مولاي هنياله الذي دگ بابك
مشتاگ ابدي الروح يم اعتابك
ياضامن الغزلان آهـو آضمني
و باب صحنك سيدي وطـِني
يامؤنس الأرواح بيدك خذني
مديت اديه اعليك لاتتـركني!
يــاسلطان .. يــاضامـن


كلمـات : ذوالفقار جميـل الخفاجـي✍️..

اللهم صل على محمد وأل محمد
_________________________
هل شهر عاشور وينك يامُحب
اتذكر العطشان طايح عالترب
هل عاشور..بان الحزن..
هل عاشور.. ولهله ون..
----------------------------
هل شهر عاشور خل نستقبله
بلبواجي اعله المشت من كربله
وعلئ كل طفله يتيمه مدللـه
راح ابوها وضلت بيـٓد حرمله
هل عاشور..شهر المحن
هل عاشور.. ولهله ون..
---------------------------
هل شهر عاشور ضل دگ الصدر
أذكر الصار وجره بذاك الظهر
وأذكر الراحن مشي بدرب ليسر
ويلي شدوهن حبل واحد سطر
هل عاشور..جرح الزمن
هل عاشور.. ولهله ون
--------------------------
هل شهر عاشور خل نحي الأمر
ونحي ذكر حسين يامحله الذكر
ضحه لجل الد ين ياناس العمر
فدوه اله كله العمر موبس شهر
هل عاشور..ليه وطن
هل عاشور.. ولهله ون
--------------------------
على ظهرك خلي زنجيلك يدگ
وعله متنك دگتك تنطيها حگ
حسين تدري الحافر بمتنه سحگ
ولجل عينك حتى صيوانه احترگ
هل عاشور.. يوگف الذهن
هل عاشور.. ولهله ون
---------------------------
هل شهر عاشور حضر قامتك
وبصباح العاشر اجرح هامتك
ولا تقصر بللطم عن وجنتك
حته باجر تنوجد وي خدمتك
هل عاشور.. وجنوني فن
هل عاشور.. ولهله ون
--------------------------
لخادم الحسين ع
ذوالفقار جميل الخفاجي

أللهم صل على محمد وأل محمد
* * *-* * *
هليت يهلال الحزن خليت زينب بس تون
تيتمت بيك العيال
وبيك دمع اطفاله سال
ياهـــــــلال ياهـــــــلال
* * *-* * *
ياهلال المن تهل بسك مصايب
ياهلال بجيتك تلفي النوايب
هلتك ترسملي مفارگ حبايب
اتعذبت بيك العقيله من الصعايب
الــٓـأم بيك شگد الم والنار من تحرگ خيم
وهجمت الخيل ورمال
وبيك دمع اطفاله سال
ياهـــــــلال
______
ياهلال بشهر نذبحت نواحر
وبيك صدر متطشر بحوافر
ولگمر فاگد نصف من النواظر
وضل بعد عباس شامتهم يأمر
وجروح مايتوصفن بجيتك ضلن ينزفن
أحزان تكبر لامحال
وبيك دمع اطفاله سال
ياهـــــــلال
______
ياهلال أنتركت بشهرك غريبه
ورده ذبلها العطش لا ولمصيبه
طفله عافوها اجوها لگوها شيبه
وفارگت والدها اليگلها الحبيبه
دمعات مترجع الرحل من راح ماضل كل أمل
والفراگ هوايه طال
وبيك دمع اطفاله سال
ياهـــــــلال
______
ياهلال البيك سكنه غروبها
والرقيه بنص خرابه تريد ابوها
ومن زغرها خوله ورده ويتموها
والصفيه فوگ هـِزل صعدوها
والشمر حادي الضعن نوگه ابد ما نوخن
حادي صار أعلل جمال
وبيك دمع اطفاله سال
ياهـــــــلال
______
يا شهر يا شام يا شر وبـَـليه
بيك بت حيدر علي تمشي سبيه
گعدت جَم ميت الخطبه الأبيه
وصلت بيها رسائل عالميه
السجاد يمشي بلدرب صحراء ولممشه صعب
عليل لاجن حاله حال
وبيك دمع اطفاله سال
ياهـــــــلال
- - - - - - - - - - - - - -
لخادم الحسين ع
ذوالفقار جميل الخفاجي

اللهم صل على محمد وأل محمد
-----------------------------------
ياهــلال ألـَأم زينب لاتـِهل
تنزل ادموعي لون اسمك يحل
وبيك علـ تربان مذبوح الكفل
والعطاشى بشهرك أماذيها
********
ياهلال البيك مكتوب الالم
وبيك طيحة علنهر راعي العلم
وصابته العدوان وبعينه السهم
وجربته يم راسه مخليها
*********
ياهلال البيك مذبوح الشباب
وفگدة القاسم لرمله شگد عذاب
وباقي ضل بمصرعه فوك التراب
وخيمته بدم نحره محنينها
**********
ياهلال البيك ماسالم الرضيع
والسهم وسط النحر ضل بيه صريع
مو اله سهم الحرب نحره رفيع
عصابته بدم رگبته مخضبيها
**********
ياهلال البيك مسبيه العيال
والسكينه تمشي مجتوفه بحبال
وجانت الحره عليها اكثر سؤال
هاي زينب ماهو اشو كفالها
**********
ياهلال البيك اللأم وعلل
و العليله الفارگت بيك الاهل
ايست يلتم بعد ذاك الشمل
وضلت الشمات تضحك حالها
*****'****
لخادم الحسين ع
ذوالفقار جميل الخفاجي

