للسيدة فاطمة العليلة عليها السلام #محرم١٤٤٧ ..

غَفله وعَلَي شَح الهَوه .. وحَسّيت عيني بلا ضوه
والگيت روحي بنُص بيت
مهجور من اهل البيت
-------------------
مدري بحِلِم مدري بعلِم هسّه آنه وحدي
لا ابو لا ام لا اخو لا اخت عندي
بداري اصفنت صفنة غرُب وايدي اعله خدي
وتجيبني حسره صفت وحسره توّدي

شِلّي بضوه عيوني بَعَد .. وضعن اليكحلوهن بَعَد
ياشوفي المن ضلّيت
مهجور من اهل البيت
-------------------
من الفاگدتهم يا عَجب محّد فگدني
راحو وللفرگه صَدَه ظل يِدوي بذني
حَسّيت بيتي بلا سگف والخوف اخذني
يابويه صحت ولا أبو والليل هَدني

مات الأمان بمنزلي .. وحتى الجدار يصيح الي
عالفارگوني انهدّيت
مهجور من اهل البيت
-------------------
صرت بألف يا بالحسن اشهگ بالانفاس
مخنوگه محروگة گلب مكسورة احساس
الحنيّه ضاعت والدفو ضيعني عباس
غفله ومشه المالَه عَوَض واشباه بالناس

ظَل بيتي چَن بلايه ظِل .. ادخيلك صحت يا بالفضل
اعله اسمك بداري اتوچيت
مهجور من اهل البيت
-------------------
تكبر الوحشه يا هلي والشوف يگصر
ياهو اللي گلكم فاطمه اعله الفرگه تگدر
الهوه خانگني انتهُض يا عِطر الأكبر
لا بيهه تغفه عيوني ولا بيهه تسهر
رد يابو (خويه تدللي) .. و (أمريني اخوچ آنه علي)
نار بدليلي شبيت
مهجور من اهل البيت
-------------------
اندب باساميهم ولا سمعو ندبتي
صَح هُمّ غُربه بس أنه الأكبر غربتي
يابويه يا يُمّه تره سهله طلبتي
بلسانكم اسمع ردت چلمة يبنتي

ناديت بدموعي التهِل .. من اكبركم لازغر طفِل
بلساني عبره وناديت
مهجور من اهل البيت
-------------------

مدّيت چفي الزم گلت چف المشو كُون
غمّضت عيني وچنت اضن افتحهه يلفون
رد چفّي خالي وأيّست اعمَن يالعيون
ميته ان رجعتو يا هلي وان ما ترجعون

وعن موتي لو ردتو السبب .. مو مَرض مِن شوگ وعتَب
كتبُو اعله گبري هـ المَيت
مهجور من اهل البيت
-------------------


ياسر حسن
ذي القعدة ¹⁴⁴⁶

رسالة من كربلاء إلى أم الوفاء عليها السلام...


الحُسين بدَم وَريده
رساله كِتبت ايده
لِلمرَبيَه عضيده
جزاچ الله ألِف خير
,,,...,,,...,,,...,,,...,,,...,,,
من كربلاء البِيهه نِزفن سِوه
و شَعّن دِمائه ودَم بنينچ ضوه
كاتب إلچ مرسال والمُحتوه
مشكوره يالربّيتي راعي اللوه
وغذّيتي وفه ،، ضَي عينه انطفه
لاجلِي وما جِفه ،، وسَجّل موقفه

واعرفچ يالوِفيتي
اعلَه شبلچ ما بچيتي
وعلي ونتچ شِديده
جزاچ الله الف خير
,,,...,,,...,,,...,,,...,,,...,,,
يمضيعه اربَع وِلِد بس يا وِلِد
كل واحد بسبعين الِف لو نِعِد
افگديتهم وما همّچ ابداً"ن" فَگِد
همّچ الاكبر أبو الاكبر يرد
انذرتي لو يعود ،، وعبراتچ تِهُود
درب الطف وُعود ،، تملينه ورود

وَفيّه شگد وَفيّه
بدِمَه اولادچ سخيّه
لاجل نصر العقيده
جزاچ الله الف خير
,,,...,,,...,,,...,,,...,,,...,,,
كاتِبلچ بمرساله بعد الشِكُر
(عبّاس) سيفي وبكسرته انكسُر
وچن ظلي (جعفر) ما جِزاني شبُر
و(عثمان) وي (عبد الله) للطف عطر
ما خافو ابَد ،، وگفولي سند
انخلقو للشِدَد ،، وفّاية عهد

