#محرم١٤٤٥

تِعبَت العين عن حسين ولا عُرفَت سطَر
والسِمعناه وقريناه مِثِل قطره ابّحر
تبقه اكبر .. يابو الاكبر
كلك اسرار ولا صار مثيلك بالبشر
←→←→←→←→←→←→
‏آنه الّلي اعرُفه ،، إنتّ ابن المصطفه
‏ودين الله اختفه ،، لو ما تضحياتك
‏يمضحّي بمنحرك ،، وعبّاسك واكبرك
‏وجسّام واصغرك ،، وسَبْي مدللاتك

شَعرُف اكثر .. يا بو الاكبر
امحير الافكار ولا صار مثيلك بالبشر
←→←→←→←→←→←→
أَنَه سامع بالعرش ،، نور اسمك منّقِش
بس باقي ابلا نَعِش ،، يالجثتك سليبه
واَنه سامع ما يلي ،، ساقي الكوثر علي
وضامي انت ويغتلي ،، چبدك من لهيبه

بـ ضِمه وبـ حَر .. يابو الاكبر
وتزهو انوار ولا صار مثيلك بالبشر
←→←→←→←→←→←→
أَنَه قاري هالخبر ،، عن (فطرس) من حِضَر
وجناحه اللي انجبَر ،، بمهدك من تِمَسَّح
احسبني فطرسك ،، داويني بمجلسك
خل دوم اتنفسك ،، وبميدانك اسرح

بحبّك اسهر .. يابو الاكبر
يلّي ما دار ولا صار مثيلك بالبشر
←→←→←→←→←→←→
عرّفني اكثر بعد ،، قرّبني يا سند
وفّقني بالمدد ،، وطهّر گلبي بيدك
بذنوبي ممتلي ،، هواي اظلم داخلي
نورك يا بو علي ،، تحضرني اريدك

بنورك اطهَر .. يابو الاكبر
بروحي الك دار ولا صار مثيلك بالبشر
←→←→←→←→←→←→
خليني من استمِع ،، لحروفك انفجع
وعيوني تصب دمع ،، وانهار اعله طاريك
وخل دمعي من يدُر ،، مو حتى آخذ اجُر
لاجلك كون انكسُر ،، وبلا غايه ابچيك

وجِفني يحمَر .. يابو الاكبر
لاجلك انهار ولا صار مثيلك بالبشر
←→←→←→←→←→←→


ياسر حسن ¹⁴⁴⁴
جمادى الآخرة

#محرم١٤٤٥

يا عمّي .. ياهو المِن اهلي امشيله
يا عمّي .. يرَجّعنـي شمـا ابچيـلــه
يا عمّي .. ما ظَل غيرك احچـيـلـه
يـــا بـــو فـــاضـــل .. يـــا بـــو فـــاضـــل
========================
شفت ابويه لَم خواتي وخَبراهن وِحده وِحده
بخاطري المكسور اعاين گِلِت خافَن حَسبه عنده
وگِلِت ما اكسرله خاطر عالسفر لا ما انِشده
دنّگِت للگاع واحچي بدمعة العين
هذا ابويه حسين لولا ماهُو الحسين
ياخِذ اهلي وآنه مدري وين ما وين

ما ادري .. عافوني بهمّي وعلتي
ما ادري .. بوحشة داري المَن ظلتي
ما ادري .. اتوسَلْت بكِل العيله
يـــا بـــو فـــاضـــل .. يـــا بـــو فـــاضـــل
========================
عمتي زينب حلّفتهه بداعتك بس ما خذتني
صَب دمعهه وعلى راسي مِسحت وحَيل الّمتني
رِجعي صاحت يالعليله وعالسبي شگد حدثتني
تگلي وحشة دارچ وحزنه وعذابه
اهون من الحادي وجروحه ومصابه
واهون من الشام ديوان وخرابه

يالكافل .. گِلْت الهه امشي ويسبوني
يالكافل .. بكل شي اقبَل بس اخذوني
يالكافل .. ولا ابقه اوحيده اِعليله
يـــا بـــو فـــاضـــل .. يـــا بـــو فـــاضـــل
========================
علي الاكبر عاتبيته گِتله مَنته حزام ظهري
شفت ظَهري محني لاچن تضعَن وميهمّك امري
إيده بيدي وما تكلّم بعبرته بس گَلي صِبري
گال اخاف اعليچ كون اويانه تمشين
من التَعب والعلّه ياخويه تموتين
مناطره بالدار ابقي اويه ام البنين

