#ASAL_FESTIVALI #HONEY_FESTIVAL

Namanganda IV “Xalqaro asal festivali” boshlandi

Bugun Davlatobod tumanidagi “Afsonalar vodiysi” tematik parki to‘rtinchi bor Xalqaro asal festivaliga mezbonlik qilmoqda.

Namangan brendiga aylanib borayotgan “Xalqaro asal festivali” Davlatimiz Rahbarining asalarichilikni rivojlantirishga qaratayotgan katta e’tiborlari hamda soha vakillarini qo‘llab-quvvatlash yo‘lida berilayotgan keng imkoniyatlar samarasini namoyon etish, bu borada xalqaro ilg‘or tajribalarni uyg‘unlashtirishda muhim ahamiyat kasb etadi.

Festivalning tantanali ochilish marosimida Namangan viloyati hokimi Shavkatjon Abdurazzoqov, xorijlik mehmonlar, viloyat jamoatchiligi hamda Namangan davlat universiteti jamoasi ishtirok etdi.

Namangan viloyati hokimi Shavkatjon Abdurazzoqov bu kabi festivallarning ahamiyati, turizm rivojidagi hissasi haqida to‘xtalib, festival, ayniqsa, soha vakillariga asal yetishtirish barobarida asalarichilik hunarmandchiligi buyumlarini tayyorlash kabi ilm va hunar uyg‘unlashgan o‘ziga xos maktab, hamkorlik maydoni sifatida muhim rol o‘ynashini ta’kidladi.

Ta’kidlash joizki, festivalda nafaqat asalarichilik masalalari, balki sohaga oid boshqa tadbirlarni ham qamrab olish rejalashtirilgan. Bugun festival doirasida “Bo‘sh ish o‘rinlari mehnat yarmarkasi”, namanganlik hunarmandlar ko‘rgazmasi va sport musobaqalari bo‘lib o‘tmoqda.

Namangan davlat universiteti jamoasi ham mazkur festivalda faol ishtirok etib, universitetning professor-o‘qituvchilari hamda talabalari tomonidan asalarichilik va tabiatni asrashga oid ilmiy ishlanmalar, innovatsion g‘oyalar taqdim etilmoqda.

Namangan davlat universiteti Axborot xizmati

Bizni rasmiy sahifalarimizda kuzatib boring:

Veb-sayt| Facebook | Instagram | YouTube