خلك خادم حسين .. ولا تصبح للصــنفين
مرات تصبح حرمله .. وتتناسىٰ درب الخيرين
--------------------
خلك خادم وتخدم علـه الفطره
وتحضر هيئتك من تلطم لزهره
واحيي مجلسك لومحد يحضره
ونادي سيدي يبن الحسن نضره
ولتهمك هاي الناس .. ماتبقىٰ ودم عباس
مادام تاليها الترب .. بحسين ضبط المقياس
------------------
الرادود الفلاني يحضر بتصوير
ولازم كامرات ومكسجه وتغير
حمزه أعللـ مسجل وصل التعبير
وقصايد كاظم البيها العقول تحير

عللـنيه شگد خدام .. وصلنا الها الأعلام
و مادوروا كثره وعدد .. ورتفعوا بجم ايام
------------------
البعض عدهم تجاره ايام المحرم
يشرط علشرط يأخذ عله المأتم
لگدام اتفاق علل عدد يخصم
والبصف موكبه يتحسر الدرهم

عجل نندب مولاي .. وبلموكب كلمن رأي
واحد يدور مصلحه .. ويشارك بگطع الماي
------------------
الموكب يبقىٰ واحد يجمع الخدام
مو قسمين وتلاثه يصبح كل عام
كل من ربعه و يلمله عـدد لطام
لاشك هذي بصدر الحسين اسهام

لاشك نحرگ لِخيام .. من نقبل بل ضِلام
ونسكت عليهم والسبب .. ماعدنه عهد والألزام
------------------

لخادم خدام الحسين (ع)
ذوالفقار جميل الخفاجي..

هل، محرم شهره، خل نخدم صدگ
خل، نواسي الركضت، برماد الحرگ
ودم، تـِطيح العين الماسالت دمع
تجر، حوافر صدره وتبعده وسحگ

الحسيني بلطمته
اليدگ صدره لـمَن
يحس وافه دگه
لعياله الي ضلن

مصيوب بطفك منفجع
ياسيدي ارد اكسر ضلع
لو مامتأمـن هل نفـس
بكل مجلس بضلوعي خلع
حـسيناه حـسينا حـسيناه حـسيناه

الدمع، يهل بلوجنه جن مجره نهر
علىٰ، اصعب لحضه ووداع اليمر
حسين، الغداً بلعاشر ويودع السند
وحيد، يضل بليله من يطفه الگمر

يحگه اليضيع
اخو بين الشماته
تصد المناضر
عليه تنهي حياته

الحيره بلرجعه للخيم
وعاف اعلشط اجمل علم
ويـاعذر يقنع زيـنبه
والرايه جروح وكلها دم
حـسيناه حـسينا حـسيناه حـسيناه

الف، صدگ هنياله الزنجيله لطم
بظهر، لطم وبحرگه ويواسي حرم
يكون، يحسب يجزع وبلايه عقل
يلوع، بهضم وبلوعه يحس بي سهم

دخيلك دعيته
على الفطره عشكته
رزقني نعمالله
عشت ضل خدمته

لو يرجع كل ذاك الجره
اهل الشور احنا اول سره
وشتطلب بينا أمر آمر
تحت ايدك واتحسب جره
حـسيناه حـسينا حـسيناه حـسيناه

سنه، اتاني العاشر واجوائه تجي
الجفن، يلف القامه يگلها ارتجي
عمر، واضل واتشرف هامات الخدم
عام، وانا انتطر مصباحه بـَجي

مجانين انتسمه
ومن عابس عرفنه
الحسين وعضمته
لعطف بيته التجئنه

غيرك ماشفنا اي درب
نلتم بي يرتاح الگلب
بس انته للضايع وطن
واليتغرب منك صعب
حـسيناه حـسينا حـسيناه حـسيناه
---------------------------------
لخـادم الحـُسين (ع)..
ذوالـفقار جميـل الخفاجـي

اللهم صل على محمد وأل محمد
-----------------------------------------
شبكت اديه وحاطتهن فوگ راسي
لمن شفتها ضعونهم حملت ناسي
لا ابوي الكالي يابويه اركبي
وانا متانيته وايدي فوگ كلبي
بلکت يناديني ... بلكت يناديني
_______________________
شبگت اديه و عيني تترسم صور
من الصور حرك المخيم
ضليت اگوم وابجي والطم واعتثر
ودمعي يهل دم
طحت بهل موقف راودني ارسم صوره
بعيني رمله شالت شمعه بس مكسوره
واحلامي تتسولفلي أبالي قصة خيمة
محترگه وبيها ابنيات تطر الهيمه
وحلمي ضل ياذيني ... بلكت ايناديني
** ** ** ** ** ** ** ** **
راسي على الباب انتجه وراح بحلم
وحلمه ذهلني
جن التراجي اتكطعن و عليها دم
وهم خوفني
گبالي رقيه انضر طاحت حيل وتبجي
درفعها الشامت ضل يضحك حيل ويحجي
مافرزنت انا احجاياته بس من گلها
وينه احسينج بلمسبية وضحكت كلها
وسوطه ضل بعيني ... بلكت يناديني
** ** ** ** ** ** ** ** ** **
فزيت وعيني اعلضعونه ضلت تربي
ومشبوحه ضليت
شلت انا اديه للسمه وادعي الربي
شلون ابقى بلبيت
ما اكدر وأحلام الليل اخ تراودني
كل ماردت اغفه لغربه تضل تفززني
وعيني كل لحضه اعلخيامه تاخذ منضر
جن ابلا والي اعلضعونه وغربه التفتر
رايده يحاجيني ... بلكت ايناديني
** ** ** ** ** ** ** ** ** ** **
جنه اشوفنه الضعن عني بعد
رايح بلاحباب
وحدي بقيت امرمره مايمي احد
بس عتبة الباب
اجروحي والام فراگي انا الماتركتني
ماتركتني لحضه وحده وماعافتني
كل تفكيري عليهم باقي يم خيمتنه
وعمي العباس وعبدلله ويم عمتنه
شوفته ترويني ... بلكت يناديني
** ** ** ** ** ** ** ** ** ** **
ضل بذني ينعاد الصده من حملو
وناده خواتي
صدليه وبنضرة حزن لمن مشو
وبيدي عباتي
من ايدي طيحت اهدومي او وجهي تلون
كل دمعه الطاحت من عيني بلكاع اترن
ماوكفن دمعات عيوني نهر يصبن
حته اهدومي من دمعاتي كلهن نكعن
لوحدي مخليني ... بلكت ايناديني
____________________________
الخادم الحسین (ع)
ذوالفقار جميل الخفاجي..