واعدني .. وردّاني بچفه الغالي
واعدني .. يرجع من الطف تالي
واعدني .. ووصاني اصبر وادعيله
يـــا بـــو فـــاضـــل .. يـــا بـــو فـــاضـــل
========================
لاختي سكنه ولرقيه عاينت وبلا محاچي
وهنّه سكته اعليه صدن سكته بس تحچي البواچي
لَن رقيه اشرتلي عالإذان وعالتراچي
ما عرَفت آنه قصدهه وفكري حاير
وجاوبتني اسكينه والدلال شاجر
تنسلب گالت اختنه بيوم عاشر

واويلي .. امشي اوياهن اتأمل
واويلي .. الوالد گالن ما يقبل
واويلي .. يا هو الغيرك اشكيله
يـــا بـــو فـــاضـــل .. يـــا بـــو فـــاضـــل
========================
انت قائد هالضعينه وجيت اريد امشي اويه ضعنك
ما اكَلفك هي چلمه گِلي ركبي بإذِن منك
لا يا عمي لا تردني تختلف چِنت آنه اضنّك
كل حچي العندي حچيته واتعبت حيل
اخذوني گلت اوياكم امشي اسرج الخيل
وگلت احط فراشكم لو چلچل الليل

يا وسفه .. حامي الخدّر خيبني
يا وسفه .. وچان بضني يركبني
يا وسفه .. ضعت وماتت كل حيله
يـــا بـــو فـــاضـــل .. يـــا بـــو فـــاضـــل
========================
فارگوهه عذبوهه والتحبهم چن نسوهه
يا ضعنهم بس غباره رد عليهه بعطر ابوهه
تشيل اديهه تلوّح الهم انطوهه الظهور وجفوهه
العله زادت والهجر ذبّل عمرهه
شتصبر وچم ليل يحملهه صبرهه
شتنتظر واصورهم تعيش بنظرهه

ما تحمل .. غربه واشواگ وفرگه
ما تحمل .. وچم دوب تظل مختنگه
ما تحمل .. تذبَل صارت كل ليله
يـــا بـــو فـــاضـــل .. يـــا بـــو فـــاضـــل
========================

ياسر حسن
ذو الحجة ¹⁴⁴⁴

عيون ام الگُمر .. تَعَبهه السَهر .. واشواگ وصُور
الغَوالي .. الغَوالي
—–— —–— —–— —–— —–— —–—
الليل كلّه مساهره ،، ومو دمع هذا الجَره ،، وبَل وجِنهه
روحهه صارت شمِع ،، وذابَت بشكل الدمع ،، من جِفنهه
حيلهه باد بسهرهه والظهَر منهه انحنَه
ليلهه فَرهَد عمُرهه ومدري كُبرَت چم سَنه
عاشِرَت هَمهه وقهرهه تنام تصحه مدوهنه

الدرب الطف تصِد .. وبي تنثر ورِد .. لجيّتهم تعِد.
ليالي .. ليالي
—–— —–— —–— —–— —–— —–—
بدارهم تنشد بقَت ،، ها يدار اهل البخت ،، هَم يرّدون
وانتّ تستانِس وانه ،، وترِد عيشتنه بهَنَه ،، نگر العيون
الضعن لو رد مثل الاول تزهي بيهم دنيتي
وكون ميردون نذبل بوحشتِك وي حسرتي
هالزلم لو كلهه ترحل ربي عَجّل موتتي

لا شك لا وَجَل .. يرحمني الاجَل .. ولا دُور الأهل
خَوالي .. خَوالي
—–— —–— —–— —–— —–— —–—
الصبر فعلاً جميل ،، لكل قدَر مِن الجليل ،، وبالشِدد عَون
بس يعالَم الاشتياق ،، الصبر عندَه لا يُطاق ،، تصبر شلون
تصبر شلون وگلبهه يعلم شحَل بالطفوف
تعاين الحومه وحربهه تعاين سهام وسيوف
وعالرمح مشيول حُبهه وعالجثث زينب تطوف

تناديـ يا نبض .. مطشر عالارض .. والحافر يرض .. بدَلالي .. بدَلالي
—–— —–— —–— —–— —–— —–—
الفرگه ما خلّت حچي ،، لسانهه صار البچي ،، تسولف دموع
غير بس چلمة حُسين ،، وياهه ترجع يمته وين ،، ماكو موضوع
اربعه اولاد الجفوهه بموت ما چانت تهِم
چان همهه يخيبوهه وما يوافوهه الزلم
وحِين وصّت، جاوبوهه بِشري، صاحت والنعِم

