اسم الروايه:
حبيتڪ غصبا عني وبمرور الوقت.

المقدمه: باللهجه الصنعانيه وتتحدث على فراق اشخاص احبو بعضهم ووقفه الاخ مع اختة والروايه واقعيه وحصلت في اليمن. والروايه قصيره.

التعريف بالشخصيات:

1⃣عائله ايمن: ايمن الولد الاكبر: عمره 25سنه كمل الجامعه درس هندسه معماريه طويل وجسمه لايق على طوله.
ابرار البنت الصغيره: عمرها 18 خلصت الثانويه تشتي تدخل جامعه بس قالت ترتاح شويه قبل ما تدخل متوسطه الطول عيونها عسليات وشعرها بني على اشقر وطويل لعند خصرها وناعم عندها غمازه باليمين فمها صغير.
الاب مات والام بعد موت زوجها معد تخرج كثيير.
2⃣عائله طه: طه الولد الاكبر عمره24سنه محاسب في شركه كبيره طويل.الولد الاصغر عماد: عمره22سنه طويل يدرس صيدله سنه رابعه.
3⃣عائله هدى: هدى البنت الكبيره متوسطه الطول عيونها رماديه على قاتي عمرها 21تدرس جرافكس شعرها لوسط ظهرها اسود ناعم .اختها امل البنت الصغيره: عمرها اخصائيه تغذيه متوسطه الطول شعرها قصير واسود عيونها سود فرفوشه.

الروِايــــه⇓

1⃣البارت الاول:
ابرار: ايمن هيا نخرج انا وانت انا ضاابحة نشم هواء وناكل سكريم ونروح. ايمن: ما انتي عادش تشتي تمشيه وسكريم. الام: حرام يا ايمن لا تزعلها معد تقلك هكذا الا بعد ما قامت من المرض. ايمن: ضروري يماة. ابرار خلاص يماه عد اتواصل انا وامل وهدى ونخرج. ايمن: يماه الاوضاع مشي سوا بيشلوا البنات. الام: والله انه صدق. ابرار: لاحول ولا قوه الا بالله ودخلت غرفتها. حس ايمن انها زاعله سار يدق لها الغرفه ودخل وهي فوق السرير ماسكه التلفون شل عليها التلفون من يدها وطرحه فوق الكمدنيوم وقال لها: ابراري انتي الاخت الغاليه وانتي امي الثانيه هيا مه وكل شي، لاتزعلي مني. ابرار: مع معد ازعل منك انا داريه ان معك عمل خلاص ليوم ثاني. ايمن: خلاص قومي ألبسي نقوم نخرج نتلوي ونتغداء انتي ما تغديتي سوء. ونتمشي وناكل سكريم وكله وامشيش اليوم كله انا كم معي ابرار. قومي.ابرار: مع سير معك عمل سير خزن. ايمن: عادنا جيت من عند دكتور الاسنان معد اخزنش اليوم قومي بس قلت اخرج انا وطه بس عد اتصله نلغي الخرجه. وحبها وقامت لبست البالطو ابرار مشي مبرقعه وخرجت وهو بدل الاداه حقه وحاكوا امهم ووصلوها بيت خالهم ونسي ما يحاكي طه. ساروا تغدوا بمطعم ريماس بلازا. ايمن: اين تشتي نسير: ابرار: اي مكان لاني ضيقه. ايمن: خلاص نطلع عصر نجلس ونشيش خورت الشيشه. ابرار: يلا تمام ههههههه. وطلعوا عصر. طه بيتصل لايمن وايمن ما بيردش. ابرار: ابرار من بيتصلك. ايمن ابردي لش. ابرار: امانه سير اذا معك شي مهم. هو طه على اساس اني اخرج انا وهوه ومعد حاكيته اني عد اخرج معش وليش اسير الله المستعان. ابرار: خلاص رد عليه عيب مايسبرش ما ترد. ايمن: السلام وعليكم: طه: وعليكم السلام وين انت بين اتصلك وانت ما تردش. سار على جنب: ابرار قالت تشتي تخرج تاعبه خرجتها ونسيت ما اتصلك. طه: وين انت ذلحينه. ايمن: انا في عصر. طه: خلاص انا قريب منك عد اجي احاكيك واخطى لي. ايمن: سابر. رجع لعند ابرار. ابرار: مايشتي. ايمن: يحاكيني بموضوع. الله يستر. وطلبوا شيشه وجااس ايمن يشيش وابرار تعمل مصه مصه. وصل طه لعندهم لانه قد قال له ايمن وينهم. وابرار بتمص وهو جاء وابرار ابسرته ومن الفجيعه اشترغت. كان ايمن يضرب بظهرها وطه يحمل يدي ماء المهم قد كانت عتمووت. ابرار: كله سببك ياطه وانا ما عملت. ابرار: انا ما بين اشيش مدري ما طلعلي مسخني ايمن وانت جيت ومن الفجيعه اشتي اخرج الدخان دخلته مدخل. طه: ههههههه.، ايمن اشتيك ضروري كلمتين على جنب لو سمحت. ايمن: ابشر وقاام ساروا على جنب طه: عتقول انه موضوع تافه. ايمن: تحاكى. طه: انا قد جمعت زلط واشتريت في بيت بوس ارضيه اشتي تصمم لي بيت حالي مثل الفله واحسن. ايمن: ابشر من عيوني عتفرح خالتي وخالي. طه: ماشي عد اخطب واتزوج لفيها مش لامي ولابي. ايمن: خير.
🔸ملاحضة:
طه عاصي لابوه وامه دايما يرفع صوتهم عليهم.