اللهم صل على محمد وال محمد
*** *** *** *** *** *** ***
وين رايح عني ومخليني رسوم وجهك لسة بويه بعيني
انـــه إلعـــــــليله
*** *** ***
وين رايح عني بويه بويه گلي ليا كــتر
بعدك انا دموعي هلت بفقدتك ماضل صبر
روحي شبه الطير حلت بلاسرب بس باقي حر
ورده من ارضك تراني بزغري يبسني الدهر
حيل مشتاكه لضعنكم انه
بويه وردتكم بقت ذبلانه
انـــه إلعـــــــليله
*** *** *** ***
بويه من گتلك اخذني ليش ماردلي الجواب
اتدلهمت بعيوني غيمة وامطرت فوگ التراب
دمعي من أحجابي ينزل حته نگعها الثياب
ادري شمسويه انا بويه وخلص عمري بس عذاب
ليش بجفاكم عميتوا اعيوني
وانا يم ديرة غرب عفتوني
انـــه إلعـــــــليله
*** *** *** ***
الليله جن شخصك اجاني ومرراني بلحلم
تگلي بويه وداعت الله وجسمك احمر كله دم
اتلعثم الساني ارد اسئلك عن خواتي ولخیم
وليس تسكت بويه عني من اسئلك عل سهم
وليه مارديت اضن ناسيني
کتلم ومن بعدك اليحميني
انـــه إلعـــــــليله
*** *** *** ***
الليلة الأخره بعيني راود حلم ابد ماينوصف
جن شفت صوب الشريعه جود والرابيه ترف
اتگربت و عيوني هلت من شفت عمي الكلف
وجن شفت ذرعانه ماهي وسهم عينه المنعكف
كتله ياعمي اشجره حاجيني
ماحجه ومن حلمي فزت عيني
انـــه إلعـــــــليله
*** *** *** ***
حلم شفته راوداني و عسن ميته بې عسن
جن شفتهن كل خواتي وعمتي وكل الضعن
وجن شفت كلهن حرمنه بللاحبال اتجتفن
گمت اصيحلهن وانادي واضن ماسمعني اضن
وحته الفوك النياگ مكيدات
ويلي أه اعل الخوات مجتفات
انـــه إلعـــــــليله
*** *** *** ***
صار ريجي دومه يابس ابد مايرويني ماي
ماكو طيب لهاي علتي شوفة الوالد دواي
جان هوه اعليه خيمه وجان بلضلمة ضواي
ومن انام اعللمخده يبوسني ويعدل غطاي
بشوفته جنت انا اكحل ناضري
والمرض من بعده ضل يسري سري
انـــه إلعـــــــليله
*** *** *** ***
لخادم الحسین ( ع )
ذوالفقار جميل الخفاجي..

بويه متعوده أشوفنك ترد
بلايا ماي يموت لويبقه الورد
بعد عينك ماكو ماي وشوفتك للعله داي
بويه متعوده
____________________
ها يمن سرتو بضعنه أهلي يا أصل المحنه
الليله ياهوه الفگدنه من بقينه
والدمع نگع ثيابي طفله من زغري بعذابي
آه ياجرحي ومصابي من بقينه
البنيه تصبح كون يوميه
بوجه والدها ويمسيها ليليه
مالي بلغربه أنا رأي وشوفتك للعله داي
** ** **
أذكر النضره الأخيره من نويتو اعللمسيره
وانا وأحزاني الجبيره أتشابگينه
الدمعه بخدودي تلالت ولثياب من أيدي طاحت
گمت أحس الباب صاحت إتشابگينه
الحسره البلگلب ماتطلع بدمعه
ولا تطلع لون طول الدهر انعه
أدري ماتحمل جفاي وشوفتك للعله داي
** ** **
ابساعة الصعدت رقيه وسكنه وي خوله سويه
وانتظر هلبت اليه أتگلي ليه
حسرة الروحه شكبرها الدنيه بعيوني شزغرها
عمَتي ما وجد نضرها أتگلي ليه
نضرت ونضرتي مو تكسر الخاطر
تموته من الآلم لو ينضر الناضر
كلشي اضلم ياضواي وشوفتك للعله داي
** ** **
بويه صدگني انا طيبه عله مابيه ومصيبه
امراضي من ابقه غريبه تلـ تجئلي
هاك شوف گبال عينك واگفه بحضرة حنينك
آشباح ضلمه بعد ادينك تلـ تجئلي
ردت وياك أروحن حته خدامه
يم راسك احرسك ليلي مانامه
قسمتي من الله هاي وشوفتك للعله داي
** ** **
خذني لو عبدلله اشيله شوفني امشي مو نحيله
بويه أحلف موعليله وبيه حيل
بويه حيل يحبني احسه وانا احب مناغه حِسه
وكلشي اعلمنه وادرسه وبيه حيل
اعاونها الرباب ابشيل عبدلله
والوليله بمفزه بجلمة اسم الله
من البرد انتم غطاي وشوفتك للعله داي
*****************
لـخادم الحسيـن (ع)..
ذوالـفقار جميـل الخفاجـي

