ملحمة بارض طفوف.    بشمس سوت كسوف
           ونزلو اثنين.     بامر الحسين

علي الاكبر وابو فاضل نزلو بطف كربله
وبينه زامط يبو اليمة اثينهم صاحوا اله
قسم ماواحد يجينه وسالم ايرد الهله
وكربله نطويها لاجلك وحك رب الزلزله
تكسرت روس وسيوف.
  الموت ضل بيهم يطوف
   وهدو  اثنين.     بامر الحسين


ا
حلف العباس بمه علي الاكبر من نزل
نطني فرصة وياك عمي يافحل يبن الفحل
ياهو امد سيفي اعلى راسه الگه راسه منعزل
وخاف ارد لحسين خالي ويمه يكتلني الخجل

عمي بس موته اشوف
مكطعه روس وجفوف
وشدو اثنين        بامر الحسين

وصاح عباس وغلاتك يبن اخوي اوهييتك
مانسيت وياي نازل واني  عازل حصتك
خلني ابرد اجلاي بيهم ورد افرح عمتك
ويبني من اكسر علمهم انت جول بصولتك

اني سكــــاي الحتوف
اكلوبهم اترسهه خوف
وهجمو اثنين.           بامر الحسين

ا
علي يبني الحومه اجتك مهر ملجمهه بعزم
واينعت روس العادي هد يكانوص الزلم
انت سبعي البيك ازامط هاك اخذ مني العلم
وكون يبني اسمع كزيز اعظامهم من تنثلم

راح اوكف وانت طوف
وكلب الصف عالصفوف
تصافو  اثنين.     بامر الحسين

گله عد عينك يعمي ومااثني احجايتك
اني سيفك يابو فاضل واني ضربت. يمنتك
فرصه من الله واجتني وراح اصول برايتك
وخسف اركان المعاره وحك طهر الجابتك
الخسف عدنه والكسوف
وترتعد منه الالوف
واحنه الاثنين.     بامر الحسين

خادم الزهراء ع ابو احمد الطائي

خيم اليل علينه بليلة العاشر سوا
انه وياك نسولف والكمر راعي اللوا
  هسه بحماكم  كرام مدللين

باجر عل لهزل أسرةمكيدين
سولفولي       
                    ::::::::::::
ليلة  العاشررهيبه ليلة اوداع الأخير
خويه انشدكم علمكم عل يصير ومايصير
سولفولي الكلب خلص وين تاليها المصير
خمسه بس اخواني بالطف قله لحسين النصير

تسعر الناربدليلي ياجرح ماله دوا
احجي خويه حسين احجي ضاك بنفاسي الهوا
بسرعه وياكم كظت ذيج السنين
                  ::::::::::
خلصت سنين العشتها وياكم وراح العمر
هاي ساعات الأخيرة وخايفه بطرت الفجر
خويه كلولي شأسوي كلب أبد مامستقر
يالعقيله حسين كلي صبري موسهل الأمر
باجر همومج ثكيله ونتي تحمي العايله
باجر بساعة رحيلي تبدي عندج كربله
باجر انتي العايله تتكفلين
                     ::::::::::
من يطر فجر المصيبه شلون زينب صايرة
تكصد الخيل ابحقدها عل مخيم غايرة
زينب اطلعين يختي من المصايب حايرة
ونتي بين الحرم واهلج صرتي بالطف دايرة
من يهجمون عليكم يعني اخوتج عل ثرة
ونتي عل نوك عكبنه بسبي يابت حيدرة
وروس اخوتج عل رماح معلكين
                 """"""""""""""""""""
وكلها ابوفاضل يزينب لجلج يهون العمر
زينب الحد المنيه انه احاميه الخدر
ولوطحت فوك الشريعه منج اترجه العذر
سامحيني لوأجيتي مكيدة بدرب اليسر
من تمرين غريبه وحايرة بظعن الحرم
ومن تسلمين عليه بيج أشم حرك الخيم
وأمرج الرب البرايه تسلمين
باجر عل لهزل أسرةمكيدين
                   ::::::::::::
كبل لايلفينه باجر بالسمعته اتلوعت
ليله مامرت مثلها بعالم الدنيه
اسمعت
باجر ايذبحون اخوها وكاعدة كباله الأخت
ريت قبل الي سمعته ياعزيز الله متت
تدري الوداع يموت للتودعه ومايرد
صعب الفراك عليه وباجر يموت الورد
باجر بيا حال اخوتي وانه وين
باجر عل لهزل أسرةمكيدين
                   ::::::::::
تمت بعون الله تعالى
خادم خدام العترة ع
علي داود المياحي
تاريخ انتها الكتابه 2024/5/22م