2⃣البارت الثاني:
طه: خلاص خاطرك. ايمن: اجلس شويه واخطى لك. طه: ماشي عادنا عد اسير عند البنشري سيارتي هاناك. ايمن: عد اوصلك. طه: تمام يلا. ورجعوا الاثنين لعند ابرار. ابرار ضبحت ان طه عيجلس بدل ما يخطى. طه: جلس يتبسر لعند ابرار.
🔸ملاحضه: ابرار وعماد اخو طه يحبو بعض من يوم ما كانوا صغار.
ابرار: ايمن يلا. ايمن: يلا. طه: شويه. ايمن: قوم قوم. وصلوا طه وخطيوا ساروا يتمشو وياكلو سكريم. ابرار: ما يشتي منك طه. ايمن: اشتري ارضيه ويشتي اصمم له بيت لانه عيخرج من بيتهم وعيتزوج لوسطها ما خالي وخالتي معد يديهم ولا يعيشهم وسطها. ابرار: ايمن اساسا طه عاصي والديه يرفع صوته على امه وابوه لو تبسر كيف بيفعلهم. ايمن: ابردي لش منه. ورجعو روحوا البيت.وامهم ممسيه في بيت اخوها الذي هو ابو عماد وطه. ويوم ثاني ساروا بيت الخال عزمهم وعلى سب يروحوا امهم .
ابرار بدلت وتعطرت لانها عتسير عند عماد وعماد عرف انها بتجي قام وتشيك.
وهاااتلك يااابي هااات.😂😂
المهم تغدوا وكل واحد يبسر الثاني وطه انتبه ان عماد يحب ابرار وطه يكره عماد بالاصل.كملوا تغدوا سارت ابرار تغسول ومرت خالها تحلف وابرار تحلف وام ابرارتقول:خليها تغسول هي مثل بنتش.خلاص ابرار بتغسول ابسرها عماد وهي تغسول دخل المطبخ بيتعذر يشتي يشرب ماء .ابرار شافته استحت. عماد: ابرار: في ببالش واحده حاليه اشتي اتزوج.ابرار مستحيه. عماد ضحك: ابرار انتي لي وبس وانتي حبي الاول والاخير. وطه جالس يتسمعهم وقلبه بيفحر. ابرار بتدعي الغباء: مافهمت. عماد: اشتيش يا ابرار تكوني شريكه حيااتي وام اولادي اشتيش على سنه الله ورسوله. ابرار استحت. وطه بيسمع. طه في نفسه: والله يا عماد لابكيك دم لاهو دموووع. ومشي وجلست ابرار تتحاكى هي وعماد على الجامعه وما تشتي تدخل ابرار من تخصص...... ابرار: ايوه ذكرت يا عماد وحاكت عماد بالذي حصل امس. طه سار لعند ايمن وقله: ايمن اشتي البيت بشهر يتخطط ويبتنائ مع الديكور وكله. ايمن: تمام لا تستعجل قد بدات ارسمه عد باقي شويه. عماد: معقوله يفعلها. ابرار: ايووه خلاص انا عد اسير عند امي اوبه تتحاكى ولا يدري طه. عماد: تمام.

3⃣البارت الثالث:
مرت الايام بيت طه ابتنئ في ثلاثه اشهر والفله حقه تجنن. بيفكر يخطب ابرار عناداً لعماد اخوه وينتقم منه اما ام ابرار وعماد سوت حادث بالسياره وماتت ايمن مقهورر وابرار دخلت العنايه جلست اسبوعين لان ابوها مات وهي صغيره وامهم كانت ماسكه دور الام والاب. وايمن عندها فاقت ابرار من العنايه وبتداعي امها وتبكي دخل لعندها ايمن وبيهديها. ابرار: ايمن امي ماتت وبكت. ايمن: ابراري ربي يرحمها خلاص انا امش.وضحك ههههههه. ابرار: بطل هبااله يا ايمن وبكيت وحضنها وعماد كان عندهم ومقهور على ابرار انها مقهوووره خرجت ابرار من العنايه وجلست بالمستشفى فتره وخرجوا من المستشفى ودخلت البيت ودخلت على غرفتها على طول ودخلت تبكككيي بقووه. عماد: ايمن جو عندنا انت وابرار هذه الفتره لان ابرار منهااره على عمتي ومعد عتقدر تفعل شي لا تطبخ ولا تكنس ولا شي البيت بيتكم. ايمن: مع اشتي اجلس جنبها تعال يا عماد انت اوقف معانا اسبوعين بالكثير. عماد: من عيووني. ايمن: تسلم عيونك بس ما رايك اشل ابرار معي معي سفره فيها شغل . عماد: ايوه شلها تغير جو لان نفسيتها من بعد موت عمتي منهاااره.
عماد زاعل ان ابرار عد تسافر وفارح لانها يمكن تخرج من حاله الاكتئاب.
مرت الايام وابرار بتتحسن عن ما كانت ايمن كلم ابرار ان معه سفره لالمانيا وانه عيشلها معه
ساروا يعاملو للسفر
ايمن: ابراري. ابرار مطننه. ايمن: ابرار. وهي ما بتسمع. ايمن: يا حاليه انا بين احاكيش. ابرار: ماهو. ايمن: مالش. ابرار ذكرت امي ولا بي شي. ايمن: قبل ما نسافر عنسير غدوه بيت خالي نجس عندهم يومين ثلاثه ايام وبيت عمي يومين ثلاثه ايام ولما نروح من عندهم نخرج السوق ونرجع ننطلق. ابرار تنهدت: تمام. وجهزت ملابسها لغدوه.
في الصبح رفعت البيت وعملت الصبوح ومشيوا بيت خالهم فتح لهم طه طه: حيا بكم. تسالم هو وايمن. طه: كيف انتي يا ابرار. ابرار: الحمدلله ودخلوا
🔸ملاحضه: بيت خالهم صغير بس حالي وانيق ثلاث غرف ومجلس كبير وحمامين ومطبخ وصاله كبيره.
ام طه: حيا حيا ابرار الله يحييش يا خاله دخلت ابرار للمجلس . عماد قال لايمن ابرار تدخل غرفته وعماد يجلس بالمجلس وايمن يجس بغرفه طه. ايمن: خلاص تمام تدخل غرفتك وانا نجس انا وانت بالمجلس. طه: ايمن عماد يجس بغرفته وانتي يا ابرار اجلسي بغرفتي وانا عد اجس انا وايمن. ابرار: مع تسلم يا طه عد اجس بغرفه عماد. طه: ليش غرفتي اكبر من غرفته. ابرار: يعجبني انا الغرف الصغار عد اجس بغرفته ودخلت ملابسها وخطت المطبخ تساعد خالتها والشباب وابو طه بالمجلس وطه قلبه بيفحر ليش ما رضت ابرار تجس بغرفته. جلست يومين ببيت خالها غيرت جو وبنفس الوقت تودعهم. ولما هي ماشيه عد تسير بيتهم العشي والصبح تسير بيت عمها.
🔸ملاحضه: ام طه وام هدى خواات.
طه: مسرع يا ابرار. ابرار: خلاص قد طولنا عليكم. طه: مقد ابسرناش سوا ابرار: مش ضروري تبسرني وعماد ابسر ابرار وابتسم وروحوا البيت وثاني يوم ساروا بيت عمهم اما ايمن كان يروح البيت ابرار استمتعت ببيت عمها كثيرر لان في بنات جلست عندهم اربعه ايام وكانوا يخرجين.هدى:ابرار والله لنفقدش.ابرار:مش اكثر مني.وسلمت عليهن ومشت البيت.