بلكت حلم موزين ياناس
حسين انذبح وبصفه عباس
شما اشرب الماي اعطش وحالي حال
بأذني العقيله تصيح طاح الكفال
__________________________.
بلكت حلم لاموصدگ والشفته اضغاث احلام
طاح الحسين وعيلته من بعده تتناده ايتام
لاموصدگ بلكت جذب والشفته بعيوني اوهام
جاليش من دون البشر ملتمه فوگه الضِلام

وتحاوطته الخيل من دون الناس
وجفوف شفت بگربه اضن للعباس
وحجايه ضلت ماتروح من البال
بأذني العقيله تصيح طاح الكفال
_________________________.
هيج الله ويرد الضعن وارجع واشوف أوليدي
عن شوفته صومي اكتمل وبشوفته اعلن عيدي
كلساع اعاين بلدرب وتاخذني صفنه من أيدي
لطف الحسين وكربله والگاه طايح حيدي

عالرمضه نايم والرمل هم جواه
وترگبتله واسمعت بس ون آه
وهناه شفت شمر بخيام ابني عال
وبأذني العقيله تصيح طاح الكفال
________________________.
منضر يجرح ناضري وكلما اغمض يطلع
ابني الحسين على الترب ويذبحه ملعون ابقع
وطبره عله طبره بهامته الصدر ١٢ مايوسع
شگد صيحت يمه ونحت محد سمعني اتوقع

يايمه أمك انا رد اترجاك
لا ماترد ادريك كل الينخاك
ولا تگطع بگلبي ييمه الأمال
بأذني العقيله تصيح طاح الكفال
_________________________.
و تگربت للمشرعه ولگيته مطبور الرأس
وذرعانه من يم الزند مگطوعه ويجر انفاس
وصاني يمه اتعذري من ام عون بأسم العباس
والماي راده لخيمتج و مـِنعَته ايادي الأرجاس

لا يمنه لا يسره ولا حته العين
لم عون كلشي يهون شنهي الجفين؟
ودمعه اعلخدر اخته الگمر ضل همال
وبأذني العقيله تصيح طاح الكفال
__________________________.
جا هوه الأكبر ينذبح والقاسم ايطبرونه؟
أسمالله الجماله الشايله سمالله ألمصد عيونه
جدامه تتغطىٰ الشمس لو باجر يزفونه
بأأيات أحصنه من الحسد خافنهم يحسدونه

وعبدلله محله لوسمعت مناغاه
تمنيت روحي كون طلعت وياه
فوگ الثره اعياله شفتهَم اجلال
بأذني العقيله تصيح طاح الكفال
_________________________.
لخادم الحسين (ع)
ذوالفقار جميل الخفاجي..

يوم الي تركتو الدار وعيني شابحه اعليكم
ضليت انضر لمحمل وتتركوني انه ادريكم

وبقيت انضر عله العباس لمن حمل اضعونه
وعله حسين وعلي الاكبر عليه جانت اعيونه
وعله اسكينه وعله رمله ولعبدلله تعرفونه
مصاب ابني الحسين آه آه بعده من يجبرونه

ولمن لم اهل بيته. صحتله ويمه وناديته.
.لتنسوني انه وصيته.

ناضرت لبنات حسين كلهن صعدن الناكه
وانه انضر عله العباس شيصبرني بفراكه
كلت عبدلله الي خلوه شمس لصحره حراكه
واشوفن بلوداع افراك اخاف ابقه نه مشتاكه

وأضل وحدي يخلوني. عليهم تعمه اعيوني.
.وبعدهم تسهر اجفوني. .

دارت عيني للقاسم واشوفه يصعد ابرمله
واشوفنه ابو اليمه العبايه وسيفه اشمحله
واشوفنهه لعقيله ويا وصعدن ليلى وخوله
صدت عيني لبنيني كلهم وعل لبو حمله

وبقيت انضر لعبدلله. ولجعفر ابني اسمالله
ولعون اوليدي حيالله.

يوم الي ضعنك سار كلبي وعيني مشبوحه
بعتاب ورسايل شوك وكل آمالي مجروحه
ماجنت احسب تردون ليه وروحي مذبوحه
وي كل موقف ابألي صوره ابذهني مسروحه

ضل ابالي كعدتكم. يمه وكل سوالفكم.
بس عفتوني انه امكم.

كسرتو خاطري بموقف ابد من عيني ماشيله
ضلت تبجي حته ادار وحته لباب والشيله
من عفتو عليلتكم ودمعها ضلت تسيله
ولي ايفارگ احبابه دهره يهدله كل حيله

ضليت بآلم دنياي. بعدكم هم عمت عيناي.
.مارديتوا يارجواي.

