INNOVATSION KUTUBXONA OCHILDI

Bugun AloqaBankda O‘zbek tili bayrami munosabati bilan tadbir bo‘lib o‘tdi.
Bankka xodimlarni ishga qabul qilishda o‘zbek tilini yaxshi bilishi kerakligi, bankning muhr, tamg‘a, ish qog‘ozlarining matnlari to‘liq davlat tilida yuritilayotgani, lavhalar, eʼlonlar, maʼlumotlar peshtaxtasi va boshqa ko‘rgazmali hamda axborot matnlari davlat tilida rasmiylashtirilayotgani hamda zarur hollarda boshqa tillarga tarjima qilinayotgani aytildi.
“O‘zbek tilini nima uchun yaxshi ko‘rasiz?” degan savolga bank bosh menejeri Yuriy Yekshibarovning o‘zbek tilidagi intervyusi namoyish qilindi.
Tahrir va tarjima ishlarida yordamchi, bank moliyalashtirayotgan “Tilmoch” startapi taqdim qilindi. Bugun ushbu platforamadan minglab ziyolilar, davlat tili mutaxassislari foydalanayotgani aytildi.
Bayram munosabati bilan bank bosh ofisida innovatsion kutubxona ham ochildi. U yerda 1500 nomdagi 4500 dona kitob yig‘ilibdi. Ularning 50 foiz o‘zbek, 35 foiz rus va 15 foiz ingliz tilida ekan. Bank, moliya, boshqaruv, badiiy adabiyot, marketing va startap sohalaridagi eng so‘nggi kitoblar London, Dubay, Bangkok va Moskvadan ham olib kelinibdi. Endi bank xodimlari, kitobxonlar audio va elektron kitoblarni shinam va qulay joyda o‘qiy oladi.
Tadbir so‘nggida mehmonlarga AloqaBank binosida joylashgan kutubxonaga aʼzolik kartasi sovg‘a qilindi. Endi ular ish kunlari 9:00dan 21:00gacha AloqaBank kutubxonasiga borib kitob o‘qishi mumkin.

Fozil Farhod