تحملون......تشيلون......تخلوني وحیده
وانا اشتاگ..والافراگ..گفل باب الاریده
هلي ياهلي             هلي ياهلي
             تخلوني وحيده


الدمـــع شــاله الجفن بيده شبه شيلة يتامه
وعلى اخدودي اثر خله درب يمشي وعلامه
السهرتي وليلي كل ساعه يطيحوني ابملامه
ابثـــگل همي عليكم روحي رفّة چن حمامه

على الروح.....تره النوح....بنه سور المأسي
والغروب......والادروب...يجرحنه احساسي
هلي ياهلي          هلي ياهلي
                 تخلوني وحيده


گـــصير اللیل ویاکم عـــمر شمعه يمرني
بس ابساعة الفرگه عـــلى اللوعه يجرني
مـــدري ابيا وكت دهري يفرحني يسرني
مل مني الصبر بويه خلص يمي وعذرني

انا ابهاي...على احشاي..تشب نیران فرگه
الگلب ذاب..بلا احباب..علیله وبیه حرگه
هلي ياهلي         هلي ياهلي
                 تخلوني وحيده


من بيكم حــده الحادي حدِت بيه المنايه
خذتني ابصفــنة احزاني وچفنتي ابعبايه
النجمه اتموت لو منها ضواها ايغيب رايه
وانتم شيله وحده اليـــوم خليتوا الثنايه

بالاهموم..والارسوم...شتل مشتوله روحي
العمر ضاع....بالاوداع....عباره گتلي نوحي
هلي ياهلي          هلي ياهلي
                تخلوني وحيده


رد اهلي وتعال ارجع نهر واروي ظمانه
يخيمتنه الچبیره البیك ملفانه وضرانه
على صدرك ننام ازغار من چنه وحمانه
چنـــت والليال بــردتها تغطينه ابغطانه


عجب راح....بالاتراح..تبّدل كلشي بالهم
ولا بال.....من الحال....صبر بالعین یلهم
هلي ياهلي         هلي ياهلي
                تخلوني وحيده


اتاني جيتـــك ابأگرب وكت تملي نظرتي
وانا اتمنـه اسمعنـــك تگلی اشگد صبرتي
تراها اعليك بس يعگوب يدركها حسرتي
صخر جلمــود ون اوياي مايحمل عبرتي

من اتعود....اشب عود...وازين الدور كلها
والثياب....على الغاب.....ابدل لك شكلها
هلي ياهلي           هلي ياهلي
                تخلوني وحيد