هديتيني أربع اِجبال
ولا تشبههم ارجال
خذو طبع الصُميده
جزاچ الله الف خير
,,,...,,,...,,,...,,,...,,,...,,,
وكاتِب خَجَل ما ريد يالطاهره
وازعَل اذا گلتي أنَه مقصره
يايمّه بس عباس كافي تَرَه
حامل لواي وجيشي هو آمُره
بس مِن انغدَر ،، يَم جِرف النهر
هنا ظهري انكسر ،، وصرت بلا ظهر

وگع ويّاه عَلَمنه
ودِنَه الجيش الخِيَمنه
صِحِت من طاحت ايده
جزاچ الله الف خير
,,,...,,,...,,,...,,,...,,,...,,,
ابلا قلَم بَل لا خُنصر ولا نحَر
واتذكّر بهالحال ام الگمَر
لا مو روايه ولا حديث انذكر
لاچن احساسي يگول هذا الصدَر
ترَه دم الشهيد ، من يرسِل بريد
ايكتبه ابلايه ايد ،، و ورقه ما يريد

كتبها اعله الثريه
رساله فاطميه
الى المرأه الفريده
جزاچ الله الف خير
,,,...,,,...,,,...,,,...,,,...,,,
باچر يرد ضعن الحزِن للوطن
و(الناعي) مو (عباس) يبره الضعن
اينادي يهَل يثرِب بعبرَه وشجَن
حسين انذبح ومخدراته انسبَن
يخبرِچ بالبنين ،، بحسرات وأنين
وانتي تعاودين ،، عنّي تناشدين

الچ ابعث سلامي
أسلّم وآنه دامي
من الديار البعيده
جزاچ الله ألِف خير
,,,...,,,...,,,...,,,...,,,...,,,


ياسر حسن
ذو الحجة¹⁴⁴⁶

سفير الفداء مسلم بن عقيل عليه السلام...


قَبِل لا يبتدي العاشر .. اجيتك
وقَبِل لا تطلُب الناصر .. فِديتك
يبَعد جروحي .. يحسين يقِبلة روحي .. يحسين
فِديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
ما ناطرت عاشِر يهِل حتى اثبت الحُب اوياك
وقَبْل الجِدَم گلبي سَعه لميدان عشگك يِفداك
آنه سفيرك ناصرك خادمك عاشگ طَرواك
ما رِدِت بالكوفه سَكَن جَيت ارد اموتن بِهواك

نِزَحت من الوطن حبّاً .. وطاعه
بگلُب اشواگك انحسبَن .. مَتاعه
يسِّر انزوحي .. يحسين يقِبلة روحي .. يحسين
فديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
طبّيت للكوفه وشفِت للغدر مشحونه اجواء
وما بين جدران الألم اسمع أنين الزهراء
وبكل مناره انظُر علي بدّم والعِصابه الصفراء
واعرفت باچر تنسبي بهاي الازقّه الحوراء

بملامحهم ادور عَن .. موالي
شفت غَدر وحقِد تِبعن .. خيالي
تطول اشروحي .. يحسين يقبلة روحي .. يحسين
فديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
من حاوطوني ما خفِت لا دوّرت عن مهرب
قاتلت بَيضت الوجه جيش بشَمُرتي اتعجّب
واهمِس بهاي حچايتي فدوه الك كون اتخضّب
وهَينه يجرّوني بحبل بس صعبه تنجر زينب

فدائي گاصد للكوفه .. ولا هاب
لچِن دلالي كل خَوفه .. اعله الحجاب
عليهن نوحي .. يحسين يقبلة روحي .. يحسين
فديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
لَمّن رموني من القصر واتكسّرت مِنّي ضلوع
لا شكوى بانت لا ضعف رغم انه كلّش موجوع
تناسيت كسري وسَلّمت صوبك سلام المفجوع
تراوالي من سطح القصر عالرمح راسك مرفوع

