Оламнинг ахволи

Ногоҳ ўлдирилса бир дайди кучук,
Дод солур ҳар бийрон, ҳам тили чучук.
Ғазода жон берса минглаб гўдаклар,
"Жонкуярлар" билмам жим турар нечук...

@A_meshayan
Абдураҳмон Мешаян

​​​​ЁНИМДА БИРГИНА СЕН ҚОЛДИНГ РОББИМ!

Дадамни қумурсқа тўдаси еди,
Аямга айтмадим тортган азобим.
Дўст:"Дардинг тинглашга вақтим йўқ" деди,
Ёнимда биргина сен қолдинг Роббим!

Табибларку фақат қилар сабабин,
Ўзинг шифо бердинг қочганда тобим.
Ёр деди: Нолиблар бузма асабим,
Ёнимда биргина сен қолдинг Роббим!

Эшигини ёпди менга қариндош,
Қаро булутлардан қўрқиб офтобим-
Юзин кўрсатмади гоҳида қуёш,
Ёнимда биргина сен қолдинг Роббим!

Тупуриб кетарди юзимга борлиқ,
Асл юзим кўрса кирлашди қалбим.
Сен кечиравердинг, тавбам бор ортиқ,
Ёнимда биргина сен қолдинг Роббим!

Соқолим жиққа хўл, жойнамозим нам,
Уйинггача бордим излаб меҳробим.
Бутун дунё мендан юз ўгирган дам,
Ёнимда биргина сен қолдинг Роббим!

Қамалдим ажрашди суюкли дилдор,
Тўп кўрган минордек чиқди харобим.
Гоҳи йўқламади фарзандлар бир бор,
Ёнимда биргина сен қолдинг Роббим!

Қилганим йўқ мен ҳам Сенга ҳиёнат,
Зам-замга алмашиб тўкдим шаробим.
Айтай келганда ҳам бир кун қиёмат:
"Ёнимда биргина сен қолдинг Роббим!"

@A_meshayan
22:16-21.05.2023
Абдураҳмон Мешаян

​​​​​​ИШҚ САВДОСИ БОШГА ТУШДИ...

Қалб хис қилди Жалолингни,
Тегмасидан ўлим мушти.
Бир бор кўрмай Жамолингни,
Ишқ савдоси бошга тушди.

Чиқдим куфр қучоғидан,
Кечдим дўзах ўчоғидан.
Дил дарзмас ширк пичоғидан,
Ишқ савдоси бошга тушди.

Қалбга қургач фаросат ин,
Кема бўлиб мукаммал дин,
Деди: Нажот топ, менга мин,
Ишқ савдоси бошга тушди.

Кўз ёшларим селга дўниб,
Каломий фармонга кўниб.
Дил дарчамга иймон қўниб,
Ишқ савдоси бошга тушди.

Энди менга эмасдир ёт,
Гўзал Сарвари Коинот.
Дунёдаги энг Буюк Зот,
Ишқ савдоси бошга тушди.

Гох касал қалб хаволанди,
Сўнг зикринг-ла даволанди.
Каломинг-ла наволанди,
Ишқ савдоси бошга тушди.

Хавотирдир юрак қурғур,
Амалларим гуноҳ туғур.
Қалбдан мунофиқлик суғур,
Ишқ савдоси бошга тушди.

Ишқсиз қалби доғланмишам,
Хаста эдим соғланмишам.
Беш арконга боғланмишам,
Ишқ савдоси бошга тушди.

Жон берар дам менга авло,
Исминг айтиб ўлмоқ Мавло.
Ё султони Арши Аъло,
Ишқ савдоси бошга тушди.

Бу юракдан чиққан байтдир,
Ёлвораман қайси пайтдир.
Жон волидамга хам айттир:
Ишқ савдоси бошга тушди.

@A_meshayan
19.10.2019
Абдураҳмон Мешаян

#Ёруғ_ният

Қироличам қадрингни билай,
Ҳизматкорман ҳизматинг қилай.
Фарзанд бўлиб нима ҳам тилай?
Оқ сут берган эй азиз онам,
Сенга ҳаром бўлсин жаҳаннам!

Ҳаё бўлди сендаги зийнат,
Фирдавда билавер қиймат.
Қучоғингда топдим сакийнат,
Мен никоҳга олган эй санам,
Сенга харом бўлсин жаҳаннам!