ام متبرعه .. بدم ولد اربعه .. إرضه تسمعه
بحلالي .. بحلالي
—–— —–— —–— —–— —–— —–—
من بعد طول انتظار ،، رَد ضعن كلٌه انكسار ،، ذابل اللون
بس يتامه بلا كفيل ،، ونِسوه مثكوله وعليل ،، وحيرة ام عون
اتگابلن والدمع سايل نِبَع من كل عَين عَين
زينب تنوح ابو فاضل آ يمگطوع الادينِ
وام گمر هاشم تسائل وين يا زينب حسين

صح راسه انگطع .. وبرماح انرفع .. و وي ضعنچ رجع
سؤالي .. سؤالي
—–— —–— —–— —–— —–— —–—
‏عله راسه ناشدت ،، زينب وزينب بچت ،، لطاري الراس
‏تگلهه يوم الاربعين ،، راسه رد يم البنين ،، وراس عباس
‏لحودهم بيدي احفرتهه وضاگ هالكون الوسيع
اسبعطش نحر اجمعتهه وچان منظرهه فجيع
من ابو السجاد احسبتهه لحد عبد الله الرضيع

يا لبوة علي .. راحو كل هلي .. وشوفي بمنزلي
شبقالي .. شبقالي
—–— —–— —–— —–— —–— —–—


ياسر حسن
محرم ¹⁴⁴⁵

السيدة زينب و ابا الفضل عليهما السلام ...

ســــــــلامـــــــــــــــات
على چفوفـك والانفـاس
على عيونك على الراس
علـى طـــولك يعبـــاس
ســــــــلامـــــــــــــــات
–·––·––·––·––·––·––·–
چفوفك يعِزي وهيبتي ياما سگن چبدي و روَن
باچر يموتنه الضمه لو عالنهر يتگطعن
ويا چف يحامينه بعد اخلافك يحماي الضعن
اتذكرت لمن چان ابونه يگعدك
باحضانه وتقبل شفافه بزندك
وگلي بجناحين الله راح يزودك

حــــــــــرامــــــــــــــات
اعيش آنه اعله هالحال
بحياه ما بيهه كفال
وانه الما بان الي خيال
حــــــــــرامــــــــــــــات
–·––·––·––·––·––·––·–
عيونك البيهن اطمئن بشوفتهن انسه كل ألم
بيهن شفت جود ودرع ومحمل عليه يرف علم
ونفس الوكت بيهن شفت دم جامد ونابت سهم
بعطرك اروينه وعوف المسنايه
الجدمك فده يروح الفرات ومايه
گلبي يطيح ولا تطيح الرايه

العطــــــش مــــــــات
بعد ما نعطش الماي
الك بس اشعر ضماي
العذب دون الاخو داي
العطــــــش مــــــــات
–·––·––·––·––·––·––·–
عباس گل لام الخدر خل انتوادع يالاخت
ابريني الذمه اذا وياچ لحضه قصرت
يا زينب انتي اتكفلي بالخدر لو عنچ غبت
ثمانين طفله وطفل لتضيعيهم
ولو بسمي صاحو صِبري وصبريهم
ولو ماي صح ماتو عطش رويهم

اعــــتـــــــــذارات
عتبچن يغلي ناري
بله ايميني ويساري
اقبلن اعتذاري
اعــــتـــــــــذارات
–––·––·––·––·––·––·–
لو بالعمد راسي انخسف وعالگاع طحت من المهر
عينچ على حسين الذي ظهره بغيابي ينكسر
لا تعتنون المصرعي خايف گلبكم ينفطر
كل خوفي يا زينب أنه كل خوفي
تشوفين راسي وناظري وتشوفي
استقبلت گاعي بصدري مو بچفوفي

مــــــــــعـــــانــــــــــاة
طريق المشرعه ايكون
الشماته بي يهوسون
اعله مشيتكم يضحكون
مــــــــــعـــــانــــــــــاة
–·––·––·––·––·––·––·–
باچر يجيبون الهزل وبحسره اصد للعلگمي
واتخيلك تثني الركب وتگعد اباب مخيمي
وتگلي يا سيدتي ركبي اعله چف الهاشمي
عفت الخيال و واقع ارد احچيهه
يصعدونه اجانب غداً تعلم بيهه
ولو موت اگلهم ابد ما سويهه