اجيت لحَرگة خيامك .. فِده ادماي
وفِديت لغربة ايتامك .. يتاماي
يمَهدي ولَوحي .. يحسين يقبلة روحي .. يحسين
فديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
غِدروني بالكوفه نعم واعليك ما يخفي الحال
وبيناتنه چان الفرق ما بالرمح راسي انشال
ولا خيل صدري الرضتّه گبال الحرم والاطفال
وترچيه ما سلبو ولا گطّع چفوفي الجمال

ولا عِفت الخيم تلهَب .. عالايتام
ولا شِفت العدو ينهَب .. بالخيام
هِدَمت صروحي .. يحسين يقبلة روحي .. يحسين
فديتك
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″


ياسر حسن
ذو الحجة ¹⁴⁴⁶

يا گلبي خل نروح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
حَن گلبي وتعذّب .. وصَب دمع العشگ صَب
وصاح اخذوني مشتاگ ،، يم اتراب زينب
اشتمه عطره وارتاح ،، همّي وغمي ينزاح
هناك بدمعة العين ،، تبرد كل الجراح
تدري بلهفتي وشوگي العقيله ،، المشتاگه الملهوفه لحسين
لأن ماتت من الفرگه الطويله ،، المشتاگه الملهوفه لحسين
تشعر بي ،، التِشِب جمرة هيامه
من يسلّم ،، ترِد اعلي سلامه
وترزقه ،، الزياره والخدامه

بـ سِر العشگ نبوح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
ارد اشهگ هوه ام عَون واهجر ناسي والكَون
واگلهه ليش بالشام اندفنتي شلون وشلون
شلون اغمضتي العين وسبّلتيهه الايدين
بغربه وگبرچ ابعيد عن عباس وحسين
شلون بحسرة الرايه بقيتي ،، وعيونچ مشبوحه لعباس
وآخر لحظه يا چلمه حچيتي ،، وعيونچ مشبوحه لعباس
بلا توديع ،، ولا دمعه ووصيه
لا خوّان ،، جِفوچ اهل الحميه
وجارچ صار ،، يزيد وآل اميه

بموكب هضم نِنوح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
يالمتغيره الرسوم خايف لا يجي يوم
شكل گبرچ يغيروه واضَيعه وابچي مهضوم
وهم مثل ام البنين الاگي الحضره بالعين
وما اعرفهه وانهار واصرخ بت علي وين
كل خوفي الشمر يحرس مقامچ ،، صعبه شگد يا زينب صعبه
و يذَكرچ بالسبي وحرگة خيامچ ،، صعبه شگد يا زينب صعبه
وتلومين ،، الذي كلهم حميه
من تشوفين ،، بخطر مرقد رقيه
وتلوذن ،، سبيه بسد سبيه

ضيم اليسِر يلوح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
ضعت والفرگه تلچِم ضعِت والغربه تهدِم
ضِعِت والحال چن حال ضياع اولاد مسلِم
البقو عنّچ يدورون امان الهم يريدون
وتالي بجنب الـ افرات انذبحو ماي العيون
وانه ذبحتني الدروب البعيده ،، كل فكري وكل همي يمچ
وحگ مسلم وولده وحگ حميده ،، كل فكري كل همي يمچ
بنص بيتي ،، وغريب آنه بشعوري
بنص صحنچ ،، أنه مسجل حضوري
يا كلهن ،، معاناتي وسروري

روحي اطلبت نزوح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″
بوحشه ما يخلّيچ ابو صالح يحاميچ
هو وعمّه عباس ليليه يمر بيچ
الگالو ما تضلين ومن گبرچ ترحلين
المهدي باچر يعود يجي وردود تزهين
الحاول يهدم الحضره يويله ،، غايبنه يصفيله حسابه
مثل لمح البصر واسرع يجيله ،، غايبنه يصفيله حسابه
ما تبقه ،، حبيبتنه غريبه
بالمهدي ،، ترف رايتهه هيبه
وما تنعاد ،، كفيلي منين اجيبه

ما تطفه بينه روح .. يم زينب
وانسكّن الجروح .. يم زينب
′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″ ′″

ياسر حسن
جمادى الآخره ¹⁴⁴⁶

شظَل بيهه الطفوف .. كُون بلاچفوف
عباس الگمر
احتاريت امشي وين .. من شِفت الحسين
مكسور الظَهَر
واضَيعتناه .. واعَبّاساه
--- — --- — --- — --- —
حسين لخِيَمنه رجع حسره وظَهر مايِل
واعرَفت من مَشيِته ما ظَل الي كافل
ومن نظرته اقره حچي وبدمعه چَن گايل
شتِسوه بعد كربله وما بيهه ابو فاضل
اي گتله ما تسوه ،، خويه
اي ماتت الخوّه ،، خويه
اي حَگك اتلوّه ،، خويه

