سبحان اللّه ..
أحياناً بجملة عابرة بتدخل مسامعك من عابر سبيل بتغيّر نظرتك بموضوع فبتحلّ مشكلة صرلك شهور واقع فيها ..
أحياناً مشهد عابر لمحته بجدد طاقتك و بيعطيك همّة أكتر من بودكاست صرلك أسابيع عم تحضره..

بالمظهر العام هالأشياء كلها صدفة بصدفة
قرأت بالصدفة شفت بالصدفة سمعت بالصدفة لتقيت بحدا بالصدفة..

بس خليني آخدك ع المنطق الأعظم
الي رح يخلينا متفقين أنو ما في صدفة بهالحياة!

كل أشي عند ربنا مخلوق بمقادير وموازين دقيقة جداً و بتواقيت محددة لتحصل ..

لهيك مافي صدفة بالحياة
في قدر مكتوب لكلشي بحياتك .. مرسوم بأدق التفاصيل..
ف انتبهوا لإشارات ربنا بالأشياء الي بتجي فجأة ..
شوفوا شو عم يبعتلكم و كيف عم يعلّمكم..
أحياناً كلمة وحدة بموقف مناسب بتغير دوافعكم و أفكاركم تغيير ما قدرت عليه عشرات الكتب والمحاضرات..

خليّكم واعيين و كونوا بخير🤍🦋

هِيام الضاهر

-‏أتمُّ الناسِ عقلاً مـن تراهُ عن الأقوامِ مشغولاً بنفسه🤍🦋.

-مبارح أخدت محاضرة بتحكي عن الأمراض النفسية و كان أغلب الحكي عن الاكتئاب و أسبابه و كيف منتعامل مع المريض و كيف منعالجه ..

الدكتور ذكر كتير أسباب و توّسع بالشرح بشكل رهيب ..
لحتى وصل ع ذكر أحد المركبات ، فعلّقت ببالي جملة حكاها بوقتها ..قال:
"نقص هالمركب بيعمل نقص بهالهرمون و بالتالي الإصابة بالاكتئاب"

صفنت شوي!
و خطرتلي كتير أسئلة ..منها:
معقول نقص هالمركب البسيط يعمل بالإنسان كل هاد؟؟

بعدين تذكرت أنو نحن من صناعة اللّه

سبحان اللّه كيف مُمكن عوز بمركّب بسيط ضمن جسدنا ..
مركب واحد من بين بلايين بلااايين المركبات والإنزيمات والمواد، قادر يقلب نشاط الإنسان وهمته و مزاجه وحتى حياته كلها!
سبحان اللّه على حجم التعقيد والتناسق بالإنسان.

وفي كلِّ شيءٍ له آية ، تدلُّ على أنّه الواحد🤍🦋.

هِيام الضاهر

-اليوم أخي كان عم بلاعب بنته
(عمرها سنة)
حطها ع رف شوي عالي عنه و مد أيديه و حكالها تعي ..تلقائياً رمت حالها عليه بدون تردد و خوف من أنها تقع

الطفل عنده ميزة رائعة جداً هي أنو ما بخاف..
بتحكيله حط إيدك ع مكان ساخن بحطها ، ارمي حالك بهاد المكان بيرمي ، بيلعب بمقص ما بهمه ، بيلعب بالكهربا ما بهمه..
هالشغلات خطر ع الأكيد كلنا منعرف،
أنا و أنت منعرف بس هو ما بيعرف و هاد تفسير ليش الطفل ما بيهتم و لا بخاف..

ذاكرة الطفل ببدايتها بتكون لوحة بيضا،
مابيملك ذكريات عن عواقب الاشياء الخطرة الي بين إيديه و لا بيلمك ذكريات مؤلمة عنها..

أما نحن عكس هالطفل اللطيف ..
بنخاف من المعاناة، بنخاف من الألم و الفشل ، بنخاف نفوت بشغلة وما نطلع قدها ..

الخوف مو أمر سيء لا أبداً
في نقاط لازم نخاف فيها و بيتطبق عليها
(لولا الخوف لأهلك الناسُ أنفسهم)

وبمواضيع تانية الخوف فيها بقيدك و بخليّك أسير ف بيتطبق عليها
(بالخوف يهلك الإنسان نفسه، ويصده عن كثيرٍ من مواضع الخير )


ف أنت حكيم نفسك وين و إيمت لازم تخاف..
لا تحسبها كتير لدرجة يغلب الخوف عالإقدام ..
خليك شجاع متل الطفل الصغير و واعي متل ما أنت ..🤍🦋


هِيام الضاهر

-ولقَد رجَوتُكَ يا إلهِي طامِعًا
ألاَّ يَخيبَ مدَى الحياةِ رَجائي🤍🦋.

اللّه معنا🤍🦋.

-اليوم نزل تاريخ بدء أمتحاناتي بكلية الصيدلة
تذكرت كميّة المواد المتراكمة و كميّة الضغوطات الموجودة عندي ..
تلقائياً العقل الباطن استغل الفرصة و دخلني بمتاهة كبيرة
-أنتِ ضيّعتِ وقت مع كل هالضغط!
-مستحيل تقدري تعوّضي الي راح!
-لازم مشتغلة أكتر ، ما ضل وقت!
-و طبعاً ما رح تلحقي مع كل الضغوطات و المسؤوليات الموجودة بحياتك!