Ala a taraq. بقلم

4⃣البارت الرابع:
وصلت العشي عملت ل ايمن العشاء وتعشوا ونامووو وفي اليوم الثاني. ايمن: ابراري جي نخرج السوق نشتري لنا اشياء لان سفرنا بعد يومين. ابرار: يلا تمام. خرجوا واشتروا ملابس ابرار اشترت جواكت قصيره وبوالط قصيره حااليات وبنطلونات وطرح و............
وايمن اشتري له بنطلونات وشمزان وفنايل وشيلان و..........
طه فكر انه يخطب ابرار قبل ما يسافىوا انتقام لعمااد وايمن عيوافق وعد يضغط عليه.وعماد جالس يفكر ب ابرار كيف عد تسافر ومعد يبسرها. طه اتصل لايمن وهم بالسوق.طه:الو.ايمن:الو حيا طه كيف حالك طه:الحمدلله اشتيك اليوم ضروري وينك.ايمن:ماهو لاتقلقنيش.طه:ههه لا مقد تقلقش ولا شي عتفرح.بس وينك اجي عندك.ايمن:انا بالسوق تشتيني جي للبيت العشي.طه:خلاص تمام الساعه 9وانا عندك.ايمن:خلاص تمام
روحوا ايمن وابرار.ايمن:ابرار جهزي العشاء عيجي طه يشتي يحاكيني.ابرار: تمام.وسارت تجهز العشاء وطه جاء ودخلت لهم العشاء وخرجت.طه:ابرار اجسي تعشي معانا.ابرار:مع مشتيش عد اتعشي داخل.طه:اجلسي.ابرار:قلت لك معد اجلسش افهم.ودخلت تتعشاء داخل وايمن وطه بيتعشوا.طه:احم احم اشتي احاكيك.ايمن:ماهوو.طه:ريع سار ادي شنطه.
🔸ملاحضه:طه يشتي يخطب بالسر ويعقد حنااك لعماد وقد سار اشتري اشياء الخطوبه كلها.
ايمن:ما هو هذا.طه:ايمن صلي على النبي اشتي ابرار على سنه الله ورسوله ايمن فكر قبل ما تستعجل فكر قبل ما تساافر.ايمن:طه انت ابن ناس ورجال وكله بس عد استشير ابرار مشتيش اظلمها.طه:معد تظلمه انا ابن خالها بس انت الذي تقرر مش هيه. ايمن:انا موافق عليك ياطه بس ضروري عد احاكيها غدوه الصبح واردلك خبر وبعد غدوه جي اخطب ولا العشي لان بعد غدوه عنسافر.اذا وافقت واذا مشي موافقه نصيب.طه:ايمن الصدق انت زعلتني انا ما ناقصني قلي هاااه ما ناقصني معي بيت معي سياره معي شهاده معي وظيفه.ايمن:افههم انا موافق بس استشيرها.طه:ابرار معد تقول لا اذا وافقت.ايمن:خير خير لصبح مشي طه وايمن فكر بالموضوع.وقال في نفسه.طه رجال وبيت وسياره وكله اما طبعه ابرار عد تغيرره اكيد بس ازيد استشيرها.
في الصبح قامت ابرار تبدا ترفع البيت قبل السفر.ايمن:ما بتفعلي يا ابرار.ابرار:بين اقشع قبل ما نخطى.ايمن:اجلسي احاكيش.ابرار: خير.ايمن:ههههه جو لش خطااب.ابرار:مش وقته هذا المجبر.ايمن مسك ابرار باكتافها:ابرار طه تقدم لش وانا وافقت.ابرار:ماهوو وبكت.ايمن:مالش.ابرار:مشتيش طه يا ايمن لانه انسان حقود ومغرور مشتييش.ايمن:صح انه عاصي والديه بس مشو حقود ولا مغرور وحبها براسها هذا لمصلحتش والله معد تلاقي رجال مثله.ابرار بتبكي:براحتك بس عتتحمل بذمتي.ايمن:مقتنعه لانه جاي موت وشتيش اظلمش.ابرار:ابسر الصح وافعله.وحملت لغرفتها تبكي.خرج ايمن يدي غداء من خارج لان ابرار بترفع البيت.وابرار بتصلي وتبكي وتدعي:يااارب ان كان فيه الخير خليه وان كان فيه الشر ابعده عني وهي تبكيي وتذكر عماد.جاء ايمن وتغداء وابرار مارضت تتغداء لانها حانقه.

Ala a tar.بقلم

5⃣البارت الخامس:
بعد العصر طه جاء لعند ايمن خطبوا وهم مخزنين. ابرار اتصلت لعماد وهي تبكي. ابرار: عماد يا عماد اخططلت يا عماد وتبكي بقهر. عماد ماااهو ما قلتي على من. ابرار: على انسان حقود وهو يكرهك وما يطيقكش لو هو يحبك هو عارف بحبي انا وانت. عماد: من هوو. ابرار: بتبكي طه وغلقت السماعه. عماد فوق السيار بيصيح طه يفعل هكذاا وسار لبيت ايمن وكان يدق الباب بقووه. ايمن: يلا يلا لحظه. فتح الباب وانه عماد. ايمن: مالك. عماد: وينه طه ودخل هو وايمن. طه: خيرر. وابرار خرجت من غرفتها وهي تبكي. طه مسك عماد من اكتافه وهزه: مالك غاارق. عماد: يا قليل المعروف انت داري اني احب ابرار واني اجنن عليها تقوم تخطبها يا قليل المعروف يا حقوود. طه: انا حر انا اخوك الكبير. عمار: وامي وابي داريين. اكيد لا. وعماد وطه تضاربوا وابرار وايمن بيفرعوا ابرار شلت عماد لغرفتها. وابرارتبكي. عماد: مسك يدها وقلها ابراري انا متفهم خلاص لا تبكيش. ابرار: عماد والله اني احبك يا عماد والله عماد: ابراري وانا متفهم وانا اجنن واموت عليش وحبها براسها وخرج وهو غاثي خرج من البيت وهو في طريقه عيسير البيت.
سوى خادث كبيرر وهو بالمستشفى في العنايه. اتصل المستشفى لابرار. ابرار: الو. المستشفى: عائله عماد. ابرار افتجعت: ايوه. المستشفى: بس اقول لكم عماد سوء كادث كبير وهو بين الحياه والموت. ابرار لبست البالطوا وخرجت وهي بتبكي لعند ايمن. ابرار: ايمن عماد سوى حادث هو بين الحيااه والمووت. ايمن: ماهوو قاموا عيسيروا عند عماد. طه: ليش عد تسيري. ابرار: مش شغلك. طه: البسي برقع. ابرار: خلي لي حالي. وخرجت للسياره وهي بتبكي عليه وايمن بيهديها. وابو عماد وامه دريوا وكلهم عند عماد وابرار بتبكي وتقري قران. طه جاء مسك ابرار: اهدائي يا ابرار لو افعل هكذا عد تدعي لي مثل عماد. ابرار بعدت من طه: لا طبعا عماد اخ وحبيب وحبه صادق وحبيته من داخل قلبي اما انت لا تحلم لاني مغصوبه عليك يا شاطر. خرج الدكتور: عماد حالته خطيره بس بيداعي اسم ابرار وين ابرار. ابرار: انا. الدكتور: ادخلي لعنده. طه: ما بش دخله. ابرار: ما عليك. ودخلت لبست ملابس معقمه وسارت لعنده وهو يداعي. ابرار ابرار. ابرار: عماد انا ابرار. عماد: ابرار لا تفلتي لامي وابي وحسني من اخي طه لاني حاسه ان ساعتي قربت وابرار ماسكه يده وهي تبكي: ماشي يا عماد ماشي. عماد: ابراري انا اموت فيش كنت اتمنى اني اكون زوجش بس القدر فرقنا طه رجال وعيريحش بس حسني من طبعه شويه. ابرار: تبكي. وعماد: ابرار انتبهي على نفسش ولا تنسيني من الفاتحه والدعاء وغمض عيونه. وابرار تهزه: عماد عماد والجهاز وقف. وابرار صاحت صوت سمعوها الذي خارج.: لااااااااااااااااااا عمااااااااااااااااااااااااااد يا عماااااااااااااااااااااااااااااااااااد الدكتور دخل وايمن دخل وهي بتبكي وهي بتهزه. الاب: ما به. ايمن خضضن خاله وقال: عظم الله اجرك يا خال. الام دوخت وابرار ما رضت تخرج من عند عماد.وهي بتبكي