Эй азонга тўлган қулоғим,
Эй Мусҳафни ўпган дудоғим.
Эй масжидга шошган оёғим,
Ўнг ва чап кўз эй ҳилватда нам,
Сенга харом бўлсин жаханнам!

Жаннатда жон берар андуҳим,
Менга бошқа нима ҳам муҳим?(муҳум)
Ҳеч қийналма дўзахда руҳим.
Қайта тирилгувчи эй танам,
Сенга харом бўлсин жаҳаннам!

@A_meshayan
21:53-19.05.2024
Абдураҳмон  Мешаян

Qibrayda yashovchi Maʼpura opaning jarrohlik amaliyotidan qolgan qarzlar toʻliq toʻlandi va bemorimiz uyga qaytdi.

Protez almashtirish davomida suyak sindirib olinib, keyingisi ham shu tarzda qoʻyilar ekan.

Ayni paytda Maʼpura opaning salomatligi tiklanishi uchun yaxshi muolaja qilinishi zarur.

Dorilar esa qimmat boʻlib, oilaning qoʻli kaltalik qilmoqda.

Saxovatli yurtdoshlarimizdan shu masalada koʻmak berishlarini soʻraymiz.

Plastik kartalar:
UzCard SQB: 8600030409795352 Ro‘zihojiyeva Maʼpura.
UzCard SQB: 5614681628662979 Ro‘zihojiyeva Feruza (qizi).

Telefon: +998955950605.

​​ЧИДАМСИЗЛИК.

("Йиғлаб ёзилган шеърлар туркум"идан)

Чидолмас ғурурли Озарбайжонлар,
Боласи душманга агар тиз чўкса.
Хам олади жонлар, хам тўкур қонлар,
Арманларни кимдир онадан сўкса.

Араблар бенамоз зотни хушламас,
Руслар лафзсизлардан тезда узоқлар.
Гуржилар номарднинг қўлин ушламас,
Элдан ажралганни суймас қозоқлар.

Гарчи ихтирога устадир япон,
Гарчи мода бирла хамнафас фаранг.
Чидолмас ўз миллат вакили нодон,
Ўз халқига қарши ишлатса найранг.

Чидолмай хорликка бирор бир туркман,
Даъюс саломинга олмайди алик.
Кўмагин бермайди ўғли бўлса хам,
Юрт сирин сотганга америкалик.

Шеърни дилдан ёздим, ёзмадим тўқиб,
Биларманку ёлғон халолмаслигин.
Балки айт деюрсиз, шеъримни ўқиб,
Ўзбеклар нимага чидолмаслигин.

Ўзбеклар чидамли, чидамли жуда,
Бошларига селдек ёғганда хам ғам.
Чидарлар дод демай худа бехуда,
Қўли калталиг-у йўқчиликка хам.

Чидар барча миллат вакили янглиғ,
Волидаси кетса жаннат боғига.
Ғаним урганда хам қоқ кўксига тиғ,
Дош берур хаттоки фарзанд доғига.

Ўзбеклар чидайди керак бўлса гар,
Уч ўғлининг бевақт ўлганлигига.
Фақат чидолмайди чимилдиқ кўрмай,
Ўз қизининг жувон бўлганлигига...

Тилдан қолар она бу хол юз берса,
Падарининг айлар юраги хуруж.
Эртасига тонгда бу уйдан чиққан,
Иккита тобутга улус бўлар дуч.

Шу боис номусни асранг сингиллар,
Она қалбин дардга тўлдирмангизлар.
Чин ўзбек бўлсангиз номуссиз бўлиб,
Отангизни бевақт ўлдирмангизлар!

2015

​​"ҚАЧОН ОДАМ БЎЛАМИЗ?!

Ашхобод" богида осмондан ёгилиши керак бўлган 20000дона ўйинчоқни 15000сўмдан хисоблаганимизда 300 000 000 сўм пул бўлар экан.

Худди шу маблағ Жигар трансплантациясига мухтож бўлиб турган огир бемор қизчага етмаяпди. Отаси чорасизликдан қўнгироқ қилаверади. Биз чорасизликдан сабр қилинг деяверамиз.
Охири жавоб ҳам бермай қўйдим.
Чунки нима дейишни ҳам билмайман.
Рамазон ойида бахоли қудрат йигиб берган фитр, закотлар урпоқ ҳам бўлмади.
Саратоннинг яна бир асири кўз ўнгимизда ўляпди.