حَگك من تطيح .. وحَگك من تصيح
قَلّت حِيلتي
وحَگي آنه من احِير .. ومدري المَن ادِير
وجهي بحيرتي
أَي واويلاه .. واعَبّاساه
--- — --- — --- — --- —
كُون الچفوف انرِمَت فَوگ المسنّايه
بيمن بعد تنلزِم وترفرف الرايه
وبيمن نرد التهِد عالخِيَم عنايه
وبيمن ألِمّن ضعن مذبوح حدّايه
يا واهس اعيوني ،، ادخيلك
يا نبضي يا لوني ،، ادخيلك
وين امشي بضعوني ،، ادخيلك

احتاريت اعتنيك .. وبيدي اجمع اديك
واشكيلك واوِن
لو يم الحسين .. ابقه اِرشدني وين
امشي الياحزن
أنَه فِكري تاه .. واعَبّاساه
--- — --- — --- — --- —
شگد صعبه يا بالفضل هالجرح شِيجبره
من تشوف اخوهه الاخت يمشي ويكض ظَهره
وگُوّه يشيل الجِدَم عثره بأثر عثره
وشيوجعك نادته گلهه الاخو وكسره
شسوّيت بحسينك ،، وينك
ما يحچي بس وينك ،، وينك
بعينه ألم عينك ،، وينك

بماي عيونه جُود .. ورايه بصف عمود
وسيف ومشرعه
وبوجهه جراح .. عن كل غالي طاح
ينحَب واسمعه
ويصرخ ويلاه .. واعَبّاساه
--- — --- — --- — --- —
الاطفال صاحت نَدَم رِد النه يا عمنه
بالماي چنّه نِهِم والآن كل هَمنه
بس تِرد سالم بعد كل عطش ما يمنه
من كون متنه ضِمه ولا بيك حشمنه
يل شِلِت مو جِربه ،، بيدك
بَل كل طفل گلبه ،، بيدك
والوطن والغربه ،، بيدك

غيرك يا عميد .. كل شي ما نريد
بس بيك الأمل
خلافك يا غيور .. بالهَيمه ندور
مضيعين الكِفَنل
ضيعّنه اجفاه .. واعَبّاساه
--- — --- — --- — --- —
اعرفت الامان انعدم والظهر ما مسنود
الخيمة عضيده اعتنه حسين وحِنه العامود
واغبار منهه طلع چن روح راعي الجود
طلعت وشامت هِتَف بخيامنه فرهود
هسه انعبر حدنه ،، ويلي
من طحت يا سَدنه ،، ويلي
وللوطن شيردنه ،، ويلي

شظل بينه بجفاك .. يا عازة حِماك
من اهل الرِده
حسين بلا مُعين .. بين الظالمين
ظل الوحّده
مطيحين الواه .. واعَبّاساه
--- — --- — --- — --- —


ياسر حسن
محرم الحرام ¹⁴⁴⁷

يا وجيهاً .. اتيهَن .. واحِير ابدونك
مالي غيرَك .. اعلَه خَيرك .. عِشِت مَمنونك
★★٭٭٭٭★★٭٭٭٭★★٭٭٭٭★★
الدنيا لو ضاگت عليّه والفَرَج سَد بابه
ما ادوّر غير وَجهك لا أَحَسْب احسابه
تسكن اوجاعي بحضرتك والهضُم واتعابه
وحتى لو مصيوب يمّك گلبي ينسه صوابه
يا مَلاذ الجِراحي ،، بسمك الگه ارتياحي
يكفي اگوله الهم يزوله ويمحي كل ضيج وعسر
الطرق كلهه عندي ،، الكربله بس توّدّي
وما عداهه يظل متاهه ولا نفع بي بل يضر

ياشفيعاً .. اضيعَن .. بدون عيونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
آنه شمقدملك آنه بَلّه شمضحيلك
غير ثوب اسود ودمعه وكل سنه أمشيلك
وانتّ المغطيني خيرك بيش اعد وابديلك
يا مْبَدّل سيّئاتي بحَسَنات ادخيلك
ذنوبي والله تِعثّر ،، و جُودك اعليّه يستر
وعن سوادي اللِي بفؤادي بعطفك تغض النظر
دمّي بيك ايتوّضّه ،، وگلبي الاسود تبيضه
روحي تطهر يا بو الاكبر تمحي ذنبي شما كُبَر