Ala a taraq. بقلم

6⃣البارت السادس:
ايمن اجل السفر وابرار تبكي وتهزه وتقول عماد لا تخطى عليا يا عماد وتبكي امي مشيت وقلت ربي عيسخر لي وذلحين انت يا عماد والدكاتره يخرجوا ابرار وهي تصيح وتبكي وخرجت وهي ب تدهوف طه وتصيح وتقوا: كله سببك يا كلب كله سببك يا حيوااان وهو يبسرها وهي تضربه. وايمن يهديها. ابرار دوخت ايمن افتجع. ابرار ابرار قومي. وبيداعي طه يا طه تعال يا طه غير عليا جاء طه وابرار في الارض. وايمن وطه يقوموها ودخلوها غرفه والممرضات يقومنها ويدين لها المغذيات والابر. ابرار فاقت. وبتداعي عماد عماد. وايمن سار يشتري العلاجات. طه: ابرار فجعتينا عليش. ابرار كله سببك يا كلب. وايمن جاء: ابراري هيا مه شدي نفسش اوقفي مع خالتي حرام
🔸ملاحضه: هدى بنت خالت عماد تحب عماد بس كانت عارفه ان عماد يحب ابرار ومشي شايله اي حقد على بنت عمها.
وهدى كانت تبكي. روحوا البيت النسوان لانه كان عشي وابرار روحت لبيت خالها دخلت غرفت عماد وبتبكي بالصووت وخرجت ملابسه وبتبكي وتشمهن وتقول الله لا سامحتك يا طه كله سببك.وفي اليوم الثاني ادوا جثه عماد على سب الناس يبسروه وابرار في يدها المغذيات والابر وابسرت عماد وصاحت عماااااااااد لا تفلتني يا عماد عماد يا عماد لا تفلللللللتني وتصيح وهدى تبكي طبيعي. شلوا جثه عماد وابرار تصييح وهي منهااره وتصيح عمااااااد عمااد وجلست طول العزاء عندهم وهي مريضه وتقوم على سب خالتها وبتوبه عليها. ابو طه وقعت فيه جلطه وامه منهاره وقع فيها القلب دخلت قبل ما تمشي غرفه عماد شلت اشياء من حقه وودعت خالتها وايمن اتصل لابرار لانه موعدهم حق السفر ودعتهم ومشت وايمن طه بالسياره ركبت السياره وهي بتبكي. طه: ابرار خلاص عماد الله يرحمه. ابرار: والله انك ما تستحي عماد مات بسببك . ايمن: ابرار هذا الذي تحاكيه عيكون زوجش. ابرار: زوجي المنتقم. وامك وابوك داريين انك خطبت يا شاطر. طه: انا عد احاكيهم . ابرار لو تدري خالتي معد تسامحك ايمن بصيااح خلااص يا ابرار عيب. ابرار: عاد الصيااح عليا.

Ala a taraq. بقلم

7⃣البارت السابع:
جاء طه على سب يودعهم ويوصلهم للمطار وجاء الصبح وعقدوا . وقدهم بيتجهزوا ابرار كانت لابسه بالطوو قصيره لتحت ركبتها ومحجبه خرجت شناطها ودخلت تدي تلفونها. ايمن هياا يا ابرار. ابرار: يلا يلا خرجت من الغرفه غلقت الابواب والطيقان وقديه خارجه.. طه ابسر ابرار ما اعجبه اللبس وقال: ابرار ادخلي غيري اللبس. ابرار ابسرت نفسها: ماله اللبس. طه: قصير. ابرار: ما عليك اخي راضي لي خلاص. طه: وانا زوجش مشتيش تلبسي هكذا. ايمن: ابرار ادخلي غيري البالطوا. ابرار: والله ما اغيره مشتيش. طه: مالها عنيده. ايمن: مدري ابرار مشي هكذا وركبوا السياره وسايرين المطار
وصلوا المطار بيعاملوا قدهم عد يركبوا الطياره و طه سلم على ايمن وجاء يشتي يسلم على ابرار وجهه وابرار مدت يدها. طه: ابرار انا زوجش. ابرار: براحتك تشتي تسلم يد ماشي مابش داعي. طه: مابش داعي. ابرار احسن. ايمن: ابرار عيب. ابرار: يلا نمشي ومشيوا وطه رجع لبيته مش لبيتهم.
ابرار وايمن فوق الطايره. ايمن: ابرار: ليش كنتي تبكي وتصيحي على عماد قلتي ليش فلتني يا عماد مدري ايش. ابرار: انا احبه من داخل قلبي ومن طفولتي. وصلوا المانيا
استاجروا شقه كبيره ومفروشه مرت سنتين وابرار درست علم نفس وقد كملت سنتين من الجامعه. ابو طه مات وجلست الام شهرين وماتت بعد زوجها
ايمن وابرار رجعوا اليمن
طه باع البيت ورجع يعيش ببيته و ابرار اول ما وصلت اليمن سارت المقبره وقريت ل طه الفاتحه وخطت وساروا بيتهم بنات العم اول ما عرفين انا ابرار باليمن سارين يبسرنها وايمن وطه مخزنيين بالمجلس. طه: ايمن تزوج. ايمن: قد انا مفكر هكذا عد اخلي ابرار تبسر لي. طه: ايمن اشتي احاكيك من سب ابرار. ايمن: تكلم. طه: اشتي اتزوج خلاص تعبت. ايمن: يا طه خلي ابوك وامك يوفوو السنه. طه: تعبت غداء من خارج اكل من خارج حتى البيت بين ارفعه ما بين احس ان نظيف. ايمن: مقد لهم الا سبعه اشهر اتقي ربك طه: حاكي ابرار وانا عد ادي المهر ويلا. ايمن: احاكيك يا طه ابرار ما تشتي الا الذي براسها هي قالت عادي تتزوج هانا بس انها تعيش بالمانيا. طه: وعملي وبيتي لمن بالله عليك. ايمن: سد انت وياها مالي دخل منكم.