هادي الامغيطي البوغبيش

نزلة للعليلة عليها السلام

آه يفراگ الحبيب
------------
شلون سواها الزمان بهل وضع خلاني
انت حي وآنه يتيمه والمرض عاداني
فاگده لنعمة حنانك عايشه بأحزاني
يا حسين وأدري گلبك لحظه ما ينساني
شما ردت تبعد قريب
آه يفراگ الحبيب
---------------
شما ردت تبعد يبويه عايش انت بروحي
وشوفة منك يل حبيب تداوي كل جروحي
رحت عني وعمري ضاع وهوت كل صروحي
وسالت دموعي وتعالت الك صرخة نوحي
وصار يتعاله النحيب
آه يفراگ الحبيب
---------------
آه لفراگك يبويه اتعاله صوت ونيني
حالت الأيام بعينك يل حبيب وبيني
عگبك بيا حال حالي و إلمن مخلّيني
للحزن للنوح للهم راح اظل تدريني
وجرحي بعدك ما يطيب
آه يفراگ الحبيب
---------------
ما تطيب جروح گلبي وما تروح آلامي
يا شمس دنياي بعدك أظلمت أيامي
من عگب عيناك عيني والفت أحلامي
مره اشوفنّك وحيد ومره اشوفك ضامي
ومره اشوفنّك سليب
آه يفراگ الحبيب
--------------
خوفي يا مظلوم ترحل ما ترد لديارك
خوفي بل طف تبقه وحدك من عگب أنصارك
ما أريد اخبار لمن تنگطع أخبارك
من تشب نيران همك بيه تسعر نارك
بمهجتي يصير اللهيب
آه  يفراگ الحبيب
---------------
بيك أشعر وبجروحك من تجور ايامك
ويحترگ بيتي عليه ويه نار اخيامك
اويعتليني الخوف واتحيَّر مثل ايتامك
وانتحب وابچي اعلى زينب من تگف گدامك
او تصرخ ولا من مجيب
آه  يفراگ الحبيب
--------------
عقيل الكاظمي  /

كافي لاتاخذ هلي.....عوف ابوالحمله علي
    تلچم اجروحي وتعيد امصيبة امي
    همي خضّــر بالدليــــل اردود همي

                     كافي كافي


إلزم احـــدودك يمــــوت ابهيــــده وياي
موحجرحتى اسلم امـــن اسيوف دنياي
الجدي وامي الهسه بيه اجروح باحشاي
لاتــــزودهـن علــــيه ابجــــيتك هــــاي

           لاتــــمد ايــــدك دلم
           ولاتعــــيشني ابحلم

     من يمر طـــاريك ينشف بيه دمي
     همي خضّــــر بالدليل اردود همي

                    كافي كافي


فيــــة الوالد چبـــیره ومــــا یسدها
غيـــر راعيها اليســـدها وهوه گدها
شاط صبري امن النوايب لاحه مدها
العدها ابو بالبيت يعني كلشي عدها

         وانا اشــــوفنه الاجل
          يظــــعن ابخير العمل

    طش شملنه وماتنفعه اتعاب لمي
    همــي خضر بالدليل اردود همي

                  كافي كافي


لو يــــروح الـــشوفته بلسم کسرتي
چم جهنم تــــشتعل من جر حسرتي
لاياموت ابــــعد دخيلك عــن أسرتي
ولاتگلي ابهالحــــيات اشـگد صبرتي

         غير يبــــگالي صبر
         ماكو خاطــر ينجبر

اشلون اصدّگ سافر اليكشفلي غمي
همي خضّــــر بالــــدليل اردود همي

                كافي كافي


حيدر اسم الله اعلى راسه امن الاذيه
الصفّــــن الــــدنيه ابــوگفته الهاشميه
نايــــم وظلــــمت نــــجوم البالـــثريه
مايــــگوم ابنــــخوتي صــــعبه علــيه

         الصوتي المن ماسمع
         مايصد جـــفني دمع

     راية الله العــــاليه ملفــوفه يمي
     همي خضر بالــدليل اردود همي

                   كافي كافي


يوم شــــالوا حيــدره واتــــفارگینه
غمضت عيــــن السعاده وانــــتهینه
كل ليــــال الفاتن ايعــودن عــــلينه
لا مــــحال العشره ميردها بــــچینه


       مايعود امس المضى
       ومايــردلي المرتضى

بس عطــــر منه بگه وايلوح شمي
همي خــــضر بالدلـيل اردود همي

              كافي كافي


زينـب انــا البــــاچر افــــگد بالمعاره
خدري واخــواني وهلي وكل الغياره
آه ياحــــرگة خــــيامــي والاســــاره
يعني درب اطــويل عندي ابهـالعباره

        بس مصــــايب نازله
        وعيني دايـــم هامله

   باچر السوط ايتحامه صیب جسمي
   همي خــــضر بالـــدليل اردود همي

                كافي كافي

هادي الامغيطي البوغبيش

جدك محمد وامك البتول
بالطف يطحنن صدرك الخيول
ثارات عدهم وي علي     وي جدك الرسول
ـــــــــــــــــــــــــــــــــــــ
طاحن ادموعي بحضرتك زايرات
وصارن اكبالي العيون الذابلات
فدوه اروحن للشفاه اليابسات
امن الرعب شردن بناتك خايفات