Кимлардир миллиардларни сарфлаб еру , кўкдаги барча юлдузларини чорлаб тўкин тўйлар қилади.

Кимлардир олди -орқасига қарамай қайта-қайта умра қилиб мақтанаб юраверади.

Кимлардир Сенатда ўтириб донаси 70000сўмлик сомсалар ейди.

Кимлардир ривожланган давлатлар юбораётган хайрияларни қуритишади.

Кимлардир газу, нефтимизни, олтину, уранимизни сотиб етти пуштига етарли хазина йигишади.

Кимлардир ўзини кўрсатиб пиар учун осмондан текин ўйинчоқ ёғдиради, музқаймоқ тарқатади.

Кимлардир тўқ болаларини иномаркасига ўткизиб, ўша текин ўйинчоқ ва музқаймоққа ошиқади .

Кимлардир эса...

Кундан-кун сўлиб бораётган жигарпорасининг тепасида унсиз йиғлайди.

Охирги узуги, охирги сиргаси....энг охирида эса уйини сотиб, кейин боласини ҳам кўмади.

Кеча Юнусободдаги "Марварид" ресторани олдида учта маст барзанги шар сотиб турган беш ёшли болага зуғум қилишган.
Мажбурликдан чиқдим. Онам касал. Адам йўқ" деган нолаларига қарамай, "Болаликдан олиб сотарликни ўрганма тирранча" деб, билагига ёпишиб, силтаб, уришишган.
Ёндиргич билан шарларни ипини куйдириб учириб юборишган.

Болажон йиғлаб-йиғлаб уйига кетган. Уч махлуқ ҳам "финдиперс" машинасига ўтириб қаёққадир ғойиб бўлишган.

Энг ачинарлиси - ўша воқеага гувоҳ бўлган бирорта катта одам орага тушиб етим болани ҳимоя қилмаган. Вахоланки учта зўравонни пийпалаб ташлайдиган, ғажиб ташлайдиган оламон бор эди ресторанда. Қорин ғами ўлсин-а! Нафс ғами ўлсин!

Воқеага гувоҳ бўлиб, лекин қўлидан ҳеч нима келмаган қизим катталар дунёсидан нафратланиб, уйга келгунча йиғлаб келган.
-У фақат шар сотяпди холос амаки. Урманг! Илтимос урманглар!...-деганча Эрталабгача босинқираб чиқди.

Биз киммиз?
Қандай халқмиз?!
Нега бунчалик бешафқат, нега бунчалик тубанмиз?!
Қачон ўзгарамиз?
Қачон бир бутун миллат бўламиз?
Қачон ОДАМ бўламиз?!
Қачон?!

Муаззам Иброҳимова

Mahalliychilik

​​МАҲАЛЛИЙЧИЛИК.

Ўзбекдир Андижон, Марғилонлик хам,
Ўзбекдир Самарқанд ва Сурхонлик хам.
Ўзбекдир Хоразм, Намонгонлик хам,
Бир бирингнинг гўштинг чайнама ўзбек.

Сенинг бошинг келиб рус силамайди,
Ёҳуд эл-улусинг ҳинд сийламайди.
Улар ўз юртин дер сени демайди,
Хасад қозонинда қайнама ўзбек.

Бир бирингни қирсанг юртинг босиб ёв,
Масжидларинг бузиб қурай дер черков.
Бундан Хақ асрасин! Гар есанг палов,
Бўлишган халқсан сен айнама ўзбек.

Боланг насронийга айлангай агар,
Ёт тилда сўзлашга шайлангай агар.
Ўзбеклар бўлмаса қон-қардош жигар,
Кўнглингни нафратга бойлама ўзбек.

Пойтахтлик хам одам, вилоятлик хам,
Инкор қилганларнинг бари муттаҳам!!!
Қондошларинг кўзин айламагин нам,
Бир бирингни хўрлаб яйрама ўзбек.

Менга деган эди, бир ўзбек бир дам:
"Тошкентликдир-отам, Жиззахлик-онам.
Хар турфа жойдандир қондошларим хам"
Шундай экан, қалбинг қийнама ўзбек.