قررت أهرب من هالأفكار و فتحت تيلغرام و دخلت ع اول قناة بوجهي كرمال ما اترك حالي لنفسي ..

لقيت أول بوست بهالقناة بيحكي:

((المُسلم في أيّ وقتٍ إذا استدرك فهو يستدرك عِند كريمٍ ، واللّه عزّ وجل هو الكريم ، فإن رأى مِنك خيرًا أعانك ، و إن أريته مِن قلبك صدق النيّة يسّر لك الأسباب ويسّرها عليك))🤍

بأي وقت منستدرك التقصير و منقرر نبلش بجديّة ربنا رح يمهّدلنا الطريق بشرط وجود النيّة الصادقة

بوست صغير كان كفيل لينتشلني من دوامة كبيرة و متاهات و اسئلة..

ف شكراً يارب عَ الإشارات الي بتذكرنا ع وجود الأمل بعز الكرب
و أنو حسن الظن باللّه هو مفتاح المستحيلات مهما كانت المعطيات بتوحي العكس🤍🦋

إلي و إلكم (دائماً في أمل)

هِيام الضاهر

-حط حالك بوسط فيه ناس مجتهدة و شاطرة..

بناءاً ع تجربتي هالموضوع صعب أبداً مو سهل..

رح تتعب بالبحث ، رح تتعب لبينما تتأقلم ، غالباً تضطر تعترف إنّك ضعيف ومبتدئ و غالباً ممكن تعترف إنك كسول و ما قدرت تلتزم لظروف حوّلتك للي أنت واقع فيه حالياً..

المُجديّن ما بحبوا أغلب الأشياء الي أنت بتضيّع وقت عليها و بيسكروا بابها بسهولة لو كانوا مكانك..

رح تلاقي عندهم صبر
ف عدوى الصبر رح تنتقل لعندك تلقائياً لمّا تندمج معهم ..

(إنك تحط نفسك بوسط ناس مجتهدة)

تقريباً هاد أحد الطرق المضمونة لبداية النجاح بعد توفيق ربنا🤍🦋.

هِيام الضاهر

‏ازيك ؟

‏خليّك دائماً فخور بنفسك و بمشوارك مهما كانت خطواتك صغيرة ، خليك فخور بقدراتك ع إنّك تقع و تقوم و تكمّل ، خليّك فخور إنك لسا بتحاول و بتقاوم رغم كل الصعوبات إلي بتمر عليك🤍🦋.

-كل ما بتكبر :

بتتعلم تجادل أقل، بتشتري راحة بالك، بتقرأ الناس أسرع، بتستوعب أنو في وقت راح هدر بأشياء كانت أقل قيمة مقارنةً مع قيمة الوقت المهدور عليها ، بتستوعب أكتر أنو كنز الدنيا الحقيقي بكون لمّا دماغك صافي و رايق بعيداً عن القلق و زحمات الحياة ، لمّا تكون راضي عن حياتك و عن الدائرة الصغيرة الي فيها الأشخاص القربين منك ، و أهم بند بتكون متطمن أنو علاقتك بربنا مهما صار ما عاد رح تنقطع..

ف ربنا يأكرمنا دائماً بتقدير قيمة نفسنا صح و نعطيها ما تستحق🤍🦋.

هِيام الضاهر

-الإنسان دائماً مهما بلغ من العمر
محتاج "sweet talkers" ضمن حياته ، مهما كان واثق بنفسه في جانب نفسي جواه بيزدهر لمّا حدا يحكيله:
"براڤوو أنت تصرّفت صح"

مثلاً شكلك أنيق اليوم و هندامك رائع، في تغيّر عظيم عندك هالسنة ، أنجازك ممتاز بهاد الجانب ، أنت بتعمل إلي عليك و هاد الصح..

مهما تغيّرت شخصياتنا و كسبنا خبرات و تخطينا مراحل بحياتنا
كفطرة بنحتاج "support" كرمال نعرف نكمل صح..
بنحتاج ناس تقدر إنجازاتنا الصغيرة و تشوفها أشي عظيم..

اللطف في التعامل سلوك مطلوب بكل زمن و بكل وقت ..

"الإنسان مهما كبر بيبقى محتاج حدا يثني عَ جهده و يحكيله
براڤو عليك إنت بطل"🤍🦋.

هِيام الضاهر

-‏و أرِحني مِن شَتات عقلي و ارزقني بِما فيه صلاحُ أمري🤍🦋.

-‏ما بصبرنا عَ مطبات الحياة غير أنو لسّا عنّا القدرة ع الحلم ..
لو بطلنا نحلم ممكن نموت أحياء..

في ناس بتبدأ تحقق أحلامها بعد سن الشباب، وفي شباب بكون باقيلها خطوات قليلة لتوصل بس بتوقف حياتها و بتنتهي باللحظة الي بيرفعوا فيها الراية البيضا ع مبدأ بلاها الأحلام..

مافي لأي حلم بالدنيا ميثاق و موعد محدد ليتحقق..
كلشي وارد يتحقق حتى المستحيل بحكم ما حدا منّا بيملك علم الغيب ..

فَ عَ قد ما بتتمسك بحلمك على قد ما هو بيتمسك فيك🤍🦋.

جمعة مُباركة

هيام الضاهر.