ماحسبت طف هناك ياخذكم غفل يبني
حسين الغالي والعباس منهم دهري يتمني
وجعفر وابني عبدلله وعون الراسمه حزني
وبناته رجعن اعل نوك أويلي ما يعرفني

وماشميته عطر الياس. ولا عطر الورد عباس .
جفاكم شيبالي الراس
__________________________________
لخادم الحسين ع.
(ذوالــــفقـــار جميل الخفاجــْْي)

خبرني يابشر شجره وسولفلي بلطف شصار
يوميه آحلم بلخيم ومرعوبه افز من النار
هوايه محمل سوالف
خـــبـرنــي خـــبـرنــي
*** *** *** *** *** ***
يابشر احلفك متضم عليه
وتحجيلي عن ابنيني سويه
بردلي گلبي بجلمه جَويه .. تسر خاطري كون

گاللها من ياهي ابدي هوايه
حسينج جماله ونوره مرايه
المرسل اليهم حسين آيـه .. وكلهم يكفرون

نار الهجر قصة جرح والها گلب بس يراد
حاطني ماخلن عليْ وكلشي حزن ضل يزداد
طاح عمود المضايف؟
*** *** *** ***
سولفلي عنه وگلي شجراله
تخبرني اريدك عن احواله
يتراوه عيني ركاض خياله .. وعليه يدوسون

تدرين نحروا اعللغبره خـلوه
بسلابك الخيل گامو يدوسوه
نعمة الله ولا ماصـانوه .. النعمه يطشرون

فوگ الرمل بعد الدفن بلحر يضل ثلث تيام
ماصايره بواحد كبل شيخ ويسلوبنه عمام
ماصايره بكل الطوايف
*** *** *** ***
يابشر حيلي موته يمك
سولفلي كلشي احسبني امك
تبردلي گلبي وبنوحي اللجمك وبدمع العيون

گاللها زينب عافت خيمها
ومتعنيه لتل تنده زلمها
وتحشم الطاح كافل حرمها وعداه يشوفون

رادت تگله الماي الك خليه نريدك سالم
هاشم تضل ليل بدهر يبعد گمرهم هاشم
گلبي مامرتاح خايف
*** *** *** ***
ليله افزن من حلمي واگعد
والخيل احسن تلحگني واشرد
عطاب اشمن جن نار ارصد مافرزنت وين؟

گاللها يهضم حرگ المخيم
گاللها جرحه اهات غيم
واطفال طاحو من خنگه الشم وبلا عناوين

مارحمو الطاح وعدل ميدان بلطف سووه
واليرگض بحيله اوگع رگضو عليه هم سحگوه
ينقلي المنهم شايف
*** *** *** ***
لخـادم الـحسين(ع)..
ذوالـفقار جـميل الخفـاجي..

اللهم صل على محمد وأل محمد
______________________________
بيع سيفك وأشتري أبوزنه الذهب
هجي صار بـأرض كوفان العجب
أنباعت أشراف لبعض يلعنها سائل
و الضماير راحت إبلا يا مُـقابل
_____________________________
جان كلمن عنده سيفه وخاله بغمده أنترك
مامحسب يجي يومه يحارب وما يندرك
هسه اجة ساعة نزاله ولزم لا ما ينترك
لازم يرد التحرك عن مساره او أي شرك

بيع سيفك. صاحو وتركو لحرب
هجي صار. و الأمر كلش صعب
(ذاك سلم هذه ضل بيهم ينازل)
و الضماير راحت إبلا يا مقابل
____________________________
بعد ماوصلت رسايلهم لأبن خير لعمل
أقدم علينا بشيراً يالله كتبوا بالعجل
بلعراق مجنديلك وحنه الك بيت وأهل
ماكو غيرك النه قائد ماكو بس أنته لعدل

بيع سيفك. وأشتري جايك هلاك
هجي صار. للـهرب من هالعراك
(يحلم الرايد يحارب لا يحاول)
و الضماير راحت إبلا يا مقابل
____________________________
لجن ابن زياد باغي ينگط من افكاره سم
غرر النسوان راحت غمدت اسيوف الزلم
كل مره تكل البعلها انطي سيفك واستلم
ذهب لاتصبح فريسه وانت من اهل السلم

بيع سيفك. والوضع اصبح خطير
هجي صار. واحنا لليوگع نَـصير
(تنازلت عن لعقيده شكد جحافل)
و الضماير راحت إبلا يا مقابل
_____________________________
حين طب لهه سفيرحسين بن عقد لوله
هجت وعجت عليه أذيابه رادت تاكله
حسهم ب هذه حقدهم مو ألي كتبو اله
راد يوصل للحسين (يكله رجع القافله)
بيع سيفك. گالو وقر كلذليل
هجي صار. وگال أبد لامستحيل
(مايطخ هيهات للذله يقاتل)
و الضماير راحت إبلا يا مقابل
______________________________
إنأمر مسلم بلرساله يوصل ويعلن سلام
بأرض كوفان واهلهله لحجه يلقيها بؤئام
صار طاعون الخيانه جرح ماله أي لتمام
حاطو اعليه مثل طير وتلتم أعليه السهام

بيع سيفك. لوتموت انته نزيل
هجي صار. وأحنه بلينزل نعيل
(عليك تلتم كلهاا يامسلم شمائل)
و الضماير راحت إبلا يا مقابل
______________________________
ألاف گالتله نحارب لجلك نقاتل جيوش
نطبگ عليهم نخيم مثل علعين الرموش
سيف واحدنه طواريه تضل بيهم تحوش
وجه داره اعليهم وناضر على هيئة وحؤش

بيع سيفك. واشتروا من الجميع
هجي صار. تنجبر تصبح مطيع
(واليبايع مسلم لجوه الرمايل)
و الضماير راحت إبلا يا مقابل
_______________________________
لخادم الحسين ع
ذوالفقار جميل الخفاجي