عبـــــــــــــارات
ثگيله يسمعوني
بعد ويشتموني
الاسيره يلقبوني
عبـــــــــــــارات
–·––·––·––·––·––·––·–
مذبوح اخوهه اعله النهر والحادي مر عالمشرعه
عمدا يعذبهن نوه وما وگف لاجل اموادعه
من الهزيله سلّمن وگلوبهن متصدعه
اعتذرت اسكينه بدمعة الحيرانه
وگالتله لو ادري النهر ينهانه
چا ما گلتلك عمي أنه عطشانه


الزمــــــن فـــــــــات
ومشينه اويه الذبحكم
وتبعتونه برمحكم
وكبر بينه جرحكم
الزمــــــن فـــــــــات
–·––·––·––·––·––·––·–



ياسر حسن
محرم ¹⁴⁴⁵

#ليلة_الوحشة

ما تجي يا قالع الباب .. ياعلي
حسين ظل عاري بلا اثياب .. ياعلي
وانسبن ربّات الـ احجاب .. ياعلي
••••• ••••• ••••• ••••• ••••• •••••
آنه زينب يا بو زينب وانْدِبَك
حايره بهالليله ظلت زينبك
ليش ظل بِگْرابه غافي امذهبك
على حسين اشعجب ما رف شاربك
صاح هل من ناصر اوياي .. ياعلي
للحرم رايدله حمّاي .. ياعلي
چان خايف ولية اجناب .. ياعلي
••••• ••••• ••••• ••••• ••••• •••••
صوت أُمّي اسمعته واختل النبض
واعلى ريحتهه اطلعت اركض ركض
الگيتهه اويه حسين متوسده الارض
تريد تحمي ضلوعه من خيل الترض
ويّه كل سحگه امّي تنخاك .. ياعلي
وآنه ويّه البضعه ارجاك .. ياعلي
صدر ابو الاكبر تره انعاب .. ياعلي
••••• ••••• ••••• ••••• ••••• •••••
يا علي اعله ابنيتك اثگيل الحِمِل
أصبحَت كافله الچانت تنكفل
ابذِمّتي اثمانين من طفله وطفل
شلون ألِمهُم مو سهل لا مو سهل
شلون ادوره الضايع بليل .. ياعلي
وآنه حزني وشّل الحيل .. ياعلي
كلهه ضد ما عندي احباب .. ياعلي
••••• ••••• ••••• ••••• ••••• •••••
يا علي حرگو اخيمنه هالطغاة
وتدري بينه اعله العفاف امعلمات
وين يا بو حسين هالليله نبات
يا علي وحتّى عبينه امحرگات
اعمامتك ردناهه يا حيد .. يا علي
غِطه من الموش اجاويد .. ياعلي
عالتراب ابنات ابو اتراب .. ياعلي
••••• ••••• ••••• ••••• ••••• ••••
بويه وديني لاخوي بهالمسه
الدنيا خنگه وردت بس اتنفسه
ردت امشي وطولي انت التحرسه
بعد ما ضن امشي بويه امنومسه
صعبه امشي رافعه الراس .. ياعلي
من عفت عالشاطي عباس .. ياعلي
بعد محّد مني ايهاب .. ياعلي
••••• ••••• ••••• ••••• ••••• •••••

ياسر حسن
محرم ١٤٣٩

يوجد تعديل بالنص الثاني

بنُص هيمه وليل وخِـدر امسلّـب
وصـاح السجّــاد بعَبـره وينحـب
وينــك عـبـــاس سِلـبــو زيـنــب
≈≈≈ ≈≈≈ ≈≈≈ ≈≈≈ ≈≈≈ ≈≈≈
يبو فاضل عفتنه وعِكست الايام
عَلمنه طايح ورفّت لـ اُميه اَعلام
هِجم جيش اعله خيمه بس حَرم وايتام
ويعمّي النار ما خَلَت علينه اخيام
صِحت العايله ،، رِكضن بالفَله
ما يفزع بعد ،، راعي المرجله

