووتێنێ...
شەپۆڵ یاریت لەگەڵ بکات.
تۆ سروودێکی تازەیت و
لەسەر لێوی ئەم وڵاتە
ڕۆژی بە هەزاران کەڕەت ئەتخوێننەوە
تۆ ئەو عەشقە پیرۆزەی وا
شەو تا بەیان
بەیان تا شەو
لە باوەشی گوڵجاڕێکا، پرچی جوانی دائەهێنی و
خۆشەویستی، لەناو کوورەی دڵی پاکتا ئەتوێتەوە.
لە چی ترسای
هەرچی دەماری ناو دڵمە، هەڵیکێشن
ناتوانن... نا...
خۆشەویستیت
لە بیر و مێشکم دەرکێشن!


#ژیلا

کە دیتم دولبەرم دڵگیرە لێم، پێم گوت کە بمبەخشە
گوتی: ئەبرۆ و موژەم بۆ کوشتنی تۆ تازە ساومدا


#عەونی

بێوەفایە گوڵ
هەموو دوو هەفتە ڕووی خۆی دەرئەخا

من لەمەولا عاشق و مەجبووری دڕکوداڵ ئەبم


#کەمالی

بۆچی ئەتهێشت خۆشم بوێی؟
کەئەتزانی من ئەو ڕەندەم
لەم وڵاتە بچکۆلانەی
دڵی خۆشما پەناهەندەم..!


#بەکر_عەلی

جەژنی قوربانن دڵم شاد کەرۆ
بنێ وەی گەردەن شمشێری ئەبرۆ


#خادیم

چاوت ئاو و دەستەکانت با و
ئەوینت تۆوی گوڵی هۆنراوەمە
ئەی کچەکە!

#شێرکۆ_بێکەس

مەگەر تۆ عەرزی حاڵم کەی لە کن یار
قەڵەم ساغی قسە: من نیمە یـــــارا...


#مەحوی
واتا: ئەی قەڵەم من خۆم ناتوانم مەگەر تۆ حاڵم لای یار باس بکەیت و حاڵی دەردمی بۆ بنووسی و داوای لێ بکەی جارێ ناوم بهێنێ.

سەماعی سازی عیشق و ڕێگە بۆ پاڕانەوەت مەحوی
لە بەر قاپی تەڵەب بێ، گوێ دەبێ کەڕ بێ، زوبانت لاڵ


#مەحوی
واتا: مەحوی ئەگەر مەبەستت ئەوەبێ گوێت لە ساز و ئاوازی عشق بێ و ڕێگات بدرێ لەبەر دەرگای یاردا بپاڕێیتەوە، دەبێ سەر بۆ باری دڵداری شۆڕکەیت و هیچ نەبیسی و هیچ نەڵێیت.

وەرە ئەی کۆنە یاری خەمڕەوێنم
وەرە ئەی تازە بووکی دڵڕفێنم

#ناسر_ئاغابرا

تۆ وەک کام وەرزی ساڵ دەچی
بە دوو چاوی نێرگزت بەهارستانی
بە مەیلت، سووری هاوینی
بە لیمۆت، قەوسی پاییزی
بە ڕووی بەفرینت، زستانی
تۆ وەک کام وەرزی ساڵ دەچی
هەر کە دەتبینم بۆ کاتێ
دیتنێکت، خەمی ساڵێکم دەداتێ

#ناسر_ئاغابرا