والله اعشگك .. واشهگك .. هَوَه لمَجنونك
مالِي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
من زَحام آلامي اغادر من ضجيج العالم
و اجفي كل شي ما يشبهك يا أعَز ابنادم
اتعب من الناس وامشي ارتاح وسْط الماتم
بغير اجواءك يروحي روحي ما تتوالم
من دُخان اليطبخون ،، لو غُبار اللِّي يمشون
ماكو اقرب لَيّه واطيَّب واغله من هذا العطر
يا جنون المشاعر ،، بچلمة اهلاً يزاير
من استمعهه يهل دمعهه عيني فرحانه شكثر

ما أخُونه .. أصُونه .. ملح ماعونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
من صِباي لحَد منيتي انت كل همومي
يا هَويتي ويا قضيتي يا صَلاتي وصَومي
اوياك اخلّص يومي وارجع ابدي بِسمك يومي
اوياك آني بخير عمري اوياك زينه علومي
في منامي ويقضتي ،، في سكوني ونبضتي
بالجوانِح بالجوارِح انتّ حاضر ما تغيب
اويه الدِمه تجري بيّه ،، والله يابو رُقيّه
انت صِيتي وانت بيتي وانه من دونك غريب

انتّ داري .. يداري .. بصدگ مفتونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
وداعتك ما يگضي يومي الإ وانت ابّالي
وما انامن ليلي اذا مو صورتك تبرالي
آني اذا مو انت عندي بدنيتي شيبقالي
(بأبِي أنتّ وأُمّي) وصحبتي وعيالي
بشِفْتي يسجد حنيني ،، وتغرگ بدمعي عيني
من اذكر اسمك وابقه اكلمك يا حبيبي يا حسين
هيّ هايه احلَه جمله ،، يا حبيبي والاحله
(نورَ عَيني) بكل يقيني ذني اصدق كلمتين

يا نهر حُب .. ضوه يصُب .. اعله اليحبونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
شماله ميجِن بيك عگلي وبِيك الِيجِن يكمَل
فطرة الوادم تحبّه السيفه بالعِز ينسَل
يالطِحِت منحور خاطر رايتك ما تنذل
وعالرمح مرفوع راسك آية الله رتّل
مفطّره برمحه شِفته ،، ورتلَت ﴿أم حَسِبْتَ﴾
ماهي عِجبه ولا هي صَعبه قصّة اصحاب الكهف
قصة الطف الاعجب ،، بيهه مسبيه زينب
تروح اميره تعود اسيره وهيّ بِت والي النجف

شما بِچيتك .. ونِعيتك .. اظل مديونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★

ياسر حسن
ذو الحجة ¹⁴⁴⁷

رثاء #علي_الأكبر


كان الله في عونك .. حبيبك علي راح
المصاحب عيونك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
يابحر ضيم وكَمَد ،، ها ياصبر ماله حد ،، بس الهجر أذاك
الفجر ذاك انطفه ،، وجرحه بدليلك غفه ،، راح وتون خلاك
ضميت دمعك عسن ،، ميشوفه الاكبر لَچن ،، اتفجر حزن عيناك
من شفته صاير وذر ،، ماي العيون انهمر ،، ومددت طوله اوياك

وونيت يم طوله .. وعِله الون والنياح
چن نوح مثكوله .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
صدره سهام انمله ،، وضميته واتقبّله ،، چنّك ردِت تحميه
وحطّيت خد اعله خد ،، واصرخت آه يالولد ،، وچم آه صحت اعليه
عالدنيا صحت العفه ،، يالتشبه المصطفه ،، كون الله لا ينطيه
الگطع رحمي وگطع ،، عمري وسلوتي وفجع ،، زهرة محمد بيه

واتصوب الهادي .. على اللي يشبهه ناح
يواسيني وينادي .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
عن وجهه تمسح دمه ،، وايد ارفعت للسمه ،، وتحچي اويه ربك صار
گتله بوتر گلبي حز ،، اشهد يرب قد برز ،، شبه النبي المختار
جده النبي ورحمته ،، لا ما رعو حرمته ،، العسكر على ابني دار
بسيف ونبل وبرمح ،، ينبت جرح في جرح ،، بكل جسمه اشوف آثار