بعصتي اتوچّيت اركضت بعِلتي
و وين اليا صوب تسأل عمتي
وآنه احتاريت ما ظل مهرب
≈≈≈ ≈≈≈ ≈≈≈ ≈≈≈ ≈≈≈ ≈≈≈
المَرَه الما طِلع ظلهه كل شي ما تندل
وين تروح غربه اليا نذِل تسأل
شاطت من هضمهه وصعدت اعله التل
وصاحت سلّبونه وحالنه اتبدّل
من بعد الخدر ،، والعز والستر
اعثرت بنص زلم ،، وظل يضحك شمر

الأذاني هواي اسمعت حچايه
اعدانه يصيحون زينب هايه
وحچي الشمّات امن الموت اصعب
≈≈≈ ≈≈≈ ≈≈≈ ≈≈≈ ≈≈≈ ≈≈≈
اليتامه عيونهم واحد على الثاني
‏طفله تصيح ابويه وين خلاني
وطفل يسأل اخويه شعجب ما جاني
وطفله تگول عمي ليش جافاني
عمتي اتمَرمُرَت ،، شتحچي اتحيرت
الچفك يا شهم ،، بچفهه أشرت

صاحت يحنان گلبي اتفطّر
تنشد الايتام وبيش اتعذّر
يسألوهه ونار فراگك تلهب
≈≈≈ ≈≈≈ ≈≈≈ ≈≈≈ ≈≈≈ ≈≈≈
طفله من خواتي (فاطمه الصغره)
فَرّت من هجوم الگوم مِنذَعره
اعليهه دوّرت زينب بالف حسره
لگتهه يم ابويه لايذه بكتره
شگد متألمه ،، رجعت فاطمه
من جروح الابو ،، جابتلي دمه

تگلي اتمنيت احضن صدره
بس كلّه اسهام احضنته بنحره
وثوبي احمر صار بدمه اتخضب
≈≈≈ ≈≈≈ ≈≈≈ ≈≈≈ ≈≈≈ ≈≈≈
بعد ما حيلهه من النايبات انهَد
عليه الليل صاحت يا علي هوّد
انه حرمه وغريبه وما اليه احّد
وكلهه مذبحه بيش الگلب يضمد
حسين وكافلي ،، وجسام وعلي
ما ظل بس عليل ،، راحو كل هلي

يا بو السبطين متفزعولي
ترضاهه اعداك شافو طولي
واعرُف ميهون انطگ وانسب
≈≈≈ ≈≈≈ ≈≈≈ ≈≈≈ ≈≈≈ ≈≈≈
فگدنه ام الرضيع ودوريناهه
‏يم جسم الحسين تون سمعناهه
الولد ضامي وترضعه چان منواهه
الغفُل عنهه مشه ومتوادع اوياهه
كل ساعه فرِد ،، بالطف ينفگِد
وعمتي تدوّره ،، وتجيبه وترِد

تعبت والحيل راح اويه اهلي
بنافلة الليل گَعده اتصلّي
التفگد عباس تذوب وتتعب
≈≈≈ ≈≈≈ ≈≈≈ ≈≈≈ ≈≈≈ ≈≈≈


ياسر حسن
محرم ¹⁴⁴⁵

مولاتي رقية مع ابيها الحسين عليهم السلام ...


بناگه اهزيله .. وشرد احچيله .. الماخذ لوني
ما اتكلّـم .. وادري يفهـم .. حچي عيوني
بحزني ومأساتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
شحچي وادري يشوف حالي بناگه ما بيهه غِطه
هـوّ فوگ الرمح وآنه بـالحـبـال امـربـطـه
الضعن فوگ جروحي يسحگ بالسبي كل ما خِطه
استعجلت بالفرگه بويه وموتي بفراگك بُطه

ينزف جرحك .. وانتّ برمحك .. تمشي اويايه
من يضربوني .. من يشتموني .. تبچي هوايه
تعجز كلماتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
سالفة دمعة رقيه انت تفهمهه شتگول
باختصار دموعي تحچي خاف بلساني تطول
شنهي طفله وعيني شافت جسمك ترضّه الخيول
واسمع بقتلك شماته تدگ بدفوف وطبول

يرفضون انحب .. من ابچي انسَب .. ويضربوني
يردوني اسكت .. ودموعي تكِت .. ما رحموني
بزحمة شمّاتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
لو صِحت يا بويه اسمع بالشتم وادم تجي
ولو بچيت اعليه صاحو كافي بنت الخارجي
اويه السِلب ترچيتي امشي ومنّه ظليت ارتجي
يرِد بيّه الجسم ابويه الصدره اريدن التجي