طايح يلوج اعلى الثره الغريب
هذا الشمر يمك وصل قريب
فحطان كلبك والعطش     بعيونك الذبول
ثارات عدهم وي علي    وي جدك الرسول
ــــــــــــــــــــــــــــــ
جانو انصارك جيوش اوواكفين
صارو اكبالك مناحر طايحين
زحفو  ودارو  عليك  الناكثين
بالخيم ضلو اطفالك خايفين

فكيت عينك تنظر الخيام
زينب دمعها جاب الك سلام
حجي الدموع الشافتك    فوك الرمل يطول
ثارات عدهم وي علي   وي جدك الرسول
ــــــــــــــــــــــــــــــــــــ
شافو العباس طاح وطوقوك
من وگع يم الشريعه استفردوك
لا  علي الاكبر ولا جاسم اجوك
من صرت وحدك يابو الاكبر ولوك

كسرو كفاك ابطيحة الزنود
صوب المخيم زحفت الحشود
رادت الدنيا بطيحتك     ذاك الظهر تزول
ثارات عدهم وي علي   وي جدك الرسول
ــــــــــــــــــــــــــــــــــ
ما روه التاریخ عُشر البيك صار
وسولفتها اجروح دمعات الزغار
من نمت عالرمل جان الرمل حار
والعطش بهروش كلبك يجوي نار

عينك تصد اعلى الخيم تشوف
خيل وزلم واصطفت الصفوف
مذبوح والخيل بحقد    فوك الصدر تجول
ثارات عدهم وي علي   وي جدك الرسول
ــــــــــــــــــــــــــــــــ                        
والله ما صاير مصابك بالخيال
ما سمعنه ابمثل سالفتك محال
صار جسمك قطعة من دم ونبال
للسبي امجتفين اهلك بالحبال

من الطم  عليك ايلومني السفيه
هذا الكلب ما يدري جمره بيه
ما نحجي عن حال السبي    هذا الحجي يطول
ثارات عدهم وي علي     وي جدك الرسول
ــــــــــــــــــــــــــــــ
نعيم ابو باقر الساعدي

يا جرحي صایر بالسمه اهلال
جايب مصايب كلهن اثگال
يهلال محرم        يهلال محرم
ـــــــــــــــــــــــــــــــــــــــــــــــ
يا جرح يسگيك دمعي امن الطفولة وصاحبتني
تكبر بكل يوم اشوفك صاحبي وما فارگتني
علمتني اعلى النعاوي وبالمجالس رافگتني
اتولعت بيك وعشگتك يا خيالي الما عفتني
عمري اشحلاته اوياك لو طال
جايب مصايب كلهن اثگال
يهلال محرم        يهلال محرم
ـــــــــــــــــــــــــــــــــــــــــــــــ
یا شهر وياك عيني بالدمع كلش كريمه
كل سنة امن اتهل اشوفك تنبش اجروحي القديمة
يا محرم بيك فعلو  عالارض ابشع جريمة
فاطمة تنشر قميص احسين واتنادي الظليمة
ينزف دمع من عيني همال
جايب مصايب كلهن اثگال
يهلال محرم        يهلال محرم
ــــــــــــــــــــــــــــــــــــــــــــــ
يا محرم هذا جفني امن الحزن سواله رايه
وركضن ادموعي اعلى خدي بكثر ركضات السبايه
بلكت ادموعي التطيح ايبردن اگلوب الضمايه
يا هظيمه اشحال زينب  بيك يا شهر الرزايه
شافت بلاوي اتصدع الاجبال
جايب مصايب كلهن اثگال
يهلال محرم        يهلال محرم
ــــــــــــــــــــــــــــــــــــــــــــــ
بيك ضل حسين وحده ابغربته وما عنده ناصر
ابطيحت العباس كسرو ظهره ابو السجاد حاير
ينظر اعلى انصاره كلهم عالارض تنزف مناحر
بعد ساعة ايصير جسمه النبي تحت الحوافر
وتتكفل اخته بحرم واطفال
جايب مصايب كلهن اثگال
يهلال محرم        يهلال محرم
ــــــــــــــــــــــــــــــــــــــــــــــ
اعتقد هذا بقيني الما يحب حسين مُرتد
وانه احس تقصیر عندي لو شفت جمراتي تبرد
من يهل شهر الصايب گلبي يلبس ثوب الاسود
واللطم افضل عبادة الرايد ايواسي محمد
هذا الشهر بيه خير الاعمال
جايب مصايب كلهن اثگال
يهلال محرم        يهلال محرم
ـــــــــــــــــــــــــــــــــــــــــــــ
نعيم ابو باقر الساعدي