اي عظم الله اجرك .. كثر ما بي جراح
وزاد الله في صبرك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
يَمّه حِنيت الظهر ،، وبحسره درت النظر ،، لفتية بني هاشم
عينوني ها ياهلي ،، خـ نشيل جثة علي ،، ودمعك جمر ساجم
وگدام جثته سِرت ،، بدخلة خيمكم حِرت ،، ما رد علي سالم
ولن زينب اتلگتك ،، وليلى بنحب شبگتك ،، وضجت حرم فاطم

چن صيحة اقيامه .. المخيم ويلي صاح
وشيجبر آلامه .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••
بعين الله گلت الحصل ،، يهون العلينه نزل ،، يا ليلى يا زينب
يا سكنه يا فاطمه ،، مو هذا آخر دمه ،، هذا اول مخضب
ساعه واظل وحّدي ،، بذبحي الشمر يبتدي ،، والعيله تتسلب
جمعي النسه يالإخت ،، اي هسه من كل وكت ،، صار السبي اقرب

ودعته ودموعك .. بعد ما تستراح
يا لچمة ضلوعك .. حبيبك علي راح
آه واحسيناه .. آه وا علياه
•••=•••=•••=•••=•••=•••=•••


ياسر حسن
محرم الحرام ¹⁴⁴⁷

وداع بلا كلام #ليلة_الوداع


بنظرة فـراگ التقينـه
بـلا كــلام توادعـيـنــه
سكته ويسولف بچينه
ليلة اوداع
---- ---- ---- ----
اتلاگينه سكته ولا صوت بس الدمع يتلاله
شيحچي الذي بعينه يشوف دمعات عين اطفاله
وكل خيمه يتركهه يريد حرمه تكض بذياله
يا حال ابو عبد الله يكسر الخاطر حاله

دنيا ظلمه وسَيل مدمع
وبس ونين ونوح تسمع
حسين باچر روحه تطلع
ويبدي الضياع
---- ---- ---- ----
اتگابل حسين وعباس وكل العيون اعليهم
وكلمن يصدهم بالعين يبّچونه ويبّچيهم
ام الرضيع العطشان بشفايفه تراويهم
وسكنه العطش عمي تصيح واخواني ضاگت بيهم

وبينهم صارت رقيه
وناحو اعليهه سويه
ويلي يا آخر مسيه
شتحمل اوجاع
---- ---- ---- ----
هناك ام الاكبر بالنوح ضمت ولَدهه وضمهه
بنحره تشم وتجر آه وحب ايد امّه وشمهه
وصاحتله يا تعب ارباي امك تموت بهمهه
لو غطه جسمك التراب ومن شوفتك يحرمهه

وفتح ليه حسين باعه
وضم علي اوليده بذراعه
شگد صعب الاكبر وداعه
يحني الاضلاع
---- ---- ---- ----
من خيمة القاسم صار اسمع نحيب وونه
وچلمة شهيد او عريس ودم وزفاف وحنّه
وانه بحسرتي اتعنيت انظرته وبدر تَم چَنه
ورمله اتحَچِي نضيعه شلون وهذا جماله وحِسنه

حسين شافه ومسح راسه
اتذكر المجتبى وباسه
هذا امانة اغلى ناسه
هضمه لو ضاع
---- ---- ---- ----
انصار اخوي يهوسون يم خيمتي يسمعوني
برگابنه نفدي حسين نيّتهم يطمنوني
وآنه ارد وانظر لحسين والشوف رك بعيوني
باچر شلون من يطيح وبالسوط يتولوني

يعتلي راسه اعله رمحه
ويحدي بضعوني اليذبحه
الليل لاحل كون صبحه
تلمني يا گاع
---- ---- ---- ----
خذت الگلب يم عباس يمه اگعدت ملهوفه
وصديتله وعندي احساس وبي رجفه گلبي وخوفه
بچفوفه مكروه يصير وظليت احب بچفوفه
وحاچيته اديك من تطيح تلگاهه ادَي مچتوفه

عازتك گتله چبيره
وحيره يابو الغيره حيره
باچر يگودوهه اسيره
اخت الاسباع
---- ---- ---- ----