صرت اتوسّل .. وارجه وأمل .. بــ الما يسوه
ما ودّاني .. بل أذّاني .. الما بي نخوّه
يسطر وجناتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
على الناگه وطيحّوني وعافني الحادي وسره
بليل وآنه اركض وراهم بطيحتي محّد دره
ما تحرّك راس ابويه والاعادي امحيره
سِئلو السجاد گلهم طفله ضاعت بالثره

ما عافاني .. وظل امتاني .. برمحه الغالي
يشعر بيّه .. وبي حنّيه .. ظل يبرالي
ينظر طيحاتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
نِزلت من الناگه عمتي وعنّي يا ما دورَت
وعالترب شافت سواده ومنهو انتي ناشدَت
جاوبتهه فاطمه آنه ارقيه باحضاني صفَت
عن يتاماكم ييمه عيني لحظه ما غفَت

امنه الزهره .. بطول المسره .. تحرس بينه
وبممشانه .. تون اويانه .. شما ونّينه
اوياهه بحسراتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°
راس ابويه الما تركني وما نساني وما جفه
ارد اموت اعليه كونه بحجري ياعالم صفه
ناذرتله سنين عمري عمري البهجره انطفه
بالخرابه لو يجيني راح اموتن لَه وفه

اترك كل شي .. ويَمّه ارد امشي .. اوياه اتلاگه
مهضومه ارحل .. والموت اسهل .. من فراگه
بآخر نظراتي .. تسولف دمعاتي
حچي عيوني
°°°°°°°°°° °°°°°°°°°° °°°°°°°°°° °°°°°°°°°°


ياسر حسن
محرم الحرام ¹⁴⁴⁴

للإمام السجاد عليه السلام ...

كــل دنـيـاي .. موت ومـوت
واعله النوح .. ما ظل صوت
بحِزني منين ابدي .. من مَهدي الـ لِحدي
مـَـوت ومـَـوت
••••• ••••• ••••• ••••• •••••
ازغير آنه بعمر سنتين ،، واسمع صوت ابوي حسين ،، اسمعه ينادي
اركان الهدى انهدمت ،، ويصرخ من عسه انشلت ،، يمين المرادي
واَسمَع جدّي صاح اگرب ،، بزينب وصّه اخو زينب ،، لِزمهه الايادي
گلّه الما طلع ظلهه ،، بويه بمهجتك خَلهه ،، يثَمرة فؤادي

زينب هاي .. يا عباس
خلهه اوياك .. بالأنفاس
من اوصيّة جدّي .. من مَهدي الـ لِحدي
مـَـــوت مـَـــوت
••••• ••••• ••••• ••••• •••••
شراواني بعد دهري ،، بايام الصِبه بعمري ،، كسرني وتعدّه
بصباي وكُبر همّي ،، من شفت الحسن عمّي ،، بطشت يخفي چبده
يخفي عن نواظرهه ،، زينب خوفه يقهرهه ،، ويمّوتهه فگده
هالموقف كسر گلبي ،، صرت ادعي بغضب ربي ،، ولعنته اعله جعده

شيـعنـاه .. بصوت آلام
والتابوت .. كلّه اسهام
صابّني بچبدي .. من مَهدي الـ لِحدي
مـَـــوت مـَـــوت
••••• ••••• ••••• ••••• •••••
اعظم فاجعه چانت ،، بالعاشر ولا هانت ،، خذت كل سنيني
بساعه كل هلي طاحو ،، وبيوم الطبگ راحو ،، وبقت تربي عيني
لن انظر رمح عالي ،، بي راس الابو الغالي ،، وندبته بونيني
وبالحومه اسمعت كسره ،، ثاري ضلوع البصدره ،، صداهن يجيني

صوت ضلوع ،، مكسورات
وصوت عيال ،، مرعوبات
ودمعاتي بخدي .. من مَهدي الـ لِحدي
مــوت ومــوت
••••• ••••• ••••• ••••• •••••
يوميه لحد حافر ،، ويوميّه بدفن حاضر ،، رزيه برزيه
من الطف ماخذت مُهله ،، وبالشام ادفنت طفله ،، العزيزه رقيه
‏ومن رجعت ضعينتنه ،، وردّينه لمدينتنه ،، النِزِلنه الخليه
‏أيام اعله رجعتنه ،، ولن ماتت عليلتنه ، ادفنتهه بديه