من يهل شهر المصايب
كمت ادور با المواكب
تحضر ابمجلس لطم
بلكي اشوفنك يغايب
ــــــــــــــــــــــــــ
للمجالس رايح وبدموعي اهدي
والجفن ضل يمطر اجروح على خدي
عيني عا اللطامه من ادخل يا مهدي
بلكي اشوفك تلطم و تصرخ يجدي
با اللطم عندك علامة
من تجي اتذب العمامة
تبجي حيلك منهدم
بلكي اشوفنك يا غايب
ــــــــــــــــــــــــــ
صاحن ادموعي التصب يا المهدي وينك
ادري ما استاهل اتباوعني عينك
عايش اويه الغربه  ما يخلص ونينك
عا المصايب سيدي الله يعينك
فدوه يا الروحك حنينة
سيدي عينك علينة
راضي لو حتى بحلم
بلكي اشوفنك يغايب
ـــــــــــــــــــــــــــ
لو لبست اجروحي و المجلس وصلته
كمت اراقب ياهو فوك الخد دمعته
ادري بيه المهدي تتميز لطمته
بحركة يلطم عا الظلع مسبيه عمته
لطمته وياها شهكه
وتنزل بدمعاته حركه
ابقى اعاين على الزلم
بلكي اشوفنك يغايب
ــــــــــــــــــــــــــ
حتى بجيك يختلف و الدمعه حمره
تبجي  دم يا المهدي عا المرضوض صدره
و ادري موكل مجلس انفاسك تحضره
يا بوصالح بس ردت ها الليلة نظره
بداعت الراحت سبيه
سيدي اتصدق عليه
مره لو عطرك اشم
بلكي اشوفنك يغايب
ــــــــــــــــــــــــــ
يلي خلصت العمر باالغربة وحدك
الدنيه كلهه تحولت مكلوبه ضدك
ياهو حاضر مجلس بها الليله عندك
يمكن الوحدك كمت تبجي على جدك
ياهو يقرالك مصيبه
و ينعى يزينب غريبه
تطلع بليلي نجم
بلكي اشوفنك يغايب
ــــــــــــــــــــــــــ
آنه ادري اذنوبي عنك اخرتني
اشكد اجرحك وانته ما ساعه عفتني
من جنت شيل اذنوب يالمهدي  و شفتني
ولو اتوب امن الذنب جا شرفتني
ما سكت بعدك ونيني
بلكي تسمعني وتجيني
اجروحي متطشره وشالم
بلكي اشوفنك يغايب
ــــــــــــــــــــــــ
يلي دومك مبتلي بيه انته  بلوه
من اروح الدمعتك سبعين فدوه
انه بيكم جلبت يالمهدي كوه
الدنيه من غيرك ولا فلسين تسوه
ابداعة المرضوض صدره
سائل ابابك انظره
عمر ي يمك ينختم
بلكي اشوفنك يغايب
ـــــــــــــــــــــــــــــــــ
اقبلني عبدك يلي مالكها  حياتي
وانه اكتب لك عهد يبقى لمماتي
يابو صالح والله ما اترك صلاتي
ومن تصد عيني المره اتذكر خواتي
واترك اصحاب المعاصي
وما اضل عد ربعي ناصي
وما اسب اهل العلم
بلكي اشوفنك يغايب
ـــــــــــــــــــــــــــــــ
نعيم ابو باقر الساعدي