Ala a taraq. بقلم

8⃣البارت الثامن:
في اليوم الثاني بالعصر جاء طه وادا مهر ابرار وجلسوا يخزنوا هو وايمن. طه: عاد حاكيت ابرار. ايمن: ما عليا مشتيش اغثيها اتعشا عندنا وحاكيها انت. طه: تمام سابر. وكملوا تخزينتهم وايمن قال لابرار ان طه عد يتعشا عندهم. عملت عشاء وايمن دخله لهم وتعشوا طه: ايمن لا تبرقطنيش حاكيتها. ايمن: انت تفهم مع ما حاكيتها قلت لك مشتيش اغثيها. طه: خلاص انا عد اجي غدوه واحاكيها المانيا مابش المانيا تفهم. ايمن: اقنعها اذا ما رضيت قالت جلسه وهي الاوله. طه: مابش مع اختك عقل امانه. ايمن: طه انت راكن ان ابرار وافقت عليك لا انا غصبتها وانا داري لمصلحتها لاتزيد بها وارجع اتندم عليك. طه: اسف اسف وخطى له. ايمن: ابرار جي ما احاكيش. ابرار: مابش احد. ايمن: مابش احد جي. دخلت ابرار شلت الصحون حق العشاء وجلست جنب اخوها. ايمن: صلي على النبي هذا المهر اديه طه وقال وظيفته وبيته هانا المانيا مش ساير. ابرار: هو حر قد قلت لك جلسه وانا الاوله. ايمن: سدي انتي وهو غدوه عيجي وتتفاهموا ذلحين يا ابرار مثلا انتي عتتزوجي ونفترض سافرنا المانيا من عيكنس لي من عيطبخ يعني. ابرار: انا من غيري. ايمن: لا انا قصدي انتي عد تخرجي شقه لحالش وانا وحدي قلت اقرر اني اتزوج. ابرار: تصدق والله اني فكرت. ايمن: دوري لي على واحده اهم شي مؤدبه. ابرار: انا فكرت نزوجك بنت عمك هدى البنت قمر الصدق ومؤدبه وكله. ايمن: قد انتي اخبر.
في الصبح الساعه 10جاء طه وفتح له طه الباب. طه: وين ابرار. ايمن: في نخرتي وين عد تسير، ادخل ادخل. طه: خرجها من نخرتك. ايمن: اعقل يا طه وين عتكون. ودخله للمجلس وداعى ابرار. ابرار دخلت المجلس: ما هو يا ايمن وابسرت طه: خير ما قد به. طه: اهدئي اهدئي مالش عد تقومي تضاربي. ابرار: الله يشفيك يا مريض قول امين. طه: قلي ايمن حاكاني بالذي قلتي بس سفر وعيشه بالمانيا لا. ابرار: ودراستي . طه: كمليها هانا. ابرار: ماشي وانا معي شروط. طه: ماهن. ابرار. شوف ابي قال ابرار معد تتبرقعش خلوها تعيش حياتها. اكمل دراستي. انك تدي لي حقوقي وما تدخل فيني. طه: انا موافق. برار: والشرط الاخير اني اعييش بالمانيا. طه: هذي مش موافق عليها طه: سفري انا وايمن بعد شهرين دور لك وظيفه انت عد تلقي بسرعه لانك محاسب. ودخلت ورجعت: صح اشتي اسألك عاد حاكيت مره عمي انك خطبت وعقدت.اما عمي قد حاكيته وقلت له لايتكلمش الا لما تتكلم. ابرار: يعني انت مخبي علئ سب يقولو بالسر خطب وتزوج اليوم تحاكيها واشتي تتصلي وتقلي مبرووووك قلهم اليوم خطبت وعقدت ولا اقلك قول اول ما رجعنا. طه: مش وقت. ابرار: طه اليوم فاهم. ودخلت. طه: الله يعينني عليها. ايمن: هههههههههه من يشتي الحالي صبر ابرار تشتي الذي براسها.

Ala a taraq. بقلم

9⃣البارت التاسع:
طه سار حاكى خالته وخالته باركت له وخالته والبنات اتصلين لابرار وباركين لها وابرار قالت..لهن ان عرسها قرب على سب يخرجين السوق جمعه يتكسين وابرار تتكسئ للعرس.
ايمن:ابراري امسكي.ابرار:ماهو هذا.ايمن:هذا مهرش وغدوه الصبح عد اسير اسحب من البنك من الحساب زلط اوفي لش ابرار بكت تذكرت عماد.ايمن سار خطب هدى وابرار بدات تخرج تتكسئ لما يحدد طه.طه رضى يسافر المانيا اذا اعجبه الوضع عيجلس ما اعجبه عد يرجع وحدد عرسه بعد اسبوعين ابرار كل ما يضيق الوقت كل ما تبكي لانها مغصوبه ورضت على سب ايمن وتذكر عماد.خرجت تتكسئ وجلست تتحجب بالبيت لا وقت العرس وعملت عرس بسيط حالي وضوت عند طه وايمن زفها وعمها زفها وهي تبكي وتذكر عماد استقبلها طه وقري عليها الفاتحه ايمن وعمها مشوا.طه:احم احم نورتي بيتش يا حاليه.وابرار بتبكي وتذكر عماد.طه:مال الحالي بيبكي.وابرار ما بد تجاوبش.قرب طه لعنده.ابرار:ابعد من جنبي.طه قرب وهي بتبكي.طه:ذكرتي عماد صح.ابرار:ايوه.طه:متفهم لش بس والله يا ابرار اني احبش.عدي اليوم.وفي اليوم الثاني الصبح جاء ايمن والعم وسلموا على طه وابرار ومشوا وابرار وطه خرجوا المطعم يتغدوا ورجعوا البيت.ابرار بدلت وتمكيجت وجلست هي وطه بس كان طه يحاكيها وهي ما تشتي تسمع حتى صوته.ايمن عقد.في يوم الثالث
🔸ملاحظه:اهل صنعاء يوم الثالث يجو العرسان عند اهل البنت يتغدوا ويجسوا لبعد المغرب ويخطىو لهم .
لها سارت وتغدت في بيتهم وخالاتها جين ومره عمها جت جلست هذالك اليوم للمغرب.وجاء لها طه وهي بتلبس البالطوا وهي بتبكي.مشيت .وصلت البيت غيرت الاداه ولبست بنطلون وفنيليه وجلست فوق الكنب في الصاله فاتحه التلفزيون.دخل طه ابسرها.وقال:مساء الخير. ابرار:مساء النور. طه:قومي البسي نخطى المطعم ونرجع نخطى نتمشى. ابرار:مالي نفس اخرج اليوم. طه:ابرار مش حالي العناد. ابرار:على ما اعتقد ان انا قد حاكيتك. طه:انا قلت تقومي. ابرار: وانا قلت معد اقومش.طه:هزر ابرار هزره من يدها لما ادربت واوجعت يدها قوي وادربت لفوق الماسه حق الصاله لما خرج دم وهي تبكي بس ما تبين سارت لبست وقديه تبكي والقطع حق يدها كان قوي ساروا مطعم.طه:ما تشتي من عشاء. ابرار:وهي بتبكي ولا شي.طه:هيا مه للمه البكاء وابسر الدم لان بالطة ابرار كانت لونها رمادي.طه:ابرار في يدش دم. ابرار ابسرت وقالت:ليش،بين ابكي من اول. هذا كله بسببك وبسسب هزرتك لما نكعت للارض يا حقود وبكت. شلها المستشفى واتصلت لايمن. ايمن جاء وقد عالج ابرار ولسقوا لها.ابرار ابسرت ايمن وحضنته وبكت .ايمن:ابراري هيا مه مالش.ابرار:حكت لايمن ايش الذي حصل.ايمن:خير خير.طه سار اشتري العلاجات ورجع. ابسر ايمن وقده قالب صورته.طه:يا نسب مالك اليوم.ايمن:عد اخطى انا وابرار لبيتنا وانت الحقنا.طه:ليش.ايمن:الحقنا وبس.