ياسر حسن
محرم ¹⁴⁴⁶

يعباس صار الليل حاميني
-- -- -- -- -- -- -- -- --
امسه المسه وخيامنه محروگه
وصدورنه من رمادهن مخنوگه
وايتامنه بخيل وزلم مسحوگه
يعباس وين نروح حاچيني
-- -- -- -- -- -- -- -- --
چا وين طولك وين يابو الشيمه
گعدن خواتك هالمسه بالهيمه
ولا رايه تستر لا غطه ولا خيمه
يعباس شمر يريد يحديني
-- -- -- -- -- -- -- -- --
كل ليل چان يمرني انه محروسه
بچفك الچان اشبه بعصة موسه
فرسان من اسمك گبل مخلوسه
يعباس خصمك جاي يسبيني
-- -- -- -- -- -- -- -- --
بهذا الظلام احتار وين انطي العين
وعباس ما ظل عندي لا ظل حسين
ولا يمنه ابونه المرتضى انجيبه منين
يعباس بالكرار دليني
-- -- -- -- -- -- -- -- --
لا خوف يسكن لا جفن يرضه ينام
لا طاب خاطر لا جرح خف والتام
ابنات الزچيه وبينه حاطت ظلام
يعباس عيب النوم يلفيني
-- -- -- -- -- -- -- -- --
صح العطش خويه بيتاماكم جاس
ما سألو اعله الماي لآخر انفاس
سألوني كلهم وين راح العباس
يعباس ليك اضماي رويني
-- -- -- -- -- -- -- -- --

ياسر حسن
محرم الحرام ¹⁴⁴7

مِن دِيره لدِيره يسلبونه .. وعباس مغمضات عيونه
شلون ايّام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
للسبي اطلعنه وعالهزل ودّعنه الاجساد
ردت انزل من الناگه لاچن علي السجاد
ناده عليه لا يعمه وعِلته تزداد
گَلّي ارحمي بحالي   لَوَن انزلتي    منو اللِي يرَكبچ
عَمّه ودعي الغالي  اعله ظهر الناگه  استعدّي لدربچ

بكيف الحادي امشينه ورايه .. ولا مَحمل ظَل ولا رايه
نِسَه وايتام .. بكوفه وشام .. وعبّاس مغمضات عيونه
„„„ „„„ „„„ „„„ „„„ „„„ „„„ „„„
طبينه للكوفه يويلي ويصعب الحال
نسوانهم تتصدق اعلينه يكفّال
وصحنه حرام الصدَقه متحِل على الآل
واعله روس اخواني  درتهه عيوني  وصحت ترضوهه
بت علي وهاي آني   اسيره بديره    هلي حِكموهه

وهِند الچانت تخدم عدنه .. تتسيد واحنه تفرهدنه
شگد آلام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
بثوب السبي ادخلنه عله ابن زياد اَسره
ومن سأل عني جاوبه السجاد حسره
وآمرهم الطاغي علي يگطعون نحره
بجمرتي حاچيته  شعِفت يا ظالم   گضو ولياني
انچان ذبحه انويته  سِوه تذبحنه   ابن اخوي وآني

وكمت استر وجهي بچفيني .. بديوان اجناب موگفيني
بنُص ظِلّام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
مِن الهِزِل طاحت سكينه بليله ظلمه
وابعَد ضعنّه وعالركض ما بيهه هِمّه
وطَر الارض رمح الحمَل راس ابو اليمه
الراس خاف اعليهه   وثبت بالغبره   الى ان صعدت
ثاري چف حاديهه  دفعها وطاحت  وبچت وانضهدت

تبچي وبِسياط يسكتوهه .. ومن تنخه حسين يشتموهه
دهري شضام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„
برايات حمره وروس اخوتي ادخلنه للشام
اعيال الرسول بنُص خرابه اعيونهه اتنام
وبقصور وعروش اللي چانت گبل خدام
ومن حلمهه ارقيّه  اكعدت مذعوره  ابوهه تريده
جاهه بس يا جيّه  بطشت بس راسه   وتحب بوريده

والشافت منحر واليهه .. من حگهه الموت يحل بيهه
ما تنلام .. بكوفه وشام .. وعباس مغمضات عيونه
„„„ „„„ „„„ „„„ „„„ „„„ „„„ „„„



ياسر حسن
محرم ¹⁴⁴⁶