لوكربو علئ خيمنه. نفديلك مناحرنا
سبحة بايدك احنه نصير
نخلي القاده بينه تحير
نفديلك مناحرنا. نفديلك مناحرنا
****************
صت صوت الانصار رعيد لهذه ليوم متحضرين
التمو مثل لفت السور وخلو بلوسط حسين
كل منهم يصيح الموت قربان انذبح للدين
نرد كل انتصار الفات اليرموك وأحد،صفين
نشبة صولت الفقار. حيدر عَلَي الكرار
نفسر اصفوفهم تفسير
نخلي القاده بينه تحير
تحيرهم ارادتنا. نفديلك مناحرنا
___________________________________
زهير الميمنه واكف وحبيب الميسره ترجل
الرافع راية وسط الجيش عباس الوفي اتكفل
عباس الي لو حارب يعدل كلشي لو ميل
مكرم الضيف والايتام وميردله شخص يسئل
دخيل افعال وعلومه. لمن ينزل للحومه
يطشر جيوشهم تطشير.
نخلي القاده بينة تحير
الزلمه ليه ما يدنا. نفديلك مناحرنا
___________________________________
مسلم جون وي عابس وهب يم الغفاريان
مثل نيران الجهنم وبحر يطفيهه يلتكيان!
انصار حسين متبصرين وجيوش الكفر عميان
واحد جيش ابو اليمه الف يذبح وهو عطشان
كلبهم واحد السبعين. ملتم موش متطشرين
كلبهم صافي وي الغير.
نخلي القاده بينة تحير
حب حسين امنا. نفديلك مناحرنا
__________________________________
ابوفاضل يكل لحسين لو وصلو علئ خيامك
اشطرهم الك ابساط تمشي فوكه اجدامك
تريد اشجخهم اعلئ الكاع مثل ارماح كدامك
لو بيهم اسوي تلول ستر لخيام حرامك
لو بالخندق ادفنهم. واكطعلك نفس حسهم
شورك سيدي يا امير.
نخلي القاده بينة تحير
شورك انتة سيدنا. نفديلك مناحرنا
___________________________________
عابس گال انه لمجنون بحب حسين اسمعوني
مابيكم كفو يحارب يترس وحده بأعيوني
بسيفي اليوم ابارزكم واشوفن هم تذبحوني
لهذه سيفي ذبيته واريد أنتم تگبلوني
ودرعي راح اذب ولطاس لاخوذة وريش علراس
بيكم ابدي التحرير.
اخلي القاده بينة تحير
خوه وحده تجمعنا. نفديلك مناحرنا
__________________________________
وهب ودعهه امه واراح يم زوجته الكوفيه
يكلهه هانيه نفسي ترد لحسين مرضيه
ولوله حب ابو اليمه روحي احسبهه ماهيه
الروح التنشغف بحسين تصبح روح قدسيه
امشي وي اخت عباس. وضلي رافعه الراس
بمشاج الهه صيري نضير.
نخلي القاده بينة تحير
نواسي الطاهره بحبنه. نفديلك مناحرنا
_________________________________
لخادم الحسين(ع)..
ذوالفقار جميل الخفاجي..

اللهم صل على محمد وال محمد
_________________________
يعباس .. خويه بس حاجيني
يعباس .. بس الم تدريني
---------------------------------
يابوفاضل شرد اسولف علعطش والامك
خويه عيني عليك تنضر وانظر لصمصامك
عيوني ضلت بس تناضر عل نهر والثامك
الأحساس .. كلش ياذيني
يعباس .. خويه بس حاجيني
*** *** ***
سكنه صاحت عمي ارجع الماي لامنريده
حسین ابوي يريدك انته يدور اعل اعضيده
رقيه تنضر عل اعادي تصيح عمي نريده
الأنفاس .. بعدك تعافيني
يعباس .. بس الم تدريني
*** *** ***
يا أبوفاضل كل خيمنه بنارهم حرگوها
والأطفال اعللمخيم عل جمر مشوها
والجثث عباس اجوها بخيلهم سحگوها
الأرجاس .. بخيلهم تاذيني
يعباس .. بس الم تدريني
*** *** ***
نوگ جابوها الخيمنه ولحبل باید هم
صاح زينب وين أخري علنهر تلكيهم
انا هضمتني جلمته وكتله أه عليهم
علی راس .. الطم تخليني
يعباس .. بس الم تدريني
*** *** ***
عيوني ماتكتم دمعها وهلت من عيوني
شلون ياعباس اضمها وانتم التجفوني
وسفه ياعباس خويه اغراب تحدي ضعوني
عرج ساس .. من علي مربيني
يعباس .. بس الم تدريني
*** *** ***
شلون ياعباس انام وانته راسك علرمح
جسمي مايغفه ويغمض يبقه كاعد الصبح
بلسبي يوميه تصعب وبلصعب هم نتضح
الحراس .. اكثر من سنيني
يعباس بس الم تدريني
*** *** ***
لخادم الحسین ( ع )
ذوالفقار جميل الخفاجي..