Ala a taraq. بقلم.

🔟البارت العاشر:
وصلت ابرار بيتهم. وقالت: اشتي اتطلق يا ايمن هذا كله بسببك انت انت قلت لي طه رجال هذا الرجال صح. ايمن: اهدئي وما يوقع الا خبر يعجبش. ابرار: يعجبني هو عيجي ويرجعني. ايمن: ادخلي الغرفه. ابرار: الله يلعني ليش تزوجت طه وجلست تبكي يا عماد وينك سرت وفلت لي انا محتاجه لك ياعماااد لوشي اني انا وانت مفتهنين ما به هذا الجغره. ايمن: اهدئي قلنا اما عماد الله يرحمه. دق الباب سار فتح ايمن وانه طه. دخلوا للديوان. طه: ايمن وين ابرار نخطى لنا. ايمن: ليش هزرت ابرار لما خرج الدم ورفع صوته هياا مه انت قلت عد شلها بعيونك اينهن عيونك هولاء قلي قلي. طه: ابرار تبالغ. ايمن اين مبالغه هذا شي واضح ما هو نكعت من نفسها وزرت نفسها بنفسها صح. طه: اعترف اني هزرتها من يدها بس اشتي اعرف من وين جاء الدم. ابرار دخلت وقالت: انت هزرتني ولا حصل فيني شي صح وانا دخلت شليت السكين وذبحت يدي صح ولا لما هزرتني ادربت لفوق الماسه الذي في الصاله هيا مه. و طه ساكت. ايمن: ااااخ يا طه اخ. طه: خلاص انا اسف يا ابرار. ايمن: انت راكن ان ابرار عد تسامحك احلم. ابرار دخلت. طه: ابرار هيا نخطى. ايمن: معد تمشي ابرار امشي انت. طه: ليش عاد احنا عرسان. ايمن: حاكي نفسك تمام. طه مشي
طه في نفسه "كيف افعل كيف اردها" وسار لعند خالته وزوج خالته الذي هي ام هدى وحكى لهم كل شي واعترف انه غلط. ابو هدى: تمام عد نساعدك بس انت غلطان. طه: ايوه انا غلطت ايوه. ام هدى: يلا ادخل البس ونسير عند ايمن. ومشوا ساروا بيت ايمن. ام هدى: اجلس انت يا طه بالسياره لما نتصل بك. طه: تمام يا خاله ياا منعاه ردولي ابرار. ابو هدى: ولا يهمك. دقوا الباب.ايمن: ايواااه ايووااه. فتح ايمن وابسر انه مرت عمه وعمه وقال: حيا بكم ادخلو. وايمن مستغرب مداهم هذي الساع. دخلهم الديوان. ايمن: خير يا عم به شي هدى امل به شي تحاكوا. ابو هدى: ههههه سعليك يا ابني لا تفتجعش. ايمن: خير. ام هدى: يا ابني ابرار وطه عادهم عرسان. ايمن: ولوا عرسان الانسان يتحاكى بهدوء مش يضربها. ابو هدى: ايمن خلاص لا تكررت لاوقف انا معاها عادهم عرسان. ايمن: اسألوا ابرار. دعوا ابرار وحاكوها. ابرار: لا يعني لا. مرت عمه: يا ابرار الرجال مايشتوا معانده. ابرار: مايفعلش هكذا. مره عمها: عادكم عرسان مقد لكم الاثلاثه ايام خزاء لما يعرفوا الناس خلاص ادخلي البسي اخطي مع زوجش. ابرار: ماهو. عمها: ايوه يلا اخطي مع زوجش. ابرار: زيدوا اسال ايمن. مرت عمها: ايمن قال رايش. ايمن: خلاص يا ابرار اخطي مع زوجش بس والله والله لو يزيد. اتصلوا ل طه وطه جاء وفتحوا له. ايمن: والله يا طه لو تتكرر محد عد يشلني من فوقك انا بين اقول لك والله وانا قلت لابرار هو رجال ماناش داري انك عتوصل هكذا. طه حب راس ابرار وحب راس ايمن واعتذر لهم وشل ابرار ومشيوا والعم ومرته وصلهم ايمن. العم: ايمن انت رجااال وما زوجتك بنتي الا وانا داري ما معي. ايمن: تسلم يا عم الله يحفظك.
وصلوا للبيت ابرار تاعبه وصلت غيرت الاداه حقها ولبست بجامتها. طه دخل الغرفه. طه: معقوله يا ابرار تشتكي بي. ابرار: ايوه تهزرني وانا اسكت لا لا. طه: ابرار انا احبش انا اعشقش انا اموت فيش حسي فيني ولا تعاندي. ابرار: طه غير من نفسك شويه طه انت انسان معقد وحقود غير من نفسك شويه خليك رجال، ليش كنت احب عماد لانه انسان عارف الحياه صح حتى لو في معانده لانه رجال قلت لك غير نفسك شويه واوعدك اني اساعدك. الفكره دارت بين راس طه وقال في نفسه"عد اغير من نفسي على سب ابرار "

Ala a taraq. بقلم.