Самарқанддан бўлса Мирзо Улуғбек,
Бобур Андижондан, сақламангиз кек,
Ўн икки вилоят хаммаси ўзбек
Бир биринг беҳуда қайрама ўзбек.

Аслида барчангнинг номинг биттадир,
Сир ва Амударё жоминг биттадир,
Султонинг биттадир, қонинг биттадир,
Мен бўлакчаман деб сайрама ўзбек.

Битта дарёдаги, турфа ирмоқсан,
Битта муштумдаги, хар хил бармоқсан.
Лек илдизинг битта, тушунсангчи сан,
Бирлашсанг хар кунинг байрам-а ўзбек?

Юртингда ғайридин, ўзга миллатлар,
Яйраюр миқ этиб отмайсан гаплар.
Миллатдошларингдан излаб иллатлар,
Яшагунча, рости индама ўзбек.

Боболар қабрида ётсин десанг тинч,
Онангнинг кўзида кўрай деб севинч.
Болангнинг кўнглидан кетсин деб ўкинч,
Бир бирингни қўлла хайдама ўзбек!

@A_meshayan
2010-йил
Абдурроҳман Мешаян

#ВАТАНИМГА_ҚАЙТАМАН.

Хато қилгач момом ва бобом,
Ватанидан қилинган қувғин.
Шундан бери дил яро мудом,
Шундан бери чехралар сўлғин.

Мусофирда мангу қолмайман,
Қачонлардир тугар бу сафар.
Лек Ватанга қайта олмайман,
Қучар бўлса лаъинлар зафар.

Мусофирнинг чўчийдигани,
Дашном, туҳмат, миннат ва таъна.
Ўзим сўраб олмасам бўлди
Жаханнамдек жирканч бошпана.

Мусофирман, хаёт машаққат,
Мен сабрли бўлмоғим керак.
Бир кун қайтгум Ватанга фақат...
Қайтиш учун ўлмоғим керак...

Музлагунча томирда қоним.
Мен Аллоҳга хамдлар айтаман.
Саломат бўл, шунда иймоним,
Ватанимга бир кун қайтаман!

У Ватанда Кавсар кўли бор,
Кўл бўйида кутар пок Набий!
У Ватаннинг номидир жаннат,
Ватанимга қайтар ё Раббий!

@A_meshayan
21:09-26.11.2017
Абдураҳмон  Мешаян

БЕВА АЁЛГА

Энди номинг бева, унвонинг бева,
Энди она тилинг дард номли шева.
Ёринг дарахт эди, бир этак мева-
Бола билан қолган чўрисан аёл.

Халол касб ортидан топсанг хамки нон,
Хушторинг бор дея айлашар бўҳтон.
Есаю емаса мудом оғзи қон-
Бўрисан,
Бўрисан,
Бўрисан аёл.

Гарчи кўнглинг оппоқ қошларинг қаро,
Туҳматлар зарбидан қалбингдир яро.
Худойим яратган инсонлар аро,
Мунчалар манглайи шўрисан аёл?

Иккинг бир қоринга к,андай сиғишган?
Ёрин қизғонади миш-миш йиғишган-
Хатто сендан гумон синглинг туғишган,
Гўё бахт ўмарган ўғрисан аёл.

Эркакларга дерлар: Йўлингда бола,
Сенинг эса мудом кўнглингда бола.
Ёнингда,
Қорнингда,
Қўлингда
Бола,
Худо билса бўлди, тўғрисан аёл.

Мени айтди дерсан, олиб ёнига,
Ўғлинг ўсгач элтар юртлар хонига.
Макка муштоқ сендек "Ҳожи Она"га
Шунда дей онанинг зўрисан аёл.

@A_meshayan
17:12-28.05.2015
Абдурроҳман Мешаян

​​#Хуш #кайфият

Анча олдин “Бева аёлга” деган шеъримни ўқиб тармоққа жойлагандим. Шеърни бир гуруҳда хам тарқатишибди. Энг қизиғи “Бу шеърнинг муаллифи ким” деб берилган саволга “Бир бева аёл ёзган, исмини ошкор қилмаслигимизни сўрашди” деб жавоб қайтаришган. Роса кулганман... Нимаям дердим бева билан бўйдоқнинг нима фарқи бор деб яхши гумон қилганманда...😃