ضاگت الگاع
من طحت والدنيه صارت مغربيه
ضاگت الگاع
وريت كون انطيك يا عباس اديه
كون يأخذني الجدم..ليك يأجمل حلم
.......
ضاگت الوسعه يكافل..التمت علينه الجحافل
من يردها ياابوفاضل.. وانته طايح
خويه عباس اگعدلنا..عللترب نومه زلمنا
ياهو اليضل يم اهلنا.. وانته رايح

رقيه تصيح عمي بويه جاوينه
اباب الخيمه گعدت تنظر اسكينه
تگلي الماي عمي يجيبه وي طينه
يجيب الشط عله خيامه..برهبه يجري گدامه
يرفرف بأيده ال علم
--------------------------------------------------
گلي ياحال الاوصفه .. والعطش بيمن نحلفه
اشتد علينه عينه صلفه .. وسفه عباس
تمرجل بكل طفله عدنا .. وببني عبدلله هضمنه
ورده ينعد من وردنه .. ويگطع انفاس

تولانا بظهر بي شحت المطره
وماروه گلب عبدلله لوگطره
اللهي ندعو شاهدنا ولو نضره
شاهد ربي جم حاله..تعذب حسين وعياله
تعزب العين بسهم
----------------------------------------------.
ياجرح ماله اليضمده .. غيرك ومحد يهيده
طولي وي طولك أمده .. لو بقيت
الله لاسامح و اشوفك .. بهلوضع واگدر اعوفك
ما گدرت أحمل ضروفك .. وانحنيت

أريد من النهر لخيمنا أشيلنك
وگبال الغرب عباس المنك
ياوسفه أرجع وبس انته اعوفنك
لوحدك علنهر طايح..ودمك علأرض سايح
وحته جودك ماسلم
----------------------------------------------.
رجعتي منك للأخيم .. منها احس حيلي تهدم
والضوه بعيوني سلهم .. بنص نهار
الخطوه ثگلت ياعضيدي .. من رجعت تريدك ايدي
شويه أگل للروح هيدي .. الصار صار

أول مره ضهري عللـ نهر يبقه
ودمعي لونزل لمصيبتك حقه
يانبع الأخوه و مبدأ الرقــه
شيِصبر گلبي بفراگك..أيا ياحسرة اشواگك
لـ فرگتك حيلي نهدم
--------------------------------------------.
جن سهم عينك نضرته .. الشامت وتأذي ضحكته
والحجي الياذيني عفته .. بلب گفاي
بالي ضل يم العقيله .. وهمي صحره ماتشيله
هوه المفارگ خليله .. ماله داي؟؟

تلگتني صفيه وخوله والسكنه
ينشدني ويگولن وينه جا عمنه
ولبابه لو أجتني صعبه هلمحنه
أگلها عظم الله اجرج..انكسر بعد الگمر خدرج
يصبرج الله لهل الألم

يــا عـــباس منــك المـدد..يــا عـــباس منــك المـدد

اليوم غصت نينوى من الدماء
وصاحت دخيلك يجد الساده
والزلم مسترهبه تصيح الفرار
بسيفه گام يحوش حته القاده
وهيه ياقاده البقت هم بيها روح
والنزع من جدهم الهم عاده

انته ابوفاضل دخيلك
ونعم حامي لخليلك
والزلم محتاره حيلك .. هذه انته لوعلي بلساحه

نينوى مختنگه عجت
رجت وهجت و وجت
مهرته بلحومه فجت .. وحته طفهم مال من اصفاحه

يــا عـــباس منــك المـدد..يــا عـــباس منــك المـدد

لوله عين حسين مايبقه فرات
جان جريته لخيم حرامك
انته ابوفاضل دخيل الله شوراك
عشره عشره يلوح صيد سهامك
زلمه بدوي بلحرب ماهو گصير
تهابك الفرسان من الثامك

معدل ونادتك زينب
والمهر مسروجه تلهب
نادتك ايسلمك الرب .. ترد سالم يا كفيل الحره

والدرع دخن حراره
دخيل ريشاته وسماره
والحجي يطشر شراره .. من علي ماخذها نفس الشمره

يــا عـــباس منــك المـدد..يــا عـــباس منــك المـدد

من وصلت العلگمي ماضله ماي
مات يمكن والله ردها لروحه
بغمده سيفك بعده ماشالته ايد
شمالها الوادم جثث مطروحه
انته فوگ المهره والشافك يموت
والتخيل فوگ تيه روحه

هلا يابيرغ عراضه
انته شيخ اعللفراضه
قدم بخاله اعتراضه .. ضدك اوگف گاله وماهابه

والنعم يبن الصميده
وانته ديوان وعجيده
ياهو صوبك يرفع ايده .. وياهو گدها وياك راد طلابه

يــا عـــباس منــك المـدد..يــا عـــباس منــك المـدد
___________________
لخادم الحسيـن (ع)..
ذوالفقـار جميـل الخفاجـي..

اللهم صل على محمد وأل محمد
__________________________
كون، كون اشوفن حنتك علخيمه
موش، دمك الطاهر يروي الهيمه
يجسام والأسهام فلا ترحم جمالك
تمنيت آياريت مثل عمك خصالك
يجسام. يجسام.
___________________________..€
يمه يمه يل ولد ضهري كسمته
ودورت عنك يغالي بليل سكته
راوداني خيالك بطولي وشبكته
وجن كلتلك ليه ترجع يمته يمته

يلوحيد ألي عيد لون اشوف أعيونك
الجرح باد ملا ضماد يضل يطول بدونك

يجسام. يجسام.
___________________________..€
كون أشوفن حنتك بلخيمه خطت
بزفة القاسم تقام الليله كتبت
وداير الخيمه ييمه شموع وجت
وكل اهل بيت الاطايب بيك فرحت

يفرحون يهنون ييمه ابوك بعرسك
كل الناس ولعباس يجي يحضر لزفتك

يجسام. يجسام.
__________________________..€
مبين العريس من ثوبه وكيانه
ونته ثوبك شايل احزان بزمانه
المن انطيهه الكلب بعدك حنانه
تبقى ضلمه لدنيه إخلافك ضوانه