ازغار اكبار .. يندفنون
والسجاد .. حاضر كون
ادفن اَهَل ودّي .. من مَهدي الـ لِحدي
مــوت ومــوت
••••• ••••• ••••• ••••• •••••
ما مرّت سنه ولنّي ،، زينب عمتي تفجعني ،، بديار البعيده
ماتت هم على اخوتهه ،، وتشبهم منيتهه ،، غريبه و وحيده
وسنين اربعه اعله الطف ،، وصرت بفاجعه مكلف ،، مصيبه جديده
ام الاربعه ماتت ،، ويحضرهه الگمر رادت ،، يوسده بيده

وعالجثمان .. من صلّيت
عن عباس .. انه امشيت
بعبراتي التدّي .. من مَهدي الـ لِحدي
مــوت ومــوت
••••• ••••• ••••• ••••• •••••
كل هذا الهضم والهم ،، تاليهه سگوني بسم ،، اويلاه اويلاه
سكته من الألم ابچي ،، ما ظل بيّه صوت احچي ،، بلا صوت اصيح آه
وآنه بآخر انفاسي ،، وطلعت صرخة احساسي ،، حُسيناه حُسيناه
بموتي وعاهدت ربي ،، وصحت آنه ونبض گلبي ،، ابد ما نسيناه

شلون انساه .. الميت اعليه
وليل انهار .. اشهگ بيه
غيره انه شعندي .. من مَهدي الـ لِحدي
مــوت ومــوت
••••• ••••• ••••• ••••• •••••




ياسر حسن
محرم الحرام ¹⁴⁴⁴

سيدتي المحرومة رقية عليها السلام ...


مو هسّه چان اهنانه .. شو خالي صار امچانه
ابچفه الابو حبّيته .. وضمّاني وضمّيته
شو خالي صار امچانه
~ ~ ~ ~ ~ ~
بس لا حلم عشته ومضه  وراح ارجع احچي ابيا ريت
فزّيت مرعوبة وصحت   ميته عسه ولا فزّيت
قبّلت چفه وچان كلّش دافي
ضمني ويگول امني وبعد لتخافي
بس شفته ما ظل كل ألم بچتافي

راح وسبتني آلامي  ..  تلچمني كل اعظامي
اليلچمني حيل اغيابه .. آ يالبُعد وامصابه
بگلبي تشب نيرانه
~ ~ ~ ~ ~ ~
مو هسّه رد امن السفر   وبشوفته همّي انزاح
شو عطره باقي ابراحتي  بس طوله خلاّني وراح
ظلّيت الوعن وانتحب كل حيلي
وناديت عمّه وين ابوي احچيلي
ولن زينب وكل الحرم تبچيلي

شگد رادو ايصبروني .. ومن البچي ايسكتوني
بس ما گطعت ابچايه .. وتالي بچو ويّايه
واتعاله صوت ابچانه
~ ~ ~ ~ ~ ~
ظل يعتلي صوت الجزع  واتجدد اعلينه امصاب
وزينب تعاين حالتي   وابراسهه اتهيل اتراب
والخبر لمّن وصل للطاغي ايزيد
جابو الراس وشفته ضاوي امن ابعيد
گتله هله براسك هله يا صنديد

متغيرات ارسومه ..  شيبه انصبغ بدمومه
شلونك صحت يا بابه .. بس ماسمعت اجوابه
يمه اگعدت حيرانه
~ ~ ~ ~ ~ ~
ملهوفه مشتاگه اله   ضمّيت راسه الصدري
وگتله منو الحز منحرك  ويتّمني وآنه بزغري
چاوين صدرك وين اديك وطولك ؟
بس آنه شسأل واذكر اتعنولك !
بخيول عشره وكل شي ما خلولك

بجسمك يجول الحافر .. وفوگ الارض متناثر
ومن صح وكت للملگه .. وخلصت ليالي الفرگه
جاني وبلا ذرعانه
~ ~ ~ ~ ~ ~
شفتي اعله شفته الذابله  خليتهه وحان الموت
لحظات وآنه ابهالوضع   وانگطع من عندي الصوت
السجاد لهبت بالصدر جمراته
مقهور ناده زينب بحسراته
ماتت رقيه وضل يهل عبراته

گد ما أحن لاحساسه .. روحي اطلعت يم راسه
ذابحني سيف اشواگه .. ما بيّه اعيش افراگه
ميته ابسبب هجرانه
~ ~ ~ ~ ~ ~




ياسر حسن
صفر ¹⁴⁴¹