اتمنى لكم قراءه ممتعه 🙂

البارت الحادي عشر: 1⃣1⃣

مرت الايام ايمن كلم عمه وادى له المهر حق هدى.
ويد ابرار تحسنت.
وطه بدا يغير من نفسه شويه. وقرب موعد سفرهم طه بدا يعامل له على سب يسافر المانيا. العرس تحدد وابرار سارت بيتهم ترفعه وغيروا غرفه ايمن وفرشوها وبدا عرس هدى وسارت ابرار العرس وروحت هدى عند ايمن وعدي اليوم وفي يوم الصباح جاء ابوها واخوالها يسلموا عليها في اليوم الثاني ابرار روحت عند طه وايمن وهدى سافروا عدن قالوا شهر العسل. ابرار بتفعل الغداء جاء طه من العمل. وتغدوا. ابرار بحزن: ليش ما سرنا شهر العسل. طه: مدري
ابرار بدات تحب طه شويه وتتاقلم معه.
سفرهم بعد اسبوع اجتمعوا العائله كامل وودعوهم. في اليوم الثاني قدهم بالطريق لالمانيا. طه وابرار جنب بعض وايمن وهدى جنب بعض وهدى وايمن بيضحكوا مفتهنين وابرار وطه مع لان ابرار بتكره طه بدات شويه تحبه. طه: ابراري ابسري ايمن وهدى بيضحكوا ومفتهنين. ابرار: ما نفعل لهم الله يهنيهم. طه: هيا نفعل مثلهم. ابرار تبسرهم ونفسها تفعل مثلهم بس كبريائها ما يسمح لها. وصلوا المانيا جاء لهم سواق ايمن وشلهم الشقه حق ايمن ايمن وهدى دخلوا غرفتهم اما طه وابرار دخلوا غرفه ابرار.. وهي بتخلس البالطوا ابسرت عنكبوت كبيره وعلى دخله طه صاحت وتشتي تخرج واصطدمت ب طه. طه: مالش. ابرار: عنكبوت كبيره. طه دخل دور مالقيش. ابرار: ماهو اظاهر انها تحت الدولاب انا خايفه لا تخرج بالعشي وتطلع فوقي. طه: هههههههههه خلاص ولا يوقع شي ما دام انا موجود. ابرار: ابتسمت. رقد طه وابرار بتنعس بس خايفه لا يطلع فوقها العنكبوت والعنكبوت خرج من تحت الدولاب وابرار حضنت طه وقالت خرج خرج ومغمضه عيونها. طه: ابسر ابرار وقال لها: مالش. ابرار انتبهت انها بحضن طه فكت له وقالت العنكبوت خرج. طه: وينه وجلسوا طول الليل وهم يلاحقوا العنكبوت لما قتله طه وابرار قد هي مفتجعه. طه: ابراري. ابرار: هااه. طه: من حقي انش تقولي لي حبيبي عمري حبي انا تغيرت يا ابرار احضنيني ما بين احسش اني تزوجت حسي فيني عامليني كزوج لش اعتبريني عماد انا تغيرت يا ابرار. ابرار ساكته. طه: تصبحي على خير ورقد. ابرار جلست تفكر بكلام طه وذكرت عماد لما قال لها اخي عيريحش بس انتي غيري من طباعه حست ب طه انه كل الذي بيفعله لاجلها وبس وهي مقد عملت شي لاجله.
في الصبح سار طه يدور له على وظيفه وبدا يشتغل وخلي صاحبه الذي في اليمن يبيع الفله ويرسل له الزلط يشتري في المانيا شقه. اما وظيفه طه كانت في شركه كبيره وكان طه المحاسب حق رئيس الشركه. ايمن قرر يخرج هو وهدى وطه وابرار رحله عائليه الى مدينه سياحيه خرجوا الاربعه مع بعض ساروا مكان سياحي حالي. هدى: ابرار ليش احسش ما تحبي طه. ابرار: ومن قلش اني ما احبه. هدى: من تصرفاتش لا تمسكي يده ولا تقولي له كلمات مثل حبيبي عمري قلبي احسش ما تهتمي بهذا الشي. طه كان بيسمع. ابرار: حبيبي طه انا وهو نقول هذي الكلمات في غرفتنا مش ضروري نوري الناس. هدى: بس سألت. ابرار قلبها اوجعها ليش هدى عرفت وحملت لعند طه وهو مقفي وابرار متوتره وما سكه يدها. وغمضت عيون طه. طه: ابرار. ابرار تضحك وهو ابسرها وضحك.. ابرار: اتحداك تلحقني. وجلست هي و طه يتلاحقوا مثل الجهال. ايمن: ما احلاها ابرار. هدى: صدق والله.
ابرار: خلاص تعبت يا طه. طه: هههههههههههههههه انا اوريش. ابرار: يا عمري انت. هههههههه. طه: ما قلتي. ابرار: يا عمري انت ما قلت. ومسك يدها ومشيوا لعند ايمن وهدى لانهم خلاص عيروحوا. ايمن: ابرار ممكن اكلمش كلمتين على جنب. ابرار: طيب. وساروا مكان محد يسمعهم. ايمن: تاقلمتي مع طه صح. ابرار: شويه. ايمن: ربي يوفقش خلاص غدوه ابدئي جامعه. ابرار ايوه ايوه
وضوو البيت وابرار بدات تجهز للجامعه. طه: ما بتفعلي. ابرار: بين اجهز للجامعه. طه: سابر قد خليت واحد يسير يبسر لنا شقه كبيره. ابرار: تمام. وفي اليوم الثاني ابرار بدات دوام بالجامعه وطه دور شقه في مدينه سياحيه والشقه كبيره وحاليه بس بعد شهرين عد تفضى وطه قال خلاص تمام مرت الايام ابرار اختبرت النصف الاول والشقه اشتراها طه وابرار وطه نقلوا لهاناك وابرار بدات تنظفها هي نظيفه بس احتياطاً جلست ثلاث ايام كملت النظاف وقد هي تاااعبه اسعفها طه قالوا فيها تحسس من التراب ضوت البيت وايمن وهدى جو ابسروها وخطيوا بعد فتره حدود 5اشهر ابرار بدات تحب طه وحست انه تغير وتذكر كلام عماد اخي عد يريحش بس غيري من طباعه.

Ala a taraq. بقلم.