من ألوليك حلم بيك انه جده لعيالك
حلم ذاب بلتراب شفتهه كل وصالك

يجسام. يجسام.
__________________________..€
يمه كل عريس اله ساعة زفافه
ينرش بورق الورد أبكل ترافه
بلسهام انته يرشونك حسافه
وطبرت لسيف وطعنته وكل وصافه

تاذيك تحنيك دماياك اعلطولك
جراحات جثيرات العده يايمه حولك

يجسام. يجسام.
__________________________..€
خايفه دهري كبل لا بيك يهدم
و الورد يا يُمه بجفوفك تيتم
نهاري يوم الفارگتني بات مظلم
والوحيد نته زفافك صار مأتم

نساني زماني لون نسيتك يمه
جرحني وذبحني وكلبي تعب من همه
يجسام. يجسام
_________________________.. €
لخادم الحسين (ع)..
ذوالــــفقـــار جميل الخفاجــْْي..

ياجـسـام يـاجــسـام ياجـسـام

يمه جاسم عميه كون ولاشفيتك
محنه بثياب العرس بلدم لگيتك
وگعدت يمك نحت وشگد بجيتك
مومحل نومك ابد موهذه بيتك

لگيتك.. مضيف تراب اعلخدك
هنانه طبره هناك طعنه شباقي منك
كلشي بارد شفته منك حته ردك

اكلك يمه قاسم گوم
كلشي هناكه حضرته
ماضل شي الك بي عوز
فراش الخيمه رتبته

ياجـسـام يـاجــسـام ياجـسـام

خطوه خطوه وخطوة الحرمه شثجلها
خـصه لمن تـسمع اخبار اعـلهلها
موش خوش ودمعت الضايع تهلها
شلون تسمع مات المحسبه لجفنها

يلمها.. والتطلبه يگلها حاضر
خيمه الها وضل عليها بلصحاري
وموش وي جتال ابنها عليها يآمر

يلب احشاي يلمتعوب
مو وكته الورد يذبل
جبتلك يمه ماي وياي
اريد اسگيك يمعدل

ياجـسـام يـاجــسـام ياجـسـام

اوگع وشـوگك يا شرلي تعاي
دنيه هيمه وانته فانوسي ضواي
شلون اطيب وضحكتك متبديه ماي
بلكت الله شويه بيك يفز نداي

لاتردني.. بكلشي احلفك يادليلي
طاح الاكبر طاح عمك ماضل آحد
وعمتك وحدها وأمصايب يويلي

السهام بكل كتر عثرات
حذره الوگعه تاذيني
السهام هوايه منشورات
خذتلي فرحة سنيني

ياجـسـام يـاجــسـام ياجـسـام

صحره شفتك والعطش ضل بيها ينزف
ونته يمه من الورد من تخجل اترف
وليدي حته بموته من الوادم انضف
بلمضايف جان ابوه براسه يحلف

شلون المه.. ابني متبدي علصحره
راسه ينزف هامته طبروها اليه
وراح اخضب راسي دم من فيض نحره

هاي شموع الك خليت
يم خيامنه تلالي
وفرشت الدرب وردات
وتالي اتضيع امالي

ياجـسـام يـاجــسـام ياجـسـام
_________________
لخـادم الحسين (ع)..
ذوالـفقار جميـل الخفاجـي..

كل جرة نفس أذكر شبابك
وكل حنة عرس أذكر خضابك
يبني يهون كلشي
لفكدك شاب رمشي
(يمه يمه)
_________________________
كل جرة نفس أسحبهه وأبشهكه
بعدك يلولد شاب أنا وين الكه
يبوطول لحلو لرمضاء إليتحركه
شجاك أتآخرت يايمه عل ملكه

و إمصابك ييمه التعباني
أرجع يلولي موكافي اتاني

أحوبي صرت وأمشي
لفكدك شاب رمشي
..............
كل شاب الأشوفه بيك اشبهنه
و اصيحه يمه يالأكبر وأندبنه
ابد إبروحتك ماكاطعه الضنه
ترد ليه و أرد حبك اجمعنه

و ترد ليه اليالي إلفاكدتها
جن روح أمشت وردت جسدها

فكدك بيه يفشي
لفكدك شاب رمشي
.............
الورده بلايا ماي تموت ماتبقه
وانته الماي الي ونداوة الرقه
تبدي النار دوم بمطرف الورقه
انا بطرف لكبر ولشيب اخذ حقه

آخذ حقه ييمه و كبراني
لحد مامن كثر نوحي عماني

بيه مابقه أي شي
لفكدك شاب رمشي
.............
تمنيتك تلم كبرتي يا للاكبر
عكازي تصير من امشي مااعثر
تلم طولي وتلم عضاي ليه تبر
ييمه وبيك باجر بلقيامه افخر

غيرك ماكو والي عندي يمه
وعطرك يلولد كلساع اشمه

نضري صاري يعشي
لفكدك شاب رمشي
............
احسبلك جنت يا يمه ايام
واضل اكعد يحيلي لمن تنام
اخاف من الهوه ياذيك ضرغام
هسه مو هوه تمر بيك الاسهام

ولسيوف ورماح تمر وسطها
ولجيوش وعساكر موت طبها

صحت لاحزاني دشي
لفكدك شاب رمشي
..........
يشامخ طول ياحلو المحاسن
الك ابكلبي حب ابكد مدائن
شيردك بعد يبن الميامن
تطبر ضهرك بكثرة مطاعن

تمنيت الدموع ترجع المات
جانشفت انا بعيني الصبيات

وياك يروح نعشي
لفكدك شاب رمشي
..........
لخادم الحسين (ع)
ذوالفقار جميل الخفاجي..