وەرە ئەی کۆنە یاری خەمڕەوێنم
وەرە ئەی تازە بووکی دڵڕفێنم

#ناسر_ئاغابرا

تۆ وەک کام وەرزی ساڵ دەچی
بە دوو چاوی نێرگزت بەهارستانی
بە مەیلت، سووری هاوینی
بە لیمۆت، قەوسی پاییزی
بە ڕووی بەفرینت، زستانی
تۆ وەک کام وەرزی ساڵ دەچی
هەر کە دەتبینم بۆ کاتێ
دیتنێکت، خەمی ساڵێکم دەداتێ

#ناسر_ئاغابرا

لێرە نیت و بەڵام هێشتا
لەسەر زاری پەڕەسێلکەی ئێوارانی و
لە نەغمەی ڕەش و سپیدا
دوو باڵی تەڕی گریانی و
لەسەر پاییز و
لەسەر من
لەنگەر ئەگری !

#شێرکۆ_بێکەس

دڵ کە وەک مەجنوونە ئەوڕۆ ئارەزووی لەیلا دەکا
هەر وەکوو وەحشی دەسووڕێ حەز لە جێی سەحرا دەکا


#موخلیس

دڵم هاوینسیفەت بۆ دیدەنیی یار گەرمە ئەمڕۆ من
ئەما یارم لەئاستی من ئەڵێی سەرمایی زستانە

#ئەحمەد_موختار_جاف

تازه ماسیی تاسەباری دەستی تینووت
ڕێی نییه بۆ دەریای سینەم...


#سواره_ئیلخانیزاده

شەوێکی چاوەنواڕت بووم، نەهاتی گیانەکەم، ویستت
منی دڵ ناسکی شاعیر بگێڕم ماتەمێکی تر


#هێمن

من تاریکم وەک شەوەزەنگ
تۆ گیانی، تیشکی، ڕووناکی


#جەلال_مەلەکشا

جگەر دەبڕێ، دڵ ئەڕفێنێت و دەڕوا
چ بێ مروەت، چ بێ پەروا، چ بێ باک

وتم: عیشق ئاگری گرتە وجوودم
وتی: ھەر بابەتی سووتانە خاشاک


#مەحوی

لێرە نیت و لێرەش نەبیت، هەر چرای چاو و بیناییت
لێرە نیت و لێرەش نەبیت، هەر سەرچاوەی دڵنەواییت
لێرە نیت و لێرەش نەبیت، تۆ هەر لێرەی لەناو گیانما
لێرە نیت و لێرەش نەبیت، بۆ ترس و بیم دڵنیاییت

#نوری_بێخاڵی

لەو ڕۆژەوە
تەخت و تاجی مەملەکەتت داگیر کردووم
هەر پنجێک گیا با لێی بدا
من لەگەڵ ئەو بەدەم باوە دەشنێمەوە...
لەو ڕۆژەوە
من هەسارەی بێ تەوەرم
بە ئازادی
بە گەردووندا دەخولێمەوە!
من لەو هەموو بەختەوەرییە ڕانەهاتووم
دەخیلت بم
ماوەم بدە تا لێی ڕابێم...
زۆر دەترسم دامڕمێنێ
زۆر دەترسم
دەرنەبەم و بە چۆکدا بێم

#پەشێو

کاپتن تۆ زەمەنی فرمێسک نا خوێنیتەوە
تێناگەی
ئەو دەمەی پیاو دەگری
کەون چ خەلەلێکی تێدایە
کاپتن....!!

#جەمال_غەمبار

“بە بێباکی دەمێکی هات و داغی کردم و ڕۆیی
دەبێ حاڵی چ بێ بولبول، بەهار زۆر پێ نەچوو ڕۆیی؟”


#وەفایی

چاوی تۆ زۆر لە ئەوین ئەدوێ لەگەڵ من چ بکەم
مەست ئەدرکێنێ قسە و، دوایە دەکا حاشایە


#هێدی

تەبیبی چی؟ حەکیمی چی؟ بە من چی عیلم و گوفتاری
ئەوی نەیدیبێ ئێشی دڵ، وەیا ئالامی دڵداری


#دڵدار

هیچ کەس نەواچۆ وە فەرهاد ڕەندەن
نەقشی شیرینش نە ڕووی سەنگ کەندەن
دەک ڕێزان دەس با وەر جە گیان سەندەن
کێ ئەڵماس نە ڕووی دیدەی وێش شەندەن

مەولەوی دەڵێت:
کەس بە فەرهاد نەڵێ ڕەند و مەرد و ئازا و هونەرمەندی، بەوەی وێنەی شیرینت لە بەرد هەڵکۆڵیوە و لەو شاخە دات تاشیوە، دەک دەستی بڕزێت پێش ئەوەی گیانی دەرچێ،
ئەگەر بەڕاستی شیرینی خۆش بویستایە ئەوا ئەڵماس (تەشوێ)ی نەدەدا لە ناوچاوی خۆی.یانی لەناو چاوی شیرین.

#مەولەوی