البارت الثاني عشر: 2⃣1⃣


ابرار سارت هي وطه بيت ايمن زياره ودقت الباب ومسكت يد طه. طه ابسرها ليش ماسكه يده ومستغرب. فتحت هدى: حيا حيا ببنت عمي وبن خالتي ادخلو وابسرت ابرار ماسكه يد طه دخلوا الاثنين ايمن خرج من الحمام وابسرهم: حيا حيا بكم البيت نور. وجلسوا هذاك اليوم جمعه. طه: ايمن قد انا فاقد لليمن بشي. ايمن: وانا والكل. ابرار: القاات صح.هههههههههه. طه: اختك مشاءالله عليها تدري بكل شي. ايمن: ههههههههههههههههه. هدى: به اسواق هانا يبيعوا قات. ايمن: بس غالي نااار. طه: خلاص ارجع نجتمع واخزن لك يا نسب انا حتى لو هو غالي.. في العشي روحوا طه وابرار بيتهم.
في اليوم الثاني كان مع طه عطله وجالس يتفرج التلفزيون. ابرار جلست جنبه وقالت وهي مرتبكه.: قلبي. طه سمع واتعامس انه ما سمع. ابرار: يا حب. طه: عيون الحب. ابرار: ايش تشتي اطبخ لك اليوم. طه ابتسم: ولا شي. ابرار: خلاص اسبر اليوم زربيان بالدجاج من حق الزربيان الذي يعجبك ما رايك. طه: همممم اليوم عد نتغداء غداء حالي. ابرار: خلاص قوم سير اشتري المقاضي وانا اطبخ نتغداء بحينه نخرج انا وانت اليوم ضبحت من البيت. طه: طيب وسار ادى المقاضي ومن بين المقاضي دجاج. شلتهن ابرار وبتحس انها بتتغاثى فتحت ابسرت وانه دجاج شلتها وبتغسلها وغاثتها نفسها وسارت الحمام عزكم الله ترجع. طه: ابرار مالش. ابرار: مدري وسارت تطبخ الزربيان وعملت سلطه بالجبن والماينيز وقديه بتقرب الغداء قربت الزربيان ونفسها بتتغاثى. طه: شمهاا قبل طعمها تسلم الايادي. ابرار: اتغدي الان عد اجي وطه بياكل. ابرار قبل ما تاكل: طه بين احس من الصبح بغثيان وبين اسوم قدلي شهر بين احس بسومه. طه: لا تفتجعيش ولا شي جت تاكل ابرار وحملت للحمام عزكم الله ترجع مره ثانيه. طه افتجع شلها المستشفى. ابرار دخلت لعند الدكتوره والدكتوره قالت لابرار انها واحم قد لها شهر ونص وابرار خرجت وهي مقهوره لان عاد باقي لها شهر وتكمل الجامعه وحملها قالت الدكتوره انها تجس على ظهرها لان رحمها هابط والحمل مهدد للسقوط طه: ما قالوا لش. ابرار: للبيت ونتحاكى. في السياره. طه: ابرار مالش ما قالوا لش. ابرار بتبكي. طه: لا تجننينيش مالش. وصلوا للبيت. طه: ابرار انا بين اقلش من اول مالش قولي لي. ابرار بكت وقالت: اناحامل قد لي شهر ونص وعد باقي لي شهر واكمل الجامعه ورحمي هابط والحمل مهدد للسقوط ضروري اجلس على ظهري وما اتحرك زياده . طه: فرح انها حاامل وابرار بتبكي وتقول: انا عد انزله. طه: ابرار لا تحرميني من كلمه بابا. ابرار دخلت غرفتها تبكي وطه دخل بعدها وقل لها ابرار يلا نسير المستشفى. ابرار: ليش طه: ننزل الجاهل ومسح لها الدموع وقال لها اهم شي سعادتش. ابرار: انا ما بين ابكيش اني واحم انا بين ابكي على جامعتي وبين ابكي اني معد اتحركش زياده، اما كلمه بابا معد احرمك من هذي الكلمه طه: ابرار انا احبش. ابرار ابتسمت. اتصلت ابرار لايمن وايمن وهدى باركوا لها. مرت الايام وحب طه وابرار يكبر اكثر واكثر.
موعد ولاده ابرار سارت المستشفى وولدت وادت ولد. خرجت الممرضه لعند طه وقالت له: مبرووك معك ولد. طه فاارح. ابرار فاقت طه جنبها والولد بيده. ابرار: اسكه خليني ابسره. طه: يشبه عماد. ابسرته ابرار وبكت. طه: هيا مه مادام يشبه عماد اخي نسميه عماد ما رايش. ابرار: تمام وتذكرت عماد وبكت. هدى وايمن جو يبسروا ابرار
وهدى قد هي واحم وبعد فتره ولدت هدى وادت بنت سموها "جوري" وابن طه عماد بدا يكبر.
طه: ابراري انتي انتي اكثر شخص حبيته واكثر شخص عشقته انتي حياتي انتي عمري. ابرار: وانت حبيتك من داخل قلبي ولانك تغيرت زاد حبك بقلبي اكثر واكثر واوعدك اني اكون لك الزوجه المخلصه والصدق الصدق حبيتك غصباً عني وبمرور الوقت. مرت الايام امل تزوجت زميلها بالجامعه وسافرت دبي بعد فتره رجعت هدى وايمن اليمن وقد معاهم مي طبعاً وامل بعد ما تزوجت جابت ولد سموه كيان وهدى وامل اتفقين انهن يىجعين اليمن ويجتمعوا مع الاب والام جت امل وزوجها وابنها لليمن واجتمعوا العائله والاب والام ابسروا احفادهم.

النهااايه.........

Ala a taraq. بقلم.

وڪذا نڪون خلصنا الروايه صغيره وحلوه

#ملخــــــــــص الروايه
مانستبقش الاحداث مهما ڪان ولا نحڪم على شي في علم الغيب لم ياتي بعد قلوبنا مش ب ايدينا عشان نحڪم عليها لــ ماسيڪون مستقبلا احوالانا بتتغير في لحظه والامربيد الله مستقبلنا وحاضرنا بيد الله ڪل شي مقدر ومڪتوب من عنده سبحانه وتعالى فــــبدل مانعترض ع قدرنا ونصيبنا في هذه الحياه بالعڪس نوثق بلله ونإيقن بلله ان الخير جاي والنهايه سعيده وبعد الصبر نلقى مفتاح الفرج

#انتهت😍❤

آرائكــم محل اهتمـامنا .. وكل واحــد يــرسل تعليقـة على الروايــة ..

كل متابع يكتب رأي جميل للنهاية لهذا الرواية المميــزة

تعليقاتكم وأرآئكـم اكتبوها ع  تعليقات القناه 👇👇👇

روايــــــه جديده

مساء الخير كيفكم اخباركم
بدكم روايه مميزه جدا خيال وقت تقرأ تحس انك عايش وسط الاحداث طريقه التاليف مختلف جداً فيها الغومض الاثاره التشويق مميزه ككتبتها اكيد انها روايه للكاتبه المميزه دوما /تولين
نحن من عشاق رواياتها اذا حابين تقراؤ تفضلوا قناتها 🙂👇

https://www.tg-